Osẹ́n Sika Tọn—E Yọn-Na-Yizan
Dile etlẹ yindọ mẹsusu nọ pọ́n Osẹ́n Sika tọn hlan taidi nuplọnmẹ walọdagbe tọn de heyin didoai gbọn Jesu dali, ewọ lọsu dọmọ: “Nuplọnmẹ ṣie mayin ṣie gba, ṣigba mẹhe do mi hlan tọn wẹ.”—Johanu 7:16.
MỌWẸ, mẹhe yin Dowatọ nuhe Jesu plọnmẹ lẹ tọn, gọna nuhe wá yin yinyọnẹn taidi Osẹ́n Sika tọn lọ wẹ mẹhe do Jesu hlan, yèdọ Mẹdatọ, Jehovah Jiwheyẹwhe.
Lẹndai dowhenu Jiwheyẹwhe tọn wẹ yindọ gbẹtọvi lẹ ni yinuwa hẹ ode awetọ dile yé na jlo nado yin nuyiwa hẹ do. E ze apajlẹ he yọ́n hugan lọ dai to dagbemẹ-ninọ mẹdevo lẹ tọn hihopọn mẹ to aliho he mẹ e dá gbẹtọvi te: “Jiwheyẹwhe dá gbẹtọ to boṣiọ etọn titi mẹ, to boṣiọ Jiwheyẹwhe tọn mẹ wẹ e dá ẹ do: asu de asi de wẹ e dá yé.” (Gẹnẹsisi 1:27) Ehe zẹẹmẹdo dọ Jiwheyẹwhe gbọn owanyi dali na jẹhẹnu tangan etọn lẹ gbẹtọvi lẹ jẹ obá de mẹ na yé nido sọgan duvivi ogbẹ̀ tọn to jijọho, ayajẹ, po kọndopọ po mẹ—yin e yọnbasi kakadoi. Eyin yé plọn ayihadawhẹnamẹnu he Jiwheyẹwhe na yé lọ ganji, e na deanana yé nado yinuwa hẹ mẹdevo lẹ to aliho he mẹ yé na jlo nado yin nuyiwa hẹ te.
Ṣejannabi Yí Tẹnmẹ
To whenuena e yindọ gbẹtọvi tindo bẹjẹeji dagbe mọnkọtọn, etẹwẹ wá jọ? Nado dọ ẹ poun, ṣejannabi wá sọawuhia. Mẹsusu jẹakọ hẹ kandai Biblu tọn heyin nuhe asu po asi po tintan wà tọn, dile e yin kinkàndai to Gẹnẹsisi weta 3 mẹ do. Na Satani he jẹagọdo nujinọtedo dodo Jiwheyẹwhe tọn lẹpo dotuhomẹna yé wutu, Adam po Evi po gbọn ṣejannabi dali gbẹ́ gandudu Jiwheyẹwhe tọn dai bo de mẹdekannujẹ po nudide mẹdetiti tọn po. E mayin nuhẹnbu susugege kẹdẹ mẹ wẹ nuyiwa ṣejannabi po atẹṣiṣi po tọn yetọn dekọtọn do gba ṣigba do nugbajẹmẹji ylankan lẹ mẹ na kúnkan sọgodo tọn yetọn lẹ. Enẹ yin dohia he họnwun kọdetọn ylankan kọgbigbẹ́ nuplọnmẹ he wá yin yinyọnẹn taidi Osẹ́n Sika tọn go tọn. Enẹwutu, “le ylando gbọn omẹ dopo dè biọ aihọn mẹ, podọ okú gbọn ylando dali; mọwẹ gbẹtọ lẹpo kú do, na omẹ popo wẹ waylan wutu.”—Lomunu lẹ 5:12.
Dile etlẹ yindọ gbẹtọvi lẹpo to pọmẹ gbẹkọ aliho owanyinọ Jehovah Jiwheyẹwhe tọn lẹ go, ewọ ma gbẹ́ yé dai gba. Di apajlẹ, Jehovah na Osẹ́n etọn akọta Islaeli tọn nado deanana yé. E plọn yé nado nọ yinuwa hẹ mẹdevo lẹ dile yelọsu na jlo nado yin nuyiwa hẹ do. Osẹ́n lọ na anademẹ do lehe yé na yinuwa hẹ afanumẹ lẹ, tọṣiọvi lẹ, po asuṣiọsi lẹ po do. E dọhodo lehe yé na yinuwa hẹ mẹgbeyinyan, mẹfinfin, po ajojijẹ po do ji. Osẹ́n wiwejininọ tọn lẹ do mẹtọnhopọn hia na agbasalilo mẹdevo lẹ tọn. Osẹ́n lẹ tlẹ sọ tin do whẹho zanhẹmẹ tọn lẹ ji. Jehovah basi bladopọ Osẹ́n etọn lẹ tọn gbọn didọna omẹ etọn lẹ dali dọmọ: “Hiẹ na yiwanna kọmẹnu towe di dewe,” yèdọ hodidọ de he Jesu sọ vọ́ dọ to godo mẹ. (Levitiku 19:18; Matiu 22:39, 40) Osẹ́n lọ sọ bẹ gbedide lẹ hẹn do lehe jonọ he tin to Islaelivi lẹ ṣẹnṣẹn na nọ yin nuyiwa hẹ gbọn ji. Osẹ́n lọ degbè dọmọ: “Hiẹ ma na miannukunna jonọ de: na mìwlẹ yọ́n ayiha jonọ de tọn lọ, mimọ mìwlẹ ko yin jonọ to aigba Egipti tọn ji.” To hogbe devo lẹ mẹ, Islaelivi lẹ dona tindo awuvẹmẹ homẹdagbe tọn na wamọnọ lẹ.—Eksọdusi 23:9; Levitiku 19:34; Deutelonomi 10:19.
Dile e dẹnsọ bọ Islaeli to hihodo Osẹ́n lọ lẹ po nugbonọ-yinyin po, wẹ Jehovah to didona akọta lọ. To gandudu Davidi po Sọlọmọni tọn po glọ, akọta lọ lẹzun adọkunnọ bọ gbẹtọ lẹ sọ to ayajẹ bosọ tindo pekọ. Kandai whenuho tọn de dọna mí dọmọ: “Jude po Islaeli po yin susu, di tọkẹ́n he tin to huto to gege mẹ, bo to dùdù bo nùnù bo to aglinjẹ basi. Juda po Islaeli po sọ yí jijọho do to ninọ, omẹ dopodopo to vẹntin etọn glọ, podọ to votin etọn glọ.”—1 Ahọlu lẹ 4:20, 25.
E blawu dọ, jijọho po hihọ́ he akọta lọ tindo po ma dẹn-to-aimẹ gba. Dile etlẹ yindọ yé tindo Osẹ́n Jiwheyẹwhe tọn, Islaelivi lẹ ma setonuna ẹn gba; yé dike ṣejannabi ni slokọna mẹdevo lẹ tọn hihopọn yetọn. Ehe, to pọmẹ hẹ atẹṣiṣi, dekọtọn do awusinyẹn mẹ na dopodopo yetọn podọ to pọmẹ taidi akọta de. To godo mẹ, to owhe 607 J.W.M., Jehovah dike Babilọninu lẹ ni và gandudu Juda tọn, tòdaho Jelusalẹm tọn, podọ etlẹ yin tẹmpli daho he tin to finẹ sudo. Etẹwutu? “Na mìwlẹ ma ko se ohó ṣie wutu, doayi e go, yẹn na domẹhlan bosọ yí whédo agewaji tọn lẹpo, wẹ OKLUNỌ dọ, yẹn nasọ do devi ṣie lẹ hlan Nẹbukadnẹzali ahọlu Babilọni tọn, bo na hẹn yé wá pehẹ aigba he, podọ hẹ tòmẹnu etọn lẹ, podọ hẹ akọta nẹlẹ lẹdo; yẹn nasọ jo yé pete, bo hẹn yé zun awujinu de, po nudepiṣlọna de po, po ovọ́jẹ lẹ po tẹgbẹtẹgbẹ.” (Jẹlemia 25:8, 9) Ahọ́ nankọ die he na yin súsú na sinsẹ̀n-bibasi wiwe ṣeke Jehovah tọn gbigbẹdai!
Apajlẹ de Nado Hodo
To alọ devo mẹ, e mayin dọ Jesu Klisti plọnmẹ Osẹ́n Sika tọn kẹdẹ wẹ gba ṣigba ze apajlẹ he yọnhugan lọ dai to hihodo e mẹ. Dagbemẹ-ninọ mẹdevo lẹ tọn duahunmẹna ẹn taun. (Matiu 9:36; 14:14; Luku 5:12, 13) To ojlẹ de mẹ, sẹpọ tòdaho Naini tọn, Jesu mọ asuṣiọsi he blawu tlala de to mẹhe jlo na yì diṣiọ visunnu dopo akàn etọn lẹ mẹ. Kandai Biblu tọn dọmọ: “Whenuena Oklunọ mọ ẹn, lẹblanu etọn wà ẹ.” (Luku 7:11-15) Sọgbe hẹ Vine’s Expository Dictionary of Old and New Testament Words, hodidọ lọ “lẹblanu etọn wà ẹ” zẹẹmẹdo “nado yin whinwhàn biọ ahun mẹ.” E mọ awubla sọn ahun mẹ wá yọnnu lọ tọn, bọ e sọ whàn ẹn nado ze afọdide nujikudo tọn lẹ nado de awubla etọn sẹ̀. Ayajẹ nankọtọn die asuṣiọsi lọ tindo to whenuena Jesu fọ́n visunnu lọ sọnku bosọ “jo e hlan onọ̀ etọn”!
To godo mẹ, to kọndopọmẹ hẹ lẹndai Jiwheyẹwhe tọn, Jesu jiya sọn ojlo mẹ wá bosọ ze ogbẹ̀ etọn jo taidi ofligọ de na gbẹtọvi nido sọgan yin hinhẹn jẹ mẹdekannu sọn kanlinmọgbenu ylando po okú po tọn mẹ. Ehe wẹ yin apajlẹ he klohugan gbẹninọ sọgbe hẹ Osẹ́n Sika tọn.—Matiu 20:28; Johanu 15:13; Heblu lẹ 4:15.
Mẹhe to Osẹ́n Sika Tọn Yido-Yizan mẹ Lẹ
Be mẹdelẹ tin to ojlẹ mítọn mẹ he to gbẹnọ sọgbe hẹ Osẹ́n Sika tọn nugbonugbo ya? Mọwẹ, podọ e mayin to whenuena e bọawuna yé poun gba. Di apajlẹ, to Wẹkẹ Whàn II whenu to Nazi Allemagne tọn, Kunnudetọ Jehovah tọn lẹ hẹn yise he yé tindo to Jiwheyẹwhe mẹ po owanyi kọmẹnu tọn po go bosọ gbẹ́ ma nado gbẹkọ Osẹ́n Sika tọn go. To whenuena Akọta lọ jẹ nujijla wangbẹnamẹ po akọ̀ ṣinṣinyan tọn po basi sọta Ju lẹpo ji, Kunnudetọ lẹ zindonukọn nado to hihodo Osẹ́n Sika tọn. To opá yasanamẹ tọn lẹ mẹ, yé tlẹ nọ hò gbẹtọvi hatọ lẹ tọn pọ́n, podọ dile núdùdù tlẹ hán sọ, yé nọ má yetọn hẹ Ju po mẹhe mayin Ju po he huvẹ to hùhù lẹ. Humọ, dile Akọta lọ tlẹ ko degbè dọ yé ni hẹn osò bo hù mẹdevo lẹ do sọ, yé gbẹ́ nado wàmọ, kẹdẹdile yé ma jlo dọ mẹdevo lẹ ni hù yelọsu do. Nawẹ yé na hù mẹhe yé dona yiwanna taidi yede titi lẹ gbọn? Na gbigbẹ́ yetọn wutu, e ma yindọ susu yetọn yin didohlan opá yasanamẹ tọn lẹ mẹ kẹdẹ wẹ gba ṣigba yin hùhù.—Matiu 5:43-48.
Dile hiẹ to hosọ ehe hia, hiẹ to alemọyi sọn apajlẹ Osẹ́n Sika tọn devo he to azọ́nwa mẹ. Kunnudetọ Jehovah tọn lẹ yọnẹn dọ to egbehe, gbẹtọ lẹ to yaji matin todido podọ matin alọgọ. Na ehe tọn wutu, Kunnudetọ lẹ nọ ze afọdide nujikudo tọn lẹ sọn ojlo mẹ wá nado gọalọna mẹdevo lẹ nado plọnnu gando todido po anademẹ yọn-na-yizan he tin to Biblu mẹ lẹ po go. Popolẹpo etọn yin apadewhe azọ́n mẹpinplọn tọn he to yinyin wiwà to obá daho hugan gbede pọ́n tọn de mẹ. Etẹwẹ yin kọdetọn lọ? Dile e yin dọdai etọn dọ to Isaia 2:2-4 mẹ do, “gbẹtọ susu,” yèdọ hugan gbẹtọ livi ṣidopo lẹdo aihọn pé, ko ‘yin pinplọn to aliho Jehovah tọn lẹ mẹ bọ yé sọ to zọnlinzin to omọ́ etọn mẹ.’ To yẹhiadonu-liho, yé ko plọn ‘nado yí ohí yetọn lẹ do tùn agbògọdọẹ podọ owhán yetọn lẹ do tùn glepọnu lẹ.’ Yé ko mọ jijọho po hihọ́ po to ojlẹ awusinyẹn tọn ehelẹ mẹ.
Etẹwẹ Dogbọn Hiẹ Dali?
Lẹnnupọn kleun do awubla po yajiji he Osẹ́n Sika tọn gbigbẹdai po ko hẹnwa gbẹtọvi ji sọn atẹṣiṣi Edẹni mẹ tọn, he Satani Lẹgba fọndote whenu gbọ́n. Lẹndai Jehovah tọn wẹ e yin nado diọ ninọmẹ lọ to madẹnmẹ. Gbọnna? “Na ehe wutu wẹ Ovi Jiwheyẹwhe tọn sọawuhia, na e nido gbà azọ́n Lẹgba tọn sudo.” (1 Johanu 3:8) Ehe na jọ to gandudu Ahọluduta Jiwheyẹwhe tọn glọ, to alọ nuyọnẹntọ po nugopetọ lọ po tọn, yèdọ Jesu Klisti, mẹhe plọnmẹ Osẹ́n Sika tọn bosọ nọgbẹ̀ sọgbe hẹ ẹ tọn mẹ.—Psalm 37:9-11; Daniẹli 2:44.
Ahọlu Davidi Islaeli hohowhenu tọn dọmọ: “Yẹn ko tin to yọpọ, yẹn sọ whẹ́n; ganṣo yẹn ma ko mọ yè gbẹ́ dodonọ dai, kavi okún etọn ni to núdùdù biọ. Lẹblanunọ wẹ ewọ to azán popo gbè, e nọ yàn namẹ; yè sọ nọ dona okún etọn.” (Psalm 37:25, 26) Be hiẹ ma na yigbe dọ mẹsusu wẹ nọ yí huhlọn do mọnu yí kavi hò onú lẹ yí to egbehe kakati nado nọ ‘do nukundagbe hia bo yàn namẹ’ ya? E họnwun dọ, hihodo Osẹ́n Sika tọn nọ dekọtọn do jijọho po hihọ́ nujọnu tọn po mẹ na e nọ hẹnmẹ wá hukan ji nado duvivi dona lẹ tọn todin podọ to sọgodo to Ahọluduta Jiwheyẹwhe tọn glọ wutu. Ahọluduta Jiwheyẹwhe tọn na de ṣejannabi po kanyinylan po he tin to aigba ji lẹpo sẹ̀ bo na yí titonu yọyọ he Jiwheyẹwhe na hẹnwa aimẹ de do diọtẹn na titonu gblezọn egbezangbe gbẹtọvi tọn. To whenẹnu, gbẹtọ lẹpo na duvivi gbẹninọ sọgbe hẹ Osẹ́n Sika tọn.—Psalm 29:11; 2 Pita 3:13.
Yẹdide to weda 4, 5]
E mayin dọ Jesu plọnmẹ Osẹ́n Sika tọn kẹdẹ wẹ gba ṣigba ze apajlẹ he yọnhugan lọ dai to bibasi i mẹ
[Yẹdide to wedae 7]
Hihodo Osẹ́n Sika tọn sọgan dekọtọn do jijọho po hihọ́ nujọnu tọn po mẹ