Be Hiẹ Flin Ya?

Be hiẹ ko yọ́n pinpẹn zinjẹgbonu agọe Atọ̀họ̀-Nuhihọ́ Lọ Tọn lẹ hihia tọn ya? Eyọn, pọ́n vlavo eyin hiẹ sọgan na gblọndo na kanbiọ he bọdego helẹ:

• Awhàngbigba to osẹ́n-liho sinsẹ̀n tọn tẹwẹ Whẹdatẹn Daho Allemagne tọn yidogọna?

Whẹdatẹn enẹ diọ nudide agọ̀ whẹdatẹn devo tọn gando Kunnudetọ Jehovah tọn lẹ po yinyọ́n yé taidi sinsẹ̀n de he sọgbe hẹ osẹ́n po go. Nudide awhàngbigba tọn lọ dọ dọ na nuhe gando mẹdekannujẹ sinsẹ̀n tọn go mẹde sọgan ‘setonuna nuyise sinsẹ̀n tọn’ hugan obiọ Tohọluduta tọn.—15/8, weda 8.

• Nawẹ ojlẹ he Job jiya na dẹnsọ?

Owe Job tọn ma dohia dọ e jiya na owhe susu gba. Yajiji Job tọn po pọngbọ mimọ etọn po sọgan ko jọ to osun kleun delẹ mẹ, vlavo to nuhe ma pé owhe dopo gblamẹ.—15/8, weda 31.

• Naegbọn mí sọgan deji dọ Lẹgba mayin omẹ otangblo tọn de poun?

Jesu Klisti yọnẹn dọ Lẹgba yin omẹ nujọnu tọn de. Jesu yin whiwhlepọn gbọn omẹ nujọnu tọn de dali, e mayin gbọn oylan de to ohò ede tọn mẹ dali gba. (Matiu 4:1-11; Johanu 8:44; 14:30)—1/9, weda 5-6.

• Howhinwhẹn lẹ 10:15 dọmọ: “Adọkunnu adọkunnọ tọn wẹ otò gángán etọn: matindo wamọnọ lẹ tọn wẹ husudo yetọn.” Nawẹ ehe yin nugbo gbọn?

Adọkunnu lẹ sọgan yinuwa taidi hihọ́ de sọta ninọmẹ tukla tọn delẹ to gbẹ̀mẹ, kẹdẹdile tòpẹvi heyin hinhẹn lodo de nọ na hihọ́ jẹ obá de mẹ na mẹhe nọ nọ̀ e mẹ lẹ do. To alọ devo mẹ, ohẹ́n sọgan hẹn nugbajẹmẹji wá to whenuena nujijọ madonukun lẹ fọndote.—15/9, weda 24.

• To linlẹn tẹmẹ wẹ ‘yinkọ Jehovah tọn yiylọ’ bẹjẹeji to azán Enọṣi tọn gbè te? (Gẹnẹsisi 4:26)

Yinkọ Jiwheyẹwhe tọn ko to yinyin yiyizan sọn bẹjẹeji whenuho gbẹtọvi tọn gbọn; enẹwutu, nuhe bẹjẹeji to ojlẹ Enọṣi tọn whenu mayin yinkọ Jehovah tọn yiylọ to yise mẹ gba. Gbẹtọ lẹ sọgan ko gbọn nuhẹnflu dali dó yinkọ Jiwheyẹwhe tọn na yedelẹ kavi na mẹdevo lẹ he gblamẹ yé gbọn do to sinsẹ̀n-basi hlan Jiwheyẹwhe.—15/9, weda 29.

• Dile eyin yiyizan to Biblu mẹ do, etẹwẹ hogbe lọ ‘mẹplọnlọ’ zẹẹmẹdo?

Hogbe lọ ma bẹ huhlọn ṣiṣizan kavi fifiẹ wunmẹ depope hẹn gba. (Howhinwhẹn lẹ 4:13; 22:15) Hogbe Glẹki tọn na ‘mẹplọnlọ’ na taun tọn bẹ anademẹ, weplọnmẹ, nugbẹnamẹ podọ, to whedelẹnu yasanamẹ po nujikudo po ṣigba to owanyi mẹ hẹn. Aliho nujọnu tọn he mẹ mẹjitọ lẹ sọgan hodo apajlẹ Jehovah tọn te wẹ dogbọn vivẹnudido nado hùn dotẹnmẹ hodọdopọ tọn lẹ do nùvo na ovi yetọn lẹ dali. (Heblu lẹ 12:7-10)—1/10, weda 8, 10.

• Nawẹ Klistiani nugbo lẹ to egbehe dohia dọ yé to godonọna gandudu Jiwheyẹwhe tọn gbọn?

To avùnlọyiyi na Ahọluduta Jiwheyẹwhe tọn mẹ, Kunnudetọ Jehovah tọn lẹ ma nọ kọnawudopọ hẹ tonudidọ kavi fọ́n atẹṣiṣi dote, etlẹ yin to otò he mẹ Kunnudetọ lẹ yin alọhẹndotena te lẹ mẹ. (Titu 3:1) Yé nọ do godonọnamẹ dagbe hia to aliho he mẹ Jesu po devi fliflimẹ etọn lẹ po wà do, bo nọ vánkan nado gọalọna gbẹtọ lẹ nado wleawuna walọ dagbe he họakuẹ Biblu tọn lẹ, taidi nugbodidọ, wiweji-ninọ walọyizan tọn, po walọ dagbe azọ́nwiwa tọn po.—15/10, weda 6.

• Nawẹ osin ogbẹ̀-namẹ tọn to sisà to Andes gbọn?

Kunnudetọ Jehovah tọn he nọ nọ̀ finẹ lẹ to vivẹnudo nado hẹn nugbo Biblu tọn yì gbẹtọ lọ lẹ dè, yèdọ to ogbè awe lẹdo lọ tọn lẹ mẹ, Quechua po Aymara po. Kunnudetọ lọ lẹ nọ dla mẹhe nọ nọ̀ lopo lọ lẹ ji pọ́n to Nọwhè Titicaca tọn ji, he bẹ lopo he to “osin-nukunmẹ” heyin póplò de he nọ yin awuwlena po fankàn he nọ wú to osin lọ mẹ lẹ po hẹn.—15/10, weda 8-10.

• Etẹwẹ Jiwheyẹwhe ko na mí he sọgan yin yiyijlẹdo zomọ nudọnamẹ-sẹdo tọn he nọ deanana agahun egbezangbe tọn lẹ go?

Jiwheyẹwhe ko na gbẹtọvi lẹ nugopipe anadenanu walọyizan dagbe, heyin linlẹn walọ dagbe homẹ tọn de. Ayihadawhẹnamẹnu he mí dugu etọn wẹ eyin. (Lomunu lẹ 2:14, 15)—1/11, weda 3-4.

• Naegbọn okú Jesu tọn do tindo nuhọakuẹ daho?

To whenuena sunnu pipé Adam waylando, e hẹn ogbẹ̀ gbẹtọ tọn na ede podọ na kúnkan etọn lẹ bu. (Lomunu lẹ 5:12) Taidi gbẹtọ pipé de, Jesu yí ogbẹ̀ gbẹtọ tọn etọn do sanvọ́, gbọnmọ dali e wleawuna ofligọ lọ he hẹn ẹn yọnbasi na gbẹtọ nugbonọ lẹ nado mọ ogbẹ̀ madopodo yí.—15/11, weda 5-6.

• Mẹnu lẹ wẹ Skitiatọ he yin nudego to Kọlọsinu lẹ 3:11 mẹ lẹ?

Skitiatọ lẹ yin akọta he nọ to yiyipe to danfafa Eurasie tọn lẹ ji, he dugán sọn nudi 700 jẹ 300 J.W.M. Yé yin osọ́-kùntọ azọ́nyọnẹntọ tlala po awhànfuntọ lẹ po. Kọlọsinu lẹ 3:11 sọgan ko to hodọdo gbẹtọ wunvinọ he ylankan hugan lẹ ji, e mayin do akọta tangan de ji gba.—15/11, weda 24-5.

• Etẹwutu mí sọgan dọ dọ Osẹ́n Sika tọn yin nuplọnmẹ de he jẹna ayidonugo gbesisọ tọn mítọn?

Nunọwhinnusẹ́n dodonu tọn ehe yin alọkẹyi to sinsẹ̀n Ju lẹ tọn, Bouddha tọn, tamẹnuplọnmẹ Glẹki tọn, po sinsẹ̀n Confucian tọn po mẹ. Etomọṣo, nuhe Jesu degbè etọn to Yẹwhehodidọ Osó ji tọn mẹ biọ nuyiwa nujikudo tọn lẹ, podọ e yinuwado gbẹzan gbẹtọ lẹ tọn ji to filẹpo podọ to ojlẹ lẹpo mẹ. (Matiu 7:12)—1/12, weda 3.