Dona Wẹndagbe lọ Tọn Lẹ
“OKLUNỌ ko yí amisisa do de mi nado dọyẹwheho wẹndagbe tọn hlan homẹmimiọnnọ lẹ; e ko do mi hlan nado basi pọngbọ ayiha awublanọ lẹ tọn . . . nado miọnhomẹna mẹhe to awubla lẹpo.”—ISAIA 61:1, 2.
1, 2. (a) Etẹwẹ Jesu do ede hia nado yin, podọ gbọnna? (b) Dona tẹlẹ wẹ wẹndagbe he Jesu lá lọ hẹnwa?
TO GBỌJẸZANGBE dopo to bẹjẹeji lizọnyizọn etọn tọn, Jesu tin to sinagọgu mẹ to Nazalẹti. Sọgbe hẹ kandai lọ, “yè sọ yí owe yẹwhegán [Isaia] tọn na ẹn, whenuena e hùn owe lọ, e mọ ofi yè wlan dọ, Gbigbọ Oklunọ tọn tin to oji e, na e ko samisisana mi nado dọyẹwheho wẹndagbe tọn.” Jesu zindonukọn nado hia owẹ̀n dọdai tọn lọ yinukọn dogọ. Enẹgodo e sinai bo dọmọ: “Egbé wẹ owe wiwe [he mì ṣẹṣẹ se vọ̀] he di to otó mìtọn mẹ.”—Luku 4:16-21.
2 To aliho ehe mẹ, Jesu do ede hia taidi wẹndagbe-jlatọ he ko yin dọdai etọn dọ lọ, yèdọ wẹndagbe-dọtọ po mẹhe hẹn homẹmiọnnamẹ wá po. (Matiu 4:23) Podọ wẹndagbe de wẹ nuhe Jesu tindo nado dọ lọ yin na taun tọn! E dọna todoaitọ etọn lẹ dọmọ: “Yẹn wẹ hinhọ́n aihọn tọn; mẹhe hodo mi ma na zinzọnlin zinvlu mẹ, ṣigba e na tindo hinhọ́n ogbẹ̀ tọn.” (Johanu 8:12) E sọ dọ ga dọmọ: “Eyin mìwlẹ nọte to ohó ṣie mẹ, whenẹnu mìwlẹ yin nuplọntọ ṣie nugbo; mìwlẹ nasọ yọ́n nugbo, nugbo lọ nasọ hẹn mì jẹ mẹdekannu.” (Johanu 8:31, 32) Mọwẹ, Jesu tindo “ohó ogbẹ̀ madopodo tọn.” (Johanu 6:68, 69) Hinhọ́n, ogbẹ̀, mẹdekannujẹ—yin dona lẹ he dona yin bowlena na taun tọn!
3. Wẹndagbe tẹwẹ devi Jesu tọn lẹ lá?
3 To Pẹntikọsti owhe 33 W.M., devi lẹ zindonukọn to azọ́n wẹndagbe-jijlá Jesu tọn mẹ. Yé dọyẹwheho “wẹndagbe ahọludu” tọn hlan Islaelivi lẹ podọ hlan kosi lẹ. (Matiu 24:14; Owalọ lẹ 15:7; Lomunu lẹ 1:16) Mẹhe kẹalọyi lẹ wá yọ́n Jehovah Jiwheyẹwhe. Yé yin hinhẹn jẹ mẹdekannu sọn kanlinmọgbenu sinsẹ̀n tọn bo lẹzun apadewhe akọta yọyọ gbigbọmẹ tọn, yèdọ “Islaeli Jiwheyẹwhe tọn,” he hagbẹ etọn lẹ tindo todido gandudu hẹ Oklunọ yetọn, Jesu Klisti to olọn mẹ kakadoi tọn. (Galatianu lẹ 5:1; 6:16; Efesunu lẹ 3:5-7; Kọlọsinu lẹ 1:4, 5; Osọhia 22:5) Dona họakuẹ lẹ wẹ enẹlẹ yin na nugbo tọn!
Wẹndagbe-Jijlá to Egbehe
4. Aliho tẹmẹ wẹ azọ́ndenamẹ wẹndagbe lilá tọn to yinyin hinhẹndi te to egbehe?
4 To egbehe, Klistiani yiamisisadode lẹ, heyin godonọna gbọn “gbẹtọ susugege” “lẹngbọ devo” he to jijideji lẹ tọn dali, to azọ́ndenamẹ dọdai tọn heyin nina Jesu dai lọ hẹndi zọnmii. (Osọhia 7:9; Johanu 10:16) Taidi kọdetọn de, wẹndagbe lọ to yinyin lilá to obá he gblo hugan pọ́n de mẹ. To aigba po aigba-denamẹ 235 po ji, Kunnudetọ Jehovah tọn lẹ ko yì “nado dọyẹwheho wẹndagbe tọn hlan homẹmimiọnnọ lẹ . . . nado basi pọngbọ ayiha awublanọ lẹ tọn, nado lá mẹdekannujẹ hlan mẹmẹglọ lẹ, podọ hùnhùn gànhọ tọn na gàntọ lẹ, nado lá owhe alọkẹyi OKLUNỌ tọn, podọ azán ahọsuyi Jiwheyẹwhe mítọn tọn; nado miọnhomẹna mẹhe to awubla lẹpo.” (Isaia 61:1, 2) Enẹwutu, azọ́n wẹndagbe-jijlá Klistiani tọn to dona lẹ hẹnwa na mẹsusu podọ homẹmimiọn nujọnu tọn na “yé he tin to tukla depope mẹ lẹ.”—2 Kọlintinu lẹ 1:3, 4.
5. Gando wẹndagbe lọ lilá go, nawẹ Kunnudetọ Jehovah tọn lẹ gbọnvona ṣọṣi Mẹylọhodotọklisti tọn lẹ gbọn?
5 Nugbo wẹ dọ ṣọṣi Mẹylọhodotọklisti tọn lẹ nọ yí akuẹ zan nado nọgodona aliho wẹndagbe-jijlá tọn voovo lẹ. Susu yetọn nọ do mẹdehlan lẹ yì nado diọ sinsẹ̀n na gbẹtọ lẹ to otò devo lẹ mẹ. Di apajlẹ, The Orthodox Christian Mission Center Magazine na linlin do nuyiwa mẹdehlan ṣọṣi Orthodoxe tọn lẹ tọn ji to Madagascar, hùwaji Aflika tọn, Tanzanie, po Zimbabwe po. Ṣigba, dile e nọ yin do to ṣọṣi Mẹylọhodotọklisti tọn devo lẹ mẹ, suhugan hagbẹ Ṣọṣi Orthodoxe tọn lẹ ma tindo mahẹ depope to azọ́n enẹ mẹ gba. To vogbingbọn mẹ, Kunnudetọ Jehovah tọn he ko klan yede do wiwe lẹpo wẹ nọ dovivẹnu nado tindo mahẹ to wẹndagbe-jijlá mẹ. Yé yọnẹn dọ wẹndagbe lilá yin dohia nugbo-yinyin yise yetọn tọn. Paulu dọmọ: “Ayiha wẹ gbẹtọ do yise hlan dodo; onù wẹ yè do basi ogbeyí hlan whlẹngán.” Oṣiọ wẹ yise he ma whanmẹ nado yinuwa yin na nugbo tọn.—Lomunu lẹ 10:10; Jakobu 2:17.
Wẹndagbe He Nọ Hẹn Dona Mavọmavọ lẹ Wá
6. Wẹndagbe tẹwẹ to yinyin lilá to egbehe?
6 Kunnudetọ Jehovah tọn lẹ nọ dọ wẹndagbe he yọnhugan lọ. Yé nọ hùn Biblu yetọn bo nọ dohia mẹhe dotoai lẹ dọ Jesu yí ogbẹ̀ etọn do sanvọ́ nado hùn aliho dote na gbẹtọvi lẹ nado dọnsẹpọ Jiwheyẹwhe, mọ jona ylando lẹ tọn yí, bo tindo todido ogbẹ̀ madopodo tọn. (Johanu 3:16; 2 Kọlintinu lẹ 5:18, 19) Yé nọ lá dọ Ahọluduta Jiwheyẹwhe tọn ko yin didoai to olọn mẹ to Ahọlu yiamisisadode, Jesu Klisti glọ, podọ dọ e na de danuwiwa sẹ sọn aigba ji to madẹnmẹ bo deanana hinhẹngọwa Paladisi tọn. (Osọhia 11:15; 21:3, 4) To hẹndi mẹ na dọdai Isaia tọn, yé nọ dọna kọmẹnu yetọn lẹ dọ din wẹ yin “owhe alọkẹyi OKLUNỌ tọn” to whenuena gbẹtọvi sọgan gbẹsọ kẹalọyi wẹndagbe lọ. Yé sọ nọ na avase dọ “azán ahọsuyi Jiwheyẹwhe mítọn tọn” na wá to madẹnmẹ to whenuena Jehovah na hẹn opodo wá ylanwatọ he ma lẹnvọjọ lẹ ji.—Psalm 37:9-11.
7. Numimọ tẹwẹ do pọninọ Kunnudetọ Jehovah tọn lẹ tọn hia, podọ naegbọn yé do tindo pọninọ mọnkọtọn?
7 To aihọn he mẹ nugbajẹmẹji po nujijọ ylankan po gọ́ de mẹ, wẹndagbe dopo akàn ehe wẹ tindo ale mavọmavọ lẹ. Mẹhe kẹalọyi i lẹ nọ lẹzun apadewhe mẹmẹsunnu-yinyin Klistiani tọn he tin to pọmẹ, akọjọpli tọn de he ma nọ na dotẹnmẹ vogbingbọn akọta, akọ, kavi akuẹzinzan tọn nado klan yé. Yé ko ‘ze owanyi dogo, na e yin pọninọ gbesisọ tọn de wutu.’ (Kọlọsinu lẹ 3:14; Johanu 15:12) Ehe yin mimọ to owhe he wayi mẹ to otò Aflika tọn de mẹ. Osò-gbè fọ́n mẹhe nọ nọ̀ tòdaho tatọ́-tònọ lọ mẹ lẹ to afọnnu dopo. Huhlọn do hò gandudu yí wẹ to jijọ. To whenuena nujijọ lẹ lẹzun nudindọn hẹnnu tọn, whẹndo Kunnudetọ lẹ tọn de yin whẹgbledo na yíyí Kunnudetọ heyin hagbẹ hẹnnu devo lẹ tọn do whégbè wutu. Whẹndo lọ gblọn dọmọ: “Kunnudetọ Jehovah tọn lẹ kẹdẹ wẹ mí tindo to owhé mítọn gbè.” Na yewlẹ, owanyi Klistiani tọn—yèdọ homẹmimiọn na mẹhe tin to nuhudo mẹ lẹ wẹ yin nujọnu, e mayin vogbingbọn hẹnnu tọn gba. Hẹnnumẹ whẹndo lọ tọn he mayin Kunnudetọ de dọmọ: “Hagbẹ sinsẹ̀n devo lẹ tọn lẹpo wẹ de sinsẹ̀ntọ hatọ yetọn lẹ hia. Kunnudetọ Jehovah tọn lẹ kẹdẹ wẹ ma wàmọ.” Susu nujijọ mọnkọtọn lẹ tọn heyin linlin etọn na sọn otò he mẹ awhàn tin te lẹ dohia dọ Kunnudetọ Jehovah tọn lẹ ‘tindo owanyi na gbẹdido mẹmẹsunnu lẹ tọn blebu’ nugbonugbo.—1 Pita 2:17.
Wẹndagbe lọ Nọ Diọ Gbẹtọ Lẹ
8, 9. (a) Diọdo tẹwẹ mẹhe kẹalọyi wẹndagbe lọ lẹ nọ basi? (b) Numimọ tẹlẹ wẹ do huhlọn he wẹndagbe lọ tindo hia?
8 Wẹndagbe lọ tindo kọndopọ hẹ nuhe Paulu ylọ dọ ‘gbẹzan dintọn po dehe ja tọn po.’ (1 Timoti 4:8) E mayin dọ e nọ ze todido jiawu, nujikudo tọn donukọnnamẹ kẹdẹ wẹ gba ṣigba e sọ nọ hẹn ‘gbẹzan dintọn’ pọnte. Taidi mẹdopodopo, Kunnudetọ Jehovah tọn lẹ nọ yin anadena gbọn Ohó Jiwheyẹwhe tọn, Biblu dali, nado hẹn gbẹzan yetọn wá kọndopọmẹ hẹ ojlo Jiwheyẹwhe tọn. (Psalm 119:101) Gbẹtọ-yinyin yetọn nọ yin hinhẹn jẹ yọyọ dile yé wleawuna jẹhẹnu lẹ taidi dodowiwa po nugbonọ-yinyin po.—Efesunu lẹ 4:24.
9 Lẹnnupọndo apajlẹ Franco tọn ji. Nuhahun etọn wẹ adidudu. Whedepopenu he nude jẹdò, e nọ yawu gblehomẹ bo nọ hẹn onú lẹ gble. Asi etọn plọn Biblu hẹ Kunnudetọ Jehovah tọn lẹ, podọ apajlẹ Klistiani tọn yetọn gọalọna Franco vudevude nado mọdọ emi dona diọ. E plọn Biblu hẹ yé bosọ penugo to godo mẹ nado do sinsẹ́n gbigbọ wiwe tọn heyin jijọho po mawazẹjlẹgo po hia. (Galatianu lẹ 5:22, 23) E yin dopo to omẹ 492 heyin bibaptizi to owhe sinsẹ̀nzọn 2001 tọn whenu to Belgique lẹ mẹ. Lẹnnupọndo apajlẹ Alejandro tọn ji ga. Sunnu jọja enẹ nọ ṣì amasin adínọ zan taun bo masọ tin to lugbe ba. E nọ dánpe gbọ̀n ogbóji, ṣinyan nudepope he e mọ lẹ nado sà bo họ̀ amasin adínọ. To whenuena e pé owhe 22-mẹvi, Kunnudetọ Jehovah tọn lẹ basi oylọ na Alejandro nado plọn Biblu, bọ e sọ yigbe. E nọ hia Biblu egbesọegbesọ bo nọ yì opli Klistiani tọn lẹ. E klọ́ gbẹzan etọn wé po awuyiya po sọmọ bọ to nuhe ma pé osun ṣidopo mẹ, e penugo nado tindo mahẹ to azọ́n wẹndagbe-jijlá tọn mẹ. E yin dopo to omẹ 10 115 he wàmọ to owhe he wayi mẹ to Panama lẹ mẹ.
Wẹndagbe lọ—Dona de na Homẹmimiọnnọ Lẹ
10. Mẹnu lẹ wẹ nọ kẹalọyi wẹndagbe lọ, podọ nawẹ pọndohlan yetọn nọ diọ gbọn?
10 Isaia dọ dọdai dọ wẹndagbe lọ na yin didọ na homẹmimiọnnọ lẹ. Mẹnu lẹ wẹ yin homẹmimiọnnọ ehelẹ? Yewlẹ wẹ owe Owalọ lẹ tọn basi zẹẹmẹ na taidi ‘mẹhe tin to ninọmẹ he jẹna ogbẹ̀ madopodo mẹ lẹ.’ (Owalọ lẹ 13:48) Yé yin omẹ whiwhẹnọ heyin mimọ to ogbẹ́ gbẹtọvi tọn lẹpo mẹ he kẹalọyi owẹ̀n nugbo lọ tọn lẹ. Omẹ mọnkọtọn lẹ plọn dọ ojlo Jiwheyẹwhe tọn wiwà nọ hẹn dona he họakuẹ taun hugan nudepope he aihọn sọgan namẹ lẹ wá. (1 Johanu 2:15-17) Ṣigba, nawẹ Kunnudetọ Jehovah tọn lẹ nọ biọ ahun lẹ mẹ to azọ́n wẹndagbe-jijlá tọn yetọn mẹ gbọn?
11. Sọgbe hẹ Paulu, nawẹ wẹndagbe lọ dona yin lilá gbọn?
11 Eyọn, lẹnnupọndo apajlẹ apọsteli Paulu tọn ji, he wlan hlan Kọlintinu lẹ dọmọ: “Mẹmẹsunnu emi, whenuena yẹn wá mì dè, e mayin po whanpẹ hogbe vivi tọn po, kavi nuyọnẹn tọn po, wẹ yẹn hẹn wá mì dè whenuena yẹn to okunnude Jiwheyẹwhe tọn lá hlan mì gba. Na yẹn ko magbe etọn ma nado yọ́n nude to mì ṣẹnṣẹn, adavo Jesu Klisti, [heyin whiwhedo yatin go].” (1 Kọlintinu lẹ 2:1, 2) Paulu ma tẹnpọn nado do fie nuyọnẹn etọn jẹ hia hosetọ etọn lẹ gba. E ma plọn yé nudevo gbọnvona nugbo he wá sọn Jiwheyẹwhe dè lẹ, yèdọ nugbo heyin kinkàndai to Biblu mẹ to egbehe lẹ. Doayi tulinamẹ Paulu tọn hlan Timoti wẹndagbe-jlatọ hatọ etọn go ga, dọmọ: “Nọ dọyẹwheho ohó lọ tọn; do magbọjẹ na dewe.” (2 Timoti 4:2) Timoti dona dọyẹwheho “ohó lọ tọn,” enẹ wẹ owẹ̀n Jiwheyẹwhe tọn. Paulu sọ wlan hlan Timoti ga dọmọ: “Dovivẹnu nado do dewe hia di mẹhe pegan hlan Jiwheyẹwhe, azọ́nwatọ he ma dona kuwinyan, ehe nọ má ohó nugbo tọn dile e jẹ do kẹdẹ.”—2 Timoti 2:15.
12. Nawẹ Kunnudetọ Jehovah tọn egbezangbe tọn lẹ nọ hodo hogbe po apajlẹ Paulu tọn lẹ po gbọn?
12 Kunnudetọ Jehovah tọn lẹ nọ setonuna apajlẹ Paulu tọn, gọna hogbe he e dọ hlan Timoti lẹ. Yé nọ yọ́n huhlọn Ohó Jiwheyẹwhe tọn tọn bosọ nọ yí ì zan ganji dile yé to tintẹnpọn nado do hogbe he sọgbe todido po homẹmimiọn tọn po hia kọmẹnu yetọn lẹ. (Psalm 119:52; 2 Timoti 3:16, 17; Heblu lẹ 4:12) Na nugbo tọn, yé nọ yí owe Biblu tọn lẹ zan ganji na mẹhe tindo ojlo lẹ nido sọgan tindo oyọnẹn Biblu tọn dogọ to ojlẹ he mẹ yé vò. Ṣigba yé nọ dín nado do nuhe Owe-wiwe dọ hia gbẹtọ lẹ to whepoponu. Yé yọnẹn dọ Ohó gbọdo Jiwheyẹwhe tọn na whàn ahun whiwhẹnọ lẹ tọn. Podọ yíyí i zan to aliho ehe mẹ nọ hẹn yise yelọsu tọn lodo ga.
“Miọnhomẹna Mẹhe to Awubla Lẹpo”
13. To owhe 2001 mẹ, nujijọ tẹlẹ wẹ fọ́n nuhudo homẹmimiọnna mẹhe to awubla lẹ tọn dote?
13 Owhe 2001 tindo nugbajẹmẹji etọn lẹ, podọ taidi kọdetọn de, mẹsusu wẹ tindo nuhudo homẹmiọnnamẹ tọn. Apajlẹ ayidego tọn de jọ to États-Unis to septembre he wayi mẹ. Nukunbianamẹtọ lẹ gbà Ahọ́nkan Ajọwatẹn Aihọn tọn to New York gọna Pentagone sẹpọ Washington, D.C. Ehelẹ yin nujijọ mẹhẹnjọsi tọn lẹ na akọta lọ blebu. To nujijọ mọnkọtọn lẹ whenu, Kunnudetọ Jehovah tọn lẹ nọ tẹnpọn nado hẹn azọ́ndenamẹ yetọn heyin nado “miọnhomẹna mẹhe to awubla lẹpo” di. Numimọ vude lẹ na do lehe yé wà ehe gbọn hia.
14, 15. Nawẹ Kunnudetọ lẹ penugo to nujijọ voovo awe whenu nado yí wefọ lẹ zan po kọdetọn dagbe po nado miọnhomẹna mẹhe to awubla lẹ gbọn?
14 Kunnudetọ heyin wẹndagbe-jlatọ whenu-gigọ tọn de dọnsẹpọ yọnnu de to aliho pá bo kàn nuhe e lẹn gando nujijọ ylankan lọ go se. Yọnnu lọ jẹ avivi ji. E dọ dọ e blawu na emi taun bosọ jlo nado gọalọ to aliho depope mẹ. Kunnudetọ lọ dohia ẹ dọ Jiwheyẹwhe tindo ojlo to mímẹpo mẹ taun, bosọ hia Isaia 61:1, 2. Hogbe heyin gbigbọdo gbọn Jiwheyẹwhe dali ehelẹ taidi nuhe sọgbe hẹ lẹnpọn dagbe na yọnnu lọ, he dọ dọ mẹlẹpo wẹ to awubla. E kẹalọyi alọnuwe pẹvi dopo bosọ biọ dọ Kunnudetọ lọ ni dla ẹ pọ́n to whégbè.
15 Kunnudetọ awe he to mahẹ tindo to azọ́n wẹndagbe-jijlá tọn mẹ dukosọ hẹ dawe de he to azọ́nwa to azọ́nhọ etọn mẹ. Yé biọ nado do hogbe homẹmiọnnamẹ tọn lẹ hia ẹ sọn Owe-wiwe mẹ na nugbajẹmẹji he ṣẹṣẹ jọ wayi to Ahọ́nkan Ajọwatẹn Aihọn tọn lọ wutu. Po gbeyiyi etọn po, yé hia 2 Kọlintinu lẹ 1:3-7, he bẹ hogbe lọ lẹ hẹn dọmọ: “Homẹmiọn . . . sù deji dogbọn Klisti mẹ.” Dawe lọ dopẹ́ dọ kọmẹnu Kunnudetọ etọn lẹ to nuhe na miọnhomẹnamẹ de má hẹ mẹdevo lẹ bosọ dọmọ: “Na Jiwheyẹwhe ni dona azọ́n dagbe he mì to wiwà.”
16, 17. Numimọ awe tẹlẹ wẹ do huhlọn Biblu tọn nado gọalọna mẹhe blawu bo jẹflumẹ na nugbajẹmẹji lẹ wutu hia?
16 Kunnudetọ de he to gọyìpọn basi na jlodotọ lẹ dukosọ hẹ visunnu yọnnu he ko do ojlo hia wayi de tọn bosọ basi zẹẹmẹ dọ lehe kọmẹnu lẹ to nuyiwa do to nugbajẹmẹji agọe tọn lọ godo duahunmẹna emi. E paṣa dawe lọ dọ Kunnudetọ lọ yí ojlẹ edetiti tọn zan nado dla gbẹtọ lẹ pọ́n nado pọ́n lehe yé te. E dọ dọ emi to azọ́nwa sẹpọ Ahọ́nkan Ajọwatẹn Aihọn tọn lọ to whenuena nujijọ lọ jọ bọ emi sọ mọ lehe onú lọ lẹpo jọ do. To whenuena e kàn nuhewutu Jiwheyẹwhe jo dotẹnmẹ do na yajiji se, Kunnudetọ lọ hia wefọ lẹ sọn Biblu mẹ, he bẹ Psalm 37:39 hẹn, he dọmọ: “Alọ OKLUNỌ tọn mẹ wẹ whlẹngán dodonọ lẹ tọn sọn: ewọ wẹ figángán yetọn to nukunbibia whenu.” Dawe lọ gbọn homẹdagbe dali kàn lehe Kunnudetọ lọ po whẹndo etọn po to bibasi do se, biọ to e si nado lẹkọwa, bosọ dopẹ́ sọn ahun mẹ wá na dlapọn lọ.
17 Devo to omẹ fọtọ́n he to awubla he Kunnudetọ Jehovah tọn lẹ miọnhomẹna to azán he bọdo nujijọ lọ go lẹ mẹ wẹ yọnnu de he Kunnudetọ lẹ dukosọ hẹ dile yé to kọmẹnu yetọn lẹ dlapọn. Nuhe jọ lọ blawu na ẹn taun bọ e sọ dotoai dile yé hia Psalm 72:12-14 dọmọ: “E na whlẹn agbátọnọ lọ whenu e to awhado; oyanọ ga, podọ ewọ he ma tindo alọgọnamẹtọ de. Ewọ na tindo lẹblanu to oyanọ po agbátọnọ po ji; e nasọ whlẹn ayiha agbátọnọ tọn gán. Ewọ na fli ayiha yetọn sọn awusinsinyẹn po adingbandido po mẹ: nuhọakuẹ wẹ ohùn yetọn na yin to nukun etọn mẹ.” Lehe ohó enẹlẹ gọna zẹẹmẹ do sọ! Yọnnu lọ biọ dọ Kunnudetọ lọ lẹ ni vọ́ wefọ lọ lẹ hia bosọ ylọ yé biọ ohọ̀ etọn mẹ nado zindonukọn to hodọdopọ lọ mẹ. Plọnmẹ Biblu de bẹjẹeji to vivọnu hodọdopọ lọ tọn.
18. Nawẹ Kunnudetọ de gọalọna kọmẹnu etọn lẹ gbọn to whenuena e yin yiylọ nado hodẹ̀ do ota yetọn mẹ?
18 Kunnudetọ dopo nọ wazọ́n to núdùdù-satẹn de to lẹdo he hunnukun de mẹ to fie omẹ lọ lẹ ma ko nọ do ojlo hia to wẹndagbe Ahọluduta tọn mẹ te dai. To nujijọ ylankan lọ godo, lẹdo lọ yin whinwhàn. To vendredi whèjai he bọdo nujijọ lọ go, yọnnu heyin ogán núdùdù-satẹn lọ tọn dọna mẹlẹpo nado tọ́njẹgbonu bo hẹn vẹla do alọmẹ, bo nabọẹ na ojlẹ kleun de na mẹhe kú to nujijọ lọ mẹ lẹ. Na Kunnudetọ lọ na sisi numọtolanmẹ yetọn lẹ wutu, e tọ́njẹgbonu bosọ nọte abọẹ to aligbọntẹn lọ. Yọnnu lọ yọnẹn dọ Kunnudetọ Jehovah tọn de wẹ e yin, enẹwutu to ojlẹ abọẹninọ tọn lọ godo, e biọ to e si nado nọ nukọnna mẹlẹpo to odẹ̀ mẹ. Kunnudetọ lọ yigbe. To dẹ̀hiho etọn mẹ, e donu awubla he gbayipe lọ go ṣigba dọ dọ mẹhe to awubla lẹ ma dona blawu matin todido gba. E dọho gando whenuena nujijọ ylankan mọnkọtọn lẹ ma nasọ jọ go bosọ dọ dọ mẹlẹpo sọgan dọnsẹpọ Jiwheyẹwhe homẹmimiọn tọn gbọn oyọnẹn he pegan sọn Biblu mẹ gblamẹ. To “Niṣẹ” didọ godo, ogán lọ—gọna gbẹtọ hugan 60 he tin to gbonu núdùdù-satẹn lọ tọn lẹ—wá Kunnudetọ lọ dè, dopẹ́ na ẹn, bo plá alọ-kọna ẹn, bosọ dọ dọ e yin dopo to odẹ̀ he yọnhugan he emi ko se pọ́n lẹ mẹ.
Dona de na Lẹdo Lọ
19. Numimọ tẹwẹ dohia dọ mẹdelẹ yọ́n nujinọtedo yiaga Kunnudetọ Jehovah tọn lẹ tọn?
19 To azán ehelẹ mẹ na taun tọn, lẹdo he mẹ Kunnudetọ Jehovah tọn lẹ yin zohunhunnọ te lẹ nọ mọaleyi sọn tintin to finẹ yetọn mẹ—dile mẹsusu ko dọ do. Nawẹ mẹhe nọgodona jijọho, nugbodidọ, po walọyizan wiwe po lẹ ma na tindo nuyiwadomẹji dagbe lẹ gbọn? To otò he tin to Ṣẹnṣẹn Asia tọn dopo mẹ, Kunnudetọ lẹ dukosọ hẹ ponọgán he tin na hihọ́ akọta lọ tọn dai tọn he ko to gbọjẹ gaa mẹ de. E dọ dọ emi yin azọ́ndena pọ́n nado dindona titobasinanu sinsẹ̀n voovo lẹ tọn. To whenuena e dindona Kunnudetọ Jehovah tọn lẹ, nugbodidọ po walọ dagbe yetọn po yinuwadeji taun. E yiwanna yise he lodo yetọn podọ nugbo lọ dọ nuplọnmẹ yetọn lẹ nọ yin zize sinai do Owe-wiwe ji. Dawe ehe kẹalọyi plọnmẹ Biblu.
20. (a) Etẹwẹ nuwiwa heyin linlin etọn na gbọn Kunnudetọ Jehovah tọn lẹ dali to owhe he wayi mẹ dohia? (b) Etẹwẹ dohia dọ azọ́n susu gbẹsọ dona yin wiwà, podọ nawẹ mí nọ pọ́n lẹblanulọkẹyi wẹndagbe-jijlá tọn mítọn hlan gbọn?
20 Sọn numimọ vude heyin didọ to hosọ ehe mẹ sọn fọtọ́n susu he sọgan yin didọ lẹ mẹ, e họnwun dọ Kunnudetọ Jehovah tọn lẹ hẹn alọnu ján taun to owhe sinsẹ̀nzọn 2001 tọn whenu.a Yé dọho hẹ gbẹtọ livi susu, miọnhomẹna mẹhe to awubla susu, podọ azọ́n wẹndagbe-jijlá tọn yetọn tindo kọdetọn dagbe. Omẹ 263 431 wẹ klan yede dowiwe hlan Jiwheyẹwhe bo yin bibaptizi. Lẹdo aihọn pé, sọha wẹndagbe-jlatọ lẹ tọn jideji po 1,7 to kanweko ji po. Podọ nugbo lọ dọ gbẹtọ 15 374 986 wẹ wá Oflin okú Jesu tọn whemẹwhemẹ tọn dohia dọ azọ́n gbẹ́po nado yin wiwà. (1 Kọlintinu lẹ 11:23-26) Mì gbọ mí ni zindonukọn to homẹmimiọnnọ he kẹalọyi wẹndagbe lọ lẹ dindinmọ mẹ. Dile e na dẹnsọ bọ owhe alọkẹyi Jehovah tọn na to nukọnzindo, mì gbọ mí ni zindonukọn nado to homẹmiọnna “ayiha awublanọ lẹ tọn.” Azọ́n pekọnamẹ tọn nankọ die mí tindo! Na jide tọn mímẹpo wẹ vọ́ hogbe Isaia tọn lẹ dọ dọmọ: “Yẹn na jaya susu to OKLUNỌ mẹ, gbigbọ ṣie nasọ yin ayajẹtọ to Jiwheyẹwhe ṣie mẹ.” (Isaia 61:10) Na Jiwheyẹwhe ni to mí yizan zọnmii dile e to hogbe dọdai tọn ehelẹ hẹndi dọmọ: “Oklunọ JIWHEYẸWHE na hẹn dodo po pipà po wú jẹgbonu to akọta lẹpo nukọn.”—Isaia 61:11.
[Nudọnamẹ Odò Tọn]
a Apotin nudọnamẹ tọn he tin to weda 19 jẹ 22 na linlin nuyiwa Kunnudetọ Jehovah tọn lẹ tọn to owhe sinsẹ̀nzọn 2001 tọn whenu.
Be Hiẹ Flin Ya?
• Nawẹ homẹmimiọnnọ lẹ mọaleyi sọn wẹndagbe he Jesu lá lọ mẹ gbọn?
• Dona tẹlẹ wẹ mẹhe kẹalọyi azọ́n wẹndagbe-jijlá devi owhe kanweko-tintan whenu Jesu tọn lẹ mọyi?
• Nawẹ mẹhe dotoai to egbehe lẹ ko mọaleyi sọn wẹndagbe lọ mẹ gbọn?
• Nawẹ mí nọ pọ́n lẹblanulọkẹyi wẹndagbe-jlatọ yinyin mítọn tọn hlan gbọn?
[Caption on page 15]
Kunnudetọ Jehovah tọn lẹ nọ flin azọngban wẹndagbe-jijlá tọn yetọn to whepoponu
[Caption on page 17]
Mẹhe kẹalọyi wẹndagbe lọ lẹ nọ lẹzun apadewhe mẹmẹsunnu-yinyin he tin to pọmẹ, akọjọpli tọn de