Jehovah—Apajlẹ He Yọnhugan Dagbewà Tọn
“Na opẹ́ lẹ hlan Oklunọ awhànpa lẹ tọn, na yinyọ́n wẹ OKLUNỌ.”—JẸLEMIA 33:11.
1. Naegbọn mí nọ yin whinwhàn nado pà Jiwheyẹwhe na dagbewà etọn?
JEHOVAH JIWHEYẸWHE yọ́n to aliho lẹpo mẹ. Yẹwhegán Zekalia lá dọ ‘lehe dagbewà etọn yin daho sọ!’ (Zekalia 9:17) Na nugbo tọn, dagbewà sọawuhia to nuhe Jiwheyẹwhe wà nado wleawuna aigba na mí nado duvivi etọn lẹpo mẹ. (Gẹnẹsisi 1:31) Mí ma na penugo gbede nado mọnukunnujẹ osẹ́n gigẹdẹ he Jiwheyẹwhe wleawuna to whenuena e dá wẹkẹ lọ lẹpo mẹ gba. (Yẹwhehodọtọ 3:11; 8:17) Ṣigba vude he mí yọnẹn nọ whàn mí nado pà Jiwheyẹwhe na dagbewà etọn.
2. Nawẹ hiẹ na basi zẹẹmẹ dagbewà tọn gbọn?
2 Etẹwẹ dagbewà zẹẹmẹdo? E yin walọ dagbe, kavi jijọ dagbe. Etomọṣo, e mayin onú ylankan lẹpo gbigbẹdai poun gba. Dagbewà, heyin dopo to sinsẹ́n gbigbọ tọn lẹ mẹ, yin jẹhẹnu he nọ yin didohia gbọn onú dagbe lẹ wiwà dali. (Galatianu lẹ 5:22, 23) Mí nọ do dagbewà hia to whenuena mí wà onú dagbe po dehe nọ hẹn ale wá lẹ po na mẹdevo lẹ. To titonu ehe mẹ, nuhe yin pinpọnhlan taidi dagbe to lẹdo delẹ mẹ sọgan yin pinpọnhlan taidi ylankan to devo lẹ mẹ. Etomọṣo, eyin mí na duvivi jijọho po ayajẹ po tọn, nujinọtedo dagbewà tọn dopo wẹ dona tin. Mẹnu wẹ tindo jlọjẹ nado ze nujinọtedo ehe dai?
3. Etẹwẹ Gẹnẹsisi 2:16, 17 dohia dogbọn nujinọtedo dagbewà tọn dali?
3 Jiwheyẹwhe wẹ nọ ze nujinọtedo dagbewà tọn dai. To bẹjẹeji whenuho gbẹtọvi tọn, Jehovah wẹ degbena sunnu tintan lọ dọmọ: “Atin he tin to jipa mẹ lẹpo hiẹ sọgan yí ojlo do dù sọn e mẹ. Ṣigba sọn atin yinyọ́n dagbe po oylan po lọ tọn mẹ hiẹ ma na dù: gbeegbe hiẹ dù enẹtọn mẹ hiẹ na kú dandan.” (Gẹnẹsisi 2:16, 17) Mọwẹ, gbẹtọvi lẹ dona lẹhlan Mẹdatọ yetọn dè nado yọ́n onú dagbe po oylan po.
Dohia Dagbewà He Yè Ma Jẹna Tọn
4. Etẹwẹ Jiwheyẹwhe ko wà na gbẹtọvi lẹ sọn whenue Adam waylando gbọ́n?
4 Todido gbẹtọ tọn na ayajẹ kakadoi to pipé mẹ yin zizedo owù mẹ to whenuena Adam waylando bo gbẹ́ nado kẹalọyi jlọjẹ Jiwheyẹwhe tọn nado ze nujinọtedo dagbewà tọn lẹ dai. (Gẹnẹsisi 3:1-6) Ṣigba, whẹpo ovivi Adam tọn lẹ wá yin jiji taidi mẹhe dugu ylando po okú po tọn, Jiwheyẹwhe dọ dọdai wiwá Okún pipé de tọn. Na taun tọn, to hodidọ na “odàn hoho lọ,” Satani Lẹgba mẹ, Jehovah lá dọmọ: “Yẹn nasọ yí okẹ̀n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe hiẹ na só afọgbẹn etọn.” (Osọhia 12:9; Gẹnẹsisi 3:15) Lẹndai Jehovah tọn wẹ nado fli gbẹtọvi ylandonọ lẹ gọ̀. To dohia dagbewà he yè ma jẹna de tọn mẹ, Jehovah na taun tọn ko basi awuwledainanu whlẹngán tọn na mẹhe tindo yise to avọ́sinsan ofligọ Visunnu yiwanna vivẹ etọn tọn mẹ lẹ.—Matiu 20:28; Lomunu lẹ 5:8, 12.
5. Dile etlẹ yindọ mí ko dugu ayilinlẹn ylankan ahun mẹ tọn, naegbọn mí sọgan wà dagbe jẹ obá de mẹ?
5 Nugbo wẹ dọ, na ylando Adam tọn wutu mí ko dugu ayilinlẹn ylankan ahun mẹ tọn. (Gẹnẹsisi 8:21) Ṣigba, homẹ mítọn hùn dọ Jehovah nọ gọalọna mí nado wà dagbe jẹ obá de mẹ. E mayin dọ nukọnzinzindo to nuhe yin pinplọn sọn owe wiwe lẹ mẹ ‘nọ hẹn mí yin nuyọnẹntọ na whlẹngán’ bo ‘nọ hẹn mí pegan na azọ́n dagbe lẹpo’ kẹdẹ wẹ gba ṣigba e sọ nọ hẹn mí penugo nado wà nuhe yin dagbe to nukun etọn mẹ. (2 Timoti 3:14-17) Nalete, nado mọaleyi sọn anademẹ Owe-wiwe tọn mẹ bo do dagbewà hia, mí dona tindo pọndohlan psalm-kàntọ tọn he jihàn dọmọ: “Yinyọ́n wẹ hiẹ [Jehovah], bosọ nọ wà [dagbe]; plọn osẹ́ndoai towe lẹ mi.”—Psalm 119:68.
Dagbewà Jehovah Tọn Yin Pipà Tlala
6. To whenuena Ahọlu Davidi ko hẹn aki alẹnu tọn lọ wá Jelusalẹm godo, hogbe tẹlẹ wẹ ohàn he Levinu lẹ ji lọ bẹhẹn?
6 Ahọlu Davidi Islaeli hohowhenu tọn yọ́n dagbewà Jiwheyẹwhe tọn bosọ dín anademẹ Etọn. ‘Yinyọ́n podọ nugbonọ wẹ Jehovah,’ wẹ Davidi dọ. “Enẹwutu wẹ e na to ali lọ plọn ylandonọ lẹ.” (Psalm 25:8) Anademẹ Jiwheyẹwhe tọn heyin nina Islaelivi lẹ bẹ osẹ́n titengbe ao lẹ hẹn—yèdọ Gbedide Ao lẹ—heyin kinkàn do tafo zánnu tọn awe ji bo yin whiwhla do apotin wiwe de he nọ yin yiylọdọ aki alẹnu tọn lọ mẹ. To whenuena Davidi ko hẹn Aki lọ wá tòdaho tatọ́-tònọ Islaeli tọn Jelusalẹm mẹ godo, Levinu lẹ ji ohàn de he bẹ hogbe ehe hẹn dọmọ: “Mì nọ na opẹ́ lẹ hlan OKLUNỌ; na yinyọ́n wẹ ewọ: na lẹblanu etọn to ote doidoi.” (1 Otannugbo lẹ 16:34, 37-41) Lehe e dona ko yin awuvivinu nado sè hogbe enẹlẹ sọn onù hànjitọ Levinu lẹ tọn mẹ do sọ!
7. Etẹwẹ jọ to whenuena Aki lọ yin hinhẹnwa Fiwiwe Gbahugbahu lọ podọ to odẹ̀ klandowiwe tọn he Sọlọmọni hò lọ godo?
7 Hogbe pipà tọn dopolọ sọ yin nùzindeji to klandowiwe tẹmpli Jehovah tọn he visunnu Davidi tọn Sọlọmọni gbá lọ whenu. To whenuena aki alẹnu tọn ko yin zizedo Fiwiwe Gbahugbahu tẹmpli yọyọ heyin gbigbá lọ tọn, Levinu lẹ jẹ Jehovah pà ji dọ, “na yinyọ́n wẹ ewọ, na lẹblanu etọn to ote doidoi.” To nujijọ enẹ whenu tẹmpli lọ gọ́ po aslọ po he yin yẹhiadonu tintin to finẹ gigonọ Jehovah tọn. (2 Otannugbo lẹ 5:13, 14) Bọdo odẹ̀ klandowiwe Sọlọmọni tọn go, “miyọ́n jẹte sọn olọn mẹ wá, bo fiọ avọ́ nunina mimẹ̀ lọ, po avọ́sannu lẹ po.” To ehe mimọ mẹ, “ovi Islaeli tọn lẹpo . . . dẹ́ yede po nukunmẹ yetọn lẹ po hlan aigba to aigba titẹ́ lọ ji, bo litai, bo na opẹ́ lẹ hlan OKLUNỌ, dọmọ, na ewọ yin yinyọ́n; na lẹblanu etọn to ote doidoi.” (2 Otannugbo lẹ 7:1-3) To hùnwhẹ azán 14 tọn de godo, Islaelivi lẹ lẹkọyi owhé yetọn gbè “[bo yin] ayajẹnọ po homẹvivinọ ayiha tọn po na dagbewà he OKLUNỌ dohia hlan Davidi, podọ hlan Sọlọmọni, podọ hlan Islaeli omẹ etọn lẹ.”—2 Otannugbo lẹ 7:10.
8, 9. (a) Dile etlẹ yindọ Islaelivi lẹ pà Jehovah na dagbewà etọn, etẹwẹ yé wà to godo mẹ? (b) Dọdai tẹwẹ yin didọ gbọn Jẹlemia gblamẹ gando Jelusalẹm go, podọ nawẹ e yin hinhẹndi gbọn?
8 E blawu dọ, Islaelivi lẹ ma zindonukọn nado nọgbẹ̀ sọgbe hẹ ohàn pipà tọn yetọn hlan Jiwheyẹwhe. To ojlẹ vude godo, omẹ Juda tọn lẹ ‘yí nùflo tata do pagigona Jehovah.’ (Isaia 29:13) Kakati nado nọgbẹ̀ sọgbe hẹ nujinọtedo dagbewà Jiwheyẹwhe tọn lẹ, yé jẹ nuhe yin oylan wà ji. Podọ etẹwẹ ylanwiwa yetọn bẹhẹn? Etẹ nkọ, yé huwhẹ̀ boṣiọ-sinsẹ̀n, fẹnnuwiwa, kọgbidina wamọnọ lẹ, po ylando sinsinyẹn devo lẹ po tọn! Taidi kọdetọn, Jelusalẹm yin vivasudo bọ tòmẹnu Juda tọn lẹ yin bibẹ sọyi kanlinmọgbenu to Babilọni to 607 J.W.M.
9 Gbọnmọ dali Jiwheyẹwhe do mẹplọnlọ omẹ etọn lẹ go. Etomọṣo, gbọn yẹwhegán etọn Jẹlemia dali, e dọ dọdai dọ ogbè de na gbẹsọ yin sisè to Jelusalẹm dọmọ: “Na opẹ́ lẹ hlan OKLUNỌ awhànpa lẹ tọn, na yinyọ́n wẹ OKLUNỌ, na lẹblanu etọn to ote doidoi.” (Jẹlemia 33:10, 11) Podọ mọwẹ e jọ do niyẹn. To vọjijẹ owhe 70 otò lọ tọn godo, pipotọ Juvi lẹ tọn lẹkọwa Jelusalẹm to 537 J.W.M. (Jẹlemia 25:11; Daniẹli 9:1, 2) Yé gbá agbà de do otẹn tẹmpli lọ tọn mẹ to Osó Molia ji bo jẹ avọ́ sán ji to finẹ. Dodonu tẹmpli lọ tọn yin didoai to owhe awetọ mẹ he yé lẹkọwa whé. Ojlẹ aglinjijẹ tọn nankọ die! Ẹzla dọmọ: “Whenuena didótọ lẹ dó dòdó ohọ̀ tẹmpli OKLUNỌ tọn lọ tọn ai, yé tò yẹwhenọ lẹ to awu yetọn lẹ mẹ po opẹ̀n lẹ po, po Levinu visunnu Asafi tọn lẹ lọ po, po ajògàn lẹ po, nado pà OKLUNỌ, kẹdẹdi tito Davidi ahọlu Islaeli tọn tọn lọ. Yé sọ to hànji omẹ de hlan awetọ to pipà mẹ, podọ to opẹ́ lẹ nina hlan OKLUNỌ mẹ, dọmọ, Na dagbe wẹ ewọ, na lẹblanu etọn to [ote] doidoi hlan Islaeli dali.”—Ẹzla 3:1-11.
10. Po hogbe ayidego tọn tẹlẹ po wẹ Psalm 118 bẹjẹeji bosọ wá vivọnu?
10 Hogbe pipà tọn mọnkọtọn lẹ gando dagbewà Jehovah tọn go sọawuhia to psalm susu mẹ. Dopo to yé mẹ wẹ Psalm 118, he whédo Islaelivi lẹ tọn ji nado dotana hùnwhẹ Juwayi tọn. Psalm enẹ bẹjẹeji bosọ yin tadona po hogbe ehelẹ po: “Mì na opẹ́ OKLUNỌ, mì akọta lẹpo; yinyọ́n wẹ ewọ: na dagbewanyi etọn to ote kakadoi.” (Psalm 118:1, 29) Ehe sọgan ko yin hogbe pipà tọn godo tọn he Jesu Klisti ji hẹ apọsteli nugbonọ etọn lẹ to 33 W.M. to ozán he jẹnukọnna okú etọn mẹ.—Matiu 26:30.
“Do Gigo Towe Hia Mi, Yẹn Vẹ̀ We”
11, 12. To whenuena Mose mọ vude to gigo Jiwheyẹwhe tọn mẹ, nulila tẹwẹ e sè?
11 Kanṣiṣa he tin to dagbewà Jehovah tọn po dagbewanyi etọn po ṣẹnṣẹn yin didohia na ojlẹ tintan to owhe kanweko susu lẹ jẹnukọnna ojlẹ Ẹzla tọn. To ojlẹ gli de godo he Islaelivi lẹ basi sinsẹ̀n hlan yìnvu sika tọn to zungbo mẹ bọ ylanwatọ lẹ ko yin vivasudo, Mose vẹvẹna Jehovah dọmọ: “Do gigo towe hia mi, yẹn vẹ̀ we.” Na Jehovah yọnẹn dọ Mose ma sọgan mọ nukunmẹ Etọn bo gán wutu, e dọna ẹn dọmọ: “Yẹn na hẹn dagbewà ṣie lẹpo gbọn nukọn towe.”—Eksọdusi 33:13-20.
12 Dagbewà Jehovah tọn gbọn Mose nukọn to wunkẹngbe to Osó Sinai tọn ji. To ojlẹ enẹ mẹ, Mose mọ vude to gigo Jiwheyẹwhe tọn mẹ bo sè nulila ehe: “OKLUNỌ lọ, OKLUNỌ lọ, Jiwheyẹwhe he gọ́ na [lẹblanu podọ homẹdagbenọ], awuwhletọ nado sadi, podọ susunọ to [dagbewanyi] po nugbo po mẹ; he nọ yí [dagbewanyi] whla na fọtọ́n-fọtọ́n lẹ, he nọ jona oylankan po ylanwiwa po po ylando po: podọ he ma na dike whẹgbledonọ to alọ depope mẹ ni yì ma jiya; he nọ dla oylankan otọ́ lẹ tọn pọ́n to ovi lẹ ji, to whẹndo atọ̀ntọ lọ po ẹnẹtọ lọ po ji.” (Eksọdusi 34:6, 7) Hogbe ehelẹ dohia dọ dagbewà Jehovah tọn tindo kanṣiṣa hẹ dagbewanyi etọn po adà gbẹtọ-yinyin etọn tọn devo lẹ po. Dogbapọnna ehelẹ na gọalọna mí nado nọ wà dagbe. Mì gbọ mí ni gbadopọnna jẹhẹnu he yin nùdego whlaawe to nulila jiawu dagbewà Jiwheyẹwhe tọn ehe mẹ whẹ́.
‘Jiwheyẹwhe . . . Susunọ to Dagbewanyi Mẹ’
13. To nulila dagbewà Jiwheyẹwhe tọn mẹ, jẹhẹnu tẹwẹ yin nùdego whlaawe, podọ naegbọn ehe do sọgbe?
13 ‘Jehovah yin Jiwheyẹwhe de heyin susunọ to dagbewanyi mẹ, he nọ yí dagbewanyi whla na fọtọ́n-fọtọ́n lẹ.’ Hogbe Heblu tọn heyin lilẹdogbedevomẹ do “dagbewanyi” sọ zẹẹmẹdo “owanyi nugbo.” Ehe wẹ yin jẹhẹnu dopo akàn lọ he yin nùdego whlaawe to nulila Jiwheyẹwhe tọn hlan Mose mẹ. Lehe e sọgbe do sọ, to whenuena e yindọ owanyi wẹ yin jẹhẹnu tangan Jehovah tọn! (1 Johanu 4:8) Hogbe pipà hlan Jehovah tọn he yin yinyọnẹn ganji lọ “na dagbewanyi etọn to ote kakadoi” zinnudo jẹhẹnu ehe ji.
14. Mẹnu lẹ na taun tọn wẹ nọ duvivi dagbewà po dagbewanyi Jiwheyẹwhe tọn po?
14 Dopo to dohia dagbewà Jehovah tọn lẹ mẹ wẹ yindọ e yin “susunọ to dagbewanyi mẹ.” Ehe nọ sọawuhia titengbe to nukunpedomẹgo awuvẹmẹ tọn he e nọ na gbẹtọ devizọnwatọ klandowiwe nugbonọ etọn lẹ mẹ. (1 Pita 5:6, 7) Dile Kunnudetọ Jehovah tọn lẹ sọgan dekunnu etọn do, e nọ ‘whla dagbewanyi’ etọn hlan mẹhe yiwanna ẹn bo nọ sẹ̀n ẹn lẹ. (Eksọdusi 20:6) Akọta Islaeli jọwamọ tọn hẹn dagbewanyi, kavi owanyi nugbo Jehovah tọn bu, na yé gbẹ́ Visunnu etọn dai wutu. Ṣigba dagbewà po owanyi nugbo Jiwheyẹwhe tọn po hlan Klistiani nugbonọ akọta lẹpo tọn na nọte kakadoi.—Johanu 3:36.
Jehovah—Lẹblanunọ po Homẹdagbenọ Po
15. (a) Nulila he Mose sè to Osó Sinai ji lẹ bẹjẹeji po hogbe tẹlẹ po? (b) Etẹwẹ lẹblanu bẹhẹn?
15 Nulila he Mose sè to Osó Sinai ji lọ bẹjẹeji po hogbe helẹ po: “OKLUNỌ lọ, OKLUNỌ lọ, Jiwheyẹwhe he gọ́ na [lẹblanu podọ homẹdagbenọ].” Hogbe Heblu tọn he yin lilẹdogbedevomẹ do “lẹblanu” sọgan dlẹnalọdo “adọ̀vi lẹ” podọ e tindo kanṣiṣa hẹ hogbe heyin zinzan na “vidọ̀.” Enẹwutu lẹblanu bẹ numọtolanmẹ awuvẹmẹ sisosiso tọn he tin to gbẹtọ homẹ hẹn. Ṣigba lẹblanu ma yin awubla didohia poun gba. E dona whàn mí nado yí nude wà nado hẹn pọngbọ wá na yajiji mẹdevo lẹ tọn. Di dohia, mẹho Klistiani owanyinọ lẹ nọ mọ nuhudo lọ nado do lẹblanu hia yisenọ hatọ lẹ, ‘bo nọ do lẹblanu hia po homẹhunhun po’ to whenuena e biọ domọ.—Lomunu lẹ 12:8; Jakobu 2:13; Juda 22, 23.
16. Naegbọn e sọgan yin didọ dọ Jehovah yin homẹdagbenọ?
16 Dagbewà Jiwheyẹwhe tọn sọ yin didohia to homẹdagbe etọn mẹ. Mẹhe yin homẹdagbenọ nọ “do awuvẹmẹ sisosiso hia na numọtolanmẹ mẹdevo lẹ tọn” bo nọ do ‘walọdagbe he dọnmẹdogo hia titengbe hlan mẹhe yìdo lẹ.’ Jehovah wẹ apajlẹ he yọnhugan homẹdagbe tọn to nuyiwa hẹ devizọnwatọ nugbonọ etọn lẹ mẹ. Di dohia, gbọn angẹli lẹ gblamẹ, Jiwheyẹwhe gbọn homẹdagbe dali na huhlọn yẹwhegán yọnhonọ Daniẹli. Podọ e sọ dọna yọnnu alọji Malia gando lẹblanulọkẹyi he e na tindo nado ji Jesu go. (Daniẹli 10:19; Luku 1:26-38) Taidi omẹ Jehovah tọn lẹ, na jide tọn mí yọ́n pinpẹn aliho homẹdagbe tọn he e nọ yí do dọhona mí to Biblu mẹ. Mí pà ẹ na dohia dagbewà etọn tọn ehe podọ mí jlo nado yin homẹdagbenọ to nuyiwa mítọn lẹ hẹ mẹdevo lẹ mẹ. To whenuena mẹhe tindo jẹhẹnu gbigbọmẹ tọn lẹ to linlẹn jlado na yisenọ hatọ de to “gbigbọ walọmimiọn tọn mẹ,” yé nọ tẹnpọn nado wadẹẹdẹ, bo yin homẹdagbenọ.—Galatianu lẹ 6:1.
Jiwheyẹwhe Nọ Whleawu Nado Sadi
17. Naegbọn mí dona dopẹ́ dọ Jehovah nọ ‘whleawu nado sadi’?
17 “Jiwheyẹwhe . . . awuwhletọ nado sadi.” Hogbe enẹlẹ dọ̀n ayidonugo wá adà dagbewà Jehovah tọn devo ji. Jehovah nọ yí homẹfa do doakọnna mape mítọn lẹ bo nọ na dotẹnmẹ mí nado dùto madogán sinsinyẹn mítọn lẹ ji bo basi nukọnyiyi gbigbọmẹ tọn. (Heblu lẹ 5:12-6:3; Jakobu 5:14, 15) Mẹhe ma ko yin sinsẹ̀ntọ Jiwheyẹwhe tọn lẹ lọsu nọ mọaleyi sọn homẹfa etọn mẹ. Yé gbẹ́ tindo dotẹnmẹ nado kẹalọyi owẹ̀n Ahọluduta lọ tọn bo lẹnvọjọ. (Lomunu lẹ 2:4) Ṣigba, dile etlẹ yindọ Jehovah yin homẹfanọ, dagbewà etọn nọ whàn ẹn to whedelẹnu nado do homẹgble etọn hia, dile e basi do to whenuena Islaelivi lẹ basi sinsẹ̀n hlan yìnvu sika tọn to Osó Sinai ji. Homẹgble Jiwheyẹwhe tọn na yin didohia to madẹnmẹ to aliho he tlẹ klo hugan de mẹ to whenuena e na và titonu Satani tọn sudo.—Ezekiẹli 38:19, 21-23.
18. Gando nugbodidọ go, vogbingbọn tẹwẹ tin to Jehovah po nukọntọ gbẹtọvi tọn lẹ po ṣẹnṣẹn?
18 ‘Jehovah yin Jiwheyẹwhe he sù to nugbo mẹ.’ Lehe Jehovah gbọnvo mlẹnmlẹn na nukọntọ gbẹtọvi tọn, he nọ dopagbe dahodaho lẹ bo nọ gboawupo nado hẹn yé di lẹ do sọ! To vogbingbọnmẹ, sinsẹ̀ntọ Jehovah tọn lẹ sọgan dejido nuhe Ohó gbọdo etọn dọ lẹpo go. To whenuena e yindọ Jiwheyẹwhe yin susunọ to nugbo mẹ, mí sọgan dejido opagbe etọn lẹ go to whepoponu. To dagbewà etọn mẹ, Otọ́ olọn mẹ tọn mítọn nọ na gblọndo odẹ̀ mítọn lẹ na nugbo gbigbọmẹ tọn gbọn awuwledainanu susugege etọn dali.—Psalm 43:3; 65:2.
19. Dagbewà ayidego tọn tẹwẹ Jehovah ko dohia ylandonọ he lẹnvọjọ lẹ?
19 ‘Jehovah yin Jiwheyẹwhe he nọ jona oylankan po ylanwiwa po po ylando po.’ To dagbewà etọn mẹ, Jehovah wleawufo nado jona ylandonọ he lẹnvọjọ lẹ. Na jide tọn, homẹ mítọn hùn dọ Otọ́ owanyinọ olọn mẹ tọn mítọn ko hẹn jona yọnbasi gbọn avọ́sinsan Jesu tọn gblamẹ. (1 Johanu 2:1, 2) Na nugbo tọn, mí yin ayajẹnọ dọ mẹhe yí yise zan to ofligọ lọ mẹ lẹpo wẹ penugo nado duvivi haṣinṣan dagbe de tọn hẹ Jehovah, po todido ogbẹ̀ mavọmavọ tọn po to aihọn yọyọ dopagbe etọn mẹ. Whẹwhinwhẹ́n ayidego tọn nankọ die nado pà Jehovah na dagbewà etọn hlan gbẹtọvi lẹ!—2 Pita 3:13.
20. Kunnudenu tẹwẹ mí tindo dọ Jiwheyẹwhe ma nọ yí nukun pẹvi do pọ́n ylanwiwa?
20 “ [Jehovah] ma na dike whẹgbledonọ to alọ depope mẹ ni yì ma jiya.” Whẹwhinwhẹ́n devo die na taun tọn nado pà Jehovah na dagbewà etọn. Etẹwutu? Na adà titengbe dagbewà tọn de wẹ yindọ e ma nọ yí nukun pẹvi do pọ́n ylanwiwa to aliho depope mẹ. Humọ, “to whenuena yè na do Jesu Oklunọ hia sọn olọn mẹ, po angẹli huhlọnnọ etọn lẹ po,” ahọsuyi na yin hinhẹnwa “yé he ma yọ́n Jiwheyẹwhe lẹ go, podọ yé he ma setonuna wẹndagbe” lẹ ji. Yè “na yí viva madopodo do sayana” yé. (2 Tẹsalonikanu lẹ 1:6-9) To whenẹnu, sinsẹ̀ntọ Jehovah tọn he luntọ́n lẹ na penugo nado duvivi ogbẹ̀ tọn to gigọ́mẹ bọ sunnu jijọ-madi-Jiwheyẹwhe tọn, he ‘ma tindo owanyi dagbewà tọn’ lẹ ma na dotukla yé.—2 Timoti 3:1-3.
Hodo Apajlẹ Dagbewà Jehovah Tọn
21. Naegbọn mí dona nọ wà dagbe?
21 Matin ayihaawe, mí tindo whẹwhinwhẹ́n susu nado pà bo dopẹna Jehovah na dagbewà etọn. Taidi devizọnwatọ etọn lẹ, be e ma jẹ dọ mí ni wà nuhe go mí pé lẹpo nado do jẹhẹnu ehe hia ya? Mọwẹ, apọsteli Paulu dotuhomẹna Klistiani hatọ lẹ dọmọ: “Mì yin mẹhodotọ Jiwheyẹwhe tọn di ovi yiwanna lẹ.” (Efesunu lẹ 5:1) Otọ́ mítọn olọn mẹ tọn nọ wà dagbe to whepoponu, podọ mílọsu dona wàmọ.
22. Etẹwẹ mí na gbadopọnna to hosọ he bọdego mẹ?
22 Eyin mí klan mídelẹ do wiwe hlan Jehovah po ahun lẹpo po, matin ayihaawe mí na jlo nado hodo apajlẹ dagbewà etọn tọn. Na mí yin kúnkàn Adam ylandonọ tọn wutu, e ma nọ bọawu nado wà nuhe yin dagbe gba. Ṣigba, to hosọ he bọdego mẹ, mí na mọ nuhewutu e do yọnbasi na mí nado wà dagbe. Mí nasọ gbadopọnna aliho voovo he mẹ mí dona hodo apajlẹ Jehovah—yèdọ apajlẹ he yọnhugan dagbewà tọn te lẹ.
Nawẹ Hiẹ Na Na Gblọndo Gbọn?
• Etẹwẹ dagbewà zẹẹmẹdo?
• Hogbe Owe-wiwe tọn tẹwẹ zinnudo dagbewà Jiwheyẹwhe tọn ji?
• Etẹwẹ yin delẹ to adà dagbewà Jehovah tọn lẹ mẹ?
• Naegbọn mí dona hodo apajlẹ dagbewà Jehovah tọn?
[Yẹdide to weda 12]
Jehovah do mẹplọnlọ omẹ etọn hohowhenu tọn lẹ go na yé ma nọgbẹ̀ sọgbe hẹ hogbe mẹpipa tọn yetọn lẹ wutu
Pipotọ nugbonọ de lẹkọwa Jelusalẹm
[Yẹdide to weda 13]
Mose sè nulila ayidego dagbewà Jiwheyẹwhe tọn
[Yẹdide to weda 15]
Dagbewà Jehovah tọn yin mimọ to aliho he mẹ e nọ dọho na mí te to Biblu mẹ