Mì Nọ to Dagbewà Zọnmii
“Sinsẹ́n [hinhọ́n] tọn tin to dagbewà, dodo, po nugbo lẹpo po mẹ.”—EFESUNU LẸ 5:9.
1. Nawẹ gbẹtọ livilivi lẹ to didohia gbọn todin dọ yé kọngbedopọ hẹ Psalm 31:19?
ONÚ dagbe hugan he mẹdepope sọgan wà wẹ nado hẹn gigo wá na Jehovah. Gbẹtọ livilivi lẹ wẹ to ehe wà to egbehe gbọn pipà Jiwheyẹwhe na dagbewà etọn dali. Taidi Kunnudetọ nugbonọ Jehovah tọn lẹ, mí yí ahun lẹpo do yigbe hẹ psalm-kàntọ lọ he jihàn dọmọ: “Na dagbe towe ka klo dole, he hiẹ sọ whlá na yé he dibusi we lẹ.”—Psalm 31:19.
2, 3. Etẹwẹ sọgan jọ eyin walọ dagbe ma zọnpọ hẹ azọ́n gbẹtọ lẹ hinhẹnzun devi tọn mítọn?
2 Sisi sisosiso tintindo na Jehovah nọ whàn mí nado pà ẹ na dagbewà etọn. E sọ nọ whàn mí nado ‘pà Jehovah, dona ẹn, bo lá gigo ahọlu-yinyin etọn tọn.’ (Psalm 145:10-13) Enẹ wẹ zọ́n bọ mí nọ yí zohunhun do tindo mahẹ to azọ́n yẹwhehodidọ Ahọluduta tọn po gbẹtọ lẹ hinhẹnzun devi po tọn mẹ. (Matiu 24:14; 28:19, 20) Na nugbo tọn, gbọnvona azọ́n yẹwhehodidọ tọn mítọn, mí dona sọ tindo walọ dagbe. Eyin e ma yinmọ, mí sọgan hẹn vlẹko wá oyín wiwe Jehovah tọn ji.
3 Mẹsusu nọ yí onù do yigbe dọ yé to Jiwheyẹwhe sẹ̀n, ṣigba walọ yetọn ma nọ sọgbe hẹ nujinọtedo he tin to Ohó gbọdo etọn mẹ lẹ. Apọsteli Paulu wlan gando omẹ mọnkọtọn lẹ go dọmọ: “Hiẹ he to mẹdevo plọn, hiẹ ma plọn dewe? Hiẹ mẹhe dọyẹwheho gbẹtọ ma do fìnnú, hiẹ to núfìn? Hiẹ mẹhe dọ gbẹtọ deayọ blo, hiẹ to ayọde? . . . Oyín Jiwheyẹwhe tọn zun nuzán do ogo na to kosi lẹ ṣẹnṣẹn na hiẹ tọn wutu, yèdọ dile yè wlan ẹn do.”—Lomunu lẹ 2:21, 22, 24.
4. Nugandomẹgo tẹwẹ walọ dagbe mítọn nọ tindo?
4 Kakati nado hẹn vlẹko wá oyín Jehovah tọn ji, mí nọ dovivẹnu nado pagigona ẹn gbọn walọ dagbe mítọn dali. Ehe nọ tindo nuyiwadomẹji dagbe do mẹhe tin to gbonu agun Klistiani tọn lẹ ji. Humọ, e nọ gọalọ na mí nado bọnùdo na agọjẹdomẹtọ mítọn lẹ. (1 Pita 2:15) Dehe sọ yin titengbe hugan lọ wẹ yindọ, walọ dagbe mítọn nọ dọ̀n gbẹtọ lẹ wá titobasinanu Jehovah tọn mẹ, bo nọ hùn aliho dote na yé nado pagigona ẹn bo mọ ogbẹ̀ madopodo yí.—Owalọ lẹ 13:48.
5. Kanbiọ tẹlẹ wẹ mí na gbadopọnna todin?
5 To whenuena e yindọ mapenọ wẹ mí yin, nawẹ mí sọgan dapana walọyizan he sọgan kọnmasin do Jehovah go bosọ hẹn nugbo-dintọ lẹ dahli gbọn? Podọ nawẹ mí sọgan tindo kọdetọn dagbe to dagbewiwa mẹ gbọn?
Sinsẹ́n Hinhọ́n Tọn De
6. Etẹwẹ yin delẹ to “azọ́n zinvlu tọn he ma do sinsẹ́n” lẹ mẹ, ṣigba sinsẹ́n tẹwẹ dona sọawuhia to Klistiani lẹ ṣẹnṣẹn?
6 Taidi Klistiani klandowiwe lẹ, mí tindo nude he nọ gọalọna mí nado dapana “azọ́n zinvlu tọn he ma do sinsẹ́n” lẹ. Ehelẹ bẹ azọ́n he nọ kọnmasin do Jiwheyẹwhe go mọnkọtọn lẹ hẹn taidi lalodido, ajojijẹ, hogbe mẹzunzun tọn, hodidọ mawé tọn lẹ dogbọn zanhẹmẹ dali, walọ fẹnnuwiwa tọn, aslan mawé, po ahànnumu po. (Efesunu lẹ 4:25, 28, 31; 5:3, 4, 11, 12, 18) Kakati nado tlọ́ mídelẹ do azọ́n mọnkọtọn lẹ mẹ, mí “nọ zinzọnlin kẹdẹdi ovi hinhọ́n tọn lẹ.” Apọsteli Paulu dọ dọ “sinsẹ́n [hinhọ́n] tọn tin to dagbewà, dodo, po nugbo lẹpo po mẹ.” (Efesunu lẹ 5:8, 9) Enẹwutu zọnlinzinzin to hinhọ́n mẹ wẹ na zọ́n bọ mí na penugo nado zindonukọn to dagbewiwa mẹ. Ṣigba hinhọ́n nankọ wẹ ehe yin?
7. Etẹwẹ mí dona wà nado nọ to sinsẹ́n dagbewà tọn detọ́n zọnmii?
7 Mahopọnna dọ mí yin mapenọ, mí sọgan nọ wadagbe eyin mí nọ zinzọnlin to hinhọ́n gbigbọmẹ tọn mẹ. Psalm-kàntọ lọ jihàn dọmọ: “Ohó towe wẹ zogbán de hlan afọ ṣie, hinhọ́n hlan omọ́-liho ṣie.” (Psalm 119:105) Eyin mí jlo na nọ to ‘sinsẹ́n hinhọ́n tọn’ dohia gbọn ‘dagbewà lẹpo’ gblamẹ, mí dona nọ mọaleyi to gbesisọmẹ sọn hinhọ́n gbigbọmẹ tọn he nọ yin mimọ to Ohó Jiwheyẹwhe tọn mẹ, bo nọ yin dogbapọnna po sọwhiwhe po to zinjẹgbonu Klistiani tọn lẹ mẹ, bosọ nọ yin hodọdeji to gbesisọmẹ to opli mítọn ji lẹ mẹ. (Luku 12:42; Lomunu lẹ 15:4; Heblu lẹ 10:24, 25) Mí dona sọ na ayidonugo vonọtaun hlan apajlẹ po nuplọnmẹ Jesu Klisti tọn lẹ po, heyin “hinhọ́n aihọn tọn” po “hinhọ́n gigo [Jehovah] tọn” po.—Johanu 8:12; Heblu lẹ 1:1-3.
Sinsẹ́n Gbigbọ Tọn De
8. Etẹwẹ sọgan hẹn mí nado wà dagbe?
8 Matin ayihaawe, hinhọ́n gbigbọmẹ tọn nọ gọalọna mí nado wà dagbe. To yidogọmẹ, mí nọ penugo nado do jẹhẹnu ehe hia na gbigbọ wiwe, kavi huhlọn yido wazọ́n Jiwheyẹwhe tọn wẹ to anadena mí wutu. Dagbewà yin dopo to “sinsẹ́n [gbigbọ] tọn” lẹ mẹ. (Galatianu lẹ 5:22, 23) Eyin mí hodo anademẹ gbigbọ wiwe Jehovah tọn tọn, e na hẹn mí nado de sinsẹ́n jiawu lọ tọ́n heyin dagbewà.
9. Nawẹ mí sọgan yinuwa to gbesisọmẹ hẹ ohó Jesu tọn heyin kinkàndai to Luku 11:9-13 mẹ gbọn?
9 Ojlo vẹkuvẹku mítọn nado hẹn homẹhun Jehovah gbọn sinsẹ́n gbigbọ tọn heyin dagbewà didetọ́n dali dona whàn mí nado yinuwa to kọndopọmẹ hẹ ohó Jesu tọn lẹ dọmọ: “Mì biọ, yè nasọ yí na mì; mì dín, mì nasọ mọ; mì húhúhọ̀n, yè nasọ hùn dai hlan mì. Na mẹdepope he biọ, mọ yí; mẹhe sọ dín, mọ; podọ hlan mẹhe sọ húhúhọ̀n yè nasọ hùn dai na ẹn. Eyin ovi biọ akla to mẹdepope mìtọn he yin otọ́ dè, be e na yí zannu na ẹn? Kavi eyin e biọ whèvi, be to whèvi tẹnmẹ, e na yí odàn na ẹn? Kavi eyin e biọ azìn, be e na dike yí aklekle na ẹn? Enẹwutu, eyin mìwlẹ he yin [mapenọ bosọ yin] omẹ ylankan yọ́n le yè nọ na nunina dagbe hlan ovi mìtọn lẹ do, nẹmunẹmu wẹ Otọ́ mìtọn olọn tọn na na [gbigbọ wiwe] hlan yé he biọ to e dè lẹ.” (Luku 11:9-13) Mì gbọ mí ni hodo ayinamẹ Jesu tọn bo nọ biọ gbigbọ Jehovah tọn to odẹ̀ mẹ na mí nido penugo nado nọ do sinsẹ́n etọn heyin dagbewà hia.
‘Zindonukọn to Dagbewiwa Mẹ’
10. Adà dagbewà Jehovah tọn tẹlẹ wẹ yin nùdego to Eksọdusi 34:6, 7 mẹ?
10 Hinhọ́n gbigbọmẹ tọn sọn Ohó Jiwheyẹwhe tọn mẹ po gbigbọ wiwe Jiwheyẹwhe tọn po sọgan gọalọna mí nado ‘zindonukọn to dagbewiwa mẹ.’ (Lomunu lẹ 13:3) Gbọn Biblu pinplọn to gbesisọmẹ dali, mí nọ plọn nususu dogọ dogbọn lehe mí sọgan hodo apajlẹ dagbewà Jehovah tọn do dali. Hosọ he wayi ko dọhodo adà dagbewà Jiwheyẹwhe tọn he yin nùdego to nulila Mose tọn heyin kinkàndai to Eksọdusi 34:6, 7 mẹ lẹ ji, fie mí hia te dọmọ: “OKLUNỌ lọ, OKLUNỌ lọ, Jiwheyẹwhe he gọ́ na [lẹblanu podọ homẹdagbenọ], awuwhletọ nado sadi, podọ susunọ to [dagbewanyi] po nugbo po mẹ; he nọ yí [dagbewanyi] whlá na fọtọ́n-fọtọ́n lẹ, he nọ jona oylankan po ylanwiwa po po ylando po: podọ he ma na dike whẹgbledonọ to alọ depope mẹ ni yì majiya.” Dogbigbapọnna adà dagbewà Jehovah tọn ehelẹ pẹkipẹki na gọalọna mí nado ‘zindonukọn to dagbewiwa mẹ.’
11. Nawẹ yinyọnẹn dọ Jehovah yin lẹblanunọ po homẹdagbenọ po dona yinuwado mí ji gbọn?
11 Nulila sọn olọn mẹ wá ehe nọ hẹn mí tin to aṣeji nado hodo apajlẹ Jehovah tọn gbọn yinyin lẹblanunọ po homẹdagbenọ po dali. ‘Ayajẹnọ wẹ lẹblanunọ lẹ,’ wẹ Jesu dọ, “na yé na mọ lẹblanu yí.” (Matiu 5:7; Luku 6:36) Na mí yọnẹn dọ Jehovah yin homẹdagbenọ wutu, mí nọ yin whinwhàn nado yin homẹdagbenọ bo jọmẹ to nuyiwa mítọn hẹ mẹdevo lẹ mẹ, gọna mẹhe mí nọ dọyẹwheho na lẹ. Ehe sọgbe hẹ ayinamẹ Paulu tọn dọmọ: “Mì gbọ hogbe mìtọn ni tin po [homẹdagbe] po to whepoponu, ehe ojẹ̀ pé, na mìwlẹ nido yọ́n le mì na nọ gblọnhona gbẹtọ lẹ dopodopo do.”—Kọlọsinu lẹ 4:6.
12. (a) To whenuena e yindọ Jiwheyẹwhe nọ whleawu nado sadi, nawẹ mí dona yinuwa hẹ mẹdevo lẹ gbọn? (b) Etẹwẹ dagbewanyi Jehovah tọn nọ whàn mí nado wà?
12 To whenuena e yindọ Jiwheyẹwhe yin awuwhletọ nado sadi, ojlo mítọn nado ‘zindonukọn to dagbewiwa mẹ’ dona nọ whàn mí nado doakọnna nuṣiwa flinflin yisenọ hatọ mítọn lẹ tọn bo na nọ ze ayidonugo do jẹhẹnu dagbe yetọn lẹ ji. (Matiu 7:5; Jakobu 1:19) Dagbewanyi Jehovah tọn nọ whàn mí nado do owanyi nugbo hia, etlẹ yin to ninọmẹ sinsinyẹn hugan lẹ glọ. Na taun tọn, ehe jẹ domọ.—Howhinwhẹn lẹ 19:22.
13. Nawẹ mí dona yinuwa gbọn nado dohia dọ Jehovah yin ‘susunọ to nugbo mẹ’?
13 To whenuena e yindọ Otọ́ olọn mẹ tọn mítọn yin ‘susunọ to nugbo mẹ,’ mí nọ tẹnpọn nado ‘suwhẹna mídelẹ taidi devizọnwatọ etọn lẹ gbọn nugbodidọ dali.’ (2 Kọlintinu lẹ 6:3-7) To onú ṣinawe he yin osùnú na Jehovah lẹ mẹ wẹ “odẹ́ lalo tọn” po “kunnudetọ lalo tọn he to ohó lalo dọ” po tin te. (Howhinwhẹn lẹ 6:16-19) Enẹwutu ojlo nado hẹn homẹhun Jiwheyẹwhe ko whàn mí nado ‘jo lalodido dai bo nọ dọ nugbo.’ (Efesunu lẹ 4:25) Mì gbọ mí ni ma gboawupo to dagbewiwa to aliho titengbe ehe mẹ blo.
14. Naegbọn mí dona nọ jonamẹ?
14 Nulila Jiwheyẹwhe tọn hlan Mose sọ dona whàn mí nado nọ jonamẹ, na Jehovah nọ jlo nado jonamẹ wutu. (Matiu 6:14, 15) Etomọṣo, Jehovah nọ sayana ylandonọ he ma lẹnvọjọ lẹ. Enẹwutu, mí dona tẹdo nujinọtedo dagbewà etọn tọn lẹ go nado hẹn wiweji-ninọ gbigbọmẹ agun lọ tọn go.—Levitiku 5:1; 1 Kọlintinu lẹ 5:11, 12; 1 Timoti 5:22.
“Mì Nọ Payi”
15, 16. Nawẹ ayinamẹ Paulu tọn he yin kinkàndai to Efesunu lẹ 5:15-19 mẹ sọgan gọalọna mí nado zindonukọn to dagbewiwa mẹ gbọn?
15 Nado sọgan nọ hodo aliho dagbewiwa tọn mahopọnna ylanwiwa he lẹdo mí pé lẹ, mí dona gọ́ na gbigbọ Jiwheyẹwhe tọn bo nọ payi lehe mí to zọnlinzin do go. Enẹwutu, Paulu dotuhomẹna Klistiani he to Efesu lẹ dọmọ: “Mì nọ payi do zinzọnlin to jijọ pipé mẹ, e ma yin di nulunọ gba, ṣigba di nuyọnẹntọ. Mì nọ fli ojlẹ; na ylankan wẹ azán lẹ wutu. Enẹwutu mì yin wunvinọ blo, ṣigba mì ni tunwun nuhe ojlo Oklunọ tọn yin go. Mì sọ gọ́ na ovẹn blo, ehe mẹ wazẹjlẹgo te; ṣigba mì gọ́ na [gbigbọ]. Mì nọ dọho hẹ mìnọzo to ohàn wiwe mẹ, to ohàn pipà tọn mẹ, podọ to ohàn gbigbọnọ mẹ, mì nọ kehàn, bosọ nọ jihàn gbèpli to ayiha mìtọn mẹ hlan Oklunọ.” (Efesunu lẹ 5:15-19) Na jide tọn, ayinamẹ ehe sọgbe na mí to ojlẹ sinsinyẹn azán godo tọn ehelẹ mẹ.—2 Timoti 3:1.
16 Eyin mí na zindonukọn to dagbewiwa mẹ, mí dona payi nado nọ zinzọnlin di mẹhe to nuyọnẹn jijọ-di-Jiwheyẹwhe tọn yizan lẹ. (Jakobu 3:17) Mí dona dapana ylando sinsinyẹn lẹ bo dona gọ́ na gbigbọ wiwe, bo dike ni nọ deanana mí. (Galatianu lẹ 5:19-25) Eyin mí nọ yí nuplọnmẹ gbigbọmẹ tọn he yin ninamẹ to opli Klistiani tọn lẹ, plidopọ lẹdo tọn po agbegbe tọn lẹ po ji do yizan mẹ, mí sọgan to nuhe yin dagbe wà zọnmii. Ohó Paulu tọn lẹ hlan Efesunu lẹ sọgan sọ flinnu mí dọ to suhugan opli mítọn lẹ tẹnmẹ, mí nọ mọaleyi sọn “ohàn gbigbọnọ” mítọn lẹ jiji po ahun lẹpo po mẹ, na susu yetọn dọhodo jẹhẹnu gbigbọ tọn lẹ taidi dagbewà ji.
17. Nujikudo tẹwẹ mẹhe to awutu sinsinyẹn jẹ lẹ sọgan tindo eyin ninọmẹ yetọn glọnalina yé nado nọ wá opli lẹ to gbesisọmẹ?
17 Etẹwẹ dogbọn yisenọ hatọ mítọn he ma penugo nado wá opli Klistiani tọn lẹ to gbesisọmẹ na awutu sinsinyẹn wutu lẹ dali? Yé sọgan jẹflumẹ na yé ma sọgan basi sinsẹ̀n hlan Jehovah to whepoponu to kọndopọmẹ hẹ mẹmẹsunnu po mẹmẹyọnnu gbigbọmẹ tọn yetọn lẹ po wutu. Ṣigba yé sọgan deji dọ Jehovah mọnukunnujẹ ninọmẹ yetọn lẹ mẹ, bo na hẹn yé do nugbo lọ mẹ, bo na na yé gbigbọ wiwe etọn, bo nasọ gọalọna yé nado nọ to nuhe yin dagbe wà zọnmii.—Isaia 57:15.
18. Etẹwẹ na gọalọna mí nado doafọna aliho dagbewiwa tọn?
18 Afọdidona aliho dagbewiwa tọn biọ dọ mí ni yí nuyọnẹn do de gbẹdohẹmẹtọ mítọn lẹ bo dapana mẹhe ‘ma yiwanna dagbewiwa lẹ.’ (2 Timoti 3:2-5; 1 Kọlintinu lẹ 15:33) Ayinamẹ mọnkọtọn yiyido yizanmẹ nọ gọalọna mí ma nado “hẹn homẹgblena [gbigbọ wiwe] Jiwheyẹwhe tọn” gbọn nuyiwa jẹagọdo anademẹ etọn lẹ dali. (Efesunu lẹ 4:30) Humọ, mí nọ yin alọgọna nado wà nuhe yin dagbe, eyin mí tindo haṣinṣan pẹkipẹki hẹ mẹhe nuyiwa yetọn lẹ dohia dọ yé yiwanna dagbewiwa bọ gbigbọ wiwe Jiwheyẹwhe tọn to anadena lẹ.—Amọsi 5:15; Lomunu lẹ 8:14; Galatianu lẹ 5:18.
Dagbewiwa Nọ Hẹn Kọdetọn Dagbe lẹ Wá
19-21. Dọ numimọ delẹ he do nuyiwadomẹji dagbewiwa tọn lẹ hia.
19 Zọnlinzinzin to hinhọ́n gbigbọmẹ tọn mẹ, hihodo anademẹ gbigbọ Jiwheyẹwhe tọn, po pipayi lehe mí nọ zinzọnlin do po go na gọalọna mí nado dapana nuhe yin oylan bo na ‘zindonukọn to dagbewiwa mẹ.’ Ehe sọgan de sinsẹ́n dagbe lẹ tọ́n to godo mẹ. Lẹnnupọndo numimọ Zongezile, heyin dopo to Kunnudetọ Jehovah tọn lẹ to Afrique du Sud mẹ ji. To whenuena e jei wehọmẹ to afọnnu gbèdopo, e zẹ̀ nado pọ́n akuẹ nẹmu he pò to akuẹsẹdotẹn etọn mẹ. Wema he maṣinu lọ detọ́n na ẹn do akuẹ lankan R42 000 [nudi $6 000, États-Unis tọn] hia. Dopo to mẹhe nọ ṣọ́ akuẹsẹdotẹn lọ po mẹdevo lẹ po dotuhomẹna ẹn nado yí akuẹ lọ bo bẹ ẹ yì akuẹsẹdotẹn devo. Kunnudetọ asu po asi po he dè e nọ nọ̀ lẹ kẹdẹ wẹ pà ẹ dọ e ma yí akuẹ lankan lọ.
20 To afọnnu azọ́nzán he bọdego tọn gbè, Zongezile yì dọ nuṣiwa lọ na akuẹsẹdotẹn lọ. E wá yin ayidego dọ sọha akuẹsẹdo-wema etọn tọn diblayin nudopolọ po dawe adọkunnọ de tọn po, bọ dawe lọ ko gbọn nuṣiwa dali bẹ akuẹ do akuẹ etọn ji. Na e paṣa dawe adọkunnọ lọ dọ Zongezile ma yí depope to akuẹ lankan lọ mẹ wutu, e kanse e dọ: “Sinsẹ̀n tẹwẹ a nọ yì?” Zongezile basi zẹẹmẹ dọ emi yin Kunnudetọ Jehovah tọn. Ogán akuẹsẹdotẹn lọ tọn lẹ pà ẹ taun, bo dọmọ: “Lehe e na ko yọ́n do eyin mẹlẹpo sọgan yin nugbodọtọ di Kunnudetọ Jehovah tọn lẹ.” Na nugbo tọn, walọ nugbodidọ po dagbewiwa tọn po sọgan sisẹ mẹdevo lẹ nado pagigona Jehovah.—Heblu lẹ 13:18.
21 Walọ dagbewiwa tọn lẹ ma dona yin dehe diyin dandan whẹpo e nado tindo nuyiwadomẹji dagbe gba. Di dohia: Jọja Kunnudetọ de he yin yẹwhehodọtọ whenu-gigọ́ tọn to lopo Samoa tọn lẹ dopo ji yì dotowhé lẹdo lọ tọn. Gbẹtọ lẹ to tenọpọn doto lọ, podọ Kunnudetọ lọ doayi e go dọ awutu lọ sinyẹn taun na yọnnu yọnhonọ he bọdego. E diọ otẹn etọn jona yọnnu lọ na e nido yawu yin nukunpedego. To whedevonu, Kunnudetọ lọ dukosọ hẹ yọnnu yọnhonọ lọ to ahimẹ. E yọ́n dẹpẹ lọ bo flin dagbe he e wà na ẹn to dotowhé. Yọnnu lọ dọmọ: “Todin yẹn yọnẹn dọ Kunnudetọ Jehovah tọn lẹ yiwanna kọmẹnu yetọn lẹ nugbo.” Ewọ he ma nọ dotoai na owẹ̀n Ahọluduta lọ tọn dai, kẹalọyi plọnmẹ Biblu whégbè tọn bo jẹ oyọnẹn Ohó Jiwheyẹwhe tọn plọn ji. Mọwẹ, dagbe he dẹpẹ Kunnudetọ lọ wà na ẹn yinuwado e ji.
22. Etẹwẹ yin dopo to aliho titengbe hugan lẹ mẹ nado ‘zindonukọn to dagbewiwa mẹ’?
22 Vlavo hiẹ sọgan dọ numimọ lẹ he na do lehe dagbewà họakuẹ sọ hia. Aliho titengbe dopo nado ‘zindonukọn to dagbewiwa mẹ’ wẹ nado tindo mahẹ to lilá wẹndagbe Ahọluduta Jiwheyẹwhe tọn mẹ to gbesisọmẹ. (Matiu 24:14) Mì gbọ mí ni zindonukọn po zohunhun po to azọ́n nujọnu tọn ehe mẹ, to yinyọnẹn mẹ dọ aliho dopo wẹ e yin nado wà dagbe, titengbe na mẹhe kẹalọyi lẹ. Dehe yin titengbe hugan wẹ yindọ lizọnyizọn mítọn po walọ dagbe mítọn po nọ pagigona Jehovah, heyin asisa daho dagbewà tọn.—Matiu 19:16, 17.
Mì Zindonukọn Nado ‘Nọ Wà Azọ́n Dagbe’
23. Naegbọn lizọnyizọn Klistiani tọn do yin azọ́n dagbe de?
23 Matin ayihaawe, azọ́n dagbe de wẹ lizọnyizọn mítọn yin. E sọgan hẹn whlẹngán wá na mí po mẹhe dotoaina owẹ̀n Biblu tọn bo wá aliho he planmẹ yì ogbẹ̀ madopodo mẹ ji lẹ po. (Matiu 7:13, 14; 1 Timoti 4:16) Enẹwutu, to whenuena mí pannukọn nudide lẹ, ojlo nado wà nuhe yin dagbe sọgan sisẹ mí nado kanse míde dọmọ: ‘Nawẹ nudide ehe na yinuwado azọ́n yẹwhehodidọ Ahọluduta lọ tọn ṣie ji gbọn? Be afọdide he yẹn jlo na ze lọ yin dagbe nugbo ya? Be e na gọalọna mi nado gọalọna mẹdevo lẹ nado kẹalọyi “wẹndagbe madopodo” lọ bo biọ haṣinṣan pẹkipẹki de mẹ hẹ Jehovah Jiwheyẹwhe ya?’ (Osọhia 14:6) Nudide he ze dagbenu Ahọluduta lọ tọn daga lẹ na hẹn ayajẹ daho wá.—Matiu 6:33; Owalọ lẹ 20:35.
24, 25. Etẹwẹ yin delẹ to aliho he mẹ mí sọgan wà dagbe to agun mẹ te, podọ nujikudo tẹwẹ mí sọgan tindo eyin mí zindonukọn to dagbewiwa mẹ?
24 Mì gbọ mí ni ma yí nukun pẹvi do pọ́n nuyiwadomẹji dagbewà tọn lẹ gbede blo. Mí sọgan zindonukọn to jẹhẹnu ehe didohia mẹ gbọn godoninọ na agun Klistiani tọn podọ wiwà nuhe go mí pé lẹpo na dagbenu po nukọnyiyi etọn po dali. Na jide tọn opli Klistiani tọn lẹ yìyì to gbesisọmẹ po mahẹ tintindo to e mẹ po yin azọ́n dagbe lẹ. Tintin to opli lẹ ji mítọn nọ na tuli sinsẹ̀n-basitọ hatọ lẹ, podọ gblọndo heyin awuwlena ganji mítọn lẹ nọ jlọ yé dote to gbigbọ-liho. Azọ́n dagbe wẹ e sọ yin nado yí nutindo mítọn lẹ zan nado penukundo Plitẹnhọ Ahọluduta tọn go podọ nado gọalọ nado hẹn ẹn do wiweji. (2 Ahọlu lẹ 22:3-7; 2 Kọlintinu lẹ 9:6, 7) Na nugbo tọn, “le míwlẹ mọtẹn do, mì gbọ mí ni nọ wà dagbe hlan omẹ popo, humọ hlan yé he yin yise whédo tọn lẹ.”—Galatianu lẹ 6:10.
25 Mí ma sọgan slẹ ninọmẹ he mẹ mí sọgan wà dagbe te lẹpo gba. Ṣigba, dile mí pannukọn avùnnukundiọsọmẹnu yọyọ lẹ, mì gbọ mí ni dín anademẹ Owe-wiwe tọn, biọ gbigbọ wiwe Jehovah tọn to odẹ̀ mẹ, bo wà nuhe go mí pé lẹpo nado wà ojlo dagbe pipé etọn lẹ. (Lomunu lẹ 2:9, 10; 12:2) Mí sọgan kudeji dọ Jehovah na dona mí susugege eyin mí zindonukọn to dagbewiwa mẹ.
Nawẹ Hiẹ Na Na Gblọndo Gbọn?
• Nawẹ mí sọgan basi wadotana dagbe hugan tọn gbọn?
• Naegbọn dagbewà yin yiylọdọ ‘sinsẹ́n hinhọ́n tọn’?
• Naegbọn dagbewà yin yiylọdọ ‘sinsẹ́n gbigbọ tọn’?
• Nuyiwadomẹji tẹwẹ walọ dagbe mítọn nọ hẹnwa?
[Yẹdide to weda 17]
Ohó Jiwheyẹwhe tọn po gbigbọ wiwe etọn po nọ gọalọna mí nado wà dagbe
[Yẹdide to weda 18]
Dagbewiwa nọ hẹn kọdetọn dagbe lẹ wá