GBẸTỌ LẸ HINHẸN ZUN DEVI
NUPINPLỌN 10
Gbemima
Nunọwhinnusẹ́n: “Mí magbe nado na mì, e ma yin wẹndagbe Jiwheyẹwhe tọn kẹdẹ gba, ṣigba mídetiti, na mìwlẹ ko lẹzun mẹyiwanna na mí taun wutu.”—1 Tẹs. 2:8.
Nuhe Jesu Wà
1. Pọ́n VIDEO lọ, kavi hia Johanu 3:1, 2. Enẹgodo, lẹnnupọndo kanbiọ he bọdego lẹ ji:
Etẹwẹ gán ko zọ́n bọ Nikodẹmi do mọdọ ozán wẹ emi na zọ̀n nado mọ Jesu bọ e na yọ́n?—Pọ́n Johanu 12:42, 43.
Na Jesu yigbe nado dọhodopọ hẹ Nikodẹmi to zánmẹ wutu, nawẹ Jesu dohia dọ emi magbe nado hẹn gbẹtọ lẹ zun devi gbọn?
Etẹwẹ Nuyiwa Jesu Tọn Ehe Plọn Mí?
2. Mí nọ dohia dọ mí yiwanna gbẹtọ lẹ whenue mí magbe nado gọalọna yé nado lẹzun devi.
Hodo Apajlẹ Jesu Tọn
3. Nọ plọnnu hẹ Biblu plọntọ towe to nọtẹn po ojlẹ he yọ́n na ẹn po mẹ. E sọgan de azán tangan de to osẹ lọ mẹ kavi gànmẹ de to azán de ji. Be e na voawu hugan eyin yè plọnnu hẹ ẹ to azọ́nwatẹn etọn, to owhé etọn gbè kavi to nọtẹn gbangba tọn de wẹ ya? Eyin e yọnbasi, wà nuhe go a pé lẹpo nado hẹn tito towe sọgbe hẹ mẹlọ tọn.
4. Nọ basi oplọn lọ to gbesisọ mẹ. Eyin e wá jọ bọ a ma na to owhé, ma dike oplọn lọ súnadú blo. Kakatimọ, lẹnnupọndo kanbiọ ehelẹ ji:
Be a gán deanana oplọn lọ to ojlẹ devo mẹ to osẹ enẹ mẹ ya?
Be a gán deanana oplọn lọ gbọn alokan ji kavi hodọdopọ video ji tọn de gblamẹ ya?
Be a gán biọ to wẹnlatọ devo si nado deanana oplọn lọ do otẹn towe mẹ ya?
5. Nọ hodẹ̀ nado yinuwa to aliho he sọgbe mẹ. Biọ Jehovah dọ ni gọalọna we nado yí gbemima do to anadena oplọn lọ zọnmii, eyin etlẹ nọ vẹawuna nuplọntọ lọ nado basi oplọn lọ to gbesisọ mẹ kavi yí ayinamẹ Owe-wiwe tọn lẹ do yizan mẹ. (Flp. 2:13) Ayihaawe ma tin dọ nuplọntọ towe do jẹhẹnu dagbe susu; nọ hodẹ̀ dọ Jehovah ni gọalọna we nado ze ayiha do jẹhẹnu enẹlẹ ji.