Kanbiọ lẹ sọn Wehiatọ lẹ Dè

Be e sọgbe nado dọ dọ lẹblanu Jehovah tọn nọ de huhlọn pò na whẹdida dodo etọn wẹ ya?

Dile etlẹ yindọ hodidọ ehe ko yin yiyizan pọ́n, e pọnte hugan nado dapana ẹn na e taidi dọ e zẹẹmẹdo dọ lẹblanu Jehovah tọn nọ de huhlọn pò kavi glọnalina whẹdida dodo etọn, taidi dọ lẹblanu etọn yiaga hugan jẹhẹnu sinsinyẹn whẹdida dodo tọn etọn nkọtọn. Ehe ma sọgbe gba.

Hogbe Heblu tọn na “whẹdida dodo” sọgan sọ zẹẹmẹdo “whẹdida.” Whẹdida dodo tindo kọndopọ pẹkipẹki hẹ dodowiwa. Etomọṣo, whẹdida dodo nọ saba tindo kọndopọ hẹ osẹ́n. Dodowiwa ma nọ saba wàmọ gba. Nugbo wẹ dọ whẹdida dodo Jehovah tọn sọgan bẹ yasanamẹ he sọgbe hẹn, ṣigba e sọgan sọ bẹ awuwiwlena whlẹngán na mẹhe jẹ lẹ hẹn ga. (Gẹnẹsisi 18:20-32; Isaia 56:1; Malaki 4:2) Enẹwutu, whẹdida dodo Jehovah tọn ma dona yin pinpọnhlan taidi nuyiwa fifiẹ tọn kavi he dona yin huhlọn depò na gba.

Hogbe Heblu tọn na “lẹblanu” sọgan dlẹnalọdo aliginglọnna whẹdida hinhẹnṣẹ. E sọgan sọ dlẹnalọdo awuvẹmẹ zohunhun tọn didohia, yèdọ nado hẹn pọngbọ wá na wamọnọ lẹ.—Deutelonomi 10:18; Luku 10:29-37.

Jehovah yin Jiwheyẹwhe whẹdida dodo po lẹblanu po tọn. (Eksọdusi 34:6, 7; Deutelonomi 32:4; Psalm 145:9) Whẹdida dodo po lẹblanu etọn po yin pipé, podọ yé sọ nọ wazọ́n to kọndopọmẹ pẹkipẹki. (Psalm 116:5; Hosea 2:19) Jẹhẹnu awe lọ lẹ tin to jlẹkaji pẹpẹ kavi nọ yidogọna ode awetọ. Enẹwutu, eyin mí dọ dọ lẹblanu Jehovah tọn nọ de huhlọn pò na whẹdida dodo etọn, mí sọ dona dọ ga dọ whẹdida dodo etọn nọ de huhlọn pò na lẹblanu etọn.

Isaia dọ dọdai dọmọ: “OKLUNỌ na nọte, na e nido wà dagbe na mì, podọ enẹwutu wẹ e na do yin zize daga, na e nido walẹblanuna mì: na OKLUNỌ wẹ Jiwheyẹwhe [whẹdida dodo] tọn.” (Isaia 30:18) Isaia dohia tofi dọ whẹdida dodo Jehovah tọn nọ whàn nuyiwa lẹblanu tọn lẹ kakati dọ lẹblanu etọn nọ de huhlọn pò na whẹdida dodo etọn kavi glọnalina ẹn. Jehovah nọ do lẹblanu hia na e yin dodonọ podọ na owanyi etọn wutu.

Nugbo wẹ dọ, Biblu-kàntọ Jakobu wlan dọmọ: “Lẹblanu sọ to awagun do to whẹdida ji.” (Jakobu 2:13b) Ṣigba, lẹdo hodidọ lọ tọn dohia dọ Jakobu ma to hodọ gando Jehovah go gba ṣigba gando Klistiani he do lẹblanu hia lẹ go—di apajlẹ, hlan mẹhe tin to awufiẹsa mẹ po wamọnọ lẹ po. (Jakobu 1:27; 2:1-9) To whenuena lẹblanunọ mọnkọtọn lẹ yin hinhẹnwa whẹdida nukọn, Jehovah nọ doayi walọyizan yetọn go bo nọ gbọn lẹblanu dali jona yé to dodonu avọ́sinsan Visunnu etọn tọn ji. Gbọnmọ dali, nuyiwa lẹblanu tọn yetọn nọ doawagun do whẹgbledomẹ he yé sọgan ko jẹna lẹ ji.—Howhinwhẹn lẹ 14:21; Matiu 5:7; 6:12; 7:2.

Enẹwutu, e ma sọgbe nado dọ dọ whẹdida Jehovah tọn nọ de huhlọn pò na lẹblanu etọn to linlẹn lọ mẹ dọ whẹdida dodo etọn dona yin huhlọn depò na gbọn lẹblanu dali gba. Jẹhẹnu awe lọ lẹ sọzẹn pẹpẹ to Jehovah mẹ. Yé nọ hẹn yede sọzẹn kẹdẹdile yé nọ hẹn jẹhẹnu Jehovah tọn devo lẹ, taidi owanyi po nuyọnẹn po sọzẹn do, bọ jẹhẹnu ehelẹ sọ nọ hẹn yelọsu sọzẹn.