Be Nukọntọ-Yinyin Klisti Tọn Yin Nujọnu Na We Ya?
“Mì sọ yin yiylọ dọ ‘nukọntọ’ blo, na Nukọntọ dopo wẹ mì tindo, yèdọ Klisti.”—MATIU 23:10. NW.
1. Mẹnu kẹdẹ wẹ yin Nukọntọ Klistiani nugbo lẹ tọn?
MARDI whèmẹ, Nisan 11 wẹ. Jesu Klisti na yin hùhù to azán atọ̀n godo. Dlapọn godo tọn etọn yì tẹmpli mẹ die. To gbenẹgbe, Jesu plọn gbẹtọgun he ko pli do finẹ lẹ gọna devi etọn lẹ nuplọnmẹ titengbe de. E dọmọ: “Ṣigba mìwlẹ yin yiylọ dọ Labbi blo: na omẹ dopo wẹ mẹplọntọ mìtọn podọ mẹmẹsunnu wẹ mì omẹ po. Mì sọ ylọ mẹde otọ́ mìtọn to aihọn mẹ blo: na omẹ dopo wẹ Otọ́ mìtọn olọn tọn. Mì sọ yin yiylọ dọ ‘nukọntọ’ blo; na Nukọntọ dopo wẹ mì tindo, yèdọ Klisti.” (Matiu 23:8-10, NW) E họnwun dọ, Jesu Klisti wẹ yin Nukọntọ Klistiani nugbo lẹ tọn.
2, 3. Nuyiwadomẹji tẹwẹ todidoai na Jehovah po alọkikẹyi Nukọntọ he e de lọ po nọ tindo do gbẹzan mítọn lẹ ji?
2 Nuyiwadomẹji dagbe nankọ lẹ die nukọntọ-yinyin Jesu tọn nọ tindo do gbẹzan mítọn lẹ ji eyin mí kẹalọyi i! To dọdai didọ gando wiwá Nukọntọ ehe tọn go, Jehovah Jiwheyẹwhe lá gbọn yẹwhegán Isaia gblamẹ dọmọ: “Mì omẹ he nugbla to hùhù lẹpo mì wá ofi he osin te, mẹhe ma tindo akuẹ; mì wá, mì họ̀, bo dù; nugbo mì họ̀ ovẹn po yìnnọ po mado akuẹ, ma dahina. . . . Mì dotoai dẹẹdẹ na mi, bo dù ehe yọ́n bo gbọ̀ ayiha mìtọn ni vivi to ojó mẹ. . . . Doayi e go, yẹn ko yí ewọ na gbẹtọ lẹ na kunnudetọ nukọntọ, togán na gbẹtọ lẹ.”—Isaia 55:1-4.
3 Isaia yí wunmẹ osin tọn he gbayipe lẹ zan—osin, yìnnọ, po ovẹn po—taidi nunọnutẹnmẹ lẹ nado do lehe gbẹzan mítọn nọ yin nuyiwadeji do eyin mí dotoaina Jehovah bo hodo Nukọntọ po Ogán he ewọ ko na mí lọ po. Kọdetọn lọ fakọnamẹ. E taidi osin fifá kọfo dopo nùnù to owhè ṣádada de mẹ nkọtọn. Nùgbla nugbo po dodowiwa tọn po mítọn gbọ̀. Dile yìnnọ nọ na huhlọn viyẹyẹ lẹ bo nọ gọalọna yé nado whẹ́n do, mọwẹ ‘yìnnọ ohó lọ tọn’ nọ na huhlọn mí bo nọ gọalọna whinwhẹ́n gbigbọmẹ tọn to haṣinṣan mítọn hẹ Jiwheyẹwhe mẹ do. (1 Pita 2:1-3) Podọ mẹnu wẹ sọgan gbẹ́ dọ ovẹn ma nọ yidogọna ayajẹ to hùnwhẹ whenu? To aliho mọnkọtọn de mẹ, sinsẹ̀n-bibasi hlan Jiwheyẹwhe nugbo lọ po afọdòmẹ Nukọntọ heyin dide lọ tọn lẹ po hihodo nọ hẹn gbẹzan ‘tindo ayajẹ mlẹnmlẹn.’ (Deutelonomi 16:15) To whelọnu lo, dandan wẹ e yin dọ mímẹpo—jọja po mẹhomẹ po, sunnu po yọnnu po—ni dohia dọ nukọntọ-yinyin Klisti tọn yin nujọnu na mí. Ṣigba, nawẹ mí sọgan dohia to gbẹzan egbesọegbesọ tọn mítọn mẹ dọ Mẹssia wẹ yin Nukọntọ mítọn gbọn?
Jọja lẹ Emi—Mì to “Nukọnyi to Nuyọnẹn Mẹ”
4. (a) Etẹwẹ jọ to whenuena Jesu owhe 12-mẹvi dla Jelusalẹm pọ́n to ojlẹ Juwayi tọn mẹ? (b) Nawẹ nuyọnẹn Jesu tọn sù sọ to whenuena e dó owhe 12 poun?
4 Gbadopọnna apajlẹ he Nukọntọ mítọn zedai na jọja lẹ. Dile etlẹ yindọ onú vude wẹ yin yinyọnẹn gando ovu-whenu Jesu tọn go, nujijọ dopo do nususu hia. To whenuena e yin owhe 12-mẹvi, mẹjitọ etọn lẹ plan ẹn hẹn to dlapọn whemẹwhemẹ tọn yetọn yì Jelusalẹm na Juwayi whenu. To nujijọ ehe whenu, e tlọ́ ede mlẹnmlẹn do hodọdopọ Owe-wiwe tọn de mẹ bọ whẹndo etọn yì jo e do to mayọnẹn mẹ. Josẹfu po Malia po he to ayimajai mẹ mọ ẹn to tẹmpli mẹ to azán atọ̀n godo, “e sinai to mẹplọntọ lẹ ṣẹnṣẹn, e to ohó yetọn se, bosọ to ohó kanbiọ yé.” Humọ, “avò vò mẹhe se e lẹ, . . . do wuntuntun po gbeyiyi etọn lẹ po go.” Lẹnnupọn, to owhe 12 dido mẹ, e mayin kanbiọ gbigbọmẹ tọn he na hẹnmẹ lẹnnupọn lẹ kẹdẹ wẹ Jesu sọgan kanse gba ṣigba e sọ to gblọndo he gọna wuntuntun lẹ na ga! Matin ayihaawe, azọ́nplọnmẹ mẹjitọ tọn wẹ gọalọna ẹn.—Luku 2:41-50.
5. Nawẹ jọja lẹ sọgan gbeje walọyizan he yé tindo hlan oplọn whẹndo tọn pọ́n gbọn?
5 Vlavo jọja de wẹ hiẹ yin. Eyin mẹjitọ towe lẹ yin devizọnwatọ mẹdezejotọ Jiwheyẹwhe tọn lẹ, e yọnbasi dọ tito-to-whinnu oplọn Biblu tọn gbesisọ tọn de tin to owhé mìtọn gbè. Nawẹ hiẹ nọ yinuwa hlan oplọn whẹndo tọn lọ do? Etẹwutu hiẹ ma na lẹnnupọndo kanbiọ lẹ ji taidi: ‘Be yẹn nọ nọgodona tito Biblu pinplọn tọn he tin to whẹndo ṣie mẹ po ahundopo po ya? Be yẹn nọ kọngbedopọ hẹ ẹ, bo ma nọ wà nudepope nado hẹn tito lọ gble ya?’ (Filippinu lẹ 3:16) ‘Be yẹn nọ tindo mahẹ zohunhun tọn to oplọn lọ mẹ ya? To whenuena e sọgbe, be yẹn nọ kàn kanbiọ lẹ se gando nuhe na yin pinplọn lọ go bosọ nọ na gblọndo do yọn-na-yizan etọn ji ya? Dile yẹn to nukọnyi to gbigbọ-liho, be yẹn to ojlo tindo na ‘núdùdù sinsinyẹn he tin na mẹhe ko whẹ́n lẹ’ ya?’—Heblu lẹ 5:13, 14.
6, 7. Nawẹ tito-to-whinnu Biblu hihia egbesọegbesọ tọn sọgan họakuẹ na jọja lẹ sọ?
6 Tito-to-whinnu Biblu hihia egbesọ tọn sọ họakuẹ ga. Psalm-kàntọ jihàn dọmọ: “Donanọ wẹ mẹhe ma zinzọnlin to hónamẹ mẹylankan lẹ tọn mẹ, . . . ṣigba homẹhunhun etọn tin to osẹ́n OKLUNỌ tọn mẹ; podọ osẹ́n etọn mẹ wẹ e nọ ayihamẹlẹnpọn te to okle po ozán po.” (Psalm 1:1, 2) Jọṣua, heyin mẹjẹmẹtẹnmẹ Mose tọn ‘nọ hia owe osẹ́n tọn bo nọ lẹnayihamẹpọn to emẹ to okle po ozán po.’ Ehe gọalọna ẹn nado yinuwa po nuyọnẹn po podọ e sọ tindo kọdetọn dagbe to azọ́n he Jiwheyẹwhe dè na ẹn lẹ hinhẹndi mẹ. (Jọṣua 1:8) Nukọntọ mítọn, Jesu Klisti dọmọ: “Yè ko wlanwe etọn dọ, gbẹtọ ma to ogbẹ̀ gbọn akla dopo kẹdẹ sinmẹ gba, adavo gbọn ohó he tọn sọn onù Jiwheyẹwhe tọn mẹ lẹpo dali.” (Matiu 4:4) Eyin mí dona nọ dù núdùdù agbasa tọn egbesọegbesọ, nẹmunẹmu wẹ mí sọ dona nọ dù núdùdù gbigbọmẹ tọn to gbesisọ mẹ do ga!
7 To nuhudo gbigbọmẹ tọn etọn lẹ yinyọnẹn mẹ, Nicole owhe 13-mẹvi jẹ Biblu hia ji egbesọegbesọ.a Todin, to owhe 16 tintindo mẹ, e ko hia Biblu blebu whladopo bo ko sọ jẹ odaa na awetọ. Aliho nuyiwa tọn etọn bọawu. “Yẹn magbe nado nọ hia e whè gbau weta dopo to gbèdopo,” wẹ e dọ. Nawẹ Biblu hihia etọn ko gọalọna ẹn gbọn? E gblọn dọmọ: “Nuyiwadomẹji ylankan lẹ sù to egbehe taun. Yẹn nọ pehẹ kọgbidinamẹnu yise ṣie tọn lẹ egbesọegbesọ to wehọmẹ podọ to fidevo lẹ. Biblu hihia egbesọegbesọ nọ gọalọna mi nado flin gbedide po nunọwhinnusẹ́n Biblu tọn lẹ po he nọ na mi tuli nado nọavunte sọta kọgbidinamẹnu lọ lẹ. Taidi kọdetọn de, yẹn mọdọ yẹn sẹpọ Jehovah po Jesu po taun.”
8. Etẹwẹ yin nuyiwa Jesu tọn gando sinagọgu go, podọ nawẹ jọja lẹ sọgan hodo apajlẹ etọn gbọn?
8 Aṣa Jesu tọn wẹ e yin nado nọ dotoai bosọ tindo mahẹ to Owe-wiwe hihia mẹ to sinagọgu mẹ. (Luku 4:16; Owalọ lẹ 15:21) Lehe e na yọ́n sọ na jọja lẹ nado hodo apajlẹ enẹ gbọn opli Klistiani tọn lẹ yìyì to gbesisọmẹ, to fie Biblu nọ yin hihia bo nọ yin pinplọn te dali! To pinpẹn-nutọn-yinyọnẹn didohia na opli enẹlẹ mẹ, Richard heyin owhe 14-mẹvi dọmọ: “Opli lẹ họakuẹ na mi taun. Yẹn nọ yin nuflin gbọzangbọzan gando dagbe po oylan po, walọ dagbe po mawé po, jijọ-di-Klisti tọn po nuhe mayin mọ lẹ po go. Yẹn ma dona yọ́n enẹ gbọn numimọ ylankan lẹ tintindo dali gba.” Mọwẹ, “aṣẹdai OKLUNỌ tọn wẹ nugbo: bo nọ diọ mayọndenọ zun nuyọnẹntọ.” (Psalm 19:7) Nicole lọsu yí i do basi yanwle nado nọ yì opli agun tọn atọ́n lẹpo to osẹ dopodopo mẹ. E sọ nọ yí sọn ganhiho awe jẹ atọ̀n zan nado wleawuna yé.—Efesunu lẹ 5:15, 16.
9. Nawẹ jọja lẹ sọgan “to nukọnyi to nuyọnẹn mẹ” gbọn?
9 Jọja-whenu wẹ yin ojlẹ he yọnhugan lọ nado tindo ‘oyọnẹn Jiwheyẹwhe nugbo dopolọ, po Jesu Klisti, mẹhe e dohlan tọn po.’ (Johanu 17:3) Hiẹ sọgan yọ́n jọja he nọ yí whenu susu zan to owe nukikodonamẹ tọn lẹ hihia mẹ, to televiziọn pinpọn mẹ, to aihundida video tọn lẹ mẹ, podọ to Internet ji. Naegbọn hiẹ na hodo apajlẹ yetọn to whenuena e yindọ hiẹ sọgan hodo apajlẹ pipé Nukọntọ mítọn tọn? Taidi jọja de, ewọ tindo homẹhunhun to nupinplọn gando Jehovah go mẹ. Podọ etẹwẹ yin kọdetọn lọ? Na owanyi he e tindo na onú gbigbọmẹ tọn lẹ wutu, “Jesu to nukọnyi to nuyọnẹn mẹ.” (Luku 2:52) Hiẹ lọsu sọgan wàmọ.
‘Mì Nọ Yin Mẹmẹglọ Hlan Mìnọzo’
10. Etẹwẹ na gọalọ nado hẹn gbẹzan whẹndo tọn yin asisa jijọho po ayajẹ po tọn?
10 Whégbè sọgan yin nọtẹn jijọho po pekọ po tọn de kavi nọtẹn kinklan po nudindọn po tọn. (Howhinwhẹn lẹ 21:19; 26:21) Alọkikẹyi nukọntọ-yinyin Klisti tọn mítọn nọ yidogọna jijọho po ayajẹ po to whẹndo mẹ. Na nugbo tọn, apajlẹ Jesu tọn yin aliho nuyiwa tọn de na haṣinṣan whẹndo tọn. Owe-wiwe dọmọ: “Mì nọ [yin] mẹmẹglọ hlan mìnọzo to osi [Klisti] tọn mẹ. Mì asi lẹ emi, mì nọ [yin] mẹmẹglọ hlan asu mìtọn lẹ taidi hlan Oklunọ. Na asu wẹ ota asi tọn dile Klisti yin ota agun tọn do; ewọ sọ wẹ whlẹngantọ agbasa tọn. . . . Mì asu lẹ emi, mì yiwanna asi mìtọn lẹ, yèdọ dile Klisti ga yiwanna agun lọ do, bosọ yí ede na ẹn.” (Efesunu lẹ 5:21-25) Apọsteli Paulu wlanwe hlan agun he tin to Kọlọsi dọmọ: “Mì ovi lẹ, mì nọ setonuna mẹjitọ mìtọn lẹ to onú popo mẹ, na ehe yọnwhanpẹ tlala to Oklunọ dè.”—Kọlọsinu lẹ 3:18-20.
11. Nawẹ asu de sọgan dohia dọ nukọntọ-yinyin Klisti tọn yin nujọnu na emi gbọn?
11 Ayinamẹ ehe hihodo zẹẹmẹdo dọ asu ni yin nukọntọ to whẹndo mẹ, asi ni yí nugbonọ-yinyin do nọgodona ẹn, podọ ovi lẹ ni setonuna mẹjitọ yetọn lẹ. Ṣigba, tatọ́-yinyin sunnu tọn na dekọtọn do ayajẹ mẹ kiki eyin e basi i to aliho he sọgbe mẹ. Asu nuyọnẹntọ de dona plọn lehe e na yí tatọ́-yinyin zan do gbọn apajlẹ Ota po Nukọntọ ede tọn po, yèdọ Klisti Jesu tọn hihodo dali. (1 Kọlintinu lẹ 11:3) Dile etlẹ yindọ Jesu wá yin “ota to onú lẹpo ji” to godo mẹ, e wá aigba ji, ‘e mayin nado yin lizọnyi na gba, ṣigba nado yilizọn namẹ.’ (Efesunu lẹ 1:22; Matiu 20:28) To aliho mọnkọtọn de mẹ, asu Klistiani de nọ yí tatọ́-yinyin etọn zan, e mayin na ojlo ṣejannabi tọn gba, ṣigba nado penukundo ojlo asi po ovi etọn lẹ po tọn go—mọwẹ, yèdọ whẹndo lọ blebu tọn. (1 Kọlintinu lẹ 13:4, 5) E nọ dín nado hodo apajlẹ jẹhẹnu dagbe Jesu Klisti, heyin ota na ẹn tọn. Taidi Jesu, e nọ yin homẹmimiọnnọ po ayiha whiwhẹnọ po. (Matiu 11:28-30) Hogbe lẹ taidi “jaale” kavi “owhẹ̀ towe whẹ́n” ma nọ sinyẹnawu na ẹn nado dọ to whenuena e ṣinuwa gba. Apajlẹ dagbe sunnu lọ tọn nọ hẹn ẹn bọawu na asi etọn nado yin “alọgọtọ,” ‘gọtọ,’ podọ ‘azọ́nwatọgbẹ́’ de na sunnu lọ, bosọ nọ hẹn ẹn bọawuna yọnnu lọ nado plọnnu sọn e dè podọ nado wazọ́n dopọ hẹ ẹ.—Gẹnẹsisi 2:20; Malaki 2:14.
12. Etẹwẹ na gọalọna asi de nado kẹalọyi nunọwhinnusẹ́n tatọ́-yinyin tọn po awubibọ po?
12 Na asi lọ, e dona yin mẹmẹglọ hlan asu etọn. Ṣigba, eyin gbigbọ aihọn tọn to nuyiwa do ewọ ji, e sọgan gando lehe e nọ pọ́n nunọwhinnusẹ́n tatọ́-yinyin tọn hlan do go, bọ linlẹn lọ nado litai na sunnu de ma nasọ hùnhomẹ na ẹn ba. Owe-wiwe ma dọ dọ sunnu ni dugán-domẹji gba, ṣigba e biọ dọ asi lẹ ni yin mẹmẹglọ hlan asu yetọn lẹ. (Efesunu lẹ 5:24) Biblu sọ dọ ga dọ asu kavi otọ́ lọ na yin azọngbannọ to whẹndo lọ mẹ, podọ to whenuena ayinamẹ etọn lẹ yin hihodo, e nọ yidogọna jijọho po titojininọ po to whẹndo lọ mẹ.—Filippinu lẹ 2:5.
13. Apajlẹ taliai tọn tẹwẹ Jesu zedai na ovi lẹ?
13 Ovi lẹ dona setonuna mẹjitọ yetọn lẹ. Jesu ze apajlẹ he yọ́n taun de dai gando ehe go. Bọdo nujijọ tẹmpli mẹ tọn go to whenuena Jesu owhe 12-mẹvi yin jijodo na azán atọ̀n, “e sọ jẹte hodo [mẹjitọ etọn lẹ] yì, bo wá Nazalẹti, bosọ whiwhẹ ede dai hlan yé.” (Luku 2:51) Tonusise ovi lẹ tọn hlan mẹjitọ lẹ nọ yidogọna jijọho po gbenọpọ po to whẹndo mẹ. To whenuena mẹlẹpo litaina nukọntọ-yinyin Klisti tọn to whẹndo mẹ, kọdetọn lọ nọ yin whẹndo ayajẹnọ de tintindo.
14, 15. Etẹwẹ na gọalọna mí nado tindo kọdetọn dagbe to whenuena mí pannukọn ninọmẹ sinsinyẹn lẹ to whégbè? Na apajlẹ dopo.
14 Etlẹ yin to whenuena ninọmẹ sinsinyẹn lẹ fọ́n to whégbè, apajlẹ Jesu tọn hihodo po alọkikẹyi ayinamẹ etọn po wẹ yin họnhungán lọ na kọdetọn dagbe. Di apajlẹ, alọwiwle Jerry owhe 35-mẹvi tọn hẹ Lana, he tindo viyọnnu aflanmẹ de hẹn nuhahun he yé omẹ awe lẹ ma ko lẹnnupọndeji lẹ wá. Jerry dọmọ: “Yẹn yọnẹn dọ yẹn dona yí nunọwhinnusẹ́n Biblu tọn he hẹn kọdetọn dagbe wá whẹndo devo lẹ mẹ zan nado sọgan yin tatọ́ dagbe de. Ṣigba yẹn wá yọnẹn to madẹnmẹ dọ yẹn dona yí yé zan to nuyọnẹn po wuntuntun daho po mẹ.” Viyọnnu asi etọn tọn nọ pọ́n ẹn hlan taidi aliglọnnamẹnu de to ewọ po onọ̀ etọn po ṣẹnṣẹn bọ e sọ gbẹwanna ẹn sinsinyẹn. Jerry dona tindo wuntuntun nado mọdọ walọyizan ehe yinuwa do nuhe viyọnnu lọ nọ dọ bo nọ wà lẹ ji. Nawẹ e penukundo ninọmẹ lọ go gbọn? Jerry gblọn dọmọ: “Lana po yẹn po kọngbedopọ dọ Lana na penukundo adà mẹplọnlọ didomẹgo mẹjitọ tọn go na ojlẹ de to whenuena yẹn na ze ayidonugo do awuwiwlena haṣinṣan dagbe de hẹ viyọnnu lọ ji. To madẹnmẹ, nuyiwa ehe tindo kọdetọn dagbe lẹ.”
15 To whenuena ninọmẹ sinsinyẹn lẹ pannukọn mí to whégbè, mí dona tindo wuntuntun nado yọ́n nuhewutu hagbẹ whẹndo tọn lẹ to hodọ bo to nuyiwa to aliho enẹ mẹ. Mí sọ dona tindo nuyọnẹn nado yí nunọwhinnusẹ́n Jiwheyẹwhe tọn lẹ do yizan mẹ ganji. Di apajlẹ, Jesu yọ́n nuhewutu yọnnu he to ohùn dì lọ dó alọ ewọ go hezeheze, bosọ yí nuyọnẹn po awuvẹmẹ po do yinuwa hẹ ẹ. (Levitiku 15:25-27; Malku 5:30-34) Nukọntọ mítọn tindo nuyọnẹn po wuntuntun po. (Howhinwhẹn lẹ 8:12) Mí nọ yin ayajẹnọ eyin mí yinuwa dile ewọ na ko wà do.
‘Mì Dín Ahọluduta lọ Whẹ́’
16. Etẹwẹ dona tin to otẹn tintan mẹ to gbẹzan mítọn lẹ mẹ, podọ nawẹ Jesu do ehe hia to apajlẹ etọn mẹ gbọn?
16 Jesu do nuhe dona tin to otẹn tintan mẹ to gbẹzan mẹhe kẹalọyi nukọntọ-yinyin etọn lẹ tọn mẹ hia hezeheze. E dọmọ: “Mì dín ahọludu Jiwheyẹwhe tọn, po dodo etọn po whẹ́.” (Matiu 6: 33) Podọ e do lehe mí sọgan wà ehe do hia gbọn apajlẹ ede tọn dali. To vivọnu azán 40 nùbibla, ayihamẹlinlẹnpọn, po dẹ̀hiho tọn po he bọdo baptẹm etọn go godo, Jesu pehẹ whlepọn de. Satani Lẹgba ze gandudu do “ahọlu yigba aihọn tọn lẹpo” ji donukọnna ẹn. Lẹnnupọndo nuhe na ko yin gbẹzan Jesu tọn ji eyin e ko kẹalọyi nuzedonukọnnamẹ Lẹgba tọn! Ṣigba, Klisti ze ayidonugo do ojlo Otọ́ etọn tọn wiwà ji. E sọ yọnẹn ga dọ gbẹninọ mọnkọtọn to aihọn Satani tọn mẹ na whègli taun. E gbẹ́ nuzedonukọnnamẹ Lẹgba tọn dai to afọdopolọji, bo dọmọ: “Tọ́n sọn ofi, Satani: na yè wlanwe etọn dọ, Hiẹ na litaina Oklunọ Jiwheyẹwhe towe, ewọ dopo kẹdẹ wẹ hiẹ na nọ sẹ̀n.” To madẹnmẹ to enẹgodo, Jesu “ṣẹ yẹwheho dọ, [ji] dọmọ, Mì lẹnvọjọ: na ahọludu olọn tọn sẹpọ.” (Matiu 4:2, 8-10, 17) Klisti lá Ahọluduta Jiwheyẹwhe tọn to gigọ́mẹ na pipotọ gbẹzan aigba ji tọn etọn.
17. Nawẹ mí sọgan dohia dọ dagbenu Ahọluduta tọn lẹ tin to otẹn tintan mẹ to gbẹzan mítọn mẹ gbọn?
17 Mí dona hodo apajlẹ Nukọntọ mítọn tọn bo ma dike aihọn Satani tọn ni klọ mí nado yí agbasazọ́n he nọ suahọ susu do basi yanwle tangan mítọn to gbẹ̀mẹ blo. (Malku 1:17-21) Lehe e na yin nululu sọ na mí nado tlọ́ míde do yanwle aihọn tọn lẹ mẹ bọ nuhe gando Ahọluduta lọ go lẹ na wá tin to otẹn awetọ mẹ! Jesu ko ze yẹwhehodidọ-Ahọluduta tọn po azọ́n gbẹtọ lẹ hinhẹn zun devi tọn po do alọmẹ na mí. (Matiu 24:14; 28:19, 20) Mọwẹ, mí sọgan tindo azọngban whẹndo tọn kavi onú devo lẹ nado penukundego, ṣigba be homẹ mítọn ma nọ hùn nado yí whèjai po sẹfifo lẹ po zan nado hẹn azọngban Klistiani tọn mítọn heyin nado dọyẹwheho podọ nado plọnmẹ di ya? Podọ lehe e namẹ tuli do sọ dọ to owhe sinsẹ̀nzọn 2001 tọn whenu, gbẹtọ 780 000 delẹ penugo nado wà sinsẹ̀nzọn taidi gbehosọnalitọ, kavi lizọnyizọnwatọ whenu-gigọ́ tọn lẹ!
18. Etẹwẹ nọ gọalọna mí nado duvivi lizọnyizọn lọ tọn?
18 Kandai Wẹndagbe tọn lẹ do Jesu hia taidi sunnu he nọ yinuwa bosọ tindo numọtolanmẹ awuvẹmẹ tọn lẹ de. To yinyọ́n ninọmẹ gbigbọmẹ mẹhe lẹdo e lẹ tọn mẹ, lẹblanu yetọn wà ẹ bọ e sọ gọalọna yé po zohunhun po. (Malku 6:31-34) Mí nọ tindo ayajẹ to lizọnyizọn mítọn mẹ eyin mí wà ẹ sọn owanyi mẹ podọ po ojlo alọgigọna mẹdevo lẹ tọn po. Ṣigba nawẹ mí sọgan wleawuna ojlo mọnkọtọn gbọn? Jọja de heyin Jayson dọmọ: “Whenuena yẹn tin to owhe aflanmẹ tọn ṣie lẹ mẹ, yẹn ma nọ duvivi lizọnyizọn lọ tọn sọmọ gba.” Etẹwẹ gọalọna ẹn nado wá tindo owanyi na azọ́n ehe? Jayson gblọn dọmọ: “To whẹndo mítọn mẹ, samedi afọnnu lẹpo nọ yin dide dovo na sinsẹ̀nzọn kunnudegbe tọn. Ehe yọ́n na mi na dile yẹn tọ́n na lizọnyizọn lọ sọ, mọwẹ yẹn nọ mọ wadotana dagbe he e nọ tindo lẹ bọ yẹn sọ nọ duvivi etọn sọ.” Mílọsu dona nọ yí sọwhiwhe do tindo mahẹ to lizọnyizọn lọ mẹ whepoponu.
19. Etẹwẹ dona yin gbemima mítọn gando nukọntọ-yinyin Klisti tọn go?
19 Kọfanamẹnu po alemọyinu po wẹ e nọ yin nado kẹalọyi nukọntọ-yinyin Klisti tọn na nugbo tọn. Eyin mí wàmọ, jọja-whenu nọ yin ojlẹ nukọnyiyi tọn de to oyọnẹn po nuyọnẹn po tintindo mẹ. Gbẹzan whẹndo tọn nọ lẹzun asisa jijọho po ayajẹ po tọn, bọ lizọnyizọn lọ nọ lẹzun nuwiwa he nọ hẹn ayajẹ po pekọ po wá. Enẹwutu, na nugbo tọn, mì gbọ mí ni magbe nado dohia to gbẹzan egbesọegbesọ tọn mítọn mẹ podọ to nudide he mí nọ basi lẹ mẹ dọ nukọntọ-yinyin Klisti tọn yin nujọnu na mí. (Kọlọsinu lẹ 3:23, 24) Nalete, Jesu Klisti sọ to awuwlena nukọntọ-yinyin gbọn asisa devo mẹ—enẹ wẹ agun Klistiani tọn. Hosọ he bọdego na do lehe mí sọgan mọaleyi sọn awuwledainanu ehe mẹ do hia.
[Nudọnamẹ odò tọn]
a Yinkọ delẹ ko yin didiọ.
Be Hiẹ Flin Ya?
• Nawẹ mí nọ mọaleyi sọn hihodo Nukọntọ heyin dide gbọn Jiwheyẹwhe dali mítọn mẹ gbọn?
• Nawẹ jọja lẹ sọgan dohia dọ yé jlo nado hodo apajlẹ nukọntọ-yinyin Jesu tọn gbọn?
• Nuyiwadomẹji tẹwẹ nukọntọ-yinyin Klisti tọn nọ tindo do gbẹzan whẹndo tọn mẹhe litaina ẹn lẹ tọn ji?
• Nawẹ lizọnyizọn mítọn sọgan dohia dọ nukọntọ-yinyin Klisti tọn yin nujọnu na mí do?
[Yẹdide to weda 9]
Jọja-whenu yin ojlẹ he yọ́n de nado tindo oyọnẹn Jiwheyẹwhe tọn po Nukọntọ dide mítọn tọn po
[Yẹdide to weda 10]
Taliai na nukọntọ-yinyin Klisti tọn nọ ze ayajẹ whẹndo tọn daga
[Yẹdide to weda 12]
Jesu dín Ahọluduta lọ whẹ́. Be hiẹ nọ wàmọ ya?