Nukọntọ Dagbe—Fie Wẹ Mí Sọgan Mọ Ẹn Te?

“MẸDE dali wẹ yè gbọn do dó ohọ̀ lẹ dopodopo,” wẹ Biblu dọ, “ṣigba mẹhe dó onú popo wẹ Jiwheyẹwhe.” (Heblu lẹ 3:4; Osọhia 4:11) Na Jiwheyẹwhe nugbo lọ, yèdọ Jehovah, wẹ yin Didatọ mítọn wutu, e “yọ́n didá mítọn [ganji].” (Psalm 103:14) E yọ́n nugopipe po nuhudo mítọn lẹ po to gigọ́mẹ. Podọ na ewọ yin Jiwheyẹwhe owanyinọ de wutu, e nọ jlo nado na pekọ nuhudo enẹlẹ. (Psalm 145:16; 1 Johanu 4:8) Mílọsu tindo nuhudo nukọntọ dagbe de tọn.

Gbọn yẹwhegán Isaia gblamẹ, Jehovah lá dọmọ: “Doayi e go, yẹn ko yí ewọ na gbẹtọ lẹ na kunnudetọ nukọntọ, togán na gbẹtọ lẹ.” (Isaia 55:4) Nuhe na hẹn pọngbọ wá na bẹwlu nukọntọ-yinyin tọn he tin to egbehe wẹ nado yọ́n Nukọntọ heyin dide gbọn Ganhunupotọ mítọn dali lọ, podọ alọkikẹyi nukọntọ-yinyin etọn. To whelọnu lo, mẹnu wẹ yin Nukọntọ po Togán heyin dọdai etọn dọ ehe lọ po? Jẹhẹnu tẹlẹ wẹ e tindo taidi nukọntọ de? Fie wẹ e na plan mí yì? Etẹwẹ mí dona wà nado mọaleyi sọn nukọntọ-yinyin etọn mẹ?

Nukọntọ Heyin Opagbe Etọn Dó lọ Wá

To owhe 2 500 delẹ die wayi, angẹli Gabliẹli sọawuhia yẹwhegán Daniẹli bo dọna ẹn dọmọ: “Yọnẹn bosọ tunayinugo, dọ sọn gbonujẹ yì gbedide lọ tọn nado gọ̀ jo podọ nado do Jelusalẹm hlan [Mẹssia Nukọntọ] lọ, na yin osẹ ṣinawe: po osẹ kandekonukunawe po, e nasọ yín vivọ́ dó, po alihogbó po po dokọdò po, yèdọ to ojlẹ tuklanọ lẹ mẹ.”—Daniẹli 9:25.

E họnwun dọ, ojlẹ tangan he mẹ Nukọntọ heyin dide gbọn Jehovah dali lọ na wá wẹ angẹli lọ to didọna Daniẹli. “Mẹssia Nukọntọ lọ” na sọawuhia to vivọnu osẹ 69, kavi owhe 483 tọn, he bẹjẹeji sọn 455 J.W.M., to whenuena ohó lọ jẹgbonu yì dọ Jelusalẹm ni yin vivọgbá.a (Nẹhemia 2:1-8) Etẹwẹ jọ to vivọnu ojlẹ enẹ tọn? Wẹndagbe kàntọ Luku dọmọ: “Dinvie to owhe fọtọ̀n ahọludu Tibeliu Sesali tọn mẹ he Pọntiu Pilati dù togán to Jude, bọ Hẹlodi sọ dù togán to Galili [29 W.M.], . . . Ohó Jiwheyẹwhe tọn wá Johanu ovi Zakali tọn dè to zungbo mẹ. E sọ wá agbegbe lẹpo ji lẹdo Jọdani, e to yẹwheho baptẹm lẹnvọjọ tọn dọ, hlan desẹ ylando lẹ tọn.” To ojlẹ enẹ mẹ, “gbẹtọ lẹ sọ tin to otodo mẹ” na Mẹssia Nukọntọ lọ. (Luku 3:1-3, 15) Dile etlẹ yindọ gbẹtọ susugege wẹ wá Johanu dè, ewọ mayin Nukọntọ lọ gba.

Enẹgodo to nudi octobre 29 W.M., Jesu Nazalẹti tọn wá Johanu dè nado yin bibaptizi. Johanu sọ dekunnu, dọmọ: “Yẹn mọ [gbigbọ] jẹte sọn olọn di apoe de, e jẹte do e ji. Yẹn masọ yọnẹn, ṣigba mẹhe do mi hlan nado yí osin do baptizi, ewọ wẹ dọ hlan mi, dọ, Ota mẹhe tọn ji hiẹ mọ, bọ [gbigbọ] jẹ do, bọ e nọte to e ji, ewọ lọ wẹ, mẹhe nọ yí [gbigbọ wiwe] do baptizi. Yẹn ko mọ ẹn, bo ko dekunnu dọ ehe wẹ Ovi Jiwheyẹwhe tọn.” (Johanu 1:32-34) To baptẹm etọn whenu, Jesu lẹzun Nukọntọ yiamisisadode lọ—yèdọ Mẹssia, kavi Klisti.

Mọwẹ, ‘nukọntọ po togán akọta lẹ tọn po’ heyin opagbe etọn dó lọ sọawuhia nado yin Jesu Klisti. Podọ eyin mí gbeje jẹhẹnu he e tindo taidi nukọntọ lẹ pọ́n, mí na mọ po awubibọ po dọ nukọntọ-yinyin etọn zẹ̀ nuhe nọ yin bibiọ sọn nukọntọ dagbe de dè to egbehe lẹ go tlala.

Mẹssia Lọ—Nukọntọ Dagbe De

Nukọntọ dagbe de nọ na anademẹ he họnwun lẹ bo nọ gọalọna mẹhe tin to anademẹ etọn glọ lẹ nado tindo nujikudo po nugopipe mẹdetiti tọn lẹ po na yé nido sọgan didẹ nuhahun lẹ ganji. ‘Ehe yin nubiọtomẹsi de na nukọntọ he na tindo kọdetọn dagbe to owhe kanweko 21tọ mẹ de,’ wẹ owe 21st Century Leadership: Dialogues With 100 Top Leaders dọ. Jesu wleawuna todoaitọ etọn lẹ ganji nado pehẹ nuhahun egbesọegbesọ tọn lẹ. Saa lẹnnupọndo hodidọ diyin hugan etọn ji poun—yèdọ Yẹwhehodidọ Osó ji tọn lọ. Hodidọ heyin kinkàndai to Matiu weta 5 jẹ 7 lẹ bẹ ayinamẹ yọn-na-yizan susu hẹn.

Di apajlẹ, lẹnnupọndo ayinamẹ Jesu tọn do lehe yè na didẹ gbèmanọpọ lẹ do ji. E dọmọ: “Enẹwutu eyin hiẹ hẹn nunina towe yì agbà kọ̀n, bosọ flin to finẹ dọ mẹmẹsunnu towe tindo nude do ogo we: jo nunina towe dai to finẹ to agbà nukọn, bo yì, gbọwhẹ hẹ mẹmẹsunnu towe whẹ́; whenẹnu wẹ a ni wá bo na nunina towe.” (Matiu 5:23, 24) Afọdide tintan zize nado gbọwhẹ hẹ mẹdevo lẹ tin to otẹn tintan mẹ—yèdọ tlẹ jẹnukọnna azọngban sinsẹ̀n tọn lẹ bibasi, taidi nunina lẹ bibasi to agbà tẹmpli tọn ji to Jelusalẹm dile Osẹ́n Mose tọn biọ do. Yin e mayin mọ, Jiwheyẹwhe ma na kẹalọyi nuwiwa sinsẹ̀n-bibasi tọn lẹ gba. Ayinamẹ Jesu tọn yọn-na-yizan to egbehe dile e yin do to owhe kanweko susu die wayi do.

Jesu sọ gọalọna todoaitọ etọn lẹ nado dapana omọ̀ fẹnnuwiwa tọn. E na tuli yé dọmọ: “Mì ko se dọ yè dọmọ, Hiẹ ma na deayọ: ṣigba yẹn dọ hlan mì, dọ, Eyin mẹdepope pọ́n yọnnusi de nado wà nugbigble hẹ ẹ, e ko deayọ hẹ ẹ to ayiha etọn mẹ dote.” (Matiu 5:27, 28) Avase he sọgbe nankọtọn die! Etẹwutu mí dona tlẹ jẹ nuyiwa he na planmẹ biọ ayọdide mẹ lẹ ji gbọn nulinlẹnpọn do yé ji dali? Ahun mẹ wẹ ogalilọ po ayọdide po nọ wá sọn, wẹ Jesu dọ. (Matiu 15:18, 19) Mí na yin nuyọnẹntọ nado whlá ahun mítọn.—Howhinwhẹn lẹ 4:23.

Yẹwhehodidọ Osó ji tọn sọ bẹ ayinamẹ dagbe lẹ hẹn do owanyi tintindo na kẹntọ mẹtọn lẹ ji, do johẹmẹ didohia ji, do pọndohlan he sọgbe agbasanu lẹ po gbigbọnu lẹ po tọn tintindo ji, podọ do onú mọnkọtọn devo lẹ ji. (Matiu 5:43-47; 6:1-4, 19-21, 24-34) Jesu tlẹ do lehe yè sọgan dín alọgọ Jiwheyẹwhe tọn do hia gbọn pinplọn todoaitọ etọn lẹ lehe yé na nọ hodẹ̀ do dali. (Matiu 6:9-13) Mẹssia Nukọntọ lọ wleawuna hodotọ etọn lẹ bosọ hẹn yé lodo nado pehẹ nuhahun he gbayipe gbẹtọvi tọn lẹ.

To Yẹwhehodidọ Osó ji tọn mẹ, whla ṣidopo wẹ Jesu bẹ hodidọ etọn lẹ jẹeji po hogbe lọ “mì ko se dọ yè dọ” kavi “yè ko dọ ga” po, ṣigba enẹgodo e nọ ze linlẹn devo donukọnnamẹ, dọmọ “ṣigba yẹn dọ hlan mì.” (Matiu 5:21, 22, 27, 28, 31-34, 38, 39, 43, 44) Enẹ dohia dọ todoaitọ etọn lẹ ko jẹakọ hẹ nuwiwa to aliho delẹ mẹ, sọgbe hẹ aṣa nùmẹ tọn Falesi lẹ tọn lẹ. Ṣigba Jesu to aliho he gbọnvo de dohia yé todin—yèdọ dehe do nuhe Osẹ́n Mose tọn to didọ taun hia. Gbọnmọ dali Jesu to diọdo de hẹnwa aimẹ, podọ e wà ehe to aliho he na hẹn ẹn bọawu na hodotọ etọn lẹ nado kẹalọyi de mẹ. Mọwẹ, Jesu whàn gbẹtọ lẹ nado basi diọdo ayidego tọn lẹ to gbẹzan yetọn mẹ, to gbigbọ-liho podọ to walọyizan-liho. Ehe yin ohia nukọntọ dagbe de tọn.

Owe anadenanu tọn de do lehe e nọ sinyẹnawu sọ nado hẹn diọdo mọnkọtọn de wá hia. E dọmọ: “Nukọntọ he na hẹn diọdo wá lọ dona tindo numọtolanmẹ sisosiso mẹhe nọ penukundo jijọho gbẹtọvi tọn go de tọn, wuntuntun mẹhe nọ plọn walọyizan gbẹtọ tọn de tọn, huhlọn marathon họntọ de tọn, linsinsinyẹn avún de tọn, jidedo-mẹdetiti go mẹhe nọ nọ̀ ede ṣo de tọn, po homẹfa mẹwiwe de tọn po. Podọ eyin e tlẹ tindo jẹhẹnu enẹlẹ, nujikudo depope matin dọ e na tindo kọdetọn dagbe gba.”

“Nukọntọ lẹ dona nọ yinuwa kẹdẹdile yé jlo dọ hodotọ yetọn lẹ ni nọ wà do,” wẹ hosọ de heyin “Nukọntọ-Yinyin: Be Jijọ lẹ Yin Nujọnu Wẹ Ya?” dọ. Na nugbo tọn, nukọntọ dagbe de dona nọ wà nuhe e nọ dọ lẹ. Lehe enẹ yin nugbo gando Jesu Klisti go do sọ! Mọwẹ, e plọn mẹhe tin to e dè lẹ nado yin whiwhẹnọ, ṣigba e sọ wleawuna apajlẹ pọ́n-do-basi tọn de na yé gbọn afọ yetọn lẹ kiklọ dali. (Johanu 13:5-15) E ma do devi etọn lẹ hlan nado dọyẹwheho wẹndagbe Ahọluduta Jiwheyẹwhe tọn poun gba, ṣigba e yí edetiti zan vẹkuvẹku to azọ́n enẹ mẹ. (Matiu 4:18-25; Luku 8:1-3; 9:1-6; 10:1-24; Johanu 10:40-42) Podọ Jesu sọ ze apajlẹ dagbe de dai to whẹho tonusise na nukọntọ-yinyin tọn mẹ. “Ovi ma sọgan wà núde ededenu,” wẹ e dọ gando ede go, “adavo nuhe e mọ Otọ́ wà.”—Johanu 5:19.

Nuhe Jesu dọ bosọ wà he mí mọ to aga lẹ dohia hezeheze dọ ewọ wẹ yin Nukọntọ dagbe lọ. Na nugbo tọn, e zẹ̀ nujinọtedo heyin bibiọ to nukọntọ dagbe gbẹtọvi tọn lẹpo si go. Jesu yin omẹ pipé. E to ogbẹ̀ kakadoi, na e ko mọ jọmaku yí bọdo okú po fọnsọnku etọn po go wutu. (1 Pita 3:18; Osọhia 1:13-18) Nukọntọ gbẹtọvi tọn tẹwẹ sọgan tindo jẹhẹnu ehelẹ?

Etẹwẹ Mí Dona Wà?

Taidi Ahọlu he to gandu Ahọluduta Jiwheyẹwhe tọn tọn, “Mẹssia Nukọntọ lọ” na kọ̀n dona lẹ do gbẹtọvi tonusetọ lẹ ji. Gando ehe go, Owe-wiwe dopagbe dọmọ: “Aihọn na gọ́ na nuyọnẹn OKLUNỌ tọn, dile osin ṣinyọ́n ohù ji do.” (Isaia 11:9) “Homẹmimiọnnọ lẹ na dugu aigba tọn; yé na hẹn homẹhun yede to jijọho susu mẹ.” (Psalm 37:11) “Yé na sinai omẹ dopodopo to vẹntin etọn glọ podọ to votin etọn glọ, podọ mẹde ma na sọ hẹn yé savò gba.” (Mika 4:4) “Jiwheyẹwhe lọsu nasọ nọ̀ hẹ yé. . . . Jiwheyẹwhe nasọ súnsún dasin lẹpo sẹ sọn nukun yetọn mẹ; oku ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi.” —Osọhia 21:3, 4.

Aihọn tin to bẹwlu nukọntọ-yinyin tọn mẹ to egbehe. Ṣigba, Jesu Klisti to anadena homẹmimiọnnọ lẹ nado biọ aihọn yọyọ jijọho tọn mẹ, to fie tonusetọ lẹ na kọnawudopọ to sinsẹ̀n-bibasi Jehovah Jiwheyẹwhe tọn mẹ bosọ zindonukọn jẹ pipé kọ̀n te. Lehe e yin nujọnu do sọ dọ mí yí whenu zan nado tindo oyọnẹn Jiwheyẹwhe nugbo lọ po Nukọntọ dide etọn po tọn bosọ yinuwa to kọndopọmẹ hẹ oyọnẹn enẹ!—Johanu 17:3.

Yẹyi yiaga hugan he mí sọgan dogona mẹde wẹ nado hodo apajlẹ etọn. To whelọnu lo, be mí ma dona hodo apajlẹ Nukọntọ he Klohugan to whenuho gbẹtọvi tọn mẹ tọn—yèdọ Jesu Klisti tọn ya? Nawẹ mí sọgan wàmọ gbọn? Nugandomẹgo tẹwẹ alọkikẹyi nukọntọ-yinyin etọn na tindo do gbẹzan mítọn lẹ ji? Kanbiọ ehelẹ po devo lẹ po na yin hodọdeji to hosọ awe he bọdego lẹ mẹ.

[Nudọnamẹ odò tọn]

[Yẹdide to weda 4]

Daniẹli dọ dọdai wiwá Nukọntọ heyin dide gbọn Jiwheyẹwhe dali tọn

[Yẹdide to weda 7]

Nuplọnmẹ Jesu tọn lẹ wleawuna gbẹtọ lẹ nado pehẹ nuhahun gbẹ̀mẹ tọn lẹ

[Yẹdide to weda 7]

Jesu na deanana tonusetọ lẹ biọ aihọn yọyọ jijọho tọn de mẹ