Lehe Oblọ Agbasa Go Tọn lẹ Na Wá Vivọnu Do

YÍ NUKUN homẹ tọn do pọ́n! Nukun nukuntọ́nnọ lẹ tọn to numọ, tókunọ lẹ to onú lẹpo se, odẹ́ unbọpẹnnọ lẹ tọn to hànji po ayajẹ po, bọ afọ sẹkunọ lẹ tọn jlọ bosọ penugo nado zinzọnlin dánpe. Mí ma to hodọ gando nuwadotana amasinzọnwiwa tọn lẹ go gba, ṣigba gando nuhe na dekọtọn to whenuena Jiwheyẹwhe na dado whẹho gbẹtọvi tọn lẹ mẹ go. Biblu dọ dọdai dọmọ: “Whenẹnu wẹ nukun nukuntọ́nnọ lẹ tọn na hùn, otó tókunọ lẹ tọn nasọ hùn. Whenẹnu wẹ pòtẹn na lọ́n di agbanlin, odẹ́ unbọpẹn tọn nasọ jihàn [po ayajẹ po].” (Isaia 35:5, 6) Ṣigba nawẹ mí sọgan deji dọ dọdai jiawu ehe na yin hinhẹndi nugbonugbo gbọn?

Nado bẹjẹeji, to whenuena Jesu Klisti tin to aigba ji, e hẹn gbẹtọ lẹ jẹ gángán sọn awutu po oblọ agbasa go tọn lẹpo po si. Humọ, kunnudetọ susu—gọna kẹntọ etọn lẹ—mọ suhugan azọ́njiawu etọn lẹ tọn. Na nugbo tọn, e whè gbau to nujijọ dopo mẹ, kẹntọ ayihaawe tindotọ etọn lẹ dindona azọ̀nhẹngbọ de kitokito nado sọgan gblewhẹdo Jesu. Ṣigba po winyan po, yé wá yigbe poun dọ azọ́njiawu lọ jọ nugbonugbo. (Johanu 9:1, 5-34) To whenuena Jesu ko wà azọ́njiawu he yè ma sọgan gbẹ́ devo godo, yé dọ po flumẹjijẹ po dọmọ: “Etẹ wà wẹ mí te? Na dawe he to ohia susu basi.” (Johanu 11:47) Ṣigba, gbẹtọ paa lẹ ma gbẹ́ azọ́njiawu lọ lẹ dai gba, na susu yetọn jẹ yise dohia to Jesu mẹ ji wutu.—Johanu 2:23; 10:41, 42; 12:9-11.

Azọ́njiawu Jesu Tọn lẹ Yin Apajlẹ Azọ̀nhẹngbọ Globu Tọn He Ja

E mayin dọ azọ́njiawu Jesu tọn lẹ do Jesu hia taidi Mẹssia po Visunnu Jiwheyẹwhe tọn po kẹdẹ wẹ gba. Yé wleawuna dodonu de na yise tintindo to opagbe Biblu tọn lẹ mẹ dọ tonusetọ lẹ na yin hinhẹn jẹ gángán to sọgodo. Opagbe ehelẹ bẹ dọdai he tin to Isaia weta 35 mẹ, heyin nudego to bẹjẹeji hẹn. Isaia 33:24 dọ gando agbasalilo sọgodo gbẹtọvi he dibusi Jiwheyẹwhe tọn lẹ go dọmọ: “Finẹnu lẹ ma to na dọmọ, yẹn to azọ̀njẹ.” Mọdopolọ, Osọhia 21:4 dopagbe dọmọ: “Jiwheyẹwhe nasọ súnsún dasin lẹpo sẹ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ [whlepọn po yajiji egbehe tọn lẹ po] ko juwayi.”

Gbẹtọ lẹ nọ hodẹ̀ to gbọzangbọzan na hẹndi dọdai ehelẹ tọn to whenuena yé vọ́ odẹ̀ apajlẹnọ Jesu tọn dọ, he dọ to apadewhe dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Mọwẹ, ojlo Jiwheyẹwhe tọn bẹ aigba po gbẹtọvi lẹ po hẹn. Dile etlẹ yindọ awutu po oblọ lẹ po yin dotẹnmẹ jodona na whẹwhinwhẹ́n de wutu, yé na yin didesẹ to madẹnmẹ, yé ma na hẹn “tokloafọligbe” Jiwheyẹwhe tọn gble kakadoi gba.—Isaia 66:1.a

Jesu Hẹnazọngbọ Vọ́nu Matin Awufiẹsa

Mahopọnna yasanamẹ he gbẹtọ lẹ to oyà etọn ji, Jesu hẹnazọngbọna yé vọ́nu matin awufiẹsa, podọ madọngban. Enẹwutu, linlin ehe tọn gbayipe to niyaniya mẹ, bọ to madẹnmẹ “agundaho lẹ sọ wá e dè, yé po sẹkunọ lẹ po, nukuntọ́nnọ lẹ, unbọpẹn lẹ, klegbesatọ lẹ, po omẹ susu devo lẹ po, yé zlọ́n yé dai to afọ etọn go; e sọ hẹnazọ̀ngbọna yé.” Nawẹ gbẹtọ lẹ yinuwa gbọn? Matiu heyin kunnudetọ yinukundomọ de zindonukọn dọmọ: “Avò vò agundaho lọ, whenuena yé mọ unbọpẹn lẹ to hodọ, klegbesatọ lẹ jẹ gángán, bọ nukuntọ́nnọ lẹ numọ: yé pagigona Jiwheyẹwhe Islaeli tọn.”—Matiu 15:30, 31.

Doayi e go dọ mẹhe Jesu hẹnazọngbọna lẹ mayin ṣinṣinyan po sọwhiwhe po sọn agundaho lọ mẹ gba—yèdọ oklọ de he azọ́njiawu-watọ mẹklọtọ lẹ nọ yizan. Kakatimọ, susu hẹnnumẹ po họntọn mẹhe to azọ̀njẹ lẹ tọn lẹ po “zlọ́n yé dai to afọ [Jesu tọn] go.” Todin mì gbọ mí ni gbadopọnna apajlẹ tangan delẹ heyin nugopipe Jesu tọn nado hẹnazọngbọ.

Nukuntintọ́n: Dile e tin to Jelusalẹm, Jesu hùn nukun na dawe he ‘tọ́nnukun sọn ajimẹ etọn’ de. Dawe ehe yin yinyọnẹn taidi nukuntọ́nnọ nubiọdutọ de to otò lọ mẹ. Enẹwutu hiẹ sọgan lẹnnupọn do aglinjijẹ po zingidi lọ po ji to whenuena gbẹtọ lẹ mọ ẹn bọ e to dindanpe bo mọnú! Ṣigba, e mayin homẹ yemẹpo tọn wẹ hùn gba. Na lehe Jesu ko hùngona kanyinylan yetọn do dai gblehomẹna yé wutu, hagbẹ klandovo he diyin Juvi lẹ tọn delẹ he nọ yin yiylọdọ Falesi lẹ to dindin vẹkuvẹku nado mọ kunnudenu mẹkiklọ tọn dó Jesu go. (Johanu 8:13, 42-44; 9:1, 6-31) Enẹwutu, yé kanhose dawe heyin azọ̀nhẹngbọna lọ, enẹgodo mẹjitọ etọn lẹ, podọ dawe lọ whladopo dogọ. Ṣigba hokansemẹ Falesi lẹ tọn vọ́ nugbo-yinyin azọ́njiawu Jesu tọn dohia poun wẹ, podọ ehe hẹnhomẹgble na yé. Nuyiwa gblezọn sinsẹ̀nnọ yẹnuwatọ ehelẹ tọn paṣa dawe heyin azọ̀nhẹngbọna lọ sọmọ bọ e dọmọ: “Sọn dodo aihọn tọn yè ma ko se dọ, mẹde hùn nukun mẹhe yè ji nukuntọ́nnọ de tọn gbede. Eyin dawe he ma tin sọn Jiwheyẹwhe dè gba, e ma sọgan wà nudepope.” (Johanu 9:32, 33) Na gblọndo nuyọnẹn tọn he do yise hia enẹ wutu, Falesi lẹ “yàn ẹn jẹgbonu,” he zẹẹmẹdo dọ yé yàn dawe he tọ́nnukun dai lọ sọn sinagọgu mẹ.—Johanu 9:22, 34.

Tókuku: Dile Jesu tin to Dekapole, he tin to whèzẹtẹn Otọ̀ Jọdani tọn, “yé sọ hẹn mẹde wá e dè mẹde heyin tókunọ, he sọ jọ unbọpẹn to odẹ́ etọn mẹ.” (Malku 7:31, 32) E mayin dọ Jesu hẹnazọngbọna omẹ lọ kẹdẹ wẹ gba ṣigba e sọ yọ́n numọtolanmẹ tókunọ lọ tọn lẹ ganji, mẹhe winyan sọgan hù to agundaho lọ mẹ. Biblu dọna mí dọ Jesu “sọ de [tókunọ lọ] sọn agundaho lọ mẹ jẹ apadopo” bo hẹnazọngbọna ẹn. Whladopo dogọ, ‘avò sọ vò yé mẹhe mọ nujijọ lọ lẹ tlala,’ bọ yé dọmọ: “E ko wà onú lẹpo dagbe: e hẹn yèdọ tókunọ nado sènu, po unbọpẹn po nado dọho.”—Malku 7:33-37.

Awukuzọ̀n: Dile Jesu tin to Kapẹlnaumi, gbẹtọ lẹ hẹn awukuzọ̀njẹtọ he to adọ́zan ji de wá e dè. (Matiu 9:2) Wefọ 6 jẹ 8 basi zẹẹmẹ nuhe jọ tọn. “[Jesu] dọhlan awukuzọ̀njẹtọ lọ, dọ, Fọ́n, ze adọ́zan towe, bo yì owhé towe gbè. E sọ fọ́n, bo tọ́n yì owhé etọn gbè. Ṣigba whenuena agundaho lẹ mọ ẹn, obu di yé, yé sọ pagigona Jiwheyẹwhe, he na aṣẹ he hunkọ hlan gbẹtọ lẹ.” Jesu wà azọ́njiawu ehe lọsu to nukun devi etọn lẹ po kẹntọ etọn lẹ po tọn mẹ. Doayi e go dọ devi Jesu tọn lẹ, he wangbẹnamẹ po nuvẹun po ma ko tọ́nnukun na, “pagigona Jiwheyẹwhe” na nuhe yé mọ.

Awutu: “Dawe pòtọnọ de wá [Jesu] dè to finẹ, e jẹklo na ẹn, bo to vẹvẹ na ẹn, bo to didọ hlan ẹn dọmọ, Eyin hiẹ jlo, hiẹ sọgan hẹn mi zun wiwe. Yíyí lẹblanu do whàn ẹn, e dlẹn alọ etọn jẹgbonu bo do e go, bosọ dọ hlan ẹn, dọmọ, Yẹn jlo, hiẹ ni zun wiwe. Afọdoponẹji opò klọ́n yì sọn e go.” (Malku 1:40-42) Doayi e go dọ Jesu ma yí awuwhiwhle do hẹnazọngbọna ẹn gba ṣigba e wàmọ sọn awuvẹmẹ nujọnu tọn mẹ. Mí ni dọ dọ hiẹ yin pòtọnọ de. Etẹwẹ na yin numọtolanmẹ towe eyin hiẹ yin azọ̀nhẹngbọna to afọdopolọji podọ matin awufiẹsa sọn awutu ylankan he ko to agbasalan towe hẹngble vudevude bo tlẹ ko sọ hẹn we zun mẹhe ma sọgan nọ gbẹtọ lẹ ṣẹnṣẹn ba si? Abajọ hiẹ sọgan mọnukunnujẹ nuhewutu pòtọnọ devo heyin azọ̀nhẹngbọna to azọ́njiawu-liho do “họ́ do nukunmẹ etọn ji to afọ [Jesu tọn] go, bo to pẹdona ẹn.”—Luku 17:12-16.

Awugble: Azọ́njiawu godo tọn he Jesu wà whẹpo do yin wiwle bo yin hùhù yin nuyiwa alán hẹngbọnamẹ tọn de. To nuyiwa homẹgble tọn de sọta mẹhe jlo na wle Jesu lẹ mẹ, apọsteli Pita, “mẹhe tindo ohí, dọ̀n ẹn sún, bo hú afanumẹ yẹwhenọ daho tọn de, bo sán otó etọn adusi tọn dlan ai.” (Johanu 18:3-5, 10) Kandai dopolọ to Luku mẹ dọna mí dọ Jesu “sọ do alọ otó etọn go, bosọ hẹn alán lọ gbọ na ẹn.” (Luku 22:50, 51) Whladopo dogọ, nuyiwa awuvẹmẹ tọn ehe yin bibasi to nukun họntọn po kẹntọ Jesu tọn lẹ po tọn mẹ—to whẹho ehe mẹ, mẹhe jlo nado wle e lẹ.

Mọwẹ, lehe mí gbadopọnna azọ́njiawu Jesu tọn lẹ kitokito do sọ, mọwẹ mí na mọdọ yé yin nugbo do niyẹn. (2 Timoti 3:16) Podọ dile e yin nudego do jẹnukọn, dodinnanu mọnkọtọn dona hẹn yise mítọn lodo to opagbe Jiwheyẹwhe tọn nado hẹn gbẹtọvi tonusetọ lẹ jẹ gángán mẹ. Biblu basi zẹẹmẹ yise Klistiani tọn taidi ‘nukundido dejidego nuhe yè to todo lẹ tọn, okunnu nuhe mí ma ko mọ tọn.’ (Heblu lẹ 11:1) E họnwun dọ, Jiwheyẹwhe nọ na tuli yise dolido he sinai do kunnudenu ji tọn, e mayin yise he ma tindo dodonu kavi he nọ to jijlo poun dọ todido enẹlẹ ni yin hinhẹndi gba. (1 Johanu 4:1) Dile mí wleawuna yise mọnkọtọn, mí nọ mọdọ mí lodo dogọ, tindo agbasalilo dogọ, bosọ yin ayajẹnọ dogọ to gbigbọ-liho.—Matiu 5:3; Lomunu lẹ 10:17.

Azọ̀nhẹngbọ Gbigbọmẹ Tọn Dona Wá Whẹ́!

Susu mẹhe tin to gángán to agbasa-liho lẹ tọn ma tindo ayajẹ gba. Mẹdelẹ tlẹ nọ tẹnpọn nado hù yede na yé ma tindo todido depope na sọgodo kavi na nuhahun lẹ sù hugan yé wutu. To yẹhiadonu-liho, yé yin madogánnọ to gbigbọ-liho—yèdọ ninọmẹ de heyin nujọnu taun to nukun Jiwheyẹwhe tọn mẹ hugan oblọ agbasa go tọn. (Johanu 9:41) To alọ devo mẹ, susu mẹhe tindo oblọ agbasa go tọn, taidi Christian po Junior po heyin nudego to hosọ tintan mẹ lẹ, nọ zan gbẹzan ayajẹnọ he nọ hẹn pekọwa lẹ. Etẹwutu? Na yé to gángán to gbigbọ-liho bosọ yin hinhẹn lodo gbọn todido he sinai do Biblu ji de dali wutu.

To alọdindlẹndo nuhudo vonọtaun mítọn taidi gbẹtọvi lẹ mẹ, Jesu dọmọ: “Gbẹtọ ma to ogbẹ̀ gbọn akla dopo kẹdẹ sinmẹ gba, adavo gbọn ohó he tọ́n sọn onù Jiwheyẹwhe tọn mẹ lẹpo dali.” (Matiu 4:4) Mọwẹ, to ma taidi kanlin lẹ mẹ, e mayin nuhudo agbasa tọn lẹ kẹdẹ wẹ gbẹtọvi lẹ tindo gba. Na mí yin didá to ‘apajlẹ’ Jiwheyẹwhe tọn mẹ wutu, mí tindo nuhudo núdùdù gbigbọmẹ tọn—yèdọ oyọnẹn Jiwheyẹwhe tọn po lehe mí sọgbe do lẹndai etọn mẹ po do gọna ojlo etọn wiwà tọn. (Gẹnẹsisi 1:27; Johanu 4:34) Oyọnẹn Jiwheyẹwhe tọn nọ hẹn gbẹzan mítọn tindo lẹndai po huhlọn gbigbọmẹ tọn po. E sọ nọ ze dodonu dai na ogbẹ̀ madopodo to paladisi aigba ji tọn mẹ. Jesu dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.”—Johanu 17:3.

E jẹ na ayidego dọ mẹhe nọgbẹ̀ to ojlẹ Jesu tọn mẹ lẹ ma nọ ylọ ẹ dọ “Azọ̀nhẹngbọtọ” gba ṣigba “Mẹplọntọ.” (Luku 3:12; 7:40) Etẹwutu? Na Jesu plọnnu gbẹtọ lẹ gando pọngbọ tẹgbẹ̀ tọn na nuhahun gbẹtọvi tọn lẹ go wutu—yèdọ Ahọluduta Jiwheyẹwhe tọn. (Luku 4:43; Johanu 6:26, 27) Gandudu olọn mẹ tọn ehe to alọ Jesu Klisti tọn mẹ na dugán do aigba lọ blebu ji bo na hẹn opagbe Biblu tọn lẹpo he gando hẹngọwa mlẹnmlẹn po tẹgbẹ̀ tọn gbẹtọvi dodonọ lẹ tọn po gọna owhé aigba ji yetọn tọn go di. (Osọhia 11:15) Enẹwutu wẹ Jesu kọ̀n wiwá Ahọluduta lọ tọn dopọ hẹ ojlo Jiwheyẹwhe tọn wiwà to aigba ji to odẹ̀ apajlẹnọ etọn mẹ.—Matiu 6:10.

Na susu mẹhe tindo oblọ agbasa go tọn lẹ, nupinplọn gando todido mẹwhantọ ehelẹ go ko hẹn ayajẹ susu wá na yé kakati ni yin awubla. (Luku 6:21) Na nugbo tọn, Jiwheyẹwhe na tlẹ wà hugan awutu po oblọ lẹ po didesẹ; e na de nuhe nọ hẹn yajiji gbẹtọvi tọn lẹ wá sẹ, enẹ wẹ ylando. Na nugbo tọn Isaia 33:24 po Matiu 9:2-7 po heyin hoyidọ sọn yé mẹ jẹnukọn, kọ̀n awutu dopọ hẹ ninọmẹ ylando tọn mítọn. (Lomunu lẹ 5:12) Enẹwutu, eyin ylando yin didesẹ, gbẹtọvi na duvivi ‘gigo mẹdekannujẹ ovi Jiwheyẹwhe tọn lẹ tọn’ to godo mẹ, yèdọ mẹdekannujẹ he na bẹ pipé-yinyin ayiha po agbasa po tọn hẹn.—Lomunu lẹ 8:21.

Mẹhe tindo agbasalilo jẹ obá de mẹ lẹ sọgan nọ yí nukunpẹvi do pọ́n lehe agbasalilo họakuẹ sọ. Ṣigba e ma nọ yinmọ na mẹhe to oyà oblọ agbasa go tọn ji lẹ gba. Yé yọ́n lehe agbasalilo po ogbẹ̀ po họakuẹ sọ podọ lehe onú lẹ sọgan diọ to ajiji mẹ do. (Yẹwhehodọtọ 9:11) Enẹwutu, todido mítọn wẹ yindọ mẹhe tindo oblọ to agbasa go to wehiatọ mítọn lẹ ṣẹnṣẹn ni na ayidonugo vonọtaun hlan opagbe jiawu Jiwheyẹwhe tọn heyin kinkàndai to Biblu mẹ lẹ. Jesu ze ogbẹ̀ etọn liai nado hẹn ẹn diun dọ yé mọ hẹndi yí. Mẹhẹndeji he yọnhugan devo tẹwẹ mí sọgan sọ tindo?—Matiu 8:16, 17; Johanu 3:16.

[Nudọnamẹ odò tọn]