Ahọluduta Jiwheyẹwhe Tọn—Naegbọn E Yin Nujọnu Na Jesu?

Dile hosọ he wayi dohia do, Jesu yí gbẹzan etọn lẹpo do ‘dọyẹwheho bosọ lá wẹndagbe ahọluduta Jiwheyẹwhe tọn.’ (Luku 8:1) E yí ede zan taun, bo zinzọnlin na kilomẹtlu kanweko susu gbọn aigba Islaeli tọn lẹ ji nado plọnnu gbẹtọ lẹ gando Ahọluduta Jiwheyẹwhe tọn go. Lehe Jesu dọyẹwheho do yin kinkandai to owe Wẹndagbe tọn ẹnẹ lẹ mẹ. To kandai lọ lẹ mẹ, hogbe lọ Ahọluduta yin yiyizan hugan whla 100. Dile etlẹ yindọ hodidọ Jesu tọn lẹ mẹ wẹ hogbe enẹ tọ́n te hugan, e họnwun dọ adà vude poun to ohó susu he e dọ gando Ahọluduta Jiwheyẹwhe tọn go wẹ yin kinkan.—Johanu 21:25.

Naegbọn Ahọluduta lọ duahunmẹna Jesu sọmọ? E yọnẹn dọ Jiwheyẹwhe ko de emi taidi Gandutọ Ahọluduta lọ tọn. (Isaia 9:6; Luku 22:28-30) Ṣigba, yanwle etọn ma yin nado dín ogántẹn kavi gigo edetiti tọn. (Matiu 11:29; Malku 10:17, 18) Whẹwhinwhẹ́n titengbe devo lẹ wẹ whàn ẹn nado lá Ahọluduta lọ. Hú popolẹpo, Jesu tindo ojlo to Ahọluduta Jiwheyẹwhe tọna mẹ bo gbẹ́ to mọwà, na e yọ́n ale he Ahọluduta lọ na hẹnwa na mẹhe e yiwanna lẹ, yèdọ Otọ́ olọn mẹ tọn etọn po hodotọ nugbonọ etọn lẹ po.

ALE HE AHỌLUDUTA LỌ NA HẸNWA NA OTỌ́ JESU TỌN

Jesu yiwanna Otọ́ olọn mẹ tọn etọn taun. (Howhinwhẹn lẹ 8:30; Johanu 14:31) E sọ yiwanna jẹhẹnu dagbedagbe he Otọ́ etọn tindo lẹ, taidi owanyi, lẹblanu, po whẹdida dodo po. (Deutelonomi 32:4; Isaia 49:15; 1 Johanu 4:8) Enẹwutu, e họnwun dọ e nọ vẹna Jesu taun nado sè lalo he gbẹtọ lẹ nọ do dokọna Otọ́ etọn. Delẹ to lalo enẹlẹ mẹ wẹ yindọ oyà he ji mí te ma nọ duahunmẹna Jiwheyẹwhe, podọ ewọ wẹ jlo dọ mí ni jiya. Ehe yin dopo to nuhe zọ́n bọ Jesu do yí zohunhun do lá “wẹndagbe Ahọluduta lọ tọn” lẹ mẹ, na e yọnẹn dọ to ojlẹ sisọ̀ mẹ Ahọluduta lọ na klan oyín Otọ́ emitọn tọn do wiwe. (Matiu 4:23; 6:9, 10) Ṣigba, nawẹ Ahọluduta lọ na wà ehe gbọn?

Jehovah na yí Ahọluduta lọ zan nado basi vọjlado ayidego tọn lẹ na dagbe gbẹtọvi lẹ tọn. “Ewọ nasọ súnsún dasin lẹpo sẹ̀ sọn” nukun gbẹtọvi nugbonọ lẹ tọn mẹ. Jehovah na sukúndona nuhe nọ hẹn dasin enẹlẹ wá, podọ “okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba.” (Osọhia 21:3, 4) Gbọn Ahọluduta lọ gblamẹ, Jiwheyẹwhe na doalọtena yajiji gbẹtọvi lẹpo tọn.b

Abajọ Jesu do yí zohunhun do plọnnu gbẹtọ lẹ gando Ahọluduta lọ go! E yọnẹn dọ Ahọluduta lọ wẹ na de obá he mẹ Otọ́ emitọn yin huhlọnnọ po awuvẹmẹtọ po jẹ hia. (Jakọbu 5:11) Jesu sọ yọnẹn dọ Ahọluduta lọ na hẹn ale wá na mẹdevo he e yiwanna lẹ, yèdọ gbẹtọvi nugbonọ lẹ.

ALE HE AHỌLUDUTA LỌ NA HENWA NA GBẸTỌVI NUGBONỌ LẸ

Jesu nọgbẹ̀ to olọn mẹ po Otọ́ etọn po na ojlẹ dindẹn whẹpo do wá aigba ji. Otọ́ etọn yí i zan nado dá nulẹpo, bẹsọn olọn jiawu he bẹ sunwhlẹvu madosọha lẹ po bẹplidopọ sunwhlẹvu lẹ tọn po hẹn ji kakajẹ aigba whanpẹnọ mítọn po nutogbẹ̀ he e bẹhẹn lẹ po ji. (Kọlọsinu lẹ 1:15, 16) Ṣigba to nudida lẹpo mẹ, gbẹtọvi lẹ mẹ wẹ Jesu tindo “homẹhunhun” te hugan.—Howhinwhẹn lẹ 8:31.

Jẹhẹnu titengbe he sọawuhia to yẹwhehodidọ Jesu tọn mẹ wẹ owanyi he e tindo na gbẹtọvi lẹ. Tlolo he e bẹ yẹwhehodidọ etọn jẹeji, e dohia dọ emi wá aigba ji nado “lá wẹndagbe” lọ na agbátọnọ lẹ. (Luku 4:18) Ṣigba, Jesu ma dọhodo alọgigọna gbẹtọvi lẹ ji poun gba. Whlasusu wẹ e do owanyi etọn hia gbẹtọvi lẹ. Di apajlẹ, to whenue gbẹtọgun daho de pli nado dotoaina ẹn, “onú yetọn wàlẹblanu na ẹn, bọ e hẹnazọ̀ngbọna omẹ yetọn he to azọ̀njẹ lẹ.” (Matiu 14:14) To whenue dawe he to awutu sinsinyẹn de jẹ do yise hia dọ Jesu sọgan gbọazọ̀nna emi eyin e jlo nugbo, lẹblanu dawe lọ tọn wà Jesu. E yí awuvẹmẹ do gblọnna ẹn dọmọ: “Yẹn jlo. Yin hinhẹn zun wiwe,” podọ azọ̀n dawe lọ tọn gbọ̀. (Luku 5:12, 13) To whenue Jesu mọ bọ họntọn etọn Malia to aluẹmẹ, na nọvisunnu etọn Lazalọsi kú wutu, Jesu “wẹnhun to ohò ede tọn mẹ,” “biọ bẹwlu mẹ” bosọ “kùn dasin.” (Johanu 11:32-36) Enẹgodo, e wà azọ́njiawu de: Mahopọnna dọ e ko yì azán ẹnẹ bọ Lazalọsi kú, Jesu hẹn ẹn gọwá ogbẹ̀!—Johanu 11:38-44.

Na nugbo tọn, Jesu yọnẹn dọ kọgbọ he emi hẹnwa ma na dẹn-to-aimẹ. E mọnukunnujẹemẹ dọ e yá kavi e dẹn wẹo, mẹhe emi gbọazọ̀nna lẹpo wẹ nasọ jẹazọ̀n podọ mẹhe emi fọnsọnku lẹpo wẹ nasọ kú. Ṣigba, Jesu sọ yọnẹn dọ Ahọluduta Jiwheyẹwhe tọn wẹ na didẹ nuhahun enẹlẹ kakadoi. Nuhe zọ́n niyẹn bọ Jesu ma wà azọ́njiawu kẹdẹ gba, ṣigba e sọ yí zohunhun do lá “yẹwheho wẹndagbe ahọluduta lọ tọn.” (Matiu 9:35) Azọ́njiawu etọn lẹ yin dohia kleun nuhe Ahọluduta Jiwheyẹwhe tọn na wadotana lẹdo aihọn pé to madẹnmẹ tọn. Lẹnnupọndo opagbe he Biblu do gando ojlẹ enẹ go lẹ ji.

• 

  Azọ̀n ma na tin ba.

  “Whenẹnu wẹ nukun nukuntọ́nnọ lẹ tọn na hùn, otó tókunọ lẹ tọn nasọ hùn. Whenẹnu wẹ pòtẹn na lọ́n di agbanlin, odẹ́ unbọpẹn tọn nasọ jihàn.” Podọ, “finẹnu lẹ ma to na dọmọ, yẹn to azọ̀njẹ.”—Isaia 33:24; 35:5, 6.

• 

  Okú ma na tin ba.

  ‘Dodonọ wẹ na dugu aigba tọn, bo nasọ nọ nọ̀ e mẹ kakadoi.’—Psalm 37:29.

  “Ewọ na ze okú mi to awhàngbigba mẹ; Oklunọ JIWHEYẸWHE nasọ súnsún dasin sọn nukun lẹpo mẹ.”—Isaia 25:8.

• Oṣiọ lẹ na gọwá ogbẹ̀.

  “Mẹhe to yọdò oflin tọn lẹ mẹ lẹpo na sè ogbè etọn bo tọ́njẹgbonu.”—Johanu 5:28, 29.

  ‘Fọnsọnku de na tin.’—Owalọ lẹ 24:15.

• 

  Mẹlẹpo na tindo azọ́n po owhé yetọn po.

  “Yé na gbá ohọ̀, bosọ nọ nọ̀ yé mẹ, yé na do vẹngle, bosọ dù sinsẹ́n yetọn. Yé ma na gbá ohọ̀ bọ mẹdevo na nọ e mẹ; yé ma na do bọ mẹdevo na dù . . . omẹ ṣie lẹ na dugbẹ azọ́n alọ yetọn mẹ tọn dẹn.”—Isaia 65:21, 22.

• 

  Awhàn ma na tin ba.

  “E hẹn awhàn gbọ kakajẹ aigba pòdo.”—Psalm 46:9.

  “Akọta ma to na ze ohí do akọta ji ba, mọ yé ma to na plọn awhànfun ba.”—Isaia 2:4.

• 

  Núdùdù ma na whèdomẹ ba.

  “Whenẹnu wẹ aigba na hẹn jideji etọn wá; Jiwheyẹwhe, yèdọ Jiwheyẹwhe mítọn lọsu, na dona mí.”—Psalm 67:6.

  “Gbàdo susugege na tin finẹ to osó lẹ ji.”—Psalm 72:16.

• Ohẹ́n ma na tin ba.

  “Yè ma na wọnji agbátọnọ lẹ go gbidigbidi.”—Psalm 9:18.

  “Na e na whlẹn agbátọnọ lọ whenu e to awhádo; oyànọ ga, podọ ewọ he ma tindo alọgọnamẹtọ de. Ewọ na tindo lẹblanu to oyànọ po agbátọnọ po ji; e nasọ whlẹn ayiha agbátọnọ tọn gán.”—Psalm 72:12, 13.

To whenue hiẹ lẹnnupọndo opagbe he gando Ahọluduta Jiwheyẹwhe tọn go ehelẹ ji, be hiẹ doayi nuhewutu Ahọluduta lọ do nọ duahunmẹna Jesu sọmọ go ya? To whenue Jesu to aigba ji, e yí zohunhun do dọho gando Ahọluduta Jiwheyẹwhe tọn go na mẹdepope he jlo na sè, na e yọnẹn dọ Ahọluduta lọ wẹ na hẹn pọngbọ wá na nuhahun sinsinyẹn he tin to egbehe lẹpo.

Be a tindo ojlo to opagbe Biblu tọn he gando Ahọluduta lọ go lẹ mẹ ya? Eyin mọ wẹ, nawẹ hiẹ sọgan plọnnu dogọ gando Ahọluduta enẹ go gbọn? Podọ etẹwẹ a sọgan wà nado hẹn ẹn diun dọ a na duvivi dona he e na hẹnwa lẹ tọn? Hosọ he gbọngodo na gblọndo kanbiọ ehelẹ tọn.