Nubiọtomẹsi Jiwheyẹwhe Tọn lẹ Kọ̀n Jijẹ Nọ Pagigona Jehovah
“Yẹn na yí opẹ́ do pagigona ẹn.”—PSALM 69:30, NW.
1. (a) Naegbọn Jehovah jẹ nado yin gigopana? (b) Nawẹ mí nọ pagigona ẹn po opẹ́ po gbọn?
JEHOVAH wẹ Jiwheyẹwhe Ganhunupotọ, Nupojipetọ Wẹkẹ lọ tọn, yèdọ Mẹdatọ lọ. Enẹwutu, oyín po lẹndai etọn lẹ po dona yin gigopana. Nado pagigona Jehovah zẹẹmẹdo nado yí nukun he họakuẹ tlala do pọ́n ẹn, nado lá, bo pà ẹ gbọn hogbe po nuyiwa po gblamẹ. Nado wàmọ po “opẹ́” po biọ dọ mí ni nọ dopẹ́ to whepoponu na nuhe e to wiwà na mí todin podọ na nuhe e na wà to sọgodo. Walọ he mí dona tindo yin didohia to Osọhia 4:11 mẹ, fie nudida gbigbọnọ nugbonọ he tin to olọn mẹ lẹ to lilá te dọmọ: “Oklunọ mítọn podọ Jiwheyẹwhe mítọn, hiẹ wẹ jẹ nado yí gigo, yẹyi, po huhlọn po: na hiẹ wẹ da onú popo, podọ to ojlo towe mẹ wẹ yé do tin, bọ yè sọ do da yé.” Nawẹ mí nọ pagigona Jehovah gbọn? Gbọn nupinplọn dogbọn ewọ dali podọ to enẹgodo wà nuhe e biọ to mí si lẹ. Mí dona tindo numọtolanmẹ dopolọ hẹ psalm-kàntọ lọ he dọmọ: “Plọn mi nado wà ojlo towe: na hiẹ wẹ Jiwheyẹwhe ṣie.”—Psalm 143:10.
2. Nawẹ Jehovah nọ yinuwa hẹ mẹhe nọ pagigona ẹn lẹ podọ hẹ mẹhe ma nọ wàmọ lẹ gbọn?
2 Jehovah nọ yí nukun he họakuẹ do pọ́n mẹhe nọ pagigona ẹn lẹ. Abajọ e do yin “ahọsutọ yé he whesọ do din in lẹ tọn.” (Heblu lẹ 11:6) Etẹwẹ yin ahọsumẹ lọ? Jesu dọ to odẹ̀ mẹ hlan Otọ́ olọn mẹ tọn etọn dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Mọwẹ, mẹhe nọ ‘pagigona Jehovah po opẹ́ po’ lẹ na “dugu aigba tọn, bo nasọ nọ nọ̀ e mẹ kakadoi.” (Psalm 37:29) To alọ devo mẹ, “ale ma na tin na mẹylankan.” (Howhinwhẹn lẹ 24:20) Podọ to azán godo tọn ehelẹ mẹ, onú niyaniya tọn de wẹ e yin nado pagigona Jehovah na to madẹnmẹ e na và mẹylankan lẹ sudo bo whlẹn dodonọ lẹ gán. “Aihọn sọ to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:17; Howhinwhẹn lẹ 2:21, 22.
3. Naegbọn mí dona payi owe Malaki tọn go?
3 Ojlo Jehovah tọn yin mimọ to Biblu mẹ, na “Owe-wiwe lẹpo [yin] gbigbọ́n sọn Jiwheyẹwhe mẹ.” (2 Timoti 3:16) Ohó Jiwheyẹwhe tọn enẹ bẹ kandai susu hẹn gando lehe Jehovah dona mẹhe pagigona ẹn lẹ po nuhe jọ do mẹhe ma nọ wàmọ lẹ po go. Dopo to kandai enẹlẹ mẹ bẹ nuhe jọ to Islaeli to ojlẹ yẹwhegán Malaki tọn whenu hẹn. To nudi owhe 443 J.W.M., to gandudu Nẹhemia tọn whenu to Juda, Malaki kàn owe he tindo yinkọ etọn. Owe huhlọnnọ he dọnmẹdogo ehe bẹ nudọnamẹ po dọdai lẹ po hẹn heyin kinkàn “na nukọnamẹ mítọn, mẹhe ji opodo owhenu tọn ja.” (1 Kọlintinu lẹ 10:11) Ayipipa ohó Malaki tọn lẹ go sọgan gọalọna mí nado wleawu dai na “azán daho osinọ Oklunọ tọn,” he whenu E na và titonu ylankan ehe sudo.—Malaki 4:5.
4. Nuagokun ṣidopo tẹlẹ wẹ yin hinhẹn wá ayidonugo mítọn mẹ to Malaki weta 1 mẹ?
4 Nawẹ owe Malaki tọn, heyin kinkàn to nuhe hugan owhe 2 400 die wayi, na gọalọna mí to owhe kanweko 21tọ ehe mẹ nado wleawu dai na azán daho osinọ Jehovah tọn gbọn? E whè gbau weta tintan dọ̀n ayidonugo mítọn wá nuagokun ṣidopo ji he na gọalọna mí nado pagigona Jehovah po opẹ́ po nado sọgan mọ nukundagbe etọn po ogbẹ̀ madopodo po yí: (1) Jehovah yiwanna omẹ etọn lẹ. (2) Mí dona do pinpẹn-nutọn hia na onú wiwe lẹ. (3) Jehovah nọ donukun dọ mí ni na emi dagbe hugan mítọn. (4) Owanyi he ma tindo ṣejannabi wẹ nọ whanmẹ nado basi sinsẹ̀n nugbo, e mayin nukunkẹn gba. (5) Sinsẹ̀nzọn he Jiwheyẹwhe kẹalọyi ma yin nuyiwa mọmọ tọn he pẹnagbanmẹ de gba. (6) Dopodopo mítọn dona dogbè na Jiwheyẹwhe. Enẹwutu, to hosọ tintan to atọ̀n he na yin dogbapọnna do owe Malaki tọn ji ehe mẹ, mì gbọ mí ni lẹnnupọndo dopodopo nuagokun enẹlẹ tọn ji dile mí to dogbapọnna Malaki weta 1.
Jehovah Yiwanna Omẹ Etọn Lẹ
5, 6. (a) Naegbọn Jehovah yiwanna Jakobu? (b) Eyin mí hodo apajlẹ nugbonọ-yinyin Jakobu tọn, etẹwẹ mí sọgan donukun?
5 Owanyi Jehovah tọn yin hinhẹn họnwun to wefọ bẹjẹeji Malaki tọn lẹ mẹ. Owe lọ bẹjẹeji po hogbe ehelẹ po dọmọ: ‘Nulila de: Ohó Oklunọ tọn gando Islaeli go.’ Dogọ, Jiwheyẹwhe dọmọ: “Yẹn ko yiwanna mì.” To apajlẹ de yiyizan to wefọ dopolọ mẹ, Jehovah dọmọ: “Yẹn ko yiwanna Jakobu.” Jakobu yin dawe de he tindo yise to Jehovah mẹ. To nukọn mẹ, Jehovah diọ yinkọ Jakobu tọn do Islaeli, podọ e lẹzun tọgbo akọta Islaeli tọn. Nuhe zọ́n bọ Jehovah yiwanna ẹn wẹ yindọ Jakobu yin dawe yisenọ de. Mẹhe do walọyizan he Jakobu tindo hlan Jehovah hia to akọta lọ mẹ lẹ yin wanyina gbọn Ewọ dali ga.—Malaki 1:1, 2.
6 Eyin mí yiwanna Jehovah bo tẹdo omẹ etọn lẹ go po nugbonọ-yinyin po, mí sọgan mọ homẹmiọnnamẹ yí sọn ohó he yin mimọ to 1 Samuẹli 12:22 mẹ dọmọ: “Oklunọ ma to na gbẹ́ omẹ etọn lẹ dai gba na oyín daho etọn tọn wutu.” Jehovah yiwanna omẹ etọn lẹ bo nọ suahọ yé. To godo mẹ, e na suahọ yé po ogbẹ̀ madopodo po. Enẹwutu mí hia dọmọ: “Dotudo Oklunọ go, bosọ nọ wà dagbe; nọ nọ̀ aigba lọ ji, bosọ nọ doafọna nugbo. Hẹn homẹ towe hùn susu to Oklunọ mẹ; ewọ nasọ yí ovẹ̀ ayiha towe mẹ tọn na we.” (Psalm 37:3, 4) Owanyi mítọn na Jehovah bẹ nuagokun awetọ heyin hinhẹn wá ayidonugo mítọn mẹ to Malaki weta 1 mẹ hẹn.
Mì Do Pinpẹn Nutọn Hia na Onú Wiwe Lẹ
7. Etẹwutu Jehovah gbẹwanna Esau?
7 Dile mí hia do to Malaki 1:2, 3 mẹ, to whenuena Jehovah dọ dọ, “yẹn ko yiwanna Jakobu” godo, e dọmọ: “Ṣigba yẹn gbẹwanna Esau.” Etẹwutu whẹho lọ do yinmọ? Jakobu pagigona Jehovah, ṣigba nọvisunnu etọn, Esau, ma wàmọ gba. Esau sọ yin yiylọdọ Edomi. To Malaki 1:4, aigba Edomi tọn yin yiylọdọ agbegbe kanyinylan tọn, bọ tòmẹnu etọn lẹ yin whẹgbledo. Yinkọ lọ Edomi (he zẹẹmẹdo “Vẹẹ”) yin nina Esau to whenuena e sa jlọjẹ họakuẹ viplọnji yinyin etọn tọn na Jakobu na yinnọdida vẹẹ de wutu godo. ‘Esau vlẹ jlọjẹ viplọnji yinyin etọn tọn,’ wẹ Gẹnẹsisi 25:34 dọ. Apọsteli Paulu dotuhomẹna yisenọ hatọ lẹ nado payi dọ ‘galọtọ kavi mẹhe ma yọ́n pinpẹn onú wiwe lẹ tọn di Esau tin blo, ewọ he sà jlọjẹ viplọnji yinyin etọn tọn na núdùdù nùdo dopo wutu.’—Heblu lẹ 12:14-16.
8. Etẹwutu Paulu do yí Esau jlẹdo galọtọ de go?
8 Naegbọn Paulu do kọ̀n nuyiwa Esau tọn dopọ hẹ galilọ? Na ninọmẹ apọ̀nmẹ tọn Esau tọn tintindo sọgan dekọtọn do awugbopo nado yọ́n pinpẹn onú wiwe lẹ tọn wutu. To alọ devo mẹ, ehe sọgan planmẹ biọ ylando sinsinyẹn lẹ mẹ, taidi galilọ. Enẹwutu, mí sọgan kanse mídelẹ dọ: ‘Be yẹn nọ yin whiwhlepọn to whedelẹnu nado yí ogú Klistiani tọn ṣie—yèdọ ogbẹ̀ madopodo—do diọ onú ojlẹ gli tọn de taidi núdùdù nùdo dopo poun wẹ ya? Vlavo to mayọnẹn mẹ, be yẹn nọ vlẹ onú wiwe lẹ wẹ ya?’ Esau tindo ojlo zogbe nado hẹn pekọwana nujlomẹ agbasa tọn de. E dọna Jakobu dọmọ: ‘Yawu, yẹn vẹ̀ we, yí yinnọdida vẹẹyan nẹ nado yìn mi.’ (Gẹnẹsisi 25:30) E blawu dọ, to yẹhiadonu liho, devizọnwatọ Jiwheyẹwhe tọn delẹ ko dọmọ: “Yawu! Etẹwutu yè nado nọtepọn alọwle yẹyinọ de?” Ojlo nado hẹn pekọwana zanhẹmẹ mahopọnna nuhe sọgan jọ ko lẹzun yinnọdida nùdo dopo yetọn.
9. Nawẹ mí sọgan tindo obu gbégbigbò tọn na Jehovah gbọn?
9 Na mí ni ma vlẹ onú wiwe lẹ gbọn nukunpẹvi yíyí do pọ́n wiwejininọ, tenọgligo-hinhẹn, po ogú gbigbọmẹ tọn mítọn po dali gbede blo. Kakati nado taidi Esau, mì gbọ mí ni taidi Jakobu nugbonọ bo tindo obu gbégbigbò tọn na Jiwheyẹwhe gbọn pinpẹn-nutọn sisosiso didohia na onú wiwe lẹ dali. Nawẹ mí sọgan wà ehe gbọn? Gbọn pipayi nado jẹ nubiọtomẹsi Jehovah tọn lẹ kọ̀n dali. Po gbesisọ po, ehe hẹn mí wá nuagokun atọ̀ntọ he Malaki weta 1 detọ́n ji. Etẹwẹ enẹ yin?
Dagbe Hugan Mítọn Nina Jehovah
10. Aliho tẹmẹ wẹ yẹwhenọ lẹ to tafo Jehovah tọn vlẹ te?
10 Yẹwhenọ Juda tọn he to sinsẹ̀nzọnwà to tẹmpli Jelusalẹm tọn mẹ to azán Malaki tọn gbè lẹ ma to avọ́sinsan dagbe hugan lẹ basi hlan Jehovah gba. Malaki 1:6-8 dọmọ: “Visunnu de nọ gbògbéna otọ́ etọn, podọ devi de mẹmẹnu etọn: whenẹnu eyin yẹn yin otọ́ de, fie wẹ gbégbòna ṣie te? Podọ eyin yẹn yin mẹmẹnu de, fie wẹ budisi ṣie te? wẹ Oklunọ awhànpa lẹ tọn dọ hlan mì, mì yẹwhenọ he to oyín ṣie vlẹ lẹ emi.” “Etẹ mẹ wẹ míwlẹ ko to oyín towe vlẹ te?” wẹ yẹwhenọ lọ lẹ kanse. “Mìwlẹ to akla sùdego yí do to avọ́ nunina na to agbà ṣie ji,” wẹ Jehovah gblọn. “Etẹ mẹ wẹ míwlẹ to sùdogona we te?” wẹ yẹwhenọ lẹ kanse. Enẹwutu Jehovah dọna yé dọmọ: “To ehe mẹ mìwlẹ dọmọ, Ovlẹnu wẹ tafo Oklunọ tọn.” Yẹwhenọ enẹlẹ nọ dohia dọ yé vlẹ tafo Jehovah tọn to whedepopenu he yé yí kanlin he tindo oblọ de do sanvọ́, bo dọ dọ: “E mayin oylan de!”
11. (a) Etẹwẹ Jehovah dọ dogbọn avọ́sinsan ylankan lẹ dali? (b) Aliho tẹmẹ wẹ gbẹtọ lẹ to paa mẹ huwhẹ̀ te?
11 Enẹgodo, Jehovah yihojlẹdohogo hẹ yé gando avọ́sinsan ylankan mọnkọtọn lẹ go dọmọ: “Yí dinvie hlan togán towe; ewọ na yin homẹhunnọ to dè we? Kavi ewọ na kẹalọyi we di gbẹtọ?” Lala, togán yetọn ma na tindo homẹhunhun to nunina mọnkọtọn mẹ gba. Nẹmunẹmu wẹ Nupojipetọ Wẹkẹ lọ tọn ma na kẹalọyi nunina oblọnọ lẹ! Podọ e mayin yẹwhenọ lẹ kẹdẹ wẹ jẹna whẹgbledo gba. Nugbo wẹ dọ yé to Jehovah vlẹ gbọn avọ́sinsan lọ lẹ bibasi dali. Ṣigba be gbẹtọ lọ lẹ to paa mẹ ma hù owhẹ̀ depope wẹ ya? Gbau! Yewlẹ wẹ nọ hẹn kanlin nukuntọ́nnọ, sẹkunọ, po awutunọ enẹlẹ po wá na yẹwhenọ lẹ nado yí do sanvọ́. Ylando nankọtọn die!
12. Nawẹ mí nọ yin alọgọna nado na dagbe hugan mítọn hlan Jehovah gbọn?
12 Dagbe hugan mítọn lẹ nina Jehovah wẹ aliho lọ nado dohia dọ mí yiwanna ẹn nugbo. (Matiu 22:37, 38) To ma taidi yẹwhenọ tasinyẹntọ azán Malaki gbè tọn lẹ mẹ, titobasinanu Jehovah tọn to awuwlena anademẹ Owe-wiwe tọn dagbe susu to egbehe he nọ gọalọna mí nado pagigona Jehovah po opẹ́ po gbọn jijẹ nubiọtomẹsi etọn lẹ kọ̀n dali. Ehe tin to kọndopọmẹ hẹ nuagokun titengbe ẹnẹtọ he sọgan yin mimọ sọn Malaki weta 1 mẹ.
Owanyi Nọ Whàn Sinsẹ̀n-Bibasi Nugbo, E Mayin Nukunkẹn
13. Etẹwẹ yẹwhenọ lẹ to wiwà he dohia dọ yé nọ yin whinwhàn gbọn nukunkẹn dali?
13 Yẹwhenọ azán Malaki gbè tọn lẹ yin ṣejannabinọ, ma tindo owanyi, bosọ yin adọwhẹ́nnọ na akuẹ. Nawẹ mí wagbọn do yọnẹn? Malaki 1:10 dọmọ: “Ṣó dọ mẹde do tin to mì ṣẹnṣẹn finẹ he do sú ohọ̀n lẹ, na mì ma nado hẹn miyọ́n ji to agbà ṣie ji to ovọ́ mẹ gba! Yẹn ma tindo homẹhun de to mì mẹ gba, wẹ Oklunọ awhànpa lẹ tọn dọ, mọ yẹn ma nasọ kẹalọyi avọ́ nunina de to alọ mìtọn mẹ gba.” Mọwẹ, yẹwhenọ nukunkẹnnọ enẹlẹ tlẹ nọ biọ akuẹ na sinsẹ̀nzọn he whè hugan tẹmpli mẹ tọn lẹ, bo nọ biọ ahọsumẹ na ohọ̀n lẹ súsú po miyọ́n he tin to agbà ji lẹ titá po! Abajọ Jehovah ma tindo homẹhun de to avọ́nunina yetọn lẹ mẹ!
14. Naegbọn mí sọgan dọ dọ owanyi wẹ nọ whàn Kunnudetọ Jehovah tọn lẹ?
14 Nukunkẹn po ṣejannabi yẹwhenọ ylandonọ lẹ tọn po to Jelusalẹm hohowhenu tọn mẹ sọgan flin mí dọ, sọgbe hẹ Ohó Jiwheyẹwhe tọn, nukunkẹnnọ lẹ ma na dugu Ahọluduta Jiwheyẹwhe tọn gba. (1 Kọlintinu lẹ 6:9, 10) Nulinlẹnpọn do nuyiwa ṣejannabi yẹwhenọ enẹlẹ tọn ji nọ hẹn pinpẹn-nutọn-yinyọnẹn mítọn na azọ́n yẹwhehodidọ tọn he Kunnudetọ Jehovah tọn lẹ to wiwà lẹdo aihọn pé jideji. Nuwiwa sọn ojlo mẹ wá wẹ e yin; mí ma nọ doahi na adà lizọnyizọn mítọn tọn depope gbede. Taidi Paulu, dopodopo mítọn sọgan dọ po nugbonọ-yinyin po dọmọ: “Yẹn [yí homẹhunhun do] dọyẹwheho wẹndagbe Jiwheyẹwhe tọn hlan mì vọ́nu.” (2 Kọlintinu lẹ 11:7) Doayi e go dọ Paulu ‘yí homẹhunhun do lá wẹndagbe lọ.’ Enẹ hẹn mí wá nuagokun atọ́ntọ heyin hinhẹnwa ayidonugo mítọn mẹ to Malaki weta 1 mẹ ji.
Sinsẹ̀nzọn Hlan Jiwheyẹwhe Mayin Nuyiwa Mọmọ Tọn He Pẹnagbanmẹ de Gba
15, 16. (a) Walọyizan tẹwẹ yẹwhenọ lẹ tindo dohlan avọ́nunina lẹ? (b) Nawẹ Kunnudetọ Jehovah tọn lẹ nọ sanvọ́ yetọn lẹ gbọn?
15 Yẹwhenọ nugbomadọtọ lọ lẹ to Jelusalẹm hohowhenu tọn mẹ pọ́n avọ́sinsan lẹ bibasi hlan taidi nuyiwa agbọ́pemẹ tọn de. Agbàn pinpẹn de wẹ e yin na yé. Dile e yin mimọ to Malaki 1:13 mẹ do, Jiwheyẹwhe dọna yé dọmọ: “Mìwlẹ sọ dọ ga, Doayi e go, agbọpenu detẹ e yin! Mì bo ko sọ yẹ́n-awọnlin do e.” Yẹwhenọ enẹlẹ yẹ́n-awọnlin do, kavi vlẹ, onú wiwe Jiwheyẹwhe tọn lẹ. Mì gbọ mí ni hodẹ̀ na mílọsu ni ma wá taidi yé gbede blo. Kakatimọ, mì gbọ mí ni nọ do gbigbọ he sọawuhia hezeheze to hogbe 1 Johanu 5:3 tọn mẹ lẹ hia whepoponu dọmọ: “Na ehe wẹ owanyi Jiwheyẹwhe tọn, dọ mí ni yìn osẹ́n etọn: osẹ́n etọn masọ yin nupẹnagbanmẹ gba.”
16 Mì gbọ mí ni hùnhomẹ to avọ́sinsan gbigbọmẹ tọn lẹ nina hlan Jiwheyẹwhe mẹ, bo ma pọ́n ẹn hlan gbede taidi nupẹnagbanmẹ agbọ́pemẹnu de blo. Na mí ni setonuna ohó dọdai tọn lọ lẹ dọmọ: “Dọ hlan [Jehovah] dọ, De ylanwa lẹpo sẹ̀, bo kẹalọyi enẹ heyin dagbe: mọwẹ míwlẹ na gọ̀ avọ́nunina nùflo mítọn tọn lẹ jó.” (Hosea 14:2) Hodidọ lọ “avọ́nunina nùflo mítọn tọn” nọtena avọ́sinsan gbigbọmẹ tọn lẹ, yèdọ ohó he mí nọ dọ nado pà Jehovah podọ gando lẹndai etọn lẹ go. Heblu lẹ 13:15 dọmọ: “Gbọn [Jesu Klisti gblamẹ], mì gbọ mí ni nọ sanvọ́ pipà tọn de hlan Jiwheyẹwhe whepoponu, enẹ wẹ, sinsẹ́n nùflo mítọn tọn, he basi gbeyiyi hlan oyín etọn.” Lehe homẹ mítọn hùn dọ avọ́sinsan gbigbọmẹ tọn mítọn lẹ mayin nuyiwa mọmọ tọn lẹ poun gba, ṣigba dohia owanyi ahundoponọ mítọn tọn hlan Jiwheyẹwhe do sọ! Ehe hẹn mí jẹ nuagokun ṣidopotọ he mí sọgan mọ sọn Malaki weta 1 mẹ ji.
Dopodopo Mítọn Dona Dogbè
17, 18. (a) Naegbọn Jehovah hodẹdo “mẹklọtọ lọ”? (b) Etẹ ji wẹ mẹklọtọ lẹ ma ko lẹnnupọndo?
17 Mẹhe nọgbẹ̀ to azán Malaki tọn gbè lẹ dogbè nuyiwa yetọn lẹ tọn, podọ mílọsu lẹ na wàmọ ga. (Lomunu lẹ 14:12; Galatianu lẹ 6:5) Po gbesisọ po, Malaki 1:14 dọmọ: “Dẹ̀hodonọ wẹ mẹklọtọ lọ ni yin, he tindo [kanlin madoblọ] asu de to lẹngbọpa etọn mẹ, bo dopagbe, bosọ yí onú azọ̀ntọ de do sanvọ́ hlan Oklunọ.” Mẹhe tindo kanlinpa de tindo kanlin susu, e mayin kanlin dopo akàn—di apajlẹ, lẹngbọ dopo poun—bọ e ma sọgan basi nudide gba. To kanlin de dide na avọ́sinsan mẹ, ewọ ma dona de dehe yin nukuntọ́nnọ, sẹkunọ, kavi awutunọ de gba. Eyin e de kanlin oblọnọ mọnkọtọn de, e na dohia dọ ewọ vlẹ tito avọ́sinsan Jehovah tọn, na mẹhe tindo kanlinpa de sọgan mọ dopo he ma tindo oblọ mọnkọtọn lẹ na jide tọn!
18 To whelọnu lo, po whẹwhinwhẹ́n dagbe po, Jehovah hodẹdo mẹklọtọ he tindo kanlin asu he jẹ ṣigba he hẹn—kavi dọ̀n kanlin nukuntọ́nnọ, sẹkunọ, kavi awutunọ wá yẹwhenọ dè na avọ́sinsan. Ṣogan, dohia depope ma tlẹ tin dọ yẹwhenọ de yihodọ sọn osẹ́n Jiwheyẹwhe tọn mẹ dọ kanlin oblọnọ lẹ mayin alọkẹyi gba. (Levitiku 22:17-20) Gbẹtọ lẹnpọn dagbenọ depope dona ko yọnẹn dọ yé ma na tindo nukundagbe togán yetọn tọn eyin yé tẹnpọn nado do nunina mọnkọtọn de hlan ẹn. Ṣigba na nugbo tọn, mẹhe klo tlala hugan togán gbẹtọvi tọn de wẹ yé to nuyiwa hẹ, yèdọ Nupojipetọ Wẹkẹ lọ tọn, Jehovah. Malaki 1:14 basi zẹẹmẹ whẹho lẹ tọn dole: “Ahọlu daho de wẹ yẹn, wẹ Oklunọ awhànpa lẹ tọn dọ, podọ osinọ wẹ oyín ṣie to Kosi lẹ mẹ.”
19. Etẹwẹ mí to nukundo, podọ etẹwẹ mí dona to wiwà?
19 Taidi devizọnwatọ nugbonọ Jiwheyẹwhe tọn lẹ, mí to nukundo azán he gbè Ahọlu Daho lọ, yèdọ Jehovah, na yin gbégbòna gbọn gbẹtọvi lẹpo dali. To ojlẹ enẹ mẹ, “aihọn na gọ́ na nuyọnẹn Oklunọ tọn, dile osin ṣinyọ́n ohù ji do.” (Isaia 11:9) Todin whẹ́, mì gbọ mí ni dovivẹnu nado jẹ nubiọtomẹsi Jehovah tọn lẹ kọ̀n gbọn apajlẹ psalm-kàntọ lọ tọn hihodo dali, mẹhe dọmọ: ‘Yẹn na yí opẹ́ do pagigona ẹn.’ (Psalm 69:30) Nado jẹ yanwle enẹ kọ̀n, Malaki tindo ayinamẹ yinukọn dogọ he sọgan hẹn ale daho wá na mí. To hosọ awe he na bọdego lẹ mẹ, mì gbọ mí ni na ayidonugo sọwhiwhe tọn hlan adà owe Malaki tọn devo lẹ.
Be Hiẹ Flin Ya?
• Naegbọn mí dona pagigona Jehovah?
• Naegbọn Jehovah ma kẹalọyi avọ́sinsan yẹwhenọ tọn lẹ to azán Malaki tọn gbè?
• Nawẹ mí nọ sanvọ́ pipà tọn hlan Jehovah gbọn?
• Etẹwẹ dona yin mẹwhinwhàn lọ na sinsẹ̀n-bibasi nugbo?
[Yẹdide to weda 9]
Dọdai Malaki tọn dlẹnalọdo azán mítọn gbè
[Yẹdide to weda 10]
Esau ma yọ́n pinpẹn onú wiwe lẹ tọn
[Yẹdide to weda 11]
Yẹwhenọ po gbẹtọ lẹ po basi avọ́sinsan ylankan lẹ
[Yẹdide to weda 12]
Lẹdo aihọn pé, Kunnudetọ Jehovah tọn lẹ to avọ́sinsan pipà tọn lẹ na vọ́nu