Nawẹ A Nọ Pọ́n Okú Hlan Gbọn?

OKÚ nọ tindo nugandomẹgo mẹhẹngbọjọ tọn do mí ji dile mí to mahẹ tindo to nuyiwa egbesọegbesọ mítọn lẹ mẹ, mahopọnna lehe mí tindo agbasalilo kavi yin adọkunnọ sọ. E sọgan jẹ mí ji to whedevonu he mí jlo na dasá aliho de kavi mlọnai do adọ́zan ji. Nujijọ ylankan lẹ taidi mẹgbeyinyan nukunbianamẹtọ lẹ tọn to 11 septembre 2001, do Tòdaho New York po Washington, D.C. tọn po ji, nọ hẹn mí yọnẹn dọ okú, heyin “kẹntọ godo tọn,” to ogbẹ̀ gbẹtọ wunmẹ lẹpo he tindo owhe voovo lẹ tọn yí, bo tlẹ nọ hù omẹ fọtọ́n susu dopọ to nukunwhiwhe kleun de mẹ to whedelẹnu.—1 Kọlintinu lẹ 15:26.

Dile etlẹ yindọ okú nọ dobunamẹ, e gbẹsọ nọ dọ̀n ayidonugo gbẹtọ lẹ tọn. Nudepope ma sọgan hẹn linlinnamẹwe de disa kavi dọ̀n mẹsusu wá televiziọn nukọn sọ linlin okú tọn, titengbe okú mẹsusu tọn to ninọmẹ budonamẹ tọn lẹ mẹ. E taidi dọ linlin mọnkọtọn lẹ ma nọ ṣiapọna gbẹtọ, vlavo okú lọ yin hinhẹnwa gbọn awhàn, nujijọ jọwamọ tọn, sẹ́nhẹngba, kavi awutu dali. Aliho sinsinyẹn he mẹ numọtolanmẹ lẹ nọ yin didohia te to whenuena omẹ nukundeji kavi omẹ diyin lẹ kú nọ do nuhiha glanglan he gbẹtọ lẹ tindo gando okú go hia.

Nugbo wẹ ehe lẹpo yin. Okú gbẹsọ nọ dọ̀n ayidonugo gbẹtọ lẹ tọn, titengbe okú mẹdevo lẹ tọn. Ṣigba, yé nọ tẹnpọn ma nado lẹnnupọndo okú yedetiti tọn ji. Okú mídetiti tọn yin hosọ de he suhugan mítọn ma nọ jlo nado lẹnnupọndeji.

Be Okú Nọ Dobuna We Wẹ?

Depope mítọn ma nọ jlo na kú gba podọ e na gbẹsọ yin mọ tẹgbẹ̀. Etẹwutu? Na Jiwheyẹwhe ko yí ojlo vẹkuvẹku gbẹninọ kakadoi tọn do mí mẹ wutu wẹ. Sọgbe hẹ Yẹwhehodọtọ 3:11, “E ko yí mavọmavọ do ahun yetọn mẹ,” wẹ Anchor Bible dọ. Enẹwutu nugbo lọ dọ gbẹtọ na kú dandan ko dó bẹwlu, kavi gbèmanọpọ dẹn-to-aimẹ de do ahun gbẹtọvi lẹ tọn mẹ. Nado sọgan duto bẹwlu ehe ji bo hẹn pekọwana ojlo jọwamọ tọn na gbẹninọ kakadoi, gbẹtọvi lẹ ko wleawuna nuyise wunmẹ lẹpo, bẹsọn nuplọnmẹ jọmaku alindọn tọn ji jẹ yise to vọjọ mẹ ji.

Depope he whẹho lọ yin, okú yin nujijọ tukladomẹ tọn, he nọ dobunamẹ de, podọ obu okú tọn tin to filẹpo. Enẹwutu, e ma dona paṣa mí gba dọ gbẹtọ lẹpo wẹ nọ pọ́n okú hlan taidi nukundido mẹhẹngbọjọ tọn de. Onú dopo wẹ yindọ, okú nọ hùngona ovọ́-yinyin gbẹzan heyin kinklandovo nado doafọna adọkun po huhlọn aṣẹpipa po tọn.

Dotowhé Ninọ Eyin Okú Sẹpọ

To ojlẹ he wayi lẹ mẹ, mẹhe to azọ̀n-jẹ-magbọ jẹ kavi mẹhe gbleawu sinsinyẹn de nọ saba yin dotẹnmẹna nado kú do lẹdo owhé etọn he e jẹakọ hẹ bo yiwanna lẹ tọn mẹ. Nuhe nọ saba jọ niyẹn to ojlẹ Biblu tọn lẹ mẹ, podọ e gbẹ́ yin mọ to fidelẹ. (Gẹnẹsisi 49:1, 2, 33) To whẹho mọnkọtọn lẹ mẹ, whẹndo lọ nọ pli, bọ ovi lẹ nọ tindo mahẹ to hodọdopọ lọ mẹ. Ehe nọ hẹn hagbẹ whẹndo tọn dopodopo tindo numọtolanmẹ lọ dọ e mayin emi kẹdẹ wẹ to awubla gba. E sọ nọ wleawuna homẹmiọnnamẹ pọmẹ tọn po awubla pọmẹ tọn po.

Ehe gbọnvo tlala na nuhe nọ jọ to lẹdo he mẹ hodidọ gando okú go yin osùnú te, bo nọ yin pinpọnhlan taidi nuhe ma sọgbe, podọ to ehe mẹ ovi lẹ ma nọ saba tindo mahẹ te na linlẹn lọ dọ e na “sinyẹn hugan na” yé wutu. To egbehe, lehe gbẹtọ nọ kú gbọn gbọnvo taun, e nọ saba yin to whenuena mẹde ma tin to yakẹ. Nugbo wẹ dọ mẹsusu na jlo nado kú do whégbè, to jijọho mẹ bo yin nukunpedego gbọn whẹndo owanyinọ de dali. Ṣigba na mẹsusu, nugbo blawu lọ wẹ yindọ yé nọ kú do dotowhé, yede ṣo podọ to awufiẹsa mẹ, bo nọ yin biblá do zomọ gigẹdẹ he dobunamẹ de go. To alọ devo mẹ, omẹ livi susu nọ kú bọ yè ma nọ yọ́n mẹhe hù yé lẹ, sọn akọ vivasudo, huvẹ, SIDA, tòwhan, kavi ohẹ́n klókló si.

Hosọ He Dona Yin Nulẹnpọndeji De

Biblu ma gbẹ́ dọ yè ni ma lẹnnupọndo okú ji gba. Na taun tọn, Yẹwhehodọtọ 7:2 dọna mí dọ: “E pọnte na yì ṣiọhumẹ hú na yì hùnwhẹ-gbé: na ehe wẹ opodo gbẹtọ lẹpo tọn.” To whenuena mí pannukọn okú, mí sọgan wọnji ahunmẹdunamẹnu kavi nuwiwa paa mítọn lẹ go bo ze ayidonugo mítọn do gliwhiwhe ogbẹ̀ tọn ji. Ehe sọgan gọalọna mí nado zan gbẹzan mítọn to aliho he tindo lẹndai dogọ de mẹ kakati nado zan ẹn to ovọ́ mẹ kavi hẹn ẹn gú poun.

Nawẹ a nọ pọ́n okú hlan gbọn? Be a ko gbeje numọtolanmẹ, nuyise, todido, po obu towe lẹ po gando opodo gbẹzan towe tọn go pọ́n ya?

Dile e yin do po ogbẹ̀ po, gbẹtọvi ma penugo nado basi zẹẹmẹ okú tọn bo mọnukunnujẹemẹ gba. Mẹdatọ lọ kẹdẹ wẹ yin omẹ dejidego dopo akàn he sọgan dọho do whẹho lọ ji. Ewọ “dè . . . wẹ asisa ogbẹ̀ tọn te,” podọ ewọ tọn “wẹ hẹndogbẹ̀ sọn okú si yin.” (Psalm 36:9; 68:20) Dile etlẹ sọgan paṣamẹ do sọ, nuyise he gbayipe gando okú go delẹ gbigbejepọn to hinhọ́n Ohó Jiwheyẹwhe tọn mẹ na miọnhomẹnamẹ bosọ fakọnamẹ. E na dohia dọ okú mayin opodo nulẹpo tọn dandan gba.

[Blurb to weda 4]

Yọnbasi okú tọn nọ gọalọna mí nado zan gbẹzan mítọn to aliho he tindo lẹndai dogọ de mẹ