Kanbiọ lẹ sọn Wehiatọ lẹ Dè

Eyin mẹde hù ede, be e na sọgbe dọ Klistiani lizọnyizọnwatọ de ni dọ hodidọ ṣiọdidi tọn lọ ya?

Klistiani lizọnyizọnwatọ dopodopo dona basi dide na ede eyin ayihadawhẹnamẹnu etọn sọgan dike e ni dọ hodidọ ṣiọdidi tọn do mẹde he hù ede ji. E dona lẹnnupọndo kanbiọ ehelẹ ji to whenue e to nudide lọ basi: Nawẹ Jehovah nọ pọ́n mẹdetiti hùhù hlan gbọn? Be nugbo wẹ dọ omẹ lọ lọsu wẹ hù ede ya? Be nuhahun apọ̀nmẹ kavi numọtolanmẹ tọn de wẹ zọ́n bọ e hù ede ya? Nawẹ mẹdetiti hùhù nọ yin pinpọnhlan do to lẹdo lọ mẹ?

Taidi Klistiani lẹ, mí tindo ojlo to lehe Jehovah nọ pọ́n mẹdetiti hùhù hlan do mẹ. Ogbẹ̀ gbẹtọvi tọn họakuẹ bo wé to nukun Jehovah tọn mẹ. (Gẹnẹsisi 9:5; Psalm 36:9) Hlọnhuhu wẹ mẹdetiti hùhù sọn ojlo mẹ yin, enẹwutu e ma nọ hẹn homẹ Jiwheyẹwhe tọn hùn gba. (Eksọdusi 20:13; 1 Johanu 3:15) Be nugbo enẹ glọnalina hodidọ ṣiọdidi tọn do mẹhe hù ede ji wẹ ya?

Lẹnnupọndo whẹho Ahọlu Sauli Islaeli tọn ji. To whenuena e yọnẹn dọ emi ma sọgan gán to awhàn godo tọn he e fùn hẹ Filistini lẹ mẹ, kakati nado dike na kẹntọ etọn lẹ ni dowinyan ẹn, “Sauli yí ohí etọn, bo dẹ́ jẹ e ji.” To whenuena Filistini lẹ mọ oṣiọ etọn, yé ze e plá do adó tòdaho Bẹti-ṣani tọn go. To mimọ nuhe Filistini lẹ ko wà mẹ, tòmẹnu Jabẹṣi-gileadi tọn lẹ de oṣiọ lọ sẹ bo mẹ̀n ẹn. Enẹgodo yé bẹ ohú etọn lẹ bo di yé. Yé tlẹ sọ blanú na azán ṣinawe, heyin aṣa aluẹmẹninọ tọn de to Islaelivi lẹ ṣẹnṣẹn. (1 Samuẹli 31:4, 8-13; Gẹnẹsisi 50:10) To whenuena Davidi, heyin mẹyiamisisadode Jehovah tọn se nuhe tòmẹnu Jabẹṣi-gileadi tọn lẹ ko wà, e dọmọ: “Donanọ mìwlẹ yin sọn OKLUNỌ dè, bọ mìwlẹ ko do dó dagbewà he hia hlan klunọ mìtọn, yèdọ hlan Sauli, bo ko do di i. Dinvie OKLUNỌ ni do dagbewà po nugbo po hlan mì.” (2 Samuẹli 2:5, 6) Biblu ma dohia dọ tòmẹnu Jabẹṣi-gileadi tọn lẹ yin whẹgbledo na nuhe sọgan yin pinpọnhlan taidi hùnwhẹ ṣiọdidi tọn de bibasi na Ahọlu Sauli gba. Yí enẹ jlẹdo whẹho mẹhe yè ma diṣiọ yetọn na ylanwiwa yetọn lẹ wutu go. (Jẹlemia 25:32, 33) Lizọnyizọnwatọ Klistiani de sọgan lẹnnupọndo kandai Sauli tọn ji nado basi nudide eyin ewọ sọgan dọ hodidọ ṣiọdidi tọn de na mẹhe hù ede.

Lizọnyizọnwatọ lọ sọgan sọ jlo nado lẹnnupọndo lẹndai hodidọ ṣiọdidi tọn de ji. To ma taidi mẹhe yise to jọmaku alindọn tọn mẹ lẹ, Kunnudetọ Jehovah tọn lẹ ma nọ basi hùnwhẹ ṣiọdidi tọn lẹ po linlẹn agọ̀ oṣiọ lọ didohlan aihọn devo mẹ tọn po gba. Kakati nado hẹn ale wá na oṣiọ lọ, lẹndai tangan hodidọ ṣiọdidi tọn de wẹ nado miọnhomẹna mẹhe tin to aluẹmẹ lẹ bo dekunnu na mẹhe wá lẹ gando ninọmẹ oṣiọ lẹ tọn go. (Yẹwhehodọtọ 9:5, 10; 2 Kọlintinu lẹ 1:3-5) Whẹwhinwhẹ́n tangan devo wẹ yin nado gọalọna mẹhe wá lẹpo nado lẹnnupọndo gliwhiwhe gbẹzan yetọn tọn ji. (Yẹwhehodọtọ 7:2) Be hodidọ do ṣiọdidi mẹhe hù ede tọn ji na yí lẹndai ehelẹ wà ya?

Nugbo wẹ dọ, mẹdelẹ sọgan lẹndọ mẹhe hù ede sọn ojlo mẹ wá de yọnẹn ganji dọ Jehovah wẹ emi waylan do. Ṣigba be e nọ yọnbasi to whepoponu nado suwhẹna numọtolanmẹ mọnkọtọn de ya? Be e sọgan ko yin nuyiwa nudide afọdopolọji tọn de wẹ ya? E nọ wá vẹna mẹhe tẹnpọn nado hù yede delẹ tlala bọ yé ma nọ tẹ́n ẹn pọ́n ba. Mẹhe ko kú de ma sọgan lẹnvọjọ na nuhe e ko wà gba.

Whẹwhinwhẹ́n titengbe devo wẹ yin nuhahun apọ̀nmẹ po numọtolanmẹ tọn lẹ po he nọ hẹn mẹdetiti hùhù susu wá. Na nugbo tọn, omẹ ehelẹ sọgan yin yiylọdọ mẹdetiti-hùtọ lẹ. Sọgbe hẹ sọha-yí-nanú delẹ, 90 to kanweko ji mẹhe hù yedelẹ tọn wẹ nọ tindo nuhahun apọ̀nmẹ, numọtolanmẹ, kavi amasin adínọ ṣiṣizan tọn wunmẹ de. Be Jehovah na jona mẹhe tin to ninọmẹ apọ̀nmẹ tọn mọnkọtọn mẹ bo hù yedelẹ ya? Mí ma sọgan dọ eyin ylando he ma tindo jona de wẹ mẹhe kú lọ wà to nukun Jehovah tọn mẹ gba. Klistiani lizọnyizọnwatọ de dona gbadopọnna ninọmẹ po kandai agbasalilo mẹhe ko kú lọ tọn po to whenuena e to nulẹnpọn vlavo eyin e na dọ hodidọ ṣiọdidi tọn na mẹhe hù ede lọ.

Adà dopo gbẹsọ dona yin nulẹnpọndeji: Nawẹ mẹhe tin to agbegbe lọ mẹ lẹ nọ pọ́n mẹdetiti hùhù po okú mẹde tọn po hlan gbọn? Ehe dona duahunmẹna mẹho lẹ taun, he tindo ojlo to yinkọ dagbe agun Kunnudetọ Jehovah tọn lẹ tọn he tin to lẹdo lọ mẹ. Sinai do pọndohlan paa gbẹtọ lẹ tọn hlan mẹdetiti hùhù ji to lẹdo lọ mẹ, titengbe gando whẹho mẹhe hù ede lọ tọn go, mẹho lẹ sọgan de ma nado penukundo ṣiọdidi mọnkọtọn go to gbangba kavi dike hodidọ lọ ni yin bibasi to Plitẹnhọ Ahọluduta tọn mẹ.

Etomọṣo, eyin Klistiani lizọnyizọnwatọ de yin bibiọ nado deanana hùnwhẹ ṣiọdidi lọ tọn, e sọgan de to dodonu nudide mẹdetiti tọn ji dọ emi sọgan wàmọ. Eyin e de nado wàmọ, e dona yí wuntuntun zan ma nado dọ po nujikudo po eyin omẹ lọ na yin finfọnsọnku. Todido sọgodo tọn depope na mẹhe ko kú lọ tin to alọ Jehovah tọn mẹ, podọ mẹdepope matin to otẹn dagbe mẹ nado dọ eyin mẹhe ko kú lọ na yin finfọnsọnku kavi lala. Lizọnyizọnwatọ lọ sọgan zinnudo nugbo Biblu tọn lẹ ji gando okú go bo miọnhomẹna mẹhe tin to aluẹmẹ lẹ.