Pọndohlan Klistiani Tọn Na Aṣa Ṣiọdidi Tọn Lẹ

OKÚ ajiji, madonukun mẹyiwanna de tọn yin nujijọ awubla tọn taun de. E nọ dekọtọn do flumẹjijẹ, he nọ yin hihodo gbọn awufiẹsa sinsinyẹn numọtolanmẹ tọn dali. Mimọ mẹyiwanna de ni kú to azọ̀njijẹ awufiẹsa whenu gaa tọn de godo mayin nubajonọmẹ gba, ṣigba awubla po numọtolanmẹ hẹnbu sisosiso tọn lọ po nọ gbọṣi aimẹ.

Mahopọnna ninọmẹ lẹ he lẹdo okú mẹyiwanna de tọn, mẹhe tin to aluẹmẹ lọ tindo nuhudo godonọnamẹ po homẹmiọnnamẹ po tọn. Klistiani he tin to aluẹmẹ de sọgan sọ pannukọn homẹkẹn sọn mẹhe tẹdo aṣa ṣiọdidi tọn he ma sọgbe hẹ Owe-wiwe lẹ go dè ga. Ehe gbayipe taun to otò Aflika tọn susu mẹ podọ to adà aigba lọ tọn devo lẹ ji ga.

Etẹwẹ sọgan gọalọna Klistiani he tin to aluẹmẹ de nado dapana aṣa ṣiọdidi tọn he ma sọgbe hẹ Owe-wiwe lẹ? Nawẹ hagbẹ yisenọ lẹ sọgan yin godonọnamẹtọ to ojlẹ whlepọn mọnkọtọn lẹ tọn mẹ gbọn? Gblọndo lẹ hlan kanbiọ ehelẹ yin ahunmẹdunamẹnu hlan mẹlẹpo he to díndín nado hẹn homẹ Jehovah tọn hùn lẹ, na “sinsẹ̀n wiwe magble to nukun Jiwheyẹwhe Otọ́ nukọn wẹ ehe, nado nọ dla tọṣiọvi po asuṣiọsi lẹ po pọ́n to nukunbibia yetọn mẹ, podọ nado whlá ede madodiho sọn aihọn dè.”—Jakobu 1:27.

Yin Kinkọndopọ Gbọn Yise de Dali

Whẹwhinwhẹ́n gbayipe dopo he kọ̀n aṣa ṣiọdidi tọn susu dopọ wẹ yise lọ dọ oṣiọ lẹ nọ to gbẹnọ zọnmii to agblò mayinukundomọ tọgbo lẹ tọn de mẹ. Nado fahomẹ na yé, susu mẹhe tin to aluẹmẹ lẹ tọn nọ tindo numọtolanmẹ yinyin hinhẹn po huhlọn po nado basi hùnwhẹ delẹ. Kavi yé nọ dibu dọ yé na hẹn homẹgblena kọmẹnu lẹ mẹhe yise dọ awugble na wá lẹdo lọ mẹ eyin hùnwhẹ lọ lẹ mayin bibasi.

Klistiani nugbo de ma dona jogbe hlan obu gbẹtọ tọn bo tindo mahẹ to aṣa he na hẹn homẹgblena Jiwheyẹwhe lẹ mẹ gba. (Howhinwhẹn lẹ 29:25; Matiu 10:28) Biblu dohia dọ oṣiọ lẹ tin to ninọmẹ nude mayọnẹn tọn mẹ, na e dọmọ: “Na mẹhe to ogbẹ̀ yọnẹn dọ emi na kú; ṣigba oṣiọ lẹ ma yọ́n nude . . . Na azọ́n matin, linlẹn matin, zinzan matin, kavi nuyọnẹn to kutomẹ fie hiẹ jei.” (Yẹwhehodọtọ 9:5, 10) Enẹwutu, Jehovah Jiwheyẹwhe na avase omẹ hohowhenu tọn etọn lẹ ma nado tẹnpọn nado fahomẹ na oṣiọ lẹ kavi dọho hẹ yé gba. (Deutelonomi 14:1; 18:10-12; Isaia 8:19, 20) Nugbo Biblu tọn ehelẹ sọta aṣa ṣiọdidi tọn susu he gbayipe lẹ.

Etẹwẹ Dogbọn “Klọwe Zanhẹmẹ Tọn” Dali?

To otò ṣẹnṣẹn Aflika tọn delẹ mẹ, alọwlemẹ he tin to aluẹmẹ lọ nọ yin nukundo nado tindo kọndopọ zanhẹmẹ tọn hẹ hẹnnumẹ sẹpọ mẹhe kú lọ tọn de. Eyin ehe mayin wiwà, e yin yiyise dọ mẹhe kú lọ na gbleawuna hagbẹ whẹndo lọ tọn he pò to ogbẹ̀ lẹ. Nuyiwa aṣa tọn ehe nọ yin yiylọdọ “klọwe zanhẹmẹ tọn.” Ṣigba Biblu basi zẹẹmẹ haṣinṣan zanhẹmẹ tọn depope to gbonu alọwle tọn dọ “ogalilọ.” To whenuena e yindọ Klistiani lẹ dona “họ̀n na galilọ,” yé nọ yí adọgbigbo do doakọnna aṣa he ma sọgbe hẹ Owe-wiwe ehe lọ.—1 Kọlintinu lẹ 6:18.

Lẹnnupọndo asuṣiọsi de heyin yiylọdọ Mercya ji. To whenuena asu etọn kú to 1989, hẹnnumẹ lẹ jlo dọ ewọ ni tindo mahẹ to klọwe zanhẹmẹ tọn mẹ hẹ hẹnnumẹ sunnu de. E gbẹ́, bo basi zẹẹmẹ dọ nuyiwa aṣa tọn enẹ jẹagọdo osẹ́n Jiwheyẹwhe tọn. Po flumẹjijẹ po, hẹnnumẹ lẹ jo e do to whenuena yé ko zun in pó godo. To osun dopo godo yé gbà owhé etọn, bo dè họgbápanu lẹ sọn ohọ̀ etọn ji. “Sinsẹ̀n towe sọgan penukundo go we,” wẹ yé dọ.

Agun lọ miọnhomẹna Mercy podọ tlẹ gbá ohọ̀ yọyọ de na ẹn. Kọmẹnu lẹ yin nuyiwadeji na dagbe sọmọ bọ mẹdelẹ basi nudide nado tindo mahẹ to họgbigbá lọ mẹ, podọ asi togán lọ tọn heyin Katoliki wẹ yin omẹ tintan he hẹn osẹ wá na họgbigbá lọ. Walọyizan nugbonọ Mercy tọn na tuli ovi etọn lẹ. Ẹnẹ to yé mẹ sọn whenẹnu ko basi klandowiwe hlan Jehovah Jiwheyẹwhe, podọ dopo to agọe tlẹ yì Wehọmẹ Azọ́nplọnmẹ Devizọnwiwa tọn.

Na aṣa klọwe zanhẹmẹ tọn wutu, Klistiani delẹ ko na dotẹnmẹ yedelẹ nado yin kọgbidina biọ alọwiwle hẹ mayisenọ de mẹ. Di apajlẹ, asiṣiọsu de to owhe 70 etọn lẹ mẹ gbọn sọmawhe dali wlealọ hẹ awhlivu hẹnnumẹ asi etọn he kú tọn de. Gbọn ehe wiwà dali, e sọgan sọalọakọn dọ emi ko basi klọwe zanhẹmẹ tọn lọ. Ṣogan, aliho nuyiwa tọn enẹ jẹagọdo ayinamẹ Biblu tọn dọ Klistiani lẹ dona wlealọ “to Oklunọ mẹ kẹdẹ.”—1 Kọlintinu lẹ 7:39.

Hùnwhẹ Jọnu-didọ Ozán-Blebu mẹ Tọn Lẹ

To otò susu mẹ, mẹhe to aluẹmẹ lẹ nọ pli to owhé mẹhe kú lọ tọn gbè bo nọ nọ̀ nukle to ozán lọ blebu mẹ. Jọnu-didọ ehelẹ nọ saba bẹ́ agọdudu po ohunhiho po hẹn. Ehe yin yiyise nado fahomẹ na mẹhe kú lọ podọ nado basi hihọ́na pipotọ whẹndo lọ tọn sọn azétọ lẹ si. Hodidọ pipà oklọ tọn lẹ sọgan yin didọ nado mọ nukundagbe mẹhe kú lọ tọn. To hodidọ de godo, mẹhe tin to aluẹmẹ lẹ sọgan jihàn sinsẹ̀n tọn de whẹpo mẹdevo nido fọnṣite bo dọho. Ehe sọgan to nukọnzindo kaka ai nido họ́n.b

Klistiani nugbo de ma nọ tindo mahẹ to hùnwhẹ jọnu-didọ ozán blebu tọn mọnkọtọn lẹ mẹ gba na Biblu dohia dọ oṣiọ lẹ ma penugo nado gọalọ kavi gbleawuna mẹhe tin to ogbẹ̀ lẹ. (Gẹnẹsisi 3:19; Psalm 146:3, 4; Johanu 11:11-14) Owe-wiwe lẹ gblewhẹdo afinyọnnọnuwiwa. (Osọhia 9:21; 22:15) Ṣogan, Klistiani asuṣiọsi de sọgan mọ ẹn taidi nuhe sinyẹnawu nado glọnalina mẹdevo lẹ sọn afinyọnnọnuwiwa lẹ mẹ. Yé sọgan tẹdo nuyiwa jọnu-didọ ozán-blebu tọn go to owhé etọn gbè. Etẹwẹ yisenọ hatọ lẹ sọgan wà nado gọalọna Klistiani lẹ he tin to aluẹmẹ he pannukọn nukunbibia dogọ ehe?

Mẹho agun tọn lẹ ko nọ saba penugo nado nọgodona whẹndo Klistiani tọn he tin to aluẹmẹ lẹ gbọn hoyijlẹdohogo hẹ hẹnnumẹ lẹ po kọmẹnu lẹ po dali. To hoyijlẹdohogo mọnkọtọn godo, omẹ dopodopo ehelẹ sọgan yigbe nado yì sọn owhé lọ gbè to jijọho mẹ bo nasọ plidopọ na nuwiwa ṣiọdidi tọn whladopo dogọ to azán devo gbè. Ṣigba etẹwẹ eyin mẹdelẹ lẹzun avundá-daitọ́? Vivẹnudido yinukọn dogọ nado yihojlẹdohogo sọgan dekọtọn do danuwiwa mẹ. ‘Afanumẹ Oklunọ tọn de ma ha na hoavun, ṣigba dona whlá ede sọn oylan si.’ (2 Timoti 2:24) Enẹwutu eyin hẹnnumẹ he ma kọngbedopọ lẹ vannukundomẹ nado yí tẹnmẹ, asuṣiọsi Klistiani de po ovi etọn lẹ po sọgan nọ ma penugo nado glọnalina ehe. Ṣigba yé ma na tindo mahẹ to hùnwhẹ sinsẹ̀n lalo tọn depope he wá aimẹ to owhé yetọn gbè mẹ gba, na yé setonuna gbedide Biblu tọn he dọmọ: “Mì yin omẹ yè yí gbemasọ do dopokle dopọ po mayisenọ lẹ po blo.”—2 Kọlintinu lẹ 6:14.

Nunọwhinnusẹ́n ehe sọ yọn-na-yizan na ṣiọdidi. Kunnudetọ Jehovah tọn lẹ ma nọ tindo mahẹ to hanjiji, odẹ̀-hihò, kavi hùnwhẹ lẹ heyin anadena gbọn lizọnyizọnwatọ sinsẹ̀n lalo tọn de dali mẹ gba. Eyin Klistiani heyin hagbẹ whẹndo tọn pẹkipẹki lẹ pọ́n ẹn hlan taidi nuhe sọgbe nado yì nuyiwa mọnkọtọn de tẹnmẹ, yé ma na tindo mahẹ gba.—2 Kọlintinu lẹ 6:17; Osọhia 18:4.

Nuyiwa Ṣiọdidi Tọn lẹ He Tindo Yẹyi

Nuyiwa ṣiọdidi tọn lẹ he nọ yin bibasi gbọn Kunnudetọ Jehovah tọn lẹ dali ma bẹ́ hùnwhẹ he tindo lẹndai nado fahomẹ na oṣiọ lọ lẹ hẹn gba. Hodidọ Biblu tọn de nọ yin nina vlavo to Plitẹnhọ Ahọluduta tọn mẹ, owhé he nọ penukundo oṣiọ go gbè, to owhé mẹhe kú lọ tọn gbè, kavi to ṣiọditẹn lọ. Lẹndai hodidọ lọ tọn wẹ nado miọnhomẹna mẹhe tin to aluẹmẹ lẹ gbọn zẹẹmẹ bibasina nuhe Biblu dọ gando oṣiọ po todido fọnsọnku tọn po go dali. (Johanu 11:25; Lomunu lẹ 5:12; 2 Pita 3:13) Ohàn sinai do Owe-wiwe lẹ ji dopo sọgan yin jìjì, bọ nuyiwa lọ nọ yin tadona gbọn odẹ̀ homẹmiọnnamẹ tọn de dali.

To agọe, nuwiwa ṣiọdidi tọn mọnkọtọn de yin bibasi na dopo to Kunnudetọ Jehovah tọn lẹ mẹ mẹhe yin nọviyọnnu pẹvi Nelson Mandela tọn, yèdọ togan Afrique du Sud tọn. To nuwiwa lọ godo, togan lọ yí ahun lẹpo do dopẹna hodọtọ lọ. Omẹ nukundeji po ogán gbóogbó susu po wẹ wá finẹ. “Ehe wẹ yin ṣiọdidi he doyẹyi hugan he yẹn ko yì pọ́n,” wẹ agbago-gán de dọ.

Be Avọ̀ Aluẹmẹninọ Tọn lẹ Yin Alọkẹyi Ya?

Kunnudetọ Jehovah tọn lẹ nọ nọ̀ aluẹmẹ na okú mẹyiwanna de tọn. Taidi Jesu, yé sọgan viavi. (Johanu 11:35, 36) Ṣigba yé ma nọ pọ́n ẹn hlan taidi dandannu nado do awubla yetọn hia gbọn yẹhiadonu gbangba tọn lẹ dali gba. (Yijlẹdo Matiu 6:16-18 go.) To aigba susu ji, asuṣiọsi lẹ nọ yin nukundo nado do avọ̀ aluẹmẹninọ tọn vonọtaun lẹ nado fahomẹ na mẹhe kú lọ. Avọ̀ ehelẹ dona yin dido na osun susu kavi etlẹ yin na owhe dopo to ṣiọdidi lọ godo, podọ didesẹ yetọn sọ yin nujijọ agọdudu tọn devo.

Awugbopo nado do ohia aluẹmẹninọ tọn lẹ hia nọ yin pinpọnhlan taidi ylanwiwa sọta mẹhe kú lọ. Na whẹwhinwhẹ́n ehe wutu, to apadewhe Swaziland tọn, ogán kọmẹ tọn lẹ ko yan Kunnudetọ Jehovah tọn lẹ yì sọn owhé po aigba yetọn titi lẹ po ji. Etomọṣo, Klistiani nugbonọ mọnkọtọn lẹ ko yin nukunpedego to whepoponu gbọn mẹmẹsunnu gbigbọmẹ tọn yetọn lẹ he nọ nọ̀ fidevo lẹ dali.

Whẹdatẹn Daho Swaziland tọn ko dawhẹ nukundagbe tọn na Kunnudetọ Jehovah tọn lẹ, bo dọ dọ yé dona yin dotẹnmẹ na nado gọ̀ wá owhé po aigba yetọn lẹ po ji. To whẹho devo mẹ, Klistiani asuṣiọsi de yin dotẹnmẹ na nado nọ nutindo etọn ji to whenuena e ko do wekinkan de po ohó-yido-kanji de po hia to ehe mẹ asu etọn he ko kú lọ dọ te hezeheze dọ asi emitọn ma dona do avọ̀ aluẹmẹninọ tọn lẹ gba. Gbọnmọ dali, e penugo nado dohia dọ emi to sisi na asu emitọn na nugbo tọn.

Nuhọakuẹ daho wẹ tin to didọ anademẹ ṣiọdidi tọn lẹ hezeheze jẹnukọnna okú mẹdetiti tọn, titengbe to fie nuwiwa he ma sọgbe hẹ Owe-wiwe lẹ gbayipe te lẹ. Lẹnnupọndo apajlẹ Victor tọn ji, mẹhe nọ nọ̀ Cameroun. E kàn tito-to-whinnu he na yin hihodo to ṣiọdidi etọn tẹnmẹ dai. Omẹ nukundeji susu wẹ tin to whẹndo etọn mẹ heyin apadewhe nuyiwa he tindo aṣa he do huhlọn lẹ gọna sisi nina oṣiọ lẹ tọn, po sinsẹ̀n-bibasi hlan taká gbẹtọ tọn lẹ po. To whenuena e yindọ Victor yin hagbẹ whẹndo lọ tọn he yè nọ na sisi, e yọnẹn dọ e yọnbasi dọ taká emitọn ni yin nuyiwa hẹ to aliho ehe mẹ. Enẹwutu e na anademẹ họnwun lẹ do lehe Kunnudetọ Jehovah tọn lẹ dona penukundo ṣiọdidi etọn go do ji. Ehe hẹn ninọmẹ lẹ bọawu na asuṣiọsi etọn po ovi etọn lẹ po, podọ kunnudide dagbe de yin nina to lẹdo lọ mẹ.

Dapana Aṣa He ma Sọgbe hẹ Owe-wiwe lẹ Hihodo

Mẹdelẹ he tindo oyọnẹn Biblu tọn nọ dibu nado gbọnvo. Nado dapana homẹkẹn, yé ko tẹnpọn nado hẹn homẹ kọmẹnu yetọn lẹ tọn hùn gbọn awusọhia jọnu-didọ aṣa tọn de didohia dali na mẹhe kú lọ. To whenuena e yin nuhe jẹ na pipà nado dla mẹhe tin to aluẹmẹ lọ pọ́n nado wleawuna homẹmimiọn mẹdetiti tọn, ehe ma biọ dọ nuwiwa ṣiọdidi tọn kleun de ni yin bibasi to owhé mẹhe kú lọ tọn gbè to whèjai lẹpo jẹnukọnna ṣiọdidi taun lọ gba. Mọwiwà sọgan hẹn ayidonugotọ́ lẹ dahli, to whenuena e yindọ e sọgan na nuyiwadomẹji lọ yé dọ mahẹ tindotọ lẹ ma yí nuhe Biblu dọ dogbọn ninọmẹ oṣiọ lẹ tọn dali sè na nugbo tọn gba.—1 Kọlintinu lẹ 10:32.

Biblu dotuhomẹna Klistiani lẹ nado ze sinsẹ̀n-bibasi Jiwheyẹwhe tọn do otẹn tintan mẹ to gbẹzan mẹ bosọ basi yizan dagbe whenu yetọn tọn. (Matiu 6:33; Efesunu lẹ 5:15, 16) Nalete, to fidelẹ, nuwiwa agun tọn ko yin alọhẹndotena na osẹ dopo kavi hugan mọ na ṣiọdidi de wutu. Nuhahun ehe ma nọte do Aflika kẹdẹ gba. Gando ṣiọdidi dopo go, linlin de sọn Huwaji Amelika tọn dọmọ: “Opli Klistiani tọn atọ̀n tindo sọha mẹplidopọ lẹ tọn he yido taun. Sinsẹ̀nzọn kunnudegbe tọn mayin godonọna na nudi azán ao. Yèdọ mẹhe tin to gbonu agun lọ tọn lẹ po Biblu Plọntọ lẹ po yin pipaṣa bosọ yin hinhẹn jẹflumẹ nado mọ lehe delẹ to mẹmẹsunnu po mẹmẹyọnnu mítọn lẹ po mẹ to mahẹ tindo to nuwiwa ṣiọdidi tọn lẹ mẹ do.”

To lẹdo delẹ mẹ, whẹndo he tin to aluẹmẹ de sọgan basi oylọ na họntọn sẹpọ delẹ wá owhé yetọn gbè na kọfanamẹ kleun de to ṣiọdidi lọ godo. Ṣigba to adà susu Aflika tọn ji, omẹ kanweko susu he yì ṣiọditẹn lẹ nọ lẹkọwa owhé mẹhe kú lọ tọn gbè bo to nukundo agọ́ de, fie kanlin lẹ nọ saba yin yíyí do sanvọ́ te. Mẹhe to awukọndopọ hẹ agun Klistiani tọn delẹ ko hodo aṣa ehe, to nuyiwadomẹji lọ didohia mẹ dọ yé to agọ́ he sọgbe hẹ aṣa lẹ wà nado fahomẹ na oṣiọ lọ.

Nuwiwa ṣiọdidi tọn he nọ yin bibasi gbọn Kunnudetọ Jehovah tọn lẹ dali lẹ ma nọ ze agbàn pinpẹn he vẹahi lẹ do mẹhe tin to aluẹmẹ lẹ ji gba. Enẹwutu e ma dona yin dandannu nado tindo tito vonọtaun de na mẹhe wá lẹ nado jọ̀ akuẹ nado suahọ akuẹzinzan ṣiọdidi wazẹjlẹgo tọn lẹ gba. Eyin asuṣiọsi wamọnọ lẹ ma sọgan suahọ akuẹzinzan lẹ tọn, mẹdevo lẹ to agun lọ mẹ matin ayihaawe na yin homẹhunnọ nado gọalọ. Eyin alọgọ mọnkọtọn whè janwẹ, mẹho lẹ sọgan basi tito nado wleawuna alọgọ agbasanu lẹ tọn na mẹhe jẹ na lẹ.—1 Timoti 5:3, 4.

Aṣa ṣiọdidi tọn lẹ ma nọ sọta nunọwhinnusẹ́n Biblu tọn lẹ to whepoponu gba. To whenuena yé wàmọ, Klistiani lẹ nọ magbè nado yinuwa to kọndopọmẹ hẹ Owe-wiwe lẹ.c (Owalọ lẹ 5:29) Dile etlẹ yindọ ehe sọgan hẹn nukunbibia dogọ lẹ wá sọ, susu devizọnwatọ Jiwheyẹwhe tọn lẹ sọgan dekunnu dọ yé ko pehẹ whlepọn mọnkọtọn lẹ po kọdetọn dagbe po. Yé ko wàmọ po huhlọn he wá sọn Jehovah dè po, yèdọ “Jiwheyẹwhe homẹmimiọn lẹpo tọn,” gọna alọgọ owanyinọ hatọ yisenọ lẹ tọn mẹhe ko miọnhomẹna yé to nukunbibia yetọn mẹ.—2 Kọlintinu lẹ 1:3, 4.

[Nudọnamẹ Odò Tọn Lẹ]

[Apotin to weda 23]

Yin Didona Na Teninọ Gligli

Sibongili yin asuṣiọsi adọgbotọ Klistiani de he nọ nọ̀ Swaziland. To okú asu etọn tọn godo agọe, e gbẹ́ nado hodo aṣa lẹ he mẹsusu nọ pọnhlan nado fahomẹ na mẹhe ko kú lọ. Di apajlẹ, e ma whlẹ́ oda etọn sọn ota gba. (Deutelonomi 14:1) Hagbẹ ṣinatọ̀n whẹndo lọ tọn lẹ gblehomẹ dogbọn ehe dali bosọ yí huhlọn do whlẹ́ ota etọn. Yé sọ glọnalina Kunnudetọ Jehovah tọn lẹ sọn dlapọn bibasi na owhé lọ nado miọnhomẹna Sibongili mẹ. Ṣigba, mẹdevo lẹ he tindo ojlo to owẹ̀n Ahọluduta lọ tọn mẹ lẹ yin homẹhunnọ nado dla ẹ pọ́n po wekanhlanmẹ tulinamẹ tọn lẹ po sọn mẹho lẹ dè. To gbedopo whenuena Sibongili yin nukundo nado dó avọ̀ vonọtaun aluẹmẹninọ tọn lẹ, onú paṣamẹ de jọ. Hagbẹ nukundeji whẹndo lọ tọn de ylọ opli de nado dọhodo gbigbẹ́ etọn nado setonuna nuwiwa aṣa aluẹmẹninọ tọn lẹ ji.

Sibongili na linlin dọmọ: “Yé kanse eyin gbemima sinsẹ̀n ṣie tọn lẹ na na mi dotẹnmẹ nado do awubla hia gbọn awù gaa yuu aluẹmẹninọ tọn lẹ dido dali. To whenuena yẹn ko basi zẹẹmẹ teninọ ṣie tọn godo, yé dọna mi dọ yé ma jlo nado hẹn mi po huhlọn po gba. Hlan nupaṣamẹ ṣie, yemẹpo vẹvẹ na nuyiwa hẹ mi agọ̀ po ota whiwhlẹ na mi sọta ojlo ṣie po. Yemẹpo biọ mi nado jona yé.” To godo mẹ, nọviyọnnu Sibongili tọn do gbemima etọn hia dọ Kunnudetọ Jehovah tọn lẹ tindo sinsẹ̀n nugbo lọ, podọ e sọ biọ plọnmẹ Biblu de.

Lẹnnupọndo apajlẹ devo ji: Dawe Afrique du Sud tọn de he yinkọ etọn yin Benjamin yin owhe 29-mẹvi to whenuena e sè dogbọn okú ajiji otọ́ etọn tọn dali. To ojlẹ enẹ mẹ, Benjamin wẹ yin Kunnudetọ dopo gee he tin to whẹndo etọn mẹ lọ. To nuwiwa ṣiọdidi tọn whenu, mẹlẹpo wẹ yin nukundo nado zinzọnlin gbọn yọdo lọ pa bo ba okọ́ alọgògò dopo do ṣiọpotin lọ ji.* To ṣiọdidi lọ godo, hagbẹ sẹpọ pẹkipẹki whẹndo lọ tọn lẹpo wẹ yin ota whlẹ́ na. To whenuena e yindọ Benjamin ma tindo mahẹ to nuwiwa ehelẹ mẹ, kọmẹnu lẹ po hagbẹ whẹndo tọn lẹ po dọ dọdai dọ ewọ na yin yasana gbọn gbigbọ otọ́ etọn he ko kú lọ tọn dali.

“Na yẹn ze jidide ṣie do Jehovah mẹ wutu, nudepope ma wà mi,” wẹ Benjamin dọ. Hagbẹ whẹndo tọn lẹ doayi lehe onú lẹ yì do na mi go. To madẹnmẹ, sọha yetọn delẹ jẹ Biblu plọn hẹ Kunnudetọ Jehovah tọn lẹ ji bosọ yin bibaptizi to yẹhiadonu klandowiwe yetọn hlan Jiwheyẹwhe mẹ. Podọ etẹwẹ dogbọn Benjamin dali? E biọ azọ́n whenu-gigọ wẹndagbe lila tọn mẹ. Na owhe kleun agọe tọn lẹ, e ko tindo lẹblanulọkẹyi dagbe sinsẹ̀nzọnwiwa na agun Kunnudetọ Jehovah tọn lẹ tọn taidi nugopọntọ tomẹyitọ de.

[Nudọnamẹ Odò Tọn]

Mẹdelẹ sọgan mọdọ nudepope ma ylan to vounvoun lẹ po okọ́ alọgògò dopo dindlan do yọdo de mẹ po gba. Etomọṣo, Klistiani de na dapana nuyiwa ehe eyin lẹdo lọ nọ pọ́n ẹn hlan taidi homẹfifana oṣiọ lọ kavi yin eyin apadewhe hùnwhẹ de heyin anadena gbọn lizọnyizọnwatọ sinsẹ̀n lalo tọn de dali.—Pọ́n Réveillez-vous! 22 juillet 1977 tọn, weda 15.