Litaina Aṣẹpipa Jiwheyẹwhe Tọn po Nugbonọ-Yinyin Po
‘Jehovah wẹ Whẹdatọ mítọn, Jehovah wẹ Osẹ́nnọ mítọn, Jehovah wẹ Ahọlu mítọn.’—ISAIA 33:22.
1. Etẹlẹ wẹ hẹn Islaeli hohowhenu tọn yin vonọtaun to akọta lẹ ṣẹnṣẹn?
TO OWHE 1513 J.W.M., akọta Islaeli tọn yin didoai. To whenẹnu, e ma tindo tòdaho tatọ́-tònọ, aigba, kavi ahọlu yinukundomọ de gba. Tòvi etọn lẹ yin afanumẹ dai tọn lẹ. Ṣigba, akọta yọyọ enẹ yin vonọtaun to aliho devo mẹ. Jehovah Jiwheyẹwhe wẹ Whẹdatọ, Osẹ́nnọ, podọ Ahọlu mayinukundomọ etọn. (Eksọdusi 19:5, 6; Isaia 33:22) Akọta devo depope ma tindo lẹblanulọkẹyi enẹ gba!
2. Kanbiọ tẹwẹ fọndote gando aliho he mẹ Islaeli yin tito-basina do go, podọ etẹwutu gblọndo lọ yin nujọnu na mí?
2 To whenuena e yindọ Jehovah yin Jiwheyẹwhe he nọ nọ̀ titoji bosọ yin Jiwheyẹwhe jijọho tọn, mí na donukun dọ akọta depope he ji e dugán do ni tin to titoji ganji. (1 Kọlintinu lẹ 14:33) Whẹho lọ pẹpẹ niyẹn po Islaeli po. Ṣigba nawẹ Jiwheyẹwhe mayinukundomọ de na deanana titobasinanu yinukundomọ aigba ji tọn de gbọn? Mì na wadagbe nado gbadopọnna lehe Jehovah deanana akọta hohowhenu tọn enẹ do, titengbe lehe nuyiwa etọn lẹ hẹ Islaeli zinnudo nujọnu-yinyin taliliaina aṣẹpipa Jiwheyẹwhe tọn po nugbonọ-yinyin po ji do.
Lehe Islaeli Hohowhenu Tọn Yin Anadena Do
3. Tito dagbe tẹlẹ wẹ Jehovah basi nado deanana omẹ etọn lẹ?
3 Dile etlẹ yindọ Jehovah wẹ yin Ahọlu mayinukundomọ Islaeli tọn, e de sunnu nugbonọ lẹ taidi afọzedaitọ yinukundomọ etọn lẹ. Ahọvi lẹ, nukọntọ whédo tọn lẹ, po sunnu mẹho lẹ po yin dide nado wadevizọn na gbẹtọ lẹ taidi ayinamẹtọ po whẹdatọ lẹ po. (Eksọdusi 18:25, 26; Deutelonomi 1:15) Nalete, mí ma dona wá tadona lọ kọ̀n dọ matin anademẹ Jiwheyẹwhe tọn, sunnu azọngbannọ enẹlẹ sọgan yí wuntuntun po nukunnumọjẹnumẹ dagbe po do dawhẹ matin nuṣiwa gba. Yé yin mapenọ bo ma sọgan yọ́n nuhe tin to ahun mẹ na sinsẹ̀n-basitọ hatọ yetọn lẹ. Ṣogan, whẹdatọ he dibusi Jiwheyẹwhe lẹ sọgan na ayinamẹ dagbe yisenọ hatọ yetọn lẹ na e sinai do Osẹ́n Jehovah tọn ji wutu.—Deutelonomi 19:15; Psalm 119:97-100.
4. Ayilinlẹn tẹlẹ wẹ whẹdatọ nugbonọ Islaeli tọn lẹ dona dapana, podọ etẹwutu?
4 Ṣigba, nado yin whẹdatọ bẹ onú susu hẹn hugan nukunnumimọjẹ Osẹ́n lọ mẹ. Na yinyin mapenọ wutu, sunnu mẹho lọ lẹ dona tin to aṣeji sọta ayilinlẹn ylankan depope he yé tindo—taidi ṣejannabi, mẹnukuntahopọn, po nukunkẹn po—he sọgan hẹn whẹdida yetọn tindo oblọ. Mose dọna yé dọmọ: ‘Mìwlẹ ma na hò gbẹtọ nukuntapọn to whẹdida mẹ gba; mì na nọ se yọpọ po mẹho po do zẹnzẹn; mì ma na dibuna nukunmẹ omẹ de tọn gba; na Jiwheyẹwhe tọn wẹ whẹdida lọ.’ Mọwẹ, whẹdatọ Islaeli tọn lẹ to whẹda na Jiwheyẹwhe. Lẹblanulọkẹyi he dobu bosọ jiawu nankọtọn die!—Deutelonomi 1:16, 17.
5. To yidogọmẹ na whẹdatọ lẹ dide, tito devo tẹlẹ wẹ Jehovah basi nado penukundo omẹ etọn lẹ go?
5 Jehovah basi tito devo lẹ nado penukundo nuhudo gbigbọmẹ tọn omẹ etọn lẹ tọn go. Whẹpo yé tlẹ do jẹ Aigba Pagbe tọn ji, e ko degbena yé nado gbá gòhọtúntún lọ, yèdọ nọtẹn sinsẹ̀n-bibasi nugbo tọn. E sọ ze yẹwhenọduta de dai he na nọ plọnmẹ Osẹ́n lọ, basi avọ́sinsan kanlin tọn lẹ, bo nọ mẹ̀ nuyọnwan to afọnnu po whèjai po. Jiwheyẹwhe de nọvisunnu daho Mose tọn, Aalọn, taidi yẹwhenọ daho tintan to Islaeli bosọ de visunnu Aalọn tọn lẹ nado gọalọna otọ́ yetọn to azọngban etọn lẹ mẹ.—Eksọdusi 28:1; Osọha lẹ 3:10; 2 Otannugbo lẹ 13:10, 11.
6, 7. (a) Kanṣiṣa tẹwẹ tin to Levinu heyin yẹwhenọ lẹ po dehe mayin yẹwhenọ lẹ po ṣẹnṣẹn? (b) Etẹwẹ mí sọgan plọn sọn nugbo lọ mẹ dọ Levinu lẹ nọ wàzọn voovo lẹ? (Kọlọsinu lẹ 3:23)
6 Azọngban daho wẹ e yin nado penukundo nuhudo gbigbọmẹ tọn omẹ livi susu lẹ tọn go, podọ yẹwhenọ lẹ ma sù sọmọ. Enẹwutu tito yin bibasi na mẹdevo lẹ sọn whẹndo Levi tọn mẹ nado gọalọna yé. Jehovah dọna Mose dọmọ: “Hiẹ bo nasọ yí Levinu lẹ lọ na hlan Aalọn podọ hlan visunnu etọn lẹ: petepete wẹ yè yí yé na hlan ẹn sọn ovi Islaeli tọn lẹ lọ mẹ.”—Osọha lẹ 3:9, 39.
7 Levinu lẹ yin tito-basina ganji. Yé yin mimá sọgbe hẹ whẹndo atọ̀n lọ lẹ—Gẹlṣoninu lẹ, Kohatinu lẹ, po Melalinu lẹ po—dopodopo po azọndenamẹ etọn po. (Osọha lẹ 3:14-17, 23-37) Azọndenamẹ delẹ sọgan ko taidi nuhe yin nujọnu hú devo lẹ, ṣigba popolẹpo wẹ dona yin wiwà. Azọ́n Levinu Kohatinu lẹ tọn biọ to yé si nado nọ sẹpọ aki wiwe alẹnu tọn lọ po aṣọdonu gòhọtúntún tọn lẹ po. Etomọṣo, Levinu lẹpo, vlavo yé yin Kohatinu kavi lala, duvivi lẹblanulọkẹyi he jiawu lẹ tọn. (Osọha lẹ 1:51, 53) E blawu dọ mẹdelẹ ma yọ́n pinpẹn lẹblanulọkẹyi yetọn lẹ tọn. Kakati nado litaina aṣẹpipa Jiwheyẹwhe tọn po nugbonọ-yinyin po, yé lẹzun pekọ-matindonọ bo joawuna goyiyi, ogántẹn dindin, po awuwhàn po. Levinu de he nọ yin Kola yin dopo to yé mẹ.
“Mìwlẹ Bosọ to Yẹwhenọzọ́n Dín Ga?”
8. (a) Mẹnu wẹ Kola yin? (b) Etẹwẹ sọgan ko hẹn Kola nado jẹ yẹwhenọ lẹ pọnhlan ji sọn pọndohlan gbẹtọvi tọn mlẹnmlẹn mẹ de?
8 Kola mayin tatọ́ whédo Levi tọn gba, mọjanwẹ e ma yin tatọ́ whẹndo Kohatinu lẹ tọn do niyẹn. (Osọha lẹ 3:30, 32) Etomọṣo, ahọvi he nọ yin sisina to Islaeli de wẹ e yin. Azọngban Kola tọn sọgan ko hẹn ẹn wá kọndopọ pẹkipẹki mẹ hẹ Aalọn po visunnu etọn lẹ po. (Osọha lẹ 4:18, 19) To mape sunnu ehelẹ tọn mimọ mẹ, Kola sọgan ko dọna ede dọ: ‘Sunnu ehelẹ yin mapenọ mlẹnmlẹn, ṣogan yẹn yin nukundo nado litaina yé! Gbètẹgbè die wayi Aalọn basi oyìnvu sikanọ de. Sinsẹ̀n-bibasi hlan oyìnvu enẹ hẹn omẹ mítọn lẹ jai biọ boṣiọ-sinsẹ̀n mẹ. Todin Aalọn, nọvisunnu Mose tọn, to devizọnwa taidi yẹwhenọ daho! Mẹnukuntahopọn nankọ die! Podọ etẹwẹ dogbọn Nadabi po Abihu po, yèdọ visunnu Aalọn tọn lẹ dali? Na nugbo tọn, yé do sisi-matindo daho hia na azọndenamẹ yetọn sọmọ bọ Jehovah dona hù yé!’a (Eksọdusi 32:1-5; Levitiku 10:1, 2) Nudepope he Kola sọgan ko lẹn, e họnwun dọ e jẹ yẹwhenọduta lọ pọnhlan ji sọn pọndohlan gbẹtọvi tọn mẹ. Enẹ dekọtọn do atẹṣiṣi etọn sọta Mose po Aalọn po mẹ, podọ to nukọnmẹ, sọta Jehovah lọsu.—1 Samuẹli 15:23; Jakobu 1:14, 15.
9, 10. Owhẹ̀ tẹwẹ Kola po atẹṣitọ hatọ etọn lẹ po sà dokọna Mose, podọ naegbọn yé dona ko yọnnuin zẹ̀ enẹ go?
9 Na Kola yin omẹ nukundeji de wutu, e ma sinyẹnawu na ẹn nado mọ mẹdevo he tindo jijọ dopolọ hẹ ẹ lẹ. Ewọ, to pọmẹ hẹ Datani po Abilami po, mọ omẹ 250 he kọngbedopọ hẹ linlẹn yetọn—he yemẹpo yin ahọvi agun lọ tọn lẹ. To pọmẹ, yé dọnsẹpọ Mose po Aalọn po bo dọmọ: “Agun lọ lẹpo wẹ wiwe, dopodopo yetọn, podọ OKLUNỌ lọ sọ tin to yé ṣẹnṣẹn: whenẹnu etẹwutu mìwlẹ ze mìde daga do agunpipli OKLUNỌ lọ tọn ta?”—Osọha lẹ 16:1-3.
10 Atẹṣitọ lọ lẹ dona ko yọnnuin zẹ̀ avùnnukundidiọsọ aṣẹpipa Mose tọn go. E ma ko dẹ̀n susu bọ Aalọn po Miliami po wà onú dopolọ. Nulẹnpọn Kola tọn pẹpẹ wẹ yelọsu tlẹ ko yizan! Sọgbe hẹ Osọha lẹ 12:1, 2, yé kanse dọ: ‘OKLUNỌ lọ nugbonugbo ko dọho gbọn Mose ṣokẹdẹ dali wẹ? Be e ma ko dọho gbọn míwlẹ lọsu dali wẹ?’ Jehovah to todoai. E degbena Mose, Aalọn, po Miliami po nado pli to họntonu gòhọ opli lọ tọn na Ewọ nido sọgan do mẹhe e de nado yin nukọntọ hia. Enẹgodo, to hogbe he họnwun hezeheze lẹ mẹ, Jehovah dọmọ: ‘Eyin yẹwhegán de tin to mì ṣẹnṣẹn finẹ, yẹn OKLUNỌ lọ na hẹn dee zun yinyọnẹn hlan ẹn to numimọ de mẹ, yẹn na dọho hẹ ẹ to odlọ de mẹ. Devi ṣie Mose ma yin mọ gba; ewọ wẹ yẹn ze owhé ṣie pete do alọmẹ na.’ Bọdo enẹ go, Jehovah yí pòzọn do hò Miliami na ojlẹ gli de.—Osọha lẹ 12:4-7, 10.
11. Nawẹ Mose penukundo ninọmẹ he gando Kola go gbọn?
11 Kola po godonọnamẹtọ etọn lẹ po dona ko yọ́n nujijọ enẹ ganji. Whẹjijọ depope matin na atẹṣiṣi yetọn gba. Etomọṣo, Mose tẹnpọn nado yihojlẹdohogo hẹ yé po homẹfa po. E dotuhomẹna yé nado yọ́n pinpẹn lẹblanulọkẹyi yetọn lẹ tọn dogọ bo dọmọ: “Onú pẹvi de e lẹzun hlan mì, dọ Jiwheyẹwhe Islaeli tọn lọ ko klan mì sọn agun Islaeli tọn lọ mẹ, nado hẹn mì wá sẹpọ ede dè?” Lala, e ma yin “onú pẹvi de” gba! Levinu lẹ ko tindo azọngban susu. Etẹwẹ yé sọgan sọ jlo dogọ? Hogbe Mose tọn he bọdego lẹ do ayilinlẹn ahun yetọn mẹ tọn hia dọmọ: “Mìwlẹ bosọ to yẹwhenọzọ́n dín ga?”b (Osọha lẹ 12:3; 16:9, 10) Nalete, nawẹ Jehovah yinuwa hlan atẹṣiṣi ehe sọta aṣẹpipa etọn gbọn?
Whẹdatọ Islaeli Tọn Dado Whẹho lọ Mẹ
12. Etẹ ji wẹ haṣinṣan dagbe zọnmii Islaeli tọn hẹ Jiwheyẹwhe sinai do?
12 To whenuena Jehovah na Osẹ́n lọ Islaeli, e dọna yé dọ eyin yé setonu, yé na lẹzun “akọta wiwe de” podọ dọ akọta lọ na penugo nado yin wiwe zọnmii dile e na dẹnsọ bọ yé kẹalọyi tito Jehovah tọn. (Eksọdusi 19:5, 6) Todin, po atẹṣiṣi yetọn he jẹ gbangba klòlò po, ojlẹ sọ na Whẹdatọ po Osẹ́nnọ Islaeli tọn po nado dado whẹho lọ mẹ! Mose dọna Kola dọ: “Hiẹ po ogbẹ́ towe lẹpo po ni tin to OKLUNỌ lọ nukọn, hiẹ, po yé po, po Aalọn po, to osọ̀: mì omẹ dopodopo ni hẹn nuwhẹnwángbán etọn wá OKLUNỌ lọ nukọn, nuwhẹnwángbán fọdekandeao: hiẹ ga, po Aalọn po, mẹdopodopo nuwhẹnwángbán etọn.”—Osọha lẹ 16:16, 17.
13. (a) Naegbọn e do yin nuyiwa sakla tọn na atẹṣitọ lọ lẹ nado na nuyọnwan to Jehovah nukọn? (b) Nawẹ Jehovah yinuwa hẹ atẹṣitọ lọ lẹ gbọn?
13 Sọgbe hẹ Osẹ́n Jiwheyẹwhe tọn, yẹwhenọ lẹ kẹdẹ wẹ sọgan na nuyọnwan. Linlẹn lọ lọsu dọ Levi he mayin yẹwhenọ de ni na nuyọnwan to Jehovah nukọn tlẹ dona ko hẹn atẹṣitọ enẹlẹ jọsi. (Eksọdusi 30:7; Osọha lẹ 4:16) Ṣigba enẹ ma tlẹ dọ nudepope na Kola po godonọnamẹtọ etọn lẹ po gba! To wunkẹngbe e “bẹ agun lọ lẹpo pli do [Mose po Aalọn po] ji jẹ ohọ̀n gòhọ opli tọn lọ tọn kọ̀n.” Kandai lọ dọna mí dọmọ: “OKLUNỌ lọ sọ dọho hlan Mose podọ hlan Aalọn, dọmọ, Mì klan mìde sọn agun he ṣẹnṣẹn, na yẹn nido sú yé do to ojlẹ vude mẹ.” Ṣigba Mose po Aalọn po vẹvẹ do ota gbẹtọgun lọ tọn mẹ nado yin whiwhla. Jehovah se ovẹ yetọn lẹ. Na Kola po godonọnamẹtọ etọn lẹ po, “miyọ́n sọ jẹgbonu sọn OKLUNỌ lọ dè wá, bo fiọ sunnusi fọdekandeao lẹ lọ he yí nuyọnwan lọ na.”—Osọha lẹ 16:19-22, 35.c
14. Naegbọn Jehovah ze afọdide nujikudo tọn sọta agunpipli Islaeli tọn?
14 E blawu dọ Islaelivi he mọ lehe Jehovah yinuwa hẹ atẹṣitọ enẹlẹ do lẹ ma plọnnu sọn e mẹ gba. “To azán awetọ gbè agun ovi Islaeli tọn lẹ tọn lẹpo to hùnhlun do Mose ta podọ do Aalọn ta, dọmọ, Mìwlẹ ko hù omẹ OKLUNỌ lọ tọn lẹ.” Islaelivi lẹ to godonọna seblatọ enẹlẹ! To godo mẹ, homẹfa Jehovah tọn wá vivọnu. Mẹdepope matin he sọgan vẹvẹ do otà yetọn mẹ todin—e ma tlẹ yin Mose kavi Aalọn. Jehovah hò tolivẹtọ lọ lẹ po azọ̀nylankan de po, podọ “yé he kú gbọn azọ̀nylankan lọ dali yin fọtọ́n wiẹnẹ po nuọntọ̀nkanweko po, mahia yé he kú to whẹho Kola tọn dali lẹ dogọ.”—Osọha lẹ 16:41-49.
15. (a) Whẹwhinwhẹ́n tẹlẹ wutu wẹ Islaelivi lẹ dona ko kẹalọyi nukọntọ-yinyin Mose po Aalọn po tọn mawhleawu? (b) Etẹwẹ kandai ehe plọn we gando Jehovah go?
15 Omẹ ehe lẹpo ma dona ko hẹn ogbẹ̀ yetọn bu dandan gba eyin yé ko yí huhlọn nulẹnpọn tọn yetọn zan ganji do whẹho ehelẹ ji. Yé sọgan ko kan kanbiọ ehelẹ se yede dọ: ‘Mẹnu lẹ wẹ ze ogbẹ̀ yetọn do owù mẹ nado sọawuhia to Falo nukọn? Mẹnu lẹ wẹ biọ dọ Islaelivi lẹ ni yin tuntundote? Mẹnu kẹdẹ wẹ yin oylọ-basina yì Osó Holẹbi tọn ji to tundote Islaeli tọn godo nado dọho nukun-sọ-nukun hẹ angẹli Jiwheyẹwhe tọn?’ Na jide tọn, kandai ayidego Mose po Aalọn po tọn do kunnudenu nugbonọ-yinyin yetọn tọn hlan Jehovah po owanyi yetọn na gbẹtọ lọ lẹ po hia. (Eksọdusi 10:28; 19:24; 24:12-15) Jehovah ma tindo homẹhunhun to atẹṣitọ lọ lẹ hùhù mẹ gba. Ṣigba to whenuena e lẹzun nuhe họnwun dọ yé jlo na zindonukọn to atẹṣiṣi yetọn mẹ, e ze afọdide nujikudo tọn. (Ezekiẹli 33:11) Ehe lẹpo tindo zẹẹmẹ nujọnu tọn na mí to egbehe. Etẹwutu?
Asisa lọ Yinyọnẹn to Egbehe
16. (a) Kunnudenu tẹwẹ dona ko dù to Ju owhe kanweko tintan whenu tọn lẹ ji dọ Jesu wẹ afọzedaitọ Jehovah tọn? (b) Naegbọn Jehovah diọ yẹwhenọduta Levinu lẹ tọn, podọ etẹwẹ e do diọ ẹ?
16 To egbehe, “akọta” yọyọ de tin he Jehovah yin Whẹdatọ, Osẹ́nnọ, podọ Ahọlu mayinukundomọ etọn. (Matiu 21:43) “Akọta” enẹ yin didoai to owhe kanweko tintan W.M. To ojlẹ enẹ mẹ, gòhọtúntún azán Mose gbè tọn ko yin didiọ po tẹmpli whanpẹnọ de po to Jelusalẹm, fie Levinu lẹ gbẹsọ pò to sinsẹ̀nzọnwa te. (Luku 1:5, 8, 9) Nalete, to owhe 29 W.M., tẹmpli devo, yèdọ gbigbọmẹ tọn de wá aimẹ, po Jesu Klisti po taidi Yẹwhenọ Daho. (Heblu lẹ 9:9, 11) Kanbiọ lọ sọ fọndote whladopo dogọ gando aṣẹpipa Jiwheyẹwhe tọn go. Mẹnu wẹ Jehovah na yizan nado deanana “akọta” yọyọ ehe? Jesu do ede hia nado yin nugbonọ mlẹnmlẹn hlan Jiwheyẹwhe. E yiwanna gbẹtọ lẹ. E sọ wà azọ́njiawu susu lẹ. Ṣigba, taidi tọgbo yetọn tasinyẹntọ lẹ, suhugan Levinu lẹ tọn ma kẹalọyi Jesu gba. (Matiu 26:63-68; Owalọ lẹ 4:5, 6, 18; 5:17) To godo mẹ, Jehovah diọ yẹwhenọduta Levinu lẹ tọn po dehe gbọnvo mlẹnmlẹn de po—yèdọ yẹwhenọduta gigonọ de. Yẹwhenọduta gigonọ enẹ zindonukọn jẹ azán mítọn gbè.
17. (a) Pipli tẹwẹ nọpọ́ do yin yẹwhenọduta gigonọ lọ to egbehe? (b) Nawẹ Jehovah nọ yí yẹwhenọduta gigonọ lọ zan gbọn?
17 Mẹnu lẹ wẹ yẹwhenọduta gigonọ ehe bẹhẹn to egbehe? Apọsteli Pita na gblọndo kanbiọ enẹ tọn to wekanhlanmẹ gbọdo etọn tintan mẹ. Pita wlanwe hlan hagbẹ yiamisisadode Klisti tọn lẹ dọmọ: ‘Mì wẹ whẹndo he yè dè, mẹhe yin yẹwhenọduta gigonọ, akọta wiwe, gbẹtọ na nudido Jiwheyẹwhe tọn titi: na mì nido jla pipà ewọ he ylọ mì sọn zinvlu mẹ do hinhọ́n ablanọ etọn tọn mẹ.’ (1 Pita 2:9) Sọn hogbe ehelẹ mẹ e họnwun dọ, taidi pipli de, hodotọ yiamisisadode Jesu tọn lẹ wẹ yin ‘yẹwhenọduta gigonọ’ lọ, he Pita sọ ylọ dọ “akọta wiwe.” Yé nọpọ́ do yin asisa he Jehovah nọ yizan nado wleawu nuplọnmẹ po anademẹ gbigbọmẹ tọn po na omẹ etọn lẹ.—Matiu 24:45-47.
18. Kọndopọ tẹwẹ tin to mẹho dide lẹ po yẹwhenọduta gigonọ lọ po ṣẹnṣẹn?
18 Mẹho dide, he nọ sẹ̀n to otẹn azọngban tọn lẹ mẹ to agun omẹ Jehovah tọn lẹ tọn mẹ lẹdo aihọn pé lẹ wẹ nọ ze afọ yẹwhenọduta gigonọ lọ tọn dai. Sunnu ehelẹ jẹ na sisi po godonọnamẹ ahundoponọ mítọn po, vlavo yé yin mẹyiamisisadode kavi lala. Etẹwutu? Na gbọn gbigbọ wiwe etọn gblamẹ, Jehovah ko de sunnu mẹho lọ lẹ do otẹn yetọn lẹ mẹ. (Heblu lẹ 13:7, 17) Nawẹ enẹ sọgan yinmọ gbọn?
19. Aliho tẹmẹ wẹ mẹho lẹ nọ yin dide gbọn gbigbọ wiwe dali te?
19 Sunnu mẹho ehelẹ jẹ nubiọtomẹsi he tin to Ohó Jiwheyẹwhe tọn mẹ lẹ kọ̀n, ehe yin nudetọn gbigbọ Jiwheyẹwhe tọn tọn. (1 Timoti 3:1-7; Titu 1:5-9) Enẹwutu, mí sọgan dọ dọ dide yetọn yin gbọn gbigbọ wiwe dali. (Owalọ lẹ 20:28) Mẹho lẹ dona jẹakọ hẹ Ohó Jiwheyẹwhe tọn ganji. Taidi Whẹdatọ Daho Hugan he dè yé lọ, mẹho lẹ lọsu dona gbẹwanna nudepope he tlẹ na taidi mẹnukuntahopọn to whẹdida mẹ.—Deutelonomi 10:17, 18.
20. Pinpẹn etẹ tọn wẹ hiẹ yọnẹn na mẹho azọ́n sinsinyẹnwatọ lẹ?
20 Kakati nado diọavunnukunsọ aṣẹpipa yetọn, mí nọ yọ́n pinpẹn mẹho azọ́n sinsinyẹnwatọ mítọn lẹ tọn tlala! Kandai sinsẹ̀nzọnwiwa nugbonọ tọn yetọn, he nọ saba hugan owhe ao susu lẹ, nọ whàn mí nado dejido yé go. Yé nọ yí nugbonọ-yinyin do wleawuna bo nọ deanana opli agun tọn lẹ, nọ wazọ́n abọ́ to abọ́ go hẹ mí to yẹwheho “wẹndagbe ahọludu” tọn lọ didọ mẹ, bo nọ na ayinamẹ sinai do Owe-wiwe ji to whenue mí tindo nuhudo etọn. (Matiu 24:14; Heblu lẹ 10:23, 25; 1 Pita 5:2) Yé nọ dla mí pọ́n eyin mí to azọ̀njẹ bo nọ miọnhomẹna mí eyin mí to aluẹmẹ. Yé nọ gbọn nugbonọ-yinyin dali nọgodona dagbenu Ahọluduta tọn lẹ matin ṣejannabi. Gbigbọ Jehovah tọn tin to yé ji; yé tindo nukundagbe etọn.—Galatianu lẹ 5:22, 23.
21. Etẹwẹ mẹho lẹ dona yọnẹn, podọ etẹwutu?
21 Nugbo wẹ dọ mẹho lẹ yin mapenọ. Na dogbó yetọn lẹ yinyọnẹn wutu, yé ma nọ tẹnpọn nado duklunọ do apó heyin “nudido Jiwheyẹwhe tọn” ji gba. Kakatimọ, yé nọ pọ́n yedelẹ hlan taidi ‘azọ́nwahẹmẹtọgbẹ́ na ayajẹ mẹmẹsunnu yetọn lẹ tọn.’ (1 Pita 5:3; 2 Kọlintinu lẹ 1:24) Mẹho whiwhẹnọ, azọ́n sinsinyẹnwatọ lẹ yiwanna Jehovah, yé sọ yọnẹn dọ dile yé tẹnpọn nado hodo apajlẹ etọn pẹkipẹki do, mọwẹ ale he yé na hẹnwa na agun lọ na sù do niyẹn. Po ehe po to ayiha mẹ, yé nọ dovivẹnu to whepoponu nado wleawuna jẹhẹnu jijọ-di-Jiwheyẹwhe tọn lẹ taidi owanyi, awuvẹmẹ, po homẹfa po.
22. Nawẹ dogbapọnna kandai Kola tọn ko hẹn yise towe lodo to titobasinanu yinukundomọ Jehovah tọn mẹ gbọn?
22 Lehe mí gọ́ na ayajẹ do sọ nado tindo Jehovah taidi Gandutọ mayinukundomọ mítọn, Jesu Klisti taidi Yẹwhenọ Daho mítọn, hagbẹ yiamisisadode yẹwhenọduta gigonọ tọn lẹ taidi mẹplọntọ mítọn lẹ, podọ mẹho Klistiani nugbonọ lẹ taidi ayinamẹtọ mítọn lẹ! Dile etlẹ yindọ titobasinanu he gbẹtọvi lẹ to anadena depope ma sọgan yin pipé, homẹ mítọn hùn nado sọgan sẹ̀n Jiwheyẹwhe to pọmẹ hẹ yisenọ hatọ nugbonọ lẹ, he nọ yí ayajẹ do litaina aṣẹpipa Jiwheyẹwhe tọn!
[Nudọnamẹ odò tọn]
a Visunnu awe Aalọn tọn devo lẹ, Eleazali po Itamali po, yin apajlẹ dagbenọ to sinsẹ̀nzọn yetọn mẹ hlan Jehovah.—Levitiku 10:6.
b Seblatọ hatọ Kola tọn lẹ, Datani po Abilami po, yin Leubeninu lẹ. Enẹwutu, e họnwun dọ yewlẹ ma jlo yẹwhenọzọ́n gba. To whẹho yetọn mẹ, yé gblehomẹ do nukọntọ-yinyin Mose tọn go gọna nugbo lọ dọ kakajẹ ojlẹ enẹ mẹ, nukundido yetọn nado jẹ Aigba Pagbe tọn ji ma ko mọ hẹndi yí.—Osọha lẹ 16:12-14.
c To ojlẹ hohowhenu tọn lẹ mẹ, tatọ́ whẹndo dopodopo tọn nọ ze afọ asi po ovi etọn lẹ tọn po dai to Jiwheyẹwhe nukọn, bo tlẹ nọ basi avọ́sinsan lẹ do ota yetọn mẹ. (Gẹnẹsisi 8:20; 46:1; Job 1:5) Ṣigba, to whenuena Osẹ́n lọ yin didoai, Jehovah de hagbẹ sunnu whẹndo Aalọn tọn lẹ taidi yẹwhenọ he gblamẹ avọ́sinsan lẹ dona nọ yin bibasi te. E họnwun dọ atẹṣitọ 250 lọ lẹ ma jlo nado kọngbedopọ hẹ vọjlado ehe to aliho nuyiwa tọn lọ mẹ.
Etẹwẹ Hiẹ Ko Plọn?
• Tito owanyinọ tẹlẹ wẹ Jehovah basi nado penukundo Islaelivi lẹ go?
• Naegbọn atẹṣiṣi Kola tọn sọta Mose po Aalọn po ma tindo whẹjijọ depope?
• Etẹwẹ mí sọgan plọn sọn aliho he mẹ Jehovah yinuwa hẹ atẹṣitọ lọ lẹ te mẹ?
• Nawẹ mí sọgan dohia dọ mí yọ́n pinpẹn tito Jehovah tọn lẹ tọn to egbehe gbọn?
[Yẹdide to weda 9]
Be hiẹ nọ pọ́n azọndenamẹ depope to sinsẹ̀nzọn Jehovah tọn mẹ hlan taidi lẹblanulọkẹyi de ya?
[Yẹdide to weda 10]
“Whenẹnu etẹwutu mìwlẹ ze mìde daga do agunpipli OKLUNỌ lọ tọn ta?”
[Yẹdide to weda 13]
Mẹho dide lẹ nọ ze afọ yẹwhenọduta gigonọ lọ tọn dai