Kanbiọ lẹ sọn Wehiatọ lẹ Dè

Be Abẹli yọnẹn dọ avọ́sinsan kanlin tọn wẹ dona yin bibasi nado mọ nukundagbe Jiwheyẹwhe tọn ya?

Kandai Biblu tọn gando avọ́sinsan Kaini po Abẹli po tọn go whègli taun. To Gẹnẹsisi 4:3-5, mí hia dọmọ: “To nukọnyiyi ojlẹ tọn mẹ e wá jọ, bọ Kaini yí sọn sinsẹ́n aigba tọn mẹ wá na nunina hlan OKLUNỌ. Podọ Abẹli, ewọ ga sọ yí plọnji sọn kanlinpa etọn mẹ podọ sọn ojó tẹnmẹ yetọn lẹ mẹ. OKLUNỌ sọ pọ́n nukundagbe Abẹli po nunina etọn po. Ṣigba hlan Kaini podọ hlan nunina etọn ewọ ma pọ́n nukundagbe.”

Jẹnukọnna nujijọ ehe, Biblu ma donu e go dọ Jehovah ko na nudọnamẹ tangan de gando avọ́sinsan lẹ go kavi gando wunmẹ avọ́sinsan he e na kẹalọyi lẹ tọn go gba. Enẹwutu, e họnwun dọ Kaini po Abẹli po na avọ́nunina yetọn lẹ sinai do nudide yedetiti tọn ji. Yé yin aliglọnna ma nado jẹ owhé Paladisi dowhenu mẹjitọ yetọn lẹ tọn gbè; yé jẹ nugandomẹgo ylando tọn lẹ mọ ji; podọ yé yin hinhẹn jẹla sọn Jiwheyẹwhe dè. To ninọmẹ ylandonọ podọ awubla tọn yetọn mẹ, yé dona ko tindo numọtolanmẹ sinsinyẹn dọ yé dona dín alọgọ Jiwheyẹwhe tọn. Vlavo avọ́nunina de bibasi hlan Jiwheyẹwhe yin nuwiwa sọn ojlo mẹ de he yé wà nado mọ nukundagbe Jiwheyẹwhe tọn.

Dile whẹho lẹ wá yì do, Jiwheyẹwhe kẹalọyi avọ́nunina Abẹli tọn, ṣigba gbẹ́ Kaini tọn dai. Etẹwutu? Be Abẹli na nuhe sọgbe lọ bọ Kaini ma wàmọ wutu wẹ ya? Mí ma sọgan yin nujikudonọ dọ wunmẹ avọ́sinsan lọ tọn ma tindo kọndopọ depope hẹ whẹho lọ lẹ gba, na nuhe yin alọkẹyi po nuhe mayin alọkẹyi po ma ko yin didọna depope yetọn wutu. Ṣigba, e yọnbasi dọ awe lọ lẹ wẹ yin alọkẹyi. To Osẹ́n he Jehovah na akọta Islaeli tọn to godo mẹ lẹ mẹ, e mayin kanlin po agbasagonu kanlin tọn lẹ po kẹdẹ wẹ avọ́sinsan heyin alọkẹyi lẹ bẹhẹn gba, ṣigba bẹ gbado sisọ̀, okọ̀ balle tọn lẹ, linfin dagbedagbe, akla hìhì lẹ, po ovẹn po hẹn ga. (Levitiku 6:19-23; 7:11-13; 23:10-13) E họnwun dọ, e mayin wunmẹ avọ́sinsan Kaini po Abẹli po tọn lẹ kẹdẹ wẹ hẹn Jiwheyẹwhe nado kẹalọyi ode bo gbẹ́ awetọ dai gba.—Yijlẹdo Isaia 1:11; Amọsi 5:22 go.

Hugan owhe fọtọ́n donu ẹnẹ to godo mẹ, apọsteli Paulu dọmọ: “Gbọn yise dali Abẹli sanvọ́ dagbedagbe de hlan Jiwheyẹwhe hú Kaini: gbọn ehe dali e mọ kunnude yí dọ dodonọ wẹ ewọ, Jiwheyẹwhe sọ dekunnuna nunina etọn.” (Heblu lẹ 11:4) Enẹwutu, yise wutu wẹ Jiwheyẹwhe yọ́n Abẹli taidi dodonọ. Ṣigba yise to etẹ mẹ? Yise to opagbe Jehovah tọn mẹ dọ ewọ na de Okún, he na ‘só ota odàn lọ tọn’ tọ́n bo hẹn jijọho po pipé he gbẹtọvi ko duvivi etọn to ojlẹ de mẹ wayi po gọwá. Sọn hodidọ lọ mẹ dọ Okún lọ ‘na yin afọgbẹn só na,’ Abẹli sọgan ko lẹnnupọn dọ nuhudo tin na avọ́sinsan he bẹ hùnsọndai hẹn. (Gẹnẹsisi 3:15) Etomọṣo, mí ma sọgan gbẹkọ nugbo lọ go dọ yise didohia Abẹli tọn wẹ hẹn ‘avọ́sinsan etọn yin dagbedagbe hú Kaini tọn.’

Mọdopolọ, Kaini yin gbigbẹdai, e mayin na e sanvọ́ wunmẹ he ma sọgbe wutu wẹ gba, ṣigba na e ma tindo yise wutu, dile nuwiwa etọn lẹ dohia do. Jehovah ko dọna Kaini hezeheze dọmọ: “Eyin hiẹ wà dagbe, yè ma na kẹalọyi we?” (Gẹnẹsisi 4:7) Jiwheyẹwhe ma gbẹ́ Kaini dai na homẹ etọn ma hùn do avọ́nunina etọn go wutu gba. Kakatimọ, Jiwheyẹwhe gbẹ́ Kaini dai na “azọ́n etọn lẹ yin oylan wutu”—he awuwhàn, wangbẹna, podọ mẹhùhù dohiagona to godo mẹ.—1 Johanu 3:12.