Jọja He Yiwanna Nugbo lọ Lẹ

“ETẸ yọpọsunnu na do klọ aliho etọn?” wẹ psalm-kàntọ Heblunu de kanse to Owhe fọtọn susu lẹ die wayi. (Psalm 119:9) Kanbiọ ehe gbẹ́ sọgbe to egbehe na jọja lẹ nọ pehẹ nuhahun susu to aihọn lọ mẹ wutu. Aṣa zanhẹmẹtọgbẹ́ susu tintindo tọn ko hùn jọja susu do nùvo hlan SIDA, nudi odaa mẹhe bẹ azọ̀n ylankan ehe tọn lẹ wẹ tin to owhe 15 po 24 po gblamẹ. Amasin-adínọ sọ nọ hẹn nuhahun susu wá ga, bo nọ hẹn okú ajiji plá jọja delẹ. Húnhiho he gblezọn; sinimọto danuwiwa po fẹnnuwiwa tọn lẹ po, nudohia televiziọn tọn lẹ, po video lẹ po; gọna yẹdide fẹnnuwiwa tọn to Internet ji to nuyiwado jọja lẹ ji to aliho ylankan mẹ. Enẹwutu, kanbiọ he psalm-kàntọ lọ kanse nọ duahunmẹna mẹjitọ po jọja susu po to egbehe.

Psalm-kàntọ dopolọ na gblọndo kanbiọ he e kanse tọn dọmọ: “Gbọn awuhihọ hlan ẹn dali kẹdẹdi ohó towe.” Na jide tọn, Biblu heyin Ohó Jiwheyẹwhe tọn, bẹ anademẹ dagbe hẹn na jọja lẹ, podọ gbọn hihodo e dali, jọja susu to kọdetọn dagbe tindo to gbẹ̀mẹ. (Psalm 119:105) Mì gbọ mí ni gbadopọnna apajlẹ jọja delẹ tọn he yiwanna Jiwheyẹwhe bo dovivẹnu nado to huhlọnnọ yin zọnmii to gbigbọ-liho to aihọn gbẹdudu-dindin po agbasanu lẹ bibẹpli tọn de po mẹ.

Yé Yọ́n Pinpẹn Anademẹ Mẹjitọ Tọn

Jacob Emmanuel yin lizọnyizọnwatọ whenu-gigọ́ tọn de na owhe delẹ whẹpo do jẹ sinsẹ̀nzọnwà ji to wekantẹn alahọ Kunnudetọ Jehovah tọn lẹ tọn mẹ to Mexique. E flin lehe owanyi etọn nado sẹ̀n Jiwheyẹwhe yin awuwlena do po pinpẹn-nutọn-yinyọnẹn po dọmọ: “Dile etlẹ yindọ mẹmẹsunnu gbigbọnọ numimọnọ heyin họntọn ṣie delẹ lọsu tlẹ gọalọna mi tlala, mẹjitọ ṣie lẹ wẹ yinuwado ji e hugan. Yé whàn mi nado yiwanna azọ́n yẹwhehodidọ tọn. Yé hẹn mi dẹẹdẹ gbọ̀n aliho jijlọ lọ ji; yé ma hẹn mi gánnu-gánnu gba.”

David, he ko yí owhe susu zan to lizọnyizọn whenu-gigọ́ tọn mẹ todin, flin lehe e yinuwadeji do dọ mẹjitọ etọn lẹ jẹ devizọnwa ji taidi gbehosọnalitọ titengbe lẹ to whenuena ewọ po nọvisunnu etọn po gbẹ́ pò to ovu. To whenuena otọ́ etọn kú, onọ̀ etọn zindonukọn taidi gbehosọnalitọ titengbe de. E penukundo yé go to yidogọmẹ na yẹwheho wẹndagbe lọ tọn didọ. “Yé ma hẹn mi po huhlọn po gbede nado yin gbehosọnalitọ de,” wẹ David dọ, “ṣigba mí mọ ayajẹ susu sọn gbehosọnalitọ bibasi mẹ taidi whẹndo de sọmọ bọ gbẹdido lọ po lẹdo lọ po whàn mi nado wà nudopolọ.” Gando nujọnu-yinyin anademẹ po ayidonugo mẹjitọ lẹ tọn po go, David dọmọ: “To ozán lẹpo mẹ, onọ̀ ṣie nọ hia otàn lẹ na mí sọn owe Du paradis perdu au paradis reconquis mẹ.a Aliho he mẹ e nọ dọ yé na mí te gọalọna mí nado yiwanna núdùdù gbigbọmẹ tọn dùdù.”

Pinpẹn-Nutọn-Yinyọnẹn na Opli Lẹ

E nọ vẹawu na jọja delẹ nado yọ́n pinpẹn opli Klistiani tọn lẹ tọn. Yé nọ yì na mẹjitọ yetọn lẹ nọ plan yé yì wutu. Ṣigba, eyin yé zindonukọn nado nọ yì opli lẹ, to nukọnmẹ yé sọgan wá yiwanna opli lẹ. Lẹnnupọndo Alfredo ji, he bẹ sinsẹ̀nzọn whenu-gigọ́ tọn jẹeji to whenuena e tindo owhe 11. E yigbe dọ to whenuena emi tindo nudi owhe atọ́n, emi nọ tẹnpọn nado gọ̀n opli lẹ na yé nọ hẹn ẹn samlọngọ bọ mẹjitọ etọn lẹ ma nọ na ẹn dotẹnmẹ nado damlọn to opli lẹ whenu wutu. E flin dọmọ: “Dile yẹn jẹ whinwhẹ́n ji, vudevude yẹn wá tindo ojlo dogọ to opli lẹ mẹ, titengbe to whenuena yẹn yọnwehia bo yọnwekan godo na to whenẹnu yẹn jẹ gblọndo lẹ na to hogbe ṣie titi lẹ mẹ ji.”

Cintia, viyọnnu owhe-17-mẹvi he to gbehosọnalitọ whepoponu tọn basi de, dọ lehe gbẹdido dagbe gọalọna ẹn nado yiwanna sinsẹ̀nzọn Jiwheyẹwhe tọn do. E dọmọ: “Haṣinṣan dagbe tintindo hẹ mẹmẹsunnu lẹ po opli lẹ yìyì to gbesisọmẹ po ko gọalọna mi ma nado jẹdò họntọn aihọnmẹnu ṣie lẹ tọn po nuwiwa he gbayipe to jọja lẹ ṣẹnṣẹn po, taidi wedutẹn zánmẹ tọn lẹ yìyì. Todidoai na gblọndo po numimọ lẹ po to opli lẹ ji fọ́n ojlo ṣie dote nado na nuhe yẹn tindo lẹpo Jehovah, podọ yẹn mọdọ nutindo ṣie he yọnhugan wẹ jọja-whenu ṣie. Enẹwutu yẹn basi dide nado yí i zan to sinsẹ̀nzọn etọn mẹ.”

Etomọṣo, e yigbe dọ: “Jẹnukọnna baptẹm ṣie, ojlẹ de tin bọ yẹn mọ ẹn yin nuhe bọawu nado nọ gọ̀n opli lẹ gbọn azọndenamẹ wehọmẹ tọn po nuwiwa devo lẹ po yiyizan taidi whẹjijọ dali. Yẹn gọ̀n opli susu, podọ ehe jẹ nuyiwado gbigbọnọ-yinyin ṣie ji. Yẹn jẹ gbẹdo hẹ dẹpẹ he ma nọ plọn Biblu de ji. Po alọgọ Jehovah tọn po, yẹn yawu jla ninọmẹ onú lẹ tọn do.”

Nudide Mẹdetiti Tọn De

To whenuena Pablo, jọja devo he tin to sinsẹ̀nzọn whenu-gigọ́ tọn mẹ, yin hokanse gando nuhe e lẹn nado yin họ̀nhungàn lọ na awuwiwlena owanyi na nugbo Ohó Jiwheyẹwhe tọn go, e dọmọ: “Yẹn lẹndọ onú awe wẹ: oplọn mẹdetiti gbesisọ tọn po zohunhun na azọ́n yẹwhehodidọ tọn po. Yẹn dopẹ́ na mẹjitọ ṣie lẹ dọ yé ko plọn mi nugbo lọ gando Jehovah go, podọ yẹn lẹndọ nuhe yọnhugan he yé sọgan ko na mi lọ die. Ṣigba, yẹn lọsu dona tindo nujikudo gando nuhewutu yẹn yiwanna Jehovah go. Na enẹ, dandannu wẹ e yin nado yọ́n ‘gbigblo po tedidi’ nugbo Biblu tọn po. Aliho ehe kẹdẹ mẹ wẹ mí nọ wá tindo ojlo zogbe na Ohó Jehovah tọn te, he nọ wleawuna ‘miyọ́n jiji’ to mí mẹ nado dọ ẹ na mẹdevo lẹ. Zohunhun enẹ na azọ́n yẹwhehodidọ tọn na hẹn pinpẹn-nutọn-yinyọnẹn mítọn na nugbo lọ jideji.”—Efesunu lẹ 3:18; Jẹlemia 20:9.

Jacob Emmanuel, heyin nùdego wayi, sọ flin lehe e yin nujọnu sọ nado basi nudide mẹdetiti tọn nado sẹ̀n Jehovah. E dọ dọ mẹjitọ emitọn lẹ ma hẹn emi po huhlọn po nado yí baptẹm gba. “Yẹn lẹndọ enẹ wẹ yọnhugan na yẹn mọ kọdetọn dagbe he e hẹnwa lẹ wutu. Di apajlẹ, jọja delẹ he yẹn nọ dogbẹ́ hẹ taun basi dide nado yí baptẹm to pọmẹ. Nugbo wẹ dọ enẹ yọ́n ganji, ṣigba yẹn sọgan mọdọ delẹ to yé mẹ wà ẹ to dodonu numọtolanmẹ tọn ji poun, podọ to ojlẹ gli de godo, zohunhun yetọn na nuwiwa Ahọluduta tọn lẹ depò. To whẹho ṣie mẹ, mẹjitọ ṣie lẹ ma gbidikọna mi nado basi nudide lọ nado klan dee do wiwe na Jehovah gba. Nudide mẹdetiti tọn wẹ e yin.”

Azọngban Agun Tọn

Jọja delẹ ko plọn nugbo Ohó Jiwheyẹwhe tọn na yedelẹ, matin alọgọ mẹjitọ yetọn lẹ tọn. Na jide tọn, e ma nọ bọawu paali to ninọmẹ mọnkọtọn lẹ glọ nado plọn nado wà nuhe sọgbe bosọ tẹdego.

Noé flin lehe nugbo lọ hẹn ale susu wá na ẹn do. E nọ yawu gblehomẹ bo nọ wà danú sọn ovu etọn whenu gbọ́n. To whenuena e jẹ Biblu plọn ji to owhe 14 mẹvi mẹ, jijọ etọn jẹ didiọ ji, bọ ehe hẹn homẹhun mẹjitọ etọn, he ma tindo ojlo to Biblu mẹ to ojlẹ lọ mẹ lẹ taun. Dile Noé yinukọn to gbigbọ-liho, e jlo na yí gbẹzan etọn zan to gigọ́mẹ dogọ to sinsẹ̀nzọn Jehovah tọn mẹ. Todin, e tin to lizọnyizọn whenu-gigọ́ tọn mẹ.

Mọdopolọ, Alejandro jẹ ojlo tindo to nugbo Biblu tọn mẹ ji to ovu whenu, dile etlẹ yindọ mẹjitọ etọn lẹ ma tindo ojlo to e mẹ. To pinpẹn-nutọn-yinyọnẹn etọn na nugbo lọ didohia mẹ, e dọmọ: “Yẹn yin jiji do whédo Katoliki akonka de tọn mẹ. Ṣigba yẹn wá hẹn yise bu to tintin Jiwheyẹwhe tọn mẹ na ṣọṣi lọ ma na gblọndo na kanbiọ he to tuklado mi sọn vuwhenu ṣie lẹ gbọ́n wutu. Titobasinanu Jehovah tọn ko gọalọna mi nado tindo oyọnẹn Jiwheyẹwhe tọn. E whlẹn ogbẹ̀ ṣie gán na eyin yẹn ma ko plọn Biblu wẹ, e yọnbasi dọ yẹn ni ko tlọ́ dee do fẹnnuwiwa, azọ̀n walọ ahànnu zẹjlẹgo tọn, kavi amasin adínọ mẹ. Yẹn tlẹ sọgan ko lẹzun apadewhe pipli gufọntọ delẹ tọn, po kọdetọn he blawu lẹ po.”

Nawẹ jọja de sọgan sinyẹnlin to nugbo lọ dindin mẹ bo tẹdego matin godonọnamẹ mẹjitọ etọn lẹ tọn gbọn? E họnwun dọ mẹho lẹ po mẹdevo lẹ po to agun mẹ nọ yí azọngban titengbe de wà. Noé flin dọ: “Yẹn ma ko tindo numọtolanmẹ ṣokẹdẹninọ tọn gbede, na Jehovah tin to apá ṣie to whepoponu wutu. Humọ, yẹn ko duvivi godonọnamẹ mẹmẹsunnu po mẹmẹyọnnu owanyinọ susu po tọn he ko lẹzun otọ́, onọ̀, po nọvisunnu gbigbọmẹ tọn ṣie lẹ po.” Todin, e to devizọnwa to Bẹtẹli bo to whenu etọn yizan to sinsẹ̀nzọn Jehovah tọn mẹ. Mọdopolọ, Alejandro dọmọ: “Nuhe yẹn na nọ dopẹ́ na to whepoponu wẹ yindọ yẹn yin didona nado tin to agun dopolọ mẹ hẹ pipli mẹho lẹ tọn de he nọ do ojlo owanyinọ hia to yẹn mẹ. Yẹn dopẹ́ tlala na to whenuena yẹn jẹ Biblu plọn ji to owhe 16 mẹvi mẹ, bẹwlu ayiha mẹ tọn he gbayipe to jọja lẹ ṣẹnṣẹn yinuwado yẹnlọsu ji ga. Whẹndo he tin to agun lọ mẹ lẹ ma jo mi do gbede. Mẹde nọ tin he na yí mi po homẹdagbe po to whepoponu bo má owhé, núdùdù po ahun etọn lọsu po hẹ mi.” Alejandro ko tin to sinsẹ̀nzọn whenu-gigọ́ tọn mẹ na nuhe hugan owhe 13 todin.

Mẹdelẹ nọ lẹndọ mẹhomẹ lẹ kẹdẹ wẹ sinsẹ̀n tin na. Ṣigba, jọja susu ko plọn nugbo Biblu tọn to vuwhenu bo ko wá yiwanna Jehovah bosọ gbọṣi nugbonọ-yinyin mẹ hlan ẹn. Hogbe Davidi tọn lẹ heyin kinkàndai to Psalm 110:3 sọgan yin yiyizan na jọja ehelẹ dọmọ: “Gbẹtọ towe lẹ na yin ojlonọ to azán huhlọn towe tọn gbè; to whanpẹ walọwiwe tọn mẹ, sọn adọ̀ afọnnu fuu tọn mẹ; hiẹ tindo ahun ovu whenu towe tọn.”

Avùnnukundiọsọmẹnu wẹ e nọ yin na jọja lẹ nado plọn nugbo lọ bo tẹdego. Ayajẹ nankọtọn die nado mọ dọ susu yetọn gbọṣi kọndopọ pẹkipẹki mẹ hẹ titobasinanu Jehovah tọn, to opli lẹ yì to gbesisọmẹ, bosọ to Biblu plọn vẹkuvẹku. To mọwiwà mẹ, yé ko penugo nado wleawuna owanyi nujọnu tọn na Ohó Jiwheyẹwhe tọn po sinsẹ̀nzọn etọn po!—Psalm 119:15, 16.

[Nudọnamẹ odò tọn]