Sinsẹ̀n—Nudide Ṣie Kavi Mẹjitọ Ṣie lẹ Tọn?

MẸSUSU wẹ nọ dọna Kunnudetọ Jehovah tọn lẹ to Pologne dọ, “Sinsẹ̀n ehe mẹ wẹ yè jì mi do, podọ e mẹ wẹ n’nasọ kú do.” To pọndohlan yetọn mẹ, enẹ zẹẹmẹdo dọ sinsẹ̀n he mẹjitọ lẹ basi wẹ ovi lẹ lọsu nọ basi, sọn whẹndo de mẹ jẹ devo mẹ. Be nudopolọ nọ jọ to lẹdo towe mẹ ya? Etẹwẹ nọ saba yin kọdetọn pọndohlan enẹ tọn? Sinsẹ̀n nọ lẹzun nuwiwa mọmọ tọn po aṣa whẹndo tọn de po poun. Be nudopolọ sọgan jọ do Kunnudetọ Jehovah tọn he plọn nugbo lọ sọn mẹjitọ kavi mẹjitọ daho yetọn dè lẹ go ya?

Enẹ ma jọ do Timoti go gba, mẹhe onọ̀ po onọ̀-daho etọn he yin Klistiani zohunhunnọ lẹ po, deanana nado tindo yise to Jiwheyẹwhe nugbo lọ mẹ bo yiwanna ẹn. “Sọn ovu gbọ́n” wẹ Timoti ko yọ́n Owe-wiwe. Dile ojlẹ to yìyì, Timoti po onọ̀ etọn po gọna onọ̀-daho etọn wá kudeji mlẹnmlẹn dọ sinsẹ̀n Klistiani tọn wẹ sinsẹ̀n nugbo lọ. E yin ‘linlẹndiọna’ nado yí nuhe e sè sọn Owe-wiwe mẹ gando Jesu Klisti go lẹ sè. (2 Tim. 1:5; 3:14, 15) Enẹwutu, mahopọnna dọ mẹjitọ Klistiani lẹ nọ wà nuhe go yé pé lẹpo nado gọalọna ovi yetọn lẹ nado lẹzun devizọnwatọ Jehovah tọn, ovi lẹ lọsu dona wleawuna ojlo lọ nado wàmọ.—Malku 8:34.

Dopodopo mítọn wẹ dona mọ kunnudenu he dutomẹji lẹ bo yin linlẹndiọna nado yise, eyin mí na sẹ̀n Jehovah sọn owanyi mẹ bo hẹn tenọgligo mahopọnna nudepope he sọgan jọ. Enẹ na zọ́n bọ yise mítọn na lodo gbanun-gbanun.—Efe. 3:17; Kọl. 2:6, 7.

Azọngban Ovi lẹ Tọn

Albert,a he yin pinplọn to whẹndo Kunnudetọ tọn mẹ, dọ dọ: “N’yọnẹn dọ Kunnudetọ Jehovah tọn lẹ wẹ sinsẹ̀n nugbo lọ, ṣigba e nọ vẹawuna mi nado kẹalọyi nuhe dọ yé te gando lehe n’dona zan gbẹzan ṣie do go.” Eyin jọja de wẹ hiẹ yin, e yọnbasi dọ hiẹ ni tindo numọtolanmẹ dopolọ. Naegbọn hiẹ ma na dovivẹnu nado yọ́n nuhe gbẹzan he Jiwheyẹwhe jlo dọ mí ni zan bẹhẹn, bo nọ hùnhomẹ to ojlo etọn wiwà mẹ? (Ps. 40:8) “To tintan whenu, n’jẹ dẹ̀ho ji,” wẹ Albert dọ. “Ṣigba, e ma bọawuna mi to bẹjẹeji. N’nọ hẹn dee po huhlọn po nado wàmọ. Ṣigba, e ma dẹn bọ n’wá tindo numọtolanmẹ lọ dọ Jiwheyẹwhe sọgan yí nukun nujọnu tọn do pọ́n mi eyin n’dovivẹnu nado wà nuhe sọgbe. Ehe na mi huhlọn nado basi diọdo he jẹ lẹ.” Gbọn haṣinṣan pẹkipẹki de tintindo hẹ Jehovah dali, hiẹ sọgan wleawuna ojlo lọ nado wà nuhe e biọ to mí si lẹ.—Ps. 25:14; Jak. 4:8.

Lẹnnupọndo aihun he a yiwanna de ji, taidi ajì-lilẹ̀ kavi aihundida lanmẹyiya tọn tangan de. Eyin a ma jẹakọ hẹ nunọwhinnusẹ́n he nọ yin hihodo lẹ kavi ma yọ́n ajì lẹ̀ ganji, enẹ sọgan hẹn apọṣi we. Ṣigba, eyin a plọn nunọwhinnusẹ́n lọ lẹ bo yọ́n aihun lọ dà ganji, be apàpà ma na sọ́ we nado nọ daihun enẹ ya? Nudopolọ wẹ gando nuwiwa Klistiani tọn lẹ go. Enẹwutu, nọ desọn ojlo mẹ nado wleawuna opli Klistiani tọn lẹ. Nọ tindo mahẹ to yé mẹ. Mahopọnna owhe he a tindo, hiẹ sọgan yin asisa tulinamẹ tọn na mẹdevo lẹ gbọn apajlẹ dagbe towe dali!—Heb. 10:24, 25.

Nunọwhinnusẹ́n dopolọ wẹ gando nuhe a yise lẹ mimá hẹ mẹdevo lẹ go. Ehe lọsu dona yin bibasi sọn owanyi mẹ, e mayin huhlọn do hẹnmẹ basi tọn. Kanse dewe dọ: ‘Naegbọn n’dona dọhona mẹdevo lẹ gando Jehovah go? Naegbọn n’dona yiwanna ẹn?’ Hiẹ dona yọ́n Jehovah taidi Otọ́ owanyinọ de. Gbọn Jẹlemia gblamẹ, e dọmọ: “Mìwlẹ na dín mi, bosọ mọ mi, whenuena mìwlẹ na yí ayiha mìtọn lẹpo do to dindin mi.” (Jẹl. 29:13, 14) Etẹwẹ ehe sọgan biọ to asiwe? “N’dona diọ pọndohlan ṣie,” wẹ Jakub dọ. “N’ko nọ yì opli lẹ bo nọ yì kunnudegbe sọn ovu gbọ́n, ṣigba nuwiwa ehelẹ wá lẹzun nuwiwa mọmọ tọn de na mi. Whenue n’wá dọnsẹpọ Jehovah bo wleawuna haṣinṣan pẹkipẹki de hẹ ẹ, whenẹnu wẹ n’ṣẹṣẹ wá hẹn nugbo lọ zun ṣie.”

Gbẹdido dagbe he nọ jlọmẹdote nọ yí adà titengbe de wà, eyin hiẹ na duvivi lizọnyizọn towe tọn. “Ewọ he to zọnlinzin hẹ nuyọnẹntọ na yọnnuin,” wẹ owe Howhinwhẹn tọn dọ. (Howh. 13:20) Enẹwutu, nọ dogbẹ́ hẹ mẹhe nọ doafọna yanwle gbigbọmẹ tọn bo nọ mọ ayajẹ to lizọnyizọn Jehovah tọn mẹ lẹ. Jola he yin jọja yọnnu de dọmọ: “N’wá mọdọ gbẹdido hẹ jọja susu he tindo yanwle gbigbọmẹ tọn lẹ yin asisa tulinamẹ tọn na mi. N’jẹ mahẹ gbesisọ tọn tindo ji to lizọnyizọn lọ mẹ podọ enẹ hẹn ayajẹ daho wá na mi.”

Azọngban Mẹjitọ lẹ Tọn

“Homẹ ṣie hùn taun dọ mẹjitọ ṣie lẹ plọnnu mi dogbọn Jehovah dali,” wẹ Jola dọ. Mọwẹ, mẹjitọ lẹ sọgan tindo nuyiwadomẹji sinsinyẹn do nudide ovi yetọn lẹ tọn ji. Apọsteli Paulu wlan dọmọ: ‘Mì otọ́ emi, mì nọ plọn ovi mìtọn lẹ to hihò po hokọnamẹ Jehovah tọn po mẹ.’ (Efe. 6:4) Ayinamẹ gbọdo ehe dohia hezeheze dọ azọngban mẹjitọ lẹ tọn wẹ nado plọn ovi yetọn lẹ aliho Jehovah tọn lẹ, e ma yin yetọn titi lẹ gba. Kakati nado zín yanwle he kọ̀n mì na ko jlo nado jẹ lẹ do ahun mẹ na ovi mìtọn lẹ, lehe e na yọ́n do sọ eyin mì sọgan gọalọna yé nado yí gbẹninọ sọgbe hẹ lẹndai Jehovah tọn do basi yanwle yetọn!

Hiẹ sọgan dó ohó Jehovah tọn lẹ do ahun mẹ na ovi towe lẹ bo “dọho yetọn whenuena hiẹ sinai to owhé towe gbè, podọ whenuena hiẹ to zọnlinzin to aliho ji, podọ to whenuena hiẹ mlọnai, podọ to whenuena hiẹ fọ́n tite.” (Deut. 6:6, 7) Ewa po Ryszard po, he yin mẹjitọ ovi atọ̀n tọn flin dọmọ, “Whlasusu wẹ mí nọ dọhodo adà voovo lizọnyizọn whenu-gigọ̀ tọn ji.” Etẹwẹ yin kọdetọn lọ? “Whenue visunnu mítọn lẹ gbẹ̀ pò to ovu, yé jlo nado ze yinkọ dai to Wehọmẹ Lizọnyizọn Yẹwhehọluduta tọn, bo lẹzun wẹnlatọ, podọ to enẹgodo basi nudide na yede nado yí baptẹm. To nukọn mẹ, yemẹpo biọ sinsẹ̀nzọn whenu-gigọ́ tọn mẹ.”

Apajlẹ dagbe mẹjitọ lẹ tọn yin nujọnu. Ryszard dọmọ, “Mí magbe ma nado zan gbẹzan awe, nado yinuwa to aliho de mẹ to whégbè podọ to aliho devo mẹ to agun mẹ.” Enẹwutu, kanse dewe dọ: ‘Etẹ go wẹ ovi ṣie lẹ nọ doayi gando go e? Be yé nọ mọdọ n’tindo owanyi nujọnu tọn na Jehovah ya? Be yé nọ doayi owanyi ehe go to odẹ̀ ṣie lẹ mẹ, podọ to oplọn mẹdetiti tọn ṣie mẹ ya? Be yé nọ mọ owanyi ehe to nukun he n’nọ yí do pọ́n sinsẹ̀nzọn kunnudegbe tọn, ayidedai, po agbasanu lẹ po mẹ, podọ to nuhe n’nọ dọ gando hagbẹ agun tọn devo lẹ go mẹ ya?’ (Luku 6:40) Ovi towe lẹ na nọ pọ́n nuhe wà a te egbesọegbesọ bo na doayi nudepope he a nọ dọ bo ma nọ wà lẹ go.

Mẹplọnlọ nọ yí adà titengbe de wà to ovi lẹ pinplọn mẹ. Ṣigba, Ohó gbọdo Jiwheyẹwhe tọn dọna mí nado ‘plọn ovi do aliho he e na gbọn ji.’ (Howh. 22:6) Ewa po Ryszard po dọmọ, “Mí nọ de whenu dovo nado plọn Biblu hẹ ovi lẹ do voovo.” Ṣigba nado dọ hójọhó, mẹjitọ lẹ wẹ na de eyin yé na plọnnu hẹ ovi lẹ do voovo kavi lala. Depope he whẹho lọ yin, e jẹ dọ mì ni nọ na ayidonugo ovi lẹ dopodopo. Ehe nọ biọ alọdidiọ po lẹnpọn dagbe po. Di apajlẹ, kakati nado nọ dọna ovi towe lẹ poun dọ húnhiho delẹ ma sọgbe, naegbọn hiẹ ma na do lehe yé na basi nudide nuyọnẹn tọn lẹ, po lehe nunọwhinnusẹ́n Biblu tọn lẹ gando whẹho lọ go gbọn hia yé?

Ovi towe lẹ sọgan yọ́n nuhe hiẹ to nukundo sọn yé si pẹpẹ, bọ e sọgan taidi dọ yé to nuhe hẹn homẹhun we wà. Ṣigba, hiẹ dona jẹ ahun yetọn mẹ. Flindọ “yinyọnẹn [kavi ayinamẹ] to ayiha gbẹtọ tọn mẹ taidi osin he siso: ṣigba omẹ zinzin wẹ na dọ̀n ẹn jẹgbonu.” (Howh. 20:5) Nọ yí wuntuntun zan nado yọ́n ohia nuhahun depope he sọgan whlá do ahun ovi towe lẹ tọn mẹ tọn bo yinuwa to afọdopolọji. Ma gblewhẹ nudepope tọn do yé blo, kakatimọ dohia yé dọ whẹho lọ dù we ga bo kán kanbiọ he sọgbe lẹ sè. Ṣigba, ni ma zẹjlẹgo blo. Mẹtọnhopọn ahundopo tọn towe na yinuwado yé ji bo hẹn we penugo nado gọalọna yé.

Azọngban Agun Tọn

Taidi dopo to devizọnwatọ Jiwheyẹwhe tọn lẹ mẹ, be hiẹ sọgan gọalọna jọja he to agun mẹ lẹ nado wlebòna ogú gbigbọmẹ tọn he yé mọyi lọ ya? Mahopọnna dọ azọngban mẹjitọ lẹ tọn wẹ nado plọn ovi yetọn lẹ, hagbẹ agun lọ tọn devo lẹ, titengbe mẹho agun tọn lẹ, sọgan nọgodona vivẹnudido yetọn. Nujọnu wẹ e yin nado gọalọna mẹhe tin to whẹndo he klan to sinsẹ̀n-liho mẹ lẹ.

Etẹwẹ mẹho lẹ sọgan wà nado gọalọna jọja lẹ na yé nido yiwanna Jehovah bo tindo numọtolanmẹ lọ dọ yé yọ́n-na-yizan taun to agun mẹ? Mariusz, he to sinsẹ̀n taidi mẹho to agun de mẹ to Pologne dọmọ: “Mẹho agun tọn lẹ dona nọ dọho hẹ jọja lẹ sọn ojlẹ de mẹ jẹ devo mẹ. Ehe ma dona yin to whenuena nuhahun lẹ fọ́n dote kẹdẹ gba, ṣigba to ninọmẹ devo lẹ mẹ ga—to lizọnyizọn lọ mẹ, to opli lẹ godo, kavi to nuwiwa pọmẹ tọn de whenu.” Naegbọn hiẹ ma na kàn nuhe yin numọtolanmẹ jọja lẹ tọn gando agun lọ go sè yé? Hodọdopọ ahundopo tọn mọnkọtọn nọ zọ́n bọ jọja lẹ nọ voawu to agun mẹ bosọ nọ hẹn yé tindo numọtolanmẹ lọ dọ yé yin apadewhe agun lọ tọn.

Eyin mẹho de wẹ hiẹ yin, be a nọ dovivẹnu nado jẹakọ hẹ jọja he to agun mìtọn mẹ lẹ ya? Mahopọnna dọ Albert he yin nùdego wayi to devizọnwa taidi mẹho todin, e ko jugbọn whlepọn susu mẹ to whenue e tin to owhe aflanmẹ tọn lẹ mẹ. E dọ dọ, “To whenue n’to gblagbla owhe 20 ṣie lẹ tọn mẹ, n’nọ tindo nuhudo dlapọn lẹngbọhọtọ tọn.” Mẹho agun tọn lẹ sọgan sọ do ojlo hia to jọja lẹ mẹ eyin yé nọ hodẹ̀ do ota yetọn mẹ na dagbemẹninọ gbigbọmẹ tọn yetọn.—2 Tim. 1:3.

Alenu wẹ e yin na jọja lẹ nado tindo mahẹ to nuwiwa agun tọn lẹ mẹ. Eyin e ma yinmọ, yé sọgan doafọna yanwle aihọn tọn lẹ. Be mì mẹhe ko whẹ́n mẹho lẹ sọgan wazọ́n hẹ yé to lizọnyizọn lọ mẹ bo jihọntọn hẹ yé ya? Nọ yí whenu zan nado deayidai hẹ jọja lẹ, enẹ na zọ́n bọ hiẹ na wleawuna kanṣiṣa jidedomẹgo po họntọnjiji po tọn hẹ yé. Jola flin dọmọ: “Mẹmẹyọnnu gbehosọnalitọ de do ojlo nujọnu tọn hia mi. Gbeegbe yẹn po ewọ po wazọ́n dopọ to lizọnyizọn lọ mẹ wẹ yin whla tintan he n’desọn ojlo mẹ nado tọ́nyi kunnudegbe.”

Nudide He Hiẹ Lọsu Dona Basi

Jọja lẹ emi, mì kanse mìde dọ: ‘Yanwle tẹlẹ wẹ n’tindo? Eyin n’ma ko yí baptẹm, be n’yí enẹ do basi yanwle ṣie ya?’ Owanyi na Jehovah wẹ dona whàn we nado yí baptẹm, e ma dona yin nado hẹn homẹhun whẹndo towe wutu.

Mọwẹ, dike Jehovah ni yin Họntọn towe vivẹ, na nugbo lọ nisọ yin adọkun na we. Jehovah dọ gbọn yẹwhegán Isaia gblamẹ dọmọ: “Adòyanú we blo: na yẹn wẹ Jiwheyẹwhe towe.” Jehovah na tin hẹ we dile e na dẹnsọ bọ hiẹ na to họntọn etọn yin. Na nugbo tọn, e na hẹn we lodo bo “yí adusilọ [etọn] dodo tọn do ze we daga.”—Isa. 41:10.

[Nudọnamẹ odò tọn]

[Yẹdide to weda 4]

Tẹnpọn nado yọ́n nuhe tin to ahun ovi towe tọn mẹ

[Yẹdide to weda 6]

Owanyi na Jehovah wẹ nọ whànmẹ nado yí baptẹm