Kanbiọ lẹ sọn Wehiatọ lẹ Dè

Be dandan wẹ nado depà heyin didó hlan Jiwheyẹwhe lẹ ya?

To Biblu mẹ, pàdido yin opagbe ahundoponọ de hlan Jiwheyẹwhe nado wà nude, sanvọ́ de, jẹ nuwiwa tangan de ji kavi lẹzun nude, kavi nado dapana nuhe ma sọgbe delẹ. Biblu bẹ kandai pàdido he sinai do ninọmẹ ji delẹ tọn hẹn, yèdọ pàdido nado wà nude eyin Jiwheyẹwhe wà nude jẹnukọn whẹ́. Di apajlẹ, Hanna, onọ̀ yẹwhegán Samuẹli tọn “sọ dó opà de, bo dọmọ, OKLUNỌ awhànpa lẹ tọn, eyin hiẹ . . . ma [na] wọn deviyọnnu towe gba, ṣigba bo na yọpọ sunnu de hlan deviyọnnu towe, whenẹnu yẹn na na ẹn hlan OKLUNỌ to azán ogbẹ̀ etọn tọn lẹpo mẹ, dàlunhi de ma na wá ota etọn go.” (1 Samuẹli 1:11) Biblu sọ basi zẹẹmẹ dọ opà lẹ nọ yin didó sọn ojlo mẹ wá. Nawẹ opà heyin didó hlan Jiwheyẹwhe lẹ yin dandan sọ?

“Whenuena hiẹ dopà hlan Jiwheyẹwhe, a nọte dẹn nado depà blo,” wẹ Ahọlu Sọlọmọni Islaeli hohowhenu tọn dọ. E yidogọ dọ: “Sú ehe a dopà etọn. E pọnte dọ a ma dopà hú dọ a ni dopà bo ma de e.” (Yẹwhehodọtọ 5:4, 5) Osẹ́n heyin nina Islaeli gbọn Mose gblamẹ dọmọ: “Whenuena hiẹ na dopà de hlan OKLUNỌ lọ Jiwheyẹwhe towe, hiẹ ma na yin awugboponọ nado sú i gba: na OKLUNỌ lọ Jiwheyẹwhe towe na kàn ẹn biọ sọn dè we dandan; e bo na yin ylando de to hiẹ mẹ.” (Deutelonomi 23:21) E họnwun dọ, whẹho sinsinyẹn de wẹ pàdido hlan Jiwheyẹwhe yin. E dona yin wiwà po mẹwhinwhàn he sọgbe po, bọ mẹhe to opà lọ dó dona mọdọ emi penugo nado de e. Yin e mayin mọ, e pọnte dọ e ni ma dopà lọ. Ṣigba, be dandan wẹ dọ yè ni depà heyin didó lẹpo ya?

Etẹwẹ lo, eyin pàdido de biọ dọ omẹ lọ ni wà nude he e wá yọnẹn to godo mẹ dọ e jẹagọdo ojlo Jiwheyẹwhe tọn? Mí ni dọ dọ pàdido he na hẹn fẹnnuwiwa biọ sinsẹ̀n-bibasi nugbo mẹ to aliho delẹ mẹ wẹ? (Deutelonomi 23:18) E họnwun dọ, opà mọnkọtọn mayin dandan tọn gba. Humọ, to Osẹ́n Mose tọn glọ, opà he yọnnu de dó sọgan yin hùzẹdeji gbọn otọ́ kavi asu etọn dali.—Osọha lẹ 30:3-15.

Lẹnnupọndo whẹho mẹhe ko dopà hlan Jiwheyẹwhe nado gbọṣi tlẹnmẹ ṣigba wá mọdọ emi tin to bẹwlu mẹ todin de tọn ji. Opà etọn ko ze e do otẹn de mẹ fie e mọdọ opà lọ dide sọgan hẹn emi nado gbà nujinọtedo wiwejininọ Jiwheyẹwhe tọn lẹ. Be e gbẹsọ dona dovivẹnu nado de opà etọn wẹ ya? Be e ma na pọnte hugan dọ e ni whlá ede sọn fẹnnuwiwa mẹ gbọn opà etọn jijodo dali, kakati dọ e ni wá to lẹblanu Jiwheyẹwhe tọn dín bosọ wá to vẹvẹna jona to godo mẹ ya? Omẹ lọ lọsu wẹ sọgan basi nudide enẹ. Gbẹtọ devo depope ma sọgan basi nudide lọ na ẹn gba.

Eyin mẹde dopà bo wá mọ to godo mẹ dọ whlẹndo ji wẹ emi basi i te lo? Be e gbẹsọ dona tẹnpọn nado depà lọ wẹ ya? E ma bọawu na Jẹfta nado depà he e dó hlan Jiwheyẹwhe, ṣigba e wàmọ po ahundopo po. (Whẹdatọ 11:30-40) Awugbopo mẹde tọn nado depà de sọgan hẹn Jiwheyẹwhe “gblehomẹ” bo nasọ hẹn nuhe omẹ lọ ko wà dai lẹpo gble. (Yẹwhehodọtọ 5:6) Nukunpẹvi yíyí do pọ́n whẹho opà de dide tọn sọgan dekọtọn do nukundagbe Jiwheyẹwhe tọn hinhẹnbu mẹ.

Jesu Klisti dọmọ: ‘Mì gbọ hogbe mìtọn ni yin, Mọwẹ, mọwẹ; Lala, lala: na onú depope he sọ hú ehelẹ, mẹylankan lọ mẹ wẹ e sọn wá.’ (Matiu 5:37) E mayin opà he Klistiani de dó hlan Jiwheyẹwhe lẹ dide kẹdẹ wẹ dona nọ duahunmẹna ẹn gba, ṣigba tintẹnpọn nado yin nugbonọ to hodidọ etọn lẹpo mẹ—hlan Jiwheyẹwhe po gbẹtọ lẹ po. Etẹwẹ eyin e wá mọ ede to bẹwlu mẹ na e ko basi gbemima he taidi nuhe yọ́n de hẹ mẹdevo to bẹjẹeji ṣigba to nulẹnpọndeji sisosiso godo wá mọdọ nuyiwa nululu tọn wẹ? E ma dona yí nukun pẹvi do pọ́n whẹho mọnkọtọn lẹ gba. Ṣigba na hodọdopọ vẹkuvẹku wutu, omẹ awetọ sọgan de nado de azọngban lọ sọn e ji.—Psalm 15:4; Howhinwhẹn lẹ 6:2, 3.

Gando opà po onú devo lẹpo po go, etẹwẹ dona yin ahunmẹdunamẹnu tangan mítọn? Mì gbọ mí ni nọ dín nado tindo haṣinṣan dagbe hẹ Jehovah Jiwheyẹwhe whepoponu.

[Yẹdide to weda 30]

Hanna ma whleawu nado depà etọn gba

[Yẹdide to weda 31]

Jẹfta depà etọn, dile etlẹ yindọ mọwiwa ma bọawu na ẹn