Nunina Zẹ̀ Nugopipe Mẹtọn Go

“MÌ SỌGAN ylọ mi dọ nubiọtọ; enẹ ma gblehomẹna mi. Jesu wẹ yẹn to nubiọ na.” Hodidọ enẹlẹ he wá sọn sinsẹ̀ngán Plọtẹstant tọn de dè zinnudo nudindọn he lẹdo godoninọna sinsẹ̀n to akuẹzinzan-liho ji. E taidi dọ sinsẹ̀n he hẹnai lẹ ma sọgan luntọ́n adavo yé nọ mọ akuẹjọ he tli yí. Sunmẹ-kuẹ lẹ dona yin súsú, tẹmpli lẹ dona yin gbigbá bo yin nukunpedego, nujijla wẹndagbe tọn lẹ dona yin godonọna to akuẹzinzan-liho. Nawẹ akuẹ he nuhudo tin na lọ na yin mimọ gbọn?

Na ṣọṣi susu, madao nina wẹ yin gblọndo lọ.a “Aliho he mẹ Jiwheyẹwhe na penukundo ahọluduta Etọn go to aigba ji to akuẹzinzan-liho te wẹ madao nina yin,” wẹ yẹwhehodọtọ Norman Robertson dọ. “Tito akuẹzinzan tọn Etọn he nọ hẹn ẹn yọnbasi nado lá Wẹndagbe lọ wẹ e yin.” To nufinflin hodotọ etọn lẹ gando azọngban yetọn nado jọ akuẹ go, e dọ madoadudẹ́ji dọmọ: ‘Madao nina mayin nude he mì nọ wà na mì pé e go wutu gba. Nuwiwa tonusise tọn de wẹ e yin. Gbedide Jiwheyẹwhe tọn lẹ gbigbà tlọlọ wẹ awugbopo nado na madao yin. Akuẹ mẹdevo tọn finfin wẹ e yin.’—Tithing—God’s Financial Plan.

Vlavo hiẹ lọsu yigbe dọ akuẹ jijọ dona yin apadewhe sinsẹ̀n-bibasi Klistiani tọn. Etomọṣo, be a ma nọ mọdọ akuẹ bibiọ gbọzangbọzan yin nuhe ma sọgbe, vlavo bo tlẹ nọ hẹn homẹgblenamẹ ya? Sinsẹ̀n-nuplọnmẹtọ Brésil tọn Inácio Strieder gblewhẹdo ṣọṣi lẹ dọ yé to madao yizan taidi aliho de “nado didẹ nuhahun sinsẹ̀n yetọn tọn lẹ” bosọ ylọ nuyiwa mọnkọtọn lẹ dọ “nuhe ma sọgbe hẹ osẹ́n, mẹhodu, podọ kinklan sọn sinsẹ̀n-nuplọnmẹ go.” Dile e dọ do, kọdetọn lọ wẹ yindọ, “mẹhe ma tindo agbasazọ́n lẹ, asuṣiọsi lẹ, hẹntọnọ lẹ, po mẹhe ma penugo nado lẹnnupọn sisosiso lẹ po wá tadona kọ̀n dọ Jiwheyẹwhe ko gbẹ́ yé dai podọ dọ yé tin to dandannu glọ nado na akuẹ susu ‘yẹwhehodọtọ lẹ’ sọmọ bọ whẹndo yetọn lẹ nọ nọ̀ huvẹ.”

A sọgan kanse dọ: ‘Be ṣọṣi he nọ hẹnmẹ gánnugánnu nado na madao lẹ to Owe-wiwe yizan ganji ya? Kavi be sinsẹ̀n delẹ to obu lọ dọ Jiwheyẹwhe na sayanamẹ yizan nado hò agunvi yetọn lẹ dù wẹ ya? Na nugbo tọn, be Jiwheyẹwhe nọ donukun dọ mí ni na akuẹ zẹ̀ nugopipe mítọn go wẹ ya?’

[Nudọnamẹ odò tọn]