Na Huhlọn Alọ Towe Lẹ

TO BIBLU mẹ, alọ yin nudego whlasusu. Hodidọ yẹdenanu tọn lẹ he gando alọ go nọ yin yiyizan to aliho voovo mẹ. Di apajlẹ, alọ he wé nọ nọtena homẹvọnọ-yinyin. (2 Samuẹli 22:21; Psalm 24:3, 4) Alọ hùnhùn zẹẹmẹdo nunina mẹdevo lẹ po alọtutlu po. (Deutelonomi 15:11; Psalm 145:16) Yè nọ dọ dọ mẹde yí ogbẹ̀ etọn do alọ mẹ to whenuena e ze ogbẹ̀ ede tọn do owù mẹ. (1 Samuẹli 19:5) Nado dike alọ mẹtọn ni yin jijẹ zẹẹmẹdo nado gbọjọ. (2 Otannugbo lẹ 15:7) Podọ nado na huhlọn alọ mẹtọn yin nado hẹn ẹn lodo bo sinyẹn na nuwiwa de.—1 Samuẹli 23:16.

To egbehe onú niyaniya de wẹ e yin dọ mí ni na huhlọn alọ mítọn lẹ. Mí to gbẹnọ to “ojlẹ awusinyẹn tọn lẹ” mẹ. (2 Timoti 3:1) To whenuena mí gbọjọ, e nọ taidi dọ alọ mítọn lẹ jẹ bo ma tindo hlọnhlọn depope. Nuhe gbayipe wẹ e yin nado mọ jọja aflanmẹ he jo wehọmẹ yìyì do lẹ, asu he jo whẹndo yetọn do lẹ, po onọ̀ he gbẹkọ ovi yetọn go lẹ po. Taidi Klistiani lẹ, mí dona na huhlọn alọ mítọn lẹ nado sọgan doakọnna whlepọn he mí to pipehẹ to sinsẹ̀nzọn mítọn hlan Jiwheyẹwhe mẹ lẹ. (Matiu 24:13) To mọwiwà mẹ, mí nọ hẹn homẹ Jehovah tọn hùn.—Howhinwhẹn lẹ 27:11.

Lehe Alọ lẹ Nọ Yin Huhlọnna Do

Ju azán Ẹzla gbè tọn lẹ dona na huhlọn alọ yetọn lẹ nado sọgan dotana tẹmpli Jehovah tọn vivọgbá to Jelusalẹm. Nawẹ alọ yetọn lẹ yin huhlọnna gbọn? Kandai lọ dọmọ: “[Yé] sọ payi hùnwhẹ akla madotọ́n tọn lọ go azán ṣinawe po ayajẹ po: na OKLUNỌ ko basi yé ayajẹnọ, bo ko sọ lẹ́ ayiha ahọlu Assilia tọn tọn hlan yé dè, nado na huhlọn alọ yetọn lẹ to azọ́n ohọ̀ Jiwheyẹwhe tọn tọn lọ mẹ, Jiwheyẹwhe Islaeli tọn lọ.” (Ẹzla 6:22) E họnwun dọ, Jehovah yí gbigbọ wiwe etọn zan nado whàn “ahọlu Assilia tọn” nado dike omẹ Etọn lẹ ni lẹkọ, bosọ dozolanmẹna omẹ lọ lẹ, bọ yé dotana azọ́n he yé ko bẹjẹeji lọ.

To nukọnmẹ, to whenuena adó Jelusalẹm tọn dona yin vivọjlado, Nẹhemia na huhlọn alọ nọvisunnu etọn lẹ tọn na azọ́n lọ. Mí hia dọmọ: “Yẹn sọ dọ alọ Jiwheyẹwhe ṣie tọn he yin dagbe to ojí na yé; podọ sọn ohó ahọlu tọn lẹ mẹ ga he e ko dọ hlan mi. Yé sọ dọmọ, Mì gbọ mí ni fọntite bo to didó. Mọwẹ yé na huhlọn alọ yetọn lẹ na azọ́n dagbe lọ.” Po alọ heyin huhlọnna lẹ po, Nẹhemia po Juvi hatọ etọn lẹ po penugo nado vọ́ adó Jelusalẹm tọn gbá to azán ayidego 52 gblamẹ!—Nẹhemia 2:18; 6:9, 15.

Mọdopolọ, Jehovah nọ na huhlọn alọ mítọn lẹ nado dọyẹwheho wẹndagbe Ahọluduta lọ tọn. (Matiu 24:14) E nọ wàmọ gbọn ‘onú dagbe lẹpo nina mí nado wà ojlo etọn’ dali. (Heblu lẹ 13:21) E ko yí azọ́nwanu dagbe hugan lẹ do alọ mítọn mẹ. Mí tindo Biblu po owe sinai do Biblu ji lẹ po, linlinnamẹwe, alọnuwe, kasẹti yidokanji lẹ po video lẹ po he mí na yizan nado jẹ gbẹtọ lẹ dè lẹdo aihọn pé. Na nugbo tọn, owe mítọn lẹ tin-to-aimẹ to ogbè hugan 380 mẹ. To yidogọ mẹ, gbọn opli agun tọn lẹ po plidopọ lẹ po gblamẹ, Jehovah nọ wleawuna nuplọnmẹ po azọ́nplọnmẹ yẹwhehọluduta tọn po do lehe mí na yí azọ́nwanu dagbe ehe zan do to lizọnyizọn mítọn wiwadotana mẹ.

Dile etlẹ yindọ Jehovah nọ na huhlọn alọ mítọn lẹ to aliho susu mẹ, e sọ nọ donukun dọ mí ni vánkan. Flin nuhe yẹwhegán Eliṣa dọna Ahọlu Joaṣi, he wá dín alọgọ to Eliṣa dè nado hoavùn sọta awhànpa Silia tọn lẹ. Eliṣa dọna ahọlu lọ nado yí ogába delẹ bo yí yé do hò aigba. Kandai Biblu tọn lọ dọmọ: “Ewọ sọ hò whla atọ̀n, bo doalọte. Omẹ Jiwheyẹwhe tọn lọ sọ yin homẹgblenọ do e go, bo dọmọ, Hiẹ do ko hò whla atọ́n kavi ṣidopo; whenẹnu hiẹ [na] hò Silianu lẹ kaka hiẹ ko do sú i do: fietọn dinvie hiẹ na hò Silia whla atọ̀n kẹdẹ.” (2 Ahọlu lẹ 13:18, 19) Na Joaṣi gboawupo nado yí zohunhun do vánkan wutu, e ma tindo kọdetọn dagbe susu to avùnhiho sọta Silianu lẹ mẹ.

Nunọwhinnusẹ́n dopolọ gando mí go eyin mí jlo na basi wadotana azọ́n he Jehovah ko de na mí tọn. Kakati nado to nuhà do aliglọnnamẹnu he tin to aliho mítọn ji lẹ kavi do lehe azọ́ndenamẹ lọ sọgan sinyẹn sọ ji, mí dona yí zohunhun do wà ẹ po ahun lẹpo po. Mí dona na huhlọn alọ mítọn lẹ bo ganjẹ Jehovah go na alọgọ.—Isaia 35:3, 4.

Jehovah Na Na Huhlọn Alọ Mítọn Lẹ

Jehovah na gọalọna mí bo na na huhlọn alọ mítọn lẹ nado wà ojlo etọn. Ṣigba, Jiwheyẹwhe ma na wà azọ́njiawu bo wà onú lẹpo na mí gba. E nọ donukun dọ mí ni wà adà mítọn—Biblu hihia to gbesisọmẹ, awuwiwlena po opli lẹ yìyì to gbesisọmẹ po, mahẹ gbesisọ tọn tintindo to lizọnyizọn lọ mẹ dile e yọnbasi do, podọ dẹ̀hiho hlan ẹn to whepoponu. Eyin mí yí nugbonọ-yinyin po vivẹnu po do wà adà mítọn to whenuena dotẹnmẹ lọ hundote na mí, Jehovah na na mí huhlọn nado wà nuhe e biọ to mí si lẹ.—Filippinu lẹ 4:13.

Lẹnnupọndo whẹho Klistiani de tọn ji he hẹn asi po onọ̀ etọn po bú to okú mẹ to owhe dopolọ mẹ. E pò to awufiẹsa mẹ to whenuena asi visunnu etọn tọn gbẹ́ asu bosọ jo aliho gbẹzan Klistiani tọn do. “Yẹn plọn dọ mí ma sọgan de whlepọn he mí jlo lẹ, kavi whenue yé na jọ kavi lehe yé na sù sọ gba,” wẹ mẹmẹsunnu ehe dọ. Nawẹ e mọ huhlọn lọ nado zindonukọn gbọn? “Odẹ̀ po oplọn mẹdetiti tọn po wẹ hẹn mi dote. Podọ godonọnamẹ mẹmẹsunnu po mẹmẹyọnnu gbigbọmẹ tọn ṣie lẹ po tọn ko miọnhomẹna mi tlala. Hú popolẹpo, yẹn ko wá mọ lehe e yin nujọnu do sọ nado wleawuna haṣinṣan dagbe hẹ Jehovah whẹpo ninọmẹ sinsinyẹn lẹ ni fọ́n.”

Nudepope he hiẹ to pipehẹ to gbẹzan towe mẹ, magbe nado ze jidide gigọ́ towe do Jehovah mẹ bosọ yí awuwledainanu etọn lẹpo zan ganji nado na huhlọn alọ towe lẹ. Gbọnmọ dali, hiẹ na penugo nado wà sinsẹ̀nzọn dagbe hugan hlan Jehovah bo hẹn pipà po gbégbò po wá oyín họakuẹ etọn ji.—Heblu lẹ 13:15.

[Yẹdide to weda 31]

Na Joaṣi gboawupo nado yí zohunhun do vánkan wutu, e ma tindo kọdetọn dagbe susu to avùnhiho sọta Silianu lẹ mẹ