Be Hiẹ to Hihodo Klisti to Gigọ́ mẹ Ya?
“[Dile mìwlẹ to wiwà do, mì] zindonukọn nado to ehe wà to gigọ́ mẹ dogọ.”—1 TẸS. 4:1.
1, 2. (a) Onú jiawu tẹlẹ wẹ mẹsusu yí nukun do mọ to azán Jesu tọn gbè? (b) Naegbọn ojlẹ he mẹ mí to gbẹnọ te lọsu do yin ayidego tọn?
BE HIẸ ko yí nukun homẹ tọn do pọ́n lehe e na ko yin awuvivinu do sọ nado nọgbẹ̀ to whenuena Jesu tin to aigba ji pọ́n ya? E sọgan ko jlo we nado yin azọ̀nhẹngbọna gbọn Jesu dali nado sọgan mọ pọngbọ sọn awufiẹsa agbasalan tọn delẹ si. Kavi hiẹ sọgan lẹnnupọndo ayajẹ he a na ko tindo ji nado mọ Jesu bo sè ohó etọn—nado penugo bo plọnnu sọn e dè kavi nado mọ ẹn dile e to azọ́njiawu delẹ wà. (Malku 4:1, 2; Luku 5:3-9; 9:11) Lehe e na ko yin lẹblanulọkẹyi daho de nado tin to finẹ to whenue Jesu to azọ́n enẹ lẹpo wà do sọ! (Luku 19:37) Whẹndo gbẹtọvi tọn depope ma ko yí nukun do mọ onú mọnkọtọn lẹ sọn ojlẹ enẹ mẹ gbọ́n, podọ nuhe Jesu wadotana to aigba ji “gbọn ede yíyí do sanvọ́ gblamẹ” ma na yin vivọbasi gbede.—Heb. 9:26; Joh. 14:19.
2 Ṣigba ojlẹ he mẹ mí to gbẹnọ te lọsu yin ayidego tọn ga. Naegbọn mí do dọ mọ? Todin, mí to gbẹnọ to ojlẹ de mẹ he Biblu dọ dọdai etọn taidi “ojlẹ opodo lọ tọn” podọ “azán godo tọn lẹ.” (Dan. 12:1-4, 9; 2 Tim. 3:1) To ojlẹ ehe mẹ, Satani yin yinyan sọn olọn mẹ. To madẹnmẹ, ewọ na yin biblá bo yin zizedlan “odò mapote lọ mẹ.” (Osọ. 12:7-9, 12; 20:1-3) To ojlẹ ehe dopolọ mẹ, mí tindo lẹblanulọkẹyi vonọtaun lọ nado to “wẹndagbe ahọluduta lọ tọn” lá lẹdo aihọn pé, bosọ to hodọna gbẹtọ lẹ gando todido Paladisi he ja lọ tọn go—yèdọ azọ́n de he ma na yin vivọ wà pọ́n gbede.—Mat. 24:14.
3. Ojlẹ kleun de whẹpo Jesu do lẹkọyi olọn mẹ, etẹwẹ e dọna hodotọ etọn lẹ nado wà podọ etẹwẹ ehe bẹhẹn?
3 Ojlẹ kleun de whẹpo Jesu do lẹkọyi olọn mẹ, e dọna hodotọ etọn lẹ dọmọ: “Mìwlẹ na yin kunnudetọ ṣie to Jelusalẹm podọ to Jude po Samalia lẹpo po, podọ kaka yì awà he dẹn hugan aigba tọn lẹ ji.” (Owalọ 1:8) Azọ́n enẹ na bẹ mẹpinplọn lẹdo aihọn pé tọn de hẹn. Po yanwle tẹ po? Nado hẹn gbẹtọ lẹ zun devi—yèdọ nado hẹn hodotọ Klisti tọn lẹ sudeji—whẹpo opodo lọ nido wá. (Mat. 28:19, 20) Etẹwẹ mí dona wà eyin mí na tindo kọdetọn dagbe to azọ́n he Klisti dena mí lọ hinhẹndi mẹ?
4. (a) Etẹ ji wẹ hogbe mẹhẹnlẹnnupọn tọn Pita tọn lẹ to 2 Pita 3:11, 12 mẹ zinnudo? (b) Etẹwẹ mí dona tin to aṣeji na?
4 Doayi hogbe mẹhẹnlẹnnupọn tọn apọsteli Pita tọn ehelẹ go dọmọ: “Omẹ nankọ wẹ e jẹ dọ mìwlẹ ni yin to walọ wiwe lẹ po nuyiwa mẹdezejo na Jiwheyẹwhe tọn lẹ po mẹ, dile mì to tenọpọn bo to hinhẹn tintin tofi azán Jehovah tọn do ayiha mẹ gligli!” (2 Pita 3:11, 12) Ohó Pita tọn lẹ zinnudo nuhudo lọ ji nado gbọṣi nukle to azán godo tọn ehelẹ mẹ bo hẹn ẹn diun dọ nuyiwa mẹdezejo na Jiwheyẹwhe tọn lẹ tin to otẹn tintan mẹ to gbẹzan mítọn mẹ. Nuyiwa mọnkọtọn lẹ bẹ wẹndagbe lọ lilá hẹn. Enẹwutu, lehe e nọ yin ayajẹnu na mí nado mọ zohunhun he mẹmẹsunnu mítọn lẹ lẹdo aihọn pé to didohia to azọ́n yẹwhehodidọ tọn he Klisti dena mí lọ hinhẹndi mẹ do sọ! To ojlẹ dopolọ mẹ, mí yọnẹn dọ mí dona tin to aṣeji na kọgbidinamẹnu aihọn Satani tọn lẹ po ojlo agbasalan tọn he mí dugu etọn lẹ po nikaa dekanpona zohunhun mítọn to sinsẹ̀nzọn Jiwheyẹwhe tọn mẹ. Enẹwutu, mì gbọ mí ni gbadopọnna lehe mí sọgan hẹn ẹn diun dọ mí zindonukọn to Klisti hihodo mẹ do.
Kẹalọyi Azọngban He Jiwheyẹwhe Zedo Alọmẹ Na We lẹ po Zohunhun Po
5, 6. (a) Etẹwẹ Paulu pà yisenọ hatọ etọn he tin to Jelusalẹm lẹ na, podọ etẹ ji wẹ e na yé avase do? (b) Naegbọn mí ma dona yí nukun pẹvi do pọ́n azọngban he Jiwheyẹwhe zedo alọmẹ na mí lẹ?
5 To wekanhlanmẹ he apọsteli Paulu dohlan Klistiani he tin to Jelusalẹm lẹ mẹ, e pà yisenọ hatọ etọn lẹ na akọndonanu he yé gbọn nugbonọ-yinyin dali dohia wayi to homẹkẹn glọ. E dọmọ: “Mì nọ to azán he wayi lẹ flin, yèdọ ojlẹ he mẹ hinhọ́n ko họ́n do mì ji godo, bọ mì doakọnna ahididi daho de to yajiji lẹ glọ.” Mọwẹ, Jehovah ma wọnji nuyiwa nugbonọ-yinyin tọn yetọn go. (Heb. 6:10; 10:32-34) Hogbe zodolanmẹnamẹ tọn he Paulu yizan nado pà Klistiani Heblu lẹ na ko na tuli yé taun. Ṣigba, to wekanhlanmẹ enẹ dopolọ mẹ Paulu na avase gando ayilinlẹn gbẹtọvi tọn de go he eyin yè ma deanana ẹn ganji, e sọgan dekanpona zohunhun mítọn to sinsẹ̀nzọn Jiwheyẹwhe tọn mẹ. E dọ dọ Klistiani lẹ dona tin to aṣeji gando whẹjijọ dindin ma nado hodo gbedide Jiwheyẹwhe tọn lẹ go.—Heb. 12:25.
6 Avase enẹ nado dapana ayilinlẹn lọ nado dín whẹjijọ ma nado kẹalọyi azọngban he Jiwheyẹwhe zedo alọmẹ namẹ lẹ sọ gando Klistiani lẹ go to egbehe ga. Mí yọnẹn dọ mí dona magbe ma nado yí nukun pẹvi do pọ́n azọngban Klistiani tọn mítọn lẹ kavi dike zohunhun mítọn to sinsẹ̀nzọn Jiwheyẹwhe tọn mẹ ni depò. (Heb. 10:39) To popolẹpo mẹ, whẹho okú po ogbẹ̀ po tọn wẹ sinsẹ̀nzọn wiwe bibasi yin.—1 Tim. 4:16.
7, 8. (a) Etẹwẹ na gọalọna mí nado hẹn zohunhun mítọn go to sinsẹ̀nzọn Jiwheyẹwhe tọn mẹ? (b) Eyin zohunhun he mí tindo to bẹjẹeji ko depò, etẹwẹ mí dona flin gando Jehovah po Jesu po go?
7 Etẹwẹ na gọalọna mí ma nado nọ dín whẹjijọ ma nado hẹn azọngban he Jiwheyẹwhe zedo alọmẹ na mí lẹ di? Aliho dagbe dopo he mẹ mí sọgan hoavùn sọta ayilinlẹn enẹ te wẹ nado nọ lẹnayihamẹpọn to gbesisọ mẹ do nuhe opà klandowiwe tọn mítọn zẹẹmẹdo ji. Na taun tọn, mí ko dopà na Jehovah dọ mí na ze ojlo etọn wiwà do otẹn tintan mẹ to gbẹzan mítọn mẹ, podọ mí jlo na hẹn opà enẹ di. (Hia Matiu 16:24.) Enẹwutu, mí dona nọ yì agbọji to whedelẹnu bo kanse míde dọ: ‘Be n’gbẹ́ tindo gbemima dopolọ nado nọgbẹ̀ sọgbe hẹ klandowiwe ṣie na Jehovah dile n’wà do to baptẹm ṣie whenu ya? Kavi be zohunhun he n’tindo to bẹjẹeji ko depò to owhe lẹ gblamẹ wẹ ya?’
8 Eyin mẹdetiti gbigbejepọn ahundopo tọn dohia dọ mí ko dekanpona zohunhun mítọn, e na yọ́n nado flin hogbe zodolanmẹnamẹ tọn yẹwhegán Zẹfania tọn lẹ. E dọmọ: “A dike alọ towe lẹ yin jijẹ blo. OKLUNỌ Jiwheyẹwhe towe tin to gblagbla hiẹ tọn mẹ, hlọnhlọnnọ dopo de mẹhe na whlẹnmẹ: ewọ na yí ayajẹ do jaya to oji we.” (Zẹf. 3:16, 17) Islaelivi hohowhenu tọn he lẹkọ sọn kanlinmọgbenu Babilọni tọn yì Jelusalẹm lẹ wẹ hogbe jidevọnamẹ tọn ehelẹ yin yiyizan na. Etomọṣo, jidenamẹ ehe gbẹ́ yọ́n-na-yizan na omẹ Jiwheyẹwhe tọn lẹ to egbehe ga. Whenuena e yindọ azọ́n Jehovah tọn wà wẹ mí te, mí ma dona wọnji dọ Jehovah po Ovi etọn po nọ nọgodona mí bosọ nọ na huhlọn mí nado hẹn azọ́n he Jiwheyẹwhe zedo alọmẹ na mí lẹ di to gigọ́ mẹ. (Mat. 28:20; Flp. 4:13) Eyin mí dovivẹnu nado to azọ́n Jiwheyẹwhe tọn wà po zohunhun po zọnmii, ewọ na dona mí bo gọalọna mí nado to nukọnyi to gbigbọ-liho.
Yí Zohunhun do ‘to Ahọluduta lọ Dín Whẹ́’
9, 10. Etẹ ji wẹ Jesu to nùzindo to apajlẹ núdùdù whèjai tọn daho lọ tọn mẹ, podọ etẹwẹ mí sọgan plọn sọn e mẹ?
9 To whenuena Jesu to núdù to owhé ogán Falesi lẹ tọn de tọn gbè, e na apajlẹ de gando núdùdù whèjai tọn daho de go. To apajlẹ lọ mẹ, e do dotẹnmẹ hundote he yin nina omẹ voovo lẹ nado tin to hukan ji na Ahọluduta olọn tọn hia. E sọ do nuhe e zẹẹmẹdo nado ‘biọgbè’ kavi dín whẹjijọ hia. (Hia Luku 14:16-21.) Jonọ he yin oylọ-basina to apajlẹ Jesu tọn mẹ lẹ dín whẹjijọ nado gọ̀n hùnwhẹ lọ tẹnmẹ. Mẹdopo dọ dọ emi dona yì pọ́n ogle he emi ṣẹṣẹ họ̀. Mẹdevo dọ dọ emi họ̀ oyìn delẹ bo jlo na yì tẹ́n yé pọ́n. Ṣogan mẹdevo dọmọ: ‘Yẹn ma sọgan wá, na n’ṣẹṣẹ dà asi wutu.’ Whẹjijọ ehelẹ ma sọgbe. To paa mẹ, mẹhe họ̀ ogle ko nọ saba pọ́n ẹn jẹnukọn, podọ mẹhe họ̀ kanlin-yìnyìn lẹ ko nọ tẹ́n yé pọ́n whẹpo do họ̀, enẹwutu nuhudo niyaniya tọn de ma tin nado yì pọ́n ẹn kavi tẹ́n yé pọ́n to godo mẹ. Podọ naegbọn alọwle he mẹde ṣẹṣẹ basi na glọnalina ẹn ma nado siọ oylọ-basinamẹ vonọtaun mọnkọtọn? Abajọ mẹhe basi oylọ namẹ lọ do gblehomẹ sinsinyẹn!
10 Omẹ Jiwheyẹwhe tọn lẹpo wẹ sọgan plọn nude sọn apajlẹ Jesu tọn ehe mẹ. Etẹwẹ nulọ? Mí ma dona dike whẹho mẹdetiti tọn lẹ taidi dehe go Jesu donù to apajlẹ etọn mẹ lẹ ni lẹzun nujọnu na mí sọmọ bọ yé na wá yitẹn to sinsẹ̀nzọn mítọn na Jiwheyẹwhe si gbede. Eyin Klistiani de ma ze whẹho mẹdetiti tọn lẹ do otẹn yetọn mẹ, zohunhun etọn to lizọnyizọn lọ mẹ na jẹ didepo ji vudevude. (Hia Luku 8:14.) Ma nado dike enẹ ni jọ, mí dona nọgbẹ̀ to kọndopọ mẹ hẹ tudohomẹnamẹ Jesu tọn dọmọ: “Enẹwutu, mì zindonukọn nado to ahọluduta lọ po dodowiwa etọn po dín whẹ́.” (Mat. 6:33) Lehe e yin homẹhunnu nado mọdọ devizọnwatọ Jiwheyẹwhe tọn lẹ—yọpọ po mẹho po—to ayinamẹ titengbe enẹ yí do yizan mẹ do sọ! Na nugbo tọn, mẹsusu wẹ ko yí onú delẹ wà nado hẹn gbẹzan yetọn bọawu na yé nido sọgan yí whenu susu dogọ zan to lizọnyizọn lọ mẹ. Sọn numimọ yetọn titi mẹ, yé ko wá mọdọ zohunhun yíyí do dín Ahọluduta lọ whẹ́ nọ hẹn ayajẹ nujọnu tọn po pekọ daho po wá.
11. Kandai Biblu tọn tẹwẹ dohia dọ zohunhun yíyí do wà sinsẹ̀nzọn Jiwheyẹwhe tọn po ahundopo po yin nujọnu?
11 Nado basi zẹẹmẹ nuhewutu e do yin nujọnu nado yin zohunhunnọ to sinsẹ̀nzọn Jiwheyẹwhe tọn mẹ tọn, mì gbọ mí ni lẹnnupọndo nuhe jọ do Ahọlu Joaṣi Islaeli tọn go ji. Na obu to didi Joaṣi dọ akọta Silia tọn na wá gbawhàn Islaeli tọn wutu, e wá Eliṣa dè po avi po. Yẹwhegán lọ dọna ẹn nado de ogá gbọn fleṣenu dohlan Silia waji nado do awhàngbigba Jehovah tọn do akọta enẹ ji hia. Ayihaawe ma tin dọ ehe dona ko dozolanmẹna ahọlu lọ. Enẹgodo, Eliṣa dọna Joaṣi nado bẹ ogába etọn lẹ bo yí yé do hò aigba. Joaṣi hò aigba whla atọ̀n. Homẹ gble Eliṣa taun, na aigba hihò whla atọ́n kavi ṣidopo na ko dohia dọ Islaelivi lẹ na ‘hò Silianu lẹ kaka yé nado sudo.’ Ṣigba todin, whla atọ̀n poun wẹ Joaṣi na duto Silianu lẹ ji. Na Joaṣi ma yinuwa po zohunhun po wutu, e ma duto yé ji mlẹnmlẹn. (2 Ahọ. 13:14-19) Etẹwẹ mí sọgan plọn sọn kandai enẹ mẹ? Jehovah na dona mí susugege, kiki eyin mí yí ahundopo do wà azọ́n etọn po zohunhun po.
12. (a) Etẹwẹ na gọalọna mí nado hẹn zohunhun mítọn go to sinsẹ̀nzọn Jiwheyẹwhe tọn mẹ dile mí to pipehẹ nuhahun gbẹ̀mẹ tọn lẹ? (b) Dọ lehe alọnu hinhẹn ján to lizọnyizọn lọ mẹ to ale hẹnwa na we do.
12 Nuhahun gbẹ̀mẹ tọn lẹ nọ whlé zohunhun po mẹdezejo mítọn to sinsẹ̀nzọn Jiwheyẹwhe tọn mẹ po pọ́n. Mẹmẹsunnu po mẹmẹyọnnu susu po wẹ to ahidi hẹ nuhahun akuẹzinzan tọn lẹ. Mẹdevo lẹ nọ jẹflumẹ na manọna sinsinyẹn lẹ nọ dekanpona nuhe yé sọgan wà to sinsẹ̀nzọn Jehovah tọn mẹ wutu. Etomọṣo, dopodopo mítọn wẹ sọgan yí onú delẹ wà nado hẹn ẹn diun dọ mí hẹn zohunhun mítọn go bo zindonukọn to Klisti hihodo mẹ to gigọ́ mẹ. Jaale pọ́n ayinamẹ delẹ gọna wefọ he yin sislẹ do apotin lọ, “Etẹwẹ Na Gọalọna We Nado Zindonukọn to Klisti Hihodo Mẹ?” Lẹnnupọndo lehe hiẹ sọgan yí yé zan to aliho dagbe hugan mẹ do ji. Eyin hiẹ wàmọ, e na hẹn ale susu wá na we. Alọnu hinhẹn ján to lizọnyizọn lọ mẹ nọ hẹn mí lodo, bo nọ hẹn gbẹzan mítọn pọnte, bosọ nọ hẹn jijọho po ayajẹ mítọn po sudeji. (1 Kọl. 15:58) Humọ, eyin mí nọ yí alindọn lẹpo do wà sinsẹ̀nzọn na Jiwheyẹwhe, enẹ na dohia dọ mí to “hinhẹn tintin tofi azán Jehovah tọn do ayiha mẹ gligli.”—2 Pita 3:12.
Yí Ahundopo do Gbeje Ninọmẹ Towe Pọ́n
13. Nawẹ mí sọgan wagbọn do yọ́n nuhe sinsẹ̀nzọn alindọn lẹpo tọn zẹẹmẹdo na dopodopo mítọn?
13 E na yọ́n nado hẹn do ayiha mẹ dọ e ma yin lehe ojlẹ he mí yizan to lizọnyizọn lọ mẹ sù sọ wẹ nọ do sinsẹ̀nzọn alindọn lẹpo tọn hia gba. Ninọmẹ mítọn lẹ ma yin dopolọ. Homẹ Jehovah tọn sọgan hùn do mẹhe nọ yí gànhiho dopo kavi awe poun zan to sinsẹ̀nzọn kunnudegbe tọn mẹ to sunmẹsunmẹ de go taun, eyin dọ nuhe agbasalilo etọn na ẹn dotẹnmẹ nado wà lẹpo ján niyẹn. (Yijlẹdo Malku 12:41-44 go.) Enẹwutu, e biọ dọ dopodopo mítọn ni gbeje ninọmẹ po nugopipe etọn lẹ po pọ́n ganji nado sọgan yọ́n nuhe e zẹẹmẹdo nado wà sinsẹ̀nzọn alindọn lẹpo tọn na Jiwheyẹwhe. Taidi hodotọ Klisti tọn lẹ, mí sọ nọ jlo nado hẹn pọndohlan mítọn tin to kọndopọ mẹ hẹ etọn. (Hia Lomunu lẹ 15:5; 1 Kọl. 2:16) Etẹwẹ tin to otẹn tintan mẹ na Jesu? E dọna tòmẹnu Kapẹlnaumi tọn lẹ dọmọ: “Yẹn dona yì tòdaho devo lẹ mẹ ga nado lá wẹndagbe ahọluduta Jiwheyẹwhe tọn, na ehe wutu wẹ yẹn do yin didohlan.” (Luku 4:43; Joh. 18:37) Eyin hiẹ lẹnnupọndo zohunhun he Jesu dohia to lizọnyizọn etọn mẹ ji, enẹ na gọalọna we nado gbeje ninọmẹ towe lẹ pọ́n vlavo eyin hiẹ sọgan hẹn lizọnyizọn towe gblodeji.—1 Kọl. 11:1.
14. Aliho devo tẹlẹ mẹ wẹ mí sọgan sọ hẹn lizọnyizọn mítọn gblodeji te?
14 Eyin mí yí sọwhiwhe do lẹnnupọndo ninọmẹ mítọn lẹ ji, e yọnbasi dọ mí ni mọdọ mí sọgan yidogọna whenu he mí nọ yizan to lizọnyizọn lọ mẹ. (Mat. 9:37, 38) Di apajlẹ, fọtọ́n susu jọja mítọn he fó wehọmẹ to agọe lẹ tọn wẹ ko hẹn lizọnyizọn yetọn gblodeji bo to numimọ ayajẹ he nọ wá sọn sinsẹ̀nzọn gbehosọnalitọ tọn wiwà po zohunhun po mẹ tọn tindo. Be hiẹ lọsu jlo nado tindo numimọ ayajẹ enẹ tọn ya? Mẹmẹsunnu po mẹmẹyọnnu delẹ po ko lẹnnupọndo ninọmẹ yetọn lẹ ji bo basi dide nado sẹtẹn yì lẹdo devo mẹ to otò yetọn mẹ, kavi tlẹ sẹtẹn yì tògodo, fie nuhudo wẹnlatọ Ahọluduta lọ tọn lẹ sù hugan te. Mẹdevo lẹ ko plọn ogbè devo nado sọgan gọalọna mẹhe nọ do jonọgbè lẹ. Dile etlẹ yindọ lizọnyizọn mítọn hinhẹn gblodeji sọgan bẹ nuhahun delẹ hẹn, e nọ hẹn dona susu wá, podọ mí sọgan gọalọna mẹsusu devo lẹ nado “wá oyọnẹn he pegan nugbo tọn kọ̀n.”—1 Tim. 2:3, 4; 2 Kọl. 9:6.
Apajlẹ Biblu Tọn He Hiẹ Dona Hodo Lẹ
15, 16. Nado lẹzun hodotọ zohunhunnọ Klisti tọn lẹ, apajlẹ mẹnu lẹ tọn wẹ mí sọgan hodo?
15 Nawẹ delẹ to mẹhe wá lẹzun apọsteli lẹ mẹ yinuwa gbọn to whenue Klisti basi oylọna yé nado lẹzun hodotọ etọn? Kandai lọ dọ gando Matiu go dọmọ: “Ewọ sọ jo onú lẹpo do, bo fọ́n bosọ to hihodo e.” (Luku 5:27, 28) Gando Pita po Andle po he to whèvi hù go, mí hia dọmọ: “To afọdopolọji, yé jo odọ̀ yetọn lẹ do bo hodo e.” Enẹgodo, Jesu mọ Jakọbu po Johanu po, mẹhe to odọ̀ yetọn lẹ tọ̀ hẹ otọ́ yetọn. Nawẹ yé yinuwa gbọn to whenue Jesu basi oylọna yé? “To afọdopolọji, yé jo tọjihun lọ po otọ́ yetọn po do, bo hodo e.”—Mat. 4:18-22.
16 Apajlẹ dagbe devo sọ wẹ Saulu tọn, mẹhe wá lẹzun apọsteli Paulu. Dile etlẹ yindọ homẹkẹndomẹtọ akonka hodotọ Klisti tọn lẹ tọn wẹ e yin, e diọ gbẹzan etọn bo lẹzun “núzinzan dide de” nado hẹn oyín Klisti tọn yì akọta lẹ dè. “To afọdopolọji, [Paulu] jẹ yẹwheho Jesu tọn dọ ji to sinagọgu lẹ mẹ, dọ Visunnu Jiwheyẹwhe tọn wẹ Ewọ.” (Owalọ 9:3-22) Podọ mahopọnna dọ Paulu doakọnna nuhahun po homẹkẹn susu po, e ma de zohunhun etọn pò gbede.—2 Kọl. 11:23-29; 12:15.
17. (a) Na nuhe du Klisti hihodo, etẹwẹ hiẹ na jlo nado wà? (b) Eyin mí yí ahun po huhlọn mítọn lẹpo po do wà ojlo Jehovah tọn, dona tẹlẹ wẹ mí na mọyi?
17 E họnwun dọ mí jlo na hodo apajlẹ dagbe he devi enẹlẹ zedai tọn bo yinuwa to afọdopolọji matin awuwhiwhle. (Heb. 6:11, 12) Dona tẹlẹ wẹ mí nọ mọyi dile mí zindonukọn bo to vivẹnudo nado hodo Klisti po zohunhun po, podọ to gigọ́ mẹ? Ojlo Jiwheyẹwhe tọn wiwà nọ hẹn ayajẹ nujọnu tọn wá na mí podọ eyin mí kẹalọyi lẹblanulọkẹyi sinsẹ̀nzọn tọn po azọngban devo lẹ po to agun mẹ, enẹ na hẹn pekọwana mí. (Ps. 40:8; hia 1 Tẹsalonikanu lẹ 4:1.) Mọwẹ, dile mí to vivẹnudo vẹkuvẹku to Klisti hihodo mẹ, mí nọ duvivi susugege dona he dẹn-to-aimẹ lẹ tọn taidi, jijọho ahun mẹ tọn, pekọ, nukundagbe Jiwheyẹwhe tọn, po todido ogbẹ̀ madopodo tọn po.—1 Tim. 4:10.
Be Hiẹ Flin Ya?
• Azọ́n titengbe tẹwẹ yin zizedo alọmẹ na mí, podọ nawẹ mí dona nọ pọ́n ẹn hlan gbọn?
• Ayilinlẹn gbẹtọvi tọn tẹwẹ mí dona dapana, podọ etẹwutu?
• Mẹdetiti gbigbejepọn ahundopo tọn tẹwẹ mí dona basi?
• Etẹwẹ na gọalọna mí nado zindonukọn to Klisti hihodo mẹ?
[Apotin/Yẹdide to weda 27]
Etẹwẹ Na Gọalọna We Nado Zindonukọn to Klisti Hihodo Mẹ?
▪ Nọ hia Ohó Jiwheyẹwhe tọn egbesọegbesọ, bo nọ lẹnayihamẹpọn do nuhe a hia ji.—Ps. 1:1-3; 1 Tim. 4:15.
▪ Nọ hodẹ̀ gbọzangbọzan nado biọ godonọnamẹ po anademẹ gbigbọ Jiwheyẹwhe tọn po.—Zek. 4:6; Luku 11:9, 13.
▪ Nọ dogbẹ́ hẹ mẹhe nọ do zohunhun ahundopo tọn hia to lizọnyizọn lọ mẹ lẹ.—Howh. 13:20; Heb. 10:24, 25.
▪ Yọ́n niyaniya-yinyin ojlẹ he mẹ mí to gbẹnọ te tọn.—Efe. 5:15, 16.
▪ Yọ́n kọdetọn vẹadi he whẹjijọ dindin nọ hẹnwa tọn lẹ.—Luku 9:59-62.
▪ Nọ lẹnnupọn to gbesisọ mẹ do opà klandowiwe towe tọn gọna dona he nọ wá sọn sinsẹ̀nzọn Jehovah tọn po ahundopo yíyí do hodo Klisti po mẹ ji.—Ps. 116:12-14; 133:3; Howh. 10:22.