Be A Flin Ya?

Be a ko duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ tọn hihia ya? Eyọn, pọ́n eyin a sọgan na gblọndo na kanbiọ he bọdego helẹ:

• Nawẹ ‘nugopipe nulẹnpọn tọn’ sọgan whla mí gbọn? (Howhinwhẹn lẹ 1:4)

E sọgan hẹn mí nado nọ aṣeji sọta owù gbigbọmẹ tọn lẹ bo sisẹ mí nado doafọna nuyiwa nuyọnẹn tọn lẹ, taidi didapana whlepọn zanhẹmẹ tọn to agbasazọ́n mẹ. E nọ gọalọna mí nado yọnẹn dọ Klistiani hatọ lẹ yin mapenọ, ehe sọgan sisẹ mí ma nado nọ yinuwa to plaplaji to whenuena nuwiwa mẹdevo tọn lẹ gblehomẹna mí. E sọgan sọ hẹn mí penugo nado dapana kọgbidinamẹ yanwle agbasanu bibẹpli tọn he sọgan hẹn mí buali to gbigbọ-liho.—15/8, weda 21-4.

• Nawẹ mẹde sọgan lẹzun kọmẹnu he họakuẹ de gbọn?

Aliho awe he mẹ mẹde sọgan yin kọmẹnu dagbe de te wẹ nado nọ nanumẹ po alọtutlu po bo nọ dopẹ́ na nunina he e mọyi lẹ. Nuhọakuẹ wẹ kọmẹnu dagbe de yin to nugbajẹmẹji lẹ whenu. Kunnudetọ Jehovah tọn lẹ nọ vánkan nado yin kọmẹnu dagbe gbọn avase nuhe na jọ to madẹnmẹ lẹ tọn nina mẹdevo lẹ dali, yèdọ nuyiwa Jiwheyẹwhe tọn nado hẹn danuwiwa wá opodo.—1/9, weda 4-7.

• Sọgbe hẹ Biblu, mẹnu lẹ wẹ yin mẹwiwe nujọnu tọn lẹ, podọ nawẹ yé na gọalọna gbẹtọvi lẹ gbọn?

Klistiani fliflimẹ tọn lẹpo wẹ yin mẹwiwe nujọnu tọn lẹ, podọ Jiwheyẹwhe wẹ de yé taidi mẹwiwe, e mayin gbẹtọ kavi titobasinanu lẹ gba. (Lomunu lẹ 1:7) To afọdopolọji he yé yin finfọnsọnku do ogbẹ̀ olọn mẹ tọn mẹ, mẹwiwe lẹ na gọalọna Klisti to didona nugbonọ he to aigba ji lẹ mẹ. (Efesunu lẹ 1:18-21)—15/9, weda 5-7.

• Nawẹ e yin nujọnu sọ na Klistiani lẹ nado yọ́n nude gando aihundida lanmẹyiya Grèce hohowhenu tọn lẹ go?

Nukinkan apọsteli Pita po Paulu po tọn lẹ tindo nuyijlẹdonugo he sinai do kavi dlẹnalọdo aihundida hohowhenu tọn lẹ. (1 Kọlintinu lẹ 9:26; 1 Timoti 4:7; 2 Timoti 2:5; 1 Pita 5:10) Na wezundotọ hohowhenu tọn de, nujọnu wẹ e yin dọ e ni tindo azọ́nplọnmẹtọ dagbe, yin mawazẹjlẹgonọ, bo nọ deanana vivẹnudido etọn lẹ ganji. Onú dopolọ yin nugbo gando vivẹnudido gbigbọmẹ tọn Klistiani lẹ tọn go to egbehe.—1/10, weda 28-31.

• Etẹlẹ wẹ yin avùnnukundiọsọmẹnu po alemọyi ovi lẹ go pinpọ́n whẹ́n to tògodo tọn po?

Ovi susu nọ yawu plọn ogbè yọyọ de hugan mẹjitọ yetọn lẹ, he e sọgan sinyẹnawuna nado mọnukunnujẹ nulẹnpọn po nuyiwa ovi yetọn lẹ tọn po mẹ. Podọ ovi lọ lẹ sọgan nọma yawu mọnukunnujẹ nuplọnmẹ Biblu tọn lẹ mẹ to ogbè mẹjitọ yetọn lẹ tọn mẹ. Ṣogan, kanṣiṣa whẹndo tọn lẹ sọgan yin hinhẹn lodo dile mẹjitọ lẹ to ogbè yetọn plọn ovi lẹ, podọ ovi lọ lẹ sọgan gbọnmọ dali se ogbè awe bosọ jẹakọhẹ aṣa awe lọ lẹ.—15/10, weda 22-6.

• Etẹwutu pinplọn nado nọ vẹvẹ yin nujọnu?

Ovẹvivẹ nujọnu tọn yin aliho de nado jla haṣinṣan he gble de do. Biblu na mí apajlẹ lẹ gando huhlọn he ovẹvivẹ sọgan tindo go. (1 Samuẹli 25:2-35; Owalọ lẹ 23:1-5) To paa mẹ, eyin omẹ awe wọ́, yé omẹ awe lẹ wẹ nọ ṣinuwa jẹ obá de mẹ. Enẹwutu, nuhudo nọ tin na gbeyiyi po ovẹvivẹ pọmẹ tọn po.—1/11, weda 4-7.

• Etẹwutu akọhiho, etlẹ yin po akuẹ vude poun po do ylan?

Akọhiho nọ fọ́n ṣejannabi, gbigbọ agbàwhinwhlẹn tọn, po nukunkẹn po dote, ehe Biblu gbẹ́. (1 Kọlintinu lẹ 6:9, 10) Susu akọhotọ egblemakunọ lẹ tọn wẹ bẹjẹeji sọn ovu yetọn gbọn súgbigbò kleun-kleun lẹ dali.—1/11, weda 31.

• To whenuena e yindọ owe Biblu tọn susu wẹ yin kinkàn do Glẹkigbe mẹ, etẹwutu nuhudo sọ tin nado basi lẹdogbedevomẹ Biblu tọn do Glẹkigbe mẹ, podọ etẹwẹ yin kọdetọn lọ lẹ?

Glẹkigbe egbezangbe tọn gbọnvo tlala na Septante tọn heyin lẹdogbedevomẹ Owe-wiwe Heblu tọn podọ na dehe yin Owe-wiwe Glẹki tọn ga. To owhe kanweko agọe tọn lẹ gblamẹ, vivẹnu susu ko yin dido nado lẹ́ apadewhe Biblu tọn kavi blebu etọn do Glẹkigbe he nọ yin didó mẹ. To egbehe, nudi lẹdogbedevomẹ 30 Biblu tọn wẹ tin, to blebu mẹ kavi to apadewhe, he Glẹkinu paa lẹ sọgan hia bo mọnukunnujẹemẹ. Les Saintes Écritures—Traduction du monde nouveau, heyin zinzinjẹgbonu to 1997 yin vonọtaun to yé mẹ.—15/11, weda 26-9.

• Etẹwutu madao nina mayin bibiọ to Klistiani lẹ si?

To Osẹ́n heyin nina Islaeli hohowhenu tọn mẹ, madao nina yin aliho de nado nọgodona whẹndo Levi tọn podọ nado penukundo wamọnọ lẹ go. (Levitiku 27:30; Deutelonomi 14:28, 29) Okú avọ́sinsan Jesu tọn doalọtena Osẹ́n lọ po nubiọtomẹsi madao nina tọn etọn po. (Efesunu lẹ 2:13-15) To Klistiani fliflimẹ tọn lẹ ṣẹnṣẹn, nuyiwa lọ wẹ yindọ Klistiani dopodopo nọ nanú sọgbe hẹ huhlọn etọn podọ dile e magbe to ahun ede tọn mẹ do. (2 Kọlintinu lẹ 9:5, 7)—1/12, weda 4-6.

• Be nuhe dọ Osọhia 20:8 te wẹ yindọ gbẹtọ susugege tlala de wẹ Satani na klọ to whlepọn godo tọn whenu ya?

Wefọ lọ dọ dọ mẹhe na yin kiklọ lẹ na “taidi tọkẹ́n ohù tọn.” To Biblu mẹ, hodidọ enẹ nọ saba zẹẹmẹdo sọha he mayin yinyọnẹn de, e ma yin sọha he sù tlala de gba. Okún Ablaham tọn, he na “di tọkẹ́n he tin to huto,” wá yin gbẹtọ 144 000 poun to godo mẹ gbọnvona Jesu Klisti. (Gẹnẹsisi 22:17; Osọhia 14:1-4)—1/12, weda 29.