‘Ewọ Nasọ Dọnsẹpọ Mì’
“[Jiwheyẹwhe] ma tlẹ dẹn sọn dopodopo mítọn dè gba.”—OWALỌ LẸ 17:27.
1, 2. (a) Kanbiọ tẹwẹ mí sọgan kanse gando Mẹdatọ lọ go eyin mí to agahomẹ he gọ́ na sunwhlẹvu lẹ pọ́n? (b) Nawẹ Biblu hẹn mí deji dọ gbẹtọvi lẹ yin nujọnu to nukun Jehovah tọn mẹ gbọn?
BE A ko pọ́n agahomẹ he gọ́ na sunwhlẹvu lẹ hlan to ozán he ma tindo aslọ de mẹ bọ awuji we taun pọ́n ya? Lehe sunwhlẹvu lẹ sù sọ po kiklo tlala wẹkẹ lọ tọn po sẹhundaga. To wẹkẹ gblagada ehe mẹ, aigba yin adà pẹvi tlala de poun. Be ehe zẹẹmẹdo dọ Mẹdatọ lọ, yèdọ “Gigogán to wẹkẹ lẹpo ji,” ko yiaga hugan nado hò gbẹtọvi lẹ tọn pọ́n kavi dẹn tlala do yé bọ yé ma sọgan dín in mọ bo yọ́n ẹn wẹ ya?—Psalm 83:18.
2 Biblu hẹn mí deji dọ gbẹtọvi lẹ yin nujọnu to nukun Jehovah tọn mẹ. Ohó Jiwheyẹwhe tọn tlẹ na mí tuli nado dín in mọ, dọmọ: “E ma tlẹ dẹn sọn dopodopo mítọn dè gba.” (Owalọ lẹ 17:27; 1 Otannugbo lẹ 28:9) Na nugbo tọn, eyin mí ze afọdide lẹ nado dọnsẹpọ Jiwheyẹwhe, ewọ na yinuwa sọgbe hẹ vivẹnudido mítọn lẹ. To aliho tẹ mẹ? Hogbe wefọ owhe 2003 tọn mítọn lẹ na mí gblọndo homẹmiọnnamẹ tọn ehe dọ: ‘Ewọ nasọ dọnsẹpọ mì.’ (Jakobu 4:8) Mì gbọ mí ni dọhodo dona jiawu delẹ he Jehovah nọ na mẹhe dọnsẹpọ ẹ lẹ ji.
Nunina Mẹdetiti Tọn de sọn Jehovah Dè
3. Nunina tẹwẹ Jehovah nọ na mẹhe dọnsẹpọ ẹ lẹ?
3 Tintan, devizọnwatọ Jehovah tọn lẹ tindo nunina họakuẹ de he e ko whlá dai na omẹ etọn lẹ. Huhlọn, adọkun, po wepinplọn he titonu ehe sọgan namẹ lẹpo po ma sọgan hẹnmẹ tindo nunina ehe. Nunina mẹdetiti tọn de wẹ e yin, yèdọ nude he Jehovah nọ na mẹhe sẹpọ ẹ lẹ kẹdẹ. Etẹwẹ onú lọ? Ohó Jiwheyẹwhe tọn na gblọndo dọmọ: “Eyin hiẹ . . . ze ogbè towe daga na ayitunnugo; eyin hiẹ dín in di fataka, bosọ dín in di adọkunnu he whlá. Whenẹnu wẹ hiẹ na tunwun osi OKLUNỌ tọn, bo nasọ mọ oyọnẹn Jiwheyẹwhe tọn. Na OKLUNỌ wẹ nọ na oyọnẹn omẹ.” (Howhinwhẹn lẹ 2:3-6) Yí nukun homẹ tọn do pọ́n gbẹtọvi mapenọ lẹ he penugo nado mọ “oyọnẹn Jiwheyẹwhe tọn”! Nunina enẹ—yèdọ oyọnẹn heyin mimọ to Ohó Jiwheyẹwhe tọn mẹ—yin yiyijlẹdo “adọkunnu he whlá” go. Etẹwutu?
4, 5. Naegbọn mí sọgan yí “oyọnẹn Jiwheyẹwhe tọn” jlẹdo “adọkunnu he whlá” go? Basi dohia.
4 Onú dopo wẹ yindọ, oyọnẹn Jiwheyẹwhe tọn họakuẹ taun. Dopo to dona họakuẹ hugan etọn lẹ mẹ wẹ todido ogbẹ̀ madopodo tọn. (Johanu 17:3) Ṣigba oyọnẹn enẹ tlẹ nọ hẹn gbẹzan mítọn yin adọkunnọ todin. Di apajlẹ, na mí yí sọwhiwhe do plọn Ohó Jiwheyẹwhe tọn wutu, mí ko wá mọ gblọndo na kanbiọ titengbe lẹ taidi: Etẹwẹ yin yinkọ Jiwheyẹwhe tọn? (Psalm 83:18) Etẹwẹ yin ninọmẹ taun oṣiọ lẹ tọn? (Yẹwhehodọtọ 9:5, 10) Etẹwẹ yin lẹndai Jiwheyẹwhe tọn na aigba po gbẹtọvi po? (Isaia 45:18) Mí ko sọ wá yọnẹn dọ aliho gbẹzan tọn he yọnhugan lọ wẹ nado yí ayinamẹ nuyọnẹn tọn Biblu tọn lẹ do yizan mẹ. (Isaia 30:20, 21; 48:17, 18) Gbọnmọ dali, mí tindo anademẹ he sọgbe he nọ gọalọna mí nado pehẹ magbọjẹ gbẹ̀mẹ tọn lẹ bo doafọna nuyiwa he nọ ze ayajẹ po pekọ nujọnu tọn po daga. Hú popolẹpo, Ohó Jiwheyẹwhe tọn pinplọn ko hẹn mí penugo nado wá yọ́n jẹhẹnu jiawu Jehovah tọn lẹ bo dọnsẹpọ ewọ. Etẹwẹ sọgan sọ họakuẹ hugan haṣinṣan pẹkipẹki de he sinai do “oyọnẹn Jiwheyẹwhe tọn” ji tintindo hẹ Jehovah?
5 Mí tindo whẹwhinwhẹ́n devo he wutu mí sọgan yí oyọnẹn Jiwheyẹwhe tọn jlẹdo “adọkunnu he whlá” go. Taidi adọkunnu susu lẹ, e ma gbayipe to aihọn ehe mẹ gba. To gbẹtọ liva ṣidopo he tin to aigba ji lẹ mẹ, nudi sinsẹ̀n-basitọ Jehovah tọn livi ṣidopo poun, kavi nudi 1 to 1 000 mẹ wẹ ko mọ “oyọnẹn Jiwheyẹwhe tọn.” Nado basi dohia lehe e yin lẹblanulọkẹyi họakuẹ de nado yọ́n nugbo he tin to Ohó Jiwheyẹwhe tọn mẹ do tọn, lẹnnupọndo kanbiọ Biblu tọn dopo ehe ji poun: Etẹwẹ nọ jọ do gbẹtọ go eyin e kú? Owe-wiwe dohia mí dọ alindọn nọ kú bọ oṣiọ lẹ masọ yọ́n nude. (Ezekiẹli 18:4) Etomọṣo, suhugan sinsẹ̀n aihọn tọn lẹ tọn wẹ kẹalọyi nuyise agọ̀ lọ dọ nude tin to gbẹtọ mẹ he nọ to gbẹnọ zọnmii to okú godo. Nuyise titengbe sinsẹ̀n Mẹylọhodotọklisti tọn lẹ tọn wẹ enẹ yin. E sọ gbayipe ga to sinsẹ̀n Buddha tọn, Hindu tọn, Jaini tọn, Ju lẹ tọn, Malenu lẹ tọn, Shinto tọn, Sikhi tọn, po Tao tọn po mẹ. Yí nukun homẹ tọn do pọ́n—sinsẹ̀n-nuplọnmẹ lalo tọn dopo ehe to gbẹtọ liva lẹ klọ!
6, 7. (a) Mẹnu lẹ kẹdẹ wẹ sọgan mọ “oyọnẹn Jiwheyẹwhe tọn”? (b) Apajlẹ tẹwẹ dohia dọ Jehovah ko na mí wuntuntun he ‘nuyọnẹntọ po zinzintọ susu po’ ma tindo?
6 Etẹwutu mẹsusu ma ko mọ “oyọnẹn Jiwheyẹwhe tọn”? Na mẹde ma sọgan mọnukunnujẹ Ohó Jiwheyẹwhe tọn mẹ to gigọ́mẹ matin alọgọ Etọn wutu wẹ. Flindọ nunina de wẹ oyọnẹn ehe yin. Mẹhe jlo na yí ahundopo po whiwhẹ po do dindona Ohó etọn lẹ kẹdẹ wẹ Jehovah nọ na. Omẹ enẹlẹ sọgan gọ̀n mayin “nuyọnẹntọ . . . gbọn agbasalan tọn mẹ.” (1 Kọlintinu lẹ 1:26) Aihọn tlẹ sọgan nọ pọ́n susu yetọn hlan taidi ‘agblinọ po wunvinọ po.’ (Owalọ lẹ 4:13) Ṣogan, e mayin enẹ wẹ yin nujọnu gba. Jehovah nọ suahọ mí po “oyọnẹn Jiwheyẹwhe tọn” po na jẹhẹnu he e mọ to ahun mítọn mẹ lẹ wutu.
7 Pọ́n apajlẹ dopo. Weyọnẹntọ Mẹylọhodotọklisti tọn susu ko kàn owe he gbloada lẹ do Biblu ji. Owe mọnkọtọn lẹ sọgan basi zẹẹmẹ dodonu whenuho lẹ tọn, zẹẹmẹ hogbe Heblu po Glẹki po tọn lẹ, po onú devo lẹ po. Po oyọnẹn ehe lẹpo po, be weyọnẹntọ mọnkọtọn lẹ ko mọ “oyọnẹn Jiwheyẹwhe tọn” na taun tọn ya? Be yé mọnukunnujẹ hosọ Biblu tọn mẹ hezeheze, heyin nado suwhẹna nupojipetọ-yinyin Jehovah tọn gbọn Ahọluduta olọn mẹ tọn etọn gblamẹ ya? Be yé yọnẹn dọ Jehovah Jiwheyẹwhe mayin apadewhe Atọ̀n-to-dopomẹ tọn de ya? Ṣigba, míwlẹ mọnukunnujẹ whẹho enẹlẹ mẹ hezeheze. Etẹwutu? Na Jehovah ko hẹn mí mọnukunnujẹ nugbo gbigbọmẹ tọn he ‘nuyọnẹntọ po zinzintọ susu po’ ma yọnẹn lẹ mẹ wutu. (Matiu 11:25) Jehovah to didona mẹhe sẹpọ ẹ lẹ na nugbo tọn!
‘Jehovah to Mẹhe Yiwanna Ẹn Lẹpo Họ́’
8, 9. (a) Nawẹ Davidi basi zẹẹmẹ dona devo he mẹhe sẹpọ Jehovah lẹ nọ duvivi etọn tọn gbọn? (b) Etẹwutu Klistiani nugbo lẹ tindo nuhudo hihọ́ Jiwheyẹwhe tọn tọn?
8 Mẹhe sẹpọ Jehovah lẹ nọ duvivi dona devo tọn, enẹwẹ hihọ́ Etọn. Psalm-kàntọ Davidi, he pehẹ nuhahun po awusinyẹnnamẹnu susu po wlan dọmọ: “OKLUNỌ ma dẹn do yé he to awhádo ylọ ẹ lẹ dè gba, e tin to yakẹ yé he to awhádo ylọ ẹ to nugbo mẹ lẹpo tọn. E nasọ hẹn ojlo yé he dibusi i lẹ tọn ṣẹ: e na se awhá yetọn ga, bo nasọ whlẹn yé gán. OKLUNỌ [to yé he yiwanna ẹn lẹpo họ́].” (Psalm 145:18-20) Mọwẹ, Jehovah sẹpọ mẹhe yiwanna ẹn lẹ, bo nọ yawu yinuwa hlan awhágbe alọgọ tọn yetọn lẹ.
9 Etẹwutu mí tindo nuhudo hihọ́ Jiwheyẹwhe tọn tọn? To yidogọmẹ na nuhahun gbẹninọ to ‘ojlẹ awusinyẹn tọn ehelẹ mẹ’ tọn lẹ, Klistiani nugbo lẹ yin yanwle tangan Satani Lẹgba, Kẹntọgán Jehovah tọn tọn. (2 Timoti 3:1) Kẹntọ mẹklọtọ enẹ ko magbe ‘nado tlẹ́n mí dù.’ (1 Pita 5:8) Satani nọ dohomẹkẹn mí, gbidikọna mí, bo nọ whlé mí pọ́n. E sọ nọ pọ́n ninọmẹ ayiha po ahun mẹ tọn lẹ po nado sọgan yí do wle mí. Yanwle etọn wẹ nado hẹn yise mítọn gbọjọ bo và mí sudo to gbigbọ-liho. (Osọhia 12:12, 17) To whenuena e yindọ kẹntọ huhlọnnọ mọnkọtọn wẹ mí to ahidihẹ, be e mayin mẹhẹndejinu wẹ e yin nado yọnẹn dọ ‘Jehovah to mẹhe yiwanna ẹn lẹpo họ́’ ya?
10. (a) Nawẹ Jehovah nọ họ́ omẹ etọn lẹ gbọn? (b) Hihọ́ wunmẹ tẹwẹ yin nujọnu hugan, podọ etẹwutu?
10 Ṣigba, nawẹ Jehovah nọ họ́ omẹ etọn lẹ gbọn? Opagbe hihọ́ tọn etọn ma dohia dọ mí na zan gbẹzan he vò sọn nuhahun si to aihọn ehe mẹ gba; mọjanwẹ e ma zẹẹmẹdo dọ e dona wà azọ́njiawu lẹ do ota mítọn mẹ do niyẹn. Etomọṣo, Jehovah nọ wleawu hihọ́ agbasamẹ tọn na omẹ etọn lẹ taidi pipli de. To popolẹpo mẹ, e ma na dike Lẹgba ni sukúndona sinsẹ̀n-basitọ nugbonọ lẹ sọn aigba ji gba! (2 Pita 2:9) Hú popolẹpo, Jehovah nọ basi hihọ́na mí to gbigbọ-liho. E nọ na mí nuhe mí dona tindo nado doakọnna homẹkẹn lẹ bo whlá haṣinṣan he mí tindo hẹ ewọ. Na taun tọn, hihọ́ gbigbọmẹ tọn wẹ yin hihọ́ heyin nujọnu hugan lọ. Etẹwutu? Dile e na dẹnsọ bọ mí tindo haṣinṣan hẹ Jehovah, nudepope—etlẹ yin okú—ma sọgan gbleawuna mí kakadoi gba.—Matiu 10:28.
11. Etẹlẹ wẹ Jehovah ko wleawudaina na, hihọ́ gbigbọmẹ tọn omẹ etọn lẹ tọn?
11 Jehovah ko basi awuwledainanu susugege lẹ na hihọ́ gbigbọmẹ tọn mẹhe sẹpọ ẹ lẹ tọn. Gbọn Ohó etọn, Biblu gblamẹ, e na mí nuyọnẹn nado pehẹ whlepọn voovo lẹ. (Jakobu 1:2-5) Yíyí ayinamẹ yọn-na-yizan heyin mimọ to Owe-wiwe mẹ lẹ do yizan mẹ yin hihọ́ de to ede mẹ. Podọ, Jehovah nọ na ‘gbigbọ wiwe hlan yé he biọ to e dè lẹ.’ (Luku 11:13) Gbigbọ enẹ wẹ huhlọn he klo hugan to wẹkẹ lọ mẹ, enẹwutu e sọgan hẹn mí pegan nado pehẹ whlepọn depope he sọgan pannukọn mí po kọdetọn dagbe po. Jehovah wleawuna ‘nunina to sunnu lẹ mẹ’ gbọn Klisti gblamẹ. (Efesunu lẹ 4:8) Sunnu he pegan to gbigbọ-liho ehelẹ nọ tẹnpọn nado do awuvẹmẹ sisosiso Jehovah tọn hia to alọgigọna sinsẹ̀n-basitọ hatọ lẹ mẹ.—Jakobu 5:14, 15.
12, 13. (a) Aliho tẹmẹ wẹ Jehovah nọ na mí núdùdù gbigbọmẹ tọn to osaa sisọ mẹ te? (b) Etẹwẹ yin numọtolanmẹ towe gando awuwledainanu Jehovah tọn lẹ na dagbemẹ-ninọ gbigbọmẹ tọn mítọn go?
12 Jehovah wleawuna onú devo de nado họ́ mí, enẹ wẹ núdùdù gbigbọmẹ tọn to osaa sisọ mẹ. (Matiu 24:45) Gbọn owe lẹ gblamẹ, he mẹ linlinnamẹwe Atọ̀họ̀-Nuhihọ́ Lọ Tọn po Réveillez-vous! po tin te, podọ gbọn opli lẹ po plidopọ lẹ po gblamẹ, Jehovah nọ na mí nuhe mí tindo nuhudo etọn to ojlẹ he jẹ lọ mẹ. Be a sọgan flin ojlẹ de he mẹ a se nude to opli, kavi plidopọ Klistiani tọn de ji he whàn we bo hẹn we lodo kavi miọnhomẹna we ya? Be hiẹ ko hia hosọ de to linlinnamẹwe heyin nùdego to aga lẹ dopo mẹ pọ́n bo lẹndọ emitọn wutu wẹ e yin kinkàn taun ya?
13 Dopo to awhànfunnu huhlọnnọ hugan Satani tọn lẹ mẹ wẹ gbigbọjọ, podọ e nọ yinuwado mílọsu ji. E yọnẹn ganji dọ todido matindo ojlẹ gaa tọn sọgan hẹn mí gbọjọ, bo hẹn mí zun madogánnọ. (Howhinwhẹn lẹ 24:10) Na Satani to tintẹnpọn nado yí flumẹjijẹ zan wutu, mí tindo nuhudo alọgọ tọn. Atọ̀họ̀-Nuhihọ́ Lọ Tọn po Réveillez-vous! po nọ zín hosọ he nọ gọalọna mí nado dù to flumẹjijẹ ji lẹ tọ́n to whedelẹnu. Mẹmẹyọnnu Klistiani de wlanwe gando hosọ mọnkọtọn dopo go dọmọ: “Diblayin egbesọegbesọ wẹ yẹn nọ hia hosọ lọ, bọ dasin gbẹsọ nọ wayi do mi. Yẹn ze e do akanma ṣie ji na yẹn nido sọgan mọ ẹn to whedepopenu he yẹn jẹ numọtolanmẹ gbigbọjọ tọn tindo ji. Gbọn hosọ mọnkọtọn lẹ gblamẹ, yẹn sọgan mọdọ alọ hihọ́ basinamẹ Jehovah tọn lẹ tin to yẹn go.”a Be mí ma dopẹna Jehovah dọ e to núdùdù gbigbọmẹ tọn na mí to osaa sisọ mẹ ya? Flindọ, awuwledainanu etọn lẹ na dagbemẹ-ninọ gbigbọmẹ tọn mítọn yin kunnudenu dọ ewọ sẹpọ mí bo ko sọ ze mí do hihọ́ etọn glọ.
Mí Sọgan Dọnsẹpọ ‘Sisetọ Odẹ̀’ Tọn
14, 15. (a) Dona tẹwẹ Jehovah nọ kọ̀n do mẹhe sẹpọ ẹ lẹ ji? (b) Naegbọn dindọnsẹpọ Jehovah po awuvivo po to odẹ̀ mẹ yin lẹblanulọkẹyi vonọtaun de?
14 Be a ko doayi e go pọ́n dọ lehe gbẹtọ lẹ tindo huhlọn po aṣẹpipa po dogọ do, mọwẹ e nọ sinyẹn na mẹhe to oglọ yetọn lẹ nado dọnsẹpọ yé do ya? Ṣigba Jehovah Jiwheyẹwhe ka lo? Be e dẹn do mí hugan nado tindo ojlo to nuhe gbẹtọvi tata lẹ to didọna ẹn lẹ mẹ wẹ ya? Lala! Nunina odẹ̀ tọn yin dona devo he Jehovah kọ̀n do mẹhe sẹpọ ẹ lẹ ji. Dindọnsẹpọ ‘Sisetọ odẹ̀’ tọn po awuvivo po yin lẹblanulọkẹyi vonọtaun de na nugbo tọn. (Psalm 65:2) Etẹwutu?
15 Di dohia: Ogán daho azọ́nwhé de tọn tindo azọngban susu. E nọ basi nudide whẹho he go ewọ lọsu na penukundo po dehe e na zedo alọmẹ na mẹdevo lẹ po tọn. Mọdopolọ, Ogán Nupojipetọ wẹkẹ lọ tọn vò nado de whẹho he mẹ e na nọ tindo mahẹ te po dehe e na zedo alọmẹ na mẹdevo lẹ po. Pọ́n nuhe Jehovah ko zedo alọmẹ na Ovi yiwanna etọn Jesu lẹpo. Ovi lọ ko yin ‘huhlọnna nado dawhẹ.’ (Johanu 5:27) Angẹli lẹ yin ‘mẹmẹglọ hlan ẹn.’ (1 Pita 3:22) Gbigbọ wiwe huhlọnnọ Jehovah tọn ko yin nina Jesu nado gọalọna ẹn to anadidena devi etọn lẹ mẹ to aigba ji. (Johanu 15:26; 16:7) Enẹwẹ zọ́n bọ Jesu sọgan dọmọ: “Aṣẹ lẹpo wẹ yè ko jo hlan mi to olọn mẹ podọ to aigba ji.” (Matiu 28:18) Etomọṣo, Jehovah ko de nado nọ se odẹ̀ mítọn lẹ tlọlọ. Enẹwutu wẹ Biblu do dọ Jehovah kẹdẹ wẹ mí ni nọ hodẹ̀ hlan gbọn oyín Jesu tọn gblamẹ.—Psalm 69:13; Johanu 14:6, 13.
16. Etẹwutu mí sọgan deji dọ Jehovah nọ dotoaina odẹ̀ mítọn lẹ?
16 Be Jehovah nọ dotoaina odẹ̀ mítọn lẹ nugbonugbo ya? Eyin e ma nọ kiyana yé wẹ, e ma na ko dotuhomẹna mí nado “gbọṣi odẹ̀ mẹ” kavi nado ze agbàn po magbọjẹ mítọn lẹ po dlan ewọ ji. (Lomunu lẹ 12:12; Psalm 55:22; 1 Pita 5:7) Devizọnwatọ nugbonọ hohowhenu tọn lẹ deji mlẹnmlẹn dọ Jehovah nọ se odẹ̀ yetọn. (1 Johanu 5:14) Abajọ, psalm-kàntọ Davidi dọmọ: “[Jehovah] nasọ se ogbè ṣie.” (Psalm 55:17) Mílọsu tindo whẹwhinwhẹ́n lẹpo nado deji dọ Jehovah to yakẹ, bo nasọ dotoaina magbọjẹ po nuhiha mítọn lẹpo po.
Jehovah Nọ Suahọ Devizọnwatọ Etọn Lẹ
17, 18. (a) Etẹwẹ nọ yin numọtolanmẹ Jehovah tọn gando sinsẹ̀nzọn nugbonọ nudida nuyọnẹntọ etọn lẹ tọn go? (b) Basi zẹẹmẹ lehe Howhinwhẹn lẹ 19:17 dohia dọ Jehovah nọ doayi nuwiwa lẹblanu tọn mítọn lẹ go do tọn.
17 Nuhe gbẹtọvi tata lẹ sọgan wà kavi gbẹ́ nado wà ma nọ yinuwado otẹn Jehovah tọn ji taidi Nupojipetọ Wẹkẹ lọ tọn gba. Etomọṣo, Jehovah yin Jiwheyẹwhe de he nọ yọ́n pinpẹn-nutọn. E nọ yọ́n pinpẹn—yèdọ nọ yí nukun he họakuẹ do pọ́n—sinsẹ̀nzọn nugbonọ nudida nuyọnẹntọ etọn lẹ tọn. (Psalm 147:11) Ehe lọsu yin ale devo he mẹhe sẹpọ Jehovah lẹ nọ duvivi etọn: E nọ suahọ devizọnwatọ etọn lẹ.—Heblu lẹ 11:6.
18 Biblu dohia hezeheze dọ Jehovah nọ yọ́n pinpẹn nuhe sinsẹ̀n-basitọ etọn lẹ wà tọn. Di apajlẹ, mí hia dọmọ: “Ewọ he walẹblanuna wamọnọ, OKLUNỌ wẹ e yàn na: onú he e wà, e nasọ suahọ etọn ẹn.” (Howhinwhẹn lẹ 19:17) Lẹblanu he Jehovah tindo na wamọnọ lẹ yin didohia to Osẹ́n Mose tọn mẹ. (Levitiku 14:21; 19:15) Etẹwẹ nọ yin numọtolanmẹ Jehovah tọn to whenuena mí hodo apajlẹ lẹblanu etọn tọn to nuyiwahẹ wamọnọ lẹ mẹ? Eyin mí nanú wamọnọ lẹ, bo ma donukun nudepope, Jehovah nọ pọ́n ehe hlan taidi akuẹ he mí yàn na Ewọ. Jehovah dopagbe nado yí nukundagbe po dona lẹ po do gọ ahọ́ enẹ sú. (Howhinwhẹn lẹ 10:22; Matiu 6:3, 4; Luku 14:12-14) Mọwẹ, eyin mí do awuvẹmẹ hia yisenọ hatọ he to nuhudo mẹ de, e nọ whàn ahun Jehovah tọn. Lehe homẹ mítọn hùn do sọ nado yọnẹn dọ Otọ́ olọn mẹ tọn mítọn nọ doayi nuwiwa lẹblanu tọn mítọn lẹ go!—Matiu 5:7.
19. (a) Naegbọn mí sọgan deji dọ Jehovah nọ yọ́n pinpẹn nuhe mí to wiwà to azọ́n yẹwhehodidọ po gbẹtọ lẹ hinhẹnzun devi po mẹ tọn? (b) Nawẹ Jehovah nọ suahọ sinsẹ̀nzọn heyin wiwà nado nọgodona Ahọluduta etọn gbọn?
19 Na taun tọn, Jehovah nọ yọ́n pinpẹn nuhe mí wà do ota Ahọluduta etọn mẹ lẹ tọn. Eyin mí dọnsẹpọ Jehovah, jọwamọnu wẹ e nọ yin dọ mí na jlo nado yí ojlẹ, huhlọn, po nutindo mítọn lẹ po zan nado tindo mahẹ gigọ́ to azọ́n yẹwhehodidọ-Ahọluduta lọ tọn po gbẹtọ lẹ hinhẹnzun devi tọn po mẹ. (Matiu 28:19, 20) To whedelẹnu, mí sọgan lẹndọ onú vude wẹ mí to wiwadotana. Ahun mapenọ mítọn tlẹ sọgan sọ hẹn mí lẹndọ vivẹnudido mítọn lẹ ma nọ hẹn homẹ Jehovah tọn hùn gba. (1 Johanu 3:19, 20) Ṣigba Jehovah yọ́n pinpẹn nunina he wá sọn ahun heyin whinwhàn gbọn owanyi dali mẹ lẹpo tọn, mahopọnna lehe yé whè sọ. (Malku 12:41-44) Biblu na mí jide dọmọ: “Jiwheyẹwhe ma yin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia . . . oyín etọn.” (Heblu lẹ 6:10) Na nugbo tọn, Jehovah nọ flin bo nọ suahọ sinsẹ̀nzọn he tlẹ whè hugan he mí wà nado nọgodona Ahọluduta etọn. Gbọnvona dona susugege gbigbọmẹ tọn lẹ todin, mí sọgan pọ́n nukọn hlan ayajẹ gbẹninọ to aihọn yọyọ he ja mẹ, to fie Jehovah na hùn alọ etọn bo hẹn pekọwana ojlo he sọgbe mẹhe sẹpọ ẹ lẹpo tọn te!—Psalm 145:16; 2 Pita 3:13.
20. To owhe 2003 tọn mẹ, nawẹ mí sọgan hẹn hogbe wefọ owhe tọn mítọn do ayiha mẹ gbọn, podọ etẹwẹ na yin kọdetọn lọ?
20 To owhe 2003 tọn mẹ, mì gbọ mí ni nọ kanse míde eyin mí to vivẹnudo zọnmii nado dọnsẹpọ Otọ́ olọn mẹ tọn mítọn. Eyin mí to mọwà, mí sọgan deji dọ ewọ na yinuwa dile e ko dopagbe do. Ehe yinmọ, na ‘Jiwheyẹwhe ma sọgan dolalo’ wutu. (Titu 1:2) Eyin mì dọnsẹpọ ẹ, ewọ nasọ dọnsẹpọ mì. (Jakobu 4:8) Etẹwẹ na yin kọdetọn lọ? Dona susugege lẹ todin podọ nukundido dindọnsẹpọ Jehovah kakadoi doi tọn!
[Nudọnamẹ odò tọn]
a Hosọ lọ wẹ “Jehovah Klo Hugan Ahun Mítọn Lẹ,” he sọawuhia to Atọ̀họ̀-Nuhihọ́ Lọ Tọn 1er mai 2000 mẹ, weda 28-31.
Be A Flin Ya?
• Nunina tẹlẹ wẹ Jehovah nọ na mẹhe dọnsẹpọ ẹ lẹ?
• Onú tẹlẹ wẹ Jehovah wleawudaina, na hihọ́ gbigbọmẹ tọn omẹ etọn lẹ tọn?
• Etẹwutu dindọnsẹpọ Jehovah po awuvivo po to odẹ̀ mẹ yin lẹblanulọkẹyi vonọtaun de?
• Nawẹ Biblu dohia dọ Jehovah nọ yọ́n pinpẹn sinsẹ̀nzọn nugbonọ nudida nuyọnẹntọ etọn lẹ tọn gbọn?
[Yẹdide to weda 15]
Jehovah ko hẹn mí mọnukunnujẹ nugbo gbigbọmẹ tọn lẹ mẹ
[Yẹdide to weda 17]
Jehovah nọ wleawuna hihọ́ gbigbọmẹ tọn
[Yẹdide to weda 18]
Jehovah to yakẹ, bo nasọ dotoaina odẹ̀ mítọn lẹpo