‘Ṣo! Jiwheyẹwhe E, Naegbọn A Dike Ehe Do Jọ?’
RICARDO gbẹ́ nọ flindọ emi po asi emitọn Maria po, wẹ to aisinsin to abò dotowhé tọn lọ mẹ.a Yé omẹ awe lẹ ma tindo jintli lọ nado hia nuhe yin kọdetọn dodinnanu dotowhé tọn agọe tọn Maria tọn. Enẹgodo, Ricardo hùn owepo lọ, bọ yé yìn nukun gbọn nuhe yin kinkàn do e mẹ lẹ ji. Yé mọ hogbe lọ “azọ̀n agbasa wiwọ̀ tọn,” bọ yé omẹ awe lẹ jẹ avivi ji na yé yọ́n nuhe hogbe enẹ zẹẹmẹdo to gigọ́mẹ wutu.
“Doto lọ jọmẹ taun,” wẹ Ricardo dọ, “ṣigba e họnwun dọ e yọ́n lehe ninọmẹ lọ sinyẹn sọ, na e to didọna mí gbọzangbọzan dọ mí dona dotudo Jiwheyẹwhe go.”
Whẹpo doto lọ do jẹ aliho nukunpedomẹgo tọn sinsinyẹn lẹ yizan na Maria ji, e doayi e go dọ afọ etọn adusiwhé tọn nọ sisọ na ede. Dodinnanu dogọ lẹ dohia dọ azọ̀n lọ ko gbayipe biọ apọ̀n etọn mẹ. Doto lọ doalọtena nukunpedomẹgo lọ to osẹ dopo tata godo. Enẹgodo, Maria dakú bosọ kú to osun awe godo. Ricardo dọmọ: “Homẹ ṣie hùn dọ yajiji etọn ko doalọte, ṣigba yẹn jẹdò etọn taun bo tlẹ wá doayi e go dọ n’nọ to jijlo dọ yẹn lọsu ni yawu kú. Gbọzangbọzan wẹ n’nọ doavigbe hlan Jiwheyẹwhe dọ: ‘Etẹwutu a dike ehe do jọ?’ ”
Kanbiọ Nọ Sù to Nugbajẹmẹji lẹ Whenu
Taidi Ricardo, gbẹtọ wọ̀bliba lẹ wẹ nọ yin hinhẹn po huhlọn po nado pehẹ nugbo-yinyin yajiji tọn lẹdo aihọn pé. To ojlẹ susu mẹ, homẹvọnọ lẹ wẹ e nọ saba yin. Lẹnnupọndo awubla sinsinyẹn he awhàn he to tuklado gbẹtọvi lẹ to hinhẹnwa ji. Kavi lẹnnupọndo awubla he susu mẹhe nọ yin zinzanhẹ gánnugánnu, ovi he nọ yin nuyiwahẹ agọ̀, mẹhe go danuwiwa whégbè tọn jọ do, gọna mẹhe go danuwiwa gbẹtọ tọn devo lẹ to gingando lẹ tọn to numimọ etọn tindo ji. To whenuho mẹ, e taidi dọ dogbó matin na whẹdida agọ̀ po awufiẹsa he gbẹtọ lẹ to jijlo nado hẹnwa yedelẹ ji po. (Yẹwhehodọtọ 4:1-3) Enẹgodo, lẹnnupọndo awubla mẹhe to oyà nugbajẹmẹji jọwamọ kavi numọtolanmẹ tọn ji, gọna mẹhe to awutu jẹ to apọ̀nmẹ po agbasamẹ po lẹ ji. Abajọ mẹsusu do nọ kanse dọ, “Etẹwutu Jiwheyẹwhe jotẹndona yajiji enẹ lẹpo?”
Yèdọ e nọ sinyẹnawuna sinsẹ̀nnọ lẹ lọsu nado doakọnna yajiji. E sọgan paṣa hiẹ lọsu dọ whẹwhinwhẹ́n tẹwẹ Jiwheyẹwhe owanyinọ, he sọ yin huhlọnnọ hugan de sọgan tindo na dotẹnmẹ jijodo na yajiji gbẹtọvi tọn. Gblọndo he hẹn pekọ wá po nugbo tọn po mimọ na kanbiọ gigẹdẹ ehe yin nujọnu na jijọho ayiha mẹ tọn po haṣinṣan mítọn hẹ Jiwheyẹwhe po. Biblu wleawuna gblọndo enẹ. Jaale gbadopọnna nuhe e dọ to hosọ he bọdego mẹ.
[Nudọnamẹ Odò Tọn]
a Yinkọ lẹ ko yin didiọ.
[Yẹdide lẹ to weda 3]
Doto lọ to didọna mí gbọzangbọzan dọ mí dona dotudo Jiwheyẹwhe go