Kanbiọ lẹ sọn Wehiatọ lẹ Dè
Be e sọgbe hẹ Owe-wiwe dọ Klistiani de ni ze alọ etọn do Biblu ji bo whlé nado dọ nugbo to whẹ̀dọhọsa ya?
Mẹdopodopo dona basi nudide mẹdetiti tọn to whẹho ehe mẹ. (Galatianu lẹ 6:5) Ṣigba, Biblu ma gbẹ́ whiwhle nado dọ nugbo to whẹ̀dọhọsa gba.
Aṣa he gbayipe de wẹ whiwhle yin sọn whenu dindẹn die. Di dohia, to hohowhenu, Glẹki lẹ nọ dlẹn alọ hlan olọn kavi ze alọ do agbà de go nado whlé. Eyin Lomunu de jlo na whlé nado dọ nugbo, e nọ ze zannu de do alọ mẹ bo nọ whlé dọ: “Eyin yẹn dolalo sọn ojlo mẹ, to whenuena [yẹwhe] Jupiteli to tòdaho lọ po figángán etọn po whlẹn, e ni ze onú dagbe lẹpo dlan sọn gbẹzan ṣie mẹ, dile yẹn na ze zannu he dlan do.”
Nuwiwa enẹlẹ dohia dọ gbẹtọvi yọ́n tintin yẹwhe huhlọnnọ de tọn he penugo nado mọ gbẹtọvi lẹ podọ ewọ wẹ yé na dogbè na. Sọn ojlẹ hohowhenu tọn lẹ mẹ, sinsẹ̀n-basitọ nugbo Jehovah tọn lẹ yọnẹn dọ e nọ yọ́n nuhe yé dọ bo wà lẹ. (Howhinwhẹn lẹ 5:21; 15:3) Yé nọ whlé to Jiwheyẹwhe nukọn, taidi dọ ewọ yin kunnudetọ de nkọtọn. Di apajlẹ, Boazi, Davidi, Sọlọmọni, po Zedekia po wàmọ. (Luti 3:13; 2 Samuẹli 3:35; 1 Ahọlu lẹ 2:23, 24; Jẹlemia 38:16) Mẹhe nọ sẹ̀n Jiwheyẹwhe nugbo lọ lẹ sọ nọ dike mẹdevo lẹ ni hẹn yé whlé. Enẹ jọ to whẹho Ablaham po Jesu Klisti po tọn mẹ.—Gẹnẹsisi 21:22-24; Matiu 26:63, 64.
Mẹhe whlé to Jehovah nukọn de sọ nọ basi ohia agbasa tọn de to whedelẹnu. Ablam (Ablaham) dọna ahọlu Sọdọmi tọn dọ: “Yẹn ko ze alọ ṣie daga hlan OKLUNỌ Jiwheyẹwhe Gigogán didatọ olọn po okẹ́ po tọn.” (Gẹnẹsisi 14:22) Angẹli he to hodọ hlan yẹwhegán Daniẹli “ze alọ etọn adusi po alọ amiyọn etọn po daga hlan olọn, bo whlé gbọn ewọ he togbẹ̀ kakadoi dali.” (Daniẹli 12:7) To yẹhiadonu-liho, Jiwheyẹwhe lọsu tlẹ ze alọ etọn daga to whiwhle mẹ.—Deutelonomi 32:40; Isaia 62:8.
Owe-wiwe ma jẹagọdo whiwhle gba. Ṣigba, Klistiani de ma dona whlé nado dohia dọ nugbo wẹ nuhe e dọ lẹpo yin gba. Jesu dọmọ: ‘Mì gbọ hogbe mìtọn ni yín, Mọwẹ, mọwẹ; Lala, lala.’ (Matiu 5:33-37) Devi Jakobu lọsu dọ onú dopolọ. Whiwhle gando whẹho flinflin lẹ go wẹ e to avase na sọta to whenuena e dọ dọ ‘mí whlé blo.’ (Jakobu 5:12) Jesu kavi Jakobu ma dọ dọ e ylan nado whlé nado dọ nugbo to whẹdọhọsa gba.
Etẹwẹ lo, eyin e yin bibiọ to Klistiani de si to whẹdọhọsa dọ e ni whlé dọ nugbo wẹ kunnudenu emitọn yin? E sọgan lẹndọ emi sọgan whlé to ojlẹ enẹ mẹ. Kavi, e sọgan yin dotẹnmẹ na nado yigbe tlọlọ dọ emi ma to lalodo gba.—Galatianu lẹ 1:20.
To whenuena nuyiwa whẹdatẹn tọn bẹ alọ zizedaga kavi alọ zizedo Biblu ji to whiwhle whenu hẹn, Klistiani de sọgan de nado wàmọ. E sọgan flin apajlẹ Owe-wiwe tọn heyin ohia agbasa tọn de bibasi to pọmẹ hẹ whiwhle de tọn. Na Klistiani de, finflin dọ Jiwheyẹwhe nukọn wẹ emi to whiwhle te nado dọ nugbo yin nujọnu hugan ohia de bibasi to whiwhle de whenu. Whẹho titengbe de wẹ whiwhle enẹ yin. Eyin Klistiani de lẹn bosọ mọdọ emi dona na gblọndo na kanbiọ heyin kinkanse emi to ojlẹ enẹ mẹ de, e dona flindọ emi ko whlé nado dọ nugbo, podọ nugbo wẹ Klistiani de dona nọ dọ to whepoponu.