Jidide po Pekọ po Tintindo to Agbasazọ́n mẹ Tin to Owù Mẹ — WESẸDOTẸN INTẸNẸT JI TỌN Watchtower Tọn

Jidide po Pekọ po Tintindo to Agbasazọ́n mẹ Tin to Owù Mẹ

“JLỌJẸ nado wazọ́n” yin dandan na gbẹtọvi lẹpo, wẹ La Déclaration Universelle des Droits de l’Homme heyin zinzinjẹgbonu gbọn Plidopọ Akọta lẹ tọn dali dọ. Ṣigba, jlọjẹ enẹ ma nọ saba yin mimọ gba. Agbasazọ́n he dẹn-to-aimẹ tintindo nọ sinai do onú susu ji—sọn ninọmẹ akuẹzinzan lẹdo lọ tọn ji jẹ ahi akọjọpli tọn ji. Etomọṣo, eyin azọ́n gble kavi tin to owù mẹ, homẹgble didohia, gufinfọn, po azọ́n gbigbẹdai po nọ saba bọdego. Otò vude poun go wẹ e ma nọ gando. Yèdọ hogbe lọ “azọ́n,” dile wekantọ dopo dọ do, “yin hosọ he nọ fọ́n numọtolanmẹ dote de, dile e ko nọ saba yin do.”

Mí dona wazọ́n na whẹwhinwhẹ́n susu wutu. Gbọnvona dọ e nọ dike mí ni mọ akuẹ, e nọ yidogọna dagbemẹninọ apọ̀nmẹ po numọtolanmẹ tọn mítọn po. Azọ́n nọ hẹn ojlo gbẹtọvi tọn di heyin nado yin hagbẹ he yọn-na-yizan lẹdo etọn tọn de bo tindo lẹndai to gbẹzan mẹ. E sọ nọ hẹn mẹdevo lẹ nado na mí sisi jẹ obá de mẹ. Enẹwẹ zọ́n bọ mẹhe tlẹ tindo akuẹ lankan kavi mẹhe dona ko yí gbọjẹ ojlẹ gaa tọn delẹ sọ gbẹ́ nọ to azọ́nwa zọnmii. Mọwẹ, azọ́n yin nujọnu sọmọ bọ nuhahun sinsinyẹn lẹ nọ saba fọ́n eyin mẹlẹpo ma tindo azọ́n.

To alọ devo mẹ, mẹdevo lẹ tin he tindo azọ́n ṣigba nọ pannukọn kọgbidinamẹ susu lẹ to azọ́n mẹ bo ma nọ tindo ayajẹ depope to azọ́nwiwa mẹ. Di dohia, na agbàwhinwhlẹn sinsinyẹn ahi lẹ tọn to egbehe wutu, azọ́nwhé susu ko de azọ́nwatọ yetọn lẹ pò nado sọgan de akuẹzinzan pò. Ehe sọgan vọ́ azọngban azọ́nwatọ he pò lẹ tọn hẹn sinyẹn, bọ yé dona wazọ́n susu dogọ.

Nuyọnẹn wintinwintin egbehe tọn, he dona ko hẹn gbẹzan po azọ́n po bọawu dogọ, ko sọ yidogọna kọgbidinamẹ he tin to azọ́nwatẹn lẹ. Di apajlẹ, ọdinatẹẹ po Internet po ko hẹn ẹn yọnbasi na gbẹtọ lẹ nado nọ hẹn azọ́n yetọn lẹ yì whégbè to vivọnu azọ́nzán lọ tọn, bo gbọnmọ dali hẹn vogbingbọn he tin to whégbè po azọ́nwatẹn po dozinvlu. Azọ́nwatọ dopo tindo numọtolanmẹ dọ alokan apomẹ tọn azọ́nwhé etọn tọn yin aliglọnnamẹnu mayinukundomọ de, he ogán etọn nọ yí do deanana ẹn.

Obu he to jijideji mẹhomẹ susu tọn wẹ yindọ yé sọgan yin pinpọnhlan taidi nugomapetọ jẹnukọnna yọnhopipo yetọn, na ninọmẹ akuẹzinzan tọn po lẹdo azọ́n tọn he to didiọ to niyaniya mẹ mítọn po wutu. Gando ehe go, Chris Sidoti heyin Ogán Daho Jlọjẹ Gbẹtọvi tọn lẹ tọn dai dọmọ: “Pọndohlan he gbayipe todin lọ wẹ yindọ mẹhe ma ko pé owhe 40 lẹ kẹdẹ wẹ sọgan penugo nado yí ọdinatẹẹ po nuyọnẹn wintinwintin yọyọ lẹ po zan.” Enẹwutu, susu mẹhe nọ yí sọwhiwhe do wazọ́n he na ko yin pinpọnhlan dai nado tin to ojlẹ gbẹzan tọn he yọnhugan yetọn mẹ lẹ nọ yin mimọ to egbehe taidi yọnhonọ he masọ yọn-na-yizan lẹ. Lehe e blawu sọ!

Abajọ, azọ́n sinsinyẹn wiwà po nugbonọ-yinyin hlan azọ́nwhé po ko depò tlala to owhe agọe tọn lẹ mẹ. “Eyin azọ́nwhé de nọ yàn gbẹtọ lẹ sọn azọ́n mẹ na diọdo kleun he wá aimẹ to akuẹzinzan mẹ wutu, nugbonọ-yinyin azọ́nwatọ lẹ tọn nọ lẹzun onú hoho, podọ a dona wazọ́n, e mayin na ale azọ́nwhé lọ tọn wutu gba ṣigba na ale dewetiti tọn,” wẹ linlinnamẹwe Flansegbe tọn lọ Libération dọ.

Mahopọnna nuhahun he to jijideji ehelẹ, nuhudo dandan gbẹtọvi tọn nado wazọ́n gbẹ́ zindonukọn. Enẹwutu to ojlẹ he to didiọ to niyaniya mẹ mítọn mẹ, nawẹ mẹde sọgan tindo pọndohlan jlẹkaji tọn gando azọ́n go bọ, to ojlẹ dopolọ mẹ, hẹn linlẹn jidide po pekọ tintindo to agbasazọ́n mẹ tọn po go gbọn?

[Yẹdide to weda 3]

Nuyọnẹn wintinwintin egbehe tọn sọgan ko yidogọna nuhahun azọ́nwatẹn tọn lẹ