Azán He Dona Yin Finflin De
AZÁN lọ diọ sọgodo gbẹtọvi tọn mlẹnmlẹn na gbẹtọ nido sọgan donukun dona mavọmavọ lẹ. Azán devo de ma ko yinuwado sọgodo gbẹtọvi tọn ji sọmọ pọ́n to whenuho mẹ. Azán he gbè Jesu dotana nuhe e wá aigba ji nado wà lẹpo wẹ e yin. Dile e yin whiwhè do yatin go, e gbọ̀ gbigbọ godo tọn etọn bo dawhá jẹgbonu dọmọ: “E vọ̀”! (Johanu 19:30) Lẹndai tẹ wutu wẹ Jesu wá aigba ji?
Biblu dọmọ: “Ovi gbẹtọ tọn ma wá nado yilizọn na, adavo nado yilizọn na omẹ, podọ nado yí ogbẹ̀ etọn do basi ofligọ na mẹsusu.” (Matiu 20:28) Jesu ze alindọn, kavi ogbẹ̀ etọn jo, na gbẹtọvi nido sọgan yin fifligọ sọn ylando po okú po he mí dugu etọn si. Mọwẹ, “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí ì se ma nado dọ̀n, ṣigba e nido tindo ogbẹ̀ madopodo.” (Johanu 3:16) Awuwledainanu họakuẹ nankọtọn die avọ́sinsan Jesu tọn yin!
Ṣogan, whẹwhinwhẹ́n devo tin he wutu azán he gbè Jesu kú dona yin finflin. To azán enẹ gbè Ovi Jiwheyẹwhe tọn plọn apọsteli etọn lẹ nuplọnmẹ họakuẹ he na gọalọna yé nado gbọṣi nugbonọ-yinyin mẹ lẹ. Lehe ohó he e dọ gbọngodo lẹ dona ko yinuwado devi enẹlẹ ji do sọ! Etẹlẹ wẹ e plọn yé? Nawẹ mí sọgan mọaleyi sọn nuhe Jesu plọn yé lẹ mẹ gbọn? Kanbiọ ehelẹ na yin hodọdeji to hosọ he bọdego mẹ.