“Mì Sẹpọ Jiwheyẹwhe, Ewọ Nasọ Sẹpọ Mì”
Jẹnukọnna Biblu Pinplọn Podọ to Enẹgodo—Gbẹzan Etọn Diọ Mlẹnmlẹn
LEHE gbẹzan ko vẹadi bo ma tindo zẹẹmẹ depope na Matsepang do sọ! Viyọnnu jọja de wẹ heyin tovi Lesotho tọn, yèdọ otò de he tin to ṣẹnṣẹn Afrique du Sud tọn. Matsepang yin pinpọn e go whẹ́n taidi Katoliki de. Ṣigba, kakati nado yin alọgọna nado dọnsẹpọ Jiwheyẹwhe, yẹwhenọ-yọnnu pamẹnọtọ lẹ ko hẹn ẹn gble na owhe susu gbọn yíyí akuẹ do klọ ẹ biọ nuyiwa fẹnnuwiwa tọn lẹ mẹ dali.
Taidi kọdetọn de, Matsepang yin hinhẹn jẹflumẹ do sinsẹ̀n go bo ma sọgan yise to Mẹdatọ owanyinọ he nọ hò gbẹtọvi he e dá lẹ tọn pọ́n de mẹ ba. Na kọgbẹmẹgo po kanyinylan he e jiya etọn po wutu, Matsepang tindo apà awufiẹsa he siso lẹ tọn po numọtolanmẹ nuvọ́nọ-yinyin mlẹnmlẹn tọn lẹ po. E whẹ́n bo lẹzun danuwatọ po kanylantọ po. Ehe dekọtọn do walọyizan sẹ́nhẹngba tọn mẹ.
To godo mẹ, Matsepang biọ ogbẹ́ jaguda he nọ jajo do gbẹtọ lẹ to pinpán mẹ tọn de mẹ. E yin wiwle bo yin didohlan ganpamẹ to Afrique du Sud. To nukọn mẹ, e yin yinyan yì Lesotho, fie e zindonukọn to nuyiwa sẹ́nhẹngba, ahànnumu, danuwiwa, po gbẹzan fẹnnuwiwa tọn po mẹ te.
To ojlẹ de mẹ he Matsepang jẹflumẹ pete to gbẹzan etọn mẹ, e hodẹ̀ vivẹvivẹ hlan Jiwheyẹwhe na alọgọ. E dopagbe dọ, “Jiwheyẹwhe, eyin yẹn jẹ gángán janwẹ, yẹn na wà nuhe go yẹn pé lẹpo nado sẹ̀n we.”
To madẹnmẹ, mẹdehlan heyin Kunnudetọ Jehovah tọn lẹ dọnsẹpọ Matsepang. Yé ze plọnmẹ Biblu donukọnna ẹn. Sọn nupinplọn etọn mẹ, e wá yọnẹn dọ Jiwheyẹwhe tindo ojlo to gbẹtọ lẹ mẹ bo nọ hò yetọn pọ́n. Na nugbo tọn, e mọdọ Satani, ‘otọ́ lalo tọn,’ nọ yí ayiha wintinwintin po nuyiwa mẹkiklọ tọn lẹ po zan nado dó linlẹn nuvọ́nọ-yinyin tọn do ayiha mẹ na mẹdelẹ bosọ nọ hẹn yé yise dọ Jehovah ma sọgan yiwanna yé gbede gba.—Johanu 8:44; Efesunu lẹ 6:11.
To vogbingbọn mẹ, lehe e miọnhomẹna Matsepang do sọ to whenuena e plọn dọ mí sọgan tindo osi-mẹdetiti tọn he sọgbe eyin mí lẹnvọjọ sọn ylando mítọn he wayi lẹ mẹ, dín jona Jiwheyẹwhe tọn, bo dovivẹnu nado hẹn homẹ etọn hùn! E yin alọgọna nado mọnukunnujẹemẹ dọ “Jiwheyẹwhe klo hú ayiha mítọn” bosọ nọ pọ́n mí hlan to aliho de mẹ he sọgan gbọnvo mlẹnmlẹn na lehe míwlẹ nọ mọ mídelẹ do.—1 Johanu 3:19, 20.
Ahun Matsepang tọn gọ́ na ayajẹ nado hia hogbe psalm-kàntọ Davidi tọn lẹ dọmọ: “OKLUNỌ sẹpọ yé he yin ayiha gbigbànọ de tọn lẹ, bosọ whlẹn yé he yin ayiha finfinọnnọ lẹ gán.” (Psalm 34:18) Taidi dopo to “ayiha finfinọnnọ lẹ” mẹ, e doayi e go dọ Jehovah ma nọ gbẹkọ devizọnwatọ etọn lẹ go gba, eyin delẹ to yé mẹ tlẹ lẹzun mẹhe jẹflumẹ kavi tindo numọtolanmẹ nuvọ́nọ-yinyin tọn. E miọnhomẹna ẹn nado plọn dọ Jiwheyẹwhe nọ hò lẹngbọ etọn lẹpo tọn pọ́n bo nọ hẹn yé dote to ojlẹ sinsinyẹn lẹ mẹ. (Psalm 55:22; 1 Pita 5:6, 7) Na taun tọn, e yin whinwhàn gbọn hogbe lọ lẹ dali dọmọ: “Mì sẹpọ Jiwheyẹwhe, ewọ nasọ sẹpọ mì.”—Jakobu 4:8.
Huhlọn Biblu heyin Ohó Jiwheyẹwhe tọn tọn, sọawuhia to madẹnmẹ to gbẹzan Matsepang tọn mẹ. E jẹ opli Klistiani tọn lẹ yì ji to gbesisọmẹ bosọ jo walọyizan etọn he ma sọgbe hẹ Owe-wiwe lẹ do. Etẹwẹ yin kọdetọn lọ? Numọtolanmẹ mẹhe ma jẹna owanyi po nukundagbe Jiwheyẹwhe tọn po he e tindo dai busẹ. Sọn whenue gbọ́n e yí baptẹm taidi dopo to Kunnudetọ Jehovah tọn lẹ mẹ, e ko yí ganhiho fọtọ́n susu zan to lizọnyizọn Klistiani tọn mẹ taidi lilatọ wẹndagbe Ahọluduta lọ tọn de. Mahopọnna awufiẹsa he e tindo wayi lẹ, Matsepang to gbẹzan ayajẹnọ he tindo zẹẹmẹ de zan todin. Dohia huhlọn Biblu tọn nado hẹn gbẹzan lẹ pọnte nankọtọn die!—Heblu lẹ
[Nudọnamẹ tangan lẹ to weda 9]
“Jiwheyẹwhe, eyin yẹn jẹ gángán janwẹ, yẹn na wà nuhe go yẹn pé lẹpo nado sẹ̀n we”
[Apotin to weda 9]
Nunọwhinnusẹ́n Biblu Tọn lẹ Yọn-na-Yizan
Delẹ to nunọwhinnusẹ́n Biblu tọn he ko miọnhomẹna mẹhe yin nuyiwahẹ to aliho agọ̀ mẹ lẹ die:
“To gege tumajai ṣie lẹ tọn mẹ to yẹn homẹ homẹmiọn towe [Jiwheyẹwhe tọn] hẹn homẹ ṣie hùn.” (Psalm 94:19) “Homẹmiọn” Jehovah tọn heyin mimọ to Ohó etọn mẹ yin asisa tulinamẹ daho de tọn. Nulẹnpọndo yé ji to ayihamẹlẹnpọn po dẹ̀hiho po whenu nọ gọalọna mí nado de linlẹn tukladomẹ tọn lẹ sẹ sọn ahun mẹ bo dejido Jiwheyẹwhe go taidi Họntọn nukunnumọjẹnumẹtọ de.
“E [Jehovah] hẹnazọ̀ngbọna ayiha gbàdonọ lẹ, bosọ blá alán yetọn.” (Psalm 147:3) Eyin mí yọ́n pinpẹn lẹblanu Jehovah tọn po awuwledainanu etọn po nado ṣinyọnnudo ylando mítọn lẹ gbọn avọ́sinsan ofligọ Jesu tọn gblamẹ, mí sọgan dọnsẹpọ Jiwheyẹwhe po adọgbigbo po matin numọtolanmẹ whẹhuhu tọn lẹ tintindo. Ehe sọgan hẹn homẹmimiọn po jijọho ayiha tọn susu po wá.
“Mẹdepope ma sọgan wá dè e, [Jesu Klisti] adavo Otọ́ he do mi hlan dọ̀n ẹn: yẹn nasọ fọ́n ẹn do ote to azán podo gbè.” (Johanu 6:44) Gbọn gbigbọ wiwe etọn gblamẹ podọ gbọn azọ́n yẹwhehodidọ Ahọluduta lọ tọn gblamẹ, Jehovah lọsu nọ dọ̀n mí hlan Ovi etọn dè bosọ nọ na mí todido ogbẹ̀ madopodo tọn.