Walọmimiọn—Jẹhẹnu Titengbe de He Klistiani lẹ Dona Tindo
‘Mì ze walọmimiọn dogo.’—KỌLỌSINU LẸ 3:12.
1. Etẹwẹ hẹn walọmimiọn yin jẹhẹnu ayidego tọn de?
EYIN osàn miọn, e nọ hẹn awuvivi wá. Eyin mẹde miọn, kavi tindo walọmimiọn, awuvivinu wẹ e nọ yin nado nọpọ́ hẹ ẹ. Ṣogan, ‘odẹ́ he miọn sọgan gbà ohú,’ wẹ Ahọlu nuyọnẹntọ Sọlọmọni dọ. (Howhinwhẹn lẹ 25:15) Walọmimiọn yin jẹhẹnu ayidego tọn de he bẹ awuvivi po huhlọn po hẹn.
2, 3. Kanṣiṣa tẹwẹ tin to walọmimiọn po gbigbọ wiwe po ṣẹnṣẹn, podọ etẹwẹ mí na gbadopọnna to hosọ ehe mẹ?
2 Apọsteli Paulu donù walọmimiọn go to “sinsẹ́n gbigbọ tọn” he e slẹ to Galatianu lẹ 5:22, 23 mẹ. Hogbe Glẹki tọn heyin lilẹdo “walọmimiọn” to wefọ 23 mẹ to Biblu Wiwe lọ mẹ nọ saba yin lilẹdo “homẹmimiọn” kavi “dẹdẹwiwa” to lẹdogbedevomẹ Biblu tọn devo lẹ mẹ. Nugbo lọ wẹ yindọ e sinyẹnawu nado mọ hogbe he sọgbe pẹpẹ na hogbe Glẹki tọn ehe to ogbè susu mẹ na hogbe dowhenu tọn lọ ma basi zẹẹmẹ dẹdẹwiwa gbonu tọn gba, ṣigba walọmimiọn po mẹtọnhopọn homẹ tọn po; e mayin jijọ mẹde tọn gba, ṣigba ninọmẹ ayiha po ahun mẹ tọn po.
3 Nado gọalọna mí nado mọnukunnujẹ zẹẹmẹ po nuhọakuẹ-yinyin walọmimiọn tọn po mẹ to gigọ́mẹ, mì gbọ mí ni gbadopọnna apajlẹ Biblu tọn ẹnẹ. (Lomunu lẹ 15:4) To mọwiwa mẹ, e mayin nuhe jẹhẹnu ehe yin kẹdẹ wẹ mí na plọn gba ṣigba lehe mí sọgan wleawuna ẹn bo do e hia to nuyiwa mítọn lẹpo mẹ do ga.
“Họakuẹ Susu to Jiwheyẹwhe Nukunmẹ”
4. Nawẹ mí wagbọn do yọnẹn dọ walọmimiọn họakuẹ to nukun Jehovah tọn mẹ?
4 To whenuena e yindọ walọmimiọn yin apadewhe sinsẹ́n gbigbọ Jiwheyẹwhe tọn tọn, e sọgbe hẹ lẹnpọn dagbe dọ e ni tindo kanṣiṣa pẹkipẹki hẹ jẹhẹnu jiawu Jiwheyẹwhe tọn lẹ. Apọsteli Pita wlan dọ ‘gbigbọ walọmimiọn po dẹdẹwiwa tọn po’ “họakuẹ susu to Jiwheyẹwhe nukunmẹ.” (1 Pita 3:4) Na nugbo tọn, Jiwheyẹwhe nọ do walọmimiọn hia, bo nọ yí nukun he họakuẹ tlala do pọ́n ẹn. Na jide tọn, whẹwhinwhẹ́n ehe kẹdẹ ko pé na devizọnwatọ Jiwheyẹwhe tọn lẹpo nado wleawuna walọmimiọn. Ṣigba nawẹ Jiwheyẹwhe ganhunupotọ lọ, heyin Aṣẹpatọ yiaga hugan to wẹkẹ mẹ, nọ do walọmimiọn hia gbọn?
5. Todido tẹwẹ mí tindo na walọmimiọn Jehovah tọn wutu?
5 To whenuena gbẹtọvi tintan lẹ, Adam po Evi po, vẹtolina gbedide he họnwun Jiwheyẹwhe tọn ma nado dù sọn atin yinyọ́n dagbe po oylan po lọ tọn mẹ, yé wàmọ sọn ojlo mẹ wá. (Gẹnẹsisi 2:16, 17) Nuyiwa tolivivẹ sọn ojlo mẹ wá tọn enẹ dekọtọn do ylando, okú, po lajijẹ sọn Jiwheyẹwhe dè po mẹ na yewlẹ po ovivi sọgodo tọn yetọn lẹ po. (Lomunu lẹ 5:12) Dile etlẹ yindọ owhẹ̀ Jehovah tọn whẹ́n mlẹnmlẹn nado hẹn whẹdida enẹ ṣẹ do yé ji, e ma gbọn fifiẹ dali gbẹkọ whẹndo gbẹtọvi tọn go taidi dọ yé ma sọgan yin gigọdotẹnmẹ bo yin fifligọ gbede ba gba. (Psalm 130:3) Kakatimọ, na homẹdagbe po ojlo tintindo etọn ma nado yin hẹngogonọ po wutu—yèdọ dohia walọmimiọn tọn—Jehovah wleawuna aliho he mẹ gbẹtọvi ylandonọ lẹ sọgan dọnsẹpọ ẹ bo mọ nukundagbe etọn te. Mọwẹ, gbọn nunina avọ́sinsan ofligọ Ovi etọn, Jesu Klisti tọn gblamẹ, Jehovah hẹn ẹn yọnbasi na mí nado dọnsẹpọ ofìn yiaga etọn po adọgbigbo po.—Lomunu lẹ 6:23; Heblu lẹ 4:14-16; 1 Johanu 4:9, 10, 18.
6. Nawẹ walọmimiọn sọawuhia to aliho he mẹ Jiwheyẹwhe yinuwa hẹ Kaini te lẹ mẹ gbọn?
6 Ojlẹ dindẹn whẹpo Jesu tlẹ do wá aigba ji, walọmimiọn Jehovah tọn yin didohia to whenuena visunnu Adam tọn lẹ, Kaini po Abẹli po, ze avọ́sinsan lẹ donukọnna Jiwheyẹwhe. To ninọmẹ ahun yetọn tọn yinyọnẹn mẹ, Jehovah gbẹ́ avọ́nunina Kaini tọn ṣigba ‘yí nukundagbe’ do pọ́n Abẹli po avọ́nunina etọn po. Nukundagbe he Jiwheyẹwhe yí do pọ́n Abẹli nugbonọ po avọ́nunina etọn po fọ́n adi Kaini tọn dote. “Homẹgble Kaini tlala, nukunmẹ etọn sọ kúṣiọ,” wẹ Biblu dọ. Nawẹ Jehovah yinuwa gbọn? Be walọ ylankan Kaini tọn doadi homẹ na ẹn wẹ ya? Lala. Po walọmimiọn po, e kanse Kaini nuhewutu e do to homẹgble sọmọ. Jehovah tlẹ dọ nuhe Kaini sọgan wà nado yin ‘alọkẹyi.’ (Gẹnẹsisi 4:3-7) Na nugbo tọn, Jehovah nọ do walọmimiọn hia to aliho pipé mẹ.—Eksọdusi 34:6.
Walọmimiọn Nọ Dọnmẹdogo bo Nọ Fakọnamẹ
7, 8. (a) Nawẹ mí sọgan mọnukunnujẹ walọmimiọn Jehovah tọn mẹ gbọn? (b) Etẹwẹ hogbe Matiu 11:27-29 tọn lẹ dohia gando Jehovah po Jesu po go?
7 Dopo to aliho he yọnhugan nado mọnukunnujẹ jẹhẹnu jiawu Jehovah tọn lẹ mẹ wẹ nado plọn gbẹzan po lizọnyizọn Jesu Klisti tọn po. (Johanu 1:18; 14:6-9) To whenuena Jesu tin to Galili to owhe awetọ nujijla yẹwhehodidọ tọn etọn whenu, e wà azọ́njiawu huhlọnnọ susu to Kolazin, Betsaida, Kapẹlnaumi, po otò he tin to yakẹ lẹ po mẹ. Ṣogan, suhugan omẹ lọ lẹ tọn yin goyitọ po ojlo matindonọ po, bọ yé sọ gbẹ́ nado yise. Nawẹ Jesu yinuwa gbọn? Dile e tlẹ flin yé kọdetọn yise matindo yetọn tọn lẹ madoadudẹ́ji, ninọmẹ blawu gbigbọmẹ tọn ʽam ha·ʼaʹrets, gbẹtọ paa he tin to ṣẹnṣẹn yetọn lẹ tọn wàlẹblanu na ẹn taun.—Matiu 9:35, 36; 11:20-24.
8 Nuyiwa Jesu tọn he bọdego lẹ dohia dọ ewọ ‘yọ́n Otọ́ etọn ganji’ bosọ nọ hodo apajlẹ etọn. Jesu basi oylọ zohunhun tọn na gbẹtọ paa lẹ dọmọ: ‘Mì wá dè e, mì he to tuklajẹ, bọ yè doagban pinpẹn na lẹ, yẹn nasọ fakọna mì. Mì yí zẹgẹ ṣie do okọ̀ mìtọn, na mì nisọ plọn nupinplọn ṣie: na walọmimiọnnọ podọ ayiha whiwhẹnọ wẹ yẹn: mì nasọ mọ kọfanamẹ hlan alindọn mìtọn lẹ.’ Lehe hogbe ehelẹ miọnhomẹ bo fakọna agbátọnọ he to yinyin kọgbidina lẹ do sọ! Yé tlẹ miọnhomẹna mílọsu to egbehe. Eyin mí yí ahundopo do ze walọmimiọn dogo, mí na tin to mẹhe ‘Ovi lọ jlo nado do Otọ́ etọn hia’ lẹ mẹ.—Matiu 11:27-29.
9. Jẹhẹnu tẹwẹ tindo kanṣiṣa hẹ walọmimiọn, podọ nawẹ Jesu yin apajlẹ dagbenọ to ehe mẹ gbọn?
9 Whiwhẹ kavi ‘ayiha whiwhẹ tọn tintindo’ tindo kanṣiṣa pẹkipẹki hẹ walọmimiọn. To alọ devo mẹ, goyiyi nọ dekọtọn do mẹdezedaga mẹ bo nọ saba hẹn mẹde nado yí fifiẹ po kanyinylan po do yinuwa hẹ mẹdevo lẹ. (Howhinwhẹn lẹ 16:18, 19) Jesu do whiwhẹ hia to lizọnyizọn aigba ji tọn etọn pete whenu. To whenuena e tlẹ kùn kẹtẹkẹtẹ biọ Jelusalẹm to nudi azán ṣinatọ̀n jẹnukọnna okú etọn bo yin gigopana taidi Ahọlu Ju lẹ tọn, nuyiwa Jesu tọn gbọnvo tlala na gandutọ aihọn tọn lẹ. E hẹn dọdai Mẹssia tọn he Zekalia dọ di dọmọ: ‘Pọ́n, Ahọlu towe ja dè we, walọmimiọnnọ, e hẹ́ kẹtẹkẹtẹ de ji, podọ kẹtẹkẹtẹ ovu de ji.’ (Matiu 21:5; Zekalia 9:9) Yẹwhegán Daniẹli nugbonọ mọ to numimọ de mẹ bọ Jehovah ze aṣẹpipa gandudu tọn do alọmẹ na Ovi etọn. Ṣogan, to dọdai he jẹnukọn de mẹ, e ko basi zẹẹmẹ Jesu tọn taidi “mẹhe yido patapata.” Na nugbo tọn, walọmimiọn po whiwhẹ po nọ yì afọsu-afọsi.—Daniẹli 4:17; 7:13, 14.
10. Naegbọn walọmimiọn Klistiani tọn ma zẹẹmẹdo madogán?
10 Walọmimiọn awuvivinamẹ tọn he Jehovah po Jesu po dohia nọ gọalọna mí nado dọnsẹpọ yé pẹkipẹki. (Jakobu 4:8) Na nugbo tọn, walọmimiọn ma zẹẹmẹdo madogán gba. Paali! Jehovah, Jiwheyẹwhe ganhunupotọ lọ, nọ do huhlọn he sẹhundaga susugege hia. Adi etọn nọ jizò do mawadodo go. (Isaia 30:27; 40:26) Mọdopolọ, Jesu magbe ma nado jogbe, etlẹ yin to mẹgbeyinyan Satani Lẹgba tọn glọ. E gbẹ́ gbidigbidi nado yigbena nuyiwa ylankan ajọwiwa sinsẹ̀ngán azán etọn gbè lẹ tọn. (Matiu 4:1-11; 21:12, 13; Johanu 2:13-17) Ṣogan, e yí walọmimiọn do yinuwa hẹ awugbopo devi etọn lẹ tọn, bosọ yí homẹfa do doakọnna madogán yetọn lẹ. (Matiu 20:20-28) Weyọnẹntọ Biblu tọn de basi zẹẹmẹ walọmimiọn tọn po gbesisọ po dole: “Huhlọn ogàn tọn tin to godo na jẹhẹnu dẹdẹwiwa tọn.” Mì dike mí ni nọ do jẹhẹnu he taidi Klisti tọn ehe hia—yèdọ walọmimiọn.
Walọmimiọnnọ Hugan to Azán Etọn Gbè
11, 12. To pọndohlanmẹ na aliho he mẹ Mose yin pinpọ́n whẹ́n te, etẹwẹ hẹn walọmimiọn etọn yin ayidego tọn?
11 Apajlẹ atọ̀ntọ he mí na gbadopọnna wẹ Mose tọn. Biblu ylọ ẹ dọ “[walọmimiọnnọ] tlala hú omẹ he tin to nukunmẹ aigba lọ tọn ji lẹpo.” (Osọha lẹ 12:3) Zẹẹmẹ ehe yin kinkàndai to gbigbọ Jiwheyẹwhe tọn glọ. Walọmimiọn ayidego tọn he Mose tindo hẹn ẹn nado kẹalọyi anademẹ Jehovah tọn.
12 Aliho he mẹ Mose yin pinpọ́n whẹ́n te jiawu tlala. Jehovah hẹn ẹn diun dọ visunnu mẹjitọ nugbonọ Heblu tọn ehe ni yin whiwhla dogbẹ̀ to ojlẹ danuwiwa po mẹhuhu tọn de po whenu. Mose yí owhe fliflimẹ tọn etọn lẹ zan hẹ onọ̀ etọn, he yí sọwhiwhe do plọn ẹn gando Jiwheyẹwhe nugbo lọ, Jehovah go. To nukọnmẹ, Mose yin tẹnsẹna sọn owhé etọn gbè nado yì nọ̀ lẹdo he gbọnvo tlala de mẹ. “Yé sọ plọn nuyọnẹn Egiptitọ tọn lẹpo Mose,” wẹ Klistiani fliflimẹ tọn lọ, Stefani he kú do yise etọn tamẹ dọ. Na nugbo tọn, Mose “dohuhlọn to ohó po walọ po mẹ.” (Owalọ lẹ 7:22) Yise etọn yin didohia to whenuena e doayi mawadodo he afanumẹ-gán Falo tọn lẹ to hinhẹnwa nọvisunnu etọn lẹ ji go. Mose dona họ̀n sọn Egipti yì aigba Midiani tọn ji na e hù Egiptinu de he to Heblunu de hò wutu.—Eksọdusi 1:15, 16; 2:1-15; Heblu lẹ 11:24, 25.
13. Nuyiwadomẹji tẹwẹ owhe 40 he Mose yizan to Midiani tindo do ewọ ji?
13 To owhe 40 mẹvi mẹ, Mose dona penukundo ede go to zungbo mẹ. E dukosọhẹ viyọnnu ṣinawe Lueli tọn lẹ to Midiani bo gọalọna yé nado dọ̀n osin na kanlinpa daho otọ́ yetọn tọn. To whenuena viyọnnu lọ lẹ lẹkọwa whégbè, yé yí ayajẹ do basi zẹẹmẹ na Lueli dọ “Egiptinu de” ko whlẹn emilẹ sọn alọ lẹngbọhọtọ he to tukladona emilẹ tọn mẹ. Lueli basi oylọna Mose, bọ e lẹzun apadewhe whẹndo lọ tọn. Oyà he e ko ji lẹ ma hẹn ẹn gbọṣi adi mẹ gba; mọjanwẹ yé ma glọnalina ẹn sọn pinplọn nado diọadana aliho gbẹninọ etọn tọn sọgbe hẹ lẹdo yọyọ he mẹ e tin te todin mẹ. Ojlo etọn nado wà ojlo Jehovah tọn ma depò gbede. To owhe 40 gblamẹ, ehe whenu e penukundo lẹngbọ Lueli tọn lẹ go, wlealọ hẹ Zipola, bo pọ́n visunnu etọn lẹ go whẹ́n te, Mose wleawuna bo hẹn jẹhẹnu he mí wá yí do yọnẹn na lọ pọnte. Mọwẹ, Mose plọn walọmimiọn gbọn akọndidona yajiji dali.—Eksọdusi 2:16-22; Owalọ lẹ 7:29, 30.
14. Basi zẹẹmẹ nude he jọ to nukọntọ-yinyin Mose tọn do Islaeli ji whenu he do walọmimiọn etọn hia.
14 To whenuena Jehovah de e taidi nukọntọ akọta Islaeli tọn godo, walọmimiọn Mose tọn gbẹ́ sọawuhia. Dẹpẹ de jẹwhẹ na Mose dọ Ẹldadi po Mẹdadi po to nuyiwa taidi yẹwhegán to osla lọ mẹ—dile etlẹ yindọ yé ma tin to finẹ to whenuena Jehovah kọ̀n gbigbọ etọn jẹgbonu do sunnu mẹho 70 ji nado gọalọna Mose. Jọṣua dọmọ: “Klunọ ṣie Mose, kọ́ na yé!” Mose gblọn po ogbè dẹẹdẹ po dọmọ: “Hiẹ yin awuwhànnọ na ṣie tọn wutu? Jiwheyẹwhe do jlo dọ omẹ OKLUNỌ lọ tọn lẹpo wẹ yẹwhegán, dọ OKLUNỌ lọ do yí gbigbọ etọn do yé ji!” (Osọha lẹ 11:26-29) Walọmimiọn gọalọ nado didẹ̀ ninọmẹ sinsinyẹn enẹ.
15. Dile etlẹ yindọ Mose yin mapenọ, naegbọn apajlẹ etọn dona yin hihodo?
15 E taidi dọ Mose gboawupo to walọmimiọn didohia mẹ to nujijọ de mẹ. To Mẹliba, sẹpọ Kadeṣi, e gboawupo nado pagigona Jehovah, Mẹhe wà azọ́njiawu lọ. (Osọha lẹ 20:1, 9-13) Dile etlẹ yindọ Mose yin mapenọ, yise mawhango etọn gọalọna ẹn to gbẹzan etọn lẹpo mẹ, podọ walọmimiọn ayidego tọn etọn tlẹ nọ whàn mí tlala to egbehe.—Heblu lẹ 11:23-28.
Fifiẹ po Walọmimiọn Po
16, 17. Avase tẹwẹ mí mọyi sọn kandai Nabali po Abigaili tọn po mẹ?
16 Apajlẹ avase tọn de sọawuhia to ojlẹ Davidi tọn mẹ, yèdọ whenu vude to okú Samuẹli, yẹwhegán Jiwheyẹwhe tọn godo. E bẹ asu po asi po de, yèdọ Nabali po asi etọn, Abigaili po hẹn. Lehe omẹ awe ehelẹ gbọnvo tlala do yede do sọ! Abigaili tindo “wuntuntun dagbe” to whenuena asu etọn yin ‘fifiẹtọ bosọ tindo walọ ylankan lẹ.’ Nabali gbọn kanyinylan dali gbẹ́ nado wleawu kọfanamẹ tọn na omẹ Davidi tọn lẹ, he ko gọalọ nado họ́ apó daho Nabali tọn sọn alọ ajotọ lẹ tọn mẹ. Po homẹgble dodo tọn po, Davidi po delẹ to sunnu etọn lẹ mẹ po blá ohí yetọn lẹ do ogo bo wle ali nado tọ́nawhàn Nabali.—1 Samuẹli 25:2-13.
17 To whenuena Abigaili se nuhe ko jọ, e wleawuna akla, ovẹn, olàn, po akla ovẹn-sinsẹ́n po ovotin tọn lẹ po to niyaniya mẹ bo tọ́n yì nado pé Davidi. E vẹvẹna ẹn dọmọ: “To oji e, klunọ ṣie, to oji e ylanwiwa lọ ni te: bo gbọ deviyọnnu towe, yẹn vẹ̀ we, ni dọho to otó towe lẹ mẹ, bosọ se ohó deviyọnnu towe tọn lẹ.” Ovẹvivẹ ogbè dẹẹdẹ Abigaili tọn miọnhomẹna Davidi. To zẹẹmẹ Abigaili tọn sise godo, Davidi dọmọ: “Donanọ OKLUNỌ yin, Jiwheyẹwhe Islaeli tọn, he do we hlan to egbé nado pé mi: donanọ nuyọnẹn towe ni yin, donanọ hiẹ ni yin, he ko glọn mi to egbé sọn [hùnhọ́dudu] mẹ.” (1 Samuẹli 25:18, 24, 32, 33) Yigodo-yinukọn, fifiẹ Nabali tọn dekọtọn do okú etọn mẹ. Jẹhẹnu dagbe Abigaili tọn lẹ hẹn ayajẹ wá na ẹn to godo mẹ nado lẹzun asi Davidi tọn. Walọmimiọn etọn ze apajlẹ de dai na mẹhe to Jehovah sẹ̀n to egbehe lẹpo.—1 Samuẹli 25:36-42.
Doafọna Walọmimiọn
18, 19. (a) Diọdo tẹlẹ wẹ nọ sọawuhia dile mí ze walọmimiọn do ogo? (b) Etẹwẹ sọgan gọalọna mí nado gbeje mídelẹ pọ́n ganji?
18 E họnwun todin dọ dandannu wẹ e yin nado tindo walọmimiọn. Jẹhẹnu de wẹ he hugan dẹdẹwiwa poun; jijọ mẹdọndogo he nọ miọnhomẹna mẹdevo lẹ wẹ e yin. Mí sọgan ko tindo aṣa lọ dai nado nọ dọho bo yinuwa po kanyinylan po. Ṣigba, to nugbo Biblu tọn pinplọn godo, mí ko diọ bo lẹzun mẹhe jọmẹ dogọ. Paulu dọho gando diọdo ehe go to whenuena e dotuhomẹna Klistiani hatọ lẹ dọmọ: “Mì ze lẹblanu homẹ tọn, dagbewà, hùwhẹ, walọmimiọn, po linsinsinyẹn po dogo.” (Kọlọsinu lẹ 3:12) Biblu yí wunmẹdidiọ ehe jlẹdo diọdo gbekanlin ylankan lẹ tọn go—ohla, opọ̀, kinnikinni, beali, po amàpoe po—zun whékanlin jijọhonọ lẹ—lẹngbọvu, gbọgbọẹvu, oyìnvu po oyìnsi po. (Isaia 11:6-9; 65:25) Diọdo gbẹtọ-yinyin tọn mọnkọtọn lẹ yin ayidego tọn sọmọ bọ yé nọ hẹn awuji mẹhe to mí pọ́n lẹ. Ṣigba, míwlẹ yọnẹn dọ diọdo ehelẹ nọ yin bibasi to nuyiwa gbigbọ wiwe Jiwheyẹwhe tọn tọn glọ, na walọmimiọn tin to sinsẹ́n ayidego tọn etọn lẹ mẹ wutu.
19 Be ehe zẹẹmẹdo dọ eyin mí ko basi diọdo he jẹ lẹ bo klan mídelẹ do wiwe na Jehovah, mí ma dona to vivẹnudo zọnmii nado yin walọmimiọnnọ ba wẹ ya? Paali. Di apajlẹ, avọ̀ yọyọ lẹ dona yin nukunpedego whẹwhẹ nado hẹn yé gbọṣi wiweji bo yọ́npọ́n. Dogbapọnna Ohó Jiwheyẹwhe tọn po ayihamẹlinlẹnpọn do apajlẹ he e bẹhẹn lẹ po ji na gọalọna mí nado nọ vọ́ mídelẹ gbeje pọ́n. Etẹwẹ mẹpọnnu Ohó gbọdo Jiwheyẹwhe tọn dohia gando gowe?—Jakobu 1:23-25.
20. Nawẹ mí sọgan tindo kọdetọn dagbe to walọmimiọn didohia mẹ gbọn?
20 Jijọ lẹ gbọnvo to jọwamọ-liho. E nọ bọawu na devizọnwatọ Jiwheyẹwhe tọn delẹ nado do walọmimiọn hia hugan mẹdevo lẹ. Etomọṣo, Klistiani lẹpo dona wleawuna sinsẹ́n gbigbọ Jiwheyẹwhe tọn, he bẹ walọmimiọn hẹn. Paulu yí owanyi do dotuhomẹna Timoti dọmọ: “Nọ [doafọna] dodo, jijọ-di-Jiwheyẹwhe, yise, owanyi, homẹfa, walọmimiọn.” (1 Timoti 6:11) Hogbe lọ ‘doafọna’ dohia dọ e bẹ vivẹnudido hẹn. Lẹdogbedevomẹ Biblu tọn de diọ tudohomẹnamẹ ehe do ‘magbe nado wà ẹ.’ (New Testament in Modern English, gbọn J. B. Phillips dali) Eyin hiẹ dovivẹnu nado lẹnayihamẹpọn do apajlẹ dagbe he tin to Ohó Jiwheyẹwhe tọn mẹ lẹ ji, yé sọgan gbọṣi ayiha towe mẹ, taidi dọ yé yin didó do e mẹ wẹ. Yé na diọ we bo deanana we.—Jakobu 1:21.
21. (a) Naegbọn mí dona doafọna walọmimiọn? (b) Etẹwẹ na yin hodọdeji to hosọ he bọdego mẹ?
21 Lehe mí nọ yinuwa hẹ mẹdevo lẹ do nọ do obá he walọmimiọn mítọn yinukọn jẹ hia. “Mẹnu wẹ nuyọnẹntọ zìnzìntọ to mì mẹ?” wẹ devi Jakobu kanse. “Mì gbọ ni yí azọ́n etọn hia po walọmimiọn nuyọnẹn tọn po gbọn walọ dagbe dali.” (Jakobu 3:13) Nawẹ mí sọgan do jẹhẹnu Klistiani tọn ehe hia to whégbè, to lizọnyizọn Klistiani tọn mẹ, podọ to agun mẹ gbọn? Hosọ he bọdego wleawuna anademẹ alọgọnamẹ tọn lẹ.
Dogbapọn
• Etẹwẹ hiẹ plọn gando walọmimiọn go sọn apajlẹ
• Jehovah?
• Jesu?
• Mose?
• Abigaili tọn mẹ?
• Naegbọn mí dona doafọna walọmimiọn?
[Yẹdide to weda 16]
Naegbọn Jehovah yí nukundagbe do pọ́n avọ́nunina Abẹli tọn?
[Yẹdide to weda 17]
Jesu dohia dọ walọmimiọn po whiwhẹ po nọ yì afọsu-afọsi
[Yẹdide to weda 18]
Mose ze apajlẹ dagbe walọmimiọn tọn dai