“Mẹnu Wẹ Nuyọnẹntọ Zinzintọ to Mì Mẹ?”
“Mẹnu wẹ nuyọnẹntọ zinzintọ to mì mẹ? Mì gbọ ni yí azọ́n etọn hia po walọmimiọn nuyọnẹn tọn po gbọn walọ dagbe dali.”—JAK. 3:13.
1, 2. Etẹwẹ mí sọgan dọ gando susu mẹhe nọ yin pinpọnhlan taidi nuyọnẹntọ lẹ tọn go?
MẸNU wẹ hiẹ nọ pọnhlan taidi nuyọnẹntọ? Vlavo mẹjitọ towe lẹ, mẹhomẹ de, kavi mẹplọntọ wehọmẹ daho tọn de. Lẹdo po ninọmẹ he mẹ hiẹ wá sọn po sọgan yinuwado pọndohlan towe ji gando mẹhe a nọ pọnhlan taidi nuyọnẹntọ go. Ṣigba pọndohlan Jiwheyẹwhe tọn wẹ nọ duahunmẹna devizọnwatọ etọn lẹ jẹnukọn.
2 E ma yin mẹhe aihọn nọ pọnhlan taidi nuyọnẹntọ lẹpo wẹ yọnnuin to nukun Jiwheyẹwhe tọn mẹ. Di apajlẹ, Job dọho hẹ mẹdelẹ he nọ mọ yede taidi mẹhe to ohó nuyọnẹn tọn lẹ dọ, ṣigba e wá tadona lọ kọ̀n dọmọ: “Yẹn ma mọ omẹ nuyọnẹntọ de to mì ṣẹnṣẹn gba.” (Job 17:10) Gando mẹhe gbẹ́ oyọnẹn Jiwheyẹwhe tọn dai delẹ go, apọsteli Paulu wlan dọmọ: “Yiylọ yede nuyọnẹntọ, yé lẹzun nulunọ.” (Lom. 1:22) Podọ gbọn yẹwhegán Isaia gblamẹ, Jehovah lọsu zinnudeji dọmọ: “Dindọn wẹ na yé he yin nuyọnẹntọ to nukun yede tọn mẹ.”—Isa. 5:21.
3, 4. Whẹpo mẹde nido yin nuyọnẹntọ nugbonugbo, etẹwẹ e dona wà?
3 E họnwun dọ, mí dona yọ́n nuhe nọ hẹn mẹde zun nuyọnẹntọ nugbonugbo bo nọ hẹn ẹn penugo nado mọ nukundagbe Jiwheyẹwhe tọn. Howhinwhẹn lẹ 9:10 na mí nukunnumọjẹnumẹ ehe dọmọ: “Osi OKLUNỌ tọn wẹ dòdó nuyọnẹn tọn: nuyọnẹn Wiwenọ Dopo lọ tọn wẹ zinzin.” Mẹhe yin nuyọnẹntọ dona nọ dibusi Jiwheyẹwhe to aliho he sọgbe mẹ bo tindo sisi na nujinọtedo etọn lẹ. Ṣigba, e ma ko pé nado yigbe poun dọ Jiwheyẹwhe tin podọ e tindo nujinọtedo lẹ gba. Devi Jakobu hẹn mí lẹnnupọndo ehe ji. (Hia Jakobu 3:13.) Doayi hogbe ehelẹ go: “Mì gbọ ni yí azọ́n etọn hia . . . gbọn walọ dagbe dali.” Nuyọnẹn nugbo dona nọ sọawuhia to nuwiwa po hodidọ mítọn egbesọegbesọ tọn lẹ po mẹ.
4 Nuyọnẹn nugbo nọ bẹ lẹnpọn dagbenọ-yinyin hẹn gọna oyọnẹn po nukunnumọjẹnumẹ po yiyizan to aliho dagbe mẹ. Nuyiwa tẹlẹ wẹ na dohia dọ mí tindo nuyọnẹn mọnkọtọn? Jakobu slẹ onú delẹ he na nọ sọawuhia to nuyiwa mẹhe yin nuyọnẹntọ lẹ tọn mẹ.a Etẹwẹ e dọ he sọgan gọalọna mí nado tindo haṣinṣan dagbe hẹ yisenọ hatọ lẹ podọ hẹ mẹdevo lẹ to gbonu agun lọ tọn?
Nuyiwa lẹ Wẹ Nọ Do Mẹhe Yọnnuin Nugbonugbo Hia
5. Nawẹ mẹhe yin nuyọnẹntọ nugbonugbo nọ yinuwa gbọn?
5 E jẹ nado vọ́ nùzindeji dọ Jakobu do kanṣiṣa hia to nuyọnẹn po walọ dagbe po ṣẹnṣẹn. Na budisi Jehovah wẹ dòdó nuyọnẹn tọn wutu, mẹhe yin nuyọnẹntọ nọ dovivẹnu nado yinuwa to kọndopọ mẹ hẹ aliho po nujinọtedo Jiwheyẹwhe tọn lẹ po. Mí ma nọ yin jiji po nuyọnẹn he sọn aga po gba. Etomọṣo, mí sọgan wleawuna ẹn gbọn Biblu pinplọn po ayihamẹlinlẹnpọn to gbesisọ mẹ po dali. Ehelẹ na gọalọna mí nado yinuwa sọgbe hẹ tudohomẹnamẹ Efesunu lẹ 5:1 tọn dọmọ: “Mì yin mẹhodotọ Jiwheyẹwhe tọn.” Lehe mí to apajlẹ jẹhẹnu Jehovah tọn lẹ tọn hodo sọ, mọ wẹ mí na do nuyọnẹn hia to nuyiwa mítọn lẹ mẹ do niyẹn. Aliho Jehovah tọn lẹ yiaga tlala hú gbẹtọvi lẹ tọn. (Isa. 55:8, 9) Enẹwutu, dile mí to apajlẹ aliho nuyiwa Jehovah tọn hodo, gbonutọ lẹ na mọdọ mí gbọnvo.
6. Naegbọn walọmimiọn nọ do mẹde hia taidi mẹhe to apajlẹ Jiwheyẹwhe tọn hodo, podọ etẹwẹ jẹhẹnu ehe bẹhẹn?
6 Jakobu dohia dọ aliho dopo nado hodo apajlẹ Jehovah tọn wẹ nado tindo “walọmimiọn nuyọnẹn tọn.” Dile etlẹ yindọ walọmimiọn nọ bẹ dẹdẹwiwa hẹn, to ojlẹ dopolọ mẹ Klistiani de sọgan yin nujikudonọ to walọ dagbe mẹ, ehe nọ gọalọna ẹn nado yinuwa po jlẹkajininọ po. Mahopọnna dọ huhlọn Jiwheyẹwhe tọn ma tindo dogbó, ewọ yin walọmimiọnnọ, podọ mí ma nọ dibu nado dọnsẹpọ ẹ. Ovi Jiwheyẹwhe tọn do walọmimiọn Otọ́ etọn tọn hia sọmọ bọ e sọgan dọmọ: “Mì wá dè e, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì. Mì yí zẹgẹ ṣie do okọ̀ mìtọn, na mì nisọ plọn nupinplọn ṣie: na homẹmimiọnnọ podọ ayiha whiwhẹnọ wẹ yẹn: mì nasọ mọ gbọjẹ hlan alindọn mìtọn lẹ.”—Mat. 11:28, 29; Flp. 2:5-8.
7. Naegbọn mí sọgan dlẹnalọdo Mose taidi apajlẹ dagbe walọmimiọn tọn?
7 Biblu donù mẹdevo lẹ go he ze apajlẹ dagbe dai to walọmimiọn kavi homẹmimiọn mẹ. Dopo to yé mẹ wẹ Mose. E tindo azọngban susu, ṣogan e yin alọdlẹndo taidi “homẹmimiọnnọ tlala hú mẹhe tin to nukunmẹ aigba lọ tọn ji lẹpo.” (Osọha 11:29; 12:3) Sọ flin huhlọn he Jehovah na Mose nado hẹn ojlo Etọn di. Homẹ Jehovah tọn nọ hùn nado yí walọmimiọnnọ lẹ zan nado hẹn lẹndai etọn di.
8. Nawẹ gbẹtọvi mapenọ lẹ sọgan do “walọmimiọn nuyọnẹn tọn” hia gbọn?
8 E họnwun dọ, e yọnbasi na gbẹtọvi mapenọ lẹ nado do “walọmimiọn nuyọnẹn tọn” hia. Míwlẹ lo? Nawẹ mí sọgan yinukọn to jẹhẹnu ehe didohia mẹ gbọn? Walọmimiọn yin apadewhe sinsẹ́n gbigbọ wiwe Jehovah tọn. (Gal. 5:22, 23) Mí sọgan biọ gbigbọ etọn to odẹ̀ mẹ bo dovivẹnu vẹkuvẹku nado do sinsẹ́n etọn hia, bosọ deji dọ Jiwheyẹwhe na gọalọna mí nado yinukọn to walọmimiọn didohia mẹ. Jidenamẹ psalm-kàntọ lọ tọn nọ whàn mí nado wàmọ. E dọmọ: “Homẹmimiọnnọ wẹ [Jiwheyẹwhe] nasọ plọn ali etọn.”—Ps. 25:9.
9, 10. Vivẹnu tẹwẹ mí dona do nado sọgan do walọmimiọn Jiwheyẹwhe tọn nkọ hia, podọ etẹwutu?
9 Etomọṣo, e sọgan biọ vivẹnu vẹkuvẹku nado yinukọn to adà ehe mẹ. Na oplọn he mí mọyi wutu, delẹ to mí mẹ sọgan nọma tindo ayilinlẹn lọ nado nọ do walọmimiọn hia. Humọ, mẹhe lẹdo mí pé lẹ tlẹ sọgan nọ na tuli pọndohlan devo pete bo nọ dọ dọ, “A wà na mi, n’na wà na we.” Ṣigba, be ehe do nuyọnẹn hia nugbonugbo ya? Eyin ofi pẹvi de wle miyọ́n to owhé towe gbè, be amì wẹ a na do ṣí ì ya kavi osin fifá? Amì kinkọ̀n do miyọ́n mẹ na hẹn ninọmẹ lọ vantan, to whenuena e yọnbasi dọ osin fifá na didẹ nuhahun lọ. To aliho dopolọ mẹ, Biblu na mí ayinamẹ dọmọ: “Hogbe dẹẹdẹ nọ lẹ́ homẹgble sẹ̀: ṣigba ohó sinsinyẹn wẹ nọ fọ́n homẹgble daga.” (Howh. 15:1, 18) Whedevonu he homẹgble na fọ́n, vlavo to agun mẹ kavi to fidevo, be e ma na yọ́n hugan nado do nuyọnẹn nugbo hia gbọn nuyiwa po walọmimiọn po dali ya?—2 Tim. 2:24.
10 Dile e yin nùdego do to aga, susu mẹhe ji gbigbọ aihọn tọn nọ yinuwado lẹ tọn wẹ ma nọ do yede hia taidi dẹẹdẹwàtọ, jijọhonọ, podọ omẹ abọẹ-abọẹ. Kakatimọ, gbẹtọ fifiẹtọ po goyitọ lẹ po wẹ mí nọ mọ hugan. Jakobu yọ́n ehe, podọ e na avase delẹ na gbigbọ enẹ nikaa bẹpla hagbẹ agun lọ tọn lẹ. Onú devo tẹlẹ wẹ mí sọgan plọn sọn ayinamẹ he e na lọ mẹ?
Jijọ Mẹhe Ma Yin Nuyọnẹntọ Tọn Lẹ
11. Jijọ tẹlẹ wẹ jẹagọdo nuyọnẹn he sọn aga?
11 Jakobu dọho madoadúdẹji gando jijọ delẹ go he jẹagọdo nuyọnẹn he sọn aga lọ. (Hia Jakobu 3:14.) Awuwhàn po avùn po yin jijọ agbasalan tọn lẹ, e ma yin gbigbọmẹ tọn gba. Pọ́n apajlẹ dopo he do nuhe nulẹnpọn to agbasa-liho nọ hẹnwa hia. Pipli mẹhe ylọ yede dọ Klistiani lẹ tọn ṣidopo wẹ nọ deanana adà voovo Ṣọṣi Yọwhé Wiwe lọ tọn to Jelusalẹm, ehe mẹsusu lẹndọ e yin gbigbá do fie Jesu yin hùhù bosọ yin didi do. Nudindọn ma hán to pipli ehelẹ ṣẹnṣẹn pọ́n gbede. To 2006, linlinwe lọ Time dọho gando ninọmẹ he ko wá aimẹ hoho de go, whenuena yẹwhenọ pamẹnọtọ he tin to finẹ lẹ “dọjlẹ na ganhiho susu, . . . bo yí zògbántin daho he ji vẹla nọ yin zizedo lẹ do to nuli ode awetọ yetọn.” Jimadedomẹgo sinyẹn to ṣẹnṣẹn yetọn sọmọ bọ Malenu de wẹ họnhungan ṣọṣi lọ tọn yin zizedo alọmẹ na.
12. Etẹwẹ sọgan jọ eyin mí ma nọ yinuwa po nuyọnẹn po?
12 E họnwun dọ nudindọn zẹjlẹgo mọnkọtọn lẹ ma dona tin to agun nugbo Klistiani tọn mẹ. Etomọṣo, to whedelẹnu mape ko hẹn mẹdelẹ nado nọ tẹdo pọndohlan yetọn titi lẹ go. Enẹ sọgan hẹn wiwọ́ po nudindọn po wá jẹ obá de mẹ. Apọsteli Paulu doayi ehe go to agun Kọlinti tọn mẹ, enẹwutu e wlan dọmọ: “Na sọle nuvẹun, po wiwọ́ po, po kinklan po tin to mì ṣẹnṣẹn, be mì ma to agbasanọ yin; bosọ to zọnlinzin di gbẹtọ tọn?” (1 Kọl. 3:3) Ninọmẹ blawu enẹ nọ̀ aimẹ to agun owhe kanweko tintan tọn ehe mẹ na ojlẹ de. Enẹwutu, mí dona tin to aṣeji na gbigbọ mọnkọtọn nikaa biọ agun de mẹ to egbehe.
13, 14. Na apajlẹ delẹ gando lehe nulinlẹnpọn to agbasa-liho sọgan sọawuhia do go.
13 Nawẹ gbigbọ mọnkọtọn sọgan lìn biọ agun de mẹ gbọn? E sọgan bẹjẹeji sọn onú flinflin delẹ ji. Di apajlẹ, to whenuena Plitẹnhọ Ahọluduta tọn de to yinyin gbigbá, gbemanọpọ lẹ sọgan fọ́n gando lehe nulẹ dona yin wiwà do go. Mẹmẹsunnu de sọgan jẹ núdọ̀n ji eyin pọndohlan etọn ma yin alọkẹyi, podọ e sọgan jẹ homọdọdo nudide he yin bibasi lẹ go ji. E tlẹ sọgan gbẹ́ ma nado doalọ nudepope go to họgbigbá lọ mẹ ba! Mẹhe to nuyiwa to aliho mọnkọtọn mẹ na dohia dọ e ko wọnji dọ wadotana azọ́n de tọn to agun lọ mẹ nọ saba sinai do gbigbọ jijọho tọn ji hugan aliho tangan he mẹ azọ́n lọ yin wiwà te. Gbigbọ walọmimiọn tọn wẹ Jehovah na dona, e ma na dona nudindọn gbede.—1 Tim. 6:4, 5.
14 Apajlẹ devo die. To agun de mẹ, mẹho lẹ sọgan mọdọ dile etlẹ yindọ mẹho agun tọn de ko sẹ̀n na owhe susu, e họnwun todin dọ e masọ jẹ nubiọtomẹsi Owe-wiwe tọn lẹ kọ̀n ba. To whenuena nugopọntọ lẹdo tọn mọdọ mẹmẹsunnu lọ ko mọ ayinamẹ yí do whẹho enẹ ji to ojlẹ de mẹ wayi ṣogan bo ma basi vọjlado, ewọ lọsu kọngbedopọ dọ e dona yin didesẹ sọn hukan mẹho tọn ji. Nawẹ mẹho enẹ dona yinuwa gbọn? Be e na kẹalọyi tadona he kọ̀n mẹho lẹ wá to pọmẹ po ayinamẹ Owe-wiwe tọn lẹ po to gbigbọ whiwhẹ po walọmimiọn po tọn mẹ bo magbe nado jẹ nubiọtomẹsi Owe-wiwe tọn lẹ kọ̀n nado sọgan sẹ̀n whladopo dogọ to otẹn azọngban tọn enẹ mẹ ya? Kavi be e na gblehomẹ bo na to awuwhàn na lẹblanulọkẹyi enẹ he e hẹnbu wutu wẹ ya? Naegbọn mẹho de na tẹkudeji dọ emi pegan taidi mẹho, to whenuena mẹho he pò lẹpo wá tadona lọ kọ̀n dọ e ma pegan? Lehe e na yin nuyọnẹnnu hugan do sọ nado do whiwhẹ po zinzin po hia!
15. Naegbọn hiẹ lẹndọ ayinamẹ gbọdo Jakobu 3:15, 16 tọn yin nujọnu?
15 Nugbo wẹ dọ, aliho devo lẹ tin he mẹ gbigbọ mọnkọtọn sọgan sọawuhia te. Ṣigba, mahopọnna ninọmẹ depope he sọgan fọ́n, mí dona dovivẹnu nado dapana jijọ enẹlẹ. (Hia Jakobu 3:15, 16.) Devi Jakobu ylọ jijọ mọnkọtọn lẹ dọ “aigbanu” na yé yin agbasalan tọn bo ma sinai do gbigbọnọ-yinyin ji wutu. Yé yin “gbẹtọ tọn” kavi “kanlinjọmẹ tọn, NW” to linlẹn lọ mẹ dọ yé nọ wá sọn ayilinlẹn agbasa tọn lẹ mẹ, taidi jijọ nudida he ma nọ lẹnnupọn lẹ tọn. Jijọ enẹlẹ yin “aovi tọn” na yé nọ do ayilinlẹn kẹntọ mayinukundomọ Jiwheyẹwhe tọn lẹ tọn hia. Lehe e na ylan do sọ dọ Klistiani de ni do jijọ mọnkọtọn lẹ hia!
16. Diọdo tẹlẹ wẹ e sọgan biọ dọ mí ni basi, podọ nawẹ mí sọgan wàmọ po kọdetọn dagbe po gbọn?
16 Dopodopo hagbẹ agun lọ tọn lẹ tọn na wadagbe nado gbeje ede pọ́n bo dovivẹnu nado de jijọ enẹlẹ sẹ̀ sọn ahun etọn mẹ. Taidi mẹplọntọ lẹ to agun mẹ, nugopọntọ lẹ dona hẹn do ayiha mẹ dọ dandannu wẹ e yin na yé nado yí yede sọn jijọ ylankan lẹ si. E ma nọ bọawu nado wà ehe po kọdetọn dagbe po na mapenọ-yinyin mítọn po nuyiwadomẹji aihọn ehe tọn po wutu. Mọwiwà sọgan yin yiyijlẹdo vivẹnudido nado hẹ́ pópló he gọ́ na ogbọ̀n bosọ dídí de ji go. Eyin mí ma mọ nuhe go mí na tẹdo, mí na dídí wádò poun wẹ. Ṣigba, eyin mí tẹdo ayinamẹ Biblu tọn lẹ go gligli, bo kẹalọyi alọgọ he agun Jiwheyẹwhe tọn to awuwlena lẹdo aihọn pé, mí na penugo nado zindonukọn.—Ps. 73:23, 24.
Jẹhẹnu He Nuyọnẹntọ Nọ Tẹnpọn Nado Dohia Lẹ
17. Nawẹ mẹhe yin nuyọnẹntọ nọ saba yinuwa gbọn to whenuena e yin whiwhlepọn nado wà oylan?
17 Hia Jakobu 3:17. Dogbigbapọnna delẹ to jẹhẹnu he nọ wá sọn “nuyọnẹn he sọn aga” didohia mẹ lẹ mẹ sọgan hẹn ale wá na mí. Nado yin wiwe zẹẹmẹdo nado yin madoblọnọ to nuyiwa po mẹwhinwhàn mítọn lẹ po mẹ. Mí dona nọ gbẹ́ oylan dai to afọdopolọji. Mọwiwà dona lẹzun jọwamọnu de na mí. Vlavo mẹde ko dibla sọalọ nukun na we pọ́n to mayọnẹn mẹ. Matin ayihaawe, hiẹ vì nado de ota towe sẹ̀ kavi a wle alọ mẹlọ tọn hẹn to afọdopolọji. Jọwamọnu wẹ; e ma biọ dọ a ni lẹnnupọn whẹ́. Mọ wẹ e dona yin to whenuena mí yin whiwhlepọn nado wà oylan. Wiwenọ-yinyin po ayihadawhẹnamẹnu mítọn he yin pinplọn gbọn Biblu dali po dona nọ whàn mí to jọwamọ-liho nado gbẹ́ oylan dai. (Lom. 12:9) Biblu na mí apajlẹ mẹhe yinuwa to aliho mọnkọtọn mẹ lẹ tọn, taidi Josẹfu po Jesu po.—Gẹn. 39:7-9; Mat. 4:8-10.
18. Etẹwẹ e zẹẹmẹdo nado yin (a) jijọhonọ? (b) jijọho-dintọ?
18 Nuyọnẹn Jiwheyẹwhe tọn sọ nọ biọ dọ mí ni yin jijọhonọ. Ehe zẹẹmẹdo dọ mí dona nọ dapana adánwiwà, avùn-didadai kavi nuyiwa he ma yin jijọho tọn lẹ. Jakobu basi zẹẹmẹ yinukọn do nuagokun ehe ji to whenuena e dọmọ: “Sinsẹ́n dodo tọn wẹ yè to didó to jijọho mẹ gbọn yé he to jijọho basi lẹ dali.” (Jak. 3:18) Doayi hogbe lọ “to jijọho basi” go. To agun mẹ, be mí yin yinyọnẹn taidi jijọho-dintọ kavi taidi mẹhe nọ hẹn jijọho he tin to mẹmẹsunnu lẹ ṣẹnṣẹn gble wẹ ya? Be mí nọ saba tindo wiwọ́ kavi gbemanọpọ hẹ mẹdevo lẹ na mí nọ yawu gblehomẹ kavi hẹn mẹdevo lẹ gblehomẹ wutu wẹ ya? Be mí nọ tẹkudeji dọ mẹdevo lẹ dona yí mí dole mí te do wẹ, kavi mí nọ gbọn whiwhẹ dali dovivẹnu nado duto jijọ mítọn he ma sọgbe bo nọ dotukla mẹdevo lẹ ji? Be mí yin yinyọnẹn taidi mẹhe nọ dovivẹnu to whepoponu nado dín jijọho, bo nọ yawu jonamẹ bosọ nọ wọnji nuṣiwa lẹ go? Mẹdetiti gbigbejepọn po ahundopo po sọgan gọalọna mí nado yọnẹn eyin mí dona dovivẹnu dogọ nado do nuyọnẹn Jiwheyẹwhe tọn hia to adà ehe mẹ.
19. Nawẹ mẹde nọ wá yin yinyọnẹn taidi lẹnpọn dagbenọ gbọn?
19 Jakobu yí dẹdẹwiwa kavi lẹnpọn dagbenọ-yinyin dogọ zẹẹmẹ etọn gando nuhe nọ do nuyọnẹn he sọn aga hia lẹ go. Be mí yin yinyọnẹn taidi mẹhe nọ saba joawuna mẹdevo lẹ to whenuena whẹho lọ ma tùnafọ nunọwhinnusẹ́n Owe-wiwe tọn de ji, bo ma nọ yawu tẹkudeji dọ nujinọtedo mítọn lẹ wẹ dona yin hihodo ya? Be mẹdevo lẹ yọ́n mí taidi mẹhe nọ wà dẹẹdẹ bọ e sọ bọawu nado dọho hẹ ya? Ehelẹ nọ dohia dọ mí ko plọn nado yin lẹnpọn dagbenọ.
20. Etẹwẹ na yin kọdetọn lọ eyin mí do jẹhẹnu Jiwheyẹwhe tọn nkọ he yin hodọdeji to hosọ ehe mẹ lẹ hia?
20 Lehe ayajẹ na tin to agun de mẹ do sọ dile mẹmẹsunnu po mẹmẹyọnnu lẹ po fọ́n bo to vivẹnudo nado do jẹhẹnu Jiwheyẹwhe tọn nkọ he Jakobu donù e go lẹ hia! (Ps. 133:1-3) Matin ayihaawe, walọmimiọn, jijọho dindin po lẹnpọn dagbenọ-yinyin po to nuyiwa hẹ ode awetọ mẹ na hẹn haṣinṣan mítọn lẹ pọnte bo nasọ dohia dọ mí tindo “nuyọnẹn he sọn aga.” To hosọ he bọdego mẹ, mí na mọ lehe pinplọn nado nọ pọ́n mẹdevo lẹ dile Jehovah nọ wà do sọgan gọalọna mí gbọn to adà ehe mẹ.
[Nudọnamẹ odò tọn]
a Lẹdo hodidọ lọ tọn dohia dọ sunnu mẹho kavi “mẹplọntọ” agun lọ tọn lẹ wẹ Jakobu tindo to linlẹn mẹ jẹnukọn. (Jak. 3:1) Nugbo wẹ dọ sunnu ehelẹ dona nọ ze apajlẹ dagbe dai to nuyọnẹn he sọn aga lọ didohia mẹ, etomọṣo mímẹpo wẹ sọgan plọnnu sọn ayinamẹ Jakobu tọn mẹ.
Be Hiẹ Sọgan Na Gblọndo Ya?
• Etẹwẹ nọ hẹn Klistiani de zun nuyọnẹntọ nugbonugbo?
• Nawẹ mí sọgan yinukọn to nuyọnẹn he sọn aga didohia mẹ gbọn?
• Jijọ tẹlẹ wẹ mẹhe ma nọ do “nuyọnẹn he sọn aga” hia lẹ nọ tindo?
• Jẹhẹnu tẹlẹ wẹ hiẹ magbe nado wleawuna dogọ?
[Yẹdide to weda 23]
Nawẹ nudindọn sọgan lìn biọ agun mẹ to egbehe gbọn?
[Yẹdide to weda 24]
Be e ko lẹzun jọwamọnu na we nado nọ gbẹ́ oylan dai ya?