“Mí Sẹpọ Jiwheyẹwhe, Ewọ Nasọ Sẹpọ Mí”
Jẹnukọnna Biblu Pinplọn Podọ to Enẹgodo—Gbẹzan Ylankan He Ko Wayi, Sọgodo Dagbe De
“OHÓ JIWHEYẸWHE TỌN tin to ogbẹ̀, e dohuhlọn, bo dá hú ohí nuawenọ . . . ewọ sọ wẹ linlẹn ayiha tọn po ojlo ayiha tọn po yọnẹntọ.” (Heblu lẹ 4:12) Nuhe apọsteli Paulu dọ gando huhlọn nuyiwadomẹji owẹ̀n Jiwheyẹwhe tọn go niyẹn. Nugopipe etọn nado biọ ahun mẹ họnwun taun to owhe kanweko tintan W.M. Mahopọnna nuyiwadomẹji ylankan ojlẹ enẹ tọn lẹ, mẹhe lẹzun Klistiani lẹ ze gbẹtọ-yinyin yọyọ lọ dogo.—Lomunu lẹ 1:28, 29; Kọlọsinu lẹ 3:8-10.
Huhlọn mẹdidiọ tọn he ohó Jiwheyẹwhe tọn tindo, dile Biblu basi kandai etọn do, sọ họnwun to egbehe lọsu ga. Di apajlẹ, lẹnnupọndo whẹho dawe he tọ́n-alùn de, he nọ yin Richard tọn ji. Na Richard nọ yawu duadi wutu, e nọ hoavùn eyin onú pẹvi tlala de gblehomẹna ẹn. Danuwiwa hẹn gbẹzan etọn gble. Richard tlẹ kọnawudopọ hẹ ogbẹ́ akotokún-yìnyìn tọn de. E plọnazọn sinsinyẹn bo lẹzun akotokún-yìntọ daho hugan Westphalia tọn, to Allemagne. E sọ nọ nùahàn zẹjlẹgo bo nọ saba dà avùn dai. To nujijọ dopo whenu, mẹdopo yin hùhù bọ Richard diblayin zizedo ganpamẹ.
Etẹwẹ dogbọn alọwle Richard tọn dali? E dọmọ: “Whẹpo Heike po yẹn po jẹ Biblu plọn ji, dopodopo mítọn nọ wà nuhe jlo e. Heike nọ yí ojlẹ susu zan hẹ họntọn etọn lẹ, bọ yẹn nọ to vivi ayidedai-yiwanna ṣie lẹ tọn dù—titengbe akotokún-yìnyìn, surfer, po otọ̀-glọ yìyì po.”
To whenuena Richard po Heike po jẹ Biblu plọn ji hẹ Kunnudetọ Jehovah tọn lẹ, linlẹn lọ dọ ewọ dona basi diọdo he sẹhundaga lẹ nado sọgan hẹn gbẹzan etọn wá kọndopọmẹ hẹ nujinọtedo yiaga Ohó Jiwheyẹwhe tọn lẹ gbahundona Richard. Ṣigba, dile e wá yọ́n Jehovah Jiwheyẹwhe ganji, e tindo ojlo sinsinyẹn nado hẹn homẹ etọn hùn. Richard yọnẹn dọ Jiwheyẹwhe ma kẹalọyi mẹhe yiwanna danuwiwa lẹ kavi mẹhe nọ yí i do basi ayidedai lẹ. E plọn dọ: ‘Jehovah gbẹwanna mẹdepope he yiwanna danuwiwa.’—Psalm 11:5.
Humọ, todido gbẹninọ kakadoi to paladisi mẹ to aigba ji tọn fọnjlodotena Richard po Heike po. Yé jlo na tin to finẹ dopọ! (Isaia 65:21-23) Oylọ basinamẹ lọ dọ “mì sẹpọ Jiwheyẹwhe, ewọ nasọ sẹpọ mì,” yinuwado Richard ji tlala. (Jakobu 4:8) E mọ nujọnu-yinyin tonusisena ayinamẹ gbọdo lọ tọn dọmọ: “A hahomẹ awusinyẹnnamẹtọ tọn blo, a sọ de dopo to ali etọn lẹ mẹ blo. Na osùnú de wẹ tasinyẹntọ yin hlan OKLUNỌ: ṣigba aṣli etọn tin dodonọ lẹ dè.”—Howhinwhẹn lẹ 3:31, 32.
Mahopọnna dọ Richard jlo vẹkuvẹku nado diọ aliho etọn lẹ, e yọnẹn dọ emi ma sọgan wàmọ to huhlọn emitọn titi mẹ. E mọdọ emi dona dín alọgọ Jiwheyẹwhe tọn to odẹ̀ mẹ. Enẹwutu e yinuwa sọgbe hẹ hogbe Jesu tọn hlan apọsteli Etọn lẹ dọmọ: ‘Mì nọ hodẹ̀ whepoponu, na mì ma nado biọ whlepọn mẹ. Nugbo, gbigbọ jlo, ṣigba agbasa yin madogánnọ.’—Matiu 26:41.
To pinplọn lehe Jiwheyẹwhe nọ pọ́n danuwiwa po homẹgble po hlan do godo, Richard yin nujikudonọ dọ akotokún-yìnyìn yin aihundida-lanmẹyiya tọn he ma sọgbe. Po alọgọ Jehovah tọn po gọna tulinamẹ mẹhe plọn Biblu hẹ ẹ lẹ tọn, e doalọtena danuwiwa. E jo akotokún-yìnyìn po avùnhiho po do bo de nado hẹn gbẹzan whẹndo etọn tọn pọnte. “Nugbo lọ pinplọn sọn Biblu mẹ ko gọalọna mi nado nọ nọte bo lẹnnupọn whẹpo do yinuwa,” wẹ Richard heyin nugopọntọ walọmimiọnnọ de to agun Kunnudetọ Jehovah tọn lẹ tọn de mẹ todin dọ. E yidogọ dọ: “Nunọwhinnusẹ́n owanyi po sisi po tọn nọ deanana mi todin to haṣinṣan ṣie mẹ hẹ asi po ovi ṣie lẹ po. Taidi kọdetọn de, whẹndo mítọn ko jẹpọ pẹkipẹki todin.”
Mẹhe ma yọ́n Kunnudetọ Jehovah tọn lẹ ganji lẹ ko sawhẹdokọna yé dọ yé nọ gbà whẹndo lẹ kija. Ṣigba, apajlẹ mẹdopodopo lẹ tọn taidi Richard tọn dohia dọ lalo wẹ enẹ yin. Na taun tọn, nugbo Biblu tọn sọgan dekọtọn do jijọho whẹndo tọn po sọgodo dagbe de po mẹ na mẹhe ko tindo gbẹzan ylankan dai lẹ.—Jẹlemia 29:11.
[Nudọnamẹ tangan lẹ to weda 9]
“Todido paladisi aigba ji tọn whàn mi nado diọ”
[Apotin to weda 9]
Nunọwhinnusẹ́n He Yọn-na-Yizan Lẹ
Biblu sọgan yinuwado gbẹzan gbẹtọ lẹ tọn ji taun. Nunọwhinnusẹ́n Owe-wiwe tọn delẹ die he ko gọalọna mẹhe yin danuwatọ dai lẹ nado diọ:
“Ewọ he whleawu nado gblehomẹ, pọnte hú huhlọntọ: ewọ he sọ dugán to gbigbọ etọn ji, hugan ewọ he yanwhàn otò tọn.” (Howhinwhẹn lẹ 16:32) Homẹgble he mayin anadena yin ohia madogán tọn, e mayin huhlọn tọn gba.
“Zinzin gbẹtọ tọn hẹn ẹn whleawu nado gblehomẹ.” (Howhinwhẹn lẹ 19:11) Nado tindo zinzin bo mọnukunnujẹ ninọmẹ de mẹ nọ gọalọ nado mọnú zẹ̀ whẹwhinwhẹ́n nukunta tọn he hẹn nudindọn de wá lẹ go bo sọgan glọnalina homẹgble aplà.
‘A jihọntọn hẹ mẹhe nọ gblehomẹ blo na hiẹ nikaa plọn jijọ etọn lẹ.’ (Howhinwhẹn lẹ 22:24, 25) Po nuyọnẹn po, Klistiani lẹ ma nọ dogbẹ́ hẹ mẹhe nọ yawu gblehomẹ lẹ.