Yin Tenọglinọ, bo Duto Alèwezun Ogbẹ̀ Tọn Ji
EYIN hiẹ dona zingbejizọnlin gbọn ohù he to adán jẹ de ji, tọjihun wunmẹ tẹwẹ a na jlo nado yizan? Be tọjihun pẹvi he ma lodo de wẹ a na jlo kavi bato he sinyẹn, bo lodo ganji de? Matin ayihaawe bato lọ wẹ a na de, na e sọgan pehẹ agbówhẹn sinsinyẹn lẹ po kọdetọn dagbe po.
Dile mí to juju gbọ̀n titonu ylankan he gọ́ na owù ehe mẹ, mí nọ pannukọn avùnnukundiọsọmẹ lẹ. Di dohia, jọja lẹ sọgan tindo numọtolanmẹ bẹwlu po hihọ́ matindo po tọn to whedelẹnu to linlẹn po aṣọdido bẹwlunọ aihọn ehe tọn lẹ po ṣẹnṣẹn. Mẹhe ṣẹṣẹ lẹzun Klistiani lẹ sọgan gọ̀n ma ko lodo. Tenọglinọ he ko yin nugbonọ to sinsẹ̀nzọn Jiwheyẹwhe tọn mẹ na owhe susu delẹ tlẹ sọgan to akọndona whlepọn lẹ na todido yetọn lẹ ma ko yin hinhẹndi mlẹnmlẹn wutu.
Numọtolanmẹ enẹlẹ mayin nuyọyọ gba. Devizọnwatọ nugbonọ Jehovah tọn lẹ, taidi Mose, Job, po Davidi po, tindo numọtolanmẹ ayimajai tọn lẹ to whedelẹnu. (Osọha lẹ 11:14, 15; Job 3:1-4; Psalm 55:4) Etomọṣo, gbẹzan yetọn yin hiadogona gbọn mẹdezejo tenọglinọ hlan Jehovah dali. Apajlẹ dagbe yetọn nọ na mí tuli nado yin tenọglinọ, ṣigba Satani Lẹgba jlo na fẹayiha mítọn sẹ sọn alèwezun ogbẹ̀ madopodo tọn lọ ji. (Luku 22:31) Enẹwutu nawẹ mí sọgan yin tenọglinọ, bo ‘lodo to yise mẹ’ gbọn? (1 Pita 5:9) Podọ nawẹ mí sọgan hẹn yisenọ hatọ mítọn lẹ lodo gbọn?
Jehovah Jlo dọ Mí Ni Yin Tenọglinọ
Eyin mí yin nugbonọ hlan Jehovah, e na nọ gọalọna mí to whepoponu nado hẹn tenọgli mítọn go. Psalm-kàntọ Davidi pannukọn ninọmẹ sinsinyẹn susu, ṣigba e dotudo Jiwheyẹwhe go bo sọgan jihàn dọmọ: “[Jehovah] hẹn mi jẹage sọn odò vivà tọn mẹ, sọn ogbọ̀n mẹ; e yí afọ ṣie do awinyan ji, bosọ hẹn zọnlin ṣie lodo.”—Psalm 40:2.
Jehovah nọ hẹn mí lodo nado “hoavùn dagbe yise tọn” na mí nido sọgan ‘hẹn ogbẹ̀ madopodo go gligli.’ (1 Timoti 6:12) E sọ nọ wleawuna nuhe sọgan gọalọna mí nado lodo bo tọ́nta to awhànfunfun gbigbọmẹ tọn mítọn mẹ lẹ. Apọsteli Paulu na tuli Klistiani hatọ lẹ nado “yin huhlọnnọ to Oklunọ mẹ, podọ to hinhlọn huhlọn etọn tọn mẹ,” bosọ ‘ze gbaja Jiwheyẹwhe tọn lẹpo blá dogo nado sọgan nọte gligli pehẹ bublu Lẹgba tọn lẹ.’ (Efesunu lẹ 6:10-17) Ṣigba etẹlẹ wẹ sọgan hẹn ayimajai wá na mí? Podọ nawẹ mí sọgan nọavunte sọta yé gbọn?
Họ́ Dewe Sọta Nuhe Sọgan Hẹnmẹ Gbọjọ Lẹ
Nuyọnẹnnu wẹ e yin nado flin nuagokun titengbe ehe dọ: Nudide he mí basi lẹ nọ yinuwado dolilo Klistiani tọn mítọn ji to aliho dagbe kavi agọ̀ mẹ. Jọja lẹ nọ pannukọn nudide lẹ taidi agbasazọ́n dide, wehọmẹ yìyì dogọ, po alọwle po. E sọgan biọ dọ mẹhomẹ lẹ ni de vlavo eyin yé na sẹtẹn yì fidevo kavi wà agbasazọ́n dogọ. Mí nọ basi nudide lẹ egbesọegbesọ gando lehe mí na yí ojlẹ mítọn zan do po onú susu devo lẹ po go. Etẹwẹ na gọalọna mí nado basi nudide nuyọnẹn tọn he na hẹn mí lodo dogọ taidi devizọnwatọ Jiwheyẹwhe tọn lẹ? Mẹhe ko yin Klistiani na owhe susu de dọmọ: “Yẹn nọ biọ alọgọ Jehovah tọn to nudide lẹ bibasi mẹ. Yẹn yise dọ nujọnu wẹ e yin nado kẹalọyi ayinamẹ heyin nina to Biblu mẹ, to opli Klistiani tọn lẹ ji, gbọn mẹho lẹ dali, podọ to owe sinai do Biblu ji lẹ mẹ, bo yí yé do yizan mẹ.”
To nudide lẹ bibasi whenu, mí dona nọ kanse míde dọ: ‘Owhe atọ́n kavi ao to nukọnmẹ, be yẹn na gbẹ́ hùnhomẹ do nudide he yẹn to bibasi todin lẹ go, kavi yé na wá vẹna mi wẹ? Be yẹn nọ tẹnpọn nado hẹn ẹn diun dọ nudide ṣie lẹ ma na hẹn mi gbọjọ to gbigbọ-liho ṣigba na hẹn mi yinukọn dogọ to gbigbọmẹ ya?’—Filippinu lẹ 3:16.
Awujijona whlepọn lẹ kavi jijo yede do nado sẹpọ osẹ́n Jiwheyẹwhe tọn lẹ gbigbà kọ̀n ko hẹn mẹhe ko yí baptẹm delẹ nado zan gbẹzan he ma lodo de. Vude to mẹhe ko yin didesẹ sọn agun mẹ na yé yí tasinsinyẹn do doafọna ylanwiwa wutu lẹ ko dovivẹnu nado yin gigọyí, kiki nado yin didesẹ whladopo dogọ—vlavo to ojlẹ kleun de godo—na nuṣiwa dopolọ wutu. Ehe sọgan ko yinmọ na yé ma hodẹ̀ bo biọ alọgọ Jiwheyẹwhe tọn nado ‘gbẹwanna nuhe ylan bo tẹdo dagbe go wutu.’ (Lomunu lẹ 12:9; Psalm 97:10) Mímẹpo dona ‘to ali jijlọ de na afọ mítọn zọnmii.’ (Heblu lẹ 12:13) Enẹwutu mì gbọ mí ni gbadopọnna nuagokun delẹ he sọgan gọalọna mí nado lodo to gbigbọmẹ.
Yin Tenọglinọ Gbọn Nuwiwa Klistiani Tọn Gblamẹ
Aliho dopo nado hẹn jlẹkaji go to alèwezun ogbẹ̀ tọn mẹ wẹ nado tindo nususu nado wà to azọ́n yẹwhehodidọ Ahọluduta tọn mẹ. Mọwẹ, lizọnyizọn Klistiani tọn mítọn yin alọgọ họakuẹ de to ahun po ayiha mítọn po zizedo ojlo Jiwheyẹwhe tọn wiwà ji bo tẹdo ale ogbẹ̀ madopodo tọn go gligli mẹ. Gando ehe go, Paulu na tuli Kọlintinu lẹ dọmọ: “Mẹmẹsunnu mẹyiwanna ṣie emi, mì yin tenọglinọ, masẹafọ, bo nọ to susudeji to azọ́n Oklunọ tọn mẹ whepoponu, sọle mì yọnẹn do dọ tuklajẹ mìtọn mayin ovọ́ to Oklunọ mẹ gba.” (1 Kọlintinu lẹ 15:58) ‘Tenọgli’ zẹẹmẹdo ‘gbigbọṣi otẹn dopo mẹ gligli.’ “Masẹafọ” sọgan zẹẹmẹdo ‘dotẹnmẹ ma jodo na míde nado yin tẹnsẹna.’ Enẹwutu, alọnu hinhẹn ján to lizọnyizọn lọ mẹ sọgan tindo nugandomẹgo mẹhẹnlodo tọn do gbẹzan Klistiani tọn mítọn ji. Alọgigọna mẹdevo lẹ nado yọ́n Jehovah nọ hẹn gbẹzan mítọn tindo zẹẹmẹ bo nọ hẹn mí yin ayajẹnọ.—Owalọ lẹ 20:35.
Pauline, he yin Klistiani de he ko yí hugan owhe 30 zan taidi mẹdehlan podọ to nuwiwa yẹwhehodidọ whenu-gigọ́ tọn devo mẹ, dọmọ: “Hihọ́ de wẹ lizọnyizọn lọ yin, na kunnudide na mẹdevo lẹ nọ hẹn mi deji dọ yẹn tindo nugbo lọ.” Nujikudo mọnkọtọn sọ nọ wá sọn mahẹ tintindo to nuwiwa Klistiani tọn devo lẹ mẹ to gbesisọmẹ, taidi opli lẹ yìyì na sinsẹ̀n-bibasi po Biblu pinplọn sọwhiwhe tọn mẹdetiti tọn po.
Yin Hinhẹn Lodo Gbọn Mẹmẹsunnu-Yinyin Owanyinọ de Dali
Yinyin apadewhe titobasinanu lẹdo aihọn pé sinsẹ̀n-basitọ nugbonọ lẹ tọn de sọgan hẹn mí lodo. Dona nankọ die nado dogbẹ́ hẹ mẹmẹsunnu-yinyin owanyinọ lẹdo aihọn pé mọnkọtọn! (1 Pita 2:17) Podọ mí sọgan tindo nuyiwadomẹji mẹhẹnlodo tọn do yisenọ hatọ mítọn lẹ ji.
Lẹnnupọndo nuyiwa mẹhẹnlodo Job dodonọ lọ tọn lẹ ji. Elifazi homẹmiọnnamẹtọ lalonọ lọ lọsu tlẹ yigbe dọ: “Ohó towe lẹ ko hẹn ewọ he to aijẹ jlọ nọte, hiẹ ko sọ hẹn kligo he to didẹ́ lẹ lodo.” (Job 4:4) Be mí nọ gọalọna mẹdevo lẹ ya? Azọngban dopodopo mítọn tọn wẹ e yin nado gọalọna mẹmẹsunnu po mẹmẹyọnnu gbigbọmẹ tọn mítọn lẹ po nado doakọnnanu to sinsẹ̀nzọn Jiwheyẹwhe tọn mẹ. To nuyiwa hẹ yé mẹ, mí sọgan yinuwa sọgbe hẹ hodidọ lọ lẹ dọmọ: “Mì hẹn alọ madogánnọ sinyẹn, bosọ hẹn kligonu he ma sinyẹn dote.” (Isaia 35:3) Enẹwutu naegbọn a ma na yí i do basi yanwle towe nado hẹn Klistiani hatọ dopo kavi awe lodo bo na yé tuli to opli lẹ ji? (Heblu lẹ 10:24, 25) Hogbe pipà tulinamẹ tọn po pinpẹn-nutọn-yinyọnẹn tọn lẹ po na vivẹnudido yetọn nado to homẹ Jehovah tọn hẹn hùn zọnmii sọgan gọalọna yé nado yin tenọglinọ bo tindo todido nado duto alèwezun ogbẹ̀ tọn ji.
Mẹho agun tọn lẹ sọgan wà nususu dotana gbọn tulinina mẹyọyọ lẹ dali. Ehe sọgan yọnbasi gbọn ayinamẹ yọn-na-yizan po dehe sinai do Owe-wiwe ji lẹ po nina yé gọna azọ́nwiwa hẹ yé to kunnudegbe dali. Apọsteli Paulu nọ saba yí dotẹnmẹ hundote lẹ zan nado hẹn mẹdevo lẹ lodo. E jlo vẹkuvẹku nado mọ Klistiani Lomu tọn lẹ na e nido gọalọ nado hẹn yé lodo to gbigbọmẹ. (Lomunu lẹ 1:11) E pọ́n mẹmẹsunnu po mẹmẹyọnnu yiwanna Filippi tọn lẹ po hlan nado yin ‘ayajẹ podọ ojẹgbakun’ etọn bosọ na tuli yé nado “nọte gligli to Oklunọ mẹ.” (Filippinu lẹ 4:1) To whenuena e se gando awusinyẹnnamẹnu he mẹmẹsunnu Tẹsalonika tọn lẹ pannukọn go, Paulu do Timoti hlan nado ‘hẹn yé lodo bo miọnhomẹna yé, na depope yetọn nikaa dahli to whlepọn nukọn.’—1 Tẹsalonikanu lẹ 3:1-3.
Apọsteli Paulu po Pita po yọ́n vivẹnudido nugbonọ sinsẹ̀n-basitọ hatọ yetọn lẹ tọn bosọ do pinpẹn-nutọn-yinyọnẹn hia na ẹn. (Kọlọsinu lẹ 2:5; 1 Tẹsalonikanu lẹ 3:7, 8; 2 Pita 1:12) Mọdopolọ, mì gbọ mílọsu ni nọ ze ayidonugo do jẹhẹnu dagbe po avùnhiho kọdetọn dagbenọ mẹmẹsunnu mítọn lẹ tọn po nado yin tenọglinọ bo gbògbéna Jehovah ji, e mayin do madogán yetọn lẹ ji gba.
Eyin mí tindo pọndohlan agọ̀ kavi nọ mọhodọdomẹgo, to mayọnẹn mẹ mí sọgan to hinhẹn ẹn sinyẹn deji na mẹdelẹ nado nọte gligli to yise mẹ. Lehe e sọgbe do sọ nado flindọ ‘yè hẹn agbọ́pe mẹmẹsunnu mítọn lẹ bosọ vúnvún yé pé’ to titonu ehe mẹ! (Matiu 9:36) Po gbesisọ po, yé dona donukun nado yin homẹmiọnna bo yin kọfana to agun Klistiani tọn mẹ. Enẹwutu, mì gbọ mímẹpo ni wà nuhe go mí pé lẹpo nado jlọ yisenọ hatọ lẹ dote bo gọalọna yé nado yin tenọglinọ.
Mẹdelẹ sọgan yinuwa hẹ mí to aliho he sọgan hẹn tenọgligo hinhẹn mítọn gbọjọ mẹ to whedelẹnu. Be mí na dike hodidọ agọ̀ kavi nuyiwa he ma sọgbe de ni hẹn mí gbọjọ to sinsẹ̀nzọn mítọn hlan Jehovah mẹ wẹ ya? Mì dike mẹde dọ̀n mí sọn tenọgligo hinhẹn mítọn mẹ pọ́n gbede blo!—2 Pita 3:17.
Opagbe Jiwheyẹwhe Tọn Lẹ —Asisa Mẹhẹnlodo Tọn De
Opagbe Jehovah tọn heyin sọgodo jiawu de to gandudu Ahọluduta tọn glọ nọ na mí todido he nọ gọalọna mí nado yin tenọglinọ. (Heblu lẹ 6:19) Podọ nujikudo lọ dọ Jiwheyẹwhe nọ hẹn opagbe etọn lẹ di whepoponu nọ whàn mí nado ‘nọ nukle bo nọte gligli to yise mẹ.’ (1 Kọlintinu lẹ 16:13; Heblu lẹ 3:6) Nuhe taidi gbàndindọn to hẹndi dọdai Jiwheyẹwhe tọn delẹ mẹ sọgan whlé yise mítọn pọ́n. Enẹwutu nujọnu taun wẹ e yin dọ mí ni nọ aṣeji sọta yinyin hinhẹn buali gbọn nuplọnmẹ lalo tọn lẹ dali bo mayin hinhẹn jai sọn todido mítọn mẹ blo.—Kọlọsinu lẹ 1:23; Heblu lẹ 13:9.
Apajlẹ ylankan Islaelivi he dọ̀n na yise matindo to opagbe Jehovah tọn lẹ mẹ tọn dona yinuwa taidi avase na míwlẹ. (Psalm 78:37) Kakati nado taidi yé, mì gbọ mí ni yin tenọglinọ, bo to Jiwheyẹwhe sẹ̀n po linlẹn niyaniya-yinyin tọn de po to azán godo tọn ehelẹ mẹ. Mẹho numimọnọ dopo dọmọ: “Yẹn nọ zan azán dopodopo taidi dọ osọ̀ wẹ azán daho Jehovah tọn ja nkọtọn.”—Joẹli 1:15.
Mọwẹ, azán daho Jehovah tọn ko sẹpọ. Etomọṣo, mí ma dona dibu nudepope tọn eyin mí tẹdo Jiwheyẹwhe go. Eyin mí tẹdo nujinọtedo dodonọ etọn lẹ go gligli bo yin tenọglinọ, mí sọgan họ̀n alèwezun ogbẹ̀ mavọmavọ tọn po kọdetọn dagbe po!—Howhinwhẹn lẹ 11:19; 1 Timoti 6:12, 17-19.
[Yẹdide to weda 23]
Be hiẹ to nuhe go a pé lẹpo wà nado gọalọna Klistiani hatọ lẹ nado yin tenọglinọ ya?
[Asisa Yẹdide tọn to weda 21]
The Complete Encyclopedia of Illustration/J. G. Heck