To Jehovah Sẹ̀n Zọnmii po Ahun Tenọglinọ de Po
“Ahun ṣie yin tenọglinọ, Jiwheyẹwhe ṣie E, ahun ṣie yin tenọglinọ.”—PSALM 57:7.
1. Naegbọn mí do sọgan tindo nujikudo he Davidi tindo nkọtọn?
JEHOVAH sọgan hẹn mí nọtegli to nugbo mẹ, na mí nido sọgan tẹdo sinsẹ̀n nugbo Klistiani tọn go taidi devizọnwatọ klandowiwe etọn lẹ. (Lomunu lẹ 14:4) Enẹwutu mí sọgan tindo nujikudo taidi psalm-kàntọ Davidi, he yin whinwhàn nado dọmọ: “Ahun ṣie yin tenọglinọ, Jiwheyẹwhe ṣie E.” (Psalm 108:1) Eyin ahun mítọn yin tenọglinọ, mí na yin whinwhàn nado hẹn klandowiwe mítọn hlan Jiwheyẹwhe di. Podọ gbọn anademẹ po hlọnhlọn po dindin sọn ewọ dè dali, mí sọgan lodo gligli, bo ma sẹafọ to gbemima po nujikudo mítọn po mẹ taidi tenọgligo-hẹntọ, ‘he tindo onú susu nado wà to azọ́n Oklunọ tọn mẹ whepoponu’ lẹ.—1 Kọlintinu lẹ 15:58.
2, 3. Etẹwẹ yin zẹẹmẹ tudohomẹnamẹ Paulu tọn heyin kinkàndai to 1 Kọlintinu lẹ 16:13 mẹ?
2 To tudohomẹnamẹ he e na hodotọ Jesu tọn lẹ to Kọlinti hohowhenu tọn mẹ he sọ yọn-na-yizan ganji na Klistiani egbezangbe tọn lẹ , apọsteli Paulu dọmọ: “Mì to alihọ́, mì nọtegli to yise mẹ, mì hẹn mìde di sunnu, mì yin huhlọnnọ.” (1 Kọlintinu lẹ 16:13) To Glẹkigbe mẹ dopodopo gbedide ehelẹ tọn yin nuhe mẹde dona to wiwà egbesọegbesọ, enẹwutu afọdide he na to nukọnzindo de wẹ yé yin. Etẹwẹ yin zẹẹmẹ tudohomẹnamẹ ehe tọn?
3 Mí sọgan “to alihọ́” to gbigbọmẹ gbọn nukundidiọsọ Lẹgba po dindọnsẹpọ Jiwheyẹwhe po dali. (Jakobu 4:7, 8) Jehovah go ginganjẹ nọ gọalọna mí ma nado hẹn haṣinṣan mítọn gble podọ nado ‘nọtegli to yise Klistiani tọn mẹ.’ Míwlẹ—gọna suhugan yọnnu he tin to ṣẹnṣẹn mítọn lẹ tọn—‘nọ hẹn míde di sunnu’ gbọn Jiwheyẹwhe sinsẹ̀n po adọgbigbo po taidi lilatọ Ahọluduta lọ tọn lẹ dali. (Psalm 68:11) Mí nọ “yin huhlọnnọ” gbọn nukọnzinzindo nado nọ ganjẹ Otọ́ olọn mẹ tọn mítọn go na hlọnhlọn nado wà ojlo etọn dali.—Filippinu lẹ 4:13.
4. Etẹwẹ nọ planmẹ jẹ baptẹm Klistiani tọn mítọn kọ̀n?
4 Mí nọ dohia dọ mí kẹalọyi nugbo lọ to whenuena mí basi klandowiwe mlẹnmlẹn hlan Jehovah bo do e hia gbọn yinyin yinylọ́n-do-sinmẹ dali. Ṣigba etẹwẹ nọ planmẹ jẹ baptẹm kọ̀n? Tintan mí nọ tindo oyọnẹn he pegan Ohó Jiwheyẹwhe tọn. (Johanu 17:3) Ehe nọ hẹn yise mítọn lodo bo nọ whàn mí nado lẹnvọjọ, bo do awubla nujọnu tọn hia do ylanwa dai tọn ji. (Owalọ lẹ 3:19; Heblu lẹ 11:6) Enẹgodo wẹ didiọ-zun Klistiani mítọn nọ wá aimẹ, na mí nọ dealọ sọn nuyiwa he ma sọgbe lẹ mẹ nado sọgan doafọna gbẹzan he tin to kọndopọmẹ hẹ ojlo Jiwheyẹwhe tọn. (Lomunu lẹ 12:2; Efesunu lẹ 4:23, 24) Klandowiwe sọn ahun mẹ wá hlan Jehovah to odẹ̀ mẹ nọ bọdo ehe go. (Matiu 16:24; 1 Pita 2:21) Mí nọ biọ ayihadawhẹnamẹnu dagbe de sọn Jiwheyẹwhe dè bo nọ yin bibaptizi to yẹhiadonu klandowiwe mítọn tọn hlan ẹn mẹ. (1 Pita 3:21) Afọdide ehelẹ hinhẹn do ayihamẹ na gọalọna mí nado to nulẹnpọndo nuhudo lọ nado nogbẹ̀ sọgbe hẹ klandowiwe mítọn bo zindonukọn nado to Jehovah sẹ̀n po ahun tenọgli tọn de po to whepoponu.
Zindonukọn to Oyọnẹn He Pegan Dindin Towe Mẹ
5. Naegbọn mí nado zindonukọn nado to oyọnẹn Owe-wiwe tọn tindo?
5 Nado sọgan hẹn klandowiwe mítọn di hlan Jiwheyẹwhe, mí dona zindonukọn nado to oyọnẹn mẹjlọdote Owe-wiwe tọn tindo. Lehe e yin homẹhunnu nado dù núdùdù gbigbọmẹ tọn to whenuena mí ṣẹṣẹ yọ́n nugbo Jiwheyẹwhe tọn do sọ! (Matiu 24:45-47) ‘Núdùdù’ mọnkọtọn lẹ nọ vivi—podọ yé nọ wadagbe na mí to gbigbọ-liho. Onú titengbe wẹ e yin todin nado zindonukọn nado to núdùdù dojo gbigbọmẹ tọn dù na mí nido sọgan hẹn ahun tenọgli tọn go taidi devizọnwatọ Jehovah tọn lẹ
6. Nawẹ hiẹ sọgan ko yin alọgọna nado wleawuna pinpẹn-nutọn-yinyọnẹn sọn ahun mẹ wá na nugbo Biblu tọn gbọn?
6 E nọ biọ vivẹnu nado zindonukọn to oyọnẹn Owe-wiwe tọn tintindo mẹ. E taidi adọkunnu he whlá de dindin—e nọ biọ kanvinván. Ṣigba lehe ‘oyọnẹn Jiwheyẹwhe tọn’ tintindo nọ tindo ale do sọ! (Howhinwhẹn lẹ 2:1-6) To whenuena lilatọ Ahọluduta lọ tọn de plọnnu hẹ we to tintan whenu, e sọgan ko yí owe lọ Oyọnẹn He Nọ Planmẹ Sọyi Ogbẹ̀ Madopodo Mẹ zan. Whenu susu sọgan ko yin yiyizan nado gbadopọnna weta dopodopo, vlavo hugan aisinsin dopo. Hiẹ mọaleyi to whenuena wefọ heyin dide lẹ yin hihia bo yin hodọdeji. Eyin onú agokun de vẹawu nado mọnukunnujẹemẹ, zẹẹmẹ etọn nọ yin bibasi. Mẹhe to anadena plọnmẹ Biblu towe nọ wleawu ganji, nọ hodẹ̀ na gbigbọ Jiwheyẹwhe tọn, bo gọalọna we nado wleawuna pinpẹn-nutọn-yinyọnẹn sọn ahun mẹ wá na nugbo lọ.
7. Etẹwẹ nọ hẹn mẹde pegan nado plọn nugbo Jiwheyẹwhe tọn mẹdevo lẹ?
7 Vivẹnu ehe sọgbe, na Paulu wlan dọmọ: “Gbọ mẹhe yè to pinplọn to ohó lọ mẹ, ni nọ to mimá hlan yé he to mẹplọn to onú dagbe lẹpo mẹ.” (Galatianu lẹ 6:6) Tofi kandai Glẹki tọn lọ dohia dọ nuplọnmẹ Ohó Jiwheyẹwhe tọn yin zínzín do ayiha ‘mẹhe to yinyin pinplọn’ lọ tọn mẹ sisosiso. Yinyin pinplọn to aliho enẹ mẹ hẹn we pegan nado sọgan plọn mẹdevo lẹ. (Owalọ lẹ 18:25) Nado yin nugbonọ na klandowiwe towe, hiẹ dona hẹn dagbemẹninọ gbigbọmẹ tọn po tenọgli towe po go gbọn Ohó Jiwheyẹwhe tọn pinplọn zọnmii dali.—1 Timoti 4:13; Titu 1:13; 2:2.
Flin Lẹnvọjọ po Didiọ Zun Klistiani Towe Po
8. Nawẹ e yọnbasi gbọn nado hẹn walọyizan jijọ-di-Jiwheyẹwhe tọn go?
8 Be hiẹ flin kọgbọ he a tindo to whenuena a plọn nugbo lọ, lẹnvọjọ, bo tindo numọtolanmẹ jona Jiwheyẹwhe tọn he sinai do yise to ofligọ avọ́sinsan Jesu tọn mẹ ji ya? (Psalm 32:1-5; Lomunu lẹ 5:8; 1 Pita 3:18) Na jide tọn hiẹ ma na jlo nado lẹkọyi gbẹzan ylanwiwa tọn de mẹ gba. (2 Pita 2:20-22) Dẹ̀hiho whẹwhẹ hlan Jehovah na gọalọna we nado hẹn walọyizan jijọ-di-Jiwheyẹwhe tọn go, hẹn klandowiwe towe di, bo zindonukọn nado to Jehovah sẹ̀n po nugbonọ-yinyin po.—2 Pita 3:11, 12.
9. To kọlilẹ sọn aliho ylando tọn lẹ ji godo, yanwle tẹwẹ mí dona doafọna?
9 To didiọzun Klistiani gbọn lilẹkọ sọn nuyiwa ylando tọn lẹ mẹ godo, zindonukọn nado to alọgọ Jiwheyẹwhe tọn din to ahun towe hinhẹn yin tenọglinọ mẹ. To popolẹpo mẹ, ali-bú wẹ hiẹ ko te dai to alihogbó de ji, ṣigba bo wá pọ́n kalti alidohiamẹ dejidego de mẹ bo jẹ zọnlinzin ji to aliho jijlọ lọ ji. Ma buali todin blo. To ginganjẹ anademẹ Jiwheyẹwhe tọn go zọnmii, bo magbe nado gbọṣi aliho ogbẹ̀ tọn ji.—Isaia 30:20, 21; Matiu 7:13, 14.
Ma Wọnji Klandowiwe po Baptẹm Towe po Go Gbede Blo
10. Nuagokun tẹlẹ wẹ mí dona hẹn do ayihamẹ gando klandowiwe mítọn hlan Jiwheyẹwhe go?
10 Hẹn do ayihamẹ dọ hiẹ basi klandowiwe hlan Jehovah to odẹ̀ mẹ, po pọndohlan lọ po nado wà sinsẹ̀nzọn po nugbonọ-yinyin po kakadoi. (Juda 20, 21) Klandowiwe zẹẹmẹdo kinklandovo, kavi nado dè nude dovo na lẹndai wiwe de. (Levitiku 15:31; 22:2) Klandowiwe towe mayin gbemima de kavi azọngban whenu-gli tọn de hlan gbẹtọ gba. Klandowiwe tẹgbẹ̀ tọn de wẹ e yin hlan Nupojipetọ Wẹkẹ lọ tọn, podọ gbẹninọ sọgbe hẹ ẹ biọ nugbonọ-yinyin hlan Jiwheyẹwhe kakajẹ vivọnu gbẹzan mẹde tọn. Mọwẹ, ‘mí to gbẹ̀ wẹ o, mí kú wẹ o, Jehovah tọn wẹ mí yin.’ (Lomunu lẹ 14:7, 8) Ayajẹ mítọn sinai do taliai mítọn na ojlo etọn po nukọnzinzindo mítọn nado to sinsẹ̀n ẹn po ahun tenọgligli tọn de po ji.
11. Naegbọn hiẹ dona nọ flin baptẹm towe po nujọnu-yinyin etọn po?
11 Nọ flin baptẹm towe whepoponu taidi yẹhiadonu klandowiwe sọn ahun mẹ wá towe tọn hlan Jiwheyẹwhe. E mayin baptẹm gánnugánnu tọn gba, na hiẹ basi nudide lọ na dewe. Be hiẹ ko magbe todin nado yí ojlo towe zan to pọmẹ hẹ ojlo Jiwheyẹwhe tọn na pipòtọ gbẹzan towe tọn ya? Hiẹ hodẹ̀ hlan Jiwheyẹwhe na ayihadawhẹnamẹnu dagbe de bo yin bibaptizi to yẹhiadonu klandowiwe towe tọn mẹ hlan ẹn. Hẹn ayihadawhẹnamẹnu mọnkọtọn go gbọn klandowiwe towe hinhẹndi dali, podọ dona susugege Jehovah tọn na tin to ojí we.—Howhinwhẹn lẹ 10:22.
Ojlo Tintindo Towe Nọ Yí Adà de Basi
12, 13. Nawẹ ojlo mídetiti tọn gando klandowiwe po baptẹm po go gbọn?
12 Na nugbo tọn klandowiwe po baptẹm po ko hẹn dona daho lẹ wá na livi susu gbẹtọ lẹ tọn lẹdo aihọn pe. To whenuena mí basi dohia klandowiwe mítọn tọn hlan Jiwheyẹwhe gbọn baptẹm osin tọn bibasi dali, mí kú na nuhe dù nuyiwa gbẹzan mítọn hoho tọn ṣigba ma nọ jó ojlo mítọn do gba. Taidi yisenọ heyin pinplọn ganji lẹ, mí nọ do ojlo mítọn lẹ hia to whenuena mí basi klandowiwe hlan Jiwheyẹwhe to odẹ̀ mẹ bo yin bibaptizi. Afọdide klandowiwe po baptẹm po tọn nọ biọ dọ mí ni yọ́n nuhe ojlo Jiwheyẹwhe tọn yin taun bo de sọn ojlomẹwa nado wà ẹ. (Efesunu lẹ 5:17) Gbọnmọ dali wẹ mí nọ hodo apajlẹ Jesu tọn, mẹhe yí ojlo etọn zan to whenuena e jó azọ́n atinpipa tọn etọn do, yin bibaptizi, bo ze ede jo to gigọ́mẹ nado wà ojlo Otọ́ olọn mẹ tọn etọn tọn.—Psalm 40:7, 8; Johanu 6:38-40.
13 Lẹndai Jehovah Jiwheyẹwhe tọn wẹ yindọ Ovi etọn ni “sọgbe gbọn yajiji dali.” Enẹwutu Jesu dona de sọn ojlo mẹ nado doakọnna yajiji mọnkọtọn to nugbonọ-yinyin mẹ. Gbọnmọ dali, “e yí awhá lele po dasin po do hodẹ̀, bosọ vẹvẹ . . . yè sọ sè etọn na obu di i wutu.” (Heblu lẹ 2:10, 18; 5:7, 8) Eyin mí do obu gbégbigbò tọn mọnkọtọn hia hlan Jiwheyẹwhe, jide tin dọ mí lọsu ‘na yin sisè,’ podọ mí sọgan deji dọ Jehovah na hẹn mí yin tenọglinọ taidi Kunnudetọ klandowiwe etọn lẹ.—Isaia 43:10.
Hiẹ Sọgan Hẹn Ahun Tenọglinọ de Go
14. Naegbọn mí dona nọ hia Biblu egbesọegbesọ?
14 Etẹwẹ na gọalọna we nado hẹn ahun tenọglinọ de go bo gbọnmọ dali hẹn klandowiwe towe hlan Jiwheyẹwhe di? Po lẹndai oyọnẹn Ohó Jiwheyẹwhe tọn he to jijideji tọn pinplọn po, nọ hia Biblu egbesọegbesọ. Ehe wẹ nuhe “afanumẹ nugbonọ, nuyọnẹntọ” lọ nọ dotuhomẹna mí whepoponu nado wà. Ayinamẹ mọnkọtọn nọ yin nina na klandowiwe mítọn hinhẹndi nọ biọ dọ mí ni zindonukọn nado to zọnlinzin to nugbo Jiwheyẹwhe tọn mẹ wutu. Eyin titobasinanu Jehovah tọn yọnẹn do kẹalọyi nuplọnmẹ lalo tọn lẹ, ayinamẹ lọ nado nọ hia Biblu ma na yin nina Kunnudetọ Jehovah tọn lẹ gbede podọ na mẹhe yé nọ dekunnuna lẹ.
15. (a) Etẹwẹ dona yin nulẹnpọndeji to nudide lẹ bibasi whenu? (b) Naegbọn e sọgan yin didọ dọ azọ́n he tin to otẹn awetọ mẹ de wẹ agbasazọ́n yin na Klistiani de?
15 To nudide lẹ bibasi whenu, nọ lẹnnupọn whepoponu do lehe yé sọgan gando klandowiwe towe hlan Jehovah hinhẹndi go do. Ehe sọgan gando agbasazọ́n towe go. Be hiẹ nọ tẹnpọn nado hẹn ẹn gọalọna we nado hẹn sinsẹ̀n-bibasi nugbo lọ gblodeji ya? Dile etlẹ yindọ azọ́nmẹyimẹdotọ lẹ na paa tọn nọ mọdọ Klistiani klandowiwe lẹ yin azọ́nwatọ dagbe bo yin mẹhe go yè sọgan dejido lẹ sọ, yé sọ nọ doayi e go dọ Kunnudetọ Jehovah tọn lẹ ma nọ tindo ojlo zogbe nado diyin to aihọn mẹ kavi nado whlẹnagbà hẹ mẹdevo lẹ na otẹn he nọ hẹnmẹ zun adọkunnọ hugan lẹ gba. Ehe yinmọ na yanwle Kunnudetọ lẹ tọn ma yin adọkun, yindidi, gigo, kavi aṣẹpipa gba. Na mẹhe to klandowiwe yetọn hlan Jiwheyẹwhe hẹndi lẹ, nuhe yin titengbe hugan lọ wẹ ojlo Jiwheyẹwhe tọn wiwà. Otẹn awetọ mẹ wẹ agbasazọ́n he nọ hẹnmẹ tindo dandannu gbẹ̀mẹ tọn lẹ tin te. Taidi apọsteli Paulu, agbasazọ́n yetọn, kavi azọ́n tangan yetọn wẹ lizọnyizọn Klistiani tọn. (Owalọ lẹ 18:3, 4; 2 Tẹsalonikanu lẹ 3:7, 8; 1 Timoti 5:8) Be hiẹ ze dagbenu Ahọluduta tọn lẹ do otẹn tintan mẹ to gbẹzan towe mẹ ya?—Matiu 6:25-33.
16. Etẹwẹ mí sọgan wà eyin magbọjẹ he mayin dandan tọn to hinhẹn ẹn vẹawu na mí nado nọgbẹ̀ sọgbe hẹ klandowiwe mítọn hlan Jiwheyẹwhe?
16 Mẹdelẹ sọgan ko yin titlọ gbọn magbọjẹ voovo lẹ dali whẹpo yé do plọn nugbo. Ṣigba lehe ahun yetọn nọ gọna ayajẹ, pẹdido, po owanyi po na Jiwheyẹwhe do sọ to whenuena yé kẹalọyi todido Ahọluduta lọ tọn! Nulinlẹnpọn do dona he yé ko to vivi etọn dù sọn whenẹnu gbọ́n lẹ ji sọgan gọalọna yé nado nọgbẹ̀ sọgbe hẹ klandowiwe yetọn hlan Jehovah. To alọ devo mẹ, etẹwẹ lo eyin magbọjẹ he mayin dandan tọn do nuhahun he mẹlẹpo tindo to aihọn ehe mẹ lẹ ji wá jlo na finyọ́n “ohó Jiwheyẹwhe tọn” hù, dile owùn sọgan hẹnalọdotena atinvu lẹ ma nado whẹ́n bo de sinsẹ́n tọ́n do? (Luku 8:7, 11, 14; Matiu 13:22; Malku 4:18, 19) Eyin hiẹ mọdọ ehe ko to jijọ do hiẹ kavi whẹndo towe go, ze magbọjẹ towe do alọ Jehovah tọn mẹ bo hodẹ̀ dọ ewọ ni gọalọna we nado hẹn owanyi po pinpẹn-nutọn-yinyọnẹn towe jideji. Eyin hiẹ ze agbàn pinpẹn towe do alọ etọn mẹ, e na gọalọna we bo na na we huhlọn nado zindonukọn to sinsẹ̀n ẹn mẹ po ayajẹ po gọna ahun tenọglinọ de.—Psalm 55:22; Filippinu lẹ 4:6, 7; Osọhia 2:4.
17. Nawẹ e yọnbasi gbọn nado doakọnna whlepọn sinsinyẹn lẹ?
17 Zindonukọn nado to dẹ̀ho hlan Jehovah Jiwheyẹwhe whepoponu, kẹdẹdile hiẹ hodẹ̀ do to whenuena hiẹ to klandowiwe towe basi hlan ẹn. (Psalm 65:2) Eyin hiẹ yin whiwhlepọn nado wà oylan kavi eyin hiẹ pannukọn whlepọn sinsinyẹn, din anademẹ Jiwheyẹwhe tọn po alọgọ etọn po nado gọalọna we nado dudeji. Hẹn nuhudo yise tọn do ayihamẹ, na devi Jakobu wlan dọmọ: “Eyin mẹde ma tindo nuyọnẹn [nado pehẹ whlepọn] to mì mẹ, ni kanbiọ to Jiwheyẹwhe dè, mẹhe nọ na omẹ susugege, bo ma nọ wọhẹ omẹ, yè na na ẹn. Ṣigba ni biọ to yise mẹ, to matin ayihaawe mẹ. Na ewọ he do ayihaawe, e taidi agbówhẹn ohù tọn, he gbọn alọ jẹhọn tọn mẹ to bibli hlan nukọn hlan godo. Na omẹ lọ lẹndọ e na mọ nude yí to Oklunọ dè blo. Gbẹtọ ayiha awenọ ma sọgan hẹn ede lodo to ali etọn lẹpo ji gba.” (Jakobu 1:5-8) Eyin whlepọn de taidi nuhe hugan huhlọn mítọn, mí sọgan tindo jide ehe dọmọ: “Whlepọn de ma saa ko plá mì adavo ehe hunkọ tin ayà hlan gbẹtọ: ṣigba nugbonọ wẹ Jiwheyẹwhe, mẹhe ma na dike yè ni whlé mì pọ́n hú ehe mì sọgan hẹn; ṣigba ewọ na deali de po whlepọn lọ po ga nado gán, na mìwlẹ nido tin sọgan nado doakọnna ẹn.”—1 Kọlintinu lẹ 10:13.
18. Etẹwẹ mí sọgan wà eyin ylando sinsinyẹn heyin zizewhla de to kàndepòna gbemima mítọn nado nọgbẹ̀ sọgbe hẹ klandowiwe mítọn hlan Jehovah?
18 Etẹwẹ lo eyin ylando sinsinyẹn heyin zizewhla de to tuklado ayihadawhẹnamẹnu towe bo to kàndepòna gbemima towe nado nọgbẹ̀ sọgbe hẹ klandowiwe towe hlan Jiwheyẹwhe? Eyin hiẹ lẹnvọjọ, hiẹ sọgan mọ homẹmimiọn yí to yinyọnẹn mẹ dọ Jehovah ma na ‘vlẹ ayiha gbigbà finfinyọn’ gba. (Psalm 51:17) Din alọgọ mẹho Klistiani owanyinọ lẹ tọn, to yinyọnẹn mẹ dọ to apajlẹ Jehovah tọn hihodo mẹ, yé ma na yí nukunpẹvi do pọ́n ojlo towe nado yin hinhẹn gọwá haṣinṣan dagbe de mẹ hẹ Otọ́ olọn mẹ tọn towe gba. (Psalm 103:10-14; Jakobu 5:13-15) Enẹgodo to huhlọn gbigbọmẹ tọn po ahun tenọglinọ heyin hinhẹn jẹ yọyọ de po mẹ, hiẹ na penugo nado jlọ́ omọ́-liho afọ towe tọn bọ e na yọnbasi na we nado nọgbẹ̀ sọgbe hẹ klandowiwe towe hlan Jiwheyẹwhe.—Heblu lẹ 12:12, 13.
To Sinsẹ̀nzọnwà Zọnmii po Ahun Tenọglinọ de Po
19, 20. Naegbọn e do yin onú titengbe dọ mí ni zindonukọn nado to gbẹnọ sọgbe hẹ klandowiwe mítọn?
19 To ojlẹ awusinyẹn tọn ehelẹ mẹ, mí dona dovivẹnu tlala nado nọgbẹ̀ sọgbe hẹ klandowiwe mítọn bo zindonukọn to Jiwheyẹwhe sinsẹ̀n mẹ po ahun tenọglinọ de po. Jesu dọmọ: “Mẹhe doakọnna kakajẹ opodo, mẹdopolọ wẹ yè na whlẹn gán.” (Matiu 24:13) To whenuena e yindọ ‘azán godo tọn lẹ’ mẹ wẹ mí to gbẹnọ te, opodo sọgan wá to whedepopenu. (2 Timoti 3:1) Humọ, depope to mí mẹ ma sọgan deji dọ mí na tin to ogbẹ̀ to osọ̀ he ja gba. (Jakobu 4:13, 14) Enẹwutu onú titengbe wẹ e yin dọ mí ni zindonukọn nado to gbẹnọ sọgbe hẹ yise mítọn to egbehe!
20 Apọsteli Pita zinnudo ehe ji to wekanhlanmẹ etọn awetọ mẹ. E dohia dọ kẹdẹdile gbẹtọ jijọ-madi-Jiwheyẹwhe tọn lẹ vasudo to Osingigọ mẹ do, mọdopolọ aigba yẹhiadonu tọn, kavi ogbẹ́ ylankan gbẹtọvi tọn, na yin vivasudo to ‘azán Jehovah tọn gbè’ do. Enẹwutu Pita dọ po awubla po dọmọ: “Omẹ na hunkọ wẹ mìwlẹ lo yin to walọ wiwe lẹpo mẹ, to jijọ-di-Jiwheyẹwhe tọn mẹ”! E sọ dotuhomẹna yé ga dọmọ: “Mì mẹyiwanna emi, le mìwlẹ ko yọ́n onú ehelẹ dai, mì nọ payi yé go na yè nikaa yí alibubu mẹylankan lẹ [mẹplọntọ lalonọ lẹ po gbẹtọ jijọ-madi-Jiwheyẹwhe lẹ po] tọn do dọ̀n mì, na mì nikaa jai sọn tenọgligli mìtọn mẹ.” (2 Pita 3:5-17) Lehe e na blawu do sọ eyin mẹhe yin bibaptizi de yin hinhẹn buali bo kú taidi mẹhe gboawupo nado hẹn ahun tenọgli tọn de go!
21, 22. Nawẹ hogbe Psalm 57:7 tọn lẹ sọawuhia nado yin nugbo to whẹho Davidi po Klistiani nugbo lẹ tọn po mẹ gbọn?
21 Gbemima towe nado nọgbẹ̀ sọgbe hẹ klandowiwe towe hlan Jiwheyẹwhe sọgan sọ yin hinhẹn lodo eyin hiẹ hẹn azán ayajẹnọ baptẹm towe tọn do ayiha mẹ bo nọ din alọgọ Jiwheyẹwhe tọn na hogbe po nuyiwa towe lẹ po nido hẹn ahun etọn jaya. (Howhinwhẹn lẹ 27:11) Jehovah ma nọ hẹn omẹ etọn lẹ jẹflumẹ gbede, podọ na jide tọn mí dona yin nugbonọ hlan ẹn. (Psalm 94:14) E do lẹblanu po awuvẹmẹ po hia to whenuena e hẹn tito kẹntọ lẹ tọn gble bo whlẹn Davidi gán. To pẹdido mẹ na ehe, Davidi lá owanyi he lodo, yèdọ masẹafọ he e tindo na Whlẹngantọ etọn. Po numọtolanmẹ sisosiso po, e jihàn dọmọ: “Ahun ṣie yin tenọglinọ, Jiwheyẹwhe ṣie E, ahun ṣie yin tenọglinọ: Yẹn na jihàn, mọwẹ, yẹn na jihàn pipà lẹ.”—Psalm 57:7.
22 Taidi Davidi, Klistiani nugbo lẹ ma ko buali sọn mẹdezejo yetọn hlan Jiwheyẹwhe mẹ gba. Po ahun tenọgligli tọn lẹ po, yé pà Jehovah na whlẹngán po mẹhẹndo-gbẹ̀ yetọn po, mẹhe yé yí ayajẹ do to ohàn pipà tọn ji hlan. Eyin ahun towe yin tenọglinọ, e na ganjẹ Jiwheyẹwhe go, podọ po alọgọ etọn po hiẹ na penugo nado hẹn klandowiwe towe di. Mọwẹ, hiẹ sọgan taidi “dodonọ” he go psalm-kàntọ jihàn gando dọmọ: “Obu owẹ̀n ylankan tọn ma na di i: Yè hẹn ayiha etọn lodo, e dotudo OKLUNỌ go.” (Psalm 112:6, 7) Po yise to Jiwheyẹwhe mẹ po gọna ginganjẹ e go mlẹnmlẹn, hiẹ sọgan hẹn klandowiwe towe di bo zindonukọn nado to Jehovah sẹ̀n po ahun tenọglinọ de po.
Be Hiẹ Flin Ya?
• Naegbọn mí nado zindonukọn nado to oyọnẹn he pegan Biblu tọn plọn?
• Naegbọn mí nado hẹn lẹnvọjọ po didiọ zun Klistiani mítọn po do ayiha mẹ?
• Nawẹ mí nọ mọaleyi sọn klandowiwe po baptẹm mítọn po finflin mẹ gbọn?
• Etẹwẹ na gọalọna mí nado zindonukọn to Jehovah sinsẹ̀n po ahun tenọglinọ de po mẹ?
[Yẹdide to weda 18]
Be hiẹ to dagbemẹninọ gbigbọmẹ tọn towe go hẹn gbọn Ohó Jiwheyẹwhe tọn hihia egbesọegbesọ dali ya?
[Yẹdide to weda 18]
Hinhẹn lizọnyizọn Klistiani tọn zun azọ́n he tin to otẹn tintan mẹ na mí nọ gọalọna na mí nado zindonukọn to Jehovah sinsẹ̀n mẹ po ahun tenọglinọ de po