Kanbiọ lẹ sọn Wehiatọ lẹ Dè
Naegbọn Atọ̀họ̀-Nuhihọ́ Lọ Tọn 1er avril 2002, weda 11, hukan 7, dọ dọ baptẹm sinmẹ tọn heyin bibasi na Juvi he ṣẹṣẹ yise to Pẹntikọsti owhe 33 W.M. lẹ yin yẹhiadonu ‘klandowiwe yetọn tọn hlan Jiwheyẹwhe gbọn Klisti gblamẹ,’ to whenuena e yindọ linlẹn he mí tindo dai wẹ yindọ baptẹm Juvi lẹ tọn sọn owhe 33 W.M. jẹ 36 W.M ma biọ klandowiwe mẹdetiti tọn mọnkọtọn?
To owhe 1513 J.W.M., Jehovah Jiwheyẹwhe hùn dotẹnmẹ dote na Islaelivi lẹ nado lẹzun akọta wiwe de hlan ẹn eyin yé ‘setonuna ogbè etọn bo yìn alẹnu etọn.’ Yé yigbe dọ: “Ehe OKLUNỌ ko dọ lẹpo wẹ mí na wà.”—Eksọdusi 19:3-8; 24:1-8.
Gbọn gbeyiyi nado yìn alẹnu Osẹ́n Mose tọn dali, Islaelivi lẹ klan yede do wiwe hlan Jiwheyẹwhe. Whẹndo Juvi tọn he bọdego lẹ yin jiji do akọta klandowiwe ehe mẹ. Ṣigba, baptẹm Juvi he lẹzun hodotọ Jesu Klisti tọn sọn Pẹntikọsti owhe 33 W.M. sọyi lẹ tọn bẹ nususu hẹn hugan yede zizejona Jiwheyẹwhe taidi hagbẹ akọta klandowiwe de tọn lẹ. E yin yẹhiadonu klandowiwe yetọn hlan Jehovah Jiwheyẹwhe tọn to haṣinṣan yọyọ de mẹ hẹ ẹ gbọn Jesu Klisti gblamẹ. Gbọnna?
Bọdo kinkọnjẹgbonu gbigbọ wiwe tọn do nudi devi 120 he pli to abò aga tọn de mẹ to Jelusalẹm to azán Pẹntikọsti owhe 33 W.M. ji go, apọsteli Pita ṣite bo jẹ yẹwhehodọ na Ju po mẹdiọzun Juvi susugege he wá pọ́n nuhe ko jọ po ji. To kunnudide he gbloada de godo, e dọna Juvi he ayihadawhẹnamẹnu yetọn ko yin whinwhàn lẹ dọmọ: “Mì lẹnvọjọ, na yè ni sọ baptizi dopodopo mìtọn to oyín Jesu Klisti tọn mẹ na desẹ ylando tọn.” To gbeyiyi mẹ na tudohomẹnamẹ yinukọn dogọ Pita tọn, “yè baptizi mẹhe yí homẹhunhun do yí ohó etọn lẹ: yè sọ hia dogọ yé ayiha foofọtọ́n nkọ to gbèdopo nẹ.”—Owalọ lẹ 2:1-41.
Be Ju heyin bibaptizi to tudohomẹnamẹ Pita tọn godo enẹlẹ ko yin hagbẹ akọta heyin kinklandowiwe de tọn wẹ ya? Be yé ko tin to haṣinṣan klandowiwe de mẹ hẹ Jiwheyẹwhe wẹ ya? Lala. Apọsteli Paulu wlan dọ ‘Jiwheyẹwhe ko de Osẹ́n sẹ sọn aimẹ gbọn whiwhè e do yatin go dali.’ (Kọlọsinu lẹ 2:14) Gbọn okú Klisti tọn gblamẹ to owhe 33 W.M., Jehovah Jiwheyẹwhe de alẹnu Osẹ́n tọn lọ sẹ—yèdọ dodonu lọ na Islaelivi lẹ hinhẹn biọ haṣinṣan klandowiwe de mẹ hẹ Ewọ. Todin Jiwheyẹwhe lọsu gbẹkọ akọta he ko gbẹ́ Ovi etọn dai lọ go. ‘Islaeli agbasalan tọn’ ma sọgan sọalọakọ́n nado yin akọta klandowiwe de hlan Jiwheyẹwhe ba.—1 Kọlintinu lẹ 10:18; Matiu 21:43.
Alẹnu Osẹ́n tọn yin didesẹ to owhe 33 W.M., ṣigba ojlẹ nukundagbe po ayidonugo vonọtaun Jiwheyẹwhe tọn po dohlan Ju lẹ ma wá vivọnu to whenẹnu gba.a Ojlẹ enẹ zindonukọn kakajẹ owhe 36 W.M., to whenuena Pita dọyẹwheho na Kọneliọsi budisi-Jiwheyẹwhe tọ́ heyin Italinu lọ po whédo etọn po gọna Kosi devo lẹ. (Owalọ lẹ 10:1-48) Etẹwẹ yin dodonu nukundagbe heyin kandlẹnna ehe tọn?
“[Mẹssia lọ] na basi alẹnu liló de hẹ mẹsusu na osẹ dopo,” wẹ Daniẹli 9:27 dọ. Alẹnu heyin hinhẹn lodo na owhe ṣinawe, kavi “osẹ dopo,” sọn baptẹm Jesu tọn po bẹjẹeji lizọnyizọn gbangba Mẹssia lọ tọn po whenu to owhe 29 W.M. lọ wẹ alẹnu Ablaham tọn. Nado tin to haṣinṣan alẹnu tọn enẹ mẹ, nuhe yin bibiọ to mẹde si lẹpo wẹ nado yin ovivi Ablaham tọn. Alẹnu tlọlọ enẹ ma hẹn haṣinṣan klandowiwe de hẹ Jehovah yọnbasi na mẹlọ gba. Enẹwutu, dile etlẹ yindọ Juvi yisenọ he yí baptẹm to hodidọ Pita tọn godo to Pẹntikọsti owhe 33 W.M. lẹ mọ ayidonugo vonọtaun yí taidi Juvi jọwamọ tọn lẹ, yé ma tindo haṣinṣan klandowiwe de hẹ Jiwheyẹwhe na alẹnu Osẹ́n tọn lọ ko yin didesẹ wutu. Dopodopo yetọn dona klan ede do wiwe hlan Jiwheyẹwhe.
Whẹwhinwhẹ́n devo tin he wutu Ju po mẹdiọzun Juvi he jlo na yí baptẹm to azán Pẹntikọsti owhe 33 W.M. lẹ po dona klan yede do wiwe. Apọsteli Pita dotuhomẹna hosetọ etọn lẹ nado lẹnvọjọ bo yin bibaptizi to oyín Jesu tọn mẹ. Mọwiwà biọ dọ yé ni jo aliho aihọn tọn do bo kẹalọyi Jesu taidi Oklunọ po Mẹssia po, taidi Yẹwhenọ Daho, podọ taidi mẹhe ko sinai to adusilọ Jiwheyẹwhe tọn mẹ to olọn mẹ. Yé dona dawhá ylọ oyín Jehovah Jiwheyẹwhe tọn na whlẹngán gbọn Klisti Jesu gblamẹ, ehe bẹ yise yiyizan to Klisti mẹ bo kẹalọyi i taidi Nukọntọ yetọn hẹn. Dodonu lọ na haṣinṣan de tintindo hẹ Jiwheyẹwhe bo mọ jona ylando tọn lẹ yí ko diọ todin. Juvi he yise dopodopo dona kẹalọyi tito yọyọ ehe. Gbọnna? Gbọn klandowiwe bibasi hlan Jiwheyẹwhe bo do e hia to gbangba gbọn yinyin yinylọ́n do sinmẹ to oyín Jesu Klisti tọn mẹ dali. Baptẹm sinmẹ tọn yin yẹhiadonu klandowiwe yetọn tọn hlan Jiwheyẹwhe, bo hẹn yé biọ haṣinṣan yọyọ de mẹ hẹ ẹ gbọn Jesu Klisti gblamẹ.—Owalọ lẹ 2:21, 33-36; 3:19-23.
[Nudọnamẹ Odò Tọn]
a To whenuena Jesu Klisti yì olọn mẹ bo ze nuhọakuẹ avọ́sinsan ogbẹ̀ gbẹtọvi tọn etọn donukọnna Jehovah Jiwheyẹwhe, alẹnu Osẹ́n Mose tọn yin didesẹ bọ dodonu “alẹnu yọyọ” heyin didọdai lọ tọn yin zizedai.—Jẹlemia 31:31-34.