Yé Yin Jiji Do Akọta Dide Jiwheyẹwhe Tọn Mẹ
“OKLUNỌ lọ Jiwheyẹwhe towe ko de we nado yin omẹ [etọn].”—DEUTELONOMI 7:6.
1, 2. Azọ́n huhlọnnọ tẹlẹ wẹ Jehovah wà do ota omẹ etọn lẹ tọn mẹ, podọ haṣinṣan tẹ mẹ wẹ Islaelivi lẹ biọ hẹ Jiwheyẹwhe?
TO OWHE 1513 J.W.M., Jehovah bẹ haṣinṣan yọyọ de jẹeji hẹ devizọnwatọ etọn he tin to aigba ji lẹ. To owhe enẹ mẹ, e dowinyan huhlọn aihọn tọn de bo whlẹn Islaelivi lẹ sọn kanlinmọgbenu. Gbọnmọ dali, e lẹzun Whlẹngantọ po Klunọ yetọn po. Whẹpo Jiwheyẹwhe do yinuwa, e dọna Mose dọmọ: “Dọ hlan ovi Islaeli tọn lẹ, dọ, Yẹn Jehovah wẹ, podọ yẹn na hẹn mì tọ́nsọn agbàn Egiptinu lẹ tọn glọ, yẹn nasọ whlẹn mì sọn mẹglọnọ yetọn mẹ, yẹn na yí awà dindlẹn do fli mì, po whẹdida daho lẹ po: podọ yẹn na yí mì hlan dee na gbẹtọ de, yẹn nasọ yin Jiwheyẹwhe de hlan mì.”—Eksọdusi 6:6, 7; 15:1-7, 11.
2 Ojlẹ vude to gbejizọnlin yetọn sọn Egipti godo, Islaelivi lẹ biọ haṣinṣan alẹnu tọn de mẹ hẹ Jiwheyẹwhe yetọn, Jehovah. Kakati nado yinuwa hẹ mẹdopodopo, whẹndo lẹ, kavi pipli hẹnnu lẹ tọn, Jehovah na tindo pipli gbẹtọ he yin titobasina lẹ tọn, yèdọ akọta de to aigba ji sọn whenẹnu sọyi. (Eksọdusi 19:5, 6; 24:7) E na omẹ etọn lẹ osẹ́n he na deanana gbẹzan egbesọ tọn yetọn lẹ, podọ to tàji, dehe na deanana sinsẹ̀n-bibasi yetọn. Mose dọna yé dọmọ: “Akọta daho tẹwẹ tin finẹ he tindo Jiwheyẹwhe sẹpọ yé de, dile OKLUNỌ lọ Jiwheyẹwhe mítọn te whedepopenu mí dawhá ylọ ẹ? Podọ akọta daho tẹwẹ tin finẹ, he tindo aṣẹdai lẹ po whẹdida dodonọ lẹ po dile osẹ́n he lẹpo te, he yẹn ze do mì nukọn to egbehe?”—Deutelonomi 4:7, 8.
Yin Jiji do Akọta Kunnudetọ lẹ Tọn Mẹ
3, 4. Whẹwhinwhẹ́n titengbe tẹwẹ zọ́n bọ akọta Islaeli tọn do tin?
3 To owhe kanweko lẹ godo, Jehovah hẹn whẹwhinwhẹ́n titengbe he wutu akọta Islaeli tọn do tin wá oflin mẹ na Islaelivi lẹ gbọn yẹwhegán Isaia gblamẹ. Isaia dọmọ: “Le wẹ OKLUNỌ dọ, mẹhe dá we hiẹ Jakobu, podọ ewọ mẹhe do we hiẹ Islaeli dọmọ, A dibu blo: na yẹn ko fli we gọ̀, yẹn ko yí oyín towe do ylọ we. [Ṣie wẹ a yin]. Na yẹn wẹ OKLUNỌ Jiwheyẹwhe towe, Omẹ Wiwe Islaeli tọn lọ Whlẹngantọ towe: . . . hẹn visunnu ṣie lẹ sọn aganu, podọ viyọnnu ṣie lẹ sọn pòdo aigba tọn. Yèdọ mẹdepope he yè ylọ gbọn oyín ṣie dali: na yẹn ko dá ẹ na gigo ṣie wutu, yẹn ko do e; nugbo, yẹn ko basi i. Mìwlẹ wẹ kunnudetọ ṣie, wẹ OKLUNỌ dọ, devi ṣie he yẹn ko de: . . . omẹ helẹ wẹ yẹn do na dee; yé na do pipà ṣie hia.”—Isaia 43:1, 3, 6, 7, 10, 21.
4 Taidi mẹhe yinkọ Jehovah tọn to ota na lẹ, Islaelivi lẹ na wadevizọn taidi kunnudetọ na nupojipetọ-yinyin etọn to akọta lẹ nukọn. Yé dona yin mẹhe ‘yin didá na gigo Jehovah tọn’ lẹ. Yé dona ‘do pipà Jehovah tọn hia,’ dọ azọ́njiawu mẹwhlẹngán tọn etọn lẹ bo gbọnmọ dali pagigona oyín etọn. Do glido, yé dona yin akọta kunnudetọ Jehovah tọn lẹ tọn de.
5. Aliho tẹ mẹ wẹ Islaeli yin akọta klandowiwe de te?
5 To owhe kanweko 11tọ J.W.M., Ahọlu Sọlọmọni dohia dọ Jehovah ko hẹn Islaeli zun akọta vonọtaun he yin kinklandovo de. To dẹ̀hiho hlan Jehovah mẹ, e dọmọ: “Hiẹ ko klan yé sọn akọta aigba tọn lẹpo go, nado yin ogú towe.” (1 Ahọlu lẹ 8:53) Dopodopo Islaelivi lẹ tọn sọ tindo haṣinṣan vonọtaun de hẹ Jehovah. Mose ko dọna yé jẹnukọn dọmọ: “Ovi OKLUNỌ lọ Jiwheyẹwhe mìtọn tọn wẹ mìwlẹ: . . . na gbẹtọ wiwe de wẹ hiẹ hlan OKLUNỌ lọ Jiwheyẹwhe towe.” (Deutelonomi 14:1, 2) Enẹwutu, ovi flinflin he tin to Islaeli lẹ ma tindo nuhudo nado klan gbẹzan yetọn do wiwe hlan Jehovah. Yé yin jiji do akọta klandowiwe Jiwheyẹwhe tọn mẹ. (Psalm 79:13; 95:7) Dile yé yin jiji, osẹ́n Jehovah tọn nọ yin pinplọn yé podọ yé tin to dandannu glọ nado yìn yé na alẹnu he sìn Islaeli do Jehovah go wutu.—Deutelonomi 11:18, 19.
Islaelivi lẹ Vò Nado Basi Nudide
6. Nudide tẹwẹ dopodopo Islaelivi lẹ tọn dona basi?
6 Dile etlẹ yindọ Islaelivi lẹ nọ yin jiji do akọta klandowiwe de mẹ, dopodopo yetọn dona basi nudide mẹdetiti tọn nado sẹ̀n Jiwheyẹwhe. Whẹpo yé do biọ Aigba Pagbe tọn mẹ, Mose dọna yé dọmọ: “Yẹn ylọ olọn po aigba po nado dekunnu do mì ji to egbehe, dọ yẹn ko ze ogbẹ̀ po okú po, dona lọ po dẹ̀hodo lọ po do nukọn towe: enẹwutu de ogbẹ̀, na hiẹ nido gán, hiẹ po okún towe po: nado nọ yiwanna OKLUNỌ lọ Jiwheyẹwhe towe, nado nọ setonuna ogbè etọn, podọ nado nọ dọnsẹpọ jẹ e dè: na ewọ wẹ ogbẹ̀ towe po aga azán towe lẹ tọn po: na hiẹ nido nọ nọ̀ aigba he OKLUNỌ lọ whlé hlan otọ́ towe lẹ, hlan Ablaham, hlan Isaki, podọ hlan Jakobu nado na yé lọ mẹ.” (Deutelonomi 30:19, 20) Enẹwutu, dopodopo Islaelivi lẹ tọn dona basi nudide nado yiwanna Jehovah, nado dotoaina ogbè etọn, podọ nado tẹdo ewọ go. To whenuena e yindọ Islaelivi lẹ vò nado basi nudide, yé dona hẹn agbàn kọdetọn nudide yetọn lẹ tọn.—Deutelonomi 30:16-18.
7. Etẹwẹ jọ to okú mẹhe nọgbẹ̀ to ojlẹ Jọṣua tọn mẹ lẹ tọn godo?
7 Ojlẹ Whẹdatọ lẹ tọn do kọdetọn nugbonọ-yinyin po nugbonọ-mayin po tọn lẹ hia hezeheze. Whẹpo ojlẹ enẹ do bẹjẹeji tlolo, Islaelivi lẹ hodo apajlẹ dagbe Jọṣua tọn bosọ yin didona. “Gbẹtọ ewlẹ sọ sẹ̀n OKLUNỌ to azán Jọṣua tọn lẹpo gbè, podọ to azán mẹho he dọ́ hú Jọṣua lẹpo tọn gbè, mẹhe ko mọ azọ́n daho OKLUNỌ tọn lẹpo, he e ko wà na Islaeli.” Ṣigba, ojlẹ vude to okú Jọṣua tọn godo, “whẹndo devo sọ fọ́n to yé godo, he ma yọ́n OKLUNỌ, kavi azọ́n he e ko wà na Islaeli. Ovi Islaeli tọn lẹ sọ wà enẹ he yin oylan to nukun OKLUNỌ tọn mẹ.” (Whẹdatọ 2:7, 10, 11) E họnwun dọ whẹndo he wá aimẹ gbọngodo bo masọ tindo numimọ lọ lẹ ma wlebòna ogú yetọn taidi hagbẹ akọta he yin kinklandowiwe de tọn, ehe Jiwheyẹwhe yetọn, Jehovah, ko wà azọ́n huhlọnnọ susu do ota etọn mẹ wayi.—Psalm 78:3-7, 10, 11.
Gbẹninọ Sọgbe hẹ Klandowiwe Yetọn
8, 9. (a) Tito tẹwẹ hẹn ẹn yọnbasi na Islaelivi lẹ nado do klandowiwe yetọn hlan Jehovah hia? (b) Etẹwẹ mẹhe basi avọ́nunina sọn ojlo mẹ wá lẹ nọ duvivi etọn?
8 Jehovah hùn dotẹnmẹ lẹ dote na omẹ etọn lẹ nado nọgbẹ̀ sọgbe hẹ klandowiwe yetọn taidi akọta de. Di dohia, Osẹ́n etọn hẹn ẹn yọnbasi nado sanvọ́ kavi basi nunina lẹ, ehe delẹ yin dandan tọn, to whenuena devo lẹ yin sọn ojlo mẹ wá. (Heblu lẹ 8:3) Avọ́sinsan mọnkọtọn lẹ bẹ avọ́nunina mimẹ̀, avọ́nunina jinulili tọn, po avọ́nunina jijọho tọn po, he popolẹpo yin nunina sọn ojlo mẹ wá lẹ hẹn—yèdọ nuhe nọ yin nina Jehovah nado mọ nukundagbe etọn bo do pinpẹn-nutọn-yinyọnẹn hia.—Levitiku 7:11-13.
9 Avọ́sinsan sọn ojlo mẹ wá enẹlẹ nọ hẹn homẹhun Jehovah. Biblu dlẹnalọdo avọ́nunina mimẹ̀ po avọ́nunina jinulili tọn po taidi “owán vivi tọn de hlan OKLUNỌ.” (Levitiku 1:9; 2:2) To avọ́nunina jijọho tọn mẹ, ohùn po ojó kanlin lọ tọn po nọ yin nina hlan Jehovah, to whenuena apadewhe olàn lọ tọn nọ yin dùdù gbọn yẹwhenọ lẹ po nunatọ lọ po dali. E gbọnmọ dali yin núdùdù yẹhiadonu tọn he nọtena haṣinṣan jijọho tọn de hẹ Jehovah. Osẹ́n lọ dọmọ: “Whenuena mìwlẹ yí avọ́sannu avọ́nunina jijọho tọn de na hlan OKLUNỌ lọ, mìwlẹ na yí ì na na mì nido yin mẹkẹalọyi.” (Levitiku 19:5) Dile etlẹ yindọ Islaelivi lẹpo wẹ yin kinklandowiwe hlan Jehovah sọn jiji whenu, mẹhe basi dide nado yí Jehovah do basi Jiwheyẹwhe yetọn nugbonugbo gbọn avọ́nunina lẹ bibasi sọn ojlo mẹ wá dali lẹ ‘nọ yin mẹkẹalọyi’ bosọ nọ yin didona susugege.—Malaki 3:10.
10. Nawẹ Jehovah do homẹgble etọn hia to azán Isaia po Malaki po tọn lẹ gbè gbọn?
10 Ṣigba, akọta Islaeli tọn gboawupo pludopludo nado yin nugbonọ hlan Jehovah. Gbọn yẹwhegán etọn Isaia gblamẹ, Jehovah dọna yé dọmọ: “Hiẹ ma hẹn kanlin pẹvi nunina mimẹ̀ towe tọn wá na mi; mọ hiẹ ma yí avọ́ towe do gbògbéna mi, yẹn ma yí nunina do hẹn we sẹ̀n [gba].” (Isaia 43:23) Humọ, nunina he ma yin whinwhàn gbọn owanyi dali bo masọ yin bibasi sọn ojlo mẹ lẹ ma tindo nuhọakuẹ depope to Jehovah nukunmẹ. Di dohia, to nudi owhe 300 to Isaia godo, to azán yẹwhegán Malaki tọn gbè, Islaelivi lẹ yí kanlin awutunọ lẹ do sanvọ́. Enẹwutu, Malaki dọna yé dọmọ: “Yẹn ma tindo homẹhun de to mì mẹ gba, wẹ OKLUNỌ awhànpa lẹ tọn dọ, mọ yẹn ma nasọ kẹalọyi avọ́nunina de to alọ mìtọn mẹ gba. . . . Mìwlẹ ko sọ hẹn enẹ he yè bẹ gbọn huhlọnnu dali wá, po sẹkunọ lọ po, po lanmẹzọ̀nnọ lọ po; le wẹ mìwlẹ hẹn avọ́nunina lọ wá do: be yẹn do kẹalọyi ehe sọn alọ mìtọn mẹ? wẹ OKLUNỌ dọ.”—Malaki 1:10, 13; Amọsi 5:22.
Yin Gbigbẹdai Taidi Akọta Klandowiwe De
11. Dotẹnmẹ tẹwẹ yin nina Islaeli?
11 To ojlẹ he mẹ Islaelivi lẹ lẹzun akọta klandowiwe de hlan Jehovah, e dopagbe na yé dọmọ: “Eyin mìwlẹ na yí ogbè ṣie sè nugbonugbo, bo yìn alẹnu ṣie, whenẹnu wẹ mìwlẹ na yin adọkunnu vivẹ de hlan mi sọn ṣẹnṣẹn gbẹtọ lẹpo tọn: na aigba lẹpo wẹ ṣie: mìwlẹ nasọ yin ahọludu yẹwhenọ lẹ tọn de, podọ akọta wiwe de hlan mi.” (Eksọdusi 19:5, 6) Mẹssia dopagbe lọ na sọawuhia to ṣẹnṣẹn yetọn bo na hùn dotẹnmẹ tintan lọ dote na yé nado lẹzun hagbẹ gandudu Ahọluduta Jiwheyẹwhe tọn tọn lẹ. (Gẹnẹsisi 22:17, 18; 49:10; 2 Samuẹli 7:12, 16; Luku 1:31-33; Lomunu lẹ 9:4, 5) Ṣigba suhugan Islaelivi lẹ tọn ma nọgbẹ̀ sọgbe hẹ klandowiwe yetọn taidi akọta de gba. (Matiu 22:14) Yé gbẹ́ Mẹssia lọ dai bo hù i to godo mẹ.—Owalọ lẹ 7:51-53.
12. Hodidọ Jesu tọn tẹlẹ wẹ dohia dọ Jehovah gbẹ́ Islaeli dai taidi akọta klandowiwe etọn?
12 Azán vude whẹpo Jesu do kú, e dọna nukọntọ sinsẹ̀n Ju tọn lẹ dọmọ: “Be mìwlẹ ma ko hia to Owe-wiwe lẹ mẹ gbede, dọ, Zannu he didotọ lẹ gbẹdai, doponẹ wẹ yè hẹn yin gángánsu họlọnglọnẹn tọn, ehe wẹ sọn [Jehovah] dè, e sọ jiawu to nukun mítọn mẹ. Enẹwutu wẹ yẹn dọ hlan mì, dọ, Yè na yí ahọludu Jiwheyẹwhe tọn sọn mì dè, yè nasọ yí na akọta de he na de sinsẹ́n etọn jẹgbonu.” (Matiu 21:42, 43) Nado dohia yé dọ Jehovah ko gbẹ́ yé dai taidi akọta klandowiwe Etọn, Jesu dọmọ: “Jelusalẹm E, Jelusalẹm, hiẹ mẹhe hù yẹwhegán lẹ, bosọ dlan zannu do mẹhe yè dohlan we lẹ, whla nẹmu wẹ yẹn do ko bẹ ovi towe lẹ pli, dile koklosi de nọ bẹ ovi etọn lẹ do awà etọn glọ do, bọ mìwlẹ ma jlo! Pọ́n, yè jo owhé mìtọn dai hlan mì ovọ́.”—Matiu 23:37, 38.
Akọta Klandowiwe Yọyọ De
13. Hodidọ dọdai tọn tẹwẹ Jehovah dọ to azán Jẹlemia tọn lẹ gbè?
13 To ojlẹ yẹwhegán Jẹlemia tọn mẹ, Jehovah dọ dọdai nuyọyọ de tọn gando omẹ etọn lẹ go. Mí hia dọmọ: “Doayi e go, azán lẹ wá, wẹ OKLUNỌ dọ, bọ yẹn na basi alẹnu yọyọ de hẹ owhé Islaeli tọn, podọ hẹ owhé Juda tọn: kẹdẹdi alẹnu he yẹn basi hẹ otọ́ yetọn lẹ to azán he mẹ yẹn yí alọ do hẹn yé nado hẹn yé tọ́nsọn aigba Egipti tọn ji ma wẹ gba; alẹnu ṣie he yé gbà, le yẹn tlẹ yin OKLUNỌ to yé ji do, wẹ OKLUNỌ dọ. Ṣigba ehe wẹ alẹnu he yẹn na basi hẹ owhé Islaeli tọn to azán nẹlẹ godo, wẹ OKLUNỌ dọ; yẹn na yí osẹ́n ṣie do ohò yetọn mẹ dọ́n, podọ ayiha yetọn mẹ wẹ yẹn na wlan ẹn do; yẹn nasọ yin Jiwheyẹwhe yetọn, yewlẹ nasọ yin omẹ ṣie.”—Jẹlemia 31:31-33.
14. Whetẹnu wẹ akọta yọyọ Jehovah tọn he yin kinklandowiwe lọ wá aimẹ podọ to dodonu tẹ ji? Basi zẹẹmẹ akọta yọyọ enẹ tọn.
14 Dodonu alẹnu yọyọ ehe tọn yin zizedai to whenuena Jesu kú bo ze nuhọakuẹ hùnsọndai etọn tọn donukọnna Otọ́ etọn, to owhe 33 W.M. (Luku 22:20; Heblu lẹ 9:15, 24-26) Nalete, alẹnu yọyọ lọ bẹazọ́n jẹeji to whenuena gbigbọ wiwe yin kinkọnjẹgbonu to Pẹntikọsti 33 W.M. bọ akọta yọyọ de he yin “Islaeli Jiwheyẹwhe tọn” yin jiji. (Galatianu lẹ 6:16; Lomunu lẹ 2:28, 29; 9:6; 11:25, 26) Apọsteli Pita wlanwe hlan Klistiani yiamisisadode lẹ dọmọ: “Mì wẹ whẹndo he yè de, mẹhe yin tado yẹwhenọduta tọn, akọta wiwe, gbẹtọ na nudido Jiwheyẹwhe tọn titi: na mì nido jla pipà ewọ he ylọ mì sọn zinvlu mẹ do hinhọ́n ablanọ etọn tọn mẹ: mẹhe, to hohowhenu, ma yin gbẹtọ de, ṣigba dinvie bọ mì sọ lẹzun omẹ Jiwheyẹwhe tọn.” (1 Pita 2:9, 10) Kanṣiṣa vonọtaun he tin to Jehovah po akọta Islaeli tọn po ṣẹnṣẹn ko doalọte. To owhe 33 W.M., dona Jehovah tọn ko yin didesẹ sọn akọta Islaeli tọn ji bo yin kinkọ̀n do Islaeli gbigbọmẹ tọn, yèdọ agun Klistiani tọn ji—‘akọta he de sinsẹ́n’ Ahọluduta Mẹssia tọn tọ́n.—Matiu 21:43.
Klandowiwe Mẹdopodopo Tọn
15. To Pẹntikọsti 33 W.M., baptẹm nankọtọn wẹ Pita dotuhomẹna hosetọ etọn lẹ nado yí?
15 To Pẹntikọsti 33 W.M. godo, mẹdopodopo, vlavo Ju kavi Kosi, dona klan ede do wiwe hlan Jiwheyẹwhe bo yin bibaptizi “do oyín Otọ́ tọn, po Ovi tọn po, po [gbigbọ wiwe] tọn po mẹ.”a (Matiu 28:19) To azán Pẹntikọsti tọn gbè, apọsteli Pita dọna Ju po mẹdiọzun Juvi ahunjijlọnọ lẹ po dọmọ: “Mì lẹnvọjọ, na yè nisọ baptizi dopodopo mìtọn to oyín Jesu Klisti tọn mẹ na desẹ ylando tọn, mìwlẹ nasọ mọ nina [gbigbọ wiwe] tọn yí.” (Owalọ lẹ 2:38) Ju po mẹdiọzun Juvi mọnkọtọn lẹ po dona dohia gbọn baptẹm yetọn dali dọ yé ko klan gbẹzan yetọn do wiwe hlan Jehovah podọ dọ yé ko kẹalọyi Jesu taidi aliho lọ he gblamẹ Jehovah na jo ylando yetọn lẹ na yé te. Yé dona kẹalọyi i taidi Yẹwhenọ Daho Jehovah tọn podọ taidi Nukọntọ yetọn, yèdọ Ota agun Klistiani tọn.—Kọlọsinu lẹ 1:13, 14, 18.
16. To azán Paulu tọn gbè, nawẹ Ju po Kosi ahunjijlọnọ lẹ po lẹzun hagbẹ Islaeli gbigbọmẹ tọn gbọn?
16 To owhe lẹ godo, apọsteli Paulu dọmọ: “Yẹn dọ hlan yé Damasku tọn lẹ whẹ́ podọ to Jelusalẹm, podọ lẹdo Jude dali lẹpo, podọ hlan Kosi lẹ ga, dọ yé ni lẹnvọjọ, bo lẹ́ do Jiwheyẹwhe dè, bo wazọ́n he jẹna lẹnvọjọ yetọn.” (Owalọ lẹ 26:20) To whenuena Paulu ko hẹn Ju po Kosi lẹ po tindo nujikudo dọ Jesu wẹ yin Klisti kavi Mẹssia lọ godo, e gọalọna yé nado klan yede do wiwe bo yin bibaptizi. (Owalọ lẹ 16:14, 15, 31-33; 17:3, 4; 18:8) Gbọn lilẹhlan Jiwheyẹwhe dè dali, devi yọyọ mọnkọtọn lẹ lẹzun hagbẹ Islaeli gbigbọmẹ tọn lẹ.
17. Azọ́n ohia didomẹgo tọn tẹwẹ to sisẹpọ vivọnu, podọ azọ́n devo tẹwẹ to yìyì po awuyiya po?
17 To egbehe, ohia godo tọn didogona pipotọ Islaelivi gbigbọmẹ tọn lẹ ko sẹpọ. To whenuena e yin tadona, “angẹli ẹnẹ” he hẹn jẹhọn vasudo “nukunbibia daho” lọ tọn go lẹ na yin gbedena nado jo yé do. Todin whẹ́, azọ́n “gbẹtọ susugege” he tindo todido nado nọgbẹ̀ to aigba ji lẹ bibẹpli tọn to yìyì po awuyiya po. “Lẹngbọ devo” ehelẹ desọn ojlo mẹ nado yí yise zan to “ohùn Lẹngbọvu lọ tọn” mẹ bo yin bibaptizi taidi dohia klandowiwe yetọn tọn hlan Jehovah. (Osọhia 7:1-4, 9-15; 22:17; Johanu 10:16; Matiu 28:19, 20) Jọja susu he ko yin pinplọn whẹ́n gbọn mẹjitọ Klistiani lẹ dali tin to ṣẹnṣẹn yetọn. Eyin hiẹ yin dopo to jọja mọnkọtọn lẹ mẹ, homẹ towe na hùn nado hia hosọ he bọdego.
[Nudọnamẹ Odò Tọn]
Dogbapọn
• Naegbọn ovi flinflin he tin to Islaeli lẹ ma tindo nuhudo nado klan yede do wiwe hlan Jehovah?
• Nawẹ Islaelivi lẹ sọgan dohia dọ yé to gbẹnọ sọgbe hẹ klandowiwe yetọn gbọn?
• Naegbọn Jehovah gbẹ́ Islaeli dai taidi akọta klandowiwe etọn, podọ nawẹ e yin tẹndiọna gbọn?
• Sọn Pẹntikọsti 33 W.M. sọyi, etẹwẹ Ju lẹ po Kosi lẹ po dona wà nado lẹzun hagbẹ Islaeli gbigbọmẹ tọn lẹ?
[Yẹdide to weda 21]
Ovi flinflin he tin to Islaeli lẹ yin jiji taidi hagbẹ akọta dide Jiwheyẹwhe tọn lẹ
[Yẹdide to weda 23]
Islaelivi dopodopo dona basi nudide nado sẹ̀n Jiwheyẹwhe
[Yẹdide to weda 23]
Nunina sọn ojlo mẹ wá lẹ hùn dotẹnmẹ dote na Islaelivi lẹ nado do owanyi he yé tindo na Jehovah hia
[Yẹdide to weda 25]
To Pẹntikọsti 33 W.M. godo, hodotọ Klisti tọn lẹ dona klan yede do wiwe hlan Jiwheyẹwhe bo do ehe hia gbọn baptẹm dali