‘Mì Dibu Kavi Savò Blo’
‘Mì dibu kavi savò blo. Jehovah na tin hẹ mì.’—2 OTANNUGBO LẸ 20:17.
1. Nugandomẹgo tẹwẹ gufinfọn nọ tindo do gbẹtọ lẹ ji, podọ naegbọn obu yetọn tindo dodonu dagbe?
GUGINFỌN! Hogbe enẹ nọ hẹn obu wá ahun mẹ, bo nọ fọ́n numọtolanmẹ hihọ́ matindo po agbátọnọ-yinyin tọn po dote. E nọ hẹn numọtolanmẹ sijijọ, awubla, po homẹgble po tọn wá. Podọ hogbe lọ basi zẹẹmẹ nuhe mẹsusu to linlẹn dọ e na dotukla gbẹtọvi na owhe susu he ja lẹ tọn. Nugbo lọ dọ otò susu ko to avùnho sọta gufinfọn wunmẹ voovo lẹ na owhe susu ṣigba bo ma ko tindo kọdetọn dagbe ko hẹn obu enẹ tindo dodonu he sọgbe.
2. Nawẹ Kunnudetọ Jehovah tọn lẹ nọ yinuwa hlan nuhahun gufinfọn tọn gbọn, he fọ́n kanbiọ tẹlẹ dote?
2 Etomọṣo, whẹwhinwhẹ́n dagbe tin na todido. Kunnudetọ Jehovah tọn, he to yẹwhehodọ po zohunhun po to aigba 234 ji lẹ, yin pọndohlan dagbenọ taun. Kakati nado to budi dọ gufinfọn ma na yin didesẹ gbede, yé deji dọ e na yin mọ—podọ to madẹnmẹ. Be e sọgbe hẹ lẹnpọn dagbe na mẹdevo lẹ nado tindo pọndohlan dagbe yetọn ya? Mẹnu wẹ sọgan tindo kọdetọn dagbe to danuwiwa ehe didesẹ sọn aihọn lọ mẹ mẹ, podọ nawẹ e sọgan yọnbasi gbọn? To whenuena e yindọ mímẹpo wẹ sọgan ko jiya danuwiwa wunmẹ delẹ tọn pọ́n, e jẹ dọ mí ni gbadopọnna dodonu pọndohlan dagbe enẹ tọn.
3. Etẹlẹ wẹ sọgan hẹn obu wá, podọ dọdai tẹwẹ yin didọ gando ojlẹ mítọn go?
3 To egbehe, gbẹtọ lẹ to budi bo to avòsa na whẹwhinwhẹ́n voovo lẹ wutu. Lẹnnupọndo gbẹtọ wọ̀bibla he ma sọgan penukundo yede go ba na yọnhowhe wutu, mẹhe to oya awutu jẹmagbọ tọn ji lẹ, po whẹndo hẹntọnọ he to kanvan nado mọ dandannu gbẹ̀mẹ tọn lẹ po ji. Podọ, lẹnnupọndo ayimajai gbẹninọ tọn lọsu ji! Asidan sọgan hẹn okú ajiji wá, kavi e sọgan taidi dọ nugbajẹmẹji lẹdo mí pé, bo jlo na hẹn nuhe mí yiwanna lẹpo gble. Obu po magbọjẹ mọnkọtọn po, gọna nuhahun po flumẹjijẹ susugege mẹdetiti tọn lẹ po, ko hẹn ojlẹ mítọn sọgbe pẹpẹ hẹ nuhe apọsteli Paulu basi zẹẹmẹ etọn dọmọ: “Ehe wẹ hiẹ ni yọnẹn ga, dọ [to azán godo tọn lẹ mẹ] ojlẹ awusinyẹn tọn lẹ na wá. Na gbẹtọ lẹ na lẹzun owanyi na yede tọ́, . . . matin owanyi hẹnnumẹ tọn, alẹdatọ, mẹslẹtọ, awumajainanọ, kanylantọ, vivlẹtọ mẹdagbe lẹ tọn.”—2 Timoti 3:1-3.
4. Adà dagbe tẹwẹ yẹdenanu ylankan heyin didọ to 2 Timoti 3:1-3 mẹ tindo?
4 Nugbo wẹ dọ ninọmẹ awubla tọn wẹ wefọ ehe dohia, ṣigba e sọ dohia dọ todido tin. Doayi e go dọ ‘azán godo tọn’ titonu ylankan Satani tọn lẹ whenu wẹ ojlẹ awusinyẹn tọn ehelẹ na tin. Ehe zẹẹmẹdo dọ kọgbọ ko sẹpọ bọ gandudu pipé Ahọluduta Jiwheyẹwhe tọn, he Jesu plọn hodotọ etọn lẹ nado nọ hodẹ̀ na, na yí otẹn to aihọn ylankan lọ si to madẹnmẹ. (Matiu 6:9, 10) Ahọluduta enẹ yin gandudu olọn mẹ tọn Jiwheyẹwhe tọn, “he ma na yin vivà gbede,” wẹ yẹwhegán Daniẹli dọ ṣigba “e na gbà ahọludu do flinflin bo sú ahọludu [gbẹtọvi tọn] he lẹpo do, ewọ bo nasọ nọte kakadoi.”—Daniẹli 2:44.
Kadaninọ Klistiani Tọn po Gufinfọn Po
5. Nawẹ akọta lẹ ko yinuwa hlan owù gufinfọn tọn gbọn to agọe?
5 Na owhe susu, gufinfọn ko hù gbẹtọ susugege lẹ. Lẹdo aihọn pé, owù gufinfọn tọn ehe jideji taun to mẹgbeyinyan New York City po Washington, D.C. po tọn, to 11 septembre 2001 godo. To pọndohlan mẹ na obá he mẹ gufinfọn gbloada jẹ lẹdo aihọn pé, akọta lẹ kọngbedopọ to niyaniya mẹ nado hoavùn sọta ẹ. Di apajlẹ, sọgbe hẹ linlin lẹ, to 4 décembre 2001, “agbagogán whẹho tògodo tọn lẹ sọn otò Europe, Agewaji Amelika po Ṣẹnṣẹn Asia po tọn 55 mẹ kẹalọyi tito de to pọmẹ” heyin awuwlena nado deanana vivẹnudido yetọn lẹ. Tohodọtọ nukundeji États-Unis tọn de pà nuwiwa ehe dọ e na vọ́ “huhlọn yọyọ” na vivẹnudido avùnhiho sọta gufinfọn tọn. To ajijimẹ, gbẹtọ livi kanweko lẹ wẹ to mahẹ tindo to nuhe The New York Times Magazine ylọ dọ “bẹjẹeji avùnhiho he sẹhundaga de” tọn mẹ. Lehe vivẹnudido mọnkọtọn lẹ na tindo kọdetọn dagbe sọ na yin mimọ to nukọnmẹ. Nalete, kọdetọn awhàn enẹ tọn sọta gufinfọn ko fọ́n obu po ayimajai po dote to mẹsusu mẹ, ṣigba e mayin to mẹhe dotudo Jehovah go lẹ mẹ gba.
6. (a) Naegbọn e sọgan sinyẹnawuna mẹdelẹ to whedelẹnu nado kẹalọyi teninọ kadaninọ Kunnudetọ Jehovah tọn lẹ tọn? (b) Apajlẹ tẹwẹ Jesu zedai na hodotọ etọn lẹ gando nuwiwa tonudidọ tọn go?
6 Kunnudetọ Jehovah tọn lẹ yin yinyọnẹn ganji na kadaninọ to tonudidọ-liho yetọn. Dile etlẹ yindọ mẹsusu nọ jlo nado kẹalọyi teninọ yetọn ehe to ojlẹ jijọho tọn lẹ mẹ, e nọ sinyẹnawuna yé nado wàmọ to ninọmẹ sinsinyẹn tlala lẹ whenu. Gbọzangbọzan, obu po ayimajai he awhàn nọ hẹnwa po nọ fọ́n numọtolanmẹ sinsinyẹn owanyi akọta mẹtọn tọn lẹ dote. Ehe sọgan glọnalina yé nado mọnukunnujẹ nuhewutu mẹdelẹ na gbẹ́ nado nọgodona nujijla titengbe akọta tọn lẹ mẹ. Ṣigba, Klistiani nugbo lẹ yọnẹn dọ yé dona setonuna gbedide Jesu tọn ‘ma nado yin apadewhe aihọn tọn.’ (Johanu 15:19; 17:14-16; 18:36; Jakobu 4:4) Ehe nọ biọ dọ yé ni nọ kada na tonudidọ po whẹho aihọn tọn lẹ po. Jesu ze apajlẹ he sọgbe lọ dai. To pọndohlan mẹ na nuyọnẹn pipé po nugopipe vonọtaun etọn lẹ po, e sọgan ko hẹn ninọmẹ gbẹtọvi tọn lẹ pọnte tlala to azán etọn lẹ gbè. Etomọṣo, e gbẹ́ nado donù tonudidọ mẹ. To bẹjẹeji lizọnyizọn etọn tọn, e gbẹ́ nuzedonukọnnamẹ Satani tọn lọ nado dugán do gandudu aihọn tọn lẹpo ji dai mlẹnmlẹn. To nukọnmẹ, e yí nujikudo do gbẹ́ mẹdide do otẹn tonudidọ tọn mẹ dai mlẹnmlẹn.—Matiu 4:8-10; Johanu 6:14, 15.
7, 8. (a) Etẹwẹ kadaninọ to tonudidọ-liho Kunnudetọ Jehovah tọn lẹ tọn ma zẹẹmẹdo, podọ etẹwutu? (b) Nawẹ Lomunu lẹ 13:1, 2 jẹagọdo mahẹ tintindo to nuwiwa danuwiwa tọn lẹ sọta gandudu lẹ mẹ gbọn?
7 Kadaninọ Kunnudetọ Jehovah tọn lẹ tọn ma dona yin nukunnumọjẹemẹ do agọ̀ nado zẹẹmẹdo dọ yé nọ nọgodona kavi kẹalọyi nuyiwa danuwiwa tọn lẹ gba. Mọwiwa na sọta alọsọakọ́n yetọn nado yin devizọnwatọ “Jiwheyẹwhe owanyi po jijọho po tọn” lẹ. (2 Kọlintinu lẹ 13:11) Yé ko plọn nuhe nọ yin numọtolanmẹ Jehovah tọn gando danuwiwa go. Psalm-kàntọ wlan dọmọ: “OKLUNỌ to dodonọ lẹ whlepọn: ṣigba mẹylankan po omẹ he yiwanna [danuwiwa] po ayiha etọn gbẹwanna.” (Psalm 11:5) Yé sọ yọ́n nuhe Jesu dọna apọsteli Pita ga dọ: “Yí ohí towe do otẹn etọn mẹ; na mẹhe ze ohí lẹpo wẹ na dọ̀n po ohí po.”—Matiu 26:52.
8 Dile etlẹ yindọ whenuho ko dohia hezeheze dọ Klistiani lalo lẹ ko nọ saba ze “ohí,” Kunnudetọ Jehovah tọn lẹ ma nọ wàmọ gba. Yé nọ nọla na nuwiwa mọnkọtọn lẹpo. Kunnudetọ lẹ nọ yí nugbonọ-yinyin do setonuna gbedide Lomunu lẹ 13:1, 2 tọn dọ: “Mì gbọ gbigbọ lẹpo ni yin mẹmẹglọ hlan huhlọn daho lẹ. Na huhlọn de matin adavo sọn Jiwheyẹwhe dè; huhlọn he tin lẹ Jiwheyẹwhe dè wẹ yè do yé ai sọn. Enẹwutu mẹdepope he diọnukunsọ huhlọn, e diọnukunsọ osẹ́ndoai Jiwheyẹwhe tọn: podọ yé he diọnukunsọ lẹ na mọ whẹgbledo yí hlan yede.”
9. Aliho awe tẹlẹ mẹ wẹ Kunnudetọ Jehovah tọn lẹ nọ hoavùn sọta gufinfọn te?
9 Ṣigba, to whenue e yindọ gufinfọn ylan sọmọ, be Kunnudetọ Jehovah tọn lẹ ma dona wà nude nado hoavùn sọta ẹ wẹ ya? Mọwẹ, podọ yé to mọ wà. Tintan, yé ma nọ tindo mahẹ to nuwiwa mọnkọtọn depope mẹ. Awetọ, yé nọ plọn gbẹtọ lẹ nunọwhinnusẹ́n Klistiani tọn lẹ, he na de danuwiwa wunmẹ lẹpo sẹ, eyin yé yin hihodo.a To owhe he wayi mẹ, Kunnudetọ lẹ yí ganhiho 1 202 381 302 zan nado gọalọna gbẹtọ lẹ nado plọn aliho Klistiani tọn ehe. E mayin whenu hinhẹngú wẹ ehe yin gba, na gbẹtọ 265 469 wẹ yin bibaptizi taidi Kunnudetọ Jehovah tọn lẹ, bo dohia gbangba dọ yé ko gbẹ́ danuwiwa dai mlẹnmlẹn.
10. Nukundido tẹlẹ wẹ tin na danuwiwa didesẹ to aihọn egbehe tọn mẹ?
10 Dogọ, Kunnudetọ Jehovah tọn lẹ yọnẹn dọ yewlẹ kẹdẹ ma sọgan de danuwiwa sẹ sọn aihọn mẹ gba. Enẹwẹ zọ́n bọ yé ze jidide mlẹnmlẹn yetọn do omẹ lọ he sọgan wàmọ mẹ—yèdọ Jehovah Jiwheyẹwhe. (Psalm 83:18) Mahopọnna vivẹnudido ahundopo tọn lẹ, gbẹtọ lẹ ma sọgan doalọtena danuwiwa gba. Biblu kàntọ gbọdo lọ na avase mí gando ojlẹ mítọn, heyin ‘azán godo tọn lẹ’ go, bo dọmọ: “Mẹylankan lẹ, po mẹklọtọ lẹ po na to yinylan yì nukọn, yé na to mẹklọ, yè nasọ to yé klọ.” (2 Timoti 3:1, 13) Sọn pọndohlan ehe mẹ, nukundido gbẹtọvi tọn lẹ nado gbawhàn danuwiwa tọn ma sọgan mọ hẹndi yí. To alọ devo mẹ, mí sọgan ganjẹ Jehovah go nado de danuwiwa sẹ mlẹnmlẹn podọ kakadoi.—Psalm 37:1, 2, 9-11; Howhinwhẹn lẹ 24:19, 20; Isaia 60:18.
Adọgbigbo to Mẹgbeyinyan He Ko Sẹpọ lọ Nukọn
11. Afọdide tẹlẹ wẹ Jehovah ko ze nado de danuwiwa sẹ?
11 Na Jiwheyẹwhe jijọho tọn gbẹwanna danuwiwa wutu, mí sọgan mọnukunnujẹ nuhewutu e ko ze afọdide lẹ nado de adọ̀ etọn, yèdọ Satani Lẹgba sẹ mẹ. Na nugbo tọn, E tlẹ ko hẹn Satani nado jiya awhànṣiṣi winyandomẹ tọn de to alọ angẹligán Mikaẹli tọn mẹ—yèdọ Ahọlu Jiwheyẹwhe tọn he ṣẹṣẹ yin zizedo ofìn ji lọ, Jesu Klisti. Biblu basi zẹẹmẹ etọn dole: “Awhàn de sọ tin to olọn mẹ: Mikaẹli po angẹli etọn lẹ po to avùnho hẹ dlagọni lọ; dlagọni lọ sọ to avùnho po angẹli etọn lẹ po, yé masọ gbawhàn; mọ otẹn masọ tin na yé to olọn mẹ ba. Yé sọ yàn dlagọni daho lọ jẹgbonu, odàn hoho lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlan aigba ji, bosọ yàn angẹli etọn lẹ jẹgbonu po e po.”—Osọhia 12:7-9.
12, 13. (a) Etẹwẹ jẹna ayidego gando owhe 1914 go? (b) Dọdai tẹwẹ Ezekiẹli dọ gando mẹhe nọgodona Ahọluduta Jiwheyẹwhe tọn lẹ go?
12 Ojlẹ hihia Biblu tọn po nujijọ aihọn tọn lẹ po kọngbedopọ to owhe 1914 dide mẹ taidi ojlẹ he mẹ awhàn olọn mẹ tọn enẹ wá aimẹ. Sọn whenẹnu gbọ́n, ninọmẹ aihọn tọn lẹ ko ylan deji. Osọhia 12:12 basi zẹẹmẹ nuhe zọ́n tọn, dọmọ: “Enẹwutu mì to ayajẹ, mì olọn lẹ emi, po mì he nọ nọ̀ yé mẹ lẹ po. Dindọn hlan aihọnmẹnu lẹ, podọ hlan yé he tin to ohù mẹ lẹ, na Lẹgba lọ ko jẹte wá mì dè, po homẹgble daho po wutu, na e yọnẹn dọ whenu gli de wẹ e tindo.”
13 Abajọ homẹgble Lẹgba tọn ko yin anadena taun sọta sinsẹ̀n-basitọ yiamisisadode Jiwheyẹwhe tọn lẹ gọna gbẹdohẹmẹtọ yetọn “lẹngbọ devo” lẹ. (Johanu 10:16; Osọhia 12:17) Nukundiọsọmẹ ehe na jẹ agayiyi pete etọn kọ̀n to madẹnmẹ to whenuena Lẹgba na bẹ mẹgbeyinyan vẹadi etọn jẹeji sọta mẹhe nọ nọgodona Ahọluduta heyin zizedai Jiwheyẹwhe tọn gọna mẹhe ze jidide yetọn do ewọ mẹ lẹpo. Mẹgbeyinyan nujikudo tọn ehe yin alọdlẹndo to Ezekiẹli weta 38 mẹ taidi mẹgbeyinyan “Gọgi . . . sọn aigba Magọgi tọn mẹ.”
14. Vivẹnudido hihọ́ basinamẹ tọn tẹlẹ wẹ Kunnudetọ Jehovah tọn lẹ ko duvivi etọn wayi, podọ be ehe na yinmọ tẹgbẹ̀ wẹ ya?
14 Sọn yinyan sọn olọn mẹ Satani tọn whenu gbọ́n, omẹ Jiwheyẹwhe tọn lẹ ko yin hihọ́ basina sọn mẹgbeyinyan Satani tọn si to whedelẹnu gbọn vivẹnudido tonudọtọ delẹ tọn dali, ehe Osọhia 12:15, 16 basi zẹẹmẹ na to hogbe yẹhiadonu tọn mẹ. To vogbingbọn mẹ, Biblu dohia dọ to mẹgbeyinyan godo tọn Satani tọn whenu, nuyizan gbẹtọvi tọn depope ma na yiavunlọna mẹhe dejido Jehovah go lẹ. Be ehe dona dobuna Klistiani lẹ kavi hẹn yé savò wẹ ya? Paali!
15, 16. (a) Pọndohlan dagbe tẹwẹ hogbe mẹhẹndeji Jehovah tọn lẹ hlan omẹ etọn lẹ to azán Jehọṣafati tọn gbè wleawuna na Klistiani lẹ to egbehe? (b) Aliho nuyiwa tọn tẹwẹ Jehọṣafati po omẹ etọn lẹ po zedai na devizọnwatọ Jiwheyẹwhe tọn lẹ to egbehe?
15 Jiwheyẹwhe na nọgodona omẹ etọn lẹ kẹdẹdile e nọgodona akọta dide etọn to azán Ahọlu Jehọṣafati tọn gbè do. Mí hia dọmọ: “Mì tuntoai, Juda lẹpo, po mì tòmẹnu Jelusalẹm tọn lẹ po, po hiẹ Jehọṣafati ahọlu po; le wẹ OKLUNỌ dọ hlan mì, Mìwlẹ dibu blo, mì sọ yin avosatọ gbọn linlẹn mẹsusu gege he tọn lẹ dali blo; na awhàn lọ mayin mìtọn gba, Jiwheyẹwhe tọn wẹ. . . . Mìwlẹ ma do avùn na hò to awhàn he mẹ gba, mì tò mìde, mì ni ṣite abọẹ, bo mọ whlẹngán OKLUNỌ tọn to mì dè, mì Juda po Jelusalẹm po emi [mì dibu kavi savò blo. To osọ̀ mì tọ́nyi yé ji, podọ Jehovah na tin hẹ mì].”—2 Otannugbo lẹ 20:15-17.
16 Omẹ Juda tọn lẹ yin hinhẹn deji dọ yé ma dona hoavùn. Mọdopolọ, omẹ Jiwheyẹwhe tọn lẹ ma na ze awhànfunnu lẹ nado yiavunlọna yede to whenuena Gọgi Magọgi tọn na yangbé yetọn. Kakatimọ, yé na “ṣite abọẹ, bo mọ whlẹngán OKLUNỌ tọn” do ota yetọn mẹ. Nugbo wẹ dọ, teninọ abọẹ ma zẹẹmẹdo alọ lẹ biblá dogo, yèdọ dile omẹ Jiwheyẹwhe tọn lẹ ma nọte ṣududu poun to azán Jehọṣafati tọn lẹ gbè do. Mí hia dọmọ: “Jehọṣafati sọ dẹ́ ota etọn po nukunmẹ etọn po hlan aigba: Juda lẹpo po tòmẹnu Jelusalẹm tọn lẹ po sọ ṣinyọ́n ai to OKLUNỌ nukọn, to taliaina OKLUNỌ. . . . Whenuena [Jehọṣafati] ko yí hónamẹ po gbẹtọ lẹ po, e dè yé he na nọ jihàn hlan OKLUNỌ, bosọ pà to whanpẹ wiwe tọn mẹ, le yé to tintọ́n jei to awhànfuntọ lẹ nukọn, bo to didọmọ, Mì na opẹ́ lẹ hlan OKLUNỌ: na lẹblanu etọn to ote doidoi.” (2 Otannugbo lẹ 20:18-21) Mọwẹ, omẹ lọ lẹ to Jehovah pà po zohunhun po dile yé tlẹ pannukọn mẹgbeyinyan kẹntọ tọn. Ehe ze aliho nuyiwa tọn lọ dai na Kunnudetọ Jehovah tọn lẹ nado hodo to whenue Gọgi na bẹ mẹgbeyinyan etọn jẹeji sọta yé.
17, 18. (a) Pọndohlan tulinamẹ tọn tẹwẹ Kunnudetọ Jehovah tọn lẹ tindo gando mẹgbeyinyan Gọgi tọn go to egbehe? (b) Nuflinmẹ tẹwẹ yin nina Klistiani jọja lẹ to agọe?
17 Kakajẹ whenẹnu—podọ etlẹ yin to bẹjẹeji mẹgbeyinyan Gọgi tọn godo—Kunnudetọ Jehovah tọn lẹ na to godonọna Ahọluduta Jiwheyẹwhe tọn zọnmii. Yé na to hihọ́ po huhlọn po mọyi zọnmii sọn gbẹdido hẹ hugan agun 94 600 lẹ mẹ lẹdo aihọn pé. (Isaia 26:20) Ojlẹ dagbe nankọ die nado pà Jehovah po adọgbigbo po! Na jide tọn, gbigbọṣi nukundido mẹ na mẹgbeyinyan he ko sẹpọ Gọgi tọn ma nọ hẹn yé nado dọ̀n yonu do godo to obu mẹ gba. Kakatimọ, e nọ dozolanmẹna yé nado hẹn avọ́sinsan pipà tọn yetọn jideji jẹ obá he mẹ yé penugo jẹ lẹpo mẹ.—Psalm 146:2.
18 Pọndohlan tulinamẹ tọn ehe yin didohia ganji gbọn jọja fọtọ́n susu he ko bẹ lizọnyizọn whenu-gigọ́ tọn jẹeji lẹdo aihọn pé lẹ dali. Nado zinnudeji dọ aliho gbẹzan tọn enẹ wẹ yọ́n hugan, alọnuwe pẹvi lọ Jeunes gens—Qu’allez-vous faire de votre vie? yin didetọn to plidopọ agbegbe 2002 tọn lẹ ji. Klistiani lẹ, jọja po mẹhomẹ lẹ po, dopẹna nuflinmẹ he wá do ganmẹ enẹ.—Psalm 119:14, 24, 99, 119, 129, 146.
19, 20. (a) Naegbọn Klistiani lẹ ma dona dibu kavi savò? (b) Etẹwẹ hosọ nupinplọn tọn he bọdego na wà?
19 Mahopọnna ninọmẹ aihọn tọn lẹ, Klistiani lẹ ma dona dibu kavi savò. Yé yọnẹn dọ Ahọluduta Jehovah tọn na de danuwiwa wunmẹ lẹpo sẹ mlẹnmlẹn to madẹnmẹ. Yé sọ nọ mọ homẹmimiọn yí to yinyọnẹn mẹ dọ fọnsọnku na hẹn mẹsusu he ko kú gbọn danuwiwa gblamẹ lẹ gọwá ogbẹ̀. To whenuena fọnsọnku ehe na hùn dotẹnmẹ tintan dote na mẹdelẹ nado plọnnu gando Jehovah go, e na hẹn mẹdevo lẹ penugo nado zindonukọn to sinsẹ̀nzọn klandowiwe yetọn hlan ẹn mẹ.—Owalọ lẹ 24:15.
20 Taidi Klistiani nugbo lẹ, mí yọnẹn dọ mí dona hẹn kadaninọ Klistiani tọn go bo magbe nado to mọwà zọnmii. Mí jlo nado hẹn todido jiawu yinyin mẹhe penugo nado “ṣite abọẹ, bo mọ whlẹngán OKLUNỌ tọn” tọn go. Hosọ he bọdego na hẹn yise mítọn lodo gbọn hinhẹn mí yọ́n nujijọ egbehe tọn he to wuntuntun na mí vudevude do hẹndi dọdai Biblu tọn lẹ ji dali.
[Nudọnamẹ Odò Tọn]
a Na apajlẹ mẹhe gbẹ́ gbẹzan danuwiwa tọn dai nado sọgan lẹzun Kunnudetọ lẹ tọn, pọ́n Réveillez-vous! 22 mars 1990, weda 21; 8 août 1991, weda 18; podọ Atọ̀họ̀-Nuhihọ́ Lọ Tọn [Flansegbe] 1er janvier 1996, weda 5; 1er août 1998 [Gungbe], weda 5.
Be Hiẹ Sọgan Na Gblọndo Ya?
• Naegbọn mẹsusu tindo pọndohlan agọ̀ sọmọ to egbehe?
• Naegbọn Kunnudetọ Jehovah tọn lẹ yin pọndohlan dagbenọ gando sọgodo go?
• Etẹwẹ Jehovah ko wà gando adọ̀ danuwiwa lẹpo tọn go?
• Naegbọn mí ma tindo whẹwhinwhẹ́n depope nado dibu na mẹgbeyinyan Gọgi tọn?
[Yẹdide to weda 3]
Jesu ze apajlẹ he sọgbe kadaninọ Klistiani tọn dai
[Yedide to weda 16]
Kunnudetọ jọja fọtọ́n susu ko yí homẹhunhun do bẹ lizọnyizọn whenu-gigọ́ tọn jẹeji
Jeunes gens— Qu’allez-vous faire de votre vie?
[Asisa Yẹdide tọn to weda12]
UN PHOTO 186226/M. Grafman