Nọ Dín Jẹhẹnu Dagbe Mẹdevo lẹ Tọn
“Jiwheyẹwhe ṣie E, flin mi, na dagbe.”—NẸHEMIA 13:31.
1. Nawẹ Jehovah nọ wà dagbe na mẹlẹpo gbọn?
TO AZÁN he sú bo dózin susu godo, hinhọ́n owhè tọn nọ hẹn diọdo dagbe wá. Ayiha gbẹtọ lẹ tọn nọ jai, bọ homẹ yetọn nọ hùn. Mọdopolọ, bọdo owhè ṣadada po yozò sinsinyẹn he dẹn-to-aimẹ po go, jikun finfán—kavi etlẹ yin jikun sinsinyẹn he bẹ to ajijimẹ de—nọ wleawuna kọfanamẹ po kọgbọ po. Mẹdatọ owanyinọ mítọn, Jehovah, ko wleawuna nunina jiawu diọdo ninọmẹ aimẹ tọn ehe do agahomẹ mítọn mẹ. Jesu dlẹnalọdo homẹdagbe Jiwheyẹwhe tọn to whenuena e plọnmẹ dọmọ: “Mì yiwanna kẹntọ mìtọn lẹ, bosọ hodẹ̀ na mẹhe to vivlẹ mì kò, bosọ to homẹkẹn do mì lẹ; na mì nido yin ovi Otọ́ mìtọn he tin to olọn mẹ tọn: na e hẹn owhè etọn vẹ́ do omẹ ylankan lẹ ji, podọ do omẹ dagbe lẹ ji, bosọ [to] jikunja do dodonọ lẹ ji, podọ do mawadodonọ lẹ ji.” (Matiu 5:43-45) Mọwẹ, Jehovah nọ wà dagbe na mẹlẹpo. Devizọnwatọ etọn lẹ dona dovivẹnu nado hodo apajlẹ etọn gbọn jẹhẹnu dagbe mẹdevo lẹ tọn dindin dali.
2. (a) Etẹ ji wẹ dagbewà Jehovah tọn sinai do? (b) Etẹ go wẹ Jehovah nọ doayi gando lehe mí yigbena dagbewà etọn do go?
2 Etẹ ji wẹ dagbewà Jehovah tọn sinai do? Sọn whenue gbọ́n Adam jai biọ ylando mẹ, Jehovah ma ko gboawupo nado dín jẹhẹnu dagbe gbẹtọvi lẹ tọn. (Psalm 130:3, 4) Lẹndai etọn wẹ nado hẹn ẹn yọnbasi na gbẹtọvi tonusetọ lẹ nado duvivi ogbẹ̀ tọn to Paladisi mẹ. (Efesunu lẹ 1:9, 10) Ojọmiọn etọn ko na mí nukundido whlẹngán tọn sọn ylando po mape po si gbọn Okún dopagbe lọ gblamẹ. (Gẹnẹsisi 3:15; Lomunu lẹ 5:12, 15) Alọkikẹyi tito ofligọ lọ tọn na hẹn ẹn yọnbasi na mí nado gọ̀ jẹ pipé kọ̀n. Jehovah to dopodopo mítọn lẹ gbeje pọ́n nado dindona lehe mí nọ yinuwa hlan homẹdagbe etọn do. (1 Johanu 3:16) E nọ doayi nudepope he mí wà nado do pinpẹn-nutọn-yinyọnẹn mítọn hia na dagbewà etọn go. “Jiwheyẹwhe mayin mawadodonọ nado wọn azọ́n mìtọn po tukla owanyi mìtọn tọn po, he mì sọhia gbọn oyín etọn dali,” wẹ apọsteli Paulu wlan.—Heblu lẹ 6:10.
3. Kanbiọ tẹwẹ mí dona gbadopọnna?
3 To whelọnu lo, nawẹ mí sọgan hodo apajlẹ Jehovah tọn to jẹhẹnu dagbe mẹdevo lẹ tọn dindin mẹ gbọn? Mì gbọ mí ni gbadopọnna gblọndo kanbiọ ehe tọn lẹ to adà ẹnẹ gbẹzan tọn mẹ: (1) lizọnyizọn Klistiani tọn, (2) whẹndo, (3) agun, podọ (4) haṣinṣan mítọn hẹ mẹdevo lẹ.
To Lizọnyizọn lọ Mẹ
4. Nawẹ mahẹ tintindo to lizọnyizọn Klistiani tọn mẹ nọ dohia dọ mí to jẹhẹnu dagbe mẹdevo lẹ tọn dín gbọn?
4 “Ogle wẹ aihọn,” wẹ zẹẹmẹ he Jesu basi dile e to gblọndona na kanbiọ devi etọn lẹ tọn gando zẹẹmẹ oló likun po ogbé po tọn go. Taidi devi egbezangbe Klisti tọn lẹ, mí yọ́n nugbo ehe to whenuena mí tin to lizọnyizọn lọ mẹ. (Matiu 13:36-38; 28:19, 20) Kunnudide mítọn bẹ yise mítọn lilá to gbangba hẹn. Nugbo lọ dọ Kunnudetọ Jehovah tọn lẹ yin yinyọnẹn ganji na lizọnyizọn yetọn sọn whédegbè-jẹ-whédegbè podọ to tòhomẹ-liho lẹ ji yin kunnudenu dọ mí yin vivẹnunọ to mẹhe jẹna owẹ̀n Ahọluduta lọ tọn lẹpo dindin mẹ. Na nugbo tọn, Jesu dọmọ: “Otò depope kavi gbeta depope mẹ he mì na biọ, mì kanse eyin mẹhe to e mẹ lẹ jẹ.”—Matiu 10:11; Owalọ lẹ 17:17; 20:20.
5, 6. Naegbọn mí nọ sinyẹnlin to dlapọn bibasina gbẹtọ lẹ pludopludo to owhé yetọn lẹ gbè mẹ?
5 To gbẹtọ lẹ didlapọn whenu, mí nọ doayi gbeyiyi yetọn hlan owẹ̀n mítọn go. To whedelẹnu mí nọ mọdọ mẹde na do ojlo hia to whédo de mẹ, to whenuena mẹdevo sọn whédo dopolọ mẹ sọgan dọ dọ, “Mí ma tindo ojlo gba,” bọ mí dona lẹkọ. Lehe e blawu do sọ dọ nukundiọsọmẹ kavi ojlo matindo mẹde tọn nọ yinuwado gbeyiyi mẹdevo tọn ji! To whelọnu lo, etẹwẹ mí sọgan wà nado sinyẹnlin to jẹhẹnu dagbe mẹdevo lẹ tọn dindin mẹ?
6 Dlapọn mítọn devo yì owhé lọ gbè to whenuena mí to kunnude to lẹdo enẹ mẹ sọgan hùn dotẹnmẹ dote nado dọho tlọlọ na mẹhe gbẹ́ ohó mítọn to dlapọn tintan whenu. Nuhe jọ to ojlẹ enẹ mẹ finflin sọgan gọalọna mí nado wleawudai. Nukundiọsọmẹtọ lọ sọgan ko yinuwa po ayilinlẹn dagbe lẹ po, bo yise dọ emi dona doalọtena mẹhe tindo ojlo lọ sọn todidoai na owẹ̀n Ahọluduta lọ tọn mẹ. Vlavo pọndohlan etọn lẹ ko yin nuyiwadeji gbọn nudọnamẹ lalo lẹ dali gando lẹndai mítọn lẹ go. Ṣigba enẹ ma dona glọnalina mí sọn linsinsinyẹn yíyí do dọyẹwheho wẹndagbe Ahọluduta lọ tọn to owhé enẹ gbè mẹ, bo tẹnpọn nado vọ́ nukunnumọjẹnumẹ agọ̀ lẹ jlado po zinzin po. Mí jlo na gọalọna mẹlẹpo nado wá oyọnẹn he pegan Jiwheyẹwhe tọn kọ̀n. Vlavo Jehovah na dọ̀n omẹ enẹ hlan ede dè to whenẹnu.—Johanu 6:44; 1 Timoti 2:4.
7. Etẹwẹ sọgan gọalọna mí nado yin pọndohlan dagbenọ to whenuena mí dọnsẹpọ gbẹtọ lẹ?
7 Anademẹ he Jesu na devi etọn lẹ sọ bẹ nukundiọsọmẹ whẹndo tọn hẹn ga. Be e ma dọmọ: “Yẹn wá nado klan visunnu dovo do otọ́ etọn ji, viyọnnu do onọ̀ etọn ji, podọ asi ovi tọn do onọ̀ asu etọn tọn ji” ya? Jesu yidogọ dọ: “Kẹntọ gbẹtọ de tọn wẹ yé he tin to owhé ewlọsu tọn gbè lẹ na yin.” (Matiu 10:35, 36) Ṣogan, ninọmẹ po walọyizan lẹ po nọ diọ. Awutu madonukun de, okú ajiji hẹnnumẹ de tọn, nugbajẹmẹji lẹ, kọgbidinamẹ numọtolanmẹ tọn lẹ, po onú susu devo lẹ po nọ yinuwado nuyiwa gbẹtọ lẹ tọn hlan yẹwhehodidọ mítọn ji. Eyin mí tindo pọndohlan agọ̀—dọ mẹhe mí to yẹwhehodọ na lẹ ma na do ojlo hia gbede—be mí to jẹhẹnu dagbe yetọn lẹ dín nugbonugbo ya? Naegbọn mí ma na yí ayajẹ do vọ́ owhé yetọn lẹ dlapọn to whedevonu? Mí sọgan mọ gbeyiyi he gbọnvo. To whedelẹnu e mayin nuhe mí dọ kẹdẹ wẹ nọ hẹn gbeyiyi dagbe wá gba ṣigba aliho he mẹ mí dọ ẹ te. Odẹ̀ vivẹvivẹ hihò hlan Jehovah whẹpo do jẹ yẹwhehodọ ji na gọalọna mí na jide tọn nado yin pọndohlan dagbenọ bo ze owẹ̀n Ahọluduta tọn donukọnna mẹlẹpo to aliho ojlofọndotenamẹ tọn mẹ.—Kọlọsinu lẹ 4:6; 1 Tẹsalonikanu lẹ 5:17.
8. Etẹwẹ sọgan dekọtọn eyin Klistiani lẹ nọ dín jẹhẹnu dagbe hẹnnumẹ mayisenọ yetọn lẹ tọn?
8 Mẹhe wá sọn hẹnnu dopolọ mẹ susu wẹ to Jehovah sẹ̀n to agun delẹ mẹ. Nuhe nọ saba fọnjlodotena jọja he tin to hẹnnu lọ mẹ lẹ wẹ linsinsinyẹn hẹnnumẹ mẹhomẹ de tọn he haṣinṣan dagbe etọn hẹ whẹndo lọ podọ hẹ alọwlemẹ etọn nọ hẹn ẹn bọawu na jọja lẹ nado diọ pọndohlan yetọn. Tonusisena ayinamẹ apọsteli Pita tọn ko gọalọna asi Klistiani susu nado diọlinlẹnna asu yetọn “matin ohó” de.—1 Pita 3:1, 2.
To Whẹndo Mẹ
9, 10. Nawẹ Jakobu po Josẹfu po dín jẹhẹnu dagbe hagbẹ whẹndo yetọn tọn lẹ tọn gbọn?
9 Kanṣiṣa pẹkipẹki he kọ̀n hagbẹ whẹndo tọn lẹ dopọ yin adà devo he mẹ mí sọgan nọ dín jẹhẹnu dagbe mẹdevo lẹ tọn te. Gbadopọnna nuplọnmẹ de sọn aliho he mẹ Jakobu yinuwa hẹ visunnu etọn lẹ te. To Gẹnẹsisi weta 37, wefọ 3 po 4 po mẹ, Biblu dohia dọ Jakobu yiwanna Josẹfu taun. Nọvisunnu Josẹfu tọn lẹ yinuwa po awuwhàn po, bo tlẹ blasé nado hù nọvi yetọn. Ṣigba, doayi nuyiwa Jakobu po Josẹfu po tọn go to godo mẹ. Yé omẹ awe lẹ wẹ dín jẹhẹnu dagbe hagbẹ whẹndo yetọn lẹ tọn.
10 To whenuena Josẹfu to devizọnwa taidi anadenanutọ-gán núdùdù tọn to ojlẹ huvẹ sinsinyẹn tọn whenu to Egipti, e yí nọvisunnu etọn lẹ po homẹhunhun po. Dile etlẹ yindọ e ma do ede hia yé to afọdopolọji, e wà nulẹpo nado hẹn ẹn diun dọ yé yin nukunpedego ganji bo tindo núdùdù nado hẹn yì na otọ́ yọnhonọ yetọn. Mọwẹ, mahopọnna dọ nọvisunnu etọn lẹ gbẹwanna ẹn, Josẹfu wà dagbe na yé. (Gẹnẹsisi 41:53–42:8; 45:23) Mọdopolọ, to adọ́zan okú tọn etọn ji, Jakobu lá dona dọdai tọn lẹ do visunnu etọn lẹpo ji. Dile etlẹ yindọ lẹblanulọkẹyi delẹ yin didepo na nuṣiwa yetọn lẹ wutu, yemẹpo wẹ mọ ogú de yí to aigba lọ ji. (Gẹnẹsisi 49:3-28) Dohia jiawu owanyi tẹgbẹ tọn nankọtọn die Jakobu dohia!
11, 12. (a) Apajlẹ dọdai tọn tẹwẹ zinnudo nujọnu-yinyin jẹhẹnu dagbe hagbẹ whẹndo tọn lẹ tọn dindin ji? (b) Etẹwẹ mí plọn sọn apajlẹ otọ́ he tin to oló visunnu duvanọ tọn he Jesu dọ lọ mẹ?
11 Linsinsinyẹn Jehovah tọn to nuyiwa etọn hẹ akọta Islaeli mayisenọ lọ mẹ wleawuna wuntuntun dogọ do lehe e nọ dín jẹhẹnu dagbe omẹ etọn lẹ tọn do. To ninọmẹ whẹndo yẹwhegán Hosea tọn lẹ yiyizan mẹ, Jehovah do owanyi tẹgbẹ tọn etọn hia. Gomẹli, asi Hosea tọn, yin ayọdetọ. Ṣogan, Jehovah dọna Hosea dọmọ: “Sọ vọ́ yì, yiwanna yọnnu mẹyiwanna de sọn asu etọn de, ganṣo yọnnu ayọdetọ de, yèdọ dile OKLUNỌ yiwanna ovi Islaeli tọn lẹ do, le yé tlẹ lẹ́ do yẹwhe devo lẹ dè sọ, podọ yé he yiwanna aklahihi vẹnhúhú lẹ tọn lẹ.” (Hosea 3:1) Naegbọn Jehovah na anademẹ ehelẹ? E yọnẹn dọ to akọta he ko danbú sọn aliho etọn lẹ ji mẹ, mẹdelẹ na yọ́n pinpẹn homẹfa etọn tọn. Hosea dọmọ: “Enẹgodo wẹ ovi Islaeli tọn lẹ na lẹgọ, bo na dín OKLUNỌ Jiwheyẹwhe yetọn, po Davidi ahọlu yetọn po; bo nasọ wá po osi po jẹ OKLUNỌ dè podọ jẹ dagbewanyi etọn mẹ to azán agọgbọnẹn lẹ lọ mẹ.” (Hosea 3:5) Na jide tọn apajlẹ dagbe he ji mí dona lẹnnupọndo to whenuena mí pehẹ nuhahun whẹndo tọn lẹ wẹ ehe yin. Eyin hiẹ zindonukọn nado nọ dín jẹhẹnu dagbe hagbẹ whẹndo towe tọn lẹ, ehe na ze apajlẹ dagbe dai to homẹfa didohia mẹ.
12 Oló Jesu tọn gando visunnu duvanọ lọ go na mí nukunnumọjẹnumẹ dogọ do lehe mí sọgan dín jẹhẹnu dagbe to whẹndo mítọn mẹ do. Visunnu pẹvi lọ lẹkọwa whé to whenuena e ko jo gbẹzan jlòkoko tọn etọn do godo. Otọ́ lọ walẹblanuna ẹn. Nawẹ otọ́ lọ yinuwa hlan lewuwu visunnu daho he ma ko jo whẹndo etọn do pọ́n gbede lọ tọn gbọn? Otọ́ lọ dọna visunnu daho etọn dọmọ: “Ovi, hiẹ tin to dè e whepoponu, nuhe yin ṣie lẹpo wẹ towe.” Ehe mayin hodidọ mẹbibẹfú tọn gba ṣigba jide vọ́ namẹ owanyi otọ́ lọ tọn tọn. “E jẹ mí ni jaya, bosọ yin homẹhunnọ; na nọvisunnu towe he ko yin oṣiọ, e sọ vọ́ togbẹ̀; bo ko yin búbú, yè bosọ mọ ẹn.” Mọdopolọ mí dona nọ dín jẹhẹnu dagbe mẹdevo lẹ tọn.—Luku 15:11-32.
To Agun Klistiani Tọn Mẹ
13, 14. Etẹwẹ yin dopo to aliho he mẹ mí sọgan yìn osẹ́n tado owanyi tọn to agun Klistiani tọn mẹ te?
13 Taidi Klistiani lẹ, yanwle mítọn wẹ nado nọ yìn tado osẹ́n owanyi tọn. (Jakobu 2:1-9) Nugbo wẹ dọ mí sọgan yiwanna hagbẹ agun mítọn tọn lẹ he ninọmẹ akuẹzinzan yetọn tọn gbọnvona mítọn. Ṣigba, be mí gbẹ́ ‘nọ ṣinyan hagbẹ’ na vogbingbọn sinmẹ agbasa tọn, aṣa, kavi sinsẹ̀n tọn lẹ wutu wẹ ya? Eyin mọwẹ, nawẹ mí sọgan hodo ayinamẹ Jakobu tọn gbọn?
14 Awuyiya do mẹhe wá opli Klistiani tọn ji lẹpo nọ do homẹdagbe mítọn hia. To whenuena mí de afọdide tintan lọ nado dọho hẹ mẹyọyọ he dla Plitẹnhọ Ahọluduta tọn pọ́n lẹ, winyan po obu yetọn lẹ po sọgan busẹ. Na nugbo tọn, mẹhe dla opli Klistiani tọn pọ́n na ojlẹ tintan delẹ dọmọ: “Mẹlẹpo wẹ jọmẹ. E taidi dọ mẹlẹpo ko yọ́n mi dai wẹ. Yẹn voawu taun.”
15. Nawẹ jọja he tin to agun mẹ lẹ sọgan yin alọgọna nado do ojlo hia to mẹhomẹ lẹ mẹ gbọn?
15 To agun delẹ mẹ, jọja delẹ sọgan pli dopọ to Plitẹnhọ Ahọluduta tọn mẹ kavi to gbonu etọn to vivọnu opli tọn, bo dapana gbẹdido hẹ mẹhomẹ lẹ. Nawẹ nuhe jlọmẹdote de sọgan yin wiwà nado dù to walọ ehe ji gbọn? Mẹjitọ lẹ wẹ dona ze afọdide tintan lọ bo plọn ovi yetọn lẹ to whégbè, bo hẹn yé tin to awuwle mẹ na opli lẹ. (Howhinwhẹn lẹ 22:6) Yé sọgan deazọ́nna yé nado dín owe voovo lẹ dai na mẹlẹpo nido tindo owe he yé na hẹn yì opli lẹ. Mẹjitọ lẹ wẹ sọ tin to otẹn dagbe hugan mẹ nado na tuli ovi yetọn lẹ nado nọ dọhodopọ hẹ mẹhomẹ kavi madogánnọ lẹ to Plitẹnhọ Ahọluduta tọn mẹ. Tintindo nuhe gọ́ na zẹẹmẹ de nado dọna omẹ mọnkọtọn lẹ sọgan hẹn pekọ wá na ovi lẹ.
16, 17. Nawẹ mẹhomẹ lẹ sọgan dín jẹhẹnu dagbe jọja he tin to agun lọ mẹ lẹ tọn gbọn?
16 Mẹmẹsunnu po mẹmẹyọnnu mẹhomẹ lẹ po dona tindo ojlo to jọja lẹ mẹ to agun mẹ. (Filippinu lẹ 2:4) Yé sọgan de afọdide tintan lọ nado dọho hẹ jọja lẹ to aliho tulinamẹ tọn mẹ. Nuagokun vonọtaun delẹ nọ saba yin gbigbà do flinflin to opli whenu. Jọja lẹ sọgan yin kinkanse eyin yé duvivi opli lọ tọn podọ vlavo eyin nuagokun de tin he yé yọ́n pinpẹn etọn taun bo sọgan yizan. Jọja lẹ yin apadewhe agun lọ tọn bo dona yin pipà na todidoai yetọn podọ na gblọndo depope he yé na to opli ji kavi na mahẹ depope he yé tindo to adà tito-to-whinnu lọ tọn lẹ mẹ. Aliho he mẹ jọja lẹ nọ dogbẹ́ hẹ mẹhomẹ lẹ te to agun lọ mẹ podọ aliho he mẹ yé nọ penukundo whégbèzọ́n paa lẹ go te na dohia dọ yé sọgan penukundo azọngban daho hugan lẹ go ganji to sọgodo.—Luku 16:10.
17 Gbọn alọkikẹyi azọngban dali, jọja delẹ yinukọn jẹ obá he mẹ jẹhẹnu gbigbọmẹ tọn yetọn lẹ hẹn yé penugo nado mọ azọ́ndenamẹ titengbe hugan lẹ yí te. Alọnu hinhẹn ján to nude kọ̀n sọgan sọ glọnalina walọyizan nululu tọn. (2 Timoti 2:22) Azọ́ndenamẹ mọnkọtọn lẹ sọgan ‘tẹ́n nugopipe’ mẹmẹsunnu he to vivẹnudo nado sẹ̀n taidi devizọnwatọ lizọnyizọnwiwa tọn lẹ tọn pọ́n. (1 Timoti 3:10) Mahẹ tintindo sọn ojlo mẹ wá yetọn to opli lẹ ji podọ zohunhun yetọn to lizọnyizọn lọ mẹ, gọna ojlo tintindo to mẹhe tin to agun mẹ lẹpo mẹ, nọ hẹn mẹho lẹ penugo nado mọ nugopipe yetọn to whenuena yé to nulẹnpọndo yé ji na azọ́ndenamẹ dogọ lẹ.
Jẹhẹnu Dagbe Mẹlẹpo Tọn Dindin
18. Owù tẹwẹ dona yin didapana to whẹdida mẹ, podọ etẹwutu?
18 ‘E ma yọ́n nado do mẹnukuntahopọn hia to whẹdida mẹ,’ wẹ Howhinwhẹn lẹ 24:23 dọ. Nuyọnẹn he sọn aga wá nọ biọ to mẹho lẹ si nado dapana mẹnukuntahopọn dile yé to whẹda to agun lọ mẹ. Jakobu dọmọ: “Nuyọnẹn he sọn aga wá whẹ́ wẹ wé, whenẹnu wẹ e yin jijọho, bosọ nọ wà dẹẹdẹ, e ma sinyẹnawu nado vẹvẹna, e gọ́ na lẹblanu po sinsẹ́n dagbe po, [e ma nọ hò mẹnukuntapọn, bo ma nọ wayẹnu].” (Jakobu 3:17) E họnwun dọ, to jẹhẹnu dagbe mẹdevo lẹ tọn dindin mẹ, mẹho lẹ dona hẹn ẹn diun dọ haṣinṣan kavi numọtolanmẹ mẹdetiti tọn lẹ ma yinuwado whẹdida yetọn ji gba. “Jiwheyẹwhe ṣite to agun Jiwheyẹwhe tọn mẹ,” wẹ psalm-kàntọ Asafi wlan. “E to whẹda to yẹwhe lẹ ṣẹnṣẹn [kavi “gbẹtọ jijọ-di-Jiwheyẹwhe tọn lẹ,” he to alọdlẹndo whẹdatọ gbẹtọvi lẹ tọn]. Nawẹ mìwlẹ na dawhẹ mawadodo tọn dẹnsọ, bo nasọ to whẹ̀yí do mẹylankan lẹ ji?” (Psalm 82:1, 2) Mọdopolọ, mẹho Klistiani lẹ nọ dapana ayilinlẹn depope nado hò mẹnukuntapọn to whenuena whẹho de gando họntọn kavi hẹnnumẹ de go. To aliho ehe mẹ yé nọ hẹn pọninọ agun lọ tọn go bo nọ dike gbigbọ Jehovah tọn ni yinuwa po awuvivo po.—1 Tẹsalonikanu lẹ 5:23.
19. Aliho tẹlẹ mẹ wẹ mí sọgan dín jẹhẹnu dagbe mẹdevo lẹ tọn te?
19 To jẹhẹnu dagbe mẹmẹsunnu po mẹmẹyọnnu mítọn lẹ po tọn dindin mẹ, mí nọ do walọyizan Paulu tọn hia to whenuena e wlanwe hlan agun Tẹsalonika tọn. E dọmọ: “Mí sọ do tugbigbo to Oklunọ mẹ na mìtọn wutu dọ, mì ko wà, bo nasọ to nuhe mí degbena mì lẹ wà.” (2 Tẹsalonikanu lẹ 3:4) E na bọawu na mí hugan nado miyọnnukundo nuṣiwa mẹdevo lẹ tọn eyin mí nọ dín jẹhẹnu dagbe yetọn lẹ. Mí na nọ dín adà he mẹ mí sọgan pà mẹmẹsunnu mítọn lẹ te lẹ, bo dapana gbigbọ homọdọdomẹgo tọn. Paulu wlan dọmọ: “Yè biọ to họ̀nkọnsi lẹ mẹ, dọ yè ni mọ omẹ lọ yin nugbonọ.” (1 Kọlintinu lẹ 4:2) Nugbonọ-yinyin mẹhe yin họ̀nkọnsi to agun lọ mẹ lẹ tọn gọna mẹmẹsunnu po mẹmẹyọnnu Klistiani mítọn lẹpo po tọn nọ hẹn yé zun mẹyiwanna mítọn lẹ. Gbọnmọ dali, mí nọ dọnsẹpọ yé pẹkipẹki, bo nọ hẹn kọndopọ họntọnjiji Klistiani tọn lẹ lodo. Mí nọ wleawuna pọndohlan he taidi dehe Paulu tindo dohlan mẹmẹsunnu lẹ to azán etọn gbè. Yé yin “azọ́nwahẹmẹtọ . . . hlan ahọludu Jiwheyẹwhe tọn” podọ ‘alọgọ mẹhẹnlodo tọn de’ na mí. (Kọlọsinu lẹ 4:11) Mí nọ gbọnmọ dali hodo apajlẹ walọyizan Jehovah tọn.
20. Dona tẹlẹ wẹ mẹhe nọ dín jẹhẹnu dagbe mẹdevo lẹ tọn na mọyi?
20 Na jide tọn, mí kọngbedopọ hẹ odẹ̀ Nẹhemia tọn dọmọ: “Jiwheyẹwhe ṣie E, flin mi, na dagbe.” (Nẹhemia 13:31) Lehe homẹ mítọn hùn do sọ dọ Jehovah nọ dín jẹhẹnu dagbe gbẹtọ lẹ tọn! (1 Ahọlu lẹ 14:13) Mì gbọ mí ni nọ wà nudopolọ to nuyiwa mítọn lẹ mẹ hẹ mẹdevo lẹ. Mọwiwà nọ ze todido ofligọ tọn po ogbẹ̀ mavọmavọ to aihọn yọyọ he ko sẹpọ tlala todin mẹ tọn po donukọnna mí.—Psalm 130:3-8.
Nawẹ Hiẹ Na Na Gblọndo Gbọn?
• Etẹ ji wẹ dagbewà Jehovah tọn hlan mẹlẹpo sinai do?
• Nawẹ mí sọgan dín jẹhẹnu dagbe mẹdevo lẹ tọn gbọn
• to lizọnyizọn mítọn mẹ?
• to whẹndo mítọn mẹ?
• to agun mítọn mẹ?
• to haṣinṣan mítọn lẹpo mẹ?
[Yẹdide to weda 18]
Mahopọnna dọ nọvisunnu etọn lẹ gbẹwanna ẹn dai, Josẹfu dín dagbe yetọn
[Yẹdide to weda 19]
Nukundiọsọmẹ ma nọ glọnalina mí sọn tintẹnpọn nado gọalọna mẹlẹpo mẹ
[Yẹdide to weda 20]
Mahopọnna nuhe yé wà wayi lẹ, visunnu Jakobu tọn lẹpo wẹ mọ dona etọn yí
[Yẹdide to weda 21]
Nọ yawu do mẹlẹpo to opli Klistiani tọn lẹ ji