“E Sú Odò de to Ahun Ṣie Mẹ”

“YẸN dopẹna mì po ahun ṣie lẹpo po na nunina whanpẹnọ lọ Dọnsẹpọ Jehovah. E sú odò de to ahun ṣie mẹ—yèdọ nuhudo lọ nado mọdọ Jehovah yiwanna mi bo nọ wlebòna mi. Todin yẹn mọdọ yẹn sẹpọ Jehovah po Visunnu yiwanna etọn po ganji. Yẹn jlo na dọna mẹlẹpo dogbọn owe ehe dali bo na mẹyiwanna ṣie lẹpo vọkan de.” Numọtolanmẹ Kunnudetọ Jehovah tọn de tọn niyẹn dogbọn owe weda-320 yọyọ heyin didetọ́n to Plidopọ Agbegbe “Lilatọ Zohunhunnọ Ahọluduta lọ Tọn Lẹ” tọn ji heyin bibasi to owhe 2002/03 whenu dali. Mì gbọ mí ni gbadopọnna adà owe yọyọ lọ tọn delẹ podọ nuhewutu e yin zinzinjẹgbonu.

Adà Owe Yọyọ lọ Tọn Delẹ

Etẹwẹ owe yọyọ ehe bẹhẹn? Nudọnamẹ heyin awuwlena to hosọ nupinplọn tọn awe he tin to Atọ̀họ̀-Nuhihọ́ Lọ Tọn ehe mẹ lẹpo—podọ susu devo lẹ! Owe lọ tindo weta 31, bọ dopodopo dite sọ hosọ nupinplọn Atọ̀họ̀-Nuhihọ́ Lọ Tọn tọn. To homẹbibiọ lọ po weta atọ̀n tintan lẹ po godo, owe lọ yin mimá do adà ẹnẹ, dopo na jẹhẹnu tangan Jehovah tọn lẹ dopodopo. Adà dopodopo bẹjẹeji po bladopọ jẹhẹnu lọ tọn po. Weta vude he bọdego lẹ dọhodo lehe Jehovah nọ do jẹhẹnu lọ hia do ji. Adà dopodopo bẹ weta de hẹn do Jesu ji. Etẹwutu? Jesu lọsu ko dọ dọ: “Ewọ he ko mọ mi ko mọ Otọ́.” (Johanu 14:9) Taidi apajlẹ pipé Jehovah tọn, Jesu do jẹhẹnu Jiwheyẹwhe tọn lẹ hia mí hezeheze. Adà dopodopo wá vivọnu po weta de po he plọn mí lehe mí sọgan hodo apajlẹ Jehovah tọn to jẹhẹnu heyin hodọdeji lọ didohia mẹ do. To hodọdo jẹhẹnu Jehovah tọn lẹ ji mẹ, owe yọyọ ehe dlẹnalọdo owe Biblu tọn lẹpo.

Owe lọ Dọnsẹpọ Jehovah sọ bẹ adà vonọtaun delẹ hẹn. Bẹsọn weta 2, weta dopodopo tindo apotin de he hosọ etọn yin “Kanbiọ He Na Yin Ayihamẹlẹnpọn Deji Lẹ.” Lẹndai wefọ po kanbiọ heyin awuwlena lẹ tọn po mayin nado basi dogbapọn weta lọ tọn gba. Kakatimọ, yé yin awuwlena nado gọalọna we nado yí Biblu zan to ayihamẹlinlẹnpọn sisosiso do hosọ lọ ji mẹ. Mí na ayinamẹ dọ hiẹ ni yí sọwhiwhe do hia wefọ Biblu tọn lẹ dopodopo. Enẹgodo lẹnnupọndo kanbiọ lọ ji bo dovivẹnu nado basi yizan mẹdetiti tọn. Ayihamẹlẹnpọn mọnkọtọn sọgan whàn ahun towe, bo gọalọna we nado dọnsẹpọ Jehovah pẹkipẹki.—Psalm 19:14.

Yẹdide he tin to owe Dọnsẹpọ Jehovah mẹ lẹ ko yin dodinna po sọwhiwhe po bo yin awuwlena nado sọgan plọnmẹ bo whànmẹ. Weta fọtọ̀nnukunawe bẹ yẹdide gigọ́ whanpẹnọ nujijọ ojlẹ Biblu tọn lẹ tọn hẹn.

Naegbọn E Yin Zinzinjẹgbonu?

Naegbọn owe Dọnsẹpọ Jehovah yin zinzinjẹgbonu? Lẹndai tangan owe yọyọ ehe tọn wẹ nado gọalọna mí nado jẹakọhẹ Jehovah ganji na mí nido sọgan wleawuna haṣinṣan pẹkipẹki hẹ Jiwheyẹwhe mítọn.

Be hiẹ sọgan lẹnnupọndo mẹde ji he sọgan mọaleyi sọn owe Dọnsẹpọ Jehovah mẹ, vlavo Biblu plọntọ de kavi etlẹ yin Klistiani mẹmẹsunnu po mẹmẹyọnnu he ko gbọjọ de po ya? Etẹwẹ dogbọn hiẹ dali—be a ko jẹ owe yọyọ ehe hia ji ya? Eyin lala wẹ, naegbọn a ma na dín ojlẹ de nado bẹjẹeji to madẹnmẹ? Yì agbọji bo lẹnnupọndo nuhe hia a te ji. Na owe yọyọ ehe ni gọalọna we nado dọnsẹpọ Jehovah Jiwheyẹwhe pẹkipẹki, na hiẹ nido sọgan yí ayajẹ daho po zohunhun po do lá wẹndagbe Ahọluduta etọn tọn!