Mí Na Jẹ Owe Dọnsẹpọ Jehovah Plọn Ji to Osẹ He Bẹsọn 6 Janvier Mẹ
1. Bẹsọn osẹ 6 janvier tọn mẹ, dotẹnmẹ hundote tẹlẹ wẹ mí na tindo nado dọnsẹpọ Jehovah dogọ?
1 Jehovah jlo dọ mí ni dọnsẹpọ emi. (Jak. 4:8) Nado sọgan jẹ yanwle enẹ kọ̀n, mí na jẹ owe Dọnsẹpọ Jehovah plọn ji to Biblu Pinplọn Agun tọn whenu to osẹ he bẹsọn 6 janvier mẹ. Homẹbibiọ owe lọ tọn dọ gando lẹndai he wutu e do yin awuwlena go dọmọ: “Sọwhiwhe yíyí do lẹnnupọndo aliho he mẹ Jehovah nọ do jẹhẹnu etọn lẹ dopodopo hia te, pinpọn lehe Jesu Klisti do yé hia to gbesisọ mẹ do, podọ yinyọ́n lehe mílọsu sọgan wleawuna yé do na dọ̀n mí sẹpọ Jiwheyẹwhe.” Agun lẹ ko plọn owe ehe to ojlẹ de mẹ wayi. Ṣigba sọn ojlẹ enẹ mẹ kakajẹ din, wẹnlatọ yọyọ lẹ ko wá nugbo lọ mẹ, podọ whla tintan die he yé na tindo dotẹnmẹ hundote lọ nado gbadopọnna jẹhẹnu he dọnmẹdogo Jehovah tọn lẹ to gigọ́ mẹ. Na mẹhe ko plọn owe lọ dai lẹ, dogbapọn lọ na gọalọna yé nado hẹn pinpẹn-nutọn-yinyọnẹn yetọn na jẹhẹnu Jehovah tọn lẹ siso deji.—Ps. 119:14.
2. Nawẹ owe Dọnsẹpọ Jehovah na yin pinplọn gbọn?
2 Lehe Oplọn lọ Na Yì Do: Anadenanutọ lọ na bẹjẹeji po homẹbibiọ kleun de po. Owe lọ ma dlẹnalọdo wefọ he na yin hihia lẹ, enẹwutu to oplọn lọ whenu, anadenanutọ lọ na nọ de wefọ tangan he dona yin hihia lẹ. Kanbiọ dopo kavi awe sọgan nọ yin kinkanse to vivọnu oplọn dopodopo tọn taidi kanbiọ dogbapọn tọn. Eyin oplọn lọ bẹ apotin he hosọ etọn yin “Kanbiọ He Na Yin Ayihamẹlẹnpọn Deji Lẹ” hẹn, e na yin yiyizan taidi apotin dogbapọn tọn. Eyin whenu tin, anadenanutọ lọ sọgan biọ to mẹplidopọ lẹ si nado hia wefọ he yin dide do apotin lọ mẹ lẹ, podọ enẹgodo e na kàn kanbiọ devo lẹ sè mẹplidopọ lẹ.
3. Dile mí na to dogbapọnna owe ehe, etẹwẹ mí dona wà podọ etẹwutu?
3 Mọaleyi to Gigọ́ Mẹ: Nọ wleawu jẹnukọn eyin a tlẹ ko plọn owe ehe wayi. Nọ tindo mahẹ to gblọndo lẹ nina mẹ, na ehe na hẹn pipà wá na Jehovah, gọalọna we nado nọ flin nudọnamẹ lọ lẹ, bo nasọ hẹn ale wá na mẹdevo lẹ. (Ps. 35:18; Heb. 10:24, 25) Dile a na to ayihamẹlẹnpọn do jẹhẹnu mayọnjlẹ Jehovah tọn lẹ ji, a na dọnsẹpọ ẹ dogọ. (Ps. 77:11-13) Taidi kọdetọn de, gbemima towe nado setonuna gbedide etọn lẹ na sinyẹn dogọ, podọ a nasọ yin whinwhàn dogọ nado nọ dọ ohó etọn na mẹdevo lẹ.—Ps. 150:1-6.