Jehovah, Jiwheyẹwhe Nugbo Tọn
“Hiẹ wẹ fli mi dai, OKLUNỌ E, Jiwheyẹwhe nugbo tọn.”—PSALM 31:5.
1. Ninọmẹ tẹlẹ wẹ tin to olọn mẹ podọ to aigba ji to whenuena lalo ma ko tin?
OJLẸ de tin to whenuena lalo depope matin. Nudida pipé gbigbọnọ lẹ wẹ tin to olọn mayinukundomọ lọ mẹ, bo to Mẹdatọ yetọn, “Jiwheyẹwhe nugbo tọn” lọ sẹ̀n. (Psalm 31:5) Lalo matin, mọjanwẹ oklọ matin. Jehovah nọ dọ nugbo na visunnu gbigbọmẹ tọn etọn lẹ. E wàmọ na e yiwanna yé bo tindo ojlo nujọnu tọn to dagbemẹ-ninọ yetọn mẹ wutu. Ninọmẹ dopolọ wẹ tin to aigba ji. Jehovah dá sunnu po yọnnu tintan lọ po, bo nọ dọho na yé to gbesisọmẹ to aliho he họnwun, to tlọlọ, bo yin nugbo mẹ gbọn asisa dide etọn gblamẹ. Lehe enẹ na ko jiawu do sọ!
2. Mẹnu wẹ hẹn lalo wá aimẹ, podọ etẹwutu?
2 Ṣigba, to nukọnmẹ, visunnu gbigbọnọ Jiwheyẹwhe tọn de yí jintli do yí ede do basi yẹwhe agbàwhlẹntọ de, bo jẹagọdo Jehovah. Nudida gbigbọnọ ehe, he wá yin yinyọnẹn taidi Satani Lẹgba, jlo dọ mẹdevo lẹ ni nọ sẹ̀n emi. Nado jẹ yanwle etọn kọ̀n, e hẹn lalo wá aimẹ taidi nuyizan de nado hẹn mẹdevo lẹ wá anademẹ etọn glọ. To mọwiwa mẹ, e lẹzun ‘lalonọ podọ otọ́ lalo tọn.’—Johanu 8:44.
3. Nawẹ Adam po Evi po yinuwa hlan lalo Satani tọn lẹ gbọn, podọ etẹlẹ wẹ yin kọdetọn lọ?
3 Gbọn odàn de gblamẹ, Satani dọna yọnnu tintan, Evi, dọ eyin e vẹtolina gbedide Jiwheyẹwhe tọn bo dù atin-sinsẹ́n heyin gbigbẹ́ lọ, e ma na kú gba. Lalo wẹ enẹ yin. E sọ dọna ẹn dọ eyin e dù i janwẹ, e na taidi Jiwheyẹwhe, bo yọ́n dagbe po oylan po. Lalo wẹ enẹ lọsu yin. Dile etlẹ yindọ mẹde ma ko dolalo na Evi pọ́n, e dona ko yọnẹn dọ nuhe emi se sọn odàn lọ dè ma sọgbe hẹ nuhe Jiwheyẹwhe ko dọna asu emitọn, Adam. Etomọṣo, e de nado yí Satani se, bo ma yí Jehovah se. Na e yin kiklọ mlẹnmlẹn wutu, e yí atin-sinsẹ́n lọ bo dù. Enẹgodo, Adam lọsu dù sọn atin-sinsẹ́n lọ mẹ. (Gẹnẹsisi 3:1-6) Taidi Evi, Adam ma ko se lalo de pọ́n gbede kavi yin kiklọ gba. (1 Timoti 2:14) Gbọn nuwiwa etọn lẹ gblamẹ, e dohia dọ emi ko gbẹ́ Basitọ emitọn dai. Kọdetọn lọ lẹ yin nugbajẹmẹji na gbẹtọvi. Na tolivivẹ Adam tọn wutu, ylando po okú po—gọna walọ gblezọn po yajiji madosọha lẹ po—gbayipe jẹ kúnkan etọn lẹpo ji.—Lomunu lẹ 5:12.
4. (a) Lalo wunmẹ tẹlẹ wẹ yin dido to Edẹni? (b) Etẹwẹ mí dona wà ma nado yin kiklọ gbọn Satani dali?
4 Lalo lọsu gbayipe. Mí dona yọnẹn dọ lalo heyin dido to jipa Edẹni tọn mẹ enẹlẹ yin mẹgbeyinyan sọta nugbonọ-yinyin Jehovah lọsu titi tọn. Satani sọalọakọ́n dọ Jiwheyẹwhe gbọn oklọ dali to onú dagbe de whlá do asu po asi po tintan lọ. Lalo taun wẹ enẹ yin. Adam po Evi po ma mọaleyi sọn tolivivẹ yetọn mẹ. Yé kú, kẹdẹdile Jehovah ko dọ do. Etomọṣo, mẹgbeyinyan mẹhẹngble Satani tọn sọta Jehovah zindonukọn, jẹ obá lọ mẹ bọ to owhe kanweko susu godo, apọsteli Johanu yin gbigbọdo nado wlan dọ Satani “to aihọn lẹpo klọ.” (Osọhia 12:9) Ma nado yin kiklọ gbọn Satani Lẹgba dali, mí dona tindo jidide mlẹnmlẹn to nugbonọ-yinyin Jehovah po Ohó etọn po tọn mẹ. Nawẹ hiẹ sọgan wleawuna jidide to Jehovah mẹ bo hẹn ẹn lodo bosọ na huhlọn dewe sọta oklọ po lalo he nọ yin zizedaga gbọn Kẹntọ etọn dali lẹ po gbọn?
Jehovah Yọ́n Nugbo Lọ
5, 6. (a) Nawẹ oyọnẹn he Jehovah tindo gbloada sọ? (b) Nawẹ oyọnẹn gbẹtọvi tọn whè sọ eyin mí yí ì jlẹdo Jehovah tọn go?
5 Biblu do Jehovah hia pludopludo taidi mẹhe “dá onú lẹpo.” (Efesunu lẹ 3:9) Ewọ wẹ ‘Omẹ lọ he dá olọn, aigba, ohù, po nuhe tin to yé mẹ lẹ po.’ (Owalọ lẹ 4:24) Na Jehovah wẹ yin Mẹdatọ lọ wutu, e yọ́n nugbo lọ gando onú lẹpo go. Di dohia: Lẹnnupọndo dawe de he basi yẹdide ohọ̀ de tọn bosọ gbá ohọ̀ lọ pete na ede ji. E na yọ́n ohọ̀ enẹ kitokito hugan nupọntọ depope poun. Gbẹtọ lẹ nọ yọ́n nuhe yelọsu basi lẹ ganji. Mọdopolọ, Mẹdatọ lọ yọ́n onú lẹpo gando nuhe e dá lẹ go.
6 Yẹwhegán Isaia yí hogbe vivi lẹ do basi zẹẹmẹ lehe oyọnẹn Jehovah tọn gbloada sọ tọn. Mí hia dọmọ: “Mẹnu wẹ ko jlẹ osin to alọpahomẹ etọn mẹ, bo yí alọ do jlẹ olọn, bo bẹ kọgudu aigba tọn pli do ojlẹnu mẹ, bo jlẹ osó lẹ to nujlẹgan ji; podọ okọta lẹ to nujlẹnu mẹ? Mẹnu wẹ ko hiali gbigbọ OKLUNỌ tọn, kavi bo yin honamẹtọ etọn, bo plọn ẹn? Mẹnu wẹ e nọ lẹnnu hẹ, mẹnu wẹ plọnnu in, bo plọn ẹn to aliho whẹdida [dodo] tọn mẹ, bo plọn ẹn nuyọnẹn, bosọ yí ali zìnzìn tọn hia ẹ?” (Isaia 40:12-14) Na nugbo tọn, “Jiwheyẹwhe oyọnẹn tọn de” wẹ Jehovah yin bosọ “yin pipé to oyọnẹn mẹ.” (1 Samuẹli 2:3; Job 36:4; 37:16) Lehe nuhe míwlẹ yọnẹn whè sọ eyin mí yijlẹdo ewọ tọn go! Mahopọnna oyọnẹn sẹhundaga he ko yin bibẹpli gbọn gbẹtọvi dali, nukunnumọjẹnumẹ mítọn gando nudida yinukundomọ lẹ go ma tlẹ ‘sọtẹn to apá na aliho Jiwheyẹwhe tọn lẹ.’ E taidi ‘pádide’ de eyin mí yí ì jlẹdo ‘wanyinyẹn huhlọnnọ’ de go.—Job 26:14.
7. Etẹwẹ Davidi yọnẹn gando oyọnẹn Jehovah tọn go, enẹwutu etẹwẹ mílọsu dona kẹalọyi?
7 Na Jehovah wẹ dá mí wutu, e sọgbe hẹ lẹnpọn dagbe dọ e ni yọ́n mí ganji. Ahọlu Davidi yọ́n ehe. E wlan dọmọ: “OKLUNỌ E, hiẹ ko dindona mi, bosọ yọ́n mi. Hiẹ yọ́n aisinsin ṣie po finfọnṣite ṣie po, hiẹ tunwun lẹndai ṣie to olá boboe. Hiẹ dindona omọ́ji ṣie po aimimlọn ṣie po, bosọ yin mẹyọndona aliho ṣie lẹpo. Na ohó depope matin to odẹ́ ṣie mẹ, doayi e go, OKLUNỌ E, hiẹ yọ́n ẹn patapata.” (Psalm 139:1-4) Nugbo wẹ dọ, Davidi yọnẹn dọ gbẹtọvi lẹ nọ yí mẹdekannujẹ zan—Jiwheyẹwhe ko na yé nugopipe lọ vlavo nado setonu kavi vẹtolina ewọ. (Deutelonomi 30:19, 20; Jọṣua 24:15) Etomọṣo, Jehovah yọ́n mí ganji hugan lehe mílọsu yọ́n míde do. E jlo onú dagbe lẹ na mí, podọ e penugo nado deanana aliho mítọn lẹ. (Jẹlemia 10:23) Na nugbo tọn, mẹplọntọ devo depope, azọ́nyọnẹntọ depope, ayinamẹtọ depope ma pegan nado plọn mí nugbo lọ bo hẹn mí yin nuyọnẹntọ po ayajẹnọ po gba.
Jehovah Yin Nugbonọ
8. Nawẹ mí yọnẹn dọ Jehovah yin nugbonọ gbọn?
8 Onú dopo wẹ e yin nado yọ́n nugbo lọ, ṣigba onú devo pete wẹ e yin nado nọ dọ nugbo to whepoponu, yèdọ nado yin nugbonọ. Di apajlẹ, Lẹgba dè ma nado “nọte to nugbo mẹ.” (Johanu 8:44) To vogbingbọn mẹ, Jehovah yin ‘susunọ to nugbo mẹ.’ (Eksọdusi 34:6) Owe-wiwe dekunnuna nugbonọ-yinyin Jehovah tọn pludopludo. Apọsteli Paulu dọ dọ “e glo Jiwheyẹwhe nado dolalo,” podọ dọ Jiwheyẹwhe “ma nọ dolalo.” (Heblu lẹ 6:18; Titu 1:2) Nugbodidọ yin adà titengbe jẹhẹnu Jiwheyẹwhe tọn tọn de. Mí sọgan ganjẹ Jehovah go bo dejido ewọ go na e yin nugbonọ wutu; e ma nọ klọ mẹhe yin nugbonọ hlan ẹn lẹ gbede.
9. Nawẹ yinkọ Jehovah tọn tindo kọndopọ hẹ nugbo gbọn?
9 Yinkọ Jehovah lọsu titi tọn dekunnuna nugbonọ-yinyin etọn. Yinkọ Jiwheyẹwhe tọn zẹẹmẹdo “E Nọ Hẹn Nado Lẹzun.” Ehe do Jehovah hia taidi Omẹ lọ he nọ hẹn opagbe he e do lẹpo di debọdo-dego. Mẹdevo depope ma tindo nugopipe enẹ. Na Jehovah wẹ yin Nupojipetọ wutu, nudepope ma sọgan hẹnalọdotena hẹndi lẹndai etọn lẹ tọn. E mayin dọ Jehovah yin nugbonọ kẹdẹ wẹ gba ṣigba ewọ kẹdẹ wẹ tindo huhlọn po nuyọnẹn lọ po nado hẹn nuhe e dọ lẹpo di.
10. (a) Nawẹ Jọṣua mọ nugbonọ-yinyin Jehovah tọn gbọn? (b) Hẹndi opagbe Jehovah tọn tẹlẹ wẹ hiẹ ko mọ?
10 Jọṣua yin dopo to mẹsusu he mọ nujijọ ayidego tọn he dekunnuna nugbonọ-yinyin Jehovah tọn lẹ mẹ. Jọṣua tin to Egipti to whenuena Jehovah hẹn azọ̀nylankan ao wá akọta lọ ji, bo dọ dọdai dopodopo tọn jẹnukọn. Gbọnvona dọdai lọ lẹ heyin hinhẹndi, Jọṣua sọ mọ hẹndi opagbe Jehovah tọn nado whlẹn Islaelivi lẹ sọn Egipti bo plan yé biọ Aigba Pagbe tọn ji, bo gbawhàn awhànpa huhlọnnọ Kenaninu lẹ tọn he jẹagọdo yé lẹ. Sẹpọ vivọnu gbẹzan etọn tọn, Jọṣua dọna sunnu mẹho Islaeli tọn lẹ dọmọ: “Mìwlẹ sọ yọnẹn to ayiha mìtọn lẹpo mẹ podọ to gbigbọ mìtọn lẹpo mẹ, dọ onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì, onú dopo ma gbòpò to e mẹ gba.” (Jọṣua 23:14) Dile etlẹ yindọ hiẹ ma mọ azọ́njiawu he Jọṣua mọ lẹ, be hiẹ ko mọ nugbo-yinyin opagbe Jiwheyẹwhe tọn lẹ tọn to gbẹwhenu towe ya?
Jehovah Nọ De Nugbo lọ Hia
11. Etẹwẹ dohia dọ Jehovah jlo dọ nugbo lọ ni yin didọna gbẹtọvi lẹ?
11 Yí nukun homẹ tọn do pọ́n mẹjitọ de he tindo oyọnẹn susu ṣigba ma nọ dọ ẹ na ovi etọn lẹ. Be hiẹ ma dopẹ́ dọ Jehovah mayin omẹ mọnkọtọn ya? Jehovah nọ gbọn owanyi dali dọho hẹ gbẹtọvi lẹ, bo nọ wàmọ po homẹdagbe po. Owe-wiwe ylọ ẹ dọ ‘Nuplọnmẹtọ Daho.’ (Isaia 30:20) To dagbewanyi etọn mẹ, e tlẹ sọ nọ dọho hẹ mẹhe ma jlo nado dotoaina ẹn lẹ. Di apajlẹ, Ezekiẹli yin azọ́ndena nado dọyẹwheho na mẹhe Jehovah yọnẹn dọ yé ma na dotoai lẹ. Jehovah dọmọ: “Visunnu gbẹtọ tọn, yì, hẹn dewe jẹ owhé Islaeli tọn gbè, bo yí ohó ṣie lẹ do dọho hlan yé.” Enẹgodo e na avase dọmọ: “[Yé] ma na tuntoai hlan we gba; na yé ma na tuntoai hlan mi: na owhé Islaeli tọn lẹpo yin nukọn sinsinyẹnnọ de tọn po ayiha sinsinyẹnnọ de tọn po.” Azọ́ndenamẹ sinsinyẹn de wẹ enẹ yin, ṣigba Ezekiẹli wà ẹ po nugbonọ-yinyin po, bo do awuvẹmẹ Jehovah tọn hia to mọwiwà mẹ. Eyin hiẹ mọ dewe to aigba-denamẹ sinsinyẹn yẹwhehodidọ tọn de ji, hiẹ sọgan deji dọ Jiwheyẹwhe na hẹn we lodo kẹdẹdile e wà na yẹwhegán Ezekiẹli do eyin a ganjẹ ewọ go.—Ezekiẹli 3:4, 7-9.
12, 13. Aliho tẹlẹ mẹ wẹ Jiwheyẹwhe ko dọho hẹ gbẹtọvi lẹ te?
12 Jehovah jlo dọ ‘gbẹtọ lẹpo ni yin whinwhlẹngán bo wá oyọnẹn he pegan nugbo tọn kọ̀n.’ (1 Timoti 2:4) E ko dọho gbọn yẹwhegán lẹ, angẹli lẹ, podọ etlẹ yin gbọn Ovi yiwanna etọn, Jesu Klisti gblamẹ. (Heblu lẹ 1:1, 2; 2:2) Jesu dọna Pilati dọmọ: “Hlan opodo he wẹ yè ko do ji mi, podọ hlan opodo he wẹ yẹn do wá aihọn mẹ, na yẹn nido dekunnu hlan nugbo lọ. Mẹdepope he yin nugbo tọn se ogbè ṣie.” Pilati tindo dotẹnmẹ hundote họakuẹ de nado se nugbo lọ gando awuwledainanu Jehovah tọn na whlẹngán go sọn Ovi Jiwheyẹwhe tọn dè tlọlọ. Ṣigba, Pilati ma to adà nugbo lọ tọn mẹ gba, podọ e ma jlo nado plọnnu sọn Jesu dè. Kakatimọ, Pilati yí goyiyi do gblọn dọ: “Etẹwẹ nugbo?” (Johanu 18:37, 38) Lehe enẹ blawu do sọ! Ṣogan, mẹsusu dotoaina nugbo he Jesu lá lọ. E dọna devi etọn lẹ dọmọ: “Donanọ wẹ nukun mìtọn lẹ, na yé mọ: podọ na otó mìtọn lẹ na yé se.”—Matiu 13:16.
13 Jehovah ko basi hihọ́na nugbo lọ do Biblu mẹ bo ko sọ hẹn ẹn tin-to-aimẹ na gbẹtọ lẹ to filẹpo. Biblu de onú lẹ hia dile yé te do pẹpẹ. E basi zẹẹmẹ jẹhẹnu, lẹndai, po gbedide Jiwheyẹwhe tọn lẹ tọn po, gọna ninọmẹ nugbo onú lẹ tọn to gbẹtọvi lẹ ṣẹnṣẹn. Jesu dọ to odẹ̀ mẹ hlan Jehovah dọmọ: “Ohó towe wẹ nugbo.” (Johanu 17:17) Na ehe tọn wutu, Biblu yin owe vonọtaun de. Ewọ kẹdẹ wẹ yin kinkàn to gbigbọ Jiwheyẹwhe he yọ́n onú popo tọn glọ. (2 Timoti 3:16) Nunina họakuẹ de wẹ e yin hlan gbẹtọvi, yèdọ nunina de he devizọnwatọ Jiwheyẹwhe tọn lẹ nọ wlebòna. Nuyọnẹnnu wẹ e na yin dọ mí ni nọ hia ẹ egbesọegbesọ.
Hẹn Nugbo lọ Go Gligli
14. Etẹwẹ yin delẹ to nuhe Jehovah dọ dọ emi na wà lẹ mẹ, podọ naegbọn mí dona yí ewọ se?
14 Mí dona yí nukun nujọnu tọn do pọ́n nuhe Jehovah dọna mí to Ohó etọn mẹ lẹ. Nugbo wẹ nuhe e dọ gando ede go lẹ, podọ e na wà nuhe e ko dọ lẹ. Mí tindo whẹwhinwhẹ́n lẹpo nado dejido Jiwheyẹwhe go. Mí sọgan yí nuhe Jehovah dọ se to whenuena e dọ dọ emi na “[yiahọsu] to yé he ma yọ́n Jiwheyẹwhe lẹ go, podọ yé he ma setonuna wẹndagbe Jesu Klisti Oklunọ mítọn tọn lẹ.” (2 Tẹsalonikanu lẹ 1:8) Mí sọgan sọ yí ohó Jehovah tọn se ga to whenuena e dọ dọ emi yiwanna mẹhe nọ doafọna dodowiwa lẹ, dọ emi na na ogbẹ̀ madopodo mẹhe yí yise zan lẹ, podọ dọ emi na de awubla, avi, podọ etlẹ yin okú sẹ. Jehovah zinnudo nugbo-yinyin opagbe godo tọn ehe ji gbọn didọna apọsteli Johanu dali dọmọ: “Wlanwe: ohó helẹ dodo po nugbo po wẹ.”—Osọhia 21:4, 5; Howhinwhẹn lẹ 15:9; Johanu 3:36.
15. Lalo tẹlẹ wẹ Satani ko zedaga?
15 Satani yin adà awetọ Jehovah tọn mlẹnmlẹn. Kakati nado hẹn gbẹtọ lẹ tindo oyọnẹn, e nọ klọ yé wẹ. Satani nọ yí lalo voovo lẹ zan nado jẹ yanwle etọn kọ̀n heyin nado lẹkọna gbẹtọ lẹ sọn sinsẹ̀n-bibasi wiwe ṣeke kọ̀n. Di apajlẹ, Satani jlo dọ mí ni yise dọ Jiwheyẹwhe ma sẹpọ mí podọ dọ yajiji he tin to aigba ji ma tlẹ nọ duahunmẹna ẹn. Ṣigba, Biblu dohia dọ Jehovah nọ hò nudida etọn lẹ tọn pọ́n sisosiso bo nọ blawu do ylanwiwa po yajiji po ji. (Owalọ lẹ 17:24-30) Satani sọ jlo dọ gbẹtọ lẹ ni yise dọ whenu hinhẹn gú wẹ afọdidona gbigbọmẹnu lẹ yin. Kakatimọ, Owe-wiwe na mí jide dọ “Jiwheyẹwhe mayin mawadodonọ nado wọn azọ́n mìtọn po tukla owanyi mìtọn tọn po, he mì ko sọhia gbọn oyín etọn dali.” Humọ, e sọ dọ hezeheze dọ “ewọ wẹ ahọsutọ yé he whèsọ do dín in lẹ tọn.”—Heblu lẹ 6:10; 11:6.
16. Naegbọn Klistiani lẹ dona gbọṣi nukle bo hẹn nugbo lọ go gligli?
16 Apọsteli Paulu wlan gando Satani go dọmọ: ‘Yẹwhe aihọn ehe tọn ko tọ́nnukunna ayiha mayisenọ lẹ tọn, na hinhọ́n wẹndagbe gigonọ lọ tọn gando Klisti, heyin ojlẹmọ Jiwheyẹwhe tọn go, ma nado họnwun hlan yé.’ (2 Kọlintinu lẹ 4:4) Taidi Evi, mẹdelẹ yin kiklọ mlẹnmlẹn gbọn Satani Lẹgba dali. Mẹdevo lẹ ko hodo aliho nuyiwa Adam, he mayin kiklọ ṣigba he de sọn ojlo mẹ bo vẹtoli tọn. (Juda 5, 11) Enẹwutu, dandannu wẹ e yin dọ Klistiani lẹ ni gbọṣi nukle bo hẹn nugbo lọ go gligli.
Jehovah Nọ Biọ “Yise Madoklọ”
17. Etẹwẹ mí dona wà nado mọ nukundagbe Jehovah tọn?
17 Na Jehovah yin nugbonọ to aliho etọn lẹpo ji wutu, e nọ donukun dọ sinsẹ̀ntọ etọn lẹ lọsu ni yin nugbonọ. Psalm-kàntọ lọ wlan dọmọ: “OKLUNỌ, mẹnu wẹ na wawaṣi to gohọ̀ towe mẹ? Mẹnu wẹ na sinai to osó wiwe towe ji? Ewọ he zinzọnlin jlọjlọ, bo to azọ́n dodo tọn wà, bosọ to ohó nugbo dọ to [ahun] etọn mẹ.” (Psalm 15:1, 2) Matin ayihaawe, nudido osó wiwe Jehovah tọn go na ko hẹn Osó Ziọni tọn wá ayiha mẹ na Juvi he jihàn enẹlẹ, yèdọ fie Ahọlu Davidi hẹn aki alẹnu tọn lẹkọwa gohọ̀ he e ko gbá do finẹ lọ mẹ te. (2 Samuẹli 6:12, 17) Osó lọ po gohọ̀ lọ po flin mí fie Jehovah nọ nọ̀ to yẹhiadonu-liho. Gbẹtọ lẹ sọgan dọnsẹpọ Jiwheyẹwhe to finẹ nado biọ nukundagbe etọn.
18. (a) Etẹlẹ wẹ e nọ biọ nado jihọntọn hẹ Jiwheyẹwhe? (b) Etẹwẹ na yin hodọdeji to hosọ he bọdego mẹ?
18 Mẹhe jlo na jihọntọn hẹ Jehovah dona nọ dọ nugbo ‘to ahun etọn mẹ,’ e mayin po nùflo po poun gba. Họntọn nugbo Jiwheyẹwhe tọn lẹ dona yin nugbonọ to ahun mẹ bo do kunnudenu “yise madoklọ” tọn hia, na ahun mẹ wẹ nuwiwa nugbonọ-yinyin tọn lẹ nọ wá sọn. (1 Timoti 1:5; Matiu 12:34, 35) Họntọn Jiwheyẹwhe tọn ma nọ hòmẹdu kavi klọmẹ, na “OKLUNỌ gbẹwanna . . . mẹklọtọ lẹ.” (Psalm 5:6) Lẹdo aihọn pé Kunnudetọ Jehovah tọn lẹ nọ wazọ́n sinsinyẹn nado yin nugbonọ to apajlẹ Jiwheyẹwhe tọn hihodo mẹ. Hosọ he bọdego na gbadopọnna ehe.
Nawẹ Hiẹ Na Na Gblọndo Gbọn?
• Naegbọn Jehovah yọ́n nugbo lọ gando onú lẹpo go?
• Etẹwẹ dohia dọ Jehovah yin nugbonọ?
• Nawẹ Jehovah ko do nugbo lọ hia gbọn?
• Gando nugbo lọ go, etẹwẹ yin bibiọ to mí si?
[Yẹdide to weda 10]
Jiwheyẹwhe nugbo tọn yọ́n onú lẹpo gando nuhe e dá lẹ go
[Yẹdide to weda 13]
Opagbe Jehovah tọn lẹ na yin hinhẹndi