Yí Jehovah Do Basi Jidide Towe
‘Hiẹ wẹ todido ṣie, Oklunọ Nupojipetọ Jehovah E, hiẹ wẹ jidide ṣie sọn ovu ṣie gbọ́n.’—PSALM 71:5.
1. Avùnnukundiọsọmẹ tẹwẹ pannukọn visunnu lẹngbọhọtọ lọ Davidi?
TEDIDI dawe lọ tọn diblayi mẹtlu 3. Abajọ awhànfuntọ Islaeli tọn lẹpo to budi nado fùnawhàn hẹ ẹ! To afọnnu po whèjai lẹpo po, na osẹ debọdo-dego susu, Goliati gángánsu lọ heyin Filistininu de nọ vlẹ awhànpa Islaeli tọn kò, bo nọ biọ to yé si nado do awhàngán de hlan nado wá hoavùn hẹ ẹ. To godo mẹ, obiọ lọ yin alọkẹyi, e mayin gbọn awhànfuntọ de dali gba, ṣigba gbọn jọja de poun dali. Visunnu lẹngbọhọtọ lọ Davidi ma tlẹ sọtẹ́n to Goliati nukọn. Na nugbo tọn, gbaja po awhànfunnu Goliati tọn lẹ po tlẹ sọgan ko pẹnzin hugan ẹn! Etomọṣo, jọja lọ tọ́nawhàn sunnu gángánsu lọ bo lẹzun adọgbotọ he diyin de.—1 Samuẹli 17:1-51.
2, 3. (a) Naegbọn Davidi penugo nado tọ́nawhàn Goliati po adọgbigbo po? (b) Afọdide awe he na hẹn mí nado sọgan yí Jehovah do basi jidide mítọn tẹlẹ ji wẹ mí na dọhodo?
2 Etẹwẹ hẹn Davidi gboadọ sọmọ? Lẹnnupọndo hogbe heyin kinkàn gbọn Davidi dali to yọnhowhe etọn lẹ mẹ ji dọmọ: ‘Hiẹ wẹ todido ṣie, Oklunọ Nupojipetọ Jehovah E, hiẹ wẹ jidide ṣie sọn ovu ṣie gbọ́n.’ (Psalm 71:5) Mọwẹ, taidi jọja de, Davidi ko dejido Jehovah go mlẹnmlẹn. To whenuena e jlo na pehẹ Goliati, e dọmọ: “Hiẹ ja dè e po ohí de po, po owhán de po, po dludlu de po: ṣigba yẹn ja dè we to oyín OKLUNỌ awhànpa lẹ tọn mẹ, Jiwheyẹwhe awhàn Islaeli tọn lẹ tọn, he hiẹ dèafudo.” (1 Samuẹli 17:45) Goliati dejido huhlọn edetiti tọn po awhànfunnu etọn lẹ po go, ṣigba Davidi dejido Jehovah go. To whenuena e yindọ Oklunọ Nupojipetọ wẹkẹ lọ tọn tin to adà etọn mẹ, naegbọn Davidi nado dibu na gbẹtọ tata, mahopọnna lehe e dohuhlọn bo sọawhànnu sọ?
3 Dile hiẹ to otàn Davidi tọn hia, be e nọ jlo we dọ jidide towe to Jehovah mẹ ni lodo domọ ya? Vlavo, susu mítọn wẹ jlo. Enẹwutu mì gbọ mí ni gbadopọnna afọdide awe he mí sọgan ze nado yí Jehovah do basi jidide mítọn. Tintan, mí dona penugo bo duto nuhe nọ saba glọnalina jidide ji. Awetọ, mí dona plọn nuhe jidide tintindo to Jehovah mẹ bẹhẹn na taun tọn.
Duduto Nuhe Nọ Saba Glọnalina Jidide Tintindo to Jehovah mẹ Ji
4, 5. Naegbọn e nọ sinyẹnawuna mẹsusu nado dejido Jiwheyẹwhe go?
4 Etẹlẹ wẹ nọ glọnalina gbẹtọ lẹ ma nado dejido Jiwheyẹwhe go? To paa mẹ, nuhewutu onú ylankan lẹ nọ jọ nọ paṣa mẹdelẹ. Mẹsusu ko yin pinplọn dọ Jiwheyẹwhe wẹ nọ hẹn yajiji wá. Eyin nugbajẹmẹji de jọ, sinsẹ̀ngán lẹ sọgan dọ dọ Jiwheyẹwhe wẹ “ylọ” mẹhe kú lẹ nado nọhẹ ẹ to olọn mẹ. Humọ, nukọntọ sinsẹ̀n tọn susu nọ plọnmẹ dọ Jiwheyẹwhe ko kàn nujijọ dopodopo dai jẹnukọn sọn whenu dindẹn die—gọna nugbajẹmẹji po nuwiwa ylankan lẹpo po—he to jijọ to aihọn ehe mẹ. E na sinyẹnawu nado dejido Jiwheyẹwhe kanylantọ mọnkọtọn de go. Satani, he nọ tọ́nnukunna mayisenọ lẹ, tin to jejeji nado ze “oplọn aovi tọn” mọnkọtọn lẹpo daga.—1 Timoti 4:1; 2 Kọlintinu lẹ 4:4.
5 Satani jlo dọ gbẹtọ lẹ ni hẹn jidide bu to Jehovah mẹ. Kẹntọ Jiwheyẹwhe tọn enẹ ma jlo dọ mí ni yọ́n nuhe nọ hẹn yajiji gbẹtọvi tọn lẹ wá na taun tọn gba. Podọ eyin mí ko plọn whẹwhinwhẹ́n he wutu yajiji tin lẹ sọn Owe-wiwe mẹ, Satani na jlo dọ mí ni wọnji yé go. Enẹwutu, e jẹ dọ mí ni nọ gbadopọnna whẹwhinwhẹ́n tangan atọ̀n he wutu yajiji do tin to aihọn mẹ lẹ sọn ojlẹ de mẹ jẹ devo mẹ. Gbọn mọwiwa dali, mí sọgan vọ́ kudeji dọ nuhahun he mí nọ pehẹ to gbẹ̀mẹ lẹ ma nọ wá sọn Jehovah dè gba.—Filippinu lẹ 1:9, 10.
6. Nawẹ 1 Pita 5:8 dlẹnalọdo dopo to whẹwhinwhẹ́n he wutu gbẹtọ do to yaji to aihọn mẹ gbọn?
6 Dopo to whẹwhinwhẹ́n he wutu gbẹtọ do to yaji to aihọn mẹ wẹ yindọ Satani jlo na hẹn tenọgligo hinhẹn omẹ nugbonọ Jehovah tọn lẹ tọn gble. E ko tẹnpọn nado hẹn tenọgligo hinhẹn Job tọn gble. Satani gboawupo to whenẹnu, ṣogan e ma ko gbọjọ gba. Taidi gandutọ aihọn ehe tọn, e nọ dín nado “tlẹ́n” devizọnwatọ nugbonọ Jehovah tọn lẹ dù. (1 Pita 5:8) Enẹ bẹ dopodopo mítọn lẹ hẹn! Satani jlo na glọnalina mí sọn Jehovah sinsẹ̀n mẹ. Enẹwutu, e nọ saba fọ́n homẹkẹn dote. Dile etlẹ yindọ yajiji mọnkọtọn nọ vẹawu, mí tindo whẹwhinwhẹ́n dagbe nado doakọnna ẹn. Gbọn mọwiwa dali, mí nọ do Satani hia nado yin lalonọ bo nọ hẹn homẹ Jehovah tọn hùn. (Job 2:4; Howhinwhẹn lẹ 27:11) Dile Jehovah to mí hẹn lodo nado doakọnna homẹkẹn, jidide mítọn to ewọ mẹ nọ whẹ́n deji.—Psalm 9:9, 10.
7. Whẹwhinwhẹ́n tẹwẹ Galatianu lẹ 6:7 gọalọna mí nado yọnẹn gando yajiji go?
7 Whẹwhinwhẹ́n awetọ he wutu yajiji tin yin mimọ to nunọwhinnusẹ́n ehe mẹ dọmọ: “Nudepope gbẹtọ dó, enẹ wẹ e na gbẹ̀n ga.” (Galatianu lẹ 6:7) To whedelẹnu gbẹtọ lẹ nọ dó oylan gbọn nudide ylankan he yé basi lẹ dali bosọ nọ gbẹ̀n yajiji jẹ obá de mẹ taidi kọdetọn de. Yé sọgan de nado kùnhún to aliho numakiyana tọn mẹ, he nọ dekọtọn do asidan mẹ. Mẹsusu de nado nù siga, bo nọ bẹ ahún-zọ̀n kavi afuje-zọ̀n taidi kọdetọn de. Owù lọ tin to finẹ dọ mẹhe de nado doalọ to fẹnnuwiwa zanhẹmẹ tọn mẹ lẹ sọgan jiya gbakija whẹndo tọn, osi mẹdetiti tọn hinhẹnbu, asamẹzọ̀n lẹ, po hòmimọ madonukun lẹ po tọn. Gbẹtọ lẹ sọgan jlo nado gblewhẹdo Jiwheyẹwhe na yajiji enẹlẹ, ṣigba nudide ylankan yedetiti tọn lẹ wẹ hẹn yé wá na nugbo tọn.—Howhinwhẹn lẹ 19:3.
8. Sọgbe hẹ Yẹwhehodọtọ 9:11, naegbọn gbẹtọ lẹ nọ jiya?
8 Whẹwhinwhẹ́n atọ̀ntọ he wutu yajiji do tin yin didọ to Yẹwhehodọtọ 9:11 mẹ dọmọ: “Yẹn gọ̀dogodo bosọ mọ to owhè glọ, dọ alèwezun mayin awuyatọ tọn, awhàn mayin huhlọntọ tọn, mọ núdùdù mayin nuyọnẹntọ tọn, adọkun mayin omẹ zinzin tọn, mọ nukundagbe masọ yin asiawàtọ tọn; ṣigba ojlẹ po kosọ po mẹ wẹ onú te na omẹ popo.” To whedelẹnu, gbẹtọ lẹ nọ tin to nọtẹn he ma sọgbe lọ to ojlẹ he ma sọgbe mẹ poun wẹ. Mahopọnna huhlọn kavi madogán mítọn lẹ, depope to mí mẹ wẹ sọgan jiya kavi kú to whedepopenu. Di dohia, to azán Jesu tọn gbè, atọ̀họ̀ de họ́ jai to Jelusalẹm bo hù gbẹtọ 18. Jesu dohia dọ Jiwheyẹwhe ma to yasana yé na ylando he yé ko wà wayi lẹ gba. (Luku 13:4) Lala, Jehovah ma nọ hẹn yajiji mọnkọtọn wá gba.
9. Etẹwẹ mẹsusu ma mọnukunnujẹemẹ gando yajiji go?
9 Onú titengbe wẹ e yin dọ mí ni mọnukunnujẹ nuhe nọ hẹn yajiji wá delẹ mẹ. Etomọṣo, adà whẹho lọ tọn de tin he nọ sinyẹnawuna mẹsusu nado mọnukunnujẹemẹ. Yèdọ, naegbọn Jehovah Jiwheyẹwhe jotẹnna yajiji?
Naegbọn Jehovah Jotẹnna Yajiji?
10, 11. (a) Sọgbe hẹ Lomunu lẹ 8:19-22, etẹwẹ jọ do “nudida lẹpo” go? (b) Nawẹ mí sọgan yọ́n mẹhe hẹn nudida yin mẹmẹglọ hlan ovọ́ gbọn?
10 Apadewhe wekanhlanmẹ apọsteli Paulu tọn dohlan Lomunu lẹ tá hinhọ́n do whẹho titengbe ehe ji. Paulu wlan dọmọ: “Nukundido nudida tọn nọtepọn osọhia ovi Jiwheyẹwhe tọn lẹ tọn. Na yè hẹn nudida yin mẹmẹglọ hlan ovọ́, e mayin po ojlo po gba, ṣigba gbọn linlẹn omẹ he yí dopolọ do mẹglọ to todido mẹ tọn dali. Na yè na whlẹn nudida lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ. Na mí yọnẹn dọ nudida lẹpo pete wẹ to winwẹ̀n bosọ to ajipanu to awufiẹsa mẹ hẹ mí kakajẹ dinvie.”—Lomunu lẹ 8:19-22.
11 Nado mọnukunnujẹ wefọ ehelẹ mẹ, mí dona dín gblọndo na kanbiọ titengbe delẹ whẹ́. Di dohia, Mẹnu wẹ hẹn nudida yin mẹmẹglọ hlan ovọ́? Mẹdelẹ ko dlẹnalọdo Satani; mẹdevo lẹ dọ dọ Adam wẹ. Ṣigba depope to omẹ awe helẹ mẹ ma sọgan ko wà ehe gba. Etẹwutu? Na mẹhe hẹn nudida yin mẹmẹglọ hlan ovọ́ wàmọ “to todido mẹ.” Mọwẹ, e namẹ todido dọ nugbonọ lẹ na wá yin ‘whinwhlẹn sọn mẹglọnọ hẹngble tọn mẹ.’ Adam kavi Satani ma sọgan namẹ todido mọnkọtọn gba. Jehovah kẹdẹ wẹ sọgan wàmọ. Enẹwutu, e họnwun dọ ewọ wẹ hẹn nudida yin mẹmẹglọ hlan ovọ́.
12. Bẹwlu tẹwẹ tin gando nuhe “nudida lẹpo” nọtena go, podọ nawẹ kanbiọ ehe sọgan mọ gblọndo yí gbọn?
12 Nalete, etẹwẹ “nudida lẹpo” dlẹnalọdo to wefọ ehe mẹ? Mẹdelẹ dọ dọ “nudida lẹpo” dlẹnalọdo aihọn yinukundomọ mítọn ehe pete, he bẹ kanlin po ogbé lẹ po hẹn. Ṣigba be kanlin po ogbé lẹ po tindo todido nado jẹ ‘mẹdekannu gigonọ ovi Jiwheyẹwhe tọn lẹ tọn’ wẹ ya? Lala. (2 Pita 2:12) To whelọnu lo, “nudida lẹpo” sọgan dlẹnalọdo gbẹtọvi lẹ kẹdẹ. Nudida ehe ji wẹ atẹṣiṣi he wá aimẹ to Edẹni mẹ hẹn ylando po okú po plá. Podọ nudida ehe wẹ tindo nuhudo todido tọn to niyaniya mẹ.—Lomunu lẹ 5:12.
13. Nawẹ atẹṣiṣi he wá aimẹ to Edẹni mẹ yinuwado gbẹtọvi ji gbọn?
13 Nawẹ atẹṣiṣi enẹ yinuwado gbẹtọvi ji gbọn? Paulu yí hogbe dopo gee do basi zẹẹmẹ kọdetọn etọn lẹ tọn: yèdọ ovọ́. Sọgbe hẹ owe dodinnanu tọn de, hogbe ehe nọ do “ovọ́-yinyin nuyizan he ma to azọ́nwa dile e yin bibasi nado wazọ́n do” tọn hia. Gbẹtọvi lẹ yin didá nado nọgbẹ̀ kakadoi, bo wazọ́n dopọ taidi whẹndo pipé, he tin to kọndopọmẹ de he na penukundo aigba paladisi tọn de go. Ṣigba kakatimọ, yé nọ zan gbẹzan gli, he gọ́ na awufiẹsa po flumẹjijẹ po. Dile Job dọ do, “gbẹtọ he yè ji sọn yọnnu de mẹ yin azán lẹ vude tọn, bosọ gọ́ na tukla.” (Job 14:1) Ovọ́ nankọ die!
14, 15. (a) Kunnudenu dodowiwa tọn tẹwẹ mí mọ to owhẹ̀ he Jehovah dana gbẹtọvi mẹ? (b) Naegbọn Paulu dọ dọ yè hẹn nudida yin mẹmẹglọ hlan ovọ́ ṣigba ‘e mayin po ojlo etọn po gba’?
14 Todin mí wá kanbiọ titengbe lọ ji: Naegbọn “Whẹdatọ aihọn lẹpo tọn” hẹn gbẹtọvi wá ninọmẹ awufiẹsa po flumẹjijẹ tọn ehe po mẹ? (Gẹnẹsisi 18:25) Be nuyiwa dodo tọn wẹ ehe yin ya? Eyọn, flin nuhe mẹjitọ mítọn tintan lẹ wà. Gbọn atẹṣiṣi sọta Jiwheyẹwhe dali, yé nọgodona Satani, he diọavùnnukunsọ nupojipetọ-yinyin Jehovah tọn mlẹnmlẹn. Nuyiwa yetọn lẹ dohia dọ yé kọngbedopọ hẹ alọsọakọ́n lọ dọ gbẹtọvi lẹ na tin to ninọmẹ dagbe mẹ matin anademẹ Jehovah tọn, bo na dugán do yede ji to anademẹ nudida gbigbọnọ atẹṣitọ de tọn glọ. Gbọn whẹdidana atẹṣitọ lọ lẹ dali, to yẹhiadonu-liho, Jehovah na yé nuhe yé biọ. E jotẹnna gbẹtọvi lẹ nado dugán do yede ji to anademẹ Satani tọn glọ. To ninọmẹ lọ lẹ glọ, nudide tẹwẹ nasọ yin dodo tọn hugan nado hẹn gbẹtọvi yin mẹmẹglọ hlan ovọ́ ṣigba to todido mẹ?
15 Nugbo wẹ dọ ehe mayin “ojlo” nudida tọn gba. E mayin nudide mítọn wẹ e yin nado yin jiji taidi afanumẹ lẹ hlan ylando po hẹngble po gba. Ṣigba Jehovah gbọn lẹblanu dali jotẹnna Adam po Evi po nado nọgbẹ̀ na ojlẹ de bo ji ovi lẹ. Dile etlẹ yindọ míwlẹ he yin kúnkàn yetọn lẹ yin mẹmẹglọ hlan ovọ́-yinyin ylando po okú po tọn, mí tindo dotẹnmẹ hundote lọ nado wà nuhe Adam po Evi po gboawupo nado wà. Mí sọgan dotoaina Jehovah bo plọn dọ nupojipetọ-yinyin etọn yin dodo tọn bo sọgbe, bọ gandudu gbẹtọvi tọn matin anademẹ Jehovah tọn nọ hẹn awufiẹsa, flumẹjijẹ, po ovọ́ po kẹdẹ wá. (Jẹlemia 10:23; Osọhia 4:11) Podọ nuyiwadomẹji Satani tọn nọ hẹn whẹho lẹ ylan dogọ poun wẹ. Whenuho gbẹtọvi tọn ko dekunnuna nugbo ehelẹ.—Yẹwhehodọtọ 8:9.
16. (a) Naegbọn mí sọgan kudeji dọ oyà he mí nọ ji to aihọn mẹ to egbehe ma wá sọn Jehovah dè? (b) Todido tẹwẹ Jehovah ko gbọn owanyi dali na nugbonọ lẹ?
16 E họnwun dọ Jehovah tindo whẹwhinwhẹ́n dagbe lẹ nado hẹn gbẹtọvi yin mẹmẹglọ hlan ovọ́. Ṣigba, be enẹ zẹẹmẹdo dọ Jehovah wẹ hẹn oyà he dopodopo mítọn lẹ nọ ji to egbehe wá wẹ ya? Eyọn, lẹnnupọndo whẹdatọ de he dawhẹ dodo tọn na sẹ́nhẹngbatọ de ji. Sẹ́nhẹngbatọ lọ sọgan jiya delẹ dile e to ogàn etọn sẹ̀n, ṣigba be e sọgan gbọn jlọjẹ dali gblewhẹdo whẹdatọ lọ dọ ewọ wẹ hẹn yajiji etọn wá ya? Paali! Mọdopolọ, Jehovah ma nọ hẹn onú ylankan lẹ wá gbede. Jakobu 1:13 dọmọ: “Yè ma sọgan yí oylan do whlé Jiwheyẹwhe pọ́n gba, mọ e masọ nọ whlé mẹdepope pọ́n.” Mì gbọ mí nisọ flin ga dọ Jehovah dá owhẹ̀ ehe “to todido mẹ.” E ko gbọn owanyi dali basi tito na kúnkàn Adam po Evi po tọn he yin nugbonọ lẹ nado mọ opodo ovọ́ tọn bo duvivi ‘mẹdekannujẹ gigonọ ovi Jiwheyẹwhe tọn lẹ tọn.’ Gbẹtọvi nugbonọ lẹ ma na tindo nuhudo nado hanú gbede ba dọ nudida lẹpo sọgan wá jai biọ ninọmẹ blawu ovọ́ tọn mẹ whladopo dogọ. Aliho dodo tọn he mẹ Jehovah ko penukundo ninọmẹ lọ go te na ko ze jlọjẹ nupojipetọ-yinyin etọn tọn sinai kakadoi doi.—Isaia 25:8.
17. Nawẹ dogbigbapọnna whẹwhinwhẹ́n he wutu yajiji tin to aihọn mẹ to egbehe lẹ dona yinuwado mí ji gbọn?
17 Dile mí gbadopọnna whẹwhinwhẹ́n ehelẹ gando yajiji gbẹtọvi lẹ tọn go, be mí mọ whẹwhinwhẹ́n depope nado gblewhẹ oylan tọn do Jehovah kavi nado hẹn jide mítọn bu to ewọ mẹ ya? Kakatimọ, dogbapọnnanu mọnkọtọn na mí whẹwhinwhẹ́n nado kọngbedopọ hẹ hogbe Mose tọn ehelẹ dọmọ: ‘Ose lọ, pipé wẹ azọ́n etọn, na whẹdida dodo wẹ ali etọn lẹpo. Jiwheyẹwhe nugbowa tọn de, podọ matin kunnuhu, dodonọ podọ jlọjẹnọ wẹ ewọ.’ (Deutelonomi 32:4) Mì gbọ mí ni nọ gbeje nukunnumọjẹnumẹ mítọn gando whẹho ehelẹ go pọ́n sọn ojlẹ de mẹ jẹ devo mẹ gbọn ayihamẹlinlẹnpọn do yé ji dali. Gbọnmọ dali, eyin mí pehẹ whlepọn lẹ, mí na nọavunte sọta vivẹnudido Satani tọn lẹ nado dó ayihaawe do ahun mítọn lẹ mẹ. Ṣigba, etẹwẹ dogbọn afọdide awetọ heyin nùdego to bẹjẹeji dali? Etẹwẹ jidide do Jehovah go bẹhẹn?
Nuhe E Zẹẹmẹdo Nado Dejido Jehovah Go
18, 19. Hogbe tẹlẹ wẹ Biblu yido na tuli mí nado dejido Jehovah go, ṣigba linlẹn agọ̀ tẹwẹ mẹdelẹ tindo gando enẹ go?
18 Ohó Jiwheyẹwhe tọn na tuli mí dọmọ: “Yí ayiha towe [lẹpo] do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe.” (Howhinwhẹn lẹ 3:5, 6) Hogbe whanpẹnọ, mẹhẹndeji tọn lẹ wẹ enẹlẹ yin. Na jide tọn, mẹde matin to wẹkẹ lọ blebu mẹ he go mí sọgan dejido hugan Otọ́ olọn mẹ tọn yiwanna mítọn gba. Etomọṣo, e bọawu tlala nado hia hogbe enẹlẹ to owe Howhinwhẹn lẹ tọn mẹ hugan nado yí yé do yizan mẹ.
19 Mẹsusu ma mọnukunnujẹ nuhe e zẹẹmẹdo nado dejido Jehovah go mẹ. Mẹdelẹ lẹndọ numọtolanmẹ de poun wẹ jidide mọnkọtọn yin, yèdọ ninọmẹ ayajẹ tọn de he dona fọ́n to ahun mẹ to jọwamọ-liho. Mẹdevo lẹ yise dọ jidide do Jiwheyẹwhe go zẹẹmẹdo dọ mí sọgan donukun in nado basi hihọ́na mí sọn tukla lẹpo mẹ, nado didẹ nuhahun mítọn lẹpo, nado diọ awusinyẹnnamẹnu egbesọ tọn mítọn lẹ sọgbe hẹ ojlo mítọn pẹpẹ—bosọ wà ehelẹ to afọdopolọji! Ṣigba linlẹn mọnkọtọn lẹ ma sọgbe gba. Jidide bẹ nususu hẹn hugan numọtolanmẹ tintindo poun, bosọ nọ hẹnmẹ yinuwa sọgbe hẹ lẹnpọn dagbe. Na mẹhe ko whẹ́n mẹho lẹ, jidide bẹ nudide mẹdetiti tọn lẹ bibasi to nulẹnpọn po sọwhiwhe po godo hẹn.
20, 21. Etẹwẹ jidide do Jehovah go bẹhẹn? Basi dohia.
20 Doayi nuhe Howhinwhẹn lẹ 3:5 dọ go ga. E do vogbingbọn hia to jidedo Jehovah go po ginganjẹ nukunnumọjẹnumẹ mítọn titi go po ṣẹnṣẹn, bo dohia dọ mí ma sọgan wà awe lẹ gba. Be enẹ zẹẹmẹdo dọ mí ma sọgan yí huhlọn nukunnumọjẹnumẹ tọn mítọn lẹ zan wẹ ya? Lala, na Jehovah, he na mí huhlọn enẹlẹ, nọ donukun dọ mí ni yí yé zan nado sẹ̀n emi. (Lomunu lẹ 12:1) Ṣigba etẹ go wẹ mí nọ ganjẹ to nudide lẹ bibasi whenu? Eyin nulẹnpọn mítọn lẹ ma sọgbe hẹ Jehovah tọn, be mí sọgan dọ dọ mí kẹalọyi nuyọnẹn etọn taidi dehe yiaga tlala hugan mítọn ya? (Isaia 55:8, 9) Jidide do Jehovah go zẹẹmẹdo dotẹnmẹ nina nulẹnpọn etọn nado deanana mí.
21 Di dohia: lẹnnupọndo ovi pẹvi de ji he sinai to oján godo tọn ji to gbẹduhun de mẹ, bọ mẹjitọ etọn lẹ sinai do nukọn. Otọ́ etọn wẹ to húnkun. To whenuena nuhahun lẹ fọ́n to gbejizọnlin lọ whenu—vlavo yé to ali bú kavi ninọmẹ aimẹ tọn kavi aliho lọ lọsu ma yọ́n sọmọ—nawẹ ovi tonusetọ, he dejido mẹjitọ etọn lẹ go de nọ yinuwa gbọn? Be e na degbè sọn godo bo dọ aliho he dona yin hihodo kavi dọna otọ́ etọn lehe e na kùn ohún lọ gbọn wẹ ya? Be e na tindo ayihaawe gando nudide mẹjitọ etọn lẹ tọn go kavi gbẹ́ to whenuena yé flin in nado gbọṣi otẹn etọn mẹ wẹ ya? Lala, e nọ dejido mẹjitọ etọn lẹ go to jọwamọ-liho nado penukundo whẹho mọnkọtọn lẹ go dile yé tlẹ yin mapenọ do sọ. Jehovah yin Otọ́ pipé de. Be e ma jẹ dọ mí ni dejido ewọ go mlẹnmlẹn, titengbe eyin mí pannukọn ninọmẹ sinsinyẹn lẹ ya?—Isaia 30:21.
22, 23. (a) Naegbọn mí dona dejido Jehovah go to whenuena nuhahun lẹ pannukọn mí, podọ nawẹ mí sọgan wàmọ gbọn? (b) Etẹwẹ na yin hodọdeji to hosọ he bọdego mẹ?
22 Nalete, Howhinwhẹn lẹ 3:6 dohia dọ mí dona ‘yọ́n Jehovah to aliho mítọn lẹpo ji,’ e mayin to whenuena mí pannukọn ninọmẹ sinsinyẹn lẹ kẹdẹ gba. Enẹwutu nudide egbesọegbesọ tọn he mí nọ basi to gbẹ̀mẹ lẹ dona dohia dọ mí dejido Jehovah go. Eyin nuhahun lẹ fọ́n, mí ma dona hẹn todido bu, dibu, kavi gbẹ́ anademẹ Jehovah tọn dai gando aliho he yọnhugan nado didẹ whẹho lẹ go. Mí dona pọ́n whlepọn lẹ hlan taidi dotẹnmẹ hundote lẹ nado nọgodona nupojipetọ-yinyin Jehovah tọn, nado do Satani hia di lalonọ, podọ nado wleawuna tonusise po jẹhẹnu devo he nọ hẹn homẹhun Jehovah lẹ po.—Heblu lẹ 5:7, 8.
23 Mahopọnna aliglọnnamẹnu depope he mí sọgan pehẹ, mí sọgan dejido Jehovah go. Mí nọ wà ehe to odẹ̀ mítọn lẹ mẹ podọ to aliho he mẹ mí nọ ganjẹ Ohó Jehovah tọn po titobasinanu etọn po go na anademẹ te. Ṣigba, nawẹ mí sọgan do jidide mítọn to Jehovah mẹ hia to whenuena mí pehẹ nuhahun he nọ fọ́n to aihọn egbehe tọn mẹ lẹ gbọn? Hosọ he bọdego na dọhodo ehe ji.
Etẹwẹ Na Yin Gblọndo Towe?
• Nawẹ Davidi dohia dọ emi ko yí Jehovah do basi jidide emitọn gbọn?
• Onú atọ̀n tẹlẹ wẹ nọ hẹn yajiji gbẹtọvi tọn wá to egbehe, podọ naegbọn e yin onú dagbe nado nọ gbadopọnna yé sọn ojlẹ de mẹ jẹ devo mẹ?
• Owhẹ̀ tẹwẹ Jehovah dá na gbẹtọvi, podọ naegbọn e do yin whẹdida dodo tọn?
• Etẹwẹ jidide do Jehovah go bẹhẹn?
[Yẹdide to weda 8]
Davidi dejido Jehovah go
[Yẹdide to weda 0]
Jesu dohia dọ e mayin Jehovah wẹ hẹn atọ̀họ̀ tangan de nado họ́ jai to Jelusalẹm gba