Kanbiọ lẹ sọn Wehiatọ lẹ Dè

To adà aihọn tọn susu mẹ, aṣa wẹ e yin nado na nunina mẹhe to alọwle lẹ. Nunọwhinnusẹ́n Owe-wiwe tọn tẹ ji wẹ mí dona lẹnnupọndo to nunina mọnkọtọn bibasi kavi mimọyi whenu?

Biblu kẹalọyi nunina bibasi to whenuena e yin bibasi po mẹwhinwhàn he sọgbe de po, podọ to ojlẹ he sọgbe de mẹ. Na nuhe dù nunamẹ, Biblu na tuli Klistiani nugbo lẹ nado hodo apajlẹ Nunamẹtọ alọtlutọ yetọn tọn—yèdọ Jehovah. (Jakobu 1:17) Apọsteli Paulu dotuhomẹna Klistiani hatọ lẹ dọmọ: “Nado nọ wadagbe podọ nado nọ mánamẹ, mì wọn blo: na avọ́ mọtọn hunkọ go wẹ homẹ Jiwheyẹwhe tọn nọ vivi do tlala.” Enẹwutu, Klistiani lẹ yin tudohomẹna nado yin alọtlutọ.—Heblu lẹ 13:16; Luku 6:38.

To otò delẹ mẹ, aṣa he gbayipe wẹ yindọ sunnu po yọnnu po he jlo na wlealọ, ni yì nusatẹn de nado yì pọ́n nuhe yè to sisà to finẹ lẹ bo basi todohukanji núzinzan he yé na jlo nado mọyi taidi nunina lẹ tọn. Hẹnnumẹ lẹ po họntọn alọwlemẹ lọ tọn lẹ po nọ yin didohlan nusatẹn enẹ mẹ nado yì họ̀ dopo to nuhe sunnu lọ po yọnnu lọ po basi todohukanji etọn lẹ mẹ. Sọn pọndohlan nuhẹn bọawu tọn de mẹ, todohukanji nunina tọn nọ gọalọna nunamẹtọ lọ ma nado hẹn whenu susu gú to nunina de dindin mẹ, bọ mẹhe nunina lọ yin nina lẹ sọ nọ vò sọn tukla kọlilẹ na nuhe yé ma jlo lẹ yì nusatẹn lọ mẹ.

Nudide mẹdetiti tọn wẹ e yin dọ sunnu po yọnnu po he jlo na wlealọ de ni zan todohukanji nunina tọn de. Ṣigba, ojlo Klistiani de tọn wẹ nado tin to aṣeji bo dapana nuwiwa depope he na gbà nunọwhinnusẹ́n Biblu tọn lẹ. Di apajlẹ, etẹwẹ eyin mẹhe jlo na wlealọ lẹ basi todohukanji he bẹ núzinzan akuẹgegenu tọn lẹ hẹn? To ninọmẹ mọnkọtọn mẹ, mẹhe ma tindo nugopipe akuẹzinzan tọn sọmọ lẹ sọgan nọ ma penugo nado basi nunina de, kavi yé sọgan mọ dọ e na yọnhugan nado gọ̀n alọwle lọ tẹnmẹ, nado dapana winyan nunina he ma vẹakuẹ hinhẹn yì tọn. Yọnnu Klistiani de wlan dọmọ: “Ehe ko lẹzun agbanpẹnmẹnu. Yẹn ko tẹnpọn nado yin alọtlutọ, ṣigba to godomẹ yẹn wá hẹn ayajẹ he yẹn nọ mọyi to nunina mẹ lẹpo bú.” Lehe e na blawu do sọ eyin hunwhẹ alọwle tọn de wá lẹzun nuhe nọ hẹnmẹ gbọjọ!

Na nugbo tọn, e ma jẹ dọ nunamẹtọ lẹ ni yin hinhẹn nado lẹndọ nunina yetọn na yin alọkẹyi kiki eyin e wá sọn nusatẹn tangan de kavi eyin e vẹakuẹ jẹ obá de mẹ. To popolẹpo mẹ, Jesu Klisti dohia dọ nuhe yin nuhọakuẹ to nukun Jiwheyẹwhe tọn mẹ hugan lọ wẹ ojlo nunamẹtọ lọ tọn, e mayin ahivivẹ nunina lọ tọn gba. (Luku 21:1-4) Mọdopolọ, na nuhe dù nunina lẹblanu tọn lẹ hlan mẹhe tin to nuhudo mẹ lẹ, apọsteli Paulu wlan dọmọ: “Omẹ dopodopo dile e lẹn to ayiha etọn mẹ do, mọwẹ mì ni gbọ e ni na do; e yin po hunhlun po blo, kavi huhlọndohẹnmẹ basi tọn blo: na Jiwheyẹwhe yiwanna nunamẹtọ homẹhunhunnọ.”—2 Kọlintinu lẹ 9:7.

Sọn pọndohlan Biblu tọn mẹ, agọjẹdonu depope ma tin dọ mẹhe to nunina basi ni do ede hia, vlavo gbọn owe kleun de kinkàn do nunina lọ ji dali gba. Ṣigba, to lẹdo delẹ mẹ, aṣa lọ wẹ nado lá nunamẹtọ lọ na mẹhe tin to finẹ lẹpo. Aṣa ehe sọgan hẹn nuhahun lẹ wá. Mẹhe to nunina basi lẹ sọgan jlo ma nado yin yinyọnẹn, nado dapana ayidonugo he ma jẹ de dindọn do yéde ji. Omẹ mọnkọtọn lẹ nọ yinuwa sọgbe hẹ nunọwhinnusẹ́n heyin mimọ to Matiu 6:3 mẹ, fie Jesu dọ te dọmọ: “Ṣigba whenuena hiẹ wà lẹblanu nunina, a dike amiyọnlọ towe yọ́n onú he adusilọ towe to wiwà blo.” Mẹdelẹ sọgan mọdọ whẹho mẹdetiti tọn wẹ nunina bibasi yin bo ma dona yin yinyọnẹn gbọn mẹdevo dali, adavo nunamẹtọ lọ po mẹhe e yin nina lọ po. Humọ, nunamẹtọ lẹ didohia sọgan dekọtọn do nunina de yíyí jlẹdo devo go mẹ, he nọ ‘fọ́n agbàwhinwhlẹn dote.’ (Galatianu lẹ 5:26) Matin ayihaawe, Klistiani lẹ ma na jlo dọ mẹdepope ni tindo numọtolanmẹ winyandomẹ tọn gbọn oyín nunamẹtọ lẹ tọn yiylọ to gbangba dali.—1 Pita 3:8.

Mọwẹ, gbọn nuyiwa sọgbe hẹ nunọwhinnusẹ́n he tin to Ohó Jiwheyẹwhe tọn mẹ lẹ dali, nuninamẹ na zindonukọn nado yin asisa ayajẹ tọn.—Owalọ lẹ 20:35.