Oyà Homẹkẹn Tọn Jiji Na Dodowiwa Wutu
‘Ayajẹnọ wẹ mẹhe to yinyin homẹkẹndo na dodo wutu lẹ.’—MATIU 5:10.
1. Naegbọn Jesu do tin to Pọntiu Pilati nukọn, podọ etẹwẹ Jesu dọ?
“HLAN opodo he wẹ yè ko do ji mi, podọ hlan opodo he wẹ yẹn do wá aihọn mẹ, na yẹn nido dekunnu hlan nugbo lọ.” (Johanu 18:37) Jesu tin to Pọntiu Pilati, heyin Togán Lomu tọn to Judé nukọn to whenuena e dọ ohó nẹlẹ. Jesu ma disa wá finẹ gba podọ Pilati ma basi oylọna ẹn gba. Kakatimọ, e tin to finẹ na sinsẹ̀ngán Ju tọn lẹ sawhẹ agọ̀ dokọna ẹn dọ e yin ylanwatọ he jẹna okú wutu.—Johanu 18:29-31.
2. Afọdide tẹwẹ Jesu ze, podọ etẹ mẹ wẹ e dekọtọn do?
2 Jesu yọnẹn ganji dọ Pilati tindo huhlọn nado jo e kavi nado hù i. (Johanu 19:10) Ṣigba enẹ ma glọnalina ẹn nado yí adọgbigbo do dọhona Pilati dogbọn Ahọluduta lọ dali gba. Dile etlẹ yindọ ogbẹ̀ Jesu tọn tin to owù mẹ, e yí dotẹnmẹ hundote lọ zan nado dekunnu na gandutọ daho hugan agbegbe lọ tọn. Mahopọnna kunnudide enẹ, Jesu yin whẹgbledo, bo yin hùhù to yatin ji na yise etọn—Matiu 27:24-26; Malku 15:15; Luku 23:24, 25; Johanu 19:13-16.
Kunnudetọ Kavi Mẹhe Tindo Ojlo Nado Kú Na Yise Etọn?
3. Etẹwẹ hogbe Glẹki tọn lọ (marʹtys) zẹẹmẹdo to hohowhenu, ṣigba etẹwẹ yin dopo to zẹẹmẹ etọn lẹ mẹ to egbehe?
3 Mẹdelẹ nọ tindo ojlo nado kú na yise yetọn lẹ, podọ mẹsusu nọ pọ́n yé hlan to egbehe taidi zohunhun agọ̀nọ kavi wazẹjlẹgonọ lẹ. Mẹhe tindo ojlo nado kú na yise yetọn wutu lẹ, titengbe yise sinsẹ̀n tọn lẹ, nọ saba yin hiadogona taidi nukunbianamẹtọ lẹ kavi mẹhe yin owù na gbẹtọ lẹ. Hogbe Glẹki tọn (marʹtys) he to hohowhenu zẹẹmẹdo “kunnudetọ,” yèdọ mẹhe dekunnu, vlavo to whẹdọhọsa, na nugbo-yinyin nuhe e yise tọn, wá tindo zẹẹmẹ devo to godo mẹ, heyin: “mẹhe ze ogbẹ̀ etọn jo na kunnudide wutu.”
4. Linlẹn tẹmẹ wẹ Jesu kú okú yise tọn te?
4 Jesu kú okú yise tọn taidi kunnudetọ de. Sọgbe hẹ nuhe e dọna Pilati, e dọ dọ emi wá nado “dekunnu hlan nugbo lọ.” Kunnudide etọn fọ́n nuyiwa voovo lẹ dote to gbẹtọ lẹ ṣẹnṣẹn. Mẹdelẹ yin whinwhàn sisosiso gbọn nuhe yé se bo mọ lẹ dali bọ yé yí Jesu se. (Johanu 2:23; 8:30) Gbẹtọgun lọ to blebu mẹ podọ titengbe sinsẹ̀ngán lẹ yinuwa po zohunhun po ga—ṣigba to aliho agọ̀ mẹ. Jesu dọna hẹnnumẹ mayisenọ etọn lẹ dọmọ: “Aihọn ma sọgan gbẹwanna mì gba; ṣigba yẹn wẹ e gbẹwanna, na yẹn dekunnu do e go, dọ oylan wẹ azọ́n etọn wutu.” (Johanu 7:7) Na Jesu dekunnu hlan nugbo lọ wutu, e yin wangbẹna gbọn nukọntọ akọta lọ tọn lẹ dali, he dekọtọn do okú etọn mẹ. Na nugbo tọn, ‘kunnudetọ dodonọ, nugbonọ lọ (marʹtys),’ wẹ e yin.—Osọhia 3:14.
“Yè Na Gbẹwanna Mì”
5. Etẹwẹ Jesu dọ gando homẹkẹn go to bẹjẹeji lizọnyizọn etọn tọn?
5 Gbọnvona dọ Jesu lọsu na ede jiya homẹkẹn sinsinyẹn tọn, e sọ na avase hodotọ etọn lẹ dọ nudopolọ na jọ do yé go. To bẹjẹeji lizọnyizọn etọn tọn, Jesu dọna mẹhe se Yẹwhehodidọ Osó ji tọn etọn lẹ dọmọ: ‘Ayajẹnọ wẹ yé he yè to homẹkẹndo na dodo tọn wutu lẹ; na yetọn wẹ ahọludu olọn tọn. Ayajẹnọ wẹ mìwlẹ, whenuena gbẹtọ lẹ na to vivlẹ mì kò, bo to homẹkẹndo mì, bosọ to oylan hunkọhunkọ dọ do mì go to lalo mẹ, na ṣie wutu. Mì ni jaya, na mì nisọ to ayajẹ susu; na ale mìtọn wẹ daho to olọn mẹ.’—Matiu 5:10-12.
6. Avase tẹwẹ Jesu na to whenuena e to apọsteli 12 lẹ dohlan gbonu?
6 To nukọn mẹ, to whenuena Jesu to apọsteli 12 lẹ dohlan gbonu, e dọna yé dọmọ: “Ṣigba mì payi gbẹtọ lẹ go; na yé na hẹn mì yì tòhodọtọ lẹ de, yé nasọ hò mì to sinagọgu yetọn lẹ mẹ; yè na hẹn mì yì togán po ahọlu lẹ po nukọn na yẹn wutu, na okunnu de do yé po Kosi lẹ po go.” Ṣigba e mayin sinsẹ̀ngán lẹ kẹdẹ wẹ na dohomẹkẹn devi lẹ gba. Jesu sọ dọmọ: “Nọvisunnu na yí nọvisunnu na okú, otọ́ na yí ovi na okú; ovi [lẹ] na fọ́n do mẹjitọ yetọn lẹ ji, yé nasọ hù yé. Yè na gbẹwanna mì gbọn gbẹtọ lẹpo de na oyín ṣie tọn wutu: ṣigba mẹhe sinyẹnlin kakajẹ opodo wẹ yè na whlẹngán.” (Matiu 10:17, 18, 21, 22) Whenuho Klistiani owhe kanweko tintan tọn lẹ dekunnuna nugbo-yinyin ohó enẹlẹ tọn.
Kandai Akọndonanu Nugbo Tọn De
7. Nujijọ tẹwẹ hẹn Stefani nado kú okú yise tọn?
7 Ojlẹ vude to okú Jesu tọn godo, Stefani wẹ yin Klistiani tintan he kú na kunnudide hlan nugbo lọ wutu. E yin mẹde “he gọ́ na yise, po huhlọn po, [podọ] e wà azọ́njiawu po nujawu daho po to gbẹtọ lẹ mẹ.” Kẹntọ sinsẹ̀nnọ etọn lẹ “masọ sọgan pehẹ nuyọnẹn po gbigbọ po he e do to hodọ hẹ yé.” (Owalọ lẹ 6:8, 10) Na awuwhàn gọ́ ayiha yetọn mẹ wutu, yé dọ̀n Stefani yì Tòhodọtọ Ju lẹ tọn nukọn, fie e dekunnu huhlọnnọ na whẹsadokọnamẹtọ lalonọ etọn lẹ te. Ṣigba, to godo mẹ, kẹntọ Stefani tọn lẹ hù kunnudetọ nugbonọ ehe.—Owalọ lẹ 7:59, 60.
8. Nukun tẹwẹ devi he tin to Jelusalẹm lẹ yí do pọ́n homẹkẹn he wá yé ji to okú Stefani tọn godo?
8 To okú Stefani tọn godo, “homẹkẹn daho de tin do agun he tin to Jelusalẹm ji; yè sọ vúnvún yé omẹ pó pé Judé po Samalia po dali, adavo apọsteli lẹ kẹdẹ.” (Owalọ lẹ 8:1) Be homẹkẹn glọnalina Klistiani lọ lẹ nado dekunnu wẹ ya? Kakatimọ, kandai lọ dọna mí dọ “yé he yé vúnvún pé to ofi popo yì, bo yẹwheho ohó lọ tọn dọ.” (Owalọ lẹ 8:4) Yé na ko tindo numọtolanmẹ dopolọ hẹ apọsteli Pita to whenuena e dọmọ: “Míwlẹ ma ha nọ ma setonuna Jiwheyẹwhe hú gbẹtọ.” (Owalọ lẹ 5:29) Mahopọnna homẹkẹn, devi nugbonọ, adọgbotọ enẹlẹ tẹdo azọ́n kunnudide hlan nugbo lọ tọn go, dile yé tlẹ yọnẹn ganji dọ ehe na hẹn nuhahun susu dogọ wá yé ji do.—Owalọ lẹ 11:19-21.
9. Homẹkẹn tẹwẹ zindonukọn nado wá hodotọ Jesu tọn lẹ ji?
9 Na nugbo tọn, homẹkẹn lọ fọ́n bo to sinsinyẹn deji. Jẹnukọn whẹ́, mí sè dọ Saulu—dawe he doalọ to zánnu dindlan do Stefani mẹ—“gbẹ́ to gbigbọ adi po hùhù po tọn gbọ̀ do nuplọntọ Oklunọ tọn lẹ ji, bo yì yẹwhenọ daho dè, bo biọ owe to e dè yì Damasku jẹ sinagọgu lẹ mẹ dọ, eyin e mọ omẹ aliho he ji tọn de, eyin yé yin sunnu kavi yọnnu, na e ni hẹn yé biblá wá Jelusalẹm.” (Owalọ lẹ 9:1, 2) Enẹgodo, to nudi owhe 44 W.M. mẹ, “ahọlu Hẹlodi dlẹn alọ etọn nado dín aklọ̀n to omẹ delẹ nù to agun lọ mẹ. E sọ yí ohí do hù Jakobu nọvisunnu Johanu tọn.”—Owalọ lẹ 12:1, 2.
10. Kandai homẹkẹn tọn tẹwẹ mí mọ to owe Owalọ lẹ po Osọhia po tọn mẹ?
10 Pipòtọ owe Owalọ lẹ tọn bẹ kandai dẹn-to-aimẹ whlepọn lẹ, gànpamẹninọ, po homẹkẹn po tọn he omẹ nugbonọ lẹ taidi Paulu, homẹkẹndomẹtọ dai tọn he wá lẹzun apọsteli de podọ he sọgan ko yin hùhù do yise etọn ji gbọn Awhàngán Lomu tọn Néron dali to nudi owhe 65 W.M., doakọnna hẹn. (2 Kọlintinu lẹ 11:23-27; 2 Timoti 4:6-8) To godo mẹ, to owe Osọhia tọn, heyin kinkàn sẹpọ vivọnu owhe kanweko tintan tọn mẹ, mí mọ dọ apọsteli Johanu yọnhonọ lọ yin zizedo gànpamẹ to lopo yasanamẹ Patmos tọn ji ‘na ohó Jiwheyẹwhe tọn didọ po kunnudide hlan Jesu po wutu.’ Osọhia sọ donù ‘Antipa, kunnudetọ nugbonọ ṣie, mẹhe yè hù’ to Pagamu go.—Osọhia 1:9; 2:13.
11. Nawẹ aliho nuyiwa Klistiani dowhenu tọn lẹ tọn do nugbo-yinyin nuhe Jesu dọ gando homẹkẹn go tọn hia gbọn?
11 Ehe lẹpo do nugbo-yinyin nuhe Jesu dọna devi etọn lẹ tọn hia dọmọ: “Eyin yé dohomẹkẹn mi, yé nasọ dohomẹkẹn mìwlẹ ga.” (Johanu 15:20) Klistiani nugbonọ dowhenu tọn lẹ wleawufo nado pannukọn whlepọn he sinyẹn hugan lọ, yèdọ okú—vlavo gbọn yasanamẹ kavi yinyin zizejo na gbekanlin ylankan lẹ dali, kavi to aliho devo depope mẹ—nado sọgan hẹn azọ́ndenamẹ he yé mọyi sọn Oklunọ Jesu Klisti dè di, heyin: “Mìwlẹ nasọ yin kunnudetọ na mi to Jelusalẹm mẹ, to Judé lẹpo mẹ, po Samalia po, podọ jẹ opodo aigba tọn.”—Owalọ lẹ 1:8.
12. Naegbọn homẹkẹndido Klistiani lẹ mayin whẹho nuhe ko jọ wayi tọn de poun?
12 Nuṣiwa daho wẹ e na yin nado lẹndọ nuyiwahẹmẹ kanyinylan tọn mọnkọtọn do hodotọ Jesu tọn lẹ go jọ to ojlẹ he wayi lẹ kẹdẹ mẹ. Dile mí ko mọ do, Paulu, he ewọ lọsu doakọnna yajiji susu, wlan dọmọ: “Yé he jlo na nọ̀ jijọ-di-Jiwheyẹwhe tọn mẹ to Klisti Jesu mẹ lẹ, na nọ doakọnna homẹkẹn.” (2 Timoti 3:12) Pita lọsu dọ gando homẹkẹn go dọmọ: “Na ehe mẹ wẹ yè ylọ mì do: na Klisti jiya na mí ga, bo yí ohia dai na mí, na míwlẹ nido nọ gbọn afọ etọn ji.” (1 Pita 2:21) Sọn whenẹnu kakajẹ ‘azán godo’ titonu ehe tọn lẹ mẹ, omẹ Jehovah tọn lẹ zindonukọn nado to oyà wangbẹnamẹ po kanyinylan po tọn ji. (2 Timoti 3:1) To filẹpo, vlavo to gandudu aṣẹ-glanglan panamẹ tọn lẹ glọ kavi to aigba démocratie tọn lẹ ji, Kunnudetọ Jehovah tọn lẹ ko jiya homẹkẹn tọn to ojlẹ de kavi devo mẹ, to mẹdopodopo liho podọ taidi pipli de.
Naegbọn Yé Nọ Yin Wangbẹna bo Nọ Yin Homẹkẹndo?
13. Etẹwẹ devizọnwatọ Jehovah tọn egbezangbe tọn lẹ dona hẹn do ayiha mẹ gando homẹkẹn go?
13 To egbehe, dile etlẹ yindọ suhugan mítọn to vivi mẹdekannujẹ nado dọyẹwheho bo pli dopọ to jijọho mẹ tọn dù jẹ obá de mẹ, mí dona hẹn nuflinmẹ Biblu tọn lọ do ayiha mẹ dọ ‘ninọmẹ aihọn ehe tọn to didiọ.’ (1 Kọlintinu lẹ 7:31) Onú lẹ sọgan diọ po awuyiya po sọmọ bọ eyin mí ma ko wleawudai to apọ̀nmẹ, to numọtolanmẹ-liho, podọ to gbigbọ-liho, mí sọgan dahli po awubibọ po. Etẹwẹ mí sọgan wà nado basi hihọ́na mídelẹ? Avùnhonu dagbe hugan lọ wẹ nado mọnukunnujẹ nuhewutu Klistiani he yiwanna jijọho bo nọ yìn osẹ́n lẹ do nọ yin wangbẹna bo nọ yin homẹkẹndo mẹ hezeheze.
14. Whẹwhinwhẹ́n tẹ ji wẹ Pita zinnudo na nuhewutu Klistiani lẹ do yin homẹkẹndo?
14 Apọsteli Pita basi zẹẹmẹ do whẹho ehe ji to wekanhlanmẹ tintan etọn mẹ, ehe e kàn to nudi owhe 62-64 W.M., to whenue Klistiani he tin to Ahọluigba Lomu tọn blebu glọ lẹ to oyà whlepọn po homẹkẹn tọn po ji. E dọmọ: “Mẹyiwanna emi, mì lẹn di nudabla de blo gbọn whlepọn miyọnawu he ja mì whlepọn gbé, kẹdẹdi onú dabla de wẹ jọ hlan mì de.” Nado basi zẹẹmẹ nuhe dọ e te tọn, Pita zindonukọn dọmọ: “Mì dike mẹdepope to mì mẹ jiya di hlọnhutọ blo, kavi di ajotọ, kavi di ylanwatọ, kavi di ajannọ to ohó mẹdevo tọn mẹ blo. Ṣigba eyin mẹde jiya di Klistiani, winyan hù i blo, ṣigba ni kúkú gbọ bo pagigona Jiwheyẹwhe na ehe wutu.” Pita zinnudeji dọ yé to yaji, e mayin na yé huwhẹ̀ de wutu wẹ gba, ṣigba na yé yin Klistiani wutu. Eyin yé ko peve to ‘walọ ylankan gblezọn dopolọ mẹ’ hẹ mẹhe lẹdo yé lẹ wẹ, yé na ko yin alọkẹyi ganji. Ṣigba na nugbo tọn, yé jiya na yé dovivẹnu nado hẹn azọ́ndenamẹ yetọn di taidi hodotọ Klisti tọn lẹ wutu. Ninọmẹ dopolọ mẹ wẹ Klistiani nugbo lẹ tin te to egbehe.—1 Pita 4:4, 12, 15, 16.
15. Vogbingbọn tẹwẹ yin mimọ to aliho he mẹ Kunnudetọ Jehovah tọn lẹ nọ yin nuyiwahẹ te to egbehe?
15 To fisusu to aihọn mẹ, Kunnudetọ Jehovah tọn lẹ nọ yin pipà to gbangba na pọninọ po gbekọndopọ he yé nọ dohia po to plidopọ yetọn lẹ, podọ to azọ́nwatẹn họgbigbá yetọn lẹ tọn tẹnmẹ. Yé sọ nọ yin pipà na nugbodidọ po vivẹnudido yetọn po, na apajlẹ dagbe walọyizan po gbẹzan whẹndo tọn yetọn po, podọ na awusọhia po jijọ dagbe yetọn po.a To alọ devo mẹ, azọ́n yetọn ko yin alọhẹndotena to nudi aigba 28 ji to whenue hosọ ehe to yinyin awuwlena, podọ suhugan Kunnudetọ lọ lẹ tọn wẹ yin yasana bosọ hẹn nususu bu na yise yetọn wutu. Naegbọn Kunnudetọ apajlẹ dagbenọ lẹ do yin nuyiwahẹ to aliho mọnkọtọn mẹ? Podọ naegbọn Jiwheyẹwhe jotẹnna ehe?
16. Etẹwẹ yin whẹwhinwhẹ́n tintan he wutu Jiwheyẹwhe jotẹnna omẹ etọn lẹ nado jiya homẹkẹn tọn?
16 Jẹnukọn whẹ́, mí dona hẹn nuhe Howhinwhẹn lẹ 27:11 dọ do ayiha mẹ dọmọ: “Ovi ṣie, yin nuyọnẹntọ, bosọ hẹn homẹ ṣie hùn; na yẹn nido gblọnhona ewọ he to vivlẹ mi.” Mọwẹ, whẹho whenu dindẹn tọn gando nupojipetọ-yinyin wẹkẹ tọn go wẹ e yin. Mahopọnna kunnudenu susugege he ko yin awuwlena gbọn mẹhe ko do tenọgligo hinhẹn yetọn hia na Jehovah to whenuho mẹ lẹ dali, Satani gbẹ́ pò to Jehovah vlẹ kẹdẹdile e wà do to azán dawe dodonọ lọ Job tọn lẹ gbè. (Job 1:9-11; 2:4, 5) Matin ayihaawe, Satani tlẹ ko sọ jẹma dogọ to vivẹnudido godo tọn etọn mẹ nado nọgodona alọsọakọ́n etọn, todin he Ahọluduta Jiwheyẹwhe tọn ko yin zize sinai gligli, po mẹjidugando gọna afọzedaitọ nugbonọ lẹ po lẹdo aihọn pé. Be omẹ ehelẹ na gbọṣi nugbonọ-yinyin mẹ hlan Jiwheyẹwhe mahopọnna yajiji po awusinyẹnnamẹnu he yé sọgan pehẹ lẹ po ya? Devizọnwatọ Jehovah tọn dopodopo wẹ dona na gblọndo na kanbiọ ehe.—Osọhia 12:12, 17.
17. Etẹ dọ wẹ Jesu te to whenuena e dọ dọ “e nasọ lẹ́ hlan yé na kunnude de”?
17 To nujijọ he na wá aimẹ to ‘vivọnu titonu ehe tọn’ lẹ didọna devi etọn lẹ mẹ, Jesu do whẹwhinwhẹ́n devo he wutu Jehovah jotẹnna homẹkẹn nado wá devizọnwatọ etọn lẹ ji hia. E dọna yé dọmọ: “Yè na hẹn mì yì ahọlu lẹ, po ogán lẹ po nukọn na oyín ṣie tọn wutu. E nasọ lẹ́ hlan yé na kunnude de.” (Matiu 24:3, 9; Luku 21:12, 13) Jesu dekunnu to Hẹlodi po Pọntiu Pilati po nukọn. Apọsteli Paulu lọsu yin ‘hinhẹn yì ahọlu lẹ po ogán lẹ po nukọn.’ To anademẹ Oklunọ Jesu Klisti tọn glọ, Paulu dín aliho lẹ nado dekunnuna gandutọ huhlọnnọ hugan ojlẹ lọ tọn to whenuena e lá dọmọ: “Yẹn yí owhẹ̀ ṣie hlan Sesali.” (Owalọ lẹ 23:11; 25:8-12) Mọdopolọ to egbehe, ninọmẹ sinsinyẹn lẹ ko nọ saba dekọtọn do kunnudide na ahọluzọnwatọ lẹ po gbẹtọ paa lẹ po to aliho dagbe mẹ.b
18, 19. (a) Nawẹ akọndidona whlepọn lẹ nọ hẹn ale wá na mí gbọn? (b) Kanbiọ tẹlẹ wẹ na yin dogbapọnna to hosọ he bọdego mẹ?
18 To godo mẹ, akọndidona whlepọn po nukunbibia lẹ po sọgan hẹn ale wá na mílọsu. To aliho tẹmẹ? Devi Jakobu flin Klistiani hatọ etọn lẹ dọmọ: “Mì mẹmẹsunnu ṣie emi, whenuena mì jẹ whlepọn hunkọhunkọ mẹ, mì hia ẹ na ayajijẹ popo; na mì nisọ yọ́n ehe dọ whlepọn yise mìtọn tọn wẹ nọ wazọ́n [akọndona] tọn.” Mọwẹ, homẹkẹn sọgan hẹn yise mítọn lodo bo na huhlọn akọndonanu mítọn. Gbọnmọ dali, mí ma nọ dibuna ẹn gba, mọjanwẹ mí ma nọ dín aliho he ma sọgbe hẹ Owe-wiwe lẹ nado dapana ẹn kavi doalọtena ẹn do niyẹn. Kakatimọ, mí nọ setonuna tudohomẹnamẹ Jakobu tọn dọmọ: “Mì gbọ [akọndona] ni wazọ́n etọn tla, na mì nido sọgbe, na mì nido pegan, nude sọ pò blo.”—Jakobu 1:2-4.
19 Dile etlẹ yindọ Ohó Jiwheyẹwhe tọn nọ gọalọna mí nado mọnukunnujẹ nuhewutu devizọnwatọ nugbonọ Jiwheyẹwhe tọn lẹ nọ yin homẹkẹndo podọ nuhewutu Jehovah nọ jotẹnna ẹn mẹ, enẹ yinyọnẹn ma nọ hẹn homẹkẹn yin nuhe bọawu nado doakọnna gba. Etẹwẹ sọgan hẹn mí lodo nado doakọnna ẹn? Etẹwẹ mí sọgan wà to whenuena mí pehẹ homẹkẹn? Mí na gbadopọnna whẹho titengbe ehelẹ to hosọ he bọdego mẹ.
[Nudọnamẹ Odò Tọn]
a Pọ́n Atọ̀họ̀-Nuhihọ́ Lọ Tọn [Flansegbe] 15 décembre 1995, weda 27-9; [Gungbe] 1er juillet 1994, weda 24-25; podọ Réveillez-vous! 22 décembre 1993, weda 6-13.
b Pọ́n Réveillez-vous! 8 janvier 2003, weda 3-11.
Be Hiẹ Sọgan Basi Zẹẹmẹ Ya?
• Na taun tọn, linlẹn tẹmẹ wẹ Jesu kú okú yise tọn te?
• Nuyiwadomẹji tẹwẹ homẹkẹn tindo do Klistiani owhe kanweko tintan tọn lẹ ji?
• Dile Pita dọ do, naegbọn Klistiani nugbo lẹ nọ yin homẹkẹndo?
• Whẹwhinwhẹ́n tẹlẹ wutu wẹ Jehovah jotẹnna homẹkẹn nado wá devizọnwatọ etọn lẹ ji?
[Yẹdide to weda 10, 11]
Klistiani owhe kanweko tintan tọn lẹ jiya, e mayin na yé hùwhẹ de wutu wẹ gba, ṣigba na yé yin Klistiani wutu
AULU
JAKOBU
JOHANU
ANTIPA
STEFANI