Lilatọ Ahọluduta Tọn lẹ Na Linlin

“Osọhia de Wẹ Ehe Yin!”

DOROTA, lizọnyizọnwatọ whenu-gigọ́ tọn de to Kunnudetọ Jehovah tọn lẹ mẹ to Pologne, plan visunnu owhe 14 mẹvi etọn de yì dotowhé wehọmẹ tọn na agbasa etọn gbigbejepọn. To omẹ gbigbejepọn lọ whenu, doto lọ, Janina,a kanse Dorota dogbọn whégbè-zọ́n he visunnu etọn nọ wà lẹ dali.

“To whenuena yẹn ma penugo nado danú, visunnu ṣie nọ dà núdùdù whèjai tọn na hagbẹ ṣidopo whẹndo lọ tọn lẹpo,” wẹ Dorota gblọn dọ. “E sọ nọ zà họmẹ bo nọ gọalọ nado jla onú lẹ do to whégbè. E yiwanna wehihia. Wehọmẹvi dagbe de wẹ e yin.”

“Enẹ sẹhundaga taun,” wẹ Janina dọ. “Owhe 12 die gbọ́n wẹ yẹn ko to azọ́nwa tofi, ṣigba yẹn ma ko sè onú mọnkọtọn de pọ́n gba.”

Na e mọ dọ dotẹnmẹ hundote de die nado dekunnu, Dorota basi zẹẹmẹ dọmọ: “Mẹjitọ susu wẹ nọ gboawupo to egbehe nado na oplọn he jẹ ovi yetọn lẹ. Enẹwẹ zọ́n bọ ovi yetọn lẹ ma nọ saba tindo osi-mẹdetiti tọn sọmọ.”

“Nawẹ hiẹ wagbọn do yọ́n ehe lẹpo?” wẹ Janina kanse. “Suhugan mẹjitọ lẹ tọn wẹ ma yọ́n nudepope dogbọn ehelẹ dali.”

“Biblu wẹ yin asisa họakuẹ nudọnamẹ ehelẹ tọn,” wẹ Dorota gblọn. “Di apajlẹ, sọgbe hẹ Deutelonomi 6:6-9, mí dona plọn míde whẹpo do plọn ovi mítọn lẹ. Be e ma jẹ dọ mí ni dó walọdagbe he mí jlo na plọn ovi mítọn lẹ do ahun po ayiha mítọn titi po mẹ whẹ́ ya?”

“Ehe sẹhundaga taun,” wẹ Janina dọ. “Ehe sẹhundaga taun!” Enẹgodo e kanse Dorota lehe Biblu gọalọna ẹn nado penukundo bo plọn ovi etọn lẹ whẹ́n do.

“Mí nọ plọn Biblu to osẹ lẹpo mẹ hẹ ovi mítọn lẹ,” wẹ Dorota basi zẹẹmẹ dọ. “Mí nọ yí owe de zan heyin Kanbiọ He Jọja lẹ Nọ Kanse—Gblọndo He Wazọ́n Lẹ.”b Enẹgodo e zindonukọn nado basi zẹẹmẹ owe lọ tọn bo donù hosọ etọn delẹ go.

“Osọhia de wẹ ehe yin!” wẹ Janina gblọn dọ. “Be yẹn sọgan mọ owe lọ po nukun po ya?”

To ganhiho dopo godo, Dorota lẹkọyi po owe lọ po.

“Sinsẹ̀n tẹwẹ a nọ kọnawudopọ hẹ?” wẹ Janina kanse, dile e to owe lọ hùn yigodo podọ yinukọn.

“Yẹn yin dopo to Kunnudetọ Jehovah tọn lẹ mẹ.”

“Nawẹ mì Kunnudetọ Jehovah tọn lẹ nọ yinuwa hẹ hagbẹ sinsẹ̀n devo lẹ tọn gbọn?”

“Kẹdẹdile yẹn yinuwa hẹ we do—yèdọ po sisi po,” wẹ Dorota gblọn dọ, bo yidogọ dọ: “Na nugbo tọn, mí jlo dọ yé ni wá yọ́n nugbo Biblu tọn.”

“Yẹn tlẹ ko plọn nususu sọn dè we todin,” wẹ Janina yigbe dọ.

To vivọnu dlapọn lọ tọn, Dorota dotuhomẹna Janina nado nọ hia Biblu. “E na hẹn gbẹzan towe tindo zẹẹmẹ bo na gọalọna we to azọ́n towe mẹ.”

“Hiẹ ko whàn mi nado jẹ ehe wà ji,” wẹ Janina yigbe dọ.

Dorota yí zinzin po vivẹnudido po zan bo lẹ́ dlapọn he e nọ basi yì wekantẹn doto lọ tọn zun kunnudide dagbe de.—1 Pita 3:15.

[Nudọnamẹ Odò Tọn]