Mì Yí Mawazẹjlẹgo Zan Nado Mọ Ale lọ Yí!
‘Mẹdepope he to mahẹ tindo to alèwezun de mẹ nọ yí mawazẹjlẹgo zan to onú lẹpo mẹ.’—1 KỌLINTINU LẸ 9:25.
1. Sọgbe hẹ Efesunu lẹ 4:22-24, nawẹ gbẹtọ livi susu ko yigbe nado wà ojlo Jehovah tọn gbọn?
EYIN hiẹ ko yin bibaptizi taidi dopo to Kunnudetọ Jehovah tọn lẹ mẹ, hiẹ ko dohia to gbangba dọ a jlo nado bẹ alèwezun de jẹeji he ale etọn yin ogbẹ̀ mavọmavọ. Hiẹ ko yigbe nado wà ojlo Jehovah tọn. Jẹnukọnna klandowiwe yetọn hlan Jehovah, mẹsusu to mí mẹ wẹ dona basi diọdo sinsinyẹn lẹ na klandowiwe mítọn nido sọgbe, bo yin alọkẹyi to Jiwheyẹwhe dè. Mí hodo ayinamẹ apọsteli Paulu tọn hlan Klistiani lẹ dọmọ: “Mì ni klọ́n do apadopo walọ ogbẹ̀ mìtọn hoho tọn, gbẹtọ hoho lọ, he ko gblezọn kẹdẹdi wantuntun he gọ́ na oklọ; . . . Mì nisọ ze gbẹtọ yọyọ lọ dogo, mẹhe yè dá to dodo mẹ di apajlẹ Jiwheyẹwhe tọn, podọ to jijọ wiwe nugbo tọn mẹ.” (Efesunu lẹ 4:22-24) To hogbe devo mẹ, jẹnukọnna klandowiwe bibasi hlan Jiwheyẹwhe, mí dona ko gbẹ́ aliho gbẹzan tọn hoho lọ he ma sọgbe dai.
2, 3. Nawẹ 1 Kọlintinu lẹ 6:9-12 dohia dọ diọdo voovo awe wẹ dona yin bibasi nado yin alọkẹyi to Jiwheyẹwhe dè gbọn?
2 Adà gbẹtọ-yinyin hoho lọ tọn delẹ he mẹhe jlo na lẹzun Kunnudetọ Jehovah tọn lẹ dona gbẹdai yin whẹgbledo tlọlọ to Ohó Jiwheyẹwhe tọn mẹ. Paulu donù delẹ go to wekanhlanmẹ etọn hlan Kọlintinu lẹ mẹ, dọmọ: “Ogalọtọ lẹ, kavi boṣiọ-sẹ̀ntọ lẹ, kavi ayọdetọ lẹ, kavi yọnnujọmẹ lẹ, kavi yé he nọ yí sunnu do hẹn yede gble lẹ. Kavi ajotọ lẹ, kavi nukunkẹnnọ lẹ, kavi ahànnumunọ lẹ, kavi mẹvlẹtọ lẹ, kavi alọslonamẹtọ lẹ de ma na dugu ahọludu Jiwheyẹwhe tọn.” Enẹgodo e dohia dọ Klistiani owhe kanweko tintan tọn lẹ basi diọdo gbẹtọ-yinyin tọn he to dandan mẹ lẹ, bo yidogọ dọmọ: “Mọ wẹ mẹdelẹ te to mì mẹ.” Doayi e go dọ, mọ wẹ yé te dai, ṣigba yé ko diọ todin.—1 Kọlintinu lẹ 6:9-11.
3 Paulu dohia dọ diọdo devo lẹ sọgan yin dandan ga, na e yidogọ dọmọ: “Onú lẹpo wẹ jẹ na mi, ṣigba onú popo ma yin ale tọn.” (1 Kọlintinu lẹ 6:12) Enẹ wẹ zọ́n bọ susu mẹhe jlo na yin Kunnudetọ Jehovah tọn lẹ tọn to egbehe dona dọ lala na nuhe tlẹ jẹ kavi sọgbe hẹ osẹ́n, ṣigba bo ma tindo ale kavi bo ma sọgan nọ aimẹ dẹn lẹ. Ehelẹ sọgan hẹn whenu gú na yé bosọ sọgan fẹayihasẹna yé sọn nuhe yin nujọnu hugan lẹ ji.
4. Hogbe Paulu tọn tẹlẹ wẹ Klistiani klandowiwe lẹ kọngbedopọ hẹ?
4 Klandowiwe nọ yin bibasi hlan Jiwheyẹwhe sọn ojlo mẹ, e mayin po awuwhiwhle po, taidi dọ e bẹ avọ́sinsan he sẹhundaga de hẹn wẹ gba. Klistiani klandowiwe lẹ kọngbedopọ hẹ Paulu, mẹhe dọ to whenuena e lẹzun hodotọ Klisti tọn godo dọmọ: “Na [Jesu wutu] yẹn to oyà gúgú onú lẹpo tọn ji, yẹn sọ hia yé di omí, na yẹn nido duale Klisti tọn.” (Filippinu lẹ 3:8) Paulu yí ayajẹ do dọ lala na nuhe ma tindo ale lẹ na ewọ nido zindonukọn to mọwẹ didọna Jiwheyẹwhe mẹ.
5. Alèwezun tẹwẹ Paulu họ̀n po kọdetọn dagbe po, podọ nawẹ mí sọgan wà onú dopolọ gbọn?
5 Paulu yí mawazẹjlẹgo zan to alèwezun gbigbọmẹ tọn etọn hinhọ̀n mẹ, bosọ penugo nado dọ to godo mẹ dọmọ: “Yẹn ko hoavùn dagbe lọ, yẹn ko hẹn ali ṣie jẹ opodo, yẹn ko yìn yise lọ: sọn dinvie yè ko ze ojẹgbakun dodo tọn daga na mi, ehe Oklunọ, whẹdatọ dodonọ, na na mi to azán nẹ gbè: e masọ yin hlan yẹn dopo kẹdẹ gba, ṣigba hlan yé he yiwanna awusọhia etọn lẹ ga.” (2 Timoti 4:7, 8) Be mílọsu na penugo nado yí hogbe mọnkọtọn zan to gbèdopo ya? Mí na wàmọ eyin mí yí mawazẹjlẹgo zan to yise mẹ bo ma gbọjọ to alèwezun Klistiani tọn mítọn mẹ kakajẹ vivọnu.
E Biọ Mawazẹjlẹgo Nado Wà Dagbe
6. Etẹwẹ mawazẹjlẹgo zẹẹmẹdo, podọ aliho voovo awe tẹlẹ mẹ wẹ mí dona yí ì zan te?
6 Hogbe Heblu po Glẹki po tọn heyin lilẹdo “mawazẹjlẹgo” to Biblu mẹ nọ dohia dọ mẹde tindo huhlọn kavi nugopipe nado deanana ede. E nọ saba tindo linlẹn aliginglọnna mẹdetiti sọn ylanwiwa mẹ tọn. Ṣigba e họnwun dọ e sọ nọ biọ mawazẹjlẹgo jẹ obá de mẹ ga eyin mí na yí agbasa mítọn do wà onú dagbe lẹ. Ojlo jọwamọ gbẹtọvi mapenọ lẹ tọn wẹ nado waylan, enẹwutu mí tindo avùnhiho wunmẹ awe. (Yẹwhehodọtọ 7:29; 8:11) Dile mí to hinhọ̀n na ylanwiwa, mí dona sọ to vivẹnudo nado to dagbe wà. Na taun tọn, anadidena agbasa mítọn nado wà dagbe yin dopo to aliho he yọnhugan lẹ mẹ nado dapana ylanwiwa.
7. (a) Etẹwẹ mí dona hodẹ̀ na, dile Davidi basi do? (b) Ayihamẹlinlẹnpọn do etẹlẹ ji wẹ na gọalọna mí nado yí mawazẹjlẹgo zan to gigọ́mẹ?
7 E họnwun dọ, mí tindo nuhudo mawazẹjlẹgo tọn eyin mí na hẹn klandowiwe mítọn hlan Jiwheyẹwhe di. Mí dona nọ hodẹ̀ he nkọtọn Davidi hò dọmọ: “Dá ayiha yọyọ de na mi, Jiwheyẹwhe E; bosọ hẹn ayiha nugbo tọn jẹ yọyọ to ohò ṣie mẹ.” (Psalm 51:10) Mí sọgan lẹnayihamẹpọn do ale he tin to didapana walọ he ma sọgbe kavi he nọ hẹnmẹ gbọjọ lẹ mẹ ji. Lẹnnupọndo owù he awugbopo nado dapana onú mọnkọtọn lẹ nọ hẹnwa lẹ ji taidi: nuhahun agbasalilo tọn sinsinyẹn lẹ, haṣinṣan lẹ hinhẹngble, kavi etlẹ yin okú ajiji ga. To alọ devo mẹ, lẹnnupọndo ale he titẹdo aliho gbẹzan tọn he Jehovah kẹalọyi lẹ go nọ hẹnwa lẹ ji. Ṣigba, nado dọ hójọhó, mí ma dona wọnji dọ ahun mítọn yin oklenọ. (Jẹlemia 17:9) Mí dona magbe nado dùto vivẹnudido etọn lẹ nado gbẹkọ nujinọtedo Jehovah tọn lẹ go ji.
8. Nugbo tẹwẹ suhugan mítọn yọnẹn ganji? Basi dohia.
8 Suhugan mítọn lẹ wẹ yọnẹn ganji dọ agbasa mape mítọn nọ tẹnpọn to whepoponu nado ṣimiyọ́n na ojlo mítọn nado wà dagbe. Yí yẹwhehodidọ Ahọluduta tọn di apajlẹ. Homẹ Jehovah tọn nọ hùn do gbẹtọvi lẹ go na ojlo sọn ahun mẹ wá yetọn nado tindo mahẹ to azọ́n ogbẹ̀-namẹ tọn ehe mẹ. (Psalm 110:3; Matiu 24:14) Ṣigba, na suhugan mítọn lẹ, pinplọn nado dọyẹwheho to gbangba ma bọawu gba. E biọ—podọ vlavo gbẹsọ biọ—dọ mí ni nọ deanana agbasa mítọn, bo nọ ‘tunnú in’ bosọ nọ ‘hẹn ẹn wá taliai mẹ,’ kakati nado na ẹn dotẹnmẹ bọ e na deanana mí nado ze afọdide he bọawu hugan lọ.—1 Kọlintinu lẹ 9:16, 27; 1 Tẹsalonikanu lẹ 2:2.
Be “to Onú Lẹpo mẹ” Wẹ Ya?
9, 10. Etẹwẹ ‘mawazẹjlẹgo yiyizan to onú lẹpo mẹ’ bẹhẹn?
9 Ayinamẹ Biblu tọn nado yí ‘mawazẹjlẹgo zan to onú lẹpo mẹ’ dohia dọ e biọ nususu hugan nado dava homẹgble bo họ̀nna walọ mawé lẹ poun. Mí sọgan lẹndọ mí ko tindo mawazẹjlẹgo to adà ehelẹ mẹ, podọ eyin mọwẹ, homẹ mítọn sọgan hùn taun. Ṣogan, etẹwẹ dogbọn adà gbẹzan tọn devo lẹ he mẹ nuhudo lọ na mawazẹjlẹgo ma nọ sọawuhia te sọmọ lẹ dali? Di dohia, mí ni dọ dọ mẹde nọ nọ̀ otò adọkun tọn de mẹ fie onú lẹ vẹahi taun te. Be e ma na yin nuyọnẹnnu nado plọn nado nọ dọ lala na akuẹzinzan he ma yin dandan lẹ ya? Mẹjitọ lẹ na wà dagbe nado plọn ovi yetọn lẹ ma nado nọ họ̀ nudepope he yé mọ, na nulọ jlo yé kavi na akuẹ etọn tin poun wutu. Na nugbo tọn, eyin nuplọnmẹ mọnkọtọn na tindo kọdetọn dagbe, mẹjitọ lẹ lọsu dona ze apajlẹ dagbe dai.—Luku 10:38-42.
10 Pinplọn nado tindo pekọ po nuhe mí tindo lẹ po sọgan hẹn gbemima mítọn lodo. E sọgan sọ hẹn pinpẹn-nutọn na nutindo agbasa tọn he mí tindo lẹ siso dogọ bosọ sọgan hẹn mí yin awuvẹmẹtọ dogọ hlan mẹhe dona nọgbẹ̀ matin onú delẹ, e mayin na yé jlo wutu gba, ṣigba na e ma tin wutu. Na nugbo tọn, gbẹzan jlẹkaji tọn nọ jẹagọdo walọ ṣejannabi tọn he gbayipe lẹ. Ajọ́jijla lẹ nọ ze ojlo tintindo na gbẹdudu afọdopolọji tọn daga, ṣigba e nọ wàmọ na ale ajọwiwa etọn tọn lẹ wutu. Ninọmẹ ehe sọgan glọnalina vivẹnudido mítọn nado do mawazẹjlẹgo hia. Linlinwe de sọn otò adọkunnọ Europe tọn de mẹ doayi e go to agọe dọmọ: “Eyin mẹhe tin to otò he jẹhẹ́n klókló mẹ lẹ dona nọ hoavùn sinsinyẹn nado dava ojlo he ma sọgbe lẹ, nẹmunẹmu wẹ na mẹhe tin to otò adọkun tọn mẹ lẹ!”
11. Naegbọn pinplọn nado tindo pekọ do yin alenu, ṣigba etẹwẹ nọ hẹn ehe vẹawu?
11 Eyin e vẹawu na mí nado yọ́n vogbingbọn to nuhe yin nujlomẹ po nuhe mí tindo nuhudo etọn nugbo lẹ po ṣẹnṣẹn, e na yọ́n nado ze afọdide lẹ ma nado nọ yinuwa to plaplaji. Di apajlẹ, eyin mí jlo nado doalọtena akuẹ ṣiṣizan, mí dona magbe ma nado nọ họ̀nú ahọ́ kavi mí sọgan nọ hẹn akuẹ he to jlẹkaji to whenuena mí jei ahiwhle gbé. Flindọ Paulu dọ dọ “jijọ-di-Jiwheyẹwhe po pekọ po” yin “ale daho.” E na whẹwhinwhẹ́n dọmọ: “Míwlẹ ma hẹn nude wá biọ aihọn mẹ, mọ míwlẹ ma sọ sọgan hẹn nude tọ́n jẹgbonu yì. Eyin mí tindo núdùdù po avọ̀ po, enẹ ni pekọna mí.” (1 Timoti 6:6-8) Be mọwẹ e yin na mí ya? Pinplọn nado zan gbẹzan he bọawu, bo ma bẹ ayihafẹsẹnamẹnu ṣejannabi tọn lẹ hẹn—to aliho depope mẹ—nọ biọ gbemima po mawazẹjlẹgo po. Ṣigba oplọn dagbe de wẹ he mí dona plọn.
12, 13. (a) Aliho tẹlẹ mẹ wẹ opli Klistiani tọn lẹ nọ biọ mawazẹjlẹgo te? (b) Adà devo tẹlẹ mẹ wẹ mí dona wleawuna mawazẹjlẹgo te?
12 Opli agun tọn lẹ po plidopọ lẹ po yìyì sọ nọ biọ mawazẹjlẹgo didohia ga. Di dohia, jẹhẹnu ehe yin dandan ma nado dike ayiha mítọn ni yin fifẹ́sẹ sọn tito-to-whinnu lọ ji. (Howhinwhẹn lẹ 1:5) E sọgan biọ mawazẹjlẹgo ma nado dotukla mẹdevo lẹ gbọn pádide na mẹhe to apá na mí lẹ dali kakati nado ze ayidonugo lẹpo do hodọtọ lọ ji. Tito mítọn lẹ vivọbasi nado sọgan wá do ganmẹ sọgan biọ mawazẹjlẹgo ga. Humọ, nuhudo sọgan tin na mawazẹjlẹgo nado de whenu dovo nado wleawuna opli lẹ podọ nado tindo mahẹ to yé mẹ.
13 Mawazẹjlẹgo didohia to onú pẹvi lẹ mẹ nọ hẹn nugopipe mítọn lodo nado wàmọ to onú daho lẹ mẹ. (Luku 16:10) Enẹwutu, lehe e na yọ́n nado do mẹplọnlọ mídelẹ go nado nọ hia Oho Jiwheyẹwhe tọn po owe sinai do Biblu ji lẹ po to gbesisọmẹ, bo nọ plọn yé bosọ nọ lẹnayihamẹpọn do nuhe mí plọn lẹ ji do sọ! Lehe e yin nuyọnẹnnu nado do mẹplọnlọ mídelẹ go gando agbasazọ́n, họntọnjiji, walọyizan, po aṣa he ma sọgbe lẹ po go kavi nado nọ dọ lala na nuwiwa he sọgan fìn whenu họakuẹ he mí sọgan yizan na sinsẹ̀nzọn Jiwheyẹwhe tọn lẹ do sọ! Na taun tọn, hinhẹn alọnu mítọn ján to sinsẹ̀nzọn Jehovah tọn mẹ yin hihọ́ tangan de na mí sọta nuhe sọgan dọ̀n mí sọn paladisi gbigbọmẹ tọn he mí to vivi etọn dù to agun lẹdo aihọn pé Jehovah tọn mẹ.
Lẹzun Mẹhe Whẹ́n Mẹho Gbọn Mawazẹjlẹgo Gblamẹ
14. (a) Nawẹ ovi lẹ dona plọn nado yí mawazẹjlẹgo zan gbọn? (b) Eyin ovi lẹ plọn jẹhẹnu ehe to ovuwhenu, ale tẹlẹ wẹ e sọgan hẹnwa?
14 Viyẹyẹ de ma nọ tindo mawazẹjlẹgo gba. Alọnuwe-pẹvi de he yin kinkàn gbọn mẹhe nọ dindona walọ ovi lẹ tọn dali basi zẹẹmẹ dọmọ: “Mawazẹjlẹgo ma nọ wá na ede kavi to jọwamọ-liho gba. Viyẹyẹ lẹ po ovivu lẹ po tindo nuhudo anademẹ po alọgọ mẹjitọ yetọn lẹ tọn po nado jẹ mawazẹjlẹgo plọn ji. . . . To anademẹ mẹjitọ lẹ tọn glọ, mawazẹjlẹgo nọ jideji to ojlẹ he yé do to wehọmẹ yì lẹpo gblamẹ.” Dodinnanu de gando owhe ẹnẹ mẹvi lẹ go dehia dọ ovi he ko plọn nado nọ yí mawazẹjlẹgo zan jẹ obá de mẹ lẹ “nọ saba whẹ́n mẹho bo nọ lẹzun jọja he setonu, diyin ganji, adọgbotọ, he go yè sọgan dejido lẹ.” Ṣigba ovi he ma ko plọn nado jẹ jẹhẹnu ehe yizan ji to owhe enẹ mẹ lẹ “nọ yawu jiya ṣokẹdẹ-ninọ, kavi flumẹjijẹ tọn bo nọ saba lẹzun tasinyẹntọ. Yé nọ gbọjọ to kọgbidinamẹ glọ bo nọ họ̀nna avùnnukundiọsọmẹ lẹ.” E họnwun dọ, nado lẹzun mẹho he go yè sọgan ganjẹ de, mẹlọ dona plọn mawazẹjlẹgo to ovuwhenu.
15. Etẹwẹ awugbopo nado yí mawazẹjlẹgo zan nọ dohia, podọ nawẹ e gbọnvona yanwle he yin zizedai to Biblu mẹ gbọn?
15 Mọdopolọ, eyin mí na lẹzun Klistiani he whèwhín lẹ, mí dona plọn nado nọ do mawazẹjlẹgo hia. Awugbopo to ehe wiwà mẹ na dohia dọ mí gbẹ́ yin ovivu lẹ to gbigbọmẹ. Biblu dotuhomẹna mí nado ‘lẹzun mẹho to wuntuntun mẹ.’ (1 Kọlintinu lẹ 14:20) Yanwle mítọn wẹ nado “wá nọ dopo to yise mẹ, podọ to oyọnẹn Ovi Jiwheyẹwhe tọn tọn mẹ, hlan gbẹtọ he sọgbe de, hlan ojlẹnu tedidi gigọ́ Klisti tọn.” Etẹwutu? “Na sọn dinvie yì, mí ma yin yọpọ ba, he yè na nọ do yigọyigọ na, bọ yè na yí jẹhọn oplọn tọn lẹpo do nọ hẹn danpé, gbọn oklọ gbẹtọ tọn dali, po nuyọnẹn bublu tọn po, gbọn ehe mẹ yé nọ tọwù do nuglọ na oklọ.” (Efesunu lẹ 4:13, 14) E họnwun dọ, pinplọn nado yí mawazẹjlẹgo zan yin dandannu na gbigbọnọ-yinyin mítọn.
Awuwiwlena Mawazẹjlẹgo
16. Nawẹ Jehovah nọ wleawu alọgọ tọn gbọn?
16 Nado wleawuna mawazẹjlẹgo, mí tindo nuhudo alọgọ Jiwheyẹwhe tọn, podọ alọgọ enẹ tin-to-aimẹ. Ohó Jiwheyẹwhe tọn nọ do fihe mí dona basi vọjlado te lẹ hia mí taidi mẹpọnnu dagbe de, podọ e nọ na mí ayinamẹ lehe mí sọgan wà ẹ do tọn. (Jakobu 1:22-25) Mẹmẹsunnu owanyinọ mítọn lẹ lọsu tin to finẹ nado gọalọ ga. Mẹho agun tọn lẹ nọ na alọgọ mẹdetiti tọn po nukunnumọjẹnumẹ po. Jehovah lọsu nọ na mí gbigbọ wiwe etọn to whedepopenu he mí biọ ẹ to odẹ̀ mẹ. (Luku 11:13; Lomunu lẹ 8:26) Enẹwutu, mì gbọ mí ni yí awuwledainanu ehelẹ zan po ayajẹ po. Ayinamẹ he tin to weda 21 lẹ sọgan gọalọ.
17. Tuli tẹwẹ Howhinwhẹn lẹ 24:16 na mí?
17 Lehe e yin homẹmiọnnamẹnu nado yọnẹn dọ Jehovah nọ yọ́n pinpẹn vivẹnu he mí to dido nado hẹn homẹ etọn hùn lẹ tọn do sọ! Ehe dona dozolanmẹ na mí nado to kanván zọnmii nado to mawazẹjlẹgo dohia dogọ. Mahopọnna lehe mí sọgan nọ gboawupo gbọzangbọzan sọ, mí ma dona gbọjọ gbede. “Nugbonọ jai whla ṣinawe, bosọ fọ́n.” (Howhinwhẹn lẹ 24:16) Whedepopenu he mí penugo bo hẹn homẹ Jehovah tọn hùn, mí dona nọ jaya. Podọ mí sọgan sọ deji dọ homẹ Jehovah lọsu tọn nọ hùn. Kunnudetọ dopo dọ dọ whẹpo emi do klan gbẹzan emitọn do wiwe hlan Jehovah, whedepopenu he emi penugo nado gbẹ́ azọ̀-nùnù dai na osẹ dopo, emi nọ yí akuẹ he mawazẹjlẹgo gọalọna emi ma nado hẹngú lọ do họ̀ nujọnu de.
18. (a) Etẹwẹ avùnhiho mítọn nado do mawazẹjlẹgo hia bẹhẹn? (b) Jide tẹwẹ Jehovah na mí?
18 Hú popolẹpo, mí dona flindọ mawazẹjlẹgo bẹ ayiha po numọtolanmẹ lẹ po hẹn. Mí sọgan mọ ehe to ohó Jesu tọn lẹ mẹ dọmọ: “Eyin mẹdepope pọ́n yọnnusi de nado wà nugbigble hẹ ẹ, e ko deayọ hẹ ẹ to ayiha etọn mẹ dote.” (Matiu 5:28; Jakobu 1:14, 15) E na bọawu na mẹhe ko plọn nado dava ayiha po numọtolanmẹ etọn lẹ po nado dava agbasa etọn blebu. Enẹwutu, mì gbọ mí ni hẹn gbemima mítọn lodo, e mayin nado gbẹ́ ylanwiwa dai kẹdẹ wẹ gba ṣigba nado gbẹ́ nulinlẹnpọn do e ji ga. Eyin linlẹn ylankan lẹ fọ́n, gbẹ́ yé dai to afọdopolọji. Mí sọgan họ̀nna mẹtẹnpọn lẹ eyin mí gbọn odẹ̀ dali ze nukun mítọn lẹ do Jesu ji. (1 Timoti 6:11; 2 Timoti 2:22; Heblu lẹ 4:15, 16) Dile mí to ehe go mí pé lẹpo wà, mí na to hihodo ayinamẹ Psalm 55:22 tọn dọmọ: “Ze agbàn towe dlan OKLUNỌ ji, ewọ nasọ hẹn we dote; ewọ ma na dike dodonọ ni yin sisẹtẹnna.”
Be Hiẹ Flin Ya?
• Aliho awe tẹlẹ mẹ wẹ mí dona yí mawazẹjlẹgo zan te?
• Etẹwẹ e zẹẹmẹdo nado yí ‘mawazẹjlẹgo zan to onú lẹpo mẹ’?
• Ayinamẹ yọn-na-yizan he na gọalọ nado wleawuna mawazẹjlẹgo tẹlẹ go wẹ hiẹ doayi to nupinplọn mítọn whenu?
• Fie wẹ mawazẹjlẹgo nọ bẹsọn?
[Apotin/Yẹdide to weda 21]
Lehe Mí Sọgan Hẹn Mawazẹjlẹgo Lodo Do
• Wleawuna ẹn etlẹ yin to onú pẹvi lẹ mẹ
• Lẹnayihamẹpọn do ale dintọn po sọgodo tọn lẹ po ji
• Yí nuhe Jiwheyẹwhe yiwanna lẹ do diọtẹnna nuhe e jẹagọdo lẹ
• Gbẹ́ linlẹn he ma sọgbe lẹ dai to afọdopolọji
• Yí linlẹn he nọ jlọmẹdote to gbigbọ-liho lẹ do gọ́ ayiha towe
• Kẹalọyi alọgọ he Klistiani he whèwhín lẹ sọgan na we
• Dapana ninọmẹ mẹtẹnpọn tọn lẹ
• Hodẹ̀ na alọgọ Jiwheyẹwhe tọn to ojlẹ mẹtẹnpọn tọn lẹ mẹ
[Yẹdide to weda 18, 19]
Mawazẹjlẹgo nọ whàn mí nado wà dagbe