Mì Dọyẹwheho Nado Hẹn Gbẹtọ lẹ Zun Devi
“Whenuena Akuila po Pliskila po sè ohó [Apọlo tọn], yé dọ̀n ẹn dogo, yé sọ dọdò ali Jiwheyẹwhe tọn hlan ẹn hezeheze.”—OWALỌ LẸ 18:26.
1. (a) Dile etlẹ yindọ e “hunzo to ayiha mẹ,” etẹwẹ whèdo Apọlo? (b) Nuhudo etẹ tọn wẹ Apọlo tindo nado hẹn nukunnumọjẹnumẹ gbigbọmẹ tọn etọn siso dogọ?
PLISKILA po Akuila po, asu po asi po Klistiani owhe kanweko tintan tọn de, mọ Apọlo to hodọ to sinagọgu mẹ to tòdaho Efesu tọn mẹ. Na Apọlo to hodọ po dẹ́didi po gọna huhlọn linlẹndiọnamẹ tọn wutu, e ko wle ayidonugo hosetọ etọn lẹ tọn. E “hunzo to ayiha mẹ,” bosọ “plọn onú Oklunọ tọn lẹ omẹ to vivẹnu mẹ.” Ṣigba e họnwun dọ “baptẹm Johanu tọn kẹdẹ wẹ [Apọlo] yọnẹn.” Yẹwheho Apọlo tọn dogbọn Klisti dali yin nugbo ṣigba e tindo dogbó. Nuhahun lọ wẹ yindọ oyọnẹn etọn gando Klisti go ma siso gba. Apọlo dona hẹn oyọnẹn etọn gando azọngban Jesu Klisti tọn to lẹndai Jehovah tọn hinhẹndi mẹ go siso dogọ.—Owalọ lẹ 18:24-26.
2. Avùnnukundiọsọmẹ tẹwẹ Pliskila po Akuila po kẹalọyi?
2 Pliskila po Akuila po ze yedelẹ jo matin awuwhiwhle nado gọalọna Apọlo nado lẹzun mẹhe sọgan doayi “onú lẹpo” he Klisti degbè etọn go. (Matiu 28:19, 20) Kandai lọ dọ dọ yé dọ̀n Apọlo “dogo, yé sọ dọdò ali Jiwheyẹwhe tọn hlan ẹn hezeheze.” Ṣigba, nugbo delẹ tin gando Apọlo go he sọgan ko hẹn Klistiani delẹ whleawu nado plọn ẹn. Nugbo tẹlẹ wẹ? Podọ etẹwẹ mí sọgan plọn sọn vivẹnu he Pliskila po Akuila po dó nado dọhodo Owe-wiwe ji hẹ Apọlo mẹ? Nawẹ dogbapọnna kandai ehe na gọalọna mí nado na ayidonugo plọnmẹ Biblu lẹ bibẹjẹeji gbọn?
Mì Ze Ayidonugo do Gbẹtọ lẹ Ji
3. Naegbọn wésise Apọlo tọn ma glọnalina Pliskila po Akuila po nado plọn ẹn?
3 Na e yin jiji to kúnkàn Juvi tọn mẹ wutu, e họnwun dọ tòdaho Alexandrie tọn mẹ wẹ Apọlo whẹ́n te. Alexandrie wẹ yin tatọ-tònọ Egipti tọn to whenẹnu bosọ yin lẹdo wesetọ akonka lẹ tọn, he diyin na wesẹdotẹn daho etọn. Juvi lẹ po wesetọ lẹ po wẹ suhugan to otò lọ mẹ. Enẹwutu, finẹ wẹ lẹdogbedevomẹ Owe-wiwe Heblu tọn lẹ do Glẹkigbe mẹ heyin yinyọnẹn di Septante yin bibasi te. Abajọ Apọlo do “peve to Owe-wiwe mẹ”! Gohọ̀ wẹ Akuila po Pliskila po nọ gbá. Be dẹ́didi Apọlo tọn hẹn yé whleawu nado gọalọna ẹn wẹ ya? Lala. Po owanyi po, yé ze ayidonugo do ewọ, nuhudo etọn lẹ, po lehe yé sọgan gọalọna ẹn gbọn po ji.
4. Fie wẹ Apọlo mọ alọgọ he e tindo nuhudo etọn yí te podọ gbọnna?
4 Mahopọnna lehe Apọlo didẹ́ sọ, e tindo nuhudo nuplọnmẹ tọn. Alọgọ he e tindo nuhudo etọn ma sọgan yin mimọ to wehọmẹ alavọ tọn depope adavo to hagbẹ agun Klistiani tọn lẹ dè. Apọlo na mọaleyi sọn nuplọnmẹ he na dekọtọn do nukunnumọjẹnumẹ he pegan de mẹ gando tito Jiwheyẹwhe tọn na whlẹngán go. Pliskila po Akuila po “dọ̀n ẹn dogo, yé sọ dọdò ali Jiwheyẹwhe tọn hlan ẹn hezeheze.”
5. Etẹwẹ hiẹ sọgan dọ dogbọn gbigbọnọ-yinyin Pliskila po Akuila po tọn dali?
5 Pliskila po Akuila po lodo to gbigbọ-liho bọ yise yetọn sọ lodo. E yọnbasi taun dọ, yé ko nọ ‘wleawu to whepoponu nado yiavunlọ to mẹhe to dodinna linlẹn todido he tin to yé mẹ lẹpo nukọn,’ vlavo mẹlọ yin adọkunnọ, wamọnọ, wesetọ, kavi afanumẹ de. (1 Pita 3:15) Akuila po asi etọn po penugo nado ‘yí ohó nugbo tọn zan dile e jẹ do.’ (2 Timoti 2:15) E họnwun dọ, yé yin nuplọntọ vivẹnunọ Owe-wiwe tọn lẹ. Apọlo yin nuyiwadeji sisosiso gbọn nuplọnmẹ he sinai do ‘ohó Jiwheyẹwhe tọn ji, he tin to ogbẹ̀, bosọ dohuhlọn,’ he nọ yinuwado ahun mẹtọn ji lọ dali.—Heblu lẹ 4:12.
6. Nawẹ mí yọnẹn dọ Apọlo yọ́n pinpẹn alọgọ he e mọyi lẹ tọn gbọn?
6 Apọlo yọ́n pinpẹn apajlẹ mẹplọntọ etọn lẹ tọn bo lẹzun mẹhe pegan ganji to gbẹtọ lẹ hinhẹnzun devi mẹ. E yí oyọnẹn etọn zan to gigọ́mẹ to azọ́n wẹndagbe lọ lilá tọn mẹ, titengbe to Juvi lẹ ṣẹnṣẹn. Apọlo yọn-na-yizan titengbe to linlẹndidiọna Ju lẹ dogbọn Klisti dali mẹ. ‘Pipeve to Owe-wiwe mẹ’ hẹn ẹn penugo nado dohia yé dọ yẹwhegán hohowhenu tọn lẹpo wẹ donukun wiwá Klisti tọn. (Owalọ lẹ 18:24) Kandai lọ yidogọ dọ, enẹgodo Apọlo yì Akaia, fie “e gọalọna mẹhe yise gbọn ojọmiọn [Jiwheyẹwhe tọn] mẹ lẹ susu: na e yí huhlọn do gọ̀kọ̀na Ju lẹ to gbangba, bosọ to didohia gbọn Owe-wiwe mẹ dọ, Jesu wẹ Klisti lọ.”—Owalọ lẹ 18:27, 28.
Mì Plọnnu sọn Apajlẹ Mẹplọntọ Devo lẹ Tọn Mẹ
7. Nawẹ Akuila po Pliskila po lẹzun mẹplọntọ azọ́nyọnẹntọ lẹ gbọn?
7 Nawẹ Akuila po Pliskila po wagbọn do lẹzun mẹplọntọ Ohó Jiwheyẹwhe tọn he pegan lẹ? Gbọnvona oplọn mẹdetiti sọwhiwhe tọn yetọn po opli lẹ yìyì po, gbẹdido pẹkipẹki hẹ apọsteli Paulu dona ko gọalọna yé taun ga. Paulu nọ owhé Pliskila po Akuila po tọn gbè to Kọlinti na osun 18. Yé wà azọ́n gohọ̀ gbigbá tọn dopọ. (Owalọ lẹ 18:2, 3) Yí nukun homẹ tọn do pọ́n hodọdopọ sisosiso do Owe-wiwe ji he na ko wá aimẹ to ṣẹnṣẹn yetọn. Podọ lehe gbẹdido yetọn hẹ Paulu na ko hẹn gbigbọnọ-yinyin yetọn lodo do sọ! “Ewọ he to zọnlinzin hẹ nuyọnẹntọ na yọnnuin,” wẹ Howhinwhẹn lẹ 13:20 dọ. Gbẹdido dagbe yinuwado yé ji to gbigbọmẹ to aliho dagbe mẹ.—1 Kọlintinu lẹ 15:33.
8. Etẹwẹ Pliskila po Akuila po plọn sọn lizọnyizọn Paulu tọn mẹ?
8 To whenuena Pliskila po Akuila po mọ Paulu to Ahọluduta lọ lá, yé mọ ẹn taidi mẹplọntọ dagbe de. Kandai Owalọ lẹ tọn dọ dọ Paulu nọ “to hoyijlẹdohogo na yé to sinagọgu [Kọlinti tọn] mẹ to gbọjẹzangbe gbọjẹzangbe, bosọ to alọtúndo Ju lẹ po Glẹki lẹ po.” To whenuena Sila po Timoti po wá kọnawudopọ hẹ ẹ to godo mẹ, Paulu nọ “hounpansu . . . gbọn ohó lọ dali e sọ to kunnude hlan Ju lẹ dọ, Jesu wẹ Klisti lọ.” To whenuena e mọ jlodotọ vude to hagbẹ sinagọgu lọ tọn lẹ ṣẹnṣẹn, Pliskila po Akuila po doayi e go dọ Paulu sẹtẹn na yẹwhehodidọ etọn sọn finẹ yì nọtẹn he pọnte hugan de mẹ, yèdọ owhé he bọdo sinagọgu go tlolo lọ gbè. Finẹ wẹ Paulu penugo nado gọalọna Klispu, “ogán daho sinagọgu tọn” te, nado lẹzun devi de. Vlavo, Pliskila po Akuila po na ko doayi e go dọ hinhẹn dawe dopo ehe zun devi yinuwado aigba-denamẹ lọ ji sisosiso bọ e de sinsẹ́n susu tọ́n. Kandai lọ dọmọ: “Klispu . . . yí Oklunọ sè po mẹhe tin to owhé etọn gbè lẹpo po; omẹ susu to Kọlintinu lẹ mẹ, he sè, yise, yè sọ baptizi yé.”—Owalọ lẹ 18:4-8.
9. Nawẹ apajlẹ Paulu tọn gọalọna Pliskila po Akuila po gbọn?
9 Lilatọ Ahọluduta tọn devo lẹ, taidi Pliskila po Akuila po hodo apajlẹ he Paulu zedai to lizọnyizọn lọ mẹ. Apọsteli lọ dotuhomẹna Klistiani devo lẹ dọmọ: “Mì yin mẹhodotọ ṣie, dile yẹn ga yin Klisti tọn do.” (1 Kọlintinu lẹ 11:1) To apajlẹ Paulu tọn hihodo mẹ, Pliskila po Akuila po gọalọna Apọlo nado mọnukunnujẹ nuplọnmẹ Klistiani tọn lẹ mẹ hezeheze. Taidi kọdetọn de, ewọ lọsu gọalọna mẹdevo lẹ. Matin ayihaawe, Pliskila po Akuila po sọ gọalọ nado hẹn gbẹtọ lẹ zun devi to Lomu, Kọlinti, po Efesu po ga.—Owalọ lẹ 18:1, 2, 18, 19; Lomunu lẹ 16:3-5.
10. Etẹwẹ hiẹ ko plọn sọn Owalọ lẹ weta 18 mẹ he na gọalọna we to azọ́n mẹhinhẹnzun devi tọn mẹ?
10 Etẹwẹ mí sọgan plọn sọn dogbapọnna Owalọ lẹ weta 18 mẹ? Do glido, kẹdẹdile Akuila po Pliskila po sọgan ko plọnnu sọn apajlẹ Paulu tọn mẹ do, mí sọgan hẹn nugopipe mítọn nado hẹnmẹ zun devi pọnte dogọ gbọn hihodo apajlẹ mẹhe nọ plọnmẹ Ohó Jiwheyẹwhe tọn ganji lẹ tọn dali. Mí sọgan dogbẹ́ hẹ mẹhe “nọ hẹn alọnu ján po ohó lọ po lẹ” po mẹhe “to kunnude to gigọ́mẹ” hlan mẹdevo lẹ po. (Owalọ lẹ 18:5, Kingdom Interlinear Translation) Mí sọgan nọ doayi lehe yé nọ yí aliho mẹpinplọn linlẹndiọnamẹ tọn zan nado jẹ ahun gbẹtọ lẹ tọn mẹ do go. Azọ́nyinyọnẹn mọnkọtọn sọgan gọalọna mí nado hẹn gbẹtọ lẹ zun devi. Eyin mẹde to Biblu plọn hẹ mí, mí sọgan biọ dọ ni basi oylọna hagbẹ whẹndo etọn tọn lẹ kavi kọmẹnu etọn lẹ nado kọnawudopọ hẹ ẹ to oplọn lọ mẹ. Kavi mí sọgan biọ to e si nado dọ mẹdevo he mí sọgan ze plọnmẹ Biblu donukọnna lẹ na mí.—Owalọ lẹ 18:6-8.
Hùn Dotẹnmẹ lẹ Dote Nado Hẹnmẹ Zun Devi
11. Fie wẹ devi yọyọ lẹ sọgan yin mimọ te?
11 Paulu po Klistiani hatọ etọn lẹ po dovivẹnu nado hẹn gbẹtọ lẹ zun devi gbọn yẹwhehodidọ dali sọn whédegbè jẹ whédegbè, to ahimẹ, podọ to whenuena yé to gbejizọnlin basi—na taun tọn, to filẹpo. Taidi azọ́nwatọ zohunhunnọ Ahọluduta tọn de he to vivẹnudo nado hẹnmẹ zun devi, be hiẹ sọgan hẹn nuwiwa sinsẹ̀nzọn kunnudegbe tọn towe lẹ gblodeji ya? Be hiẹ sọgan yí dotẹnmẹ he hundote lẹ zan ganji nado dín mẹhe jẹ lẹ bo dọyẹwheho na yé ya? Aliho tẹlẹ wẹ wẹnlatọ wẹndagbe lọ tọn hatọ mítọn delẹ ko yizan nado mọ devi lẹ? Mì gbọ mí ni pọ́n aliho kunnudide alokan ji tọn whẹ́.
12-14. Dọ numimọ towe titi kavi dopo to dehe tin to hukan ehelẹ mẹ nado do ale he tin to kunnudide alokan ji tọn mẹ lẹ hia.
12 To whenuena e to kunnude sọn whédegbè jẹ whédegbè to Brésil, Klistiani de he mí sù-yinkọ na dọ Maria ze alọnuwe-pẹvi de na yọnnu jọja de he to tintọ́n sọn owhé de gbè. Maria yí hosọ alọnuwe-pẹvi lọ tọn zan di homẹbibiọ de, bo kanse dọ, “Be hiẹ jlo na yọ́n nususu dogọ do Biblu ji ya?” Yọnnu lọ gblọn dọ: “Mọwẹ, yẹn jlo. Ṣigba nuhahun lọ wẹ yindọ mẹplọntọ de wẹ yẹn yin, bọ azọ́n ṣie nọ yí whenu ṣie lẹpo.” Maria basi zẹẹmẹ dọ yé sọgan dọhodo Biblu ji to alokan ji. Yọnnu lọ na sọha alokan etọn tọn Maria, podọ to gbenẹgbe whèjai, e bẹ oplọn de jẹeji to alokan ji to alọnuwe Etẹwẹ Jiwheyẹwhe Biọ to Mí Si? a mẹ.
13 To whenuena e to kunnudide alokan ji tọn basi, e paṣa lizọnyizọnwatọ whenu-gigọ́ tọn de to Ethiopie to whenuena e to hodọna dawe de ṣigba bosọ to zingidi devo sè dohlan. Dawe lọ dọna ẹn nado ylọ to whedevonu. To whenuena e wàmọ, dawe lọ vẹ̀ ẹ bo dọna ẹn dọ nutlọ wẹ emi po asi emitọn po te sinsinyẹn to whenuena e ylọ wayi. Mẹmẹyọnnu lọ yí dotẹnmẹ ehe zan nado dlẹnalọdo anademẹ nuyọnẹn tọn he Biblu na nado penukundo nuhahun whẹndo tọn lẹ go. E dọna dawe lọ dọ owe Aṣli Ayajẹ Whẹndo Tọn, heyin zinzinjẹgbonu gbọn Kunnudetọ Jehovah tọn lẹ dali ko gọalọna whẹndo susu. To azán vude godo he owe lọ yin hinhẹn yì na ẹn, mẹmẹyọnnu lọ ylọ dawe lọ whladopo dogọ. Dawe lọ dọna ẹn dọ: “Owe ehe ko whlẹn alọwle ṣie!” Na nugbo tọn, dawe lọ ko basi opli whẹndo tọn de nado sọgan má nudọnamẹ dagbe he e hia to owe lọ mẹ lẹ hẹ whẹndo etọn. Plọnmẹ Biblu whégbè tọn de bẹjẹeji, podọ to madẹnmẹ dawe lọ jẹ opli agun tọn lẹ yì ji to gbesisọmẹ.
14 Lilatọ Ahọluduta tọn de to Danemark he bẹ plọnmẹ Biblu de jẹeji gbọn kunnudide alokan ji tọn dali dọmọ: “Nugopọntọ sinsẹ̀nzọn tọn dotuhomẹna mi nado tindo mahẹ to kunnudide alokan ji tọn mẹ. Yẹn whleawu jẹnukọn, bo dọmọ: ‘Yẹn ma sọgan wà azọ́n ehe gba.’ Ṣigba, to gbèdopo yẹn wleawuna adọgbo bo jẹ sọha alokan whétọ tintan tọn zín ji. Sonja wẹ yigbe, podọ to hodọdopọ kleun de godo, e yigbe nado kẹalọyi owe sinai do Biblu ji de. Mí dọhodo nudida ji to whèjai dopo, bọ e do ojlo hia nado hia owe lọ La vie: comment est-elle apparue? Évolution ou création?b Yẹn dọna ẹn dọ e na yọnhugan eyin mí sọgan mọ mídelẹ nukun-sọ-nukun nado dọhodo hosọ lọ ji. E yigbe. Sonja ko wleawudai na oplọn lọ to whenuena yẹn jẹ finẹ, podọ sọn whenẹnu gbọ́n wẹ mí ko to nuplọn to osẹ lẹpo mẹ.” Mẹmẹyọnnu mítọn dotana dọmọ: “Yẹn ko to dẹ̀ho sọn owhe susu die nado tindo plọnmẹ Biblu de, ṣigba yẹn ma kúdlọ gbede nado tindo e gbọn kunnudide alokan ji tọn dali gba.”
15, 16. Numimọ tẹlẹ wẹ hiẹ sọgan dọ nado do ale he tin to dotẹnmẹ voovo lẹ yiyizan nado bẹ plọnmẹ Biblu lẹ jẹeji mẹ hia?
15 Mẹsusu to kọdetọn dagbe tindo na yé to ayinamẹ lẹ yido yizan mẹ nado dekunnu na gbẹtọ lẹ to fidepope he yé yin mimọ te wutu. Yọnnu Klistiani de to États-Unis glín gbẹduhun etọn do apá na ahihun de to húnglintẹn de. To whenuena yọnnu he tin to ahihun lọ mẹ mọ ẹn, mẹmẹyọnnu lọ jẹ zẹẹmẹ basi na ẹn ji gando azọ́n Biblu pinplọnmẹ tọn mítọn go. Yọnnu lọ dotoai, jẹte sọn ahihun lọ mẹ, bo dọnsẹpọ gbẹduhun mẹmẹyọnnu lọ tọn, bosọ dọmọ: “Homẹ ṣie hùn tlala dọ hiẹ nọte nado dọho hẹ mi. Yẹn masọ mọ owe sinai do Biblu ji mìtọn lẹ depope sọn whenu dindẹn die ba. Humọ, yẹn jlo na jẹ Biblu plọn ji whladopo dogọ. Be hiẹ na plọnnu hẹ mi ya?” Gbọnmọ dali mẹmẹyọnnu mítọn hùn dotẹnmẹ dagbe dote nado lá wẹndagbe lọ.
16 Mẹmẹyọnnu de to États-Unis na numimọ he bọdego ehe to whenuena e dla owhé mẹgopinpọn tọn de pọ́n: E dọnsẹpọ ogán owhé lọ tọn dopo bo dọna ẹn dọ emi na jlo nado gọalọ bo hẹn pekọwa na nuhudo gbigbọmẹ tọn mẹhe nọ nọ̀ owhé lọ gbè lẹ tọn. Mẹmẹyọnnu lọ yidogọ dọ homẹ emitọn na hùn nado nọ basi plọnmẹ Biblu sẹmẹsẹmẹ tọn vọnu de hẹ mẹhe jlo lẹpo. Ogán lọ nagbè e nado dla abò ohọ̀ voovo he to owhé lọ gbè tọn lẹ pọ́n. To madẹnmẹ, e nọ deanana plọnmẹ Biblu whlaatọ̀n to osẹ dopo mẹ hẹ gbẹtọ 26, bọ dopo to yé mẹ nọ yì opli mítọn lẹ to gbesisọmẹ.
17. Aliho tẹwẹ nọ saba wazọ́n nado bẹ plọnmẹ Biblu whégbè tọn lẹ jẹeji?
17 Na lilatọ Ahọluduta tọn delẹ, plọnmẹ Biblu zizedonukọnnamẹ tlọlọ nọ tindo kọdetọn dagbe. To afọnnu dopo, agun de he tindo wẹnlatọ 105 dovivẹnu vonọtaun nado ze plọnmẹ Biblu donukọnna whétọ he yé dukosọ hẹ lẹpo. Wẹnlatọ 86 wẹ tọ́n na sinsẹ̀nzọn kunnudegbe tọn, podọ to ganhiho awe yiyizan to yẹwhehodidọ mẹ godo, yé mọdọ e whè gbau plọnmẹ Biblu yọyọ 15 wẹ ko yin bibẹjẹeji.
Mì Nọ to Mẹhe Jẹ lẹ Dín Zọnmii
18, 19. Anademẹ titengbe Jesu tọn tẹwẹ mí dona hẹn do ayiha mẹ, podọ nado sọgan wà ehe etẹwẹ mí dona magbe nado wà?
18 Taidi lilatọ Ahọluduta tọn de, hiẹ sọgan tẹ́n ayinamẹ he yin nina to hosọ ehe mẹ lẹ pọ́n. Na nugbo tọn, e na yin nuyọnẹnnu nado lẹnnupọndo aṣa lẹdo tọn lẹ ji to whenuena hiẹ jlo na yí aliho kunnudide tọn de zan. Hú popolẹpo, mì gbọ mí ni hẹn anademẹ Jesu tọn do ayiha mẹ nado nọ dín mẹhe jẹ lẹ mọ bo nọ gọalọna yé nado lẹzun devi lẹ.—Matiu 10:11; 28:19.
19 Nado sọgan wà ehe, mì gbọ mí ni nọ ‘yí ohó nugbo lọ tọn zan dile e jẹ do.’ Mí sọgan wàmọ gbọn yíyí linlẹndiọnamẹ he sinai do Owe-wiwe lẹ ji mlẹnmlẹn zan dali. Ehe na gọalọna mí nado jẹ ahun jlodotọ lẹ tọn mẹ bosọ whàn yé nado yinuwa. Eyin mí ganjẹ Jehovah go to odẹ̀ mẹ, mí sọgan tindo mahẹ to alọgigọna mẹdelẹ nado lẹzun devi Jesu Klisti tọn mẹ. Podọ lehe azọ́n ehe tindo ale do sọ! Enẹwutu, mì gbọ mí ni ‘dovivẹnu nado do míde hia di mẹhe pegan hlan Jiwheyẹwhe,’ bo nọ gbògbéna Jehovah to whepoponu taidi lilatọ zohunhunnọ Ahọluduta tọn lẹ, he nọ dọyẹwheho po lẹndai lọ po nado hẹn gbẹtọ lẹ zun devi.—2 Timoti 2:15.
[Nudọnamẹ Odò Tọn]
a Yin zinzinjẹgbonu gbọn Kunnudetọ Jehovah tọn lẹ dali.
b Yin zinzinjẹgbonu gbọn Kunnudetọ Jehovah tọn lẹ dali.
Be Hiẹ Flin Ya?
• Naegbọn yè dona dọdò ali Jiwheyẹwhe tọn hlan Apọlo hezeheze?
• Aliho tẹlẹ mẹ wẹ Pliskila po Akuila po plọnnu sọn apọsteli Paulu dè te?
• To kandai Owalọ lẹ weta 18 tọn mẹ, etẹwẹ hiẹ plọn gando azọ́n mẹhinhẹnzun devi tọn go?
• Nawẹ hiẹ sọgan hùn dotẹnmẹ lẹ dote nado hẹnmẹ zun devi gbọn?
[Yẹdide to weda 18]
Pliskila po Akuila po ‘dọdò ali Jiwheyẹwhe tọn hlan Apọlo hezeheze’
[Yẹdide to weda 20]
Apọlo lẹzun mẹhe pegan ganji to gbẹtọ lẹ hinhẹnzun devi mẹ
[Yẹdide to weda 21]
Paulu dọyẹwheho to fidepope he e yì
[Yẹdide to weda 23]
Hùn dotẹnmẹ lẹ dote nado dọyẹwheho