Họ́ Dewe Sọta Nuyiwa Oklọ Tọn
‘Mì nọ payi do mìde na mẹde ma na do yí oklọ tata do bẹ mì yì.’—KỌLỌSINU LẸ 2:8.
1-3. (a) Apajlẹ tẹlẹ wẹ dohia dọ nuyiwa oklọ tọn ko dibla gbayipe biọ adà nuwiwa egbesọ tọn lẹpo mẹ? (b) Naegbọn nuyiwa oklọ tọn he to aihọn mẹ ma dona paṣa mí?
“OMẸ nẹmu to mì mẹ wẹ mẹhe mì to whẹ̀yidọ na lẹ ma ko dolalo na pọ́n?” Mẹplọntọ daho whẹ̀yidọtọ lẹ tọn de basi dodinnanu de to owhe delẹ die bo kàn kanbiọ enẹ sè. Gblọndo tẹwẹ e mọyi? E dọmọ: “Omẹ dopo poun to whẹ̀yidọtọ fọtọ́n susu lọ lẹ mẹ wẹ depope to mẹhe e to whẹ̀yidọ na lẹ mẹ ma ko dolalo na pọ́n.” Etẹwutu? “Whẹ̀yidọtọ lọ ṣẹṣẹ bẹ azọ́n enẹ jẹeji wẹ podọ azọ́nwhé daho de wẹ e to whẹ̀yidọ na.” Numimọ ehe do nugbo he blawu de hia—dọ lalodido po oklọ po ko gbayipe to aihọn egbehe tọn mẹ taun.
2 Nuyiwa oklọ tọn tin to wunmẹ susu ji bo ko sọ gbayipe biọ adà gbẹzan egbezangbe tọn lẹpo mẹ. Linlinnamẹnu lẹ nọ ze linlin mọnkọtọn lẹ susu tọ́n—yèdọ lalo tonudọtọ lẹ tọn, akuẹ-lẹntọ po whẹ̀yidọtọ lẹ po nọ dolalo gando ale azọ́nwhé lẹ tọn go, ajọjlatọ lẹ nọ dolalo klọ ahisinọ yetọn lẹ, gbẹtọ lẹ nọ hò azọ́nwhé he nọ gọalọ to asidan whenu lẹ dù, ehelẹ yin apajlẹ vude poun. Humọ oklọ sinsẹ̀n tọn lẹ tin ga. Sinsẹ̀ngán lẹ nọ klọ gbẹtọ lẹ gbọn nuplọnmẹ lalo tọn lẹ, taidi jọmaku alindọn tọn, olọnzomẹ, po Atọ̀n-to-dopomẹ po pinplọn yé dali.—2 Timoti 4:3, 4.
3 Be nuyiwa oklọ tọn ehe lẹpo dona paṣa mí wẹ ya? Paali. Biblu na avase gando ‘azán godo tọn lẹ’ go dọmọ: “Mẹylankan lẹ, po mẹklọtọ lẹ po na to yinylan yì nukọn, yé na to mẹklọ, yè nasọ to yé klọ.” (2 Timoti 3:1, 13) Taidi Klistiani lẹ, mí dona tin to aṣeji sọta linlẹn mẹkiklọ tọn he sọgan lẹ́ mí sọn nugbo lọ kọ̀n. Kanbiọ awe he fọndote lẹ wẹ: Naegbọn nuyiwa oklọ tọn do gbayipe to egbehe sọmọ, podọ nawẹ mí sọgan họ́ míde ma nado yin kiklọ gbọn?
Naegbọn Nuyiwa Oklọ Tọn Do Sù Sọmọ to Egbehe?
4. Nawẹ Biblu basi zẹẹmẹ nuhewutu nuyiwa oklọ tọn do gbayipe to aihọn mẹ sọmọ tọn gbọn?
4 Biblu basi zẹẹmẹ hezeheze nuhewutu nuyiwa oklọ tọn lẹ do gbayipe sọmọ to aihọn ehe mẹ. Apọsteli Johanu wlan dọ “aihọn lẹpo sọ mlọnai to omẹ ylankan lọ mẹ.” (1 Johanu 5:19) Satani Lẹgba wẹ yin “omẹ ylankan lọ.” Jesu dọ gando ewọ go dọmọ: “E ma nọ nọte to nugbo mẹ gbede, na nugbo ma tin to ewọ mẹ wutu. Whenuena e dọ lalo de, e dọho etọn titi tọn: na lalonọ de wẹ ewọ, podọ otọ́ etọn.” To whelọnu lo, be nupaṣamẹ de wẹ e yin dọ aihọn ehe nọ do gbigbọ, linlẹn, po jẹhẹnu oklọ ogán etọn tọn po hia ya?—Johanu 8:44; 14:30; Efesunu lẹ 2:1-3.
5. Nawẹ Satani ko to vivẹnu etọn lẹpo dó nado klọmẹ to ojlẹ opodo tọn ehe mẹ gbọn, podọ mẹnu lẹ na taun tọn wẹ yin yanwle etọn?
5 Satani to vivẹnu etọn lẹpo dó to ojlẹ opodo tọn ehe mẹ. E ko yin yinyan dlan aigba ji. E yọnẹn dọ ojlẹ gli de wẹ pò na emi, podọ e tin to “homẹgble daho” de mẹ. Na e ko magbe nado và susu gbẹtọvi lẹ tọn sudo dile e sọgan yọnbasi do wutu, e “nọ to aihọn lẹpo klọ.” (Osọhia 12:9, 12) Mẹkiklọ Satani tọn mayin vlavonu de gba. Kakatimọ, onú ma nọ ṣikọna ẹn to vivẹnudido etọn lẹ mẹ nado klọ gbẹtọvi lẹ.a E nọ yí aliho oklọ tọn he e yọnẹn lẹpo zan—gọna ayiha gigẹdẹ po ayiha wintinwintin lẹ po—nado tọ́nnukun na ayiha mayisenọ lẹ tọn bo hẹn yé gbẹkọ Jiwheyẹwhe go. (2 Kọlintinu lẹ 4:4) Na taun tọn, yanwle ogán mẹklọtọ ehe tọn wẹ nado tlẹ́n mẹhe to Jiwheyẹwhe sẹ̀n “to gbigbọ mẹ podọ to nugbo mẹ” lẹ dù. (Johanu 4:24; 1 Pita 5:8) Na nugbo tọn, ma wọnji gbede blo dọ Satani ko sọalọakọ́n dọ: ‘Yẹn sọgan lẹ́ mẹdepope sọn Jiwheyẹwhe dè.’ (Job 1:9-12) Mì gbọ mí ni gbadopọnna “bublu” kavi ayiha gigẹdẹ he Satani nọ yizan delẹ podọ lehe mí sọgan họ́ míde sọta yé do.—Efesunu lẹ 6:11.
Họ́ Dewe Sọta Oklọ Atẹṣitọ lẹ Tọn
6, 7. (a) Alọsọakọ́n tẹlẹ wẹ atẹṣitọ lẹ nọ basi? (b) Nawẹ Owe-wiwe do nuhe yin yanwle atẹṣitọ lẹ tọn hia hezeheze gbọn?
6 Satani ko yí atẹṣiṣi zan na ojlẹ dindẹn to vivẹnu etọn lẹ mẹ nado doyẹklọ devizọnwatọ Jiwheyẹwhe tọn lẹ. (Matiu 13:36-39) Atẹṣitọ lẹ sọgan sọalọakọ́n dọ yé to Jehovah sẹ̀n bo yise to Biblu mẹ, ṣigba yé gbẹ́ titobasinanu yinukundomọ etọn dai. Delẹ to yé mẹ tlẹ nọ lẹhlan sinsẹ̀n-nuplọnmẹ “Babilọni Daho” tọn, heyin ahọluigba aihọn sinsẹ̀n lalo tọn lẹ, he nọ kọ̀n masin do Jiwheyẹwhe go lẹ kọ̀n. (Osọhia 17:5; 2 Pita 2:19-22) To gbọdo glọ, Biblu kantọ lẹ yí hogbe sinsinyẹn lẹ zan nado hùngona yanwle atẹṣitọ lẹ tọn po aliho he yé nọ yizan lẹ po.
7 Etẹwẹ yin yanwle atẹṣitọ lẹ tọn taun? Suhugan yetọn lẹ ma nọ tindo pekọ to yise he yé ko nọ pọ́n dai di nugbo lọ jijodo poun mẹ gba. Yé nọ saba jlo nado plan mẹdevo lẹ yì po yede po. Kakati nado yì dín devi yetọn lẹ to gbonu, susu atẹṣitọ lẹ tọn nọ jlo nado “dọ̀n nuplọntọ lẹ [enẹ wẹ, devi Klisti tọn lẹ] do godo yetọn.” (Owalọ lẹ 20:29, 30) Apọsteli Paulu na avase niyaniya tọn ehe gando mẹplọntọ lalonọ lẹ go dọmọ: “Mì nọ payi do mìde na mẹde ma na do yí yinyọnẹn po oklọ tata po do bẹ mì.” (Kọlọsinu lẹ 2:8) Be enẹ ma do nuhe susu atẹṣitọ lẹ tọn nọ jlo nado wà hia ya? Taidi mẹfinzetọ he nọ fìn mẹhe ma to aṣeji de yì sọn whẹndo etọn dè, mọwẹ atẹṣitọ lẹ nọ tọ̀pọwu na hagbẹ agun lọ tọn he dejido yé go lẹ do, bo nọ to díndín nado fìn yé yì sọn lẹngbọpa lọ mẹ.
8. Aliho tẹlẹ wẹ atẹṣitọ lẹ nọ yizan nado jẹ yanwle yetọn kọ̀n?
8 Aliho tẹlẹ wẹ atẹṣitọ lẹ nọ yizan nado jẹ yanwle yetọn kọ̀n? Yé nọ saba yí yẹdoklọmẹ, nugbo-daa, po lalo tlọlọ lẹ po zan. Jesu yọnẹn dọ hodotọ etọn lẹ na wá yin yẹdoklọ gbọn mẹhe nọ ‘dó lalo ylankan hunkọhunkọ lẹ do yé go’ lẹ dali. (Matiu 5:11) Agọjẹdomẹtọ ylankan mọnkọtọn lẹ na dọ nuhe ma yin nugbo lẹ po yanwle lọ po nado klọ mẹdevo lẹ. Apọsteli Pita na avase gando atẹṣitọ he na yí “ohó oklọ tọn” lẹ zan, bo hẹn ‘nuplọnmẹ oklọ tọn lẹ’ gbayipe, bo nasọ ‘slokọna Owe-wiwe’ nado jẹ yanwle yetọn lẹ kọ̀n go. (2 Pita 2:3, 13; 3:16) E blawu dọ, atẹṣitọ lẹ nọ “sisẹ́ yise mẹdelẹ tọn liai” po kọdetọn dagbe po.—2 Timoti 2:18.
9, 10. (a) Nawẹ mí sọgan họ́ míde ma nado yin kiklọ gbọn atẹṣitọ lẹ dali gbọn? (b) Eyin nukunnumọjẹnumẹ mítọn gando lẹndai Jiwheyẹwhe tọn go dona yin vivọjlado, naegbọn ehe ma nọ hẹn mí tindo ayihaawe?
9 Nawẹ mí sọgan họ́ míde ma nado yin kiklọ gbọn atẹṣitọ lẹ dali gbọn? Gbọn hihodo ayinamẹ he tin to Ohó Jiwheyẹwhe tọn mẹ lọ dali, ehe dọmọ: “Mì nọ payi yé he nọ hẹn kinklan po ahlìda po wá lẹ, ehe jẹagọ do oplọn he mì plọn go; bo nọ nọlá na yé.” (Lomunu lẹ 16:17) Mí nọ “nọlá na yé” gbọn gbigbẹkọ linlẹn yetọn lẹ go dali—vlavo yé dọnsẹpọ mí nukun-sọ-nukun wẹo, kavi to zinjẹgbonu yetọn lẹ mẹ, kavi to Internet ji. Naegbọn mí dona ze teninọ mọnkọtọn? Tintan whẹ́, Ohó Jiwheyẹwhe tọn degbena mí nado wàmọ, podọ mí deji dọ Jehovah nọ lẹn dagbe mítọn to whepoponu.—Isaia 48:17, 18.
10 Awetọ, mí yiwanna titobasinanu lọ he ko plọn nugbo họakuẹ lẹ mí ehe klan mí dovo mlẹnmlẹn na Babilọni Daho lọ. Mọdopolọ, mí yọnẹn dọ mí ma tindo oyọnẹn pipé gando lẹndai Jiwheyẹwhe tọn go gba; nukunnumọjẹnumẹ mítọn ko yin vivọjlado whlasusu to owhe lẹ gblamẹ. Klistiani nugbo lẹ nọ tindo pekọ nado nọtepọn Jehovah na vọjlado mọnkọtọn lẹpo. (Howhinwhẹn lẹ 4:18) Enẹwutu, mí ma na gbẹkọ titobasinanu he Jiwheyẹwhe to yiyizan po homẹhunhun po go gba, na mí mọ kunnudenu he họnwun dona etọn tọn do e ji.—Owalọ lẹ 6:7; 1 Kọlintinu lẹ 3:6.
Họ́ Dewe Sọta Mẹdetiti Kiklọ
11. Naegbọn gbẹtọvi mapenọ lẹ tindo ayilinlẹn de nado nọ klọ yede?
11 Gbẹtọvi mapenọ lẹ tindo ayilinlẹn de he Satani nọ yawu yizan—enẹ wẹ mẹdetiti kiklọ. “Ayiha yin oklenọ hugan onú lẹpo, podọ e sọ yin awutunọ tupinpẹnnọ,” wẹ Jẹlemia 17:9 dọ. Podọ Jakobu wlan dọmọ: “Omẹ dopodopo wẹ yè whlepọn, whenuena yè gbọn wantuntun etọn titi dali dọ̀n ẹn yì, bọ yè sọ doyẹklọ ẹ.” (Jakobu 1:14) Eyin ahun mítọn yin yẹdoklọ, to godo mẹ, e sọgan dọ̀n mí biọ ylanwiwa mẹ bo na hẹn ẹn sọawuhia di nuhe dọnmẹdogo bo ma tindo owù. Pọndohlan oklọ tọn de wẹ enẹ yin, na vasudo mẹ wẹ ylanwiwa sọn ojlo mẹ nọ planmẹ yì.—Lomunu lẹ 8:6.
12. Aliho tẹlẹ mẹ wẹ mẹdetiti kiklọ sọgan domọwle mí te?
12 Mẹdetiti kiklọ sọgan yawu domọwle mí. Ayiha oklenọ gbẹtọvi tọn sọgan suwhẹna ede gando jijọ he ma sọgbe de go kavi dín whẹwhinwhẹ́n lẹ na ylando sinsinyẹn de. (1 Samuẹli 15:13-15, 20, 21) Ayiha tupinpẹnnọ mítọn sọgan sọ dín aliho lẹ nado suwhẹna walọ he sọgan fọ́n kanbiọ dote de. Yí whẹho ayidedai tọn di apajlẹ. Ayidedai delẹ sọgbe bo nọ hẹn awuvivi wá. Ṣigba, suhugan ayidedai he aihọn ehe nọ zedonukọnnamẹ—to video lẹ, tito televiziọn tọn lẹ, po Internet po ji lẹ—wẹ bẹ wantuntun po fẹnnuwiwa po hẹn. E bọawu nado duto mídelẹ ji dọ mí sọgan nọ pọ́n aihundida he nọ bẹ fẹnnuwiwa hẹn lẹ matin awugble depope. Mẹdelẹ tlẹ nọ lẹnnupọn dọ, “E ma saa dotukla ayihadawhẹnamẹnu ṣie, enẹwutu etẹwẹ ylan to e mẹ?” Ṣigba omẹ mọnkọtọn lẹ to ‘yedelẹ klọ po whẹwhinwhẹ́n lalo tọn po’ wẹ.—Jakobu 1:22.
13, 14. (a) Apajlẹ Owe-wiwe tọn tẹwẹ dohia dọ ayihadawhẹnamẹnu mítọn ma sọgan yin ginganjẹ e go to whepoponu? (b) Nawẹ mí sọgan họ́ míde sọta mẹdetiti kiklọ gbọn?
13 Nawẹ mí sọgan tin to aṣeji sọta mẹdetiti kiklọ gbọn? Tintan whẹ́, mí dona flin dọ ayihadawhẹnamẹnu gbẹtọ tọn ma sọgan yin jide-dego to whepoponu. Lẹnnupọn do otàn apọsteli Paulu tọn ji. Whẹpo e do lẹzun Klistiani de, e dohomẹkẹn hodotọ Klisti tọn lẹ. (Owalọ lẹ 9:1, 2) Ayihadawhẹnamẹnu etọn sọgan ko nọma dotukla ẹ to ojlẹ enẹ mẹ. Ṣigba, e họnwun dọ e klọ ẹ wẹ. “Yẹn yí mayọnẹn do basi i to mayise mẹ,” wẹ Paulu dọ. (1 Timoti 1:13) Enẹwutu nugbo lọ poun dọ ayidedai delẹ ma nọ dotukla ayihadawhẹnamẹnu mítọn ma yin whẹwhinwhẹ́n de dọ e sọgbe gba. Ayihadawhẹnamẹnu he ko yin pinplọn ganji gbọn Ohó Jiwheyẹwhe tọn dali kẹdẹ wẹ sọgan yin anademẹnu he sọgbe de.
14 Eyin mí na dapana mẹdetiti kiklọ, mí dona hẹn ayinamẹ delẹ he na gọalọna mí do ayiha mẹ. Gbeje dewe pọ́n gbọn odẹ̀ dali. (Psalm 26:2; 2 Kọlintinu lẹ 13:5) Mẹdetiti gbigbejepọn nujọnu tọn sọgan dohia dọ hiẹ dona basi diọdo delẹ to pọndohlan towe kavi gbẹzan towe mẹ. Nọ dotoai na mẹdevo lẹ. (Jakobu 1:19) Na e bọawu na pọndohlan mítọn nado yinuwado mẹdetiti gbigbejepọn mítọn ji wutu, e na yin nuyọnẹnnu nado dotoai na ayidonugo ahundoponọ Klistiani hatọ he whèwhín lẹ tọn. Eyin hiẹ nọ basi nudide lẹ kavi nọ yinuwa to aliho delẹ mẹ he nọ fọ́n ayihaawe dote to nukun yisenọ hatọ numimọnọ, he to jlẹkaji lẹ tọn mẹ, hiẹ sọgan kanse dewe dọ, ‘Be e mayin ayihadawhẹnamẹnu ṣie wẹ ma yin pinplọn do aliho he sọgbe ji ya, kavi ahun ṣie wẹ to kiklọ mi ya?’ Nọ plọnnu sọn Biblu po owe sinai do Biblu ji lẹ po mẹ to gbesisọmẹ. (Psalm 1:2) Mọwiwa na gọalọna we nado hẹn linlẹn, jijọ, po numọtolanmẹ towe lẹ po sọgbe hẹ nunọwhinnusẹ́n Jiwheyẹwhe tọn lẹ.
Họ́ Dewe Sọta Lalo Satani Tọn Lẹ
15, 16. (a) To vivẹnudido Satani tọn mẹ nado klọ mí, lalo tẹlẹ wẹ e nọ yizan? (b) Nawẹ mí sọgan dapana yinyin kiklọ gbọn lalo mọnkọtọn lẹ dali gbọn?
15 Satani nọ yí lalo voovo lẹ zan to vivẹnudido etọn nado klọ mí mẹ. E nọ tẹnpọn nado dohia mí dọ nutindo agbasa tọn lẹ wẹ nọ hẹn ayajẹ po pekọ po wá, ṣigba lalo pete wẹ. (Yẹwhehodọtọ 5:10-12) E nọ hẹn mí nado yise dọ aihọn ylankan ehe na zindonukọn kakadoi, dile etlẹ yindọ kunnudenu he họnwun dohia dọ mí to gbẹ̀nọ to ‘azán godo tọn lẹ’ mẹ. (2 Timoti 3:1-5) Satani nọ ze linlẹn lọ daga dọ owù depope ma tin to gbẹzan fẹnnuwiwa tọn zinzan mẹ gba, dile etlẹ yindọ mẹhe to gbẹzan mọnkọtọn zan lẹ nọ jiya kọdetọn ylankan lẹ tọn. (Galatianu lẹ 6:7) Nawẹ mí sọgan dapana yinyin kiklọ gbọn lalo mọnkọtọn lẹ dali gbọn?
16 Alemimọyi sọn apajlẹ Biblu tọn lẹ mẹ. Biblu bẹ apajlẹ avase tọn lẹ hẹn gando mẹhe ko yin kiklọ gbọn lalo Satani tọn dali lẹ go. Yé yiwanna onú agbasa tọn lẹ, bo wọnji ojlẹ he mẹ yé tin te go, kavi bo tlọ́ yedelẹ biọ walọ mawé mẹ—bọ popolẹpo hẹn kọdetọn ylankan wá. (Matiu 19:16-22; 24:36-42; Luku 16:14; 1 Kọlintinu lẹ 10:8-11) Plọnnu sọn apajlẹ egbezangbe tọn lẹ mẹ. E blawu dọ, Klistiani delẹ nọ wọnji ojlẹ niyaniya tọn he mẹ mí te go to whedelẹnu bo nọ wá mọdọ nude to gúgú yé na yé to Jiwheyẹwhe sẹ̀n wutu. Yé sọgan jo nugbo lọ do bo doafọna gbẹzan he nọ yin pinpọn di gbẹdudu tọn. Ṣigba, ‘aigba he dídí ji’ wẹ omẹ mọnkọtọn lẹ tin te, na e dẹn wẹo kavi e yá wẹo kọdetọn walọ ylankan yetọn lẹ tọn na wá yé ji. (Psalm 73:18, 19) Nuyọnẹnnu wẹ e yin na mí nado plọnnu sọn nuṣiwa mẹdevo lẹ tọn mẹ.—Howhinwhẹn lẹ 22:3.
17. Naegbọn Satani nọ ze lalo lọ daga dọ Jehovah ma yiwanna mí podọ mí masọ họakuẹ to nukun etọn mẹ?
17 Lalo devo he Satani ko sọ yizan po kọdetọn dagbe po wẹ yindọ Jehovah ma yiwanna mí podọ mí masọ họakuẹ to nukun etọn mẹ. Satani ko dindona gbẹtọvi mapenọ lẹ na owhe fọtọ́n susu. E yọnẹn ganji dọ ehe sọgan hẹn mí gbọjọ to gbigbọ-liho. (Howhinwhẹn lẹ 24:10) Enẹwutu, e nọ ze lalo lọ daga dọ mí ma họakuẹ to nukun Jiwheyẹwhe tọn lẹ mẹ. Eyin mí yin ‘hihò liai’ bọ mí kudeji dọ Jehovah ma nọ hò mítọn pọ́n, mí sọgan yin whiwhlepọn nado gbọjọ. (2 Kọlintinu lẹ 4:9) Nuhe Mẹklọtọ daho lọ jlo pẹpẹ niyẹn! To whelọnu lo, nawẹ mí sọgan họ́ míde ma nado yin kiklọ gbọn lalo Satani tọn ehe dali gbọn?
18. Nawẹ Biblu na mí jide gando owanyi Jehovah tọn go gbọn?
18 Nọ lẹnayihamẹpọn na dewe do nuhe Biblu dọ dogbọn owanyi Jiwheyẹwhe tọn na mí dali ji. Ohó Jiwheyẹwhe tọn yí hogbe awuvivi tọn delẹ zan nado hẹn mí deji dọ Jehovah nọ doayi dopodopo mítọn lẹ go bosọ yiwanna mí. E nọ kọ̀n dasin towe “do ogò” etọn mẹ, ehe zẹẹmẹdo dọ e nọ mọ bosọ nọ flin dasin he hiẹ kùn to kanvinván towe mẹ nado gbọṣi nugbonọ-yinyin mẹ. (Psalm 58:8) E nọ yọ́n whenue hiẹ yin “ayiha gbigbànọ” podọ e nọ dọnsẹpọ we to ojlẹ enẹlẹ mẹ. (Psalm 34:18) E yọ́n zẹẹmẹ gigọ́ lẹ gando gowe, gọna sọha “oda ota” towe tọn lẹpo. (Matiu 10:29-31) Hú popolẹpo, Jiwheyẹwhe “yí Ovi detọ́n etọn dopo akàn” jo do ota towe mẹ. (Johanu 3:16; Galatianu lẹ 2:20) To ojlẹ delẹ mẹ, e sọgan nọ vẹawuna we nado yise dọ wefọ mọnkọtọn lẹ gando hiẹ lọsu titi go. Ṣigba, mí dona yí nuhe Jehovah dọ lẹ sè. E jlo dọ mí ni yise dọ emi yiwanna mí e mayin taidi pipli de poun gba ṣigba di omẹ dopodopo.
19, 20. (a) Naegbọn e do yin nujọnu nado yọnẹn bosọ gbẹ́ lalo Satani tọn lọ dọ Jehovah ma yiwanna we dai? (b) Nawẹ nugopọntọ tomẹyitọ de ko gọalọna mẹhe gbọjọ lẹ gbọn?
19 Yọ́n lalo lọ bosọ gbẹ́ ẹ dai. Eyin hiẹ yọnẹn dọ lalo dó wẹ mẹde te, hiẹ sọgan tin to aṣeji ma nado yin kiklọ. Mọdopolọ, yinyọnẹn poun dọ Satani jlo dọ hiẹ ni yí lalo lọ dọ Jehovah ma yiwanna mí sè sọgan gọalọna we tlala. To gbeyiyi mẹ na hosọ Atọ̀họ̀-Nuhihọ̀ Lọ Tọn de he na avase gando ayiha gigẹdẹ Satani tọn lẹ go, yọnnu Klistiani de dọmọ: “Yẹn ma yọnẹn gbede dọ Satani nọ tẹnpọn nado yí numọtolanmẹ ṣie zan nado hẹn mi gbọjọ gba. Ehe yinyọnẹn dozolanmẹ na mi nado duto numọtolanmẹ ehelẹ ji.”
20 Lẹnnupọndo numimọ nugopọntọ tomẹyitọ de tọn sọn otò Hùwaji Amelika tọn de mẹ ji. Eyin e to dlapọn lẹngbọhọtọ tọn basi na yisenọ hatọ he gbọjọ lẹ, e nọ saba kanse yé dọ, ‘Be hiẹ yise to Atọ̀n-to-dopomẹ mẹ ya?’ Mẹhe gbọjọ lọ nọ saba gblọn dọ, ‘Paali,’ na e yọnẹn dọ ehe yin dopo to lalo Satani tọn lẹ mẹ. Enẹgodo nugopọntọ tomẹyitọ lọ sọ nọ kanse dọ, ‘Be hiẹ yise to olọnzomẹ mẹ ya?’ Whladopo dogọ gblọndo lọ nọ yin, ‘Lala!’ To whenẹnu mẹho tomẹyitọ lọ nọ dọna yé dọ lalo Satani tọn devo de tin he ma nọ saba yin yinyọnẹn sọmọ. E nọ dọ̀n ayidonugo yetọn wá weda 249, hukan 21, owe Dọnsẹpọ Jehovahb tọn ji, ehe hùngona lalo lọ dọ Jehovah ma yiwanna dopodopo mítọn lẹ. Nugopọntọ tomẹyitọ lọ na linlin kọdetọn dagbe lẹ tọn sọn alọgigọna mẹhe gbọjọ lẹ to aliho enẹ mẹ nado yọ́n lalo Satani tọn lẹ bosọ gbẹ́ yé dai.
Basi Hihọ́na Dewe Sọta Oklọ
21, 22. Naegbọn mí ma tin to zinvlu mẹ gando ayiha oklọ Satani tọn lẹ go, podọ etẹwẹ dona yin gbemima mítọn?
21 To adà he gbọngodo to azán godo tọn ehelẹ mẹ, mí dona donukun dọ Satani na zindonukọn nado to lalo po oklọ voovo lẹ po zedonukọnnamẹ. Mí dopẹ́ dọ, Jehovah ma jo mí do zinvlu mẹ gando ayiha mẹkiklọ Satani tọn lẹ go gba. Biblu po owe sinai do Biblu ji “afanumẹ nugbonọ, nuyọnẹntọ” lọ tọn lẹ po do aliho gigẹdẹ Lẹgba tọn lẹ hia hezeheze. (Matiu 24:45) Yinyọ́n yé jẹnukọn na gọalọna mí nado yọ́n lehe mí sọgan duto yé ji do.—2 Kọlintinu lẹ 2:11.
22 To whelọnu lo, mì gbọ mí ni họ́ míde sọta linlẹn atẹṣitọ lẹ tọn. Mì gbọ mí ni magbe nado dapana omọ̀ wintinwintin oklọ mẹdetiti tọn. Podọ mì sọ gbọ mí ni yọ́n lalo Satani tọn lẹ bosọ gbẹ́ yé dai. Gbọn mọwiwa dali, mí na basi hihọ́na haṣinṣan mítọn hẹ “Jiwheyẹwhe nugbo tọn,” he gbẹwanna oklọ.—Psalm 31:5; Howhinwhẹn lẹ 3:32.
[Nudọnamẹ Odò Tọn]
a Gando hogbe lọ “klọ” he yin yiyizan to Osọhia 12:9 mẹ go, owe de dọ dọ e “zẹẹmẹdo nuyiwa he to nukọnzindo de he ko lẹzun aṣa de.”
b Yin zinzinjẹgbonu gbọn Kunnudetọ Jehovah tọn lẹ dali.
Be Hiẹ Flin Ya?
• Naegbọn oklọ do sù to aihọn egbehe tọn mẹ sọmọ?
• Nawẹ mí sọgan họ́ míde ma nado yin kiklọ gbọn atẹṣitọ lẹ dali gbọn?
• Nawẹ mí sọgan họ́ míde sọta mẹdetiti kiklọ depope gbọn?
• Nawẹ mí sọgan dapana yinyin kiklọ gbọn lalo Satani tọn lẹ dali gbọn?
[Yẹdide to weda 17]
Ma klọ dewe gando ayidedai go blo
[Yẹdide to weda 18]
Nado basi hihọ́na dewe sọta mẹdetiti kiklọ, gbeje dewe pọ́n gbọn odẹ̀ dali, nọ dotoai na mẹdevo lẹ, bo nọ plọnnu sọn Ohó Jiwheyẹwhe tọn mẹ to gbesisọmẹ