Mì Na Otẹn Lẹgba Blo
“Mì na otẹn Lẹgba blo.”—EFESUNU LẸ 4:27.
1. Naegbọn mẹsusu tindo ayihaawe gando tintin Lẹgba tọn go?
NA OJLẸ dindẹn, mẹsusu nọ pọ́n Lẹgba hlan taidi nudida azònọ de he tindo ofẹ̀n zizẹ lẹ bo nọ dó avọ̀ vẹẹ bosọ nọ yí owhán-onù-susunọ de do bẹ mẹylankan lẹ dlan zòmẹ. Biblu ma nọgodona linlẹn enẹ gba. Ṣigba, e họnwun dọ nukunnumọjẹnumẹ agọ̀ mọnkọtọn lẹ ko hẹn livi susu gbẹtọ lẹ tọn nado tindo ayihaawe gando tintin Lẹgba tọn go kavi nado lẹndọ linlẹn ylankan de wẹ e yin poun he tin to gbẹtọvi lẹ mẹ.
2. Nugbo tẹlẹ wẹ Owe-wiwe dehia gando Lẹgba go?
2 Biblu na ohia yinukundomọ po kunnudenu he họnwun po he dohia dọ Lẹgba tin nugbo. Jesu Klisti mọ ẹn to agblò gbigbọmẹ olọn tọn mẹ bosọ dọhona ẹn to aigba ji. (Job 1:6; Matiu 4:4-11) Dile etlẹ yindọ Owe-wiwe ma dọ yinkọ dowhenu nudida gbigbọnọ ehe tọn na mí, e ylọ ẹ dọ Lẹgba (he zẹẹmẹdo “Mẹhẹngbletọ” to Glẹkigbe dowhenu tọn mẹ) na e hẹn Jiwheyẹwhe gble wutu. E sọ yin yiylọdọ Satani (he zẹẹmẹdo “Agọjẹdomẹtọ”), na e jẹagọdo Jehovah wutu. Satani Lẹgba yin alọdlẹndo taidi “odàn hoho lọ,” vlavo na e yí odàn de zan nado klọ Evi wutu. (Osọhia 12:9; 1 Timoti 2:14) E sọ yin yinyọnẹn taidi “danunọ,” kavi mẹylankan lọ.—Matiu 6:13.a
3. Kanbiọ tẹwẹ mí na gbadopọnna?
3 Taidi devizọnwatọ Jehovah tọn lẹ, mí ma jlo nado di Satani he yin kẹntọgán Jiwheyẹwhe nugbo dopo kẹdẹ lọ tọn to aliho depope mẹ gba. Enẹwutu, mí dona setonuna ayinamẹ he apọsteli Paulu na dọmọ: “Mì na otẹn Lẹgba blo.” (Efesunu lẹ 4:27) Na taun tọn, etẹwẹ yin delẹ to jijọ Satani tọn he mí ma dona hodo lẹ mẹ?
Ma Hodo Apajlẹ Mẹhẹngbletọ Daho lọ Tọn Blo
4. Nawẹ “danunọ” lọ hẹn Jiwheyẹwhe gble gbọn?
4 “Danunọ” lọ sọgan yin yiylọdọ mẹhẹngbletọ po jlọjẹ po. Mẹhẹngble zẹẹmẹdo nado dolalo, doajàn, kavi kọ̀n masin do mẹde go. Jiwheyẹwhe degbena Adam dọmọ: “Sọn atin yinyọ́n dagbe po oylan po lọ tọn mẹ hiẹ ma na dù: gbeegbe hiẹ dù enẹ tọn mẹ hiẹ na kú dandan.” (Gẹnẹsisi 2:17) Ehe ko yin didọna Evi, ṣigba gbọn odàn de yiyizan dali, Lẹgba dọna ẹn dọmọ: “Mì ma na kú dandan gba: na Jiwheyẹwhe yọnẹn dọ azán he gbè mìwlẹ dù to e mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yọ́n onú dagbe po oylan po.” (Gẹnẹsisi 3:4, 5) Mẹhẹngble kanyinylan tọn wẹ enẹ yin sọta Jehovah Jiwheyẹwhe!
5. Naegbọn Diotlefe dona dogbè mẹhẹngble etọn tọn?
5 Islaelivi lẹ yin gbedena dọmọ: “Hiẹ ma na to aga yì bo to odò yì di ajàndotọ de to omẹ towe lẹ ṣẹnṣẹn gba.” (Levitiku 19:16) Apọsteli Johanu dọ gando mẹhẹngbletọ azán etọn gbè tọn de go dọmọ: “Yẹn wlanwe alọpa delẹ hlan agun lọ: ṣigba Diotlefe, mẹhe jlo nado yin ogán to yé mẹ, ma yí mí do gba. Enẹwutu, eyin yẹn wá, yẹn na flin nuwiwa etọn he e wà, e yí ohó homẹkẹn tọn do to mí badu.” (3 Johanu 9, 10) Diotlefe to Johanu hẹngble podọ e dona dogbè nuwiwa etọn lẹ tọn. Klistiani nugbonọ tẹwẹ na jlo nado di Diotlefe bo hodo apajlẹ Satani, mẹhẹngbletọ daho lọ tọn?
6, 7. Naegbọn mí ma na jlo nado hẹn mẹdepope gble?
6 Hodidọ mẹhẹngble tọn lẹ po whẹsadokọnamẹ agọ̀ lẹ po nọ saba yin yiyizan sọta devizọnwatọ Jehovah tọn lẹ. “Ogán yẹwhenọ lẹ tọn, po wekantọ lẹ po . . . nọte bosọ to sislẹ [Jesu] susu.” (Luku 23:10) Yẹwhenọ Daho Anania po mẹdevo lẹ po sawhẹdokọna Paulu to aliho agọ̀ mẹ. (Owalọ lẹ 24:1-8) Podọ Biblu dlẹnalọdo Satani taidi “mẹslẹtọ mẹmẹsunnu mítọn lẹ tọn . . . , he nọ to owhẹ̀ yetọn jẹ to Jiwheyẹwhe mítọn nukọn to okle po ozán po.” (Osọhia 12:10) Mẹmẹsunnu he owhẹ̀ agọ̀ yin sisadokọna enẹlẹ wẹ Klistiani yiamisisadode he tin to aigba ji to azán godo tọn ehelẹ mẹ lẹ.
7 Klistiani depope ma na jlo nado hẹn mẹdevo gble kavi sawhẹ agọ̀ dokọnamẹ. Ṣogan, enẹ sọgan jọ eyin mí dekunnu sọta mẹde to whenuena mí ma tindo nudọnamẹ gigọ́ do whẹho lọ ji. To Osẹ́n Mose tọn glọ, eyin mẹde desọn ojlo mẹ bo dekunnu lalo tọn, e sọgan dekọtọn do okú mẹ na ẹn. (Eksọdusi 20:16; Deutelonomi 19:15-19) Humọ, dopo to nuhe Jehovah nọ pọnhlan taidi osùnú lẹ mẹ wẹ “kunnudetọ lalo tọn he to ohó lalo dọ.” (Howhinwhẹn lẹ 6:16-19) Enẹwutu, mí ma jlo nado hodo apajlẹ mẹhẹngbletọ daho lọ podọ whẹsadokọnamẹtọ lalonọ lọ tọn gba.
Họ̀nna Aliho Hlọnhutọ Dowhenu Tọn lọ Tọn Lẹ
8. Aliho tẹ mẹ wẹ Lẹgba yin ‘hlọnhutọ sọn whẹwhẹwhenu’ te?
8 Hlọnhutọ de wẹ Lẹgba yin. “Hlọnhutọ de wẹ ewọ sọn whẹwhẹwhenu,” wẹ Jesu dọ. (Johanu 8:44) Satani ko yin hlọnhutọ bẹsọn gbeegbe e lilẹ́ Adam po Evi po sọn Jiwheyẹwhe dè. E hẹn okú plá asu po asi po tintan lọ po kúnkan yetọn po. (Lomunu lẹ 5:12) E jẹna ayidego dọ omẹ nujọnu tọn de janwẹ sọgan wà onú mọnkọtọn, e ma yin linlẹn ylankan he tin to gbẹtọ mẹ de poun gba.
9. Dile e yin didohia to 1 Johanu 3:15 mẹ do, nawẹ mí sọgan lẹzun hlọnhutọ gbọn?
9 “Hiẹ ma na hùmẹ,” wẹ dopo to Gbedide Ao he yin nina Islaeli lẹ mẹ. (Deutelonomi 5:17) Apọsteli Pita wlanwe hlan Klistiani lẹ dọmọ: “Mì dike mẹdepope to mì mẹ jiya di hlọnhutọ blo.” (1 Pita 4:15) E họnwun dọ taidi devizọnwatọ Jehovah tọn lẹ, mí ma na hùmẹ gba. Ṣogan, mí na hùwhẹ to Jiwheyẹwhe nukọn eyin mí gbẹwanna Klistiani hatọ de bo nọ jlo okú etọn. Apọsteli Johanu wlan dọmọ: “Mẹdepope he gbẹwanna mẹmẹsunnu etọn mẹhutọ de wẹ; mì sọ yọnẹn dọ ogbẹ̀ madopodo ma na nọ̀ hẹ mẹhutọ gba.” (1 Johanu 3:15) Islaelivi lẹ yin gbedena dọmọ: “Hiẹ ma na gbẹwanna nọvisunnu towe to ayiha towe mẹ gba.” (Levitiku 19:17) Mì gbọ mí ni nọ yawu didẹ nuhahun depope he sọgan fọndote to míwlẹ po Klistiani hatọ de po ṣẹnṣẹn, na hlọnhutọ lọ Satani nikaa hẹn pọninọ Klistiani tọn mítọn gble.—Luku 17:3, 4.
Nọte Gligli Sọta Lalonọ Daho Lọ
10, 11. Etẹwẹ mí dona wà nado sọgan nọte gligli sọta lalonọ daho lọ, Satani?
10 Lalonọ wẹ Lẹgba. “Whenuena e dọ lalo de, e dọho etọn titi tọn: na lalonọ de wẹ ewọ, podọ otọ́ etọn,” wẹ Jesu dọ. (Johanu 8:44) Satani dolalo na Evi; ṣigba Jesu wá aihọn mẹ nado dekunnu hlan nugbo lọ. (Johanu 18:37) Nado nọte gligli sọta Lẹgba bo do mídelẹ hia taidi hodotọ Klisti tọn lẹ, mí ma sọgan yí lalo po oklọ po zan. Mí dona “nọ dọho nugbo.” (Zekalia 8:16; Efesunu lẹ 4:25) Kunnudetọ nugbodọtọ lẹ kẹdẹ wẹ ‘Jehovah Jiwheyẹwhe nugbo tọn’ nọ dona. Mẹylankan lẹ ma tindo jlọjẹ depope nado yin afọzedaitọ etọn gba.—Psalm 31:5; 50:16; Isaia 43:10.
11 Eyin mẹdekannujẹ he mí mọyi sọn lalo Satani tọn lẹ mẹ gbọn nugbo Biblu tọn yinyọnẹn dali họakuẹ na mí, mí na tẹdo sinsẹ̀n Klistiani tọn, he yin “ali nugbo tọn lọ” go gligli. (2 Pita 2:2; Johanu 8:32) Nuplọnmẹ Klistiani tọn lẹpo to pọmẹ wẹ yin “nugbo wẹndagbe tọn” lọ. (Galatianu lẹ 2:5, 14) Na nugbo tọn, whlẹngán mítọn sinai do ‘zọnlinzinzin to nugbo lọ mẹ’ ji—yèdọ gbọn titẹdo e go po teninọ gligli sọta ‘otọ́ lalo tọn’ lọ po dali.—3 Johanu 3, 4, 8.
Nọavunte Sọta Atẹṣitọ Daho Hugan Lọ
12, 13. Nawẹ mí dona nọ yinuwa hẹ atẹṣitọ lẹ gbọn?
12 Nudida gbigbọnọ he wá lẹzun Lẹgba ko nọ̀ nugbo mẹ pọ́n. Ṣigba “e ma . . . nọte to nugbo mẹ,” wẹ Jesu dọ, “na nugbo ma tin to ewọ mẹ wutu.” (Johanu 8:44) Atẹṣitọ daho hugan ehe ko zindonukọn nado to agọjẹdo “Jiwheyẹwhe nugbo tọn” lọ. To owhe kanweko tintan whenu, Klistiani delẹ jai jẹ “omọ̀ Lẹgba tọn” mẹ, vlavo na yé na ẹn dotẹnmẹ nado klọ yé bo hẹn yé buali sọn nugbo mẹ wutu. Enẹwutu Paulu dotuhomẹna azọ́nwatọgbẹ́ etọn Timoti nado yí walọmimiọn do plọn yé na yé nido gọ̀ jẹ gángán to gbigbọ-liho bo tọ́nsọn omọ̀ Satani tọn mẹ. (2 Timoti 2:23-26) Na nugbo tọn, e pọnte hugan dọ mí ni tẹdo nugbo lọ go gligli bo ma jai jẹ omọ̀ linlẹn atẹṣiṣi tọn lẹ mẹ gbede.
13 Asu po asi po tintan lọ ṣiatẹ na yé dotoaina Lẹgba bo ma gbẹ́ lalo etọn lẹ dai wutu. To whelọnu lo, be e jẹ dọ mí ni dotoaina atẹṣitọ lẹ, hia owe yetọn lẹ, kavi pọ́n nudọnamẹ yetọn lẹ to Internet ji ya? Eyin mí yiwanna Jiwheyẹwhe po nugbo lọ po, mí ma na wàmọ gba. Mí ma dona na dotẹnmẹ atẹṣitọ lẹ nado biọ owhé mítọn gbè kavi tlẹ dọnudo yé, na nuyiwa mọnkọtọn lẹ na hẹn mí zun ‘mimátọ to azọ́n ylankan yetọn lẹ mẹ.’ (2 Johanu 9-11) Na mí ni ma joawuna oklọ Lẹgba tọn lẹ gbọn “ali nugbo” Klistiani tọn jijodo nado hodo mẹplọntọ lalo he nọ dín nado hẹn “nuplọnmẹ he nọ hẹnnugble” lẹ wá bosọ nọ tẹnpọn nado ‘pàhódọ nado sọgan hò mí dù’ lẹ dali gbede blo.—2 Pita 2:1-3, Alẹnuwema Yọyọ Fọngbè Tọn.
14, 15. Avase tẹwẹ Paulu na mẹho agun tọn he wá sọn Efesu lẹ po azọ́nwatọgbẹ́ etọn Timoti po?
14 Paulu dọna mẹho agun tọn he wá sọn Efesu lẹ dọmọ: “Mì payi mìde go, po apó he [gbigbọ wiwe] yí mì do basi nugopọntọ na lẹpo po, nado nọ yìn agun Jiwheyẹwhe tọn, he e yí ohùn [Ovi etọn titi] tọn do họ̀. Na yẹn yọ́n ehe dọ, to yìyì ṣie godo, ohla he dobu na biọ mì mẹ, ma pò apó yìnte. Podọ to mìlọsu mẹ wẹ sunnu lẹ na fọ́n sọn bo na to onú agọ̀ dọ, nado dọ̀n nuplọntọ lẹ do godo yetọn.” (Owalọ lẹ 20:28-30) To nukọn mẹ, atẹṣitọ enẹlẹ fọ́n nugbo bo ‘dọ onú agọ̀ lẹ.’
15 To gblagbla owhe 65 W.M. mẹ, apọsteli lọ na tuli Timoti nado ‘nọ yí ohó nugbo tọn zan dile e jẹ do.’ “Ṣigba gbẹ́ ohó ovọ́ po ohógblo lẹ po dai,” wẹ Paulu wlan, “na yé [na] dẹ́ do jijọ-madi-Jiwheyẹwhe tọn ji yinukọn. Ohó yetọn na dùgbà di apà vivó: yé mẹhe mẹ Himeneu po Filetu po te; mẹhe ko buali gbọn nugbo dali, bosọ to didọ dọ fọnsọnku ko juwayi dinvie, bosọ sisẹ́ yise mẹdelẹ tọn liai.” Atẹṣiṣi ko bẹjẹeji! “Ṣigba dòdó lili [kavi dodonu dolido] Jiwheyẹwhe tọn nọte,” wẹ Paulu yidogọ.—2 Timoti 2:15-19.
16. Naegbọn mí gbọṣi nugbonọ-yinyin mẹ hlan Jiwheyẹwhe po Ohó etọn po mahopọnna oklọ atẹṣitọ daho hugan lọ tọn lẹ?
16 Satani ko yí atẹṣitọ lẹ zan whlasusu to vivẹnudido mẹ nado hẹn sinsẹ̀n-bibasi nugbo gblezọn—ṣigba to ovọ́ mẹ. To owhe 1868, Charles Taze Russell bẹ dogbapọn sọwhiwhe tọn de jẹeji do sinsẹ̀n-nuplọnmẹ ṣọṣi Mẹylọhodotọklisti tọn he ko yin alọkẹyi na ojlẹ dindẹn lẹ ji bo wá mọ tadena agọ̀ Owe-wiwe tọn lẹ. Russell po nugbo-dintọ vude devo lẹ po ze pipli Biblu pinplọn tọn de dai to Pittsburgh, Pennsylvanie, to États-Unis. To nudi owhe 140 he ko juwayi sọn whenẹnu gbọ́n lẹ gblamẹ, devizọnwatọ Jehovah tọn lẹ ko whẹ́n deji to oyọnẹn gọna owanyi na Jiwheyẹwhe po Ohó etọn po mẹ. Mahopọnna oklọ atẹṣitọ daho hugan lọ tọn lẹ, aṣejininọ gbigbọmẹ tọn pipli afanumẹ nugbonọ nuyọnẹntọ lọ tọn ko gọalọna Klistiani nugbo ehelẹ nado gbọṣi nugbonọ-yinyin mẹ hlan Jehovah po Ohó etọn po.—Matiu 24:45.
A Dike Ogán Aihọn lọ Tọn Yinuwado Ji We Gbede Blo
17-19. Aihọn tẹwẹ mlọnai to huhlọn Lẹgba tọn mẹ, podọ naegbọn mí ma dona yiwanna ẹn?
17 Aliho devo he mẹ Satani nọ tẹnpọn nado domọwle mí te wẹ gbọn kiklọ mí nado yiwanna aihọn ehe dali—yèdọ ogbẹ́ gbẹtọvi mawadodonọ lẹ tọn he ko jẹla sọn Jiwheyẹwhe dè. Jesu ylọ Lẹgba dọ “ahọvi aihọn tọn” bo dọmọ: “Ewọ ma . . . tindo nude to yẹn mẹ” kavi ma sọgan yinuwado ji e. (Johanu 14:30) Na Satani ni ma yinuwado mí ji gbede blo! Na nugbo tọn, mí yọnẹn dọ “aihọn lẹpo [wẹ] mlọnai to mẹylankan [enẹ] mẹ.” (1 Johanu 5:19) Enẹ wẹ zọ́n bọ Lẹgba penugo nado ze “ahọluigba aihọn tọn lẹpo” donukọnna Jesu eyin ewọ gbẹ́ yigbe bo litaina ẹn poun—yèdọ nuyiwa atẹṣiṣi tọn he Ovi Jiwheyẹwhe tọn gbẹdai gbidigbidi. (Matiu 4:8-10) Aihọn he Satani to anadena lọ gbẹwanna hodotọ Klisti tọn lẹ. (Johanu 15:18-21) Abajọ apọsteli Johanu na mí avase ma nado yiwanna aihọn!
18 Johanu wlan dọmọ: “Mì yiwanna aihọn blo, kavi nuhe tin to aihọn mẹ. Eyin mẹde yiwanna aihọn, owanyi Otọ́ tọn ma tin to ewọ mẹ gba. Na nuhe tin to aihọn mẹ lẹpo, wantuntun agbasalan tọn, wantuntun nukun tọn, po gigovọ́ ogbẹ̀ tọn po, e ma tin to Otọ́ tọn mẹ gba, ṣigba aihọn tọn wẹ. Aihọn sọ to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.” (1 Johanu 2:15-17) Mí ma dona yiwanna aihọn, na aliho gbẹninọ etọn tọn nọ fọ́n ojlo agbasalan mape tọn daga bosọ jẹagọ mlẹnmlẹn do nujinọtedo Jehovah Jiwheyẹwhe tọn lẹ.
19 Eyin mí ka tindo owanyi na aihọn ehe to ahun mítọn mẹ lo? To whelọnu lo mì gbọ mí ni hodẹ̀ na alọgọ Jiwheyẹwhe tọn nado duto owanyi ehe po wantuntun agbasalan tọn he nọ zọnpọ hẹ ẹ lẹ po ji. (Galatianu lẹ 5:16-21) Na jide tọn, mí na dovivẹnu nado gbọṣi “madodiho [mẹ] sọn aihọn dè” eyin mí hẹn do ayiha mẹ dọ “nutogbẹ̀ gbigbọnọ lẹ,” kavi huhlọn gbigbọ ylankan tọn lẹ wẹ yin “nukọntọ [mayinukundomọ] aihọn” tọn he to anadena ogbẹ́ gbẹtọvi mawadodonọ lẹ tọn.—Jakobu 1:27; Efesunu lẹ 6:11, 12; 2 Kọlintinu lẹ 4:4.
20. Naegbọn e sọgan yin didọ dọ mí “ma yin aihọn tọn”?
20 Jesu dọ gando devi etọn lẹ go dọmọ: “Yé ma yin aihọn tọn, yèdọ dile yẹn ma yin aihọn tọn do.” (Johanu 17:16) Klistiani yiamisisadode lẹ po gbẹdohẹmẹtọ klandowiwe yetọn lẹ po nọ dovivẹnu nado gbọṣi wiweji to walọyizan-liho podọ to gbigbọ-liho, bo nọlá na aihọn ehe. (Johanu 15:19; 17:14; Jakobu 4:4) Aihọn mawadodo tọn ehe gbẹwanna mí na mí nọ nọlá na ẹn bosọ yin “yẹwhehodọtọ dodo tọn” lẹ wutu. (2 Pita 2:5) Nugbo wẹ dọ mí to gbẹnọ to ogbẹ́ gbẹtọvi de tọn ṣẹnṣẹn, he bẹ galọtọ lẹ, ayọdetọ lẹ, alọslonamẹtọ lẹ, boṣiọ-sẹ̀ntọ lẹ, ajotọ lẹ, lalonọ lẹ, po ahànnumunọ lẹ po hẹn. (1 Kọlintinu lẹ 5:9-11; 6:9-11; Osọhia 21:8) Ṣigba mí ma nọ gbọ̀ “gbigbọ aihọn tọn,” na mí ma nọ yin anadena gbọn huhlọn mẹwhinwhàn ylando tọn ehe dali.—1 Kọlintinu lẹ 2:12.
Mì Na Otẹn Lẹgba Blo
21, 22. Nawẹ hiẹ sọgan yí ayinamẹ Paulu tọn he yin kinkàndai to Efesunu lẹ 4:26, 27 mẹ zan gbọn?
21 Kakati nado yin whinwhàn gbọn “gbigbọ aihọn tọn dali,” mí nọ yin anadena gbọn gbigbọ Jiwheyẹwhe tọn dali, he nọ hẹn mí tindo jẹhẹnu lẹ taidi owanyi po mawazẹjlẹgo po. (Galatianu lẹ 5:22, 23) Jẹhẹnu ehelẹ nọ gọalọna mí nado nọavunte gligli to whenue Lẹgba to yise mítọn whlepọn. Ojlo etọn wẹ yindọ mí ni ‘fiẹ nado waylan,’ ṣigba gbigbọ Jiwheyẹwhe tọn nọ gọalọna mí nado “gbọ sọn homẹgble go, bosọ jo adánjijẹ zogbe dai.” (Psalm 37:8) Nugbo wẹ dọ, to whedelẹnu mí sọgan gblehomẹ po whẹjijọ po, ṣigba Paulu na mí ayinamẹ dọmọ: “Eyin mì gblehomẹ, mì waylando blo; mì sọ dike owhè biọ do homẹgble mìtọn ji blo: mì na otẹn Lẹgba blo.”—Efesunu lẹ 4:26, 27.
22 Adi mítọn sọgan dekọtọn do ylando mẹ eyin mí gbọṣi homẹgble mẹ. Eyin mí jo ayiha mítọn do ninọmẹ ehe mẹ, mí na na otẹn Lẹgba nado hẹn gbemanọpọ wá agun lọ mẹ kavi nado hẹn mí tindo mahẹ to ylanwiwa mẹ. Nuhe zọ́n niyẹn bọ mí dona nọ yawu didẹ wiwọ́ he mí tindo hẹ mẹdevo lẹ to aliho he Jiwheyẹwhe kẹalọyi mẹ. (Levitiku 19:17, 18; Matiu 5:23, 24; 18:15, 16) Enẹwutu, mì gbọ mí ni nọ yin anadena gbọn gbigbọ Jiwheyẹwhe tọn dali, bo nọ yí mawazẹjlẹgo zan bo masọ dike homẹgble he tlẹ yin whẹsuna de ni dekọtọn do adi, kanyinylan, po wangbẹna po mẹ gbede blo.
23. Kanbiọ tẹlẹ wẹ mí na gbadopọnna to hosọ he bọdego mẹ?
23 Mí ko dọhodo jijọ Lẹgba tọn he mí ma dona tindo delẹ ji. Ṣigba mẹhe hia hosọ ehe delẹ sọgan kanse dọ: Be mí dona dibuna Satani wẹ? Naegbọn e nọ fọ́n homẹkẹn dote sọta Klistiani lẹ? Podọ nawẹ mí sọgan wagbọn bọ alọ Lẹgba tọn ma na jẹ mí go?
[Nudọnamẹ Odò Tọn]
a Pọ́n hosọ debọdo-dego lọ “Be Lẹgba Tin Nugbo Ya?” to Atọ̀họ̀-Nuhihọ́ Lọ Tọn 15 novembre 2005 mẹ.
Etẹwẹ Yin Gblọndo Towe?
• Naegbọn mí ma dona hẹn mẹdevo gble gbede?
• To kọndopọ mẹ hẹ 1 Johanu 3:15, nawẹ mí sọgan dapana hlọnhutọ-yinyin gbọn?
• Nukun tẹwẹ mí dona nọ yí do pọ́n atẹṣitọ lẹ, podọ etẹwutu?
• Naegbọn mí ma dona yiwanna aihọn?
[Yẹdide to weda 23]
Mí ma na na otẹn Lẹgba nado hẹn pọninọ Klistiani tọn mítọn gble gbede
[Yẹdide to weda 24]
Naegbọn Johanu dotuhomẹna mí ma nado yiwanna aihọn?